天下茶居 @ 紅磡 ( 31-JAN-2025 年初三 )

新特盛拚盤 ($78) - 有味付螺肉 + 煎野菜豚肉餃子 +吉列池魚拚吉列炸蝦 + 咖哩飯 (小)   都幾好味呀   同埋份量都唔少   無諗過咖哩飯咁大碗   Share 食完都好飽下

生薑燒豚肉丼 ($55) - 叫里奧大人試塊豚肉再食多少少飯   我就真係食唔落喇   所以最後都係要打包

香桃綠茶 (+$2) / 牛乳抹茶 (+$2)

( 31-JAN-2025  FRI )

今朝瞓到 10 點先起身   梳洗之後就去食早餐喇 ~

里奧大人通常等埋我影完相先食   佢知我鍾意影全家福嘛   但好在今朝我話唔等咋   因為腸仔煎蛋等咗好耐呢

食完都番屋企   里奧大人話去佐敦行下   之後話去權發買兩餸飯   我話無咩想行喎   同埋唔會為咗食兩餸飯而行佐敦囉   哈哈 ~

睇下 Youtube   好快又到 2 點半   唔係好餓但想食嘢   所以叫里奧大人買麵包喇 ~

難得放假喺屋企   我話想睇 "唐人街神探" 呀 ~

差唔多 5 點出去   原來落好細嘅毛毛雨   不過都可以唔駛開遮嘅 ~

唔係咁餓就周圍睇下有咩食   突然好想食咖哩   所以去天下茶居喇 ~

里奧大人話落單嘅時候見到假日茶餐   我話梗係食下午茶啦   因為我唔係咁餓呀 ~

落完兩個餐就已經 5 點 59 分   時間啱啱好   哈哈 ~

仍然落毛毛雨   所以都唔行 AEON 喇   直接番屋企算喇 ~

開埋機洗衫就沖涼休息   同里奧大人一齊睇 "富貴千團"   真係無諗過呢套劇集係好睇   可能演員顏值比較高呀   哈哈 ~

睇完又睇下 Youtube 再打多陣機   今晚 10 點半都瞓 lu ~

打邊爐 @ 姑奶屋企 (大埔) ( 30-JAN-2025 年初二 )

佢哋話買咗振興牛肉丸   1 粒要 $5 咁上下   咁都好貴喎

魚皮餃同墨魚丸等等   仲有脆肉鯇用雞件

打邊爐真係有牛肉先有 Feel   哈哈

蝦   其實仲有牛骨髓 + 鵝腸 + 菜心 + 菠菜苗   因為掛住傾偈   所以無去影

零添加有骨炸魚皮 ($56) - 呢個超級好味呀   好脆同埋最緊要唔油

工人炸嘅春卷   佢煮嘢又係好味道

問有無人食蜆   個個話食   之後掛住傾偈   直頭唔記得食添呀

工人包嘅水餃

工人整嘅西米露   我一向對西米露無興趣   但工人整到超級超級好食呀   我食咗 2 杯添呀

士多啤梨就無食喇

車厘子都甜   尋日喺婆婆屋企食車厘子又係好甜   家姐同大食表妹又係一食就話好甜   不過我食到有啲驚   唔係都想買嚟補補血

( 30-JAN-2025  THU )

今朝瞓到 10 點   梳洗完就去食早餐喇 ~

食完番屋企抖下   之後又做下小清潔   做完又抖下   咁都唔錯   假期唔係咁想太過體力勞動   哈哈 ~

差唔多 1 點半就預備午餐   所以 2 點幾先食得呀 ~ 

金沙骨醃咗幾晚   真係唔食唔得囉   好在今日可以煮埋   唔係就會掉㗎喇

抖陣就沖涼洗頭   差唔多 4 點就出發去大埔 ~

行大埔超級城   行到 5 點幾   我話唔行喇   行去搭小巴去姑奶屋企食團年飯好過呢 ~

我已經有 Power Bank   唔係真係好想買囉

去到接近 6 點半   傾多陣偈就開始食喇   今日有 35 個人出席呀   所以兩枱都擺滿係食物   睇見都開心   哈哈 ~

我一去到   兒生女即刻拎個袋比我   好開心呀   因為我都買呢啲款式嘅袋

食下傾下   兒生女老公話喺大陸有間食店好靚   之後話食一個菜式要 2 個鐘   兒生女即話食 5 個菜咪 10 個鐘 ?!   我覺得佢呢句好好笑   哈哈 ~

我一路食生果一路傾偈   之後里奧大人話走喇   原來已經 9 點鐘 ~

番到屋企都差唔多 10 點 45 分   要拿拿聲沖涼喇 ~

睇下 Youtube   今晚 12 點幾先瞓 ~

KFC 炸雞滋味盒 (外賣) ( 29-JAN-2025 年初一 )

炸雞滋味盒 X 2 - 香辣脆雞 X 4 / 粟米杯 X 2 / 辣汁蘑菇香飯 X 2 / 葡撻 X 2  / 百事可樂 X 2

( 29-JAN-2025  WED 年初一 )

今朝 7 點 45 分起身   始終今日係年初一   所以尋日問定邊啲餐廳開呀   大家樂都比平時開遲一個鐘   不過對我哋無影響   哈哈 ~

我見到塊牛扒咁細   真係呆咗   我同里奧大人話要同經理講下先   不過如果無經理喺度就算喇   咁啱行出去就見到個經理   我同佢講話塊牛扒咁細塊嘅   同塊午餐肉差唔多 Size   佢話係薄牛扒   我話我明白   但都唔係咁細塊嘛   之後經理話叫廚房比多塊比我

依家兩塊嘅 Size 即係以前嘅 1 塊   如果係超值餐真係唔會有要求   但依家 $39 就唔好咁細嘅份量囉

 

我番埋位嘅時候   里奧大人話無諗過我會夠膽講   我話離譜嘛   同埋我又唔係同佢鬧交   我哋對話嘅時候都好溫柔㗎   只係真係覺得咁價錢咁份量係離譜囉   之後里奧大人話以為牛扒餐係 $28   我話 $28 就唔會講啦 ~

食完早餐就去里奧大人公司幫手   之後我番崇拜   但崇拜未完都要走喇   因為約咗家姐同表妹們 11 點半喺婆婆屋企附近食早啲嘢   食完先上去婆婆屋企拜年 ~

諗住打比剪髮表妹喺邊   原來佢同大食表妹都到咗婆婆屋企附近   咁我哋睇下邊間食店有開   但得 2 間開咋   所以我話去九龍冰室啦   之後剪髮表妹話係九號冰室呀細表   哈哈哈哈 ~

之後家姐 細表妹同個女都到埋   咁叫嘢食 lu ~

剪髮表妹食蔥油雞扒飯   見到咁多蔥油真係好吸引

大食嘅鮑魚豬扒麵餐   佢依家要減肥   所以食嘢有節制   佢本身好似食米粉餐   但見到鮑魚豬扒麵又想食   我話食啦   又唔係成日食   同埋食咗呢餐   妳呢兩日要食番清啲就可以

大食主動話比半個奶油豬比家姐   比着以前一定唔會㗎   食對佢嚟講係非常重要嘛   哈哈

家姐食沙爹牛肉麵餐 (+$6 辛辣麵) - 我食兩啖就可以   因為細表妹唔食炒蛋   我要幫手食   咁叫錯杯華田   我又要幫手飲   我其實都可以叫做食咗一個餐   哈哈

食完即去婆婆屋企拜年喇   今餐係大食比錢呀   真係估唔到呢   之後家姐話佢同事個女學鋼琴一個鐘要 $1,000   所以係咁話大食賺好多錢   哈哈 ~

里奧大人 12 點 45 分放工   叫佢食埋午餐先嚟拜年呢 ~

最鍾意見到全盒   兒時回憶

婆婆屋企一定有大量金莎朱古力   枱面仲有幾盒金莎同雪莎添呀

細細表妹送比剪髮表妹嘅禮物

剪髮表妹買比細表妹個女嘅盲盒   佢哋又係鍾意水怪呀

里奧大人嚟咗無耐就到大舅父 舅母   之後到大眼表妹一家嚟埋   當堂熱鬧哂呀 ~

講開大食減緊肥   其實節食係最緊要   舅父話讚成少食多餐   但一日食 10 餐就死啦   哈哈   佢成日都要話鬼大食呀 ~

大眼表妹仲搞笑   講咗 168 做 16   里奧大人話佢都啱咗 2/3   大眼表妹成日都講錯嘢   好搞笑 ~

之後又講開教會   大眼表妹話舅母喺屋企 Whatsapp 群組講牧師生日快樂   舅父話牧師唔係神   感受唔到妳祝福   之後里奧大人話如果有人覆妳先驚呀   哈哈   所以太多群組又係好易 Send 錯嘢   我都衰過幾次 ~

舅母話依家要飲蛋白粉增肌   我話其實對 Supplement 幾抗拒   但到某個年齡又一定要食呢啲   我依家都有食目清素啦   食咗唔覺好   但唔食就知道食咗真係好   哈哈 ~

細表妹買咗盤年花只係 $600   佢上年買嘅 $900 又係好靚   之後剪髮表妹話 $600 用嚟買玩具好過   我哋話無經濟負擔真係好囉   佢仲要成間房都係玩具   講緊啲玩具唔係平仲要大大件 ~

剪髮表妹買咗呢隻 Rolex 要 8 萬幾   之後我哋個個要拎嚟戴   佢就最怕係我戴啦   因為啪唔到嘛   我話格硬啪都唔爛先係真嘢嘛   哈哈哈哈

同家姐 細表妹坐到 4 點都走喇   之後同里奧大人行陣 AEON   最後去埋 KFC 買晚餐就番屋企 lu ~

番到屋企即沖涼   乾乾淨淨開餐真係好鬼爽呢 ~   

6 點唔夠就開餐   今晚到我有啲餓   因為中午食咗好少嘢咋 ~

估唔到家姐比熊貓利是封   我覺得好得意呀   車銀優利是封就係我嘅生日大利是

剪髮表妹送比我嘅新年禮物   佢記得我話鍾意食呀   送比家姐係 ROYCE 朱古力薯片   佢真係好有心

好想食雪糕   所以喺 CHATERAISE 買包迷你朱古力甜筒 ($32)

家姐比我嘅新年食品

我本身話要咁多㗎咋

喺婆婆屋企拎咗 2 條金莎   佢叫我哋拎哂成盒呀   不過我哋真係食唔到咁多囉   之後我喺管理處又拎咗啲果汁糖   好在拎咗第一轉咋   之後係萬樂珠   呢啲就唔吸引喇   呵呵

食完就開機洗衫   里奧大人就熨衫 ~

叫里奧大人揀套笑片   佢揀咗 "你好, 李煥英"   其實我之前成日見呢套戲嘅名㗎喇   所以都想睇下 ~

無諗過結局係要喊囉   之後同里奧大人講話點搞呀   又話笑片嚟嘅   哈哈 ~

睇完都 10 點半   我話要瞓覺喇   今日頻頻樸樸有啲攰呀 ~

金玉滿堂蘿蔔糕 ( 28-JAN-2025 )

( 28-JAN-2025  TUE )

起身前係咁發夢   咁我同家姐一齊行去搭巴士  沿途有好多係幾個月嘅貓仔   我覺得佢哋好可憐   咁我一路行   有隻狗仔一路拖住我隻腳   之後去到巴士站   我喺度爆喊   因為我要上車呀   我同家姐講話如果下次佢再係有狗仔咁跟住行   我一定要拎佢番屋企養 ~

另一個夢係我自己拎行李去寄番香港   本身夜晚 10 點就到   但職員話每次都會遲 2 個鐘先到   我心諗肯定比里奧大人話啦   咁我搞掂去搭電梯去 11 樓   但部電梯得 4 樓同 9 樓有制喎   我去 11 樓要扭個轉盤先去到   咁到咗 11 樓仲恐怖   其中有部係空門   有個男人入咗去呀   之後跌咗落下一層嘅平地   好在無事咋 ~

之後鬧鐘響都唔想起身   因為個人仲好驚咁呀 ~

早餐食芝士麻糬波波球 + 朱古力麻糬波波球 + 金不文芝士迷你酥   因為今日起碼要 1 點 45 分先食   都係食飽啲好呢 ~

菇場唔忙   又做下自己嘢咁啦 ~

今日放 1 點   所以同里奧大人一齊搭 116 去銅鑼灣喇 ~

里奧大人話想去南記食米線   咁無問題啦   之後由佢帶路   但我話佢行錯方向咁嘅   佢話記得有條橋   但我話真係唔係呢個方向咁喎   之後去到唔見到南記   佢話執咗   但我都覺得唔係呢個方向囉   咁我話周圍行下睇有咩食   到我哋正想行上橋方向嘅時候   比我見到南記嘅 Logo   里奧大人又話我認地方真係靠個鼻喎   黐鬼線   哈哈 ~

我咪話佢囉   成日只望一個方向   要好似我咁周圍望先得家囉 ~

南記都要等陣位呀   之後里奧大人個樣好驚訝話啲人行年宵呀   我話唔係依家先知呀嘛 ~

雙拚小窩套餐 (春卷 + 魚皮餃 + 生菜 + 細豆漿) - 我唔知個套餐原來有生菜   咁又好喎

辣豬肉小窩米線 - 我只想食一個餸   所以將春卷比里奧大人食   佢就變咗兩個餸啦   大家開心   哈哈

食完去營多買 ABC 豉油   之後就行 Sogo   點知里奧大人又行錯方向   我話今日兩次都行錯方向喎   好在我記得點行咋 ~

2 點半開始行   我覺得今年無咩氣氛咁   同埋無咩嘢睇   加上又熱   所以只行乾貨咋 ~

@ 維園年宵花市

今日好好天   所以超級熱呀

我都幾鍾意呢啲鐵皮裝飾品

平過韓國   我拎咗 1 對睇係 Made in Korea   可惜我太多襪   唔係一定買呀

EMOJI 都得意

熊貓積木

里奧大人無啦啦話忍無可忍喇   以為咩事啦   原來話要除咗件外套   哈哈   我其實一入年宵市場已經除外套啦

魔法魚蛋檔

可以施魔法嘅糖蔥餅 ($20/件)

呢檔嘅懷舊糖蔥餅 ($20/2 件)

齋燒鵝都抵嘅

買咗 2 件糖蔥餅

衰貪心買 2 件   雖然好味道   但始終都係甜嘢   所以食完之後好鬼滯呀

Briefing

走人

食埋糖蔥餅就走喇   原來只行咗半個鐘   呵呵 ~

里奧大人話去 "呃大"   佢以為我想出街行   但我話番屋企都可以   出咗汗好攰呀 ~

去到巴士站要等 3 分鐘   咁當然無問題啦   最感恩係到昤士站見到另一架巴士都會經過屋企   仲要平啲喎   所以即搭啦 ~

咁阿妹啱啱放工   諗住同佢食下午茶   不過佢話差唔多番到屋企   咁唔去 lu ~

番到屋企即開機洗衫   里奧大人就熨衫   咁今晚大家就可以 Relax 喇 ~

ABC Kecap Pedas (Hot Soy Sauce) ($15/2 支) / KARANGASRI 辣花生糕 ($15)

里奧大人熨完衫就沖涼瞓陣覺   我就睇下 Youtube   差唔多 6 點就預備煎糕喇   本來我話蒸嘅   因為姑奶擺過落冰格   之後里奧大人話等佢煎   唔得先再蒸   咁即係想食煎啦   我話仲諗住收咗爐   點知今晚咁快就要開爐   哈哈 ~

元朗榮華嘅金玉滿堂蘿蔔糕

用呢隻鑊煎糕真係非常之好   因為唔黐底   所以可以好有心機煎   哈哈

其實啲糕唔實淨   所以煎到兩邊都脆已經好好㗎喇

是日晚餐 - 金玉滿堂蘿蔔糕

金玉滿堂蘿蔔糕 - 里奧大人一起身就話聞到好香   雖然今次真係煎到好香脆   但啲糕真係好鬼難食啦   食麵粉咁   最慘係無料   因為水姑同姑奶話好好食   所以特登買比我哋   咁唔要唔得啦   我食剩一半呀   里奧大人見到就笑住話係咪好難食 ?!   我話絕對係   之後佢又再話食完大媽整嘅糕   真係無得比   哈哈 ~

洗埋碗就做小清潔   之後沖涼休息喇 ~

同里奧大人一齊睇 "富貴千團"   睇完再睇陣 Youtube   今晚都係 10 點半瞓覺 lu ~