乾炒叉燒河粉 + 迷你福建飯 (外賣) ( 30-JUN-2025 )

( 30-JUN-2025  MON )

感恩一覺瞓天光呀   不過個人仍然唔多舒服咁 ~

早餐食合桃芝士包   好在覺得好味道咋   哈哈 ~

菇場忙呀   但成日好多胃氣   搞到個人有啲辛苦   做嘢都慢啲呀 ~

Lunch Time 出去行陣   突然好想食司華力腸   所以去 7-11 買常餐喇 ~

轉咗沙嗲魚蛋   但都係咖哩魚蛋好食啲

仍然忙呀   仲忙到放工   真係開心呀 ~

放工即走   船頭話尋晚落好大雨   佢老公諗住跑步   之後佢話反正都濕   落去跑囉   佢老公話彩佢都傻   我話佢病咗妳都要照顧佢啦   佢話最多咪煮白粥   你估細佬仔咩   下下要拖住佢隻手照顧佢呀 ?!   我話妳可以嘅   之後大家分開走   佢好大聲笑住叫我收聲啦   哈哈 ~

諗住買 BB 鴨   點知轉咗芝麻雞   我又唔係咁想食   所以叫里奧大人去買晚餐番屋企喇 ~

想買雪糕比里奧大人食   咁喺 CHATERAISE 買迷你朱古力甜筒啦   依家加到 $40 喇   我記得之前好似係 $32 咋

今晚沖埋涼先開餐   真係勁爽呀 ~

食完就開機洗衫   抖陣再熨 2 機衫   今晚想郁下呀 ~

搞掂就同里奧大人睇 "弱美男英雄"   連續睇咗 4 集   睇到 12 點先瞓 ~

豚肉生薑燒 (外賣) ( 29-JUN-2025 )

( 29-JUN-2025  SUN )

今朝 7 點起身   梳洗完就出發去家姐屋企   里奧大人話估唔到今朝都去家姐屋企   因為尋晚已經去咗   我話姐夫去咗旅行   我咪陪佢囉   哈哈 ~

咁我問家姐邊度等 ?!   佢答我屋企等   之後諗住上佢屋企   佢就打嚟話去邊度等   好在佢打得早   唔係我要周圍滕喇 ~

我問家姐做咩頭先話屋企等 ?!   佢話以為我問佢喺邊喎   我話奇怪無啦啦做咩要去妳屋企   仲以為想我同埋 Berry 一齊行完街先食早餐呀 ~

同家姐去茶木食早餐   難得無咩人   咁就入去食喇   其實家姐尋晚同之前都成日話去茶木   所以點都要去啦   好記得之前成日講咗好多次話想食日式燒肉飯   食完之後就無再提喇   真係唔食唔心息咁㗎 ~

三杯沙茶牛肉湯米粉 (配腸仔+太陽蛋配刈包 ($48)

加配香脆長魚柳 (+$12) - 本身想叫魚柳餐   但其實我又食唔哂成個餐   家姐話有加配魚柳呀   所以即加喇

凍台式珍珠奶茶 (+$3) - 家姐話有啲胚芽味道   珍珠都煙韌但好少   哈哈

食完去 360 買檸檬汁   之後番屋企 lu ~

家姐工人好奇怪我今朝都嚟呀   確實係好少有嘅 ~

Berry 就一定撲我先㗎喇   狗仔真係好得意   每次番屋企一定撲人   即係如果入屋 3 次佢就撲 3 次   如果里奧大人入屋 3 次   我都唔會攬佢 3 次嘛   養狗其實係開心嘅   所以都唔明點解啲人要棄狗同打狗   真係好無人性囉 ~

好乖女喎     

佢想走但唔比佢走   所以就咁嘅樣喇

家姐話唔舒服飲咗會好啲喎   但真係超級超級苦   呢隻藥粉之前喺日本大賣   因為疫情期間個個當寶㗎   

我哋無無聊聊戴工人同佢朋友副眼鏡   不過戴深色同淺色真係有分別   但工人戴咩色都靚女喎   可能佢對眼靚呀   之後佢哋又戴家姐副眼鏡   佢哋話好暈呀   鬼咩   幾百幾度近視呀   哈哈 ~

家姐有個新袋唔想用   所以送咗個袋比工人   之後我哋話好睇   工人話家姐拎咩袋都唔好睇呀   衰得佢吖 ~

同家姐傾開鬼故   家姐話最恐怖係見到隻窗有好多頭髮喺出面   但佢話唔記得係夢定係真呀   不過佢都試過間房成日熄燈   但家姐瞓覺就無啦啦開燈   我覺得呢個好恐怖呀   哈哈 ~

傾呢樣嗰樣又到 1 點   係時候要走喇   所以佢同 Berry 送我搭車喇 ~

里奧大人又未放工   咁我去惠康買奶茶   感恩做特價 $44/2 Pack 呀   咁買 4 Pack 仲有 77 折   本身諗住原價 $28/Pack   依家特價真係平好多㗎 ~

買完打比里奧大人   佢話可以放工   咁約佢喺大家樂等喇 ~

點知里奧大人差唔多 15 分鐘後先到   我又趕住同家姐交收   所以我唔食喇   佢就改為買外賣番屋企食呢 ~

同家姐交收完就番屋企   我食咗少少炸肶就再食藥   之後同里奧大人睇 "旅行最緊要近"   農夫真係好搞笑   所以即刻喺 Youtube 睇番之前幾集呀 ~

睇到 5 點左右   里奧大人就瞓一陣   我就睇其他嘢喇 ~

差唔多 8 點先叫里奧大人買晚餐番屋企食   今日狀態唔好   都唔係咁想煮呢 ~

食完抖陣就沖涼   同里奧大人一齊睇 "弱美男英雄"   最正係得 8 集   同埋每集 45 分鐘   咁唔駛追咁耐   哈哈 ~

不過今晚只睇咗 2 集   因為我 10 點 45 分都要瞓覺 lu ~

TOKENYO 韓式烤肉料理 @ 將軍澳 ( 28-JUN-2025 )

粟米芝士炸雞 ($98 帶骨) - 味道好一般

海鮮香蔥煎餅 ($58) - 煎得唔夠香脆

香芒百香果籽氣泡水 ($28) - 呢杯好飲呀   好在叫 1 杯先咋   我飲咗幾啖都好脹胃呢

可以夾 2 次公仔

( 28-JUN-2025  SAT )

尋晚瞓得都唔錯   不過好多時都係 7 點唔夠就醒醒哋咁   但真係唔想咁早起身囉 ~

沖埋涼就去買麵包喇   今朝早餐食碎蛋豬柳包   唔知係咪唔餓   所以覺得食完好滯   哈哈 ~

星期六唔會咁早番菇場   唔想又坐大堂等開門呀 ~

菇場唔忙   咁上網睇下嘢又傾下偈   啲時間都好快過嘅 ~

放工去買龜苓膏比家姐   之後買埋午餐就去里奧大人公司一齊食 lu ~

食完要去 LA 活動嘅司儀綵排   3 點半搞掂   我即刻去家姐屋企喇 ~

我一入屋   Berry 怪叫又大力撲我嘛   工人朋友即刻話 Berry 真係好鍾意新媽咪太太   之後工人又再話 Berry 唔會咁撲太太㗎   所以 Berry 真係好鍾意新媽咪太太   我話因為唔係成日見到我嘛   Berry 知道邊個係主人㗎   落街唔會跟住我呢 ~

打喊露

係咁 "攣" 我   所以成條裙都係佢啲毛

之後唔會理我囉   所以我成日同工人講   唔好再話 Berry 好鍾意我喇   哈哈

頭先食完嘢好熱   咁入到冷氣房又吹住條頸   之後覺得唔係咁舒服添   諗住飲益力多酸酸哋好啲   點知飲完仲反胃   哈哈 ~

好在瞓咗一陣又好似好啲   不過仍然有啲反胃 ~

挨住我瞓呀   但可惜我要走啦

家姐 7 點鬆啲到餐廳   但我其實唔餓   所以話唔食烤肉   同埋唔想同家姐講話唔係咁舒服囉 ~

一坐低就比麵包比我   因為佢今日經過地鐵站   特登買比我呢 ~

FRESH FRESH BAKERY 合桃芝士包

個人有啲不在狀態   好在家姐多嘢講咋   哈哈 ~

食到 8 點幾   之後行一陣就走喇   估唔到見到工人同 Berry 去街   工人話 4 個人帶住 1 隻狗行街好搞笑   我話係誇張啦   唔知以為 Berry 女好惡呀   哈哈 ~

番到屋企見到里奧大人食完麥當勞晚餐   好在無留薯條比我食咋   但佢買咗 4 個芋頭批   不過我唔係咁舒服   唔想食呢 ~

同里奧大人一齊睇 The Equalizer (叛諜裁判)   估唔到幾好睇喎   因為之前錄嘅   每 10 分鐘就有廣告   怪唔得做兩個半鐘啦   哈哈   不過我睇到 11 點都瞓喇   留番下半 Part 聽晚再睇 ~

午餐肉 + 福花 ( 27-JUN-2025 )

( 27-JUN-2025  FRI )

感恩一覺瞓天光呀   臨起身前個夢係里奧大人公司有慈善薑糖義賣   每粒 $10   試完就買咗 $50   之後同媽咪 家姐 里奧大人同一班教友一齊食自助餐   係總共有 5 張枱   由第 1 張開始去拎嘢食先嘅   我哋係第 2 張   我記得有蝦餃   因為家姐話我無幫里奧大人拎蝦餃   之後鬧鐘響 lu ~

早餐食丹麥條+甜餐包+尋晚剩嘅牛油多士   食到有啲驚   哈哈 ~

菇場忙咗陣   搞掂就做自己嘢喇 ~

阿花比啲筍嘢我呀   所以請佢請包朱古力喇

Lunch Time 蒸完飯就出去行下   忍唔住買咗半份燒賣 + 1 隻粉果   因為好想食呀 ~

今日食福花+芋絲+少少雞肉   已經加咗麻辣醬   但其實都唔係咁想食   哈哈

唔忙就繼續做自己嘢   又睇下討論區   其實都學到好多嘢㗎 ~

放工即走   今晚煮麵   所以要等埋里奧大人番到屋企先煮   好在佢 6 點半番到屋企咋 ~

是日晚餐 - 午餐肉 + 福花

午餐肉 - 呢啲罐頭儲備一定要有   同埋我只係焗熱   夠哂方便呢 ~

福花 - 雖然都鍾意食   但食埋呢餐要停一停喇 ~

洗埋碗就做小清潔   之後沖涼休息喇 ~

睇下 Youtube   今晚 10 點 50 分先瞓覺 ~

迷你福建飯 + 鮑片通粉餐 (外賣) ( 26-JUN-2025 )

( 26-JUN-2025  THU )

感恩瞓得都唔錯   不過里奧大人今朝仍然有少少肚屙   所以叫佢喺屋企休息喇 ~

早餐食半條丹麥條   呢個份量啱啱好 ~

菇場唔忙   可以抖下 ~

Lunch Time 出去行陣再去食水餃米   我之前同里奧大人講話間唔中出去食都唔錯   佢話唔覺喎   因為覺得帶飯真係好方便   唔想成日諗食咩呢 ~

估唔到好忙呀   差唔多 4 點先搞掂 ~

放工即走   買埋晚餐就番屋企喇 ~

食完抖陣就開機洗衫   沖埋涼就熨衫 ~

里奧大人話睇埋 "我是遺物整理師"   我覺得套劇真係笑中有淚   我睇 2 次都有喊呢 ~

睇完要睇 Bao Family 笑下呀   所以 10 點 45 分先瞓覺 ~

福花 + 芋絲 ( 25-JUN-2025 )

( 25-JUN-2025  WED )

尋晚里奧大人肚屙咗幾次   加上佢臨瞓前話有啲發冷又令我好擔心   搞到我瞓得好差   今朝起身直頭有啲暈咁呀   所以即刻同西瓜講話今日 A/L 呀 ~

里奧大人話尋晚屙咗幾次搞到我瞓得唔好   叫我請假   我話已經請咗喇 ~

瞓到 9 點半都起身   早餐食雞尾包   呢排無啦啦又好想食咁 ~

食完睇 Youtube 啦   里奧大人 11 點半起身   叫佢食埋個包就要食藥喇 ~

我唔記得里奧大人食邊粒藥丸   但食完好快就眼瞓   所以佢食咗藥再睇陣 Youtube 又要瞓覺了 ~

雖然放假   但今日都好攰   所以都的唔起心肝做家務呀 ~

差唔多 3 點食午餐   食番尋日里奧大人嘅午餐   之後里奧大人 3 點半起身   佢話食焗豬扒飯   仲諗住自己出去買   我話梗係我買啦 ~

其實我話焗豬扒飯好油咁    不過里奧大人人話唔油喎   咁難得佢想食就買啦   唔係一陣我買其他嘢又唔食   真係搵我自己嚟搞咯 ~

食剩一半就番今晚再食

睇 Youtube 啲時間都好快過   好快又到 7 點   咁我都預備晚餐 lu ~

今晚只係食福花 + 芋絲   我覺得食芋絲好似仲飽過食飯咁   可能我食哂成包呀 ~

洗埋碗諗住沖涼   點知里奧大人啱啱起身   咁我焗熱啲豬扒飯比佢食   搞掂就沖涼喇 ~

同里奧大人一齊睇 Youtube   睇到 10 點 45 分都瞓覺 lu ~

煎釀三寶 + 魚肉燒賣 + 雪菜肉絲火腿公仔麵 (外賣) ( 24-JUN-2025 )

( 24-JUN-2025  TUE )

感恩一覺瞓天光呀   咁樣反而條腰就無咁痛   次次都係咁㗎 ~

早餐食宇治抹茶紅豆包   今次要搽花生醬同芝麻醬喇 ~

菇場唔忙呀   一開 Email 即收到個震撼嘅消息   實在太開心啦   即刻同里奧大人講呀   估唔到佢話估到會係咁呢   開心開心 ~

Lunch Time 蒸完飯就出去行陣   今日行咗半個鐘又無咩點流汗喎   實在太好喇 ~

阿花送咗手信比我   所以我又買番啲零食比佢呢

唔忙就做自己嘢   之後里奧大人話作嘔佢悶咁   番咗屋企休息 ~

放工即走   諗住番屋企   但里奧大人話去九龍灣睇醫生   咁我都過去陪佢喇 ~

醫生話感冒菌入腸呀   里奧大人話可能尋日喺 CH 冷親呢 ~

睇完醫生即搭車番屋企   叫里奧大人番屋企沖涼先   我就買晚餐比佢食喇 ~

食完抖陣就開機洗衫   之後就沖涼   抖多陣就熨衫   雖然今晚唔駛煮   但可能滕嚟滕去又擔心   所以覺得好攰咁 ~

睇陣 Youtube   今晚 10 點 20 分都瞓覺 lu ~

豉汁鮮淮山蒸排骨 + 芥蘭苗 ( 23-JUN-2025 )

( 23-JUN-2025  MON )

感恩一覺瞓天光呀   正想醒嘅時候就啱啱鬧鐘響 ~

早餐食宇治抹茶紅豆包   口感好鬼乾呀 ~

西瓜喺公司群組發放訊息話未來一兩小時本港或受雨區影響   我即刻望下個天   之後諗住著明燈同搭另一架巴士   但其實資料係朝早 5   咁我出門口都 8 點幾   即係唔會無啦啦大雨啦 ~

菇場忙咗陣就做 Email Filing   好快就到 11 點 45 分呢 ~

Lunch Time 出去銀行入數   搞掂就行陣   買埋牛雜河就番菇場喇 ~

諗住 Hea 過   點知有 Urgent 嘢要做   一做就做到 4 點幾呀   真係眼都濛埋   次次太集中對數字就會咁呢 ~

放工即走   番到屋企都即預備晚餐 lu ~

是日晚餐 - 豉汁鮮淮山蒸排骨 + 芥蘭苗 

豉汁鮮淮山蒸排骨 - 排骨真係來來去去都係豉汁蒸或者梅菜蒸   不過都係我懶無搵其他食譜啫   哈哈 ~

芥蘭苗 - 好耐無食喇   又買嚟食下呢 ~

洗埋碗就沖涼休息   今晚有啲攰呀 ~

睇下 Bao Family   差唔多 10 點 45 分先瞓覺 ~

五香肉丁出前一丁 ( 22-JUN-2025 )

( 22-JUN-2025  SUN )

尋晚瞓得唔係咁好呀   因為成晚仲係興奮狀態咁   哈哈 ~

今朝同里奧大人食早餐   之後要去佢公司幫手喇 ~

搞掂就即番崇拜   崇拜完畢再要去佢公司搞啲嘢   差唔多 11 點就搞掂哂 ~

里奧大人今日 Lunch Meeting   咁我有好多時間喇   所以去成興隆買急凍排骨粒   之後買埋麵包同午餐   最後買埋榴槤就番屋企喇 ~

落完雨出太陽真係最攞命   番到屋企真係即開大冷氣抖下先食午餐呀 ~

個膠袋太闊   所以裝 1 個飯盒就會歪哂   咁我等車嘅時候就整番平去啦   點知仲衰   仲衰個頭先   個飯盒直頭打直添呀   所以成盒飯好似打風咁囉   我只係食脆卜卜嘅生炒骨   蘿蔔牛腩就留比里奧大人聽日做午餐

特登去買金枕頭比里奧大人食㗎   呢盒要 $128   好似得 6 嚿咋

食完好滯呀   頭先又出咗汗好眼瞓   所以睇睇下 Youtube 都瞓着咗 ~

里奧大人 4 點開完會   之後同佢出去搞啲嘢   感恩詔程順利   好快搞掂 ~

番到屋企又抖下   因為諗住出街食飯   里奧大人就瞓到 6 點就醒咗喇   佢話想去食刀削麵   不過個天色麻麻哋   同埋我話佢今日做到咁晏都好攰   想佢抖下好過   所以我話煮丁丁啦 ~

是日晚餐 - 五香肉丁出前一丁

五香肉丁出前一丁 - 里奧大人至愛   雖然好易煮但無咩益   所以我攰又想煮嘅話   煮丁丁就最好   大家開心嘛   哈哈   我會蒸熱啲五香肉丁   我接受唔到要凍冰冰咁食   出面食就話無得揀啫 ~

食完諗住抖下先洗碗   之後奧大人話幫我洗碗呀   佢驚我好攰   因為佢本身已經叫我唔好煮呢 ~

開埋機洗衫就沖涼   里奧大人就熨衫 ~

等佢搞掂就一齊食榴槤   食完先睇 "我是遺物整理師"   因為我驚有血腥畫面呀 ~

最鍾意 1 集係 45-50 分鐘   咁樣節奏會快好多嘛   今晚睇到11 點 10 分先瞓覺 ~

Add Some Thai Restaurant @ 官塘 ( 21-JUN-2025 )

A.S.T 小食拚盤 ($178) - 唔想諗咁多   所以食拚盤喇

泰式雜菌金邊粉 ($88) - 阿 Man 話食飯或者食金邊粉   我揀金邊粉   因為我唔想食飯呀

西貢少女 ($46) - 我見到係百香果+薄荷葉+檸檬就叫嚟飲   但唔明呢幾樣同少女有咩關係   哈哈

泰。生椰拿鐵 ($45) - 阿 Man 好鍾意飲咖啡   其實之前諗住飲杯唔知咩咖啡   要等半個鐘嘅   之後職員有話無唔知咩   所以轉拿鐵喇

( 21-JUN-2025  SAT )

尋晚半夜去完廁所都好快瞓得番   臨醒之前個夢係見到好多人食灰燼呀   係一湯匙一湯匙咁食   但佢哋係人嚟㗎   再望個場景係好濛   因為啲灰燼飛到周圍都係   我嗰下係覺得好唔舒服咁呢 ~

我同里奧大人講番呢個夢   佢話就嚟 7 月 14 呀   呢下好笑呀   咁都聯想到 ~

今朝出去食早餐   星期六可以慢慢嘆   因為無咩人番工嘛 ~

同里奧大人一路行一路傾偈   之後有一家三口叫我哋賣旗   好在我有散紙咋   個媽媽好開心話係第一單呀   我叫佢哋加油啦   同埋依家 8 點幾都算早呢   哈哈 ~

基本上星期六唔會咁早番菇場   因為唔知有無人開門   咁我一入 Lobby 見到阿爽同溫總   阿爽 8 點 33 分番到嚟   佢話咁啱坐到小巴   我話真係唔知好彩定唔好彩呀 ~

傾下傾下就見到 BG   可以一齊番菇場喇   所以阿爽話要喺 Lift 度影張相呀   因為 9 點 20 分先可以入到菇場呢   哈哈 ~

拿埋杯就開工啦   仲以為西瓜唔番   點知 9 點半就見到佢 ~

唔忙就上網睇嘢   話咁快就放工 ~

同里奧大人去食米線   食完就番屋企喇 ~

沖埋個涼就抖陣   之後就參加 LA 活動喇 ~

活動完畢要有啲嘢傾   所以差唔多 4 點 50 分先走   咁我都搭車去觀塘喇   可以行陣 APM ~

里奧大人今晚約咗菜仔同媚媚去官塘食晚餐   我都約咗阿 Man 喺官塘食晚餐   本身我諗住去 megaBOX   但阿 Man 又要坐多轉 Shuttle Bus   咁不如官塘算喇 ~

約咗阿 Man 6 點喺 B2 出口等   咁我一定早到嘅   之後阿 Man 喺 5 點 56 分話到咗 B2   仲影埋相比我睇   我即刻過去呀   我其實應該約 B 出口先啱呢   好在我都係要經過 B2 出口咋   唔係約咗人又唔知邊度就勁樣衰啦 ~

真係大大話話 20 年無見喇   見面第一句真係問佢認唔認得我呀   哈哈   佢話我行緊過嚟嘅時候都認得我啦   話我其實無咩點變喎   幾識講嘢   哈哈 ~

因為我記得佢生日   所以每次佢生日都會 Whatsapp 佢嘅   上年知佢讀嘅課程已經畢業呀   我話請佢食飯   講講下已經 1 年添呀   因為唔係佢忙就係我忙   咁啱今晚里奧大人又出去食飯   咁我即刻約佢喇   本身佢都唔知得唔得㗎   始終要趕功課   所以好感恩今晚可以一齊食飯喇 ~

同佢算係第一間公司識嘅   佢對我好好㗎   好似阿哥對阿妹咁   所以我真係好感恩   男女同事都當我係妹妹咁愛錫   我番工真係好開心㗎   仍都係得呢間公司   係由同事關係變為好朋友關係呢 ~

雖然間唔中喺 Whatsapp 都會傾偈   但始終見面係開心好多   大家傾下自己近況   我問佢老婆知唔知你同邊個食飯 ?!   佢話同老婆講話同 XX 食飯   佢老婆話哦   XX 嘛   知邊個啦   呢個花名真係叫足咁耐   我以前老闆都咁叫我㗎   所以好親切   哈哈 ~

無諗過一見面咁多嘢傾   因為真係太耐無見   我都驚傾啲咩好㗎   哈哈 ~

阿 Man 同阿仔係同部門   阿仔話我好多嘢講   叫我停反而仲特登係咁講   阿 Man 話佢部門其實仲有一個男同事   但我無同佢傾偈   我問番佢個同事叫咩名 ?!   佢話唔記得   我話係咪做咗好短時間呀 ?!   佢話幾年啦   咁我即刻話佢係咪對你好衰   所以我唔同佢傾偈呀 ?!   哈哈 ~

我好耐好耐之前曾經好唔開心   原來我有搵個佢㗎   我話講講下又有啲印象   不過佢好搞笑   好輕輕咁提   怕再令我唔開心咁   我話過咗去啦   都係一種經歷嚟啫 ~

之後又傾下工作 家庭同信仰   真係有傾唔完嘅話題   好在今晚約 6 點食飯   可以傾耐啲   哈哈 ~

今次食飯真係好多得著   呢排有啲嘢要搞   今晚我好放心咁問佢好多嘢   佢比咗好多信心我呀   所以好感恩今晚見到佢呢 ~

我哋差唔多 10 點要走喇   因為餐廳要收工呀 ~

大家喺地鐵站分道揚鑣   咁我打比里奧大人問佢走未 ?!   點知咁啱佢又打比我   原來佢哋都係喺地鐵站行緊   之後菜仔同媚媚話想見下我喎   所以我喺閘口等佢哋喇 ~

菜菜仔又攬住我   又一路行一路搭住我膊頭   佢永遠都係騎騎呢呢咁㗎   之後又話 4 個一齊影張相   仲講明唔會比里奧大人   真係黐鬼線 ~

同媚媚一齊搭車   不過佢喺九龍塘轉車嘅 ~

里奧大人話菜仔問我點解唔嚟食飯 ?!   又話每次問起我都依依哦哦唔想講咁   所以係都要見下我喎   真係黐鬼線   咁我話下次一齊去食囉   因為我成日驚阻住佢哋傾嘢先唔嚟嘛 ~

番到屋企即沖涼呀   同里奧大人傾下偈又已經 12 點   係時候要瞓喇 ~