茄子燜午餐肉 ( 29-MAR-2026 )

 

( 29-MAR-2026  SUN )

今朝同里奧大人食早餐   我食完就去家姐屋企喇 ~

家姐同姐夫 9 點番到屋企   一入屋就話比手信比我   我話放心喎   我實會提妳嘅   哈哈 ~

咁睇又唔係好肥

Berry 姨姨

一路執手信一路傾偈   家姐今次都玩得開心呀   仲話里奧大人比佢嘅 6,000 台幣已經買哂嘢喇   不過仲剩番 1 萬台幣   叫我入銀行   我話唔要啦   佢話我下次去台灣用咪得囉   佢特登兌換定台幣比我用㗎   真係比佢激死 ~

幾乎大半喼都係放我啲手信

聖比德 (咖啡牛軋餅) - 家姐鍾意食餅乾   我就真係普普通通

味王王子麵 + 王子麵 (火鍋專用)   家姐話見到 "香蔥" 兩個字   所以買埋香蔥雞汁風味科學麵比我   話我鍾意食蔥喎   哈哈

執完已經 10 點 45 分喇   家姐話要出貨   所以佢一路做一路傾偈   咁我隻手托住 Berry   佢瞓到扯鼻鼾   仲要好大聲添呀 ~

坐喺度等我

開始想瞓覺

進入睡眠狀態

咁就似細個嘅樣喇

同家姐講阿爽啲嘢   佢話搞到佢想飲馬蹄爽喎   佢講完都忍唔住笑   哈哈 ~

12 點 20 分同家姐 Berry 落街行   行咗 20 分鐘就番屋企喇 ~

今日拎個喼番屋企   所以家姐幫我 Call 車   咁同埋姐夫一齊出門口   佢就幫我掉個舊喼喇 ~

家姐陪我等車   咁上車無耐諗住出九龍方向   點知司機話前面撞車呀   佢即轉另一條線   感恩架車可以退後   唔係應該塞 1 個鐘呀 ~

2 點鬆啲落車   里奧大人幫我拎個喼番屋企   我就去大家樂搵位 ~

叉燒四寶飯 ($49)   加埋飲品要 $60   我同里奧大人講話番屋企飲嘢算喇

食完就番屋企喇   里奧大人沖完涼抖陣就瞓覺   我就執手信同清潔屋企 ~

黑橋牌條子肉乾 (岩燒蒜香 & 炙燒原味 & 鐵板黑胡椒) - 我拎起包肉乾   家姐話里奧大人可以送杯麵食   估唔到家姐記得佢鍾意咁樣食法   哈哈

快車肉乾 (脆片櫻花蝦 & 海苔肉鬆 & 蜜汁豬肉乾)

阮的肉干 (原味 & 炭燒) - 家姐話香港仲未有   所以買嚟試下

肥了都想吃   哈哈

香菜味超闊條餅 & Doritos 香菜口味薯片

家姐話見到 822 係里奧大人生日   所以買咗呢包科學麵喇

武松殿 (肉鬆合桃酥 & 經典原味肉酥餅 & 紫菜肉鬆捲)

我都估唔到家姐買豆干比我   仲話記得我之前講要買非基因改造嘅豆先好買   哈哈   提子朱古力就係叫家姐有就買   唔好特登去搵   家姐話本身諗住買 10 盒   但家樂福得 3 盒   好在佢唔知 7-11 都有得買咋   哈哈

海邊走走 (肉鬆愛餡蛋捲 & 咖啡拿鐵蛋捲) - 同家姐 Share   因為食 1 條都好飽   我真係食唔到咁多呢

本身叫家姐買王子麵零食   但家姐買錯咗即食麵   其實我又無講明係零食   之後佢再買埋科學麵   咁我迫佢每樣要 1 包   佢話剩番 4 包   我同里奧大人可以平均分   哈哈

家姐買咗蠟筆小新嘅餐具比我   佢自己就買咗小丸子   再買套 Winnie the Pool 比 U 姐

水怪悠遊卡係家姐喺 7-11 買比我嘅   之前捷運站出嘅小新   我唔鍾意   估唔到佢去 7-11 買呢張卡比我   仲話水怪有另一張係一家人   佢話唔識啲人物   所以就咁買只係水怪嘅比我   所以見到餐具同電話卡真係好有驚喜呢

家姐話去台北嘅時候   已經問我想買咩 ?!   我話只係要小王子麵同豬肉乾   點知佢買咗咁多嘢比我呀   超級感動呢

執到差唔多 5 點   之後都瞓咗 20 分鐘呀   抖陣就燜餸喇 ~

5 點 45 分都預備晚餐   里奧大人瞓到 6 點 15 分呀   不過要等到 6 點半先食得 ~

是日晚餐 - 茄子燜午餐肉

茄子燜午餐肉 - 用泰式聖羅勒辣椒醬燜嘅   簡單方便又好味 ~

洗埋碗就換季   又可以捐 2 袋衫呢 ~

搞掂哂都已經 9 點   開埋機洗衫就沖涼休息   但洗衣機突然好嘈   聽日要約人嚟睇   希望快啲搞掂啦 ~

同里奧大人一路食糖水一路睇 "中年好聲音 4"   我覺得好 Relax 㗎喇 ~

波仔嘅椰汁紫米露   始終放喺雪櫃太耐   所以要整熱先食

唔甜同埋好多料   之前係比較甜㗎

里奧大人留比我食㗎   自家制斑蘭糕點真係超級好食

睇多陣 Youtube   今晚 10 點 35 分都瞓覺 lu ~

忠記粥品 @ 紅磡 ( 28-MAR-2026 )

皮蛋艇仔粥 ($25) - 都好多料

炸兩腸粉 ($16) - 油炸鬼都脆

銀芽炒麵 ($16) - 份量都幾多

鮮製豆漿 ($12) - 幾濃豆味

( 28-MAR-2026  SAT )

好多時都係瞓到 6 點 55 分都醒醒哋   今朝又係咁   不過我會繼續瞓到鬧鐘響先醒 ~

今朝同里奧大人出去食早餐   雖然唔係好餓   但我好想食雪菜肉絲米呀 ~

我同職員講話米粉扣底   佢話唔好扣呀   份量好少㗎咋   可能見我肥怕我唔夠飽   哈哈

食完就去里奧大人公司坐陣   今朝唔駛咁早番工 ~

菇場 3D   一坐低就聞到陣燶味   之後我去阿齋個位都聞到   可能神枱有人裝香   咁我都無咁驚   但阿齋話會買香薰番嚟噴   咁就好喇 ~

阿齋見到我 Keyboard 話靚   所以佢同 BG 都買   之後阿蟲都想買   話用靚嘅嘢係開心好多㗎 ~

仍然要執嘢   所以時間過得好快 ~

放工即走  同里奧大食完午餐就要去搞啲嘢 ~

瑞士雞翼蔥油即食麵+牛乳炒滑蛋+青醬蒜蓉包 ($56)

鴛鴦扒飯 (豬扒/雞扒) + 是日餐湯 + 熱特濃朱古力 ($59)

搞到 3 點半   叫里奧大人陪我去買茄子   之後我就再去樓上買嘢   我叫里奧大人走先   估唔到佢話陪我   仲話做咩唔叫佢陪添呀 ~

我好專心揀帶皮豬腩嘛   里奧大人突然行過嚟好細聲話睇緊咩 ?!   真係比佢嚇死   咁我拎住 2 包燒賣同帶皮豬腩   職員過嚟比個購物籃比我   話唔駛我隻手咁凍   本身其實我只係諗住買呢兩樣   依家有籃就買埋梅頭肉喇 ~

馬鮫魚肉眷賣 ($16/袋) X 2 / 加拿大天然梅頭肉 ($29) / 西班牙天然帶皮豬腩 ($37)

朱古力味粒粒威化 ($12) - 里奧大人話買嚟試下

祛濕茶 ($14)

買完即番屋企沖涼   里奧大人沖完涼就熨 2 機衫   辛苦佢了 ~

6 點半就出去食粥   食完就去 AEON 行下   行行下我話對鞋踭甩甩哋   但其實係個鞋墊鬆咗   里奧大人話唔驚喎   附近一定有得買鞋   我話唔想嘥錢買鞋嘛   佢叫我去 Beans 買 2 個膠袋笠住對腳咪得囉   黐鬼線   哈哈 ~

里奧大人話想買褲   我話買啦   難得做特價   之後我都買咗裙同褲呀   聽晚又要捐番啲衫褲出嚟   之前買咗着幾次又唔想着   咁拿拿聲捐出去好過 ~

男裝淨色 7 分袖裇衫 ($159 原價 $199) / 男裝工裝長褲 ($159 原價 $199) X 3 條

女裝連身裙 ($179 原價 $239) / 女裝緊身褲 ($159 原價 $199) X 2 條

買完去家品部睇下嘢   我又買咗個環保袋   里奧大人話質料好先買咋 ~

OPANCHU USAGI  可摺疊環保袋 ($29.9 原價 $49.9)

去埋 DAISO 就走啦   頭先我話我買對拖鞋起碼 $200   里奧大人有史以嚟咁快行入 DAISO   就係搵 $12 拖鞋   哈哈 ~

我好怕着人字拖   着到啲腳趾好痛

番到屋企即沖涼喇   出咗一日街真係幾攰   可能今日熱呀 ~

TOPVALU BP 比利時窩夫 ($17.9/包)   再忍唔住買 2 罐菠蘿芒果味有汽酒 ($9.9/罐)

睇下 Youtube   今晚 11 點 45 分先瞓 ~

豉油雞 + 油麥菜 ( 27-MAR-2026 )

( 27-MAR-2026  FRI )

尋晚瞓得麻麻哋   但感恩起身都精神 ~

今朝同里奧大人出去食早餐   開心開心 ~

里奧大人找完錢拎住 $40   我即刻搶咗去   我搶嘅時候想講嘢   我話你想講咩 ?!   佢話想講只係比 $20   我話太遲 lu   哈哈 ~

食完去里奧大人公司坐陣先番工   咁樣真係唔錯   番工會開心啲 ~   

菇場忙呀   今日係我同阿齋喬遷之喜   BG 幫我 Set-up 電腦   之後叫佢幫我買個層架同防藍光屏幕 ~

咁我用私家 Keyboard 嘛   阿齋以為係公司提供   之前我用防藍光屏幕   船頭都以為係公司配套呀   所以船頭換新機   佢又話要買埋防藍光屏幕   所以 BG 突然變咗好忙   哈哈 ~

搞掂已經 11 點 35 分   因為張枱好亂   諗住唔出去   但最後都係蒸完飯就出去行喇 ~

去咗 360 買豆漿同即食芝士腸   買完都番菇場開飯 lu ~

我掛住執嘢   船頭話我個位都唔少嘢   以前唔會經過我個位   所以望唔到   哈哈 ~

bibigo 薯仔味紫菜脆片 ($5 特價)   我鍾意玟奎同勝寬   阿齋話唔鍾意 ASTRO 喇 ?!   我話唔係   同埋我諗住買呢包脆片 Share 一齊食啫

船頭比咗藍莓乾   BG 又比花茶

放工即走   船頭呢幾日唔舒服   阿齋問佢今晚煮唔煮飯 ?!   船頭話唔舒服仲煮 ?!   唔係咁命苦呀嘛   呢句好笑 ~

放工即走   番到屋企都即刻煮晚餐同埋開機洗衫   里奧大人 6 點半番嚟都可以食得喇 ~

是日晚餐 - 豉油雞 (外賣) + 油麥菜

豉油雞 (外賣) - 前晚買咗 1  隻豉油雞   但食咗好少   所以今晚點都食埋去 ~

油麥菜 - 終於食哂   真係好在買咗 2 棵咋 ~

洗埋碗抖陣就出發去教會喇   今晚有小組呢 ~

10 點 10 分散會   感恩好快有車   10 點 35 就番到屋企 lu ~

沖埋涼再睇陣電視   今晚 11 點 15 分先瞓覺 ~

沙薑雞 + 油麥菜 ( 26-MAR-2026 )

里奧大人飲茶食剩半碟干炒牛河   仲有 1 個叉燒包 + 1 件雞扎   另外 2 件珍珠雞就比里奧大人做 Lunch Box 喇

( 26-MAR-2026  THU )

尋晚半夜去完廁所   之後一上床就即刻瞓得着呀   感恩感恩 ~

早餐食法國丹麥酥方包   今次搽咗牛油仲好食 ~

今朝我都仲係着長袖 Hoodie   但家姐已經着短袖   但我覺得着短袖又有啲凍咁   不過我都應該要換短袖   再加件薄外套好過   始終我中午出街   有時行到出哂汗呢 ~

菇場唔忙   但都要清下自己啲嘢   咁搬位唔駛搬咁多嘢喇 ~

正官庄嘅紅石榴液 ($138/盒)   阿齋買嚟試下   咁啱一盒有 3 小盒   所以比埋我同船頭喇   阿齋話幾好味道   我話今晚去買

Lunch Time 行陣就去食水餃上海麵   呢間嘅上海麵有啲煙韌   所以我好鍾意食㗎 ~

食完又去日本城行下   買完已經 12 點 50 分   要即番到菇場喇 ~

玻璃清潔 ($12/2 包) X 2 / 皮革清潔 ($12/2 包) / NOMATA 量匙 ($3 清貨價)

忙咗一陣又可以 Hea 過   咁就覺得好快放工 ~

今日里奧大人放假   所以番到屋企都即刻預備晚餐 lu ~

是日晚餐 - 沙薑雞 + 油麥菜

沙薑雞 - 今日里奧大人同水公佢哋飲茶   咁啱惠州個表姐都有嚟   所以比咗隻比我哋食喇 ~

油麥菜 - 尋晚喺惠康買   $5/包有 2 棵   咁呢個份量都唔錯   有時想食菜但唔想食咁多   就會去惠康買㗎喇 ~  

洗埋碗就去惠康買完意粉醬   之後再去正官庄買紅石榴液   買咗 6 盒 $828   咁買滿 $800 就可以做埋會員呢   下次叫阿齋幫我儲積分  哈哈 ~

買完啱啱有巴士   實在太感恩   因為 4 樽意粉醬同 6 盒紅石榴液都好重下 ~

番到屋企即沖涼   里奧大人今日開咗機洗衫同埋熨 2 機衫   我就可以休息喇 ~

睇下 Youtube   今晚 10 點半都瞓覺 lu ~