川滬小館 @ 大埔 ( NOV-2007 )

尋晚好攰又有啲頭痛   所以決定唔煮飯   同里奧大人去川滬小館食小籠包 + 海哲拚素鵝 + 八寶豆腐 + 鬆子肉碎 + 2 件叉子燒餅 ($186)   依家咩都細碟哂   以前碟鬆子肉碎一定要叫夾 4 件燒餅先食得哂   但尋晚嘅份量只可以夾 2 件叉子燒餅   價錢無變   但份量劇變   不過對於我都好嘅   細細碟份量啱啱好唔駛嘥嘛 ~

番到屋企同自己講一定要 11 點瞓覺   唔係唔掂   好在真係可以 11 點瞓覺 ~

~~~~

今朝太好喇   因為有充足嘅時間食早餐   所以去咗 KFC 食牛角包餐配咖啡 ($12)   今次早餐真係要多謝家姐   因為佢比咗張 $10 Coupon 比我   所以今朝只係用咗 $2 就可以嘆到早餐   估唔到 2 個細細嘅包又幾飽㗎噃 ~

番到公司超級忙   忙到就嚟顛 ~

晏晝好開心可以同里奧大人 + 1 個客 + 1 個同事去別府食 Lunch   我食咗魚生飯   勁飽呀 ~

但那等候耶和華的, 必從新得力, 他們必如鷹展翅上騰, 他們奔跑卻不困倦, 行走卻不疲乏. (以賽亞書 40 : 31)

But they that wait upon the Lord shall renew their strength. They shall mount up with wings like eagles; they shall run and not be weary; they shall walk and not faint. (Isaiah 40:31)

菜遠炒牛肉 + 生炒排骨小菜套餐 ( NOV-2007 )

放工唔駛煮飯唔駛煲藥真係好鬼嘆   所以就去百佳行下   因為想買麥片做早餐   所以買左 1 盒即沖營養燕麥片 (原味) +  2 盒 Nestle 麥片 (高鈣脫脂配方)   去得百佳梗係唔咁快行番出嚟啦   所以順便買埋 St. Ives 潤膚露18oz + 透明膠布 + 椰纖果 + 黑胡椒粉 + 手指餅 + 鴨梨 6 個   又用左 $140   所以又要開始慳番唔好買其他嘢先得喇 ~

番到屋企他他條條咁掃掃地   拆拆信   收收衫咁等里奧大人電話就可以出街食飯 lu   去好麵膳食咗菜遠炒牛肉 + 生炒排骨配例湯 + 白飯 + 熱柚子茶 ($80)   不過啲餸唔係咁好食   而里奧大人又覺得啲飯好硬   但為咗慳啲錢無辦法啦   如果去酒樓食要百幾㗎 ~

食完行一陣就番屋企喇   之後就沖涼   一路燙衫一路睇電視   其實都幾辛苦   因為咁樣基本上係聽電視   唔係睇   但係我一心想燙衫   如果唔燙真係會覺得有樣嘢未做咁會周身唔安樂   呢樣嘢真係要戒喇唔係自己會好辛苦 ~

真係覺得涷同勁乾燥   個鼻哥同喉嚨勁唔舒服   皮膚又乾   去一次洗手間要搽 2 次 Hand Cream 先得   之後即刻敷 Mask   我唔想塊粉臉乾爭爭呀    一敷塊 Mask 真係涷到嗌救命呀冬天最需要做保濕㗎   咁點算好呀 ~

尋晚又係成 12 點先瞓   好驚習慣咗呢個時間先瞓呀 ~

~~~~

今朝天氣真係涷左好多   所以真係唔願起身番工   但我需要錢   所以簡單一個祈禱就彈起身去

梳洗   然後番工賺錢 ~

今朝又係 Only me   因為里奧大人要見客   坐車既時侯雖然有陽光曬住   但都覺得有啲涷   所以好想瞓覺 ~

今朝早左番到公司附近   所以食在早餐先番工   食咗芝士火腿菠蘿包 + 熱杏霜 ($15)   呢排都好多嘢做   真係有啲攰 ~

里奧大人突然打嚟   話見完客之後要同另一個客上廠   好辛苦呢   我真係要學會儲錢   唔想再亂駛錢   因為里奧大人賺錢好辛苦呀   我真希望可以做到 ~

晏晝帶飯   因為尋晚食唔哂   唔好嘥   又可以慳錢   但真係好奇怪   慳慳埋埋啲食飯錢都唔覺銀包多錢咗   因為多咗嘅錢係會不期然咁買其他嘢   所以基本上係無慳到   就係咁   里奧大人就成日丙到我 9 彩   話知唔知咩叫慳錢 ?!   唔係慳呢樣錢黎買其他嘢叫慳錢   呢頭話儲錢..果頭又買到成屋都係嘢   買咁多煲咁多碟做咩 ?!   得兩個人用   買到好似廿幾人用咁   成日話無衫要買衫   買完啲衫又唔見妳着   又係買到成柜都係   吓 ?!   下冊二百字   如果我可以喊到就好啦   用眼淚攻擊   我諗個個男人都會受啩   但我唔會   我只會對佢 "咀篾篾"   因為我好唔認同佢所講嘅嘢   買得多嘢係令到女人會好有安全感   男人你唔明㗎喇 ~

麥當勞之至尊漢堡餐 ( NOV-2007 )

尋日里奧大人要北上開會兼過夜   所以尋晚係我嘅 Free Time ~

放工好開心好開心   因為約咗家姐睇佢嘅新居   有自己嘅屋企真係好好   因為點裝修都得   同埋又唔駛每兩年就要搬   改地址都改到煩啦   同埋搵屋仲煩 ~

尋晚搭地鐵時同家姐講好想食煎釀三寶   但好難買到   估唔到家姐屋企附近有得買   所以即刻買咗 $5/4 件試下   雖然啲三寶樣衰衰咁   但原來好鬼好味㗎   真係有驚喜呀   之後上到家姐屋企參觀   又唔錯噃   最正係開窗之後都唔係好嘈   又對住園境   正呀 ~

我最鍾意係有 Club House   最正係有得玩 GYM 篤波同打網球   我真係好鍾意打網球   但無人肯做我對手   因為我實在太 "勁抽" 喇   係無人接到我發嘅球   因為唔係出哂界就係唔過網   一係就將啲波打完左邊到右邊   打到人哋都話我係咪顛㗎 ?!   想走死人咩 ~

其實家姐尋晚有朋友去佢屋企打邊爐   但見媽咪去睇大戲得我一個人食飯   所以係都要陪我   我就拿拿聲去麥當勞食至尊漢堡餐 ($24.5)   個餐係配薯角   都幾好味   好在家姐幫手食薯角   唔係就嘥哂㗎喇   之後同一齊家姐搭小巴   因為架小巴可以到大家嘅屋企   太好喇 ~

番到屋企見到深愛嘅朱朱撲兩撲就上床仔瞓   覺得佢係有啲唔舒服   應該係想作嘔格   點知真係抱兩抱就嘔   真係陰公咯   所以尋晚我有啲悶   因為唔可以攬住深愛嘅朱朱 "灘" 喺梳化度睇電視   因為佢要瞓覺覺   好在尋晚套 "兩妻時代" 又幾好笑啫   唔係就悶死我咯   睇完就瞓覺 lu ~

~~~~

今朝同媽咪.家姐 朱朱去一間可以偷雞帶狗入去嘅餐廳食早餐   食咗火腿麵 + 奶油多 + 熱咖啡   係一個餐嚟㗎   $18 又幾抵喎   今朝媽咪請食早餐   我仲抵呀 ~

晏晝帶飯   因為媽咪尋晚特登煮多啲比我帶飯嘅   有髮菜蠔豉燜豬手 + 炒荷蘭豆蝦乾 + 清炒芽菜   好好食呀 ~

呢幾日唔駛飲中藥   要等到 1/12 北上覆診後先再飲   太好喇   因為一早空肚飲真係好攞命   呢幾日我會好好珍惜唔駛煲藥嘅日子   因為煲藥真係好困身 ~

今日好開心   因為 CC 出院   聽佢把聲仲精神過我   仲有最開心係佢嘅傷口唔痛   唔駛咁辛苦嘛 ~

真係好邪呀   家姐尋晚先同我講話一對啲工人好呢   啲工人就會得吋進呎   點知頭先家姐打嚟話個工人將自己啲衫同埋家姐嗰啲一齊開機洗   家姐問做咩一齊洗   工人答無嘢   再問都係答無嘢   .慶到家姐話唔識講就一齊去 Agent 度用印尼話講   之後仲衰   個工人話家姐咩都唔得   隔離工人個太太咩都得   呢句話真係令到家姐發顛呀   因為工人話想放假就比佢放   如果喺屋企有客人嚟   叫佢瞓到 11 點幾得喇   家姐之佢偷懶   但無話佢    家姐心態係有邊個打工嘅唔偷懶呢   點知個工人就用人哋嘅好嘢嚟比   人哋衰嘅又無講   激到家姐話以後妳唔好有任何要求呀   我咩都唔會比㗎   我會記住妳講呢句說話   個工人今次真係唔衰攞嚟衰咯 ~

凡事謝恩, 因為這是 神在基督耶穌裏向你們所定的旨意. (帖撒羅尼迦前書 5 : 18)

驚險的 75 折元綠壽司 ( NOV-2007 )

尋晚放工即刻去探 CC   見佢做完手術後都好精神   我個心安樂哂   傾到 7 點幾我就走喇   趕住同里奧大人食晚飯呢   等車時突然間喺度諗   係咪應該比人休息下   唔好同人講咁多野呢   女人真係好多野講呀 ~

晚餐同里奧大人去元綠   因為用埋 11 月底前用嘅 75 折 Coupon 同埋一客免費迷你花之卷囉   同里奧大人拿拿聲 Order 蟹籽 / 蟹籽沙律豆腐皮 / 仲魚 / 火陷帆立貝既壽司 + 吉列炸蝦卷 + 蠔情卷 + 三文魚手卷 + 冷辣辣麵 +  鐵板豆腐 + 迷你花之卷 (3 個麥嘜印花免費贈送)   埋單 $129...因為有 75 折   所以咁平 ~

我尋晚入到元綠真係嚇鬼死我   因為我比 7 折 Coupon 佢哋啦   佢哋話 7 折係用到 6 點   嚇到我有啲頭暈   之後鎮定啲再摷銀包仲有無其他 75 折 Coupon   好在有咋   唔係唔抵嘛    一心諗住 7 折先嚟食咋   依家 75 折都好嘛   今次唔知點解好快飽   仲有啲食到想嘔嘅感覺   我食嘅次序係冷辣辣麵   蟹籽沙律豆腐皮之後再花之卷   樣樣都有醬   所以食到花之卷時已經唔   .好想嘔   啲醬好漏呀...搞到我無咩胃口食其他壽司添呀   激死   唔怪之得里奧大人成日都話啲沙律醬好漏啦   經過尋晚咁食法   真係覺得好漏 ~

番到屋企里奧大人忙覆 Email 同寫 Meeting Report   而我就熨下衫   之後沖涼再睇 Keroro DVD   好正呀   睇卡通片真係令人好開心   唔駛一路睇一路諗   多麼的舒服呀   真係好多謝里奧大人用私已錢送呢幾套 Keroro DVD 比我呀 ~

睇左一隻 DVD 後再玩 NDS 太鼓   玩到 12 點幾先瞓 ~

~~~~

好眼瞓呀   雖然知一定會遲到   但都要喺出面食完早餐先番工   食咗營養豐富嘅蛋牛治烘底 + 熱鴦 ($15)   好滿足好滿足 ~

番到公司要慢慢做   因為之前出錯單   好驚再做錯   所以慢慢做慢慢對   原來慢工出細貨真係講得好啱   所以我以後做咩都會用呢個宗旨做人 ~

晏晝突然好想食豬扒   所以買豬扒 + 通菜 + 米線 ($13)   真係又再次嚇餐死   Order 完記得我散紙包張 $20 今朝用咗   好在仲有 $18 散紙咋   唔係都唔知叫唔叫人撩番塊豬扒出嚟好呀   我下次都係唔好嫌煩拎銀包買野食先得喇 ~

香茅煎雞翼 + 菜心 + 炒飯 ( NOV-2007 )

晏晝番到屋企   里奧大人就瞓晏覺   而我就睇報紙   尋日行經 7-11 同 Circle K 都好奇怪   因為只係得蘋果日報   無哂東方日報   心諗唔知係咪有大事件 ?!   所以同里奧大人不惜一切咁耗盡所有腳骨力   行到有東方日報買既報紙檔   原來係講有對父母將 5 個女留喺屋企   任由佢哋喺屋內同屋外大小二便   而兩夫婦就成日出街蒲   留低啲仔女喺屋企   但好怪就係話搞分居   但又一齊去蒲喎   都唔知啲報紙邊句真 ?!   不過點都好   番低啲 小朋友喺屋企真係好唔啱   好危險家嘛   如果真係咁想成日去玩   就不如唔好生啦   仲要生 5 個咁多   做人父母要有責任照顧家嘛生咗又唔養又唔教   最憎呢啲咁無責任嘅父母呀 ~

睇完報紙再睇陣雜誌都成 3 點幾   里奧大人話頭重重唔食嘢   叫我自己食喎   所以就求其食咗個辛辣杯麵   食完無耐里奧大人就話不如出去食嘢   我話唔係化   啱啱食完杯麵點食呀 ?!   所以又求其煮咗個腸仔福麵比里奧大人食算喇   早啲出聲話食嘛   咁我可以唔駛咁慘食杯麵   又唔駛咁慘煮麵你食嘛   仲要話啲腸仔唔好食   要煎先好食 ~

尋日終於搞掂份讀書報告   太好喇.   仲差 1 份報告未做呢 ~

里奧大人都好乖仔   因為主動煲藥仲洗埋所有野添   可能係見我特登煮麵比佢食令到佢心生感動呀 ~

之後我就開始預備晚餐喇   就係香茅煎雞翼 + 菜心 + 炒飯

香茅煎雞翼 - 將 3 支香茅切條   再用豉油 糖 麻油 胡椒粉 粟粉醃 2 個鐘   切香茅嘅時候覺得好香   原來食嘅時候係無味嘅 ~

菜心 - 太攰   居然唔記得拻 "依"   好在唔多渣 ~

炒飯 - 用蔥粒 + 蛋 + 老抽 + 生抽嚟炒   懶人飯 ~

薑蓉 - 因為唔想嘥咗啲蔥   所以整薑蓉   同埋覺得好似多樣餸咁 ~

整完哂所有嘢就同里奧大人去跑步   好舒服呀 ~

番到屋企即刻食橙   唔知咁會唔會肥嘅呢 ~

~~~~

今朝里奧大人要北上   我又可以早啲出門口   但今朝車程慢咗   所以買炒米粉 + 熱咖啡 ($17) 番公司食   其實想喺公司沖咖啡   但硬係覺得提唔到神   所以都係要飲出面嗰啲 ~

番到公司都有嘢做   但今日開始好悶喇   因為朋友 CC 入院做小手術   出院又要抖下   所以唔知要悶幾耐喇 ~

晏晝帶飯   可以慳錢但悶死 ~

諗番起星期五晚發既夢   唔小心打爛個藥煲   之後鬧鐘響就醒咗喇   點知星六晚真係打爛咗個樽   掃完地以為無事   無着到拖鞋點知比玻璃碎 "吉" 到腳板底呀   痛到吖   又流血   嚇死呀   之後里奧大人同我用黃藥水消毒再貼膠布   行路我都唔咁腳板掂地呀   因為好痛呀   好耐之前試過發夢仲咗六合   我醒嘅時候仲記得啲號碼   所以放工即刻去買   但一個字都無中嘅   點解今次打爛嘢又會夢境成真呀 ?!

鍥而不捨的韭菜豬肉雲吞 + 菜心 + 腐竹糖水 ( NOV-2007 )

尋日食完野番到屋企   休息一陣就煲藥 lu   因為早煲早着   之後就開始預備晚餐喇 ~

是日晚餐 - 韭菜豬肉雲吞 + 菜心 + 腐竹糖水

今次終於可以食到自己整既雲吞喇   唔想煮咁多   因為想食菜 ~

之後再食埋腐竹糖水   正呀   本來想煲湯嘅   但好攰同埋要用比較多嘅時間   但又想潤下喎   所以簡簡單單煲齋腐竹糖水算喇 ~

搞掂所有嘢就開始做功課   真係好想好想下星期可以做好   唔駛成日心掛掛呀 ~

尋日食 Tea 飲咗杯咖啡   成點鐘都仲喺床度典嚟典去瞓唔着   真係勁慘 ~

~~~~

今朝好開心   因為可以瞓到 10 點先起身 ~

同里奧大人梳洗完就出發到教會附近嘅餐廳食早餐   我食沙爹牛肉米線配煎雙蛋 + 熱朱古力   而里奧大人就食至愛五香肉丁福麵 + 熱朱古力 ($36)   等咗成 10 分鐘先有得食   又唔係多人喎   咁鬼慢   下次都唔會再去呀 ~

番完祟拜後就慢步回家   途經 Jusco   里奧大人終於買咗個電子鬧鐘 ($49)   .因為依家嗰個有時唔響   所以非買不可   之後就番屋企休息下先喇 ~

牛腩米加菜 ( NOV-2007 )

尋日晏晝要去覆診   但去覆診前先去 Ikea 買 1 Pack 焗爐碟 ($39.9/2 pcs)   因為抵到爆   所以非買不可 ~

去西龍傳香買咗個惹味嘅肉燥粟米飯團 ($12) 坐車食   食咗幾啖唔對路   因為食到有磨菇 雞同肉鬆   都唔係我要個飯團嚟嘅 ?!   淡到死   之後番上屋企放低啲碟就搭小巴去覆診 lu ~

今次好好彩   等咗 25 分鐘就叫名   感謝神   因為我甲狀腺同鐵含血量都係正常   醫生話今次食藥食得好好   但我其實無食醫生開嘅藥   而係一路食中藥調理   咁當然無同醫生講   唔係實鬧死   好感謝神嘅帶領保守   讓我有一個好嘅醫師幫我調理身體 ~

等攞藥期間   有一個着住醫院衫褲嘅男人   問我有無 $5 散紙 ?!   咁我就比咗佢   之後佢就咁講聲唔該就走咗   原來佢唔係兌換散紙   而係問人攞散紙   咁都得嘅 ?!   比完之後再喺度諗   個男人可能係道友之類嘅人   因為好人好姐係唔會咁問   但咁多人唔問偏偏要問我嘅 ?!   唔通一睇就知我係一個心地善良   佢眼中傻傻哋嘅人 ~

之後番屋企見仲有時間   所以煲埋中藥   之後真係要走喇   因為要去番學呀   去到學校附近嘅德昌食牛腩米加菜 ($18)   非常飽   食完就行下食神傳說   買左乳酪糖 ($6.9)   1 包 Mentos Mints ($15) 同 Boss Coffee ($10/3 罐) 就番學 lu ~

尋晚真係一堂最值得上嘅堂   因為係牧師親自做輔導員   真係學到好多嘢呀   希望日後真係可以用到啦 ~

放學就即刻番屋企喇   因為真係好攰   而里奧大人就喺屋企附近巴士站接我放學   又係第一時間幫我拎袋同手上嘅嘢   依次次見我手上有嘢就會第一時間幫我拎   好細心呀   真係幾好咁喎   我應該要學曉好滿足先得 ~

~~~~
 

今朝同里奧大人去 Olive'Super Sandwiches 食早餐   我食 Egg Francorn + Coffee   里奧大人食 Egg Bac Dice + Coffee ($46.80)   好正好 Relax 呀   今次仲做埋會員   因為只係 $50 會員費   但係會比番 $50 Cash Coupon 仲有 9 折   最正係可以即刻有 9 折嘛   所以唔做唔得啦 ~

同里奧大人傾偈   我話好想買相機   點知佢就成日迫我要佢部舊相機   仲要 $1,000 賣比我   我話 $300 就買   佢話好   但我諗諗下除非我自己出去食先用手機影嘅啫   喺屋企食既多數都係用佢部相機喎   而部相機又多數係屋企嘅   隨時用都得啦   駛咩 用 $300 大元買喎   分明搵我笨啦   所以我話 $150 就買   佢話啋我都傻喎   等佢比啲有需要嘅人好過   我咪話我咪係有需要囉   佢話好難喇   妳咁樣最多一拍兩散   你話佢係咪黐咗線吖 ~

~~~~

番到公司有野做   但好有 Holiday Mood ~

今日最開心   可以同里奧大人食早餐 ~

今日最最開心係去 Jusco 買咗 1 個盒 + 1 把除塵掃 ($50)   之後  J Card 有 5,200 積分可以換到 $50 Cash Coupon   今日同 50 好有緣呀 ~

今日最最最開心又係可以同里奧大人食 Lunch   先去麥記買兒童套餐 ($18.5)   因為有 Tamama 公仔   之後再去澳門街食干炒牛河 + 鹹魚雞粒炒飯 + 熱咖啡 + 熱檸茶 ($44)   等食期間里奧大人突然同我講: 同妳食飯真係好開心好興奮   我好開心呀   佢居然咁講   所以叫里奧大人講多次比我聽   原來係自己聽錯   原來里奧大人係話 "就嚟聖誕好開心好興奮"   佢又講得細聲   餐廳又嘈   個音又差唔多   等到自己會錯意添 ~

食完行咗一陣   再去街市買菜心 ($10) + 雲吞皮 ($5) 就番屋企 lu ~

激死人雲吞 ( NOV-2007 )

尋日唔知點解好無 Mood 做野   所以個人好攰無咩心機咁 ~

放工等咗半個鐘先有車   好在只係需要買粟米啫   唔係真係又要趕到死死下呀   所以一落車去街市買 3 條粟米 ($7.5) 就可以番屋企 lu ~

懷着興奮嘅心情番到屋企   因為是日晚餐係最鍾意食嘅韭菜雲吞 ~

今次用超甜粟米做湯底   所以又要用好多心機咁續粒續粒拻啲粟米   拻咗 20 分鐘   之後開始包雲吞喇   點知一開包雲吞皮已經係發霉   人家尋晚都聞過啲雲吞皮   係無臭噃   之得唔好懶   睇埋有無發霉啦   個阿姐又話可以留 1 個月    嘥哂我啲嘢 ~

一心想食濕濕哋嘅嘢   點知又發霉   好在仲有灣仔碼頭韭菜豬肉餃啫   唔係啲粟米唔知點算好喇   卒之最後就食灣仔碼頭韭菜豬肉餃 + 龍蝦丸 + 生麵 (粟米湯底) ~

其實用粟米湯底煮生麵都幾古怪   啲味好唔 Match   但好想食粟米   無計 ~

一路食一路睇 "同事三分親"   聽到 Diana 同裘俊講話有人記得佢嘅嘢係好幸福   咁又係喎   但好少男性係咁呢   除非熱戀嗰陣啦   不過可能都有嘅   只不過我遇到嗰位唔係咁啫 ~

~~~~

今朝里奧大人北上   所以我可以早啲出門口搭車 ~

今朝好快去到公司附近   但我帶咗早餐   所以番公司食   食芝士包 + 朱古力奶   勁 Heavy 呀 ~

番到公司要拿拿聲做嘢喇   因為晏晝要去覆診呢 ~

肉醬螺絲粉 + 蒜蓉包 ( NOV-2007 )

喺公司度無野做又要扮有做野   咁梗係要向前望住部電腦   手郁郁扮下野咁啦   橫掂電腦開住嘅   無咩理由嘥左佢家嘛   所以咪 MSN 睇 Blog 睇報紙囉   唔係日子點過喎   我都好慘㗎   望得電腦多   望到眼濛濛呀 ~

晨咁早已經諗好咗煮肉醬意粉   所以已經醃定免治豬肉   同埋買定大洋蔥   再整多個蒜蓉包   應該夠飽喇啩   依期少啲滾湯 lu   因為又飲湯又中藥   飲都飲飽呀   其實好唔慣   因為我鍾意食下飯飲下湯咁   個口無咁乾呀 ~

前面兩個爐用嚟煲藥   後面就再開焗爐焗螺絲粉   真係熱到黐線呀 ~

肉醬螺絲粉 - 螺絲粉淥幾分鐘待用   洋蔥切粒   啲人教話喺水度切洋蔥唔會流眼淚   我試過無用嘅   一樣照流   同埋我覺得係水度切啲洋蔥會走哂味   我次次都係將洋蔥同對眼距離差唔多 2 尺   咁樣切我就唔會咸   今次好有心機整   爆香洋蔥再加豬肉   再加蕃茄膏   好有出街食啲肉醬 Feel 呀   我第一次煮成咁咋   之後放入錫紙盆   我先將肉醬放喺底   再加螺絲粉再舖肉醬同芝士   之後又放螺絲粉再舖肉醬再狂落芝士   因為啲芝士粉就嚟到期   所以咪迫住要整囉   仲有 1 支新嘅   又係差唔多到 Expiry Date   都唔知點算好 ~

蒜蓉包 - 用現成牛油法包 ($6.5/細)   其實應該用法包   硬身啲   但因為 Panash 得牛油法包   又唔想再搵其他麵包舖   咁無辦法啦   番到屋企見到個包軟腍腍   好難切   激死   本應想粗暴咁拻開兩邊查牛油蒜蓉就算   但覺得賣相極核突   所以都用盡辦法切好呢麵包   再放蒜蓉 (自己切粒) 同香草   焗 5 分鐘   好香呢 ~

里奧大人話肉醬螺絲粉係有史以嚟最好食既一次.   好香喎   可能勁多芝士   之後再食蒜蓉包   仲正呀   好香蒜蓉味同脆卜卜 ~

第時假期我都會整嚟食   因為我好鍾意好鍾意食蒜蓉包   奈何出街食嘅蒜蓉包多數唔好味呢 ~

諗住同里奧大人跑步   但里奧大人話頭痛唔跑喎   不過算啦   橫掂頭先煮野都煮到成身汗   咪當做咗運動囉   之後拿拿聲沖涼   再食生果   上次媽咪比啲黑提真係好甜好爽脆呀   但好難拻皮   所以一路食一路吐皮都幾煩   之後睇陣書就瞓喇 ~

~~~~

今朝又係有少少塞車   但都可以比我喺餐廳食到早餐   食咗芝蛋治 + 熱華田 ($14) ~

晏晝帶尋晚嘅螺絲粉   啲同事話好香呀   好香肉醬意粉味呀   搞到佢哋要去 Pizza Hut 食肉醬意粉呀   哈哈   我好有滿足感呢 ~

今日里奧大人北上開會同過夜   我可以休息一天   所以會去媽咪屋企食飯同瞓覺   又可以見到深愛嘅朱朱   好開心呀   好想快啲放工呀 ~

討 論 區 精 華 ： 返 工 上 網 公 司 變 網 吧 -  好似講緊我公司咁嘅   唔通啲人係化名 ?!   講真   上網好過傾電話同同事傾偈   又唔會阻住人又唔會嘈到人   對自己又好   因唔駛傾到口乾   靜靜哋都不知幾好呀   最記得有次台灣大地震   影響到無得上網幾慘呀   最慘係無得 MSN 呀   我覺得 MSN 好處係有咩野都可以第一時間話比對方知 (例如時事 8 卦嘢 買嘅 食嘅等等)   又可以練打字   真係對自己有好多益處呢 ~

講開又講   CC 間公司仲勁   個個都掛住睇股票   無 10 成都有 8 成呀   如果老細出 Trip 仲頂癮   阿媽級就幫仔女影印   後生啲就擺明居馬上網同 MSN   老啲嘅就出去食早餐同下午茶   講出嚟簡直唔係一間公司   所以真係一山還有一山高呀 ~

柱侯醬煎雞翼 + 唐生菜 ( NOV-2007 )

尋晚遲左少少走   所以一落車就要趕頭趕命買餸   真係辛苦過番工呀 ~

一落車即標去街市買唐生菜 ($5) + 2 支粟米 ($5) + 韭菜 ($3)   再飄移到超市買梅頭 ($10) + 香蕉 ($9)   之後就飛奔番屋企喇 ~

番到屋企放低野先記得無拎粟米   因為一手拎菜一手比錢   所以將粟米放埋一邊唔記得拎   激死~

番到屋企里奧大人打電話嚟話啱啱開完會...要再做多陣   差唔多 8 點半先可以番到屋企   之得我唔駛咁趕啦...不過話就話好似好多時間咁   但其實我都無停過手做野...煲藥最煩   5 碗水煎成 1 碗水   再 4 碗水煎成 1 碗水   之後入保溫壺同洗煲   又要睇火   煲一煲就用咗 1 個鐘㗎喇   所以我一路煲一洗菜浸菜   之後就醃豬肉同切韭菜    預備第晚食水餃呢   當我搞掂時里奧大人就打嚟話上咗車   即係又要開始煮飯啦 ~

是日晚餐 - 柱侯醬煎雞翼 + 唐生菜

柱侯醬煎雞翼 - 用柱侯醬嚟醃雞翼   醃咗 2 日   煎起上嚟好香   但食落就同豉油糖醃嘅味道一樣   下次試下落多啲醬嚟醃   希望可以食到柱侯味啦 ~

唐生菜 - 灼熟   蘸腐乳蓉嚟食   超級簡單 ~

食完洗埋碗成 9 點半喇   後真係要拿拿聲沖涼做功課   時間迫人呀 ~

~~~~

今朝好攰   因為呢個星期晚晚成 12 點先瞓   今朝好唔想食三文治   所以買干蒸牛肉 + 粉果 ($10)   再去 7-11 買朱古力奶 ($8.8/2 盒) 番公司 ~

晏晝就非常開心   因為媽咪又煲咗北芪南棗豬展湯同埋炸左腰果比我   所以順理成章去美心飲茶   食咗雞絲卷 + 芋頭糯米卷 + 豉汁煎魚雲 + 炸鮮蝦鮮竹卷 + 豆腐花   美心真係除咗坐得舒服之外   真係無咩點心食   來來去去都係得 4 架車   悶死   好在我有幾碗湯頂下   唔係真係唔知食 Mood 好喇   今餐係 Free Lunch   因為係媽咪請㗎 ~

彩福酒家 @ 大埔 ( NOV-2007 )

尋日 CC 打嚟話要做婦科手術   搞到我都無哂心機做野   但又忙喎 ~

做做下野里奧大人Skype 話會接我一齊放工   因為喺我公司附近見客呀   當堂開心哂   話時話都唔算叫接我放工   因為係我行到巴士站附近 Join 埋一齊搭車番屋企咋噃   里奧大人又講得幾好聽喎   接我放工 ~

難得里奧大人咁早   當然唔想煮飯啦   所以就去試下福彩酒家嘅打邊爐 ~

今餐埋單 $200 都 OK   但食物就麻麻哋   下次應該唔會再去 ~ 

肥牛 - 好細塊   麻麻哋好食

手打鯪魚球 - 腥到暈

澳洲桂花蚌 - 無味

墨魚滑 - 口感 OK 但無味

順得魚腐 - 難食

唐生菜 - 好甜好好味

竹蔗水 - 好甜   至在心理上無咁熱氣

自選醬料 - OK 啦   但乾乾淨淨咁

同里奧大人食得太飽   所以要行路番屋企幫助消化呀 ~

番到屋企又忙煲藥   之後沖涼   等自己醒神啲做功課   但夜晚對住電腦做功課真係好辛苦   對眼好攰呀   可能由朝望到晚   所以做咗  1 個鐘頂唔順就收檔喇 ~

~~~~

今朝遲咗   但都係嘆埋早餐先番公司   食咗芝腿治烘底 + 熱朱古力 ($15)   番到公司就即刻埋崗位做嘢   實在太多野做呢 ~

晏晝出去食魚皮餃米 ($18)   好耐好耐無食過魚皮餃   所以覺得幾好味 ~

突然好眼瞓   好在有吊命朱古力啫 ~

終於好味的肉醬意粉 + 隔夜湯 ( NOV-2007 )

尋日忙忙忙   忙到就嚟顛呀 ~

太攰喇   所以放工即刻番屋企 lu   因為番到屋企仲忙仲多野搞   煲藥 燙衫同煮飯 ~

尋晚唔駛去買任何野   因為屋企已經齊備哂   再加上里奧大人要 8 點半先番到屋企   所以有好多時間比我預備晚餐 ~

唔想食中餐   所以是日晚餐係肉醬意粉 + 隔夜湯

好簡單嘅做法   醃好肉碎   切洋蔥條   煮 6 分鐘意粉   之後爆香洋蔥再加入肉碎同一罐細茄膏 + 茄汁   意粉一齊慢慢火炒   我會放喺錫紙盆再加大量芝士粉   個味道真係唔錯   里奧大人話煮咁多次   今次係最好味...其實我覺得似焗茄汁洋蔥意粉   因為我唔係咁鍾意食肉碎   所以只係用咗之前買落嗰少少   食落真係唔多覺有肉碎囉 ~

本來一心諗住跑步   但食埋飯洗埋碗都已經 9 點半   再抖多一個鐘先跑既話   咪成 10 點半先跑   所以都無跑 lu   同埋我要趕做讀書報告   喺屋企求其做啲 Exercise 算喇 ~

~~~~

尋晚瞓得勁差呀   起身去咗 2 次洗手間   搞到今朝都有啲攰   好在今朝可以比我嘆早餐   食咗茄蛋治烘底 (走牛油要熟蛋) + 熱朱古力 ($15)   份三文治原來有兩隻熟蛋咁多   咁平時唔知係咪又係 2 隻咁多既呢 ?!   咁食法真係唔掂喎   膽固醇肯定高呀   下次都係食米粉通心粉之類好啲喇 ~

番到公司簡直係打仗   忙到 Lunch Time   又係食番尋晚嘅肉醬意粉 ~

干燒牛仔骨 + 蒜蓉豆豉炒油麥菜 + 炒飯 + 花膠螺片紅蘿蔔豬𦟌湯 ( NOV-2007 )

尋日晏晝 Tea 完就開始煲湯 lu   今次煲花膠螺片紅蘿蔔豬展湯   要煲成 3 個鐘   所以早啲煲可以早啲食晚飯 ~

之後開始讀書   太好喇   終於讀完可以做讀書報告喇 ~

是日晚餐 - 干燒牛仔骨 + 蒜蓉豆豉炒油麥菜 + 炒飯 + 花膠螺片紅蘿蔔豬𦟌湯

干燒牛仔骨 - 牛仔骨之前醃好咗   所以就咁煎就搞掂   我用韓式牛肉醬汁醃   所以唔需要再做任何醬汁 ~

蒜蓉豆豉炒油麥菜 - 就咁整碎蒜蓉同豆豉   之後炒炒炒到熟就得 ~

炒飯 - 用生抽 老抽 蔥粒同雞蛋係咁炒   里奧大人好鍾意食㗎 ~

花膠螺片紅蘿蔔豬展湯 - 花膠浸一晚   再用大量薑蔥少量燒酒出水   螺片同豬𦟌又要出水   紅蘿蔔切到靚靚   煲 3 個鐘搞掂 ~

食完洗完抖一個鐘就用里奧大人跑步 lu   今次好好呀   因為我終於可以跑步喇   其實次次我都係徑步   一跑親就心口痛   但尋晚心口一啲都唔痛   好開心呀 ~

番到屋企沖涼後再食木瓜   好健康呀   但尋晚 12 點先瞓呢 ~

~~~~

今朝里奧大人要見客   又係自己一個搭車   而個天又陰陰暗暗   好淒慘呢 ~

又遲到呀   所以買燒賣粉果 ($10) 番公司食   今日又係好充實呀 ~

今朝 CC 好早打嚟話換新假期一書三冊嘅旅遊書   喺 9 點 10 分已經無得換喇   仲話聽到有人講話有啲人朝早 6 點幾已經喺 7-11 門口排隊等換書喇   顛㗎   9 點 10 分 咁已經無得換   真係好驚唔會再出呀   嚇到我即刻打比里奧大人   話官塘無得換   你去尖沙咀見完客就即刻幫我換啦

隔左無耐   里奧大人打電話嚟第一句就話: 下世都係唔做妳老公喇   真係聽到我一頭煙 ?!   原來里奧大人特登喺九龍塘 MTR 出閘幫我換旅遊書呀   仲搞到遲咗見客添呀   里奧大人真係好好呀 ~

無幾耐 CC 又打嚟話佢老公咁啱去九龍灣   所以都係去埋九龍塘換比佢   費事煩喎   CC 老公同里奧大人真係幾慘噃   因為有個精神緊張嘅靚老婆   哈哈 ~

晏晝帶飯   因為要慳錢 ~

魚香茄子 + 三文魚扒 + 紅豆年糕糖水 ( NOV-2007 )

里奧大人又番學   得我一個人弧零零喺屋企   不過我有好多野做   所以都唔覺悶   做嘅嘢係醃豬肉   醃牛仔骨   執下屋   洗下衫咁   要做完先開始讀書   讀咗 1 個鐘真係好悶呀   所以伏係張枱到瞓咗 20 分鐘   瞓到里奧大人番到屋企先醒 ~

之後好精神咁煮是日晚餐 - 魚香茄子 + 煎三文魚扒

魚香茄子 - 將兩條茄子好細心咁切條   之後炒香茄子備用   再爆香少少肉碎再將茄子回鑊   再用我殺手鐧   老李魚香茄子醬嚟炒   真係好似出面食嗰啲咁㗎   其實再加啲指天椒仲正   但因為仍在服用中藥期間   所以唔可以食辣椒   可惜可惜 ~

煎三文魚扒 - 第一次煎   個阿姐話就咁解涷就可以煎   當然信佢啦   但煎嘅時候好腥   所以即刻落大量黑胡椒粉   食嘅時候真係無咁腥   好彩好彩 ~

好想好想食糖水   因為年糕嚟黎過期   所以就整左紅豆年糕糖水   係用即食日本紅豆 + 日本年糕   好好好好好好好好味呀 ~

之後心血來潮想睇無線   想睇肥姐有無出場   終於見到佢喇   見佢瘦咗咁多真係好心痛   再加埋螢光幕 Show 肥姐以前肥嘟嘟個樣   真係忍唔住喊左出嚟呀   講真   我覺得肥姐咁辛苦都撐嚟係因為想欣宜有曝光機會   欣宜由始至終都無觀眾緣   搞咁多野做咩吖   我覺得全晚最感動係李司棋謝詞嗰刻   因為佢講: 我咩都唔憂慮   因為神的恩典夠我用   係真㗎   我真係覺得神比咗好多好多恩典我呀 ~

睇完無線睇有線   訪問梅媽媽又係喊又係講錢   我真係相信佢成日喊成日咁傷心唔係因為阿梅走咗   係因為佢無人比錢佢駛   好心啦   咁老咩都化啦   仲睇錢睇得咁緊要做咩吖   成日淨係錢錢錢   好煩呀 ~

~~~~

今朝 10 點起身立即梳洗   同里奧大人落樓下餐廳食早餐   食腸蛋麵 + 熱咖啡   而里奧大人就食五香肉丁米 + 熱華田 ($34)   之後打的番教會   勁舒服 ~

祟拜之後就同里奧大人慢步番屋企   見到 Jusco 仲做緊韓國食品節   最吸引係 Cashier 無人排除嘛   所以同里奧大人旋風式掃少少貨   話慳話慳又用咗 $120   之後去街市買 1 斤油麥菜 ($6.5) + 2 條紅蘿蔔 ($7) 咁就番屋企 ~

番到屋企又係時候食 Tea 喇   喺屋企整熱狗   每人 2 隻   唔好睇細細條   初初仲驚唔夠飽添   但食完就覺得勁飽   脆卜卜既熱狗真係好好食呀 ~

牛筋米 + 可樂 ( NOV-2007 )

尋晚要番學   所以放工即走 lu   坐架熱九真係嘈到暈呀 ~

時間校得啱啱好   可以食晚餐再行一陣商場   食咗牛筋河 + 可樂 ($22)   之後再去九龍城廣場逛逛 $10 店   之前好想好想喺 $10 店買碟   但唔知點解尋晚無咩意欲去買噃   唔通攰到傻咗 ~

尋晚番學真係有啲攰   可能之前喺公司唔駛做野   可以養精蓄銳   但呢排忙到顛   所以令到我上堂都無咩心機   仲眼瞓添呀   好在有 Extra 可以醒下 ~

番到屋企突然好想食麥當勞嘅脆香雞翼   所以就買咗 2 件 ($6) 番屋企同里奧大人一齊食   點知里奧大人話電視啱啱講緊麥當勞係 Junk Food   仲話講到佢想嘔添   唔好預佢咁話喎   激死~

尋晚 12 點幾先瞓呀   太夜喇 ~

~~~~

今朝雖然攰   但係好開心   因為可以同里奧大人一齊食早餐   去 Oliver's Super Sandwiches 食早餐   因為有 Coupon 呀   我食法蘭克福腸 + 粟米 + 煎蛋配多士 + 奶茶   而里奧大人就食煙肉 + 薯粒 + 煎蛋配多士 + 奶茶   埋單 $46   原本要 $52   因為有 Coupon    所以平咗 $6 咁多呀 ~

番到公司好忙   而 CC 又無番到工   無得 MSN 有啲唔慣添   不過好彩多野做   唔係就悶死喇 ~

晏晝里奧大人要番學呀   所以 Only me 食晏咋   第一時間番屋企出車   之後去 KFC 食脆辣雞腿包餐配可樂 ($25)   好怕 Order 呢個包   因為同麥記個辣包名好鬼似   叫錯好肉酸家嘛   再去百佳   真係無咩必要唔好入超市   唔係買下買下又會買左好多野㗎喇   我本來諗住買豬展   免治豬肉同牛仔骨啫   但行下行下又買咗1 Pack 三文魚扒 + 1 Pack 雞蛋 + 1 盒香精 + 1 包意粉 + 4 罐番茄膏 + 1 Pack 熱狗包 + 1 支大滴露   仲想買㗎   但要留番啲位擺生果先收手咋   又用咗 $249   去到商場居然有玻璃碟攤位   咁又買左 4 隻大碟 + 3 隻細碟   但超平只係 $44   你話唔買係咪對唔住自己吖 ~

之後再碌去街市買 8 個橙 ($20) + 2 條茄子 ($5)   架車終於滿載而歸喇 ~

芥蘭臘味 (蒸版) + 回鍋雞柳 ( NOV-2007 )

尋日忙到顛呀   不過我好鍾意咁忙   因為時間過得好快同好充實 ~

成日一搭車就好想自己可以楂車   因為我實在太鍾意楂車嘅感覺喇   但香港養車實在太貴喇...什麼保險牌費呀   油呀   停車場費呀   洗車費    打腊費等等等等   樣樣都係要錢   真係恨下好喇   坐巴士幾好   又唔駛自己楂車咁傷神   又可以望下風景   又可以瞓下覺   睇下報紙幾好呀

是日晚餐 - 回鍋雞柳 + 芥蘭 + 臘腸拚潤腸

回鍋雞柳 - 雞柳之前已經醃好咗   但又唔想用茄汁同黑椒汁   所以就用左回鍋醬再加一個洋蔥去炒   好好味呀 ~

芥蘭 - 因為係之前買落   唔煮就要掉㗎喇   所以就灼芥蘭 ~

臘腸拚潤腸 - 就咁擺喺飯面蒸...因為突然好想食 ~

本來想整芥蘭炒臘味   但無時間   所以就咁分開嚟煮   都可以叫做芥蘭臘味吖 ~

尋晚都無跑步 lu   因為好攰   想早啲瞓 ~

~~~~

里奧大人今朝又要北上   所以又係得我一個人搭車   今朝食咗吞拿魚三文治烘底 + 熱咖啡 ($15)   又好食又好飲 ~

番到公司忙到 9 彩   晏晝帶飯   目的係想慳錢呀 ~

蠔汁燜脆肉瓜黑木耳魚片 + 蛤蚧無花果當參川貝鱷魚肉湯 ( NOV-2007 )

今朝回暖番少少   咁快又唔凍   真係無癮呀 ~

早餐又食三文治   日日唔悶嘅話   食三文治真係幾好   又唔會食到成身汗   一隻手就搞掂   非常之方便呀 ~

番到菇場忙到呢   不過越忙越開心喎   一啲眼瞓感覺都無呀 ~

晏晝去媽咪屋企附近茶餐廳食 Lunch   原來媽咪感冒   咁啱我又約媽咪   咁佢唔駛煮 Lunch 咁辛苦   好在媽咪有胃口食嘢    唔係我又擔心   希望媽咪快啲好番啦 ~

番到菇場仍然係忙   但好精神喎   我知點解   因為可能 Lunch 好耐無人陪   所以覺得好開心   一啲都唔眼瞓呀 ~

放工再要諗煮乜   菜同肉一定唔少得   好在自己識煮嘅餸唔多   唔係太多選擇都幾麻煩呀   哈哈 ~

是日懶餐 - 蠔汁燜脆肉瓜黑木耳魚片 + 蛤蚧無花果當參川貝鱷魚肉湯

蠔汁燜脆肉瓜黑木耳魚片 - 3 條脆肉瓜 + $10 鯪魚肉 + 10 塊黑木耳   用蠔油做茨汁   第一次整算係唔錯啦   不過覺得里奧大人麻麻哋鍾意食呢樣餸   但我覺得呢個餸幾有益   應該會再整 ~

蛤蚧無花果當參川貝鱷魚肉湯 - 媽咪煲㗎   滋陰補腎呢 ~

依家多數食完飯   洗完碗就同里奧大人落街散步   天氣涼涼哋都幾舒服   最緊要係比自己做下運動   因為喺屋企整完哂所有嘢   沖埋涼就真係唔願郁㗎 ~

住家飯 @ 奶奶屋企 ( NOV-2007 )

尋晚做咗啲意想不到嘅事   就係開 OT 呀   開到 5 點 55 分呀   之後約埋里奧大人一齊出發去奶奶屋企食晚飯 lu ~

尋晚天氣唔錯   所以同里奧大人選擇唔搭小巴   而慢慢行去奶奶屋企   我發覺身體好似好咗   因為行成 20 分鐘都無喘氣   而里奧大人就慘啲   因為佢揹埋個 Laptop   再加上鼻塞   所以比較辛苦啲   係咁扯蝦   其實我覺得佢係扯蝦   但佢堅持話因鼻塞而透唔到氣   所以扯蝦   之後又突然沾沾自喜咁話去考消防員   笑死人啦   第一年齡超到唔齡   第二行兩行就喘   第三個肚腩又巨   .咪玩啦消防員 ~

去到奶奶屋企傾咗一陣就食飯 lu   有茄汁蝦碌 + 蒸魚 + 豉油雞 + 油麥菜 + 灼菜心 + 花膠石斛煲雞湯   但我晏晝餐仲未消化完   所以淨係飲湯食菜   再食少少魚同雞   食完坐多陣要走喇   趕住煲藥呀   今次真係又食又拎呀   因為奶奶買咗花膠同魚翅邊比我   講真   我真係唔識我買呢啲嘢   如果買嘅話分分鐘比人呃   因為啲人一知妳唔識就會第一時間比啲貴嘢妳   再咁講有啲咩咩咩好   對於我啲咩都唔識嘅靚女就好容易墜入圈套㗎喇   所以貴野都係由奶奶買好 ~

里奧大人尋晚好好噃   見我攰就主動幫我煲藥   算佢啦   難得唔駛煲   梗係第一時間沖涼啦   之後再上網   再做功課   希望今個星期可以搞掂份功課啦 ~

~~~~

里奧大人今朝又要北上   得我一個人坐車咋   但今朝又唔係太多人排隊等車   再加上早左到公司附近   所以我真係可以慢慢嘆早餐喇   又係食腿蛋治 + 熱杏霜 ($14)   唔知幾時會食到厭呢 ?!

番到公司忙到爆炸   連同朋友 MSN 嘅時間都少之又少   其實番到公司係咁做係咁做都真係幾  Dry 下 ~

晏晝買車仔麵   食辣魚蛋 + 炸菜 + 通菜米線 ($14)   都幾好味   最緊要係抵嘛   但又唔知幾時會食到厭呢 ?!

今朝突然好有 Mood 着長袖衫   點知出到街又唔係咁涷   仲有啲熱添   激死我呀 ~

生炒排骨 + 涼瓜燜倉魚 ( NOV-2007 )

尋日喺公司無 Mood 到爆呀   一套單做成幾個鐘   真係吖 ~

但差唔多 5 點又好有衝勁做野噃   但都唔會去到盡 lu   因為 5 點半要準時走   想早啲番屋企做家務呀 ~

一放工里奧大人就打比我問晚餐食咩   我話好攰唔想煮   同埋無 Idea 煮咩好   所以出去食喇   費事諗呀 ~

番到屋企附近先去 Jusco 買韓國年糕.($20.9)   其實唔知點煮   但我覺得平所以就即買呀   記得喺韓國食過一次年糕係好煙韌好好食   所以想買嚟整下   不過我都係信唔過自己   所以會去韓國餐廳食一次年糕   再問用啲咩嚟煮   咁就搞掂唔駛諗點煮喇   好聰明呀我   最衰心急番屋企啦   唔記得順便買埋韓式辣椒醬添 ~

好想好想食辣野呀   但食緊中藥唔食得辣   人生真係有啲枯燥乏味呀   但又唔敢偷食喎   一陣要食多幾十次中藥咪仲死   忍下口啦 ~

里奧大人差唔多 7 點半番到屋企附近   由於食飯時間邊度都咁多人   所以我去攞位先   間餐廳個名好似叫花貓餐廳   講真   因為食得唔多同近屋企先去咋   我哋食生炒排骨 + 豉汁燜倉魚 + 2 個白飯 + 2 個西洋菜味精湯   好失望呀   生炒骨唔夠汁   又唔甜又唔酸   涼瓜無味   條魚就有啲腥   但要食哂佢   因為唔可以嘥嘢   食唔哂既生炒骨同涼瓜就比我帶飯   咁我可以慳番啲食飯錢買其他野喇   埋單 ($91)   之得去麥記好過啦 ~

番到屋企又開始我辛勞嘅工作喇   就係煲中藥   唔知係咪幾日無煲   倒藥既時候隻手無力   所以要出動里奧大人強而有力既雙手嚟幫一幫   之後當然要順便睇埋火洗埋煲啦   而我就唔會偷懶嘅   所以就燙衫   執屋   分工合作幾好呀   下下得我一個做真係做到發脾四 ~

之後里奧大人就去跑步   我就拖地喇   唔係又唔知幾時先有心情拖呀 ~

呢期生果多數食木瓜   以前頂盡飲木瓜奶   因為整出嚟嗰啲係毫無木瓜味嘅木瓜奶   但結婚之後就改變咗   因為朋友話雪涷好好味   無咁臭   咁又真係無咁臭喎   所以我都接受到木瓜陣味   到依家我覺得唔涷仲好味   因為香好多  但好多人都好怕食木瓜   怕嗰嗰陣味呀   我個髮型師話食咗 2 個星期木瓜   連個肚腩都無埋呀   咁吸引   難食都食啦 ~

~~~~

我發覺次次食完木瓜   朝早起身係特別肚餓   所以今朝食芝士火腿菠蘿包 + 熱咖啡 ($15) ~

番到公司好忙   但又想同 CC MSN   所以份外忙 ~

晏晝帶飯   睇下報紙咁又過咗半日   即係邁向中年嘅時間越嚟越接近 ~

灣仔碼頭韭菜豬肉水餃 + 福字麵 + 灼芥蘭 ( NOV-2007 )

尋日成日做做做   真係好鬼攰呀   所以晚餐都係以簡單為主   就係灣仔碼頭韭菜豬肉水餃 + 福字麵 + 灼芥蘭 ~

尋晚放工搭巴士見到有個後生仔   睇對腳既長度似 11-12歲   坐電單車後座   仲要係唔捉住司機   我覺得好危險呀   拋咗出嚟點算呀   睇見都牙煙   不過佢可能係好 Enjoy 嘅 ~

落車即去超市買一盒灣仔韭菜水餃 ($12.9)   再速入街市買芥蘭 ($10/2 斤) + 4 個橙 ($10) + 3 個木瓜 ($10)   之後番屋企開火煲藥喇 ~

一路煲藥一路拻菜同浸菜  其實除咗睇火   真係無咩野做   但都好似好忙咁   真係精神緊張呀   到里奧大人番到屋企就開始煮晚餐喇   灼完芥蘭就煮水餃麵   呢餐飯真係易煮   本來想自己包雲吞㗎   但好攰   所以買急涷算喇 ~

食完洗碗   抖 1 個鐘就同里奧大人跑步 lu   但唔知點解我次次徑步都無汗既 ?!   人家想出汗減肥嘛 ~

番到屋企即沖涼   之後再食橙   好嘆呀 ~

~~~~

呢排天氣比較涷   所以要早啲起身煲滾啲中藥再放入保溫壺   如果唔係等到晏晝飲嘅時候會涷冰冰好難飲 ~

今朝食吞拿魚三文治烘底 + 熱朱古力 ($15)  慢慢食幾好呀 ~

番到公司又有一大疊單要做呀   真係有排忙呀 ~

晏晝同媽咪去翠園飲茶   因為媽咪又煲左愛心北芪南棗豬展湯比我飲呢   太好喇   呢排都無咩湯水補下   同媽咪合力叫咗上湯炒飯 (1 細碗嘅楊洲炒飯 + 上湯   即係泡飯啦但唔好食囉)  + 桂花龍鬚蛋散 (龍鬚糖好味   蛋散好鬆脆) + 麻香胡椒包 (好油好漏) + 水晶粉蒸排骨 (好味但好油) + 黃沙豬潤腸粉 (好多豬潤   好味)   今餐我請   埋單 $156.2   好飽呀   可能飲咗 3 碗湯   所以樣樣都係食剩一半   嘥哂 ~

番到公司又要拚條老命做野喇   加油加油 ~

煙三文魚凱撒沙律 + 乾蔥紅酒汁燒西冷扒 ( NOV-2007 )

尋朝 9 點已經起咗身 lu   因為要帶晴晴出九龍灣之後再番教會 ~

同晴晴 里奧大人去 Delifrance 食早餐   我食炸鱈魚柳 + 炒蛋及粟米配百吉包   里奧大人就食烘芝士火腿蛋法包   而晴晴就食香腸 + 煎蛋 + 火腿扒及粟米配九穀多士   全部飲蘋果汁   環境 OK   可能我哋坐梳化比較 Relax   但我份早餐真係好難食  塊魚柳好油又苦   個包簡直係超級隔夜   我覺得有啲苦苦哋添呀   總之就係難食啦   之後埋單 $101   以前唔駛 10% Service Charge 㗎   唔知係咪唔想咁多保險 Sales 同客人喺度傾野呢   因為我次次見親都有 3-4 枱係傾保險   飲 2 杯野傾 2 個鐘  啲食市肯定唔 Like 啦   所以我覺得因為咁而收 10% Service Charge ~

送完晴晴去地鐵站   我同里奧大人就開行 Turbo 番教會   散會就即同家姐打的去拜祭爸爸   拜祭完就打的去官塘   求其食車仔麵醫肚   因為仲要趕下一場   我同家姐 Share 食辣魚蛋 + 芝士腸 + 牛柏葉 + 魷魚 + 豬腸 + 生菜米粉 + 忌廉   而里奧大人就食男人餐   牛腩 + 辣魚蛋 + 餃子 + 生菜米粉 + 豆漿 ($65)   啲嘢食就無咩好食   但個辣汁就好正   好香唔會辣到妳死死下嗰隻   但可惜比較油   食完就搭小巴去荃灣   之後再打的去拜祭公公   好在去度先肚屙   唔係就唔知點算好喇   自從 N 年前減肥之後   一食啲油膩野就會即肚屙   好麻煩 ~

拜祭完公公後就搭小巴落番荃灣   本來想同里奧大人行 Jusco $10 店   但家姐話我口唇都白埋   仲敢去咩 ?!   所以同家姐道別後就同里奧大人搭巴士番屋企   實在唔多舒服喇   里奧大人話可能頻頻樸樸喎   但我覺得好似成日淨係坐車坐車坐車咁囉 ~

番到屋企附近見吉之島做韓國食品節   所以拖着疲憊不堪既身軀入去睇下有無筍野買   今次里奧大人就有收鑊喇   買左 8 個辛辣杯麵   聽到人哋話好食嘅海鮮味杯麵   所以買 2 個   之後真係要番屋企 Hea 下喇 ~

抖到差唔多 7 點就出街食飯   唔想食飽肚嘅嘢   所以就去食西餐   食咗煙三文魚凱撒沙律配西柚汁 + 乾蔥紅酒汁燒西冷扒配薯菜 + 餐湯羅宋湯 + 涷檸樂   咩事呀   今日叫親咩都好難食   西冷扒個汁真係難食到難以形容   好在個湯同沙律 OK 咋   唔係比里奧大人丙到9彩之後要我食哂就死喇 ~

番到屋企就睇下電視   雜誌   而里奧大人就懷着興奮嘅心情咁獨自去跑步   咁我就仍然留喺屋企 Hea 下   之後去沖涼   又睇陣電視   里奧大人跑完之後就切生果比我食   今晚好嘆呀 ~

~~~~

里奧大人今朝要北上   加上係星期一   所以搭車時顯得份外孤單 ~

今朝食腿蛋治 + 熱杏霜 ($14)   好似好耐無食過三文治咁   所以覺得好好食 ~

番到公司大把嘢做呀   但 Holiday Mood 仲喺度 ~

晏晝食牛筋米 ($18)   好味但食唔哂 ~

彩福酒家 ( NOV-2007 )

星期六晏晝唔駛番工實在太好喇   仲要對於一個唔舒服嘅人嚟講就更加更加好添呀   可以早啲番屋企休息嘛 ~

次次星期六都要等成半個鐘頭先可以上到車   所以索性打的去里奧大人公司附近巴士站一齊番屋企好過喇 ~

番到屋企附近都係唔係咁想食野   所以就同里奧大人去茶餐廳食奶醬多 + 干炒三絲意粉配熱檸蜜   兩個人食只係 $24   又有位卡位座   真係抵到爛呀 ~

番屋企即沖涼即瞓覺   3 點半瞓到 6 點   仲瞓得好好添   咁即係代表今晚唔駛旨意可以瞓到 ~

由於夜晚里奧大人屋企人會同奶奶慶祝生日   所以必須即刻梳洗出發   去到酒樓又話差唔多開席   但差唔多搞左成個鐘先得   啲侍應效率奇差呀   而食物就 OK    因為擺酒啲食物都係千篇一律無變化 ~

食完就同里奧大人慢慢行路番屋企   天氣極好   所以好 Relax ~

番到屋企沖埋涼   睇下電視   好似有啲攰   所以上床瞓   點知上到床又瞓唔着噃   典嚟典去   典到成兩點幾先瞓着   仲要係成晚都係瞓下醒下   次次瞓完晏覺夜晚實瞓得唔好 ~

燒賣 + 腸粉 (外賣) ( NOV-2007 )

尋日都係唔舒服   但唔係咁想請病假   唯有做下瞓下咁   好在老細 4 點幾走   我就索性唔做野瞓覺   最緊要係校好手電鬧鐘   唔係瞓到放工都唔知就死喇 ~

番到屋企又係即沖涼 "灘" 喺梳化度瞓   咩都唔理係咁瞓呀   瞓到里奧大人打電話嚟問想食乜   我話無胃口   求其買串燒賣啦   點知里奧大人驚我唔飽又買埋腸粉比我   佢自己就食車仔麵 ~

我話咁多點食呀   唔舒服仲比我見到咁大堆野   真係睇見都驚   最後我都淨係食咗 3 粒燒賣同 3 條仔腸粉   之後又再瞓   剩番嗰啲唔知里奧大人有無食埋去呢 ?!

瞓到 9 點幾   CC 打嚟傾左 20 分鐘   之後又瞓   瞓到 11 點條頸好痛   所以即番入房瞓喇   尋日真係唔知自己做過啲咩   淨係知自己好似成日都係瞓瞓瞓 ~

雖然瞓得多   但瞓得唔好即係等如無瞓 ~

~~~~

今朝好開心   因為可以喺番工前同里奧大人食早餐   我食咗沙爹牛肉一丁 + 熱咖啡   里奧大人食餐蛋一丁 + 熱豆漿 ($40)   無咩胃口   但又想同里奧大人食早餐   所以只係食咗 1/3 同飲咗 1/3   真係食唔落   嘥鬼哂啲野呀 ~

番到公司有好多野做   但唔想做   因為仲有啲唔舒服   但只可以慢慢做   因為老細喺度 ~

好在 1 點放工   可以番屋企休息 ~

麥當勞薯條 ( NOV-2007 )

尋日每月一到搞到周身唔係咁舒服   所以無探媽咪喇   要快啲番屋企休息呀 ~

番到屋企即沖涼   之後喺梳化瞓一陣   一路瞓一路等里奧大人   尋晚真係無胃口   所以只得里奧大人一個人買麥當勞番屋企食   食雙層芝士孖寶餐   見到啲薯條好正   所以食咗 10 幾條再瞓過   瞓下醒下已經 10 點   所以都係入房瞓   舒服啲 ~

成晚想嘔   瞓得我極之辛苦 ~

~~~~

好在今朝都 OK   但個胃都係頂住頂住好想嘔   唯有食粒止嘔丸   其實唔想食   因為寫明係會令人昏昏欲睡   上次食過   真係唔夠半個鐘已經瞓我着   仲瞓得好好添   所以今朝一上車已經好眼瞓   但個胃又唔舒服   真討厭 ~

今朝唔想食早餐   但里奧大人話因為無食到野所以胃痛   咁我就買咗奶油多 + 熱杏霜 ($15)   買番公司食   飲哂杯杏霜   所以只能容納半塊多士 ~

救命呀   我依真係一合埋眼已經可以瞓着喇   但又大把嘢做   有成吋成厚嘅單要做呀   我一路中眼瞓一路做   慘呀 ~

正想瞓着嗰陣   媽咪打電話嚟話可以出院喇   真係太好喇   唔駛再咁心掛掛 ~

晏晝叫外賣   火腿通粉 ($11)   食完即瞓   因為今晚要番學呀 ~

車仔麵 ( NOV-2007 )

尋晚放工就即走   好在有車   所以好早就可以陪媽咪喇   家姐同里奧大人都唔得閒   所以得我同工人探媽咪   之後一齊傾下偈   睇下報紙睇下電視咁   話咁快就 8 點   要走喇 ~

坐車時問里奧大人想食乜   點知話想食車仔麵   我話又車仔 ?!   晏晝先食完車仔餸   唔想食車仔麵呀   等我諗下食乜再打比你啦   諗下諗下里奧大人又要煲藥又要洗衫就必須要喺屋企食   自己又肚餓唔想等位   咁即係食全城最快嘅車仔麵啦   諗咗等如無諗   我食通菜 + 炸菜 + 牛腩 + 炸魚皮 +米粉   里奧大人就食生菜 + 牛腩 + 辣魚蛋 + 雞翼尖 + 米線 ($42)   雖然又係車仔   但今次好食好多   終於都忍唔住食咗又香又脆嘅魚皮   真係好正呀 ~

食完嘢再晾埋衫   睇多幾頁書就要瞓喇   因為聽朝 7 點 15 分要起身到醫院抽血 ~

~~~~

今朝激死   特登早啲起身去抽血   點知等咗成半個鐘頭小巴   等左 3 架都係 Full   又無的士   真係急死人呀   最慘又毛毛雨又涷喎   好在等小巴時見到有的士   因為架架都有人坐   半個鐘頭淨係見到一架吉的咋   即上喇   番工時間好難有的士嘛   上慢啲都無呀   經此一役   下次都係瞓晏啲打的算喇   費事喺度白等嘥哂啲時間 ~

去到醫院已經有好多阿婆阿伯坐咗喺度等   好在我都係排第 20 個   我又點同啲阿婆阿伯鬥早吖   佢哋真係天未光就起身做晨運   真係好佩服佢哋   可以早睡早起   飲下茶   他他條條咁過一日 ~

如果我同里奧大人老嘅時候係咁就好喇   不過我首先要減肥先   因為老咗太肥會好論盡   又驚里奧大人老咗無力扶我呢   實我好驚自己老個樣   因為會好皺皮...好多好多皺紋   好多好多老人班   .好多好多白頭髮   瞼皮粗塌哂   要用假牙   又長氣又無記性   里奧大人仲慘   濃密頭髮變成稀疏嘅毛仔   爆牙變無牙   好可怕呀   唔諗喇 ~

抽完血就要即走喇   想暖啲   所以去附近買粢飯 ($9)   好慘呀   一路坐車一路食咋   我覺得好似成個男人咁   因為我覺得男人先會食咁飽嘅早餐 ~

10 點幾番到公司   沖杯華田   再飲埋啲中藥   點知胃痛呀   可能太飽喇   晏晝就食腸仔包 ($4.8)   之後瞓覺   因為每月一到   有少少唔舒服   同埋好攰   所以要休息~

牛雜河 + 牛肚河 + 淨雲吞 + 菜心 ( NOV-2007 )

尋晚放工即飛奔探媽咪   好在見到媽咪都好精神   媽咪今次真係唔驚噃   因為入院係覆診時心律唔正常   要轉一轉藥嘅份量   所以留院觀察   咁都好啲   唔駛我咁擔心 ~

6 點幾里奧大人同家姐都到 lu   傾下傾下又到 8 點   又要走喇 ~

同里奧大人真係心靈相通   因為大家都想食牛雜河   聽到家姐都想食   但奈何工人煮咗飯   所以佢唯有等下次啦 ~

同里奧大人食咗牛雜河+牛肚河+淨雲吞+菜心+忌廉 ($75)   好想食魚皮㗎   但飲緊中藥要戒口   里奧大人仲論盡   明明想食牛腩河   點知叫錯咗牛肚河   我都奇怪㗎喇   唔 Like 食內臟又會食牛肚嘅 ?!   原來餓得滯叫錯   依家喺出面食嘢啲份量真係大縮水   碗粉細碗咗 1/3   以前食親河粉都比啲粉索哂啲湯嘅   依家食完仲有成大碗湯剩呀   最搞嘢係兩次叫多蔥都變咗走蔥   唔通扮嘢聽唔到想慳番啲 ?!   次次食親河粉個肚會好脹   下次都係食米粉好啲   又無咁肥 ~

番到屋企都有時間煲中藥   所以里奧大人負責煲藥   而我就負責善後同燙衫   搞掂拿拿聲沖涼瞓覺喇   因為 Eyelid 已經落到鼻到喇 ~

~~~~

今朝好眼瞓呀   整中藥又遲咗出門口   無得比我嘆早餐添   所以買咗炒米粉番公司食   再沖杯咖啡   但硬係覺得自己沖嘅咖啡無餐廳嗰啲咁提神   不過為咗慳錢無辦法啦 ~

早餐未落格就要食 Lunch   所以無咩胃口   買咗車仔餸菜肉雲吞 (4 隻)+芝士腸 (4 條)+通菜 ($13)   真係平平平   豈有此理   啲菜少到呢   夾咗 4 次就食完哂   仲係細細撮添噃   越食越肚餓   之得叫多個米粉啦 ~

呢兩日又忙番   有啲寄託 ~

煙鴨胸 + 牛油香草炒粟米粒 + 酸甜齋 ( NOV-2007 )

尋日真係超級無 Mood   做一份單要做成 3 次先完成   對於我嚟講簡直係一個打擊   但真係集中唔到精神   唔做錯已經偷笑喇   之後再喺度諗煮乜好   諗到個頭爆炸都諗唔到   好煩呀 ~

放工喇   淨係無啦啦想食酸甜齋   其他仲未諗到   唯有問問里奧大人想食乜啦   里奧大人話食麵呀   我話唔好   之後里奧大人話又叫人諗   諗完又話唔好   咁妳自己諗啦   我唔諗喇   我又係噃   哈哈   麵無益嘛   哈哈   之後收線 ~

女人就係咁   話就就無所謂   但其實係最有所謂   所以男人必須要體諒   因為性格係與生俱來的   係無法改變的東西呢 ~

落車終於諗到食乜   就係去惠康買煙鴨胸 ($19) + 香蕉 ($6)   係咁多喇 ~

因為里奧大人見完客比我早番屋企   所以煲藥既重位就落在里奧大人手上   我番到去啱啱好煲完中藥   太好喇   唔駛煲藥真係舒服好多呀 ~

是日晚餐 - 煙鴨胸 + 牛油香草炒粟米粒 + 酸甜齋 ~

煙鴨胸 - 係現成涷冰冰既   所以用易潔鑊煎一煎   "必" 咗成 4 湯匙油出嚟呀   之後再要用煮油紙係咁索係咁索   我第一次煎一煎佢咋   原來功夫都唔少   不過就好食好多 ~

牛油香草炒粟米 - 見有時間   所以將 2 條超甜粟米續粒拻   再用前日用剩嘅麥記牛油嚟炒   上碟再落香草   第一次整   個味唔錯唔錯 ~

酸甜齋 - "自家素食" 度買㗎   水準下降咗 90 倍   但無辦法   得佢一間又太想食齋 ~

由於里奧大人要跑步   所以飯後要即刻食糖水   係隔夜腐竹白果糖水   好飽呀 ~

尋晚個人好攰   所以 10 點 40 分就要瞓喇 ~

~~~~

實在瞓得太差喇   成晚發夢   又去咗幾次廁所   好好好攰呀   飲咖啡提神呀    所以今朝食吞拿魚三文治烘底 + 熱鴦 ($15)   雖然飲半杯   但人家想戒咖啡家嘛   但實在太攰喇   算吧啦 ~

太唔開心喇   家姐打嚟話媽咪入醫院呀   因為覆診時話心跳快所以要入院留醫   好在媽咪唔係太驚嗰隻咋   唔知今次醫生又建唔建議媽咪裝起伏器呢 ?!   如果要既話就即裝唔駛煩喇   下下入院真係妳唔驚我都驚呀 ~

晏晝食完飯就即刻做功課   唔係今晚探完媽咪   食埋飯番到屋企就好夜   無時間做功課㗎喇 ~

神呀   求祢賜我精神力氣應付一切事情呀   我實在太攰喇   阿門

凡勞苦擔重擔的人, 可以到我這裏來, 我就使你們得安息. (馬太福音 11:28)