焗排骨 + 蒸節瓜 ( 2-JUL-2025 )

( 2-JUL-2025  WED )

瞓得麻麻哋   成晚好熱咁 ~

今朝里奧大人去買早餐   咁我鬧鐘響咗   佢叫我瞓多 10 分鐘   當我沖完涼   就啱啱好可以食早餐   其實我都唔會再瞓㗎喇 ~

早餐食腿蛋治+凍鴛鴦   我話飲咖啡同鴛鴦都無問題   但最緊要係少奶就得㗎喇 ~

里奧大人陪我等車   我上咗巴士都會同我揮手   我同屋企人不嬲都會咁做   仲會揮手到架車駛開為止   以前里奧大人會話我駛唔駛望咁耐呀 ?!   之後跟得我多   佢都會咁做   望到我架車走咗就停手   哈哈 ~

菇場忙呀   忙到 11 點 35 分呀 ~

7 月好開始

Lunch Time 蒸好飯就出去買菜   之後再行陣   今日好焗熱   所以流咗好多汗呀 ~

船頭又係薄荷控   所以我買呢包薄荷朱古力 Share 食

唔忙就做自己嘢   咁啱阿花又幫我整嘢   感恩終於搞掂哂   好在唔忙咋   哈哈 ~

放工即走   番到屋企都即刻煮晚餐喇 ~

是日晚餐 - 焗排骨 + 蒸節瓜

焗排骨 - 用叉燒醬醃㗎   我覺得好味過金沙骨呀   可能無咁油膩 ~

蒸節瓜 - 因為唔駛帶 Lunch Box   所以蒸 3 個細節瓜就啱啱好 ~

洗埋碗就去樓上買雞翼膇   本身里奧大人話陪我去   我叫佢熨衫好過啦   哈哈 ~

番到屋企都成身汗   我已經慢慢行㗎喇 ~

沖埋涼真係要抖下   之後同里奧大人睇埋 "弱美男英雄" 最後 3 集   我覺得個個演員都做得好好呀   同埋都有感動位   希望有第 3 季啦 ~

好好味呀   好在里奧大人都鍾意食榴槤咋

睇多陣 Youtube   今晚 10 點 45 分先瞓覺 ~

銘興山西刀削麵 @ 紅磡 ( 1-JUL-2025 )

熱拌豬軟骨刀削麵 ($55) - 食唔哂啲豬軟骨   所以打包喇

麻辣雞扒酸辣湯刀判麵 ($50) - 仍都食唔哂啲雞扒   都係要打包呢

 

( 1-JUL-2025  TUE )

感恩一覺瞓天光   仲要無發夢添呀 ~

里奧大人話原來 9 點 55 分喇   我仲以為佢呃我添   因為我無諗過瞓到咁晏嘛   平時瞓到 9 點左右都會醒呢 ~

沖埋涼就去食早餐   食完唔駛趕番工嘅感覺真係好喇   哈哈 ~

食完就去 Circle K 買 M&M   感恩買到呀   因為唔係間間都有呀 ~

$7/包咋   所以買 8 包同家姐 Share

番屋企開機洗衫同埋執嘢   搞掂就去 HKTVmall 買提子 ~

尋晚食咗覺得好甜同好脆   所以買多兩盒   每盒只係 $12.6   不過之後應該唔係呢個價錢 lu

仍然睇 Youtube   差唔多 2 點食 Lunch ~

尋晚食剩嘅晚餐加埋芝士合桃包

繼續睇 Youtube   睇到 5 點幾都要出發去食晚餐喇 ~

食完就去 AEON   一去到見到有風扇仔   只係 $59 都想買呀   但個貼紙係 $149   咁問職員   佢話應該唔會咁平   所以帶我去 Cashier 問幾錢 ?!   之後真係 $59 呀   職員話估唔到喎   叫我拿拿聲去買   好搞笑 ~

之後去買有汽酒   今次好在我比錢咋   原來 AEON 卡有 95 折呀 ~

其實 $9.9/罐都好抵   但 $15/2 罐就更加抵啦   之前係 $13.9/罐就唔捨得買呢

我話買 6 罐   但里奧大人話我咁鍾意就買 10 罐啦   我話好重喎   不過佢係都話唔重

買完就去買叉鴨飯做 Lunch Box   之後經過生果舖   我話金枕頭只係 $80 咋   上次買 $128 呀   里奧大人話買啦   我話好重喎   佢又係話唔重   但又唔比我拎 ~

番到屋企即沖涼喇   之後睇 "弱美男英雄" 最後 2 集   之後再睇埋第 2 季   一口氣睇咗 6 集   因為打鬥場面一定飛   所以睇得好快   阿花睇劇又係成日飛   所以佢話睇飛劇唔係睇韓劇   哈哈 ~

我都鍾意食提子   但一定要無核呢

睇完都已經 10 點 45 分   係時候瞓覺喇 ~

乾炒叉燒河粉 + 迷你福建飯 (外賣) ( 30-JUN-2025 )

( 30-JUN-2025  MON )

感恩一覺瞓天光呀   不過個人仍然唔多舒服咁 ~

早餐食合桃芝士包   好在覺得好味道咋   哈哈 ~

菇場忙呀   但成日好多胃氣   搞到個人有啲辛苦   做嘢都慢啲呀 ~

Lunch Time 出去行陣   突然好想食司華力腸   所以去 7-11 買常餐喇 ~

轉咗沙嗲魚蛋   但都係咖哩魚蛋好食啲

仍然忙呀   仲忙到放工   真係開心呀 ~

放工即走   船頭話尋晚落好大雨   佢老公諗住跑步   之後佢話反正都濕   落去跑囉   佢老公話彩佢都傻   我話佢病咗妳都要照顧佢啦   佢話最多咪煮白粥   你估細佬仔咩   下下要拖住佢隻手照顧佢呀 ?!   我話妳可以嘅   之後大家分開走   佢好大聲笑住叫我收聲啦   哈哈 ~

諗住買 BB 鴨   點知轉咗芝麻雞   我又唔係咁想食   所以叫里奧大人去買晚餐番屋企喇 ~

想買雪糕比里奧大人食   咁喺 CHATERAISE 買迷你朱古力甜筒啦   依家加到 $40 喇   我記得之前好似係 $32 咋

今晚沖埋涼先開餐   真係勁爽呀 ~

食完就開機洗衫   抖陣再熨 2 機衫   今晚想郁下呀 ~

搞掂就同里奧大人睇 "弱美男英雄"   連續睇咗 4 集   睇到 12 點先瞓 ~

豚肉生薑燒 (外賣) ( 29-JUN-2025 )

( 29-JUN-2025  SUN )

今朝 7 點起身   梳洗完就出發去家姐屋企   里奧大人話估唔到今朝都去家姐屋企   因為尋晚已經去咗   我話姐夫去咗旅行   我咪陪佢囉   哈哈 ~

咁我問家姐邊度等 ?!   佢答我屋企等   之後諗住上佢屋企   佢就打嚟話去邊度等   好在佢打得早   唔係我要周圍滕喇 ~

我問家姐做咩頭先話屋企等 ?!   佢話以為我問佢喺邊喎   我話奇怪無啦啦做咩要去妳屋企   仲以為想我同埋 Berry 一齊行完街先食早餐呀 ~

同家姐去茶木食早餐   難得無咩人   咁就入去食喇   其實家姐尋晚同之前都成日話去茶木   所以點都要去啦   好記得之前成日講咗好多次話想食日式燒肉飯   食完之後就無再提喇   真係唔食唔心息咁㗎 ~

三杯沙茶牛肉湯米粉 (配腸仔+太陽蛋配刈包 ($48)

加配香脆長魚柳 (+$12) - 本身想叫魚柳餐   但其實我又食唔哂成個餐   家姐話有加配魚柳呀   所以即加喇

凍台式珍珠奶茶 (+$3) - 家姐話有啲胚芽味道   珍珠都煙韌但好少   哈哈

食完去 360 買檸檬汁   之後番屋企 lu ~

家姐工人好奇怪我今朝都嚟呀   確實係好少有嘅 ~

Berry 就一定撲我先㗎喇   狗仔真係好得意   每次番屋企一定撲人   即係如果入屋 3 次佢就撲 3 次   如果里奧大人入屋 3 次   我都唔會攬佢 3 次嘛   養狗其實係開心嘅   所以都唔明點解啲人要棄狗同打狗   真係好無人性囉 ~

好乖女喎     

佢想走但唔比佢走   所以就咁嘅樣喇

家姐話唔舒服飲咗會好啲喎   但真係超級超級苦   呢隻藥粉之前喺日本大賣   因為疫情期間個個當寶㗎   

我哋無無聊聊戴工人同佢朋友副眼鏡   不過戴深色同淺色真係有分別   但工人戴咩色都靚女喎   可能佢對眼靚呀   之後佢哋又戴家姐副眼鏡   佢哋話好暈呀   鬼咩   幾百幾度近視呀   哈哈 ~

家姐有個新袋唔想用   所以送咗個袋比工人   之後我哋話好睇   工人話家姐拎咩袋都唔好睇呀   衰得佢吖 ~

同家姐傾開鬼故   家姐話最恐怖係見到隻窗有好多頭髮喺出面   但佢話唔記得係夢定係真呀   不過佢都試過間房成日熄燈   但家姐瞓覺就無啦啦開燈   我覺得呢個好恐怖呀   哈哈 ~

傾呢樣嗰樣又到 1 點   係時候要走喇   所以佢同 Berry 送我搭車喇 ~

里奧大人又未放工   咁我去惠康買奶茶   感恩做特價 $44/2 Pack 呀   咁買 4 Pack 仲有 77 折   本身諗住原價 $28/Pack   依家特價真係平好多㗎 ~

買完打比里奧大人   佢話可以放工   咁約佢喺大家樂等喇 ~

點知里奧大人差唔多 15 分鐘後先到   我又趕住同家姐交收   所以我唔食喇   佢就改為買外賣番屋企食呢 ~

同家姐交收完就番屋企   我食咗少少炸肶就再食藥   之後同里奧大人睇 "旅行最緊要近"   農夫真係好搞笑   所以即刻喺 Youtube 睇番之前幾集呀 ~

睇到 5 點左右   里奧大人就瞓一陣   我就睇其他嘢喇 ~

差唔多 8 點先叫里奧大人買晚餐番屋企食   今日狀態唔好   都唔係咁想煮呢 ~

食完抖陣就沖涼   同里奧大人一齊睇 "弱美男英雄"   最正係得 8 集   同埋每集 45 分鐘   咁唔駛追咁耐   哈哈 ~

不過今晚只睇咗 2 集   因為我 10 點 45 分都要瞓覺 lu ~

TOKENYO 韓式烤肉料理 @ 將軍澳 ( 28-JUN-2025 )

粟米芝士炸雞 ($98 帶骨) - 味道好一般

海鮮香蔥煎餅 ($58) - 煎得唔夠香脆

香芒百香果籽氣泡水 ($28) - 呢杯好飲呀   好在叫 1 杯先咋   我飲咗幾啖都好脹胃呢

可以夾 2 次公仔

( 28-JUN-2025  SAT )

尋晚瞓得都唔錯   不過好多時都係 7 點唔夠就醒醒哋咁   但真係唔想咁早起身囉 ~

沖埋涼就去買麵包喇   今朝早餐食碎蛋豬柳包   唔知係咪唔餓   所以覺得食完好滯   哈哈 ~

星期六唔會咁早番菇場   唔想又坐大堂等開門呀 ~

菇場唔忙   咁上網睇下嘢又傾下偈   啲時間都好快過嘅 ~

放工去買龜苓膏比家姐   之後買埋午餐就去里奧大人公司一齊食 lu ~

食完要去 LA 活動嘅司儀綵排   3 點半搞掂   我即刻去家姐屋企喇 ~

我一入屋   Berry 怪叫又大力撲我嘛   工人朋友即刻話 Berry 真係好鍾意新媽咪太太   之後工人又再話 Berry 唔會咁撲太太㗎   所以 Berry 真係好鍾意新媽咪太太   我話因為唔係成日見到我嘛   Berry 知道邊個係主人㗎   落街唔會跟住我呢 ~

打喊露

係咁 "攣" 我   所以成條裙都係佢啲毛

之後唔會理我囉   所以我成日同工人講   唔好再話 Berry 好鍾意我喇   哈哈

頭先食完嘢好熱   咁入到冷氣房又吹住條頸   之後覺得唔係咁舒服添   諗住飲益力多酸酸哋好啲   點知飲完仲反胃   哈哈 ~

好在瞓咗一陣又好似好啲   不過仍然有啲反胃 ~

挨住我瞓呀   但可惜我要走啦

家姐 7 點鬆啲到餐廳   但我其實唔餓   所以話唔食烤肉   同埋唔想同家姐講話唔係咁舒服囉 ~

一坐低就比麵包比我   因為佢今日經過地鐵站   特登買比我呢 ~

FRESH FRESH BAKERY 合桃芝士包

個人有啲不在狀態   好在家姐多嘢講咋   哈哈 ~

食到 8 點幾   之後行一陣就走喇   估唔到見到工人同 Berry 去街   工人話 4 個人帶住 1 隻狗行街好搞笑   我話係誇張啦   唔知以為 Berry 女好惡呀   哈哈 ~

番到屋企見到里奧大人食完麥當勞晚餐   好在無留薯條比我食咋   但佢買咗 4 個芋頭批   不過我唔係咁舒服   唔想食呢 ~

同里奧大人一齊睇 The Equalizer (叛諜裁判)   估唔到幾好睇喎   因為之前錄嘅   每 10 分鐘就有廣告   怪唔得做兩個半鐘啦   哈哈   不過我睇到 11 點都瞓喇   留番下半 Part 聽晚再睇 ~

午餐肉 + 福花 ( 27-JUN-2025 )

( 27-JUN-2025  FRI )

感恩一覺瞓天光呀   臨起身前個夢係里奧大人公司有慈善薑糖義賣   每粒 $10   試完就買咗 $50   之後同媽咪 家姐 里奧大人同一班教友一齊食自助餐   係總共有 5 張枱   由第 1 張開始去拎嘢食先嘅   我哋係第 2 張   我記得有蝦餃   因為家姐話我無幫里奧大人拎蝦餃   之後鬧鐘響 lu ~

早餐食丹麥條+甜餐包+尋晚剩嘅牛油多士   食到有啲驚   哈哈 ~

菇場忙咗陣   搞掂就做自己嘢喇 ~

阿花比啲筍嘢我呀   所以請佢請包朱古力喇

Lunch Time 蒸完飯就出去行下   忍唔住買咗半份燒賣 + 1 隻粉果   因為好想食呀 ~

今日食福花+芋絲+少少雞肉   已經加咗麻辣醬   但其實都唔係咁想食   哈哈

唔忙就繼續做自己嘢   又睇下討論區   其實都學到好多嘢㗎 ~

放工即走   今晚煮麵   所以要等埋里奧大人番到屋企先煮   好在佢 6 點半番到屋企咋 ~

是日晚餐 - 午餐肉 + 福花

午餐肉 - 呢啲罐頭儲備一定要有   同埋我只係焗熱   夠哂方便呢 ~

福花 - 雖然都鍾意食   但食埋呢餐要停一停喇 ~

洗埋碗就做小清潔   之後沖涼休息喇 ~

睇下 Youtube   今晚 10 點 50 分先瞓覺 ~

迷你福建飯 + 鮑片通粉餐 (外賣) ( 26-JUN-2025 )

( 26-JUN-2025  THU )

感恩瞓得都唔錯   不過里奧大人今朝仍然有少少肚屙   所以叫佢喺屋企休息喇 ~

早餐食半條丹麥條   呢個份量啱啱好 ~

菇場唔忙   可以抖下 ~

Lunch Time 出去行陣再去食水餃米   我之前同里奧大人講話間唔中出去食都唔錯   佢話唔覺喎   因為覺得帶飯真係好方便   唔想成日諗食咩呢 ~

估唔到好忙呀   差唔多 4 點先搞掂 ~

放工即走   買埋晚餐就番屋企喇 ~

食完抖陣就開機洗衫   沖埋涼就熨衫 ~

里奧大人話睇埋 "我是遺物整理師"   我覺得套劇真係笑中有淚   我睇 2 次都有喊呢 ~

睇完要睇 Bao Family 笑下呀   所以 10 點 45 分先瞓覺 ~