辣肉腸炒意粉 + 味噌沙甸魚 ( 14-JUN-2025 )

( 14-JUN-2025  SAT )

今朝熟睡到 7 點 50 分   咁見里奧大人未起身   我又再瞓到 8 點 48 分   之後里奧大人問瞓唔瞓   我話都想再瞓下   終於瞓到 9 點 45 分先起身呢 ~

沖埋涼就同里奧大人出去食早餐   瞓夠就想食豐富啲   平時番工就真係唔會㗎   始終我又早食午餐   就算瞓夠都唔會咁食   哈哈 ~

食完番屋企又執下間屋   之前買落好多嘢要做分類呀   我同里奧大人講話依家做嘢好慢   佢話我唔慢呀   同埋又睇住電視呢 ~

我次次話屋企好污糟同埋做嘢慢   佢次次都話唔係吖   屋企好乾淨呀   唔駛執啦   佢好怕我好辛苦   覺得放假就喺屋企休息下啦   不過我其實真係精神先會做嘢嘅   依家體力真係大不如前喇   以前食完早餐就係一氣柯成做大清潔   但依家係慢慢做仲要分幾 Part 做   好在我晚晚都有吸塵   大清潔就做少一樣嘢喇   哈哈 ~

搞掂都已經 12 點幾   里奧大人要番工   我就靈修個半鐘 ~

好想食榴槤   所以去街市買   但今日好焗熱   我要慢慢行 ~

買完再去樓上拎芒果乾同買雞翼   咁又已經用咗個幾鐘 ~

番到屋企擺好哂所有嘢   之後又要出發買午餐去里奧大人公司喇 ~

差唔多 3 點先開餐   好在里奧大人唔餓咋 ~

忍唔住買咗杯 38 奶霸   其實飲呢杯都好飽㗎   因為有黑糖珍珠+仙草+蒟蒻呢

食完就番屋企抖下   之後就番崇拜 lu ~

榴槤好似 18/磅   呢個只係 $100   但我買完先醒起問係咩國家榴槤   佢答越南   不過聞落都開嘅

買咗 2 包黑芝麻丸同黑芝麻芡實桃桃糕   因為覺得口感幾煙韌咁

崇拜完畢就番屋企煮晚餐喇   里奧大人 8 點先放工   之後唔駛咁早煮定啦   哈哈 ~

是日晚餐 - 辣肉腸炒意粉 + 味噌沙甸魚

辣肉腸炒意粉 - 今次煮 1 條辣肉腸同 1 束意粉就夠喇   因為我要留肚食榴槤呀 ~

味噌沙甸魚 - 焗到好乾呀   成日覺得里奧大人都幾慘   無魚食都算   連罐頭魚都焗到咁鬼樣   哈哈 ~

洗埋碗就開機洗衫   之後沖涼休息喇   同里奧大人一齊食榴槤   估唔到又幾好味喎   係我鍾意嘅 Creamy 口感 ~

食完就再睇 "血謎拚圖"   我哋覺得大結局有啲爛尾囉 ~

我同里奧大人講話今晚唔係咁眼瞓   佢話我瞓得夠嘛   咁又係嘅 ~

之後再睇 "我是遺物整理師"   我之前自己一個人睇哂㗎喇   原來里奧大人之前睇咗幾集   不過我都再睇都覺得好好睇呀 ~

睇到 12 點都眼瞓 lu   要即刻瞓啦   對我嚟講升好夜喇   哈哈 ~