香煎龍脷柳 + 蒜蓉薑粒炒青豆 + 隔夜湯 ( MAY-2008 )

好耐無食過魚   所以同里奧大人去 Jusco 買急涷龍脷柳做晚餐喇 ~

天氣好焗   咩都無 Mood 做   里奧大人又做功課   又無電視好睇   所以求其執下櫃   Mark 低一部份食物同調味料嘅份量同 Expiry Date   唔駛到時又過哂期嘥哂啲嘢嘛 ~

想他他條條睇獎門人   所以 6 點幾就 Ready 晚餐 lu ~

是日懶餐 : 香煎龍脷柳 + 蒜蓉薑粒炒青豆 + 隔夜湯

香煎龍脷柳 - 平時就會用黑椒汁   但里奧大人啱啱好番唔想食辣   所以就用韓國醃雞肉醬料做汁   甜甜哋幾好味   我好怕整魚   次次整完原都覺得條魚好腥好難食㗎 ~

蒜蓉薑粒炒青豆 - 前日炒蛋用淨嘅   所以食埋去   不過我覺得好難炒   因為唔識睇熟唔熟   所以炒 7 分鐘焗 5 分鐘   咁應該熟喇啩 ~

隔夜湯 - 超甜超多湯渣 ~

食完洗完沖埋涼   再有時間比我敷 Mask   之後時間啱啱好   可以同里奧大人坐定定睇獎門人   不過今集啲嘉賓唔係咁吸引同埋咁好笑囉 ~

~~~~

今朝里奧大人無帶電話   同埋出門口無關鐵閘   咁都得嘅 ~

要比番電話里奧大人   所以喺里奧大人公司附近食早餐   食腸仔蛋炸菜肉絲米 + 奶茶 ($19)   一食一路等里奧大人拎番電話呀 ~

番到菇場無嘢做   晏晝公司同同事去美心皇宮 Farewell   有 Free Lunch 幾好呀 ~

我好鍾意睇酒樓出面果寫住啲咩府咩府聯婚㗎   因為有啲真係好搞笑   家姐話見過有間酒樓有兩個牌左右寫住毛錢聯婚 何府宴客 (偕音: 無錢聯婚 何苦宴客)   都唔知係咪有心玩嘢呀 ~