咖哩薯仔雞扒 + 墨西哥烤餅 ( 30-NOV-2022 )

煮多個拉麵同里奧大人 Share 食

( 30-NOV-2022  WED )

尋晚半夜去咗 2 次廁所   不過都預咗㗎喇   始終飲咗蕃茄湯   好鬼利尿呢 ~

今朝 7 點 15 分都起咗身   咁整早餐   搞掂哂都已經 7 點半   可以刷牙沖涼了 ~

早餐食芝士排包   里奧大人就食花生醬排包   因為我想清埋樽花生醬   哈哈 ~

菇場唔忙呀   咁抖下啦 ~

Lunch Time 去一田買嘢   今次買咗好多重嘢   所以唔想再行去買午餐 ~

有購物車真係買得好爽   因為完全唔覺重嘛   所以一放入袋就出哂事

我攰到要番埋位放低先去 Pantry 整烏冬食呀   今日突然好想食 ~

仍然唔忙   準時放工 ~

放工即走   番到屋企都即刻預備晚餐 lu ~

是日晚餐 - 咖哩薯仔雞扒 + 墨西哥烤餅

咖哩薯仔雞扒 - 都係用田師傅咖哩包   但好辣呀   今次加埋紅蘿蔔同腸仔一齊煮   又可以食多餐   哈哈哈哈 ~

墨西哥烤餅 - 我唔知焗燶咗塊烤餅   一開焗爐全屋係煙呀   嚇到即刻開哂啲窗同開大風扇   真係勁驚囉 ~

沖埋涼就同里奧大人睇 SPY   睇住 2 集先   因為里奧大人又要整其他嘢 ~

CHD 千島丸龜讚崎烏冬 ($27.9/2包) 

讚崎五人眾蕎麥麵 ($31.9/2包) /  讚崎五人眾烏冬 ($31.9/2包) - 阿花話平   咁我又買 4 包啦

益力多 ($22.5/2排) / 丹麥紫堡牌馬蘇里拉碎芝士 ($59.9/2包) - 芝士好抵呀   平時 1 包都要接近 $40

三幸杏仁芝士餅 ($22.9/2包) / 藍鑽石鹽焗杏仁包裝 & 藍鑽石煙焗杏仁包裝 ($64/2包) - 係時候要買啲果仁食下

新東陽豬肉鬆 ($49.9) - 里奧大人鍾意食   所以買定一罐喺屋企

依家我買啲咩   家姐都話同工人兩份   所以我依家買嘢要買 4 個人嘅嘢   哈哈哈哈 ~

今晚 10 點都開始眼瞓   睇 Youtube 都睇到瞓着咗   一開眼已經 10 點半   咁都去瞓覺 lu ~

香煎蓮藕餅 & 香煎鯪魚餅 (外賣) + 蕃茄薯仔南瓜湯 ( 29-NOV-2022 )

( 29-NOV-2022  TUE )

今朝瞓到 7 點 20 分都醒咗   咁起身整早餐 lu ~

早餐食牛油排包 + 朱古力牛角酥   有兩款麵包都唔錯   但肯定唔會成日出現   哈哈 ~

菇場唔忙   又可以抖下   每月一到比較攰 ~

Lunch Time 一定要出去行   因為難得有陽光呀   買埋菜同餸就去買紅腸酸辣米線   無啦啦好想食佢呀   哈哈 ~

菇場仍然唔忙啦   準時放工 ~

番到屋企就即預備晚餐   里奧大人已經同我翻熱啲湯   所以慳番好多時間呢 ~

是日懶餐 - 香煎蓮藕餅 & 香煎鯪魚餅 (外賣) + 蕃茄薯仔南瓜湯

香煎蓮藕餅 & 香煎鯪魚餅 (外賣) - 諗唔到食咩就買呢啲啦   同埋呢啲餸都適合帶飯嘛 ~

蕃茄薯仔南瓜湯 - 飲湯都飲飽   咁樣都唔錯㗎 ~

洗埋碗就整咖哩   搞掂哂都 8 點半   拿拿聲沖涼休息了 ~

家姐尋晚扭親腳   工人眼濕濕話駛唔駛搬屋 ?!   咁樣近啲去睇醫生   咁又幾感動嘅   佢又好鍾意家姐陪佢食飯   話好開心 ~

工人有時好鬼搞笑   話點解家姐無腳毛   佢有好多   姐夫話有毛先有錢   之後工人話咁 Berry 咪好有錢 ?!?!   呢下真係比佢笑死   家姐話人點同狗呀   我話 Berry 有錢又點 ?!   會加人工比妳咩   真係笑死我 ~

今晚里奧大人要整啲嘢   所以唔睇波   咁我都睇 Youtube   好耐無睇咁喇 ~

唔睇波都係 11 點左右瞓   可能慣咗呢段時間瞓   哈哈 ~

夫妻肺片套餐 + 滋味豬扒套餐 (外賣) ( 28-NOV-2022 )

叫咗 2 個套餐   有飲品 (芒果果汁 & 百香果果汁) + 小食 (手拍青瓜 & 涼拌大豆芽) + 白飯

夫妻肺片 - 份量都唔少喎 

滋味豬扒 - 好乾呀   好在個汁好味道咋

里奧大人又可以帶飯   另外 1 盒白飯就留番聽晚食呢 

( 28-NOV-2022  MON )

感恩尋晚瞓得都唔錯   起身都無咩難度 ~

早餐食朱古力牛角酥   細細個都唔錯㗎 ~

菇場今朝 9 點半要全人類開會傾 System   一傾又傾到 11 點 45 分   本來話繼續   但我哋 Lunch Time 要下半場再續呢 ~

行咗 DASIO 再去買麵包   之後買埋水餃米就番菇場 lu ~

菇場唔忙   同埋好在下半場唔駛入去咋   8 卦話聽到眼瞓   哈哈 ~

我好多時叫外賣   都會叫家姐估我食咩   但今次係問家姐會食咩   所以佢咁答真係笑死我   佢真係好慘   哈哈哈哈

放工即走   買埋外賣番屋企慢慢食 ~

食完抖陣就番學   差唔多 9 點半先落堂 ~

番到屋企即沖涼   之後即睇南場對加納下半場   呢場又係好緊張 ~

今晚 11 點鬆啲都瞓喇   好在眼瞓   哈哈 ~

肉醬意粉 & 薄餅 + 蕃茄薯仔南瓜湯 ( 27-NOV-2022 )

 

( 27-NOV-2022  SUN )

今朝同里奧大人一齊番工   下個月都係咁   睇嚟我都適應咗咁早起身   哈哈哈哈 ~

依家鍾意一個早餐 Share 食   咁樣唔駛咁飽   加上一陣早食午餐   就更加唔會食兩個餐添

食完早餐又同阿妹傾下偈   之後都要番學同埋開簡介會   搞掂哂就要去番崇拜了 ~

今日里奧大人要開會   所以買午餐喺佢公司食呢 ~

佢食完都要即刻去開會   我就去買餸喇 ~

番到屋企放低哂所有嘢就去做運動   之後睇聖經   今日又睇咗 1 個鐘頭聖經   實在太好 ~

4 點開始滾湯   搞掂哂都已經 5 點   切粒粒真係最花時間呢 ~

好記得有次煲湯落得太多料   個湯直頭滾唔起呀   自此之後就唔敢落咁多料囉

開機洗衫再大清潔屋企   今日都唔聽歌做家務   咁樣可以快啲咁㗎 ~

6 點半沖個涼   里奧大人差唔多 7 點先開完會   我都預備晚餐了 ~

里奧大人同事嘅手信   我覺得好靚呀   我好鍾意食米餅   家姐話估我唔到

是日晚餐 - 肉醬意粉 & 薄餅 + 蕃茄薯仔南瓜湯

肉醬意粉 & 薄餅 - 薄餅焗熱就方便   但肉醬意粉就落鑊炒熱呢 ~

蕃茄薯仔南瓜湯 - 6 個蕃茄 + 5 個澳洲小薯仔 + 南瓜 ($12)   我都鍾意飲呢啲齋湯   因為無咁油 ~  

洗埋碗就沖涼   差唔多 9 點先睇錄咗嘅法國對波蘭   呢場都刺激呀 ~

睇錄影都係 11 點瞓   我同里奧大人講話如果世界盃做半年   我就死得   因為成日要咁夜瞓   點知里奧大人話唔係妳死呀   係啲球員死呀   我話點解呀 ?!?!  佢話因為係短時間踢一場呀 ~

怪獸多寶大批 (薄批) + 炸雞 3 件 招牌肉醬焗意粉 (外賣) ( 26-NOV-2022 )

怪獸多寶大批 (薄批) - 餅皮脆得嚟又有啲煙韌   唔錯唔錯   食剩 4 塊就留番聽晚   里奧大人成日以為唔留得   我話焗爐焗熱咪得囉    

炸雞 3 件 - 估唔到咁細件   哈哈   所以今晚食得哂

招牌肉醬焗意粉 - 留番聽晚食

( 26-NOV-2022  SAT )

今朝 7 點都起咗身   喺度諗今日星期五有咩特價 ?!   再諗諗下點解尋日唔買定菜   咁今晚無菜食囉   之後先醒起今日係星期六 ~

早咗起身   所以烘多士   我食芝士多士   里奧大人就醬占多 ~

菇場當然唔忙啦   就算忙都無 Mood 做囉   哈哈   所以都係同阿花 Whatsapp ~

阿虫 12 點 50 分先叫我 Run Report   頭先講得又唔清楚   又要我再多一次   麻鬼煩   好在 12 點 56 分搞掂咋 ~

放工即走   買埋午餐就番屋企喇   里奧大人啱啱好放工 ~

食完就同里奧大人去裕華買話梅薑比家姐   之後又買啲零食   再行去尖沙咀買洗頭水   買完就搭車番屋企喇 ~

之前 $2x 都唔捨得買   依家特價要 $45 就直頭唔會買   加上我驚唔好食   咁無可能掉哂咁浪費   但要食咁多唔鍾意食嘅嘢   自己又好辛苦喎   哈哈 

買咗 1 大袋加埋飲品   所以勁攰   番到屋企都 5 點   我抖多陣就去買 Pizza ~

2 包小王子麵 ($30/包)  / 4 包話梅薑 & 梅 ($110)

阿齋介紹我用呢隻洗頭水   $168 都唔算貴   因為都幾大支

髮尾油   呢隻味道好香呀 

真係唔覺得天氣涼咗   我行到出哂汗   不過可能係我急步   始終唔想有倒汗水喺盒入面呢 ~

沖埋涼先食   今晚 6 點 15 分開餐   咁可以睇兩波   勁開心呀 ~

今晚睇錄咗嘅荷蘭對厄瓜多爾   呢場真係好好睇   夠哂緊張 ~

之後再睇直播波蘭對沙特   所以又 11 點幾先瞓呀 ~

燒汁焗五花腩 + 墨西哥烤餅 + 芝麻菠菜苗 ( 25-NOV-2022 )

( 25-NOV-2022  FRI )

尋晚瞓到半夜   隻左腳抽筋   我郁到里奧大人   佢仲以為我去廁所添   好在抽咗一陣無事   又繼續瞓番 lu ~

今朝 7 點 20 分起咗身   掃下地又鬧鐘響了   咁即刷牙沖涼喇 ~

早餐仍然食朱古力卷蛋   唔駛搽麵包真係慳咗啲時間呢 ~

菇場忙咗陣就可以抖   所以個人好凍   哈哈 ~

Lunch Time 就出去買麵包同菜   做番一個正常人   哈哈哈哈   最後買埋雞翼紅薯粉就番菇場喇 ~

今日個個都問我有無行一田 ?!   我話唔行啦   留力下星期先買其他嘢 ~

忙咗陣又可以 Hea   可以準時放工 ~

番到屋企都即預備晚餐   里奧大人差唔多 6 點半先放工   今晚唔做運動   叫佢沖涼先 ~

差唔多 7 點半先開餐   好在今晚唔駛睇世界盃咋 ~

是日晚餐 - 燒汁焗五花腩 + 墨西哥烤餅 + 芝麻菠菜苗

燒汁焗五花腩 - 今次係一條五花腩   唔想留一半又有排先食囉 ~

墨西哥烤餅 - 好有心機慢慢烘熱   脆卜卜勁正呀   咁樣無咁飽肚   哈哈 ~

芝麻菠菜苗 - 買咗 $10   細細棵好呀   浸到易啲啦 ~

洗完碗就開機洗衫   之後大清潔屋企   搞掂哂就沖涼喇 ~

雖然唔係睇直播   但都係 9 點先開始睇波   哈哈哈哈 ~

錄咗葡萄牙對伊朗   C 朗踢埋呢屆世紀盃咋   所以一定要睇呢 ~

呢樣都好好睇呀   下半場好緊張   賽果 3:2 都係險勝 ~

睇完都即瞓覺   因為已經 11 點了 ~

黑椒豬手 (外賣) + 福花 ( 24-NOV-2022 )

( 24-NOV-2022  WED )

感恩一覺瞓天光呀   鬧鐘未響都起身呢 ~

早餐食朱古力卷蛋   里奧大人喺另一間買嘅   無咁甜仲好食 ~

我叫里奧大人記得帶飯   佢話實記得啦   個袋掛住喺門口   咁今朝佢出門口先   之後我聽見有人入屋   原來佢番轉頭拎飯   因為佢只係拎咗個飯袋   哈哈哈哈 ~

番到菇場一坐低   就 Whatsapp 問家姐要唔要 M 巾   一田買一送一呀   之後阿爽對住手機喺度笑   仲向住我係咁笑   以為佢睇咩狗仔片   原來係我 Send 咗去公司群組呀   哈哈哈哈   勁樣衰啦   幾個同事都睇到   咁我話買就出聲啦   一陣幫妳地去買埋   最搞笑阿豪話見唔到   我話講一句要唔要買就得   哈哈 ~

隻肥豬女   真係當正係自己張床咁喎

菇場唔忙呀   又傾下計到 Lunch Time ~

又去一田買嘢   之後繼續問家姐要乜   每見一樣就問一次   好在佢 WFH 咋   真係睇股價都無咁緊張   哈哈 ~

今日買埋 2 盒泡菜同韓國金菇   加埋包澳洲薯仔   呢幾樣係最重   反而買 8 包 M 巾真係唔多覺佢存在   哈哈哈哈 ~

又係 12 點 45 分先搞掂   但我有啲餓   所以買炒麵番菇場食 ~

仍然唔忙   但整下呢樣嗰樣又到 5 點半 lu ~

放工去買餸同買生果   番到屋企都即預備晚餐了 ~

是日懶餐 - 黑椒豬手 (外賣) + 福花

黑椒豬手 (外賣) - 見 $58/份就想試下   估唔到都幾好味   其實唔駛焗熱仲好   因為唔想洗嘢   但唔知佢擺咗幾耐   所以都係焗下好啲 ~

焗完之後   我擺唔番咁靚

福花 - 買 $10/份算喇   因為想一次過食哂 ~ 

洗埋碗就抖陣   差唔多 8 點鬆啲就同里奧大人去做運動 ~

今日喺一田買嘅少量零食

ACHO 香蒜蕃茄味薯片 & 黑松露薯片 ($39.9/2包) - 咩都試下   希望好味啦

ORIHIRO 蒟蒻 ($35/3包) - 一田一做特價   我已經問家姐有咩要買 ?!   佢話咩都唔要   但我知佢鍾意食呢啲蒟蒻   所以排隊嘅時候見到有就即問佢   之後佢話抵喎   要 3 包   哈哈哈哈

沖埋涼啱啱好 9 點   可以即刻睇波   韓國對烏拉圭   雖然 0:0   但非常之緊湊 ~

今晚都係 11 點瞓   世界盃完咗   希望可以調教番到 10 點 45 分瞓呢 ~