肉醬意粉 & 薄餅 + 蕃茄薯仔南瓜湯 ( 27-NOV-2022 )

 

( 27-NOV-2022  SUN )

今朝同里奧大人一齊番工   下個月都係咁   睇嚟我都適應咗咁早起身   哈哈哈哈 ~

依家鍾意一個早餐 Share 食   咁樣唔駛咁飽   加上一陣早食午餐   就更加唔會食兩個餐添

食完早餐又同阿妹傾下偈   之後都要番學同埋開簡介會   搞掂哂就要去番崇拜了 ~

今日里奧大人要開會   所以買午餐喺佢公司食呢 ~

佢食完都要即刻去開會   我就去買餸喇 ~

番到屋企放低哂所有嘢就去做運動   之後睇聖經   今日又睇咗 1 個鐘頭聖經   實在太好 ~

4 點開始滾湯   搞掂哂都已經 5 點   切粒粒真係最花時間呢 ~

好記得有次煲湯落得太多料   個湯直頭滾唔起呀   自此之後就唔敢落咁多料囉

開機洗衫再大清潔屋企   今日都唔聽歌做家務   咁樣可以快啲咁㗎 ~

6 點半沖個涼   里奧大人差唔多 7 點先開完會   我都預備晚餐了 ~

里奧大人同事嘅手信   我覺得好靚呀   我好鍾意食米餅   家姐話估我唔到

是日晚餐 - 肉醬意粉 & 薄餅 + 蕃茄薯仔南瓜湯

肉醬意粉 & 薄餅 - 薄餅焗熱就方便   但肉醬意粉就落鑊炒熱呢 ~

蕃茄薯仔南瓜湯 - 6 個蕃茄 + 5 個澳洲小薯仔 + 南瓜 ($12)   我都鍾意飲呢啲齋湯   因為無咁油 ~  

洗埋碗就沖涼   差唔多 9 點先睇錄咗嘅法國對波蘭   呢場都刺激呀 ~

睇錄影都係 11 點瞓   我同里奧大人講話如果世界盃做半年   我就死得   因為成日要咁夜瞓   點知里奧大人話唔係妳死呀   係啲球員死呀   我話點解呀 ?!?!  佢話因為係短時間踢一場呀 ~