京都肉排飯 & 沙爹牛肉米 + 唐生菜苗 ( 13-JUL-2026 )

個汁好味呀

( 13-JUL-2026  MON )

感恩一覺瞓天光呀   仲要係鬧鐘響之前幾秒就醒添呀   之前兩晚瞓得好差   今次真係補眠成功   哈哈 ~

早餐食芝士吐司   我焗埋比里奧大人嘅   咁食兩件又好飽   但食 1 件又唔夠飽咁   所以 1 件半就最好喇 ~

菇場忙呀   咁就好啦   有嘢做精神好多㗎 ~

Lunch Time 蒸完飯就去一田買嘢   話咁快又過咗 20 分鐘   要番菇場開餐 lu ~

北海道雪華豚急凍豬梅片 ($89.90/2 件) / 北海道雪華豚急凍西冷片 ($89.90/2 件) - 之前激安嘅時候買過   估唔到咁快又做特價   所以每樣買 2 Pack

日本物什豆 ($35) - MM 鍾意食   咁就買比佢食啦

忙下停下   咁啲時間又係會好快過 ~

里奧大人 Whatsapp 話下次唔駛煮意粉   等我可以休息下   估唔到佢會記得尋晚食過啲咩   哈哈 ~

放工即走   番到屋企諗住預備晚餐   但原來里奧大人仲未放工   咁我去惠康買嘢先喇 ~

唐生菜 ($5) /  出前一丁北海道蝦麵 & 黑蒜豬骨麵 ($60/3 包)

維他港式奶茶 6 包裝 ($60/3 件) - 黑珍珠上次好眼瞓   飲咗里奧大人盒奶茶   所以我買 1 Pack 比佢   番到屋企叫里奧大人拎 Pack 比黑珍珠   佢個樣好愕然   哈哈

統一滿漢大餐牛肉碗麵 ($85) - 買 5 碗有 8 折再加埋今日有 92 折真係好抵   所以買比里奧大人喇

HARIBO 雜錦橡皮糖 ($20.90) - 船頭話想食糖   咁又買包比佢食啦

Royal Farm 泰國雞中翼 ($69.90) - 尋日無貨   所以今晚難得見到就買喇

本身諗住買奶茶同出前一丁   但拎咗戰車就可以買多啲啦   同埋今次折咗之後係 $261 都抵嘅 ~

番到屋企都即刻浸菜   里奧大人 6 點 45 分番到屋企   差唔多 7 點 15 分先食得 ~

是日晚餐 - 京都肉排飯 & 沙爹牛肉米 + 唐生菜苗

京都肉排飯 & 沙爹牛肉米 - 里奧大人今日同水姑食下午茶   佢哋唔餓但想兩樣都食   所以食唔哂就打包做晚餐喇 ~

唐生菜苗 - 其實我可以最後先淥菜   但我想快啲洗個煲   所以好多時都係煮菜先   咁啲菜就會黃咁咁呢 ~

洗埋碗就開機洗衫   之後沖涼休息喇 ~

里奧大人話今日洗咗窗簾 Cushion 套同枕頭套   咁又好呀   我成日都唔記得洗呢幾樣嘢   哈哈 ~

朱古力麻糬布甸 & 法式布甸包都好食呀

切開係咁嘅

睇下 Youtube 又打下機   今晚 10 點半都瞓覺 lu ~

梅子鴨 + 涼拌豬手 + 生炒骨 + 椒鹽豬扒 (外賣) ( 9-JUL-2026 )

( 9-JUL-2026  THU )

瞓得麻麻哋   本身諗住食 Flakes   但最後都係唔整早餐 lu ~

今朝都係里奧大人去買早餐   之後就去佢公司喇 ~

菇場唔忙   船頭講開案底   我話公司點樣 Check 到有無案底 ?!   佢話大公司有 HR 實 Check 到   我哋細公司一定 Check 唔到   除非做過大單嘢   我話做咗大單嘢都未咁快出到嚟啦   佢話 19 歲坐 30 年唔得咩   哈哈 ~

Lunch Time 蒸完飯就去一田幫阿齋買筆   買完再行陣就番菇場開餐喇 ~

筆 X 3 (HK$8/支)   再買 2 包童星企袋闊條麵雞肉味 ($13.90/包)   1 包比里奧大人   1 包就喺菇場 Share 食

估唔到忙呀   所以啲時間過得好快 ~

放工買埋兩餸先番屋企   咁 6 點半左右焗熱哂啲食物   里奧大人話 7 點先番到屋企   我見有時間就熨衫啦   本身要熨 2 機   但熨到 7 點都要停喇   要留番星期六先熨 lu ~

里奧大人 7 點 20 分番到屋企   我開始煮河粉喇 ~

是日晚餐 - 梅子鴨 + 涼拌豬手 + 生炒骨 + 椒鹽豬扒 (外賣)

梅子鴨 + 涼拌豬手 - 好想食豬手呀   所以加多份梅子鴨   里奧大人見到豬手   就笑笑口同我講我好鍾意食豬手   我話好在得 4 隻   咁今晚可以食哂   同埋呢兩款嘅汁都係酸酸甜甜   覺得好味呀 ~

生炒骨 + 椒鹽豬扒 - 帶飯就係要呢啲餸   所以依家有兩餸飯真係好方便   哈哈 ~

洗埋碗就開機洗衫   之後沖涼休息喇 ~

等埋里奧大人沖埋涼就食蕃薯糖水   連食幾晚又要停一停先 ~

睇下 Youtube   今晚 10 點 45 分都瞓覺 lu ~

燒鴨 (外賣) + 辣子雞拚雞翼 (外賣) + 金銀蛋白菜仔 ( 25-JUN-2026 )

( 25-JUN-2026  THU )

臨醒前係咁發夢   因為我想去廁所但忍住唔去   好記得有個夢係我喺尖沙咀搭車番工   但經過屋企個站就落咗車   我仲呆咗   之後想追架車都追唔到啦 ~

一起身就 7 點 25 分啱啱鬧鐘響   起身嗰下係好攰   因為起身前係不停發夢 ~

早餐食粟米火腿包   里奧大人就食丹麥條 ~

菇場唔忙   咁就做 Filing 啦   之後阿齋問我做咩 Filing ?!   船頭即刻話因為核突咪 Filing 囉   哈哈   因為我放哂喺隔離張枱   真係好阻礙眼呢 ~

之後我話我好忙㗎   阿齋同船頭即刻和應   其實大家都係講比溫總同阿爽聽囉   船頭仲好大聲話尋日上網睇到段嘢好搞笑   話突然間要幫人做嘢   就好似有人話呢個係妳嘅私生子   妳要負責任咁   真係形容得好好呀   哈哈 ~

阿齋去 city'super 買環保大袋   我本身都話買   之後船頭話等阿齋買完番嚟   睇下個色啱唔啱先買啦   又話我呢方面會忍到唔買   零食就忍唔到   哈哈 ~

同埋我話我已經有個衰仔樂園大袋   家姐又比咗個 Porter 大袋   加上我本身又好多袋   再買大袋會比老公鬧囉 ~

Lunch Time 同船頭去一田買嘢   今次我話要推車   船頭話都要呀   今日買啲嘢係濕濕碎碎好難拎呀 ~

佢又講咗西瓜啲嘢比我聽   咁之前阿怪同溫總鬧交   最後嘅處理方法先頂癮囉 ~

買完都已經 12 點 25 分   要急步番菇場開餐喇 ~

我哋 12 點 45 分先開餐呀   食完就同阿齋一齊去洗碗

船頭整嘅酸梅排骨同炒四季豆真係超級好味   阿齋話尋晚買外賣都係食四季豆   依家覺得原來出面嘅係咁難食   我話我今日食咖哩都覺得完全無味咁呀   哈哈

船頭話新聞見到有人屋企有鱷魚   我話係咪用嚟煲湯呀   佢話識劏先得㗎   呢句好笑   哈哈 ~

仍然要 Filing   感恩 4 點半先搞掂呀   如果再繼續做   我應該會手痛呢 ~

放工去大家樂買醬香雞   點知賣哂呀   所以要去買燒鴨喇 ~

雖然買咗外賣餸   但今晚要浸菜同煮鹹蛋都要啲時間 ~

燒鴨 (半隻) ($70)

淨兩餸 ($45)

依家真係好無記性   我唔記得仲有咖哩雞   但今晚真係要食埋去呢   之得唔買淨餸啦 ~

里奧大人 6 點 45 分番到屋企   咁煮出前一丁比佢食   等佢開心下   哈哈 ~

是日晚餐 - 燒鴨 (外賣) + 辣子雞拚雞翼 (外賣) + 金銀蛋白菜仔

燒鴨 (外賣) - 完全無食過呀   要留番星期六先食 lu ~

辣子雞拚雞翼 (外賣) - 辣子雞好味道呀   雞翼就留番做 Lunch Box ~

金銀蛋白菜仔 - 想食鹹蛋皮蛋   所以煮白菜仔喇 ~

洗埋碗就開機洗衫   之後染完髮就沖涼喇 ~

里奧大人 9 點開 Zoom Meeting   估唔到 10 點開完   之後里奧大人話原來要再開   但再入去嘅時候又無人   所以佢都瞓覺喇 ~

頭先食剩咗啲皮蛋同菜   咁我晾埋衫就食埋去啦   原來都已經 9 點半   感覺好似食宵夜咁   哈哈 ~

我就再睇多陣 Youtube   差唔多 10 點 45 分先瞓覺 ~

鹹肉糭 (外賣) + 菜心 ( 21-JUN-2026 )

( 21-JUN-2026  SUN )

今朝同里奧大人一齊食早餐   我食完就番屋企休息喇 ~

食剩牛油多士同 1 隻蛋   特登再叫餐肉同腸仔   咁可以加入咖哩度煮埋去呢

諗住即刻做大清潔   但又想比自己抖下先   之後睇睇下 Youtube 都由 9 點 50 分瞓到 10 點 15 分呀 ~

瞓醒就精神哂   要即刻做大清潔喇   做完都已經 12 點了 ~

沖埋涼抖陣   12 點半去惠康買嘢 ~

菜心 ($5) / 牛角燒肉燒汁 X 3 ($10/支) / 牛角特製燒肉醬油 X 2 ($10/支)

珠江橋牌金標老抽王 ($10) / 原味作家甘荀竹蔗馬蹄水 X 2 ($38 買1送1)

買完拎番屋企   之後先去買午餐去里奧大人公司 lu ~

同里奧大人 Share 食蒜蓉汁雞扒腿蛋意粉   不過我飲完碗湯已經好飽   完全食唔落意粉   咁可以做聽日 Lunch Box 喇

2 點左右走人   之後就執食物櫃同執文件   星期日多數都係留時間嚟執嘢   哈哈 ~

3 點半開始餓   所以就焗熱牛油多士同隻蛋喇   我多數加埋蒜蓉醬焗多士   咁樣好好食㗎   同埋最主要係快啲清哂兩支蒜蓉醬呀 ~

差唔多 5 點 15 分就執完   我覺得執文件係最花時間呢 ~

抖多陣就預備晚餐同埋煮定咖哩雞下髀   里奧大人 6 點半番到屋企就可以即刻食喇 ~

是日晚餐 - 鹹肉糭 (外賣) + 菜心

鹹肉糭 (外賣) - 之前 Y 姑叫 U 姐拎比我哋㗎   所以要快啲食埋去喇   但只係食咗 1 隻   咁留番比里奧大人做聽日嘅 Lunch Box ~

菜心 - 只係淥咗幾條   今晚無咩胃口食嘢 ~

沖埋涼就休息   隻右手好痛呀   可能抹嘢又用錯力   所以里奧大人幫我按下   真係舒緩好多㗎 ~

里奧大人 7 點半瞓覺   所以我都唔睇 "中年好聲音 4" 喇   之後佢 8 點 45 分起身   咁就睇 "中年好聲音 4" 啦   哈哈 ~

睇完再睇陣 Youtube   差唔多 11 點先瞓 ~

1 人蜂盛套餐 (Jollibee) @ 屋企 ( 19-JUN-2026 )

1 人蜂盛套餐 ($60) - 每人一份真係好豐盛㗎   本身諗住一飯一薯條   但落單唔記得就算啦   咁我開膠袋嘅時候   我話原來個餐係有薯條同蘑菇飯㗎   不過都食剩 1 盒蘑菇飯 1 件炸雞同 1 件香芒蜜桃批   咁留番聽晚食 lu

( 19-JUN-2026  FRI )

今朝瞓到 9 點半都醒喇   里奧大人沖完涼仲見我仲瞓喺張床度   我整鬼佢話想繼續瞓   佢即刻好快手咁幫我蓋好張被   之後係咁講話瞓覺好呀   瞓多啲好呀   我話想陪下你呀   佢話唔駛呀   我出廳睇電視   妳快啲瞓啦   瞓多啲好呀   真係好搞笑 ~

我話我都起身沖涼啦   其實我真係已經醒咗   哈哈 ~

里奧大人食完要番公司做嘢   因為之前安排咗好多嘢   驚撞哂時間   所以難得一個人喺公司就可以靜靜哋整理好去呢   咁我話我都番吖   我想幫佢執好張枱同個櫃呀 ~

差唔多 1 點就搞掂   但里奧大人仲未走得   佢話出去佐敦食午餐再行陣   不過我話咁熱唔想出去   寧願晏啲去 AEON 好過 ~

咁我去樓上買嘢   順便去麥當勞換埋杯即磨咖啡先番屋企呢 ~

急凍泰國天然雞下髀 ($46) / 珍寶鹽烤脆腰果 (帶皮) (忽然驚喜價 $19)

急凍日本北海道花豚梅片 (本週特價 $35) / 急凍加拿大天然豬排骨粒 (本週特價 $36)

忍唔住再買日本玄米茶茶包 (22包) ($23) / 北海道黑豆茶 (30包) (本週特價 $31)

1 點半番到屋企就預備午餐   里奧大人 2 點番到屋企就食得喇 ~

今朝早餐食剩嘅窩夫   不過都係食唔落   要留番聽晚食了

尋晚食剩嘅豬腩肉

樓上買嘅馬鮫魚肉燒賣

里奧大人食完就開機洗窗簾   之後仲熨衫添呀   感恩今日佢好精神   哈哈 ~

差唔多 5 點就出發去 AEON   經過 7 -11 就想食雪糕呀   今日買 1 送 1 好抵呀 ~

去完 Green Price 買蘋果山楂橘子茶就去 AEON   我第一時間就同里奧大人去睇褲   仲要係 $300/3 條仲有 95 折   我話超級抵啦   平時最平都要 $159/條嘛   咁里奧大人話無佢想買嘅款   我話等我再周圍睇下   點知真係有呀   感恩感恩   所以即刻叫里奧大人去揀   佢話買 3 條   我話買夠 6 條啦   之前特價 $159 都買 3 條   依家咁抵無理由都買 3 條嘛 ~

$300/任選 3 件

之後佢再買 2 件 Tee   只係 $99/件   最感恩係里奧大人鍾意嘅質地   之前係無呢啲質地嘅 Tee 㗎 ~

我話呢啲係我送比佢嘅父親節禮物   可以再買多啲嘢呀   不過佢話唔駛   哈哈 ~

男裝束腳褲 X 2 + 男裝工裝長褲 X 4 ($600) / 男裝短袖 Polo 衫 X 2 ($198)   總共 HK$758.10 (95 折)

諗住行超市   之後我話都係唔行   因為無嘢買   但里奧大人話行啦   睇下水果啤酒有無特價嘛   可惜無特價呢 ~

去 Jollibee 買埋炸雞就番屋企喇   番到屋企已經 7 點半   所以即刻開機洗衫   之後沖埋涼先開餐喇 ~

食完就睇 "飛馳人生 3"    睇到 11 點 40 分先瞓覺 ~

燒鴨 (外賣) ( 14-JUN-2026 )

( 14-JUN-2026  SUN )

感恩又一覺瞓天光呀   同里奧大人一齊起身   但我沖埋涼就去家姐屋企呢 ~

今朝 Berry 離遠已經聞到我陣味   我特登行去人堆   佢係咁望我嘅方向   之後再扯住 U 姐過嚟   真係勁得意   哈哈 ~

送埋佢哋番屋企就去食早餐   家姐話 Uncle 介紹咗間茶記   不過我話下次先食   因為唔想食粉麵   之後佢話又大快活唔悶咩 ?!   我話咪一星期最多兩次 ~

雞尾包+阿活珍寶炒滑蛋+煙肉+火腿湯通粉 ($40) - 食唔哂雞尾包   所以拎走喇   咁我一定有帶定食物袋同 Zipper 袋   家姐覺得我好醒咁   哈哈

阿活脆邊煎雙蛋+黑椒牛扒 ($40)

某個原因   職員比兩塊牛扒比我哋   嗰下真係有啲愕然   但過程真係好搞笑

食完就去 A1 買麵包   買完就番屋企喇 ~

積分換 1 包焦糖丹麥酥 ($28) 但我要再買多 1 包   之後家姐再買極方包 ($22) 比 U 姐

一開門   Berry 女又係咁尖叫   真係好想知佢講緊咩   哈哈 ~

U 姐喺房傾電話同打機   我問係咪放假 ?!   家姐笑住話梗係啦   唔係點夠膽咁做呀   不過好記得佢有個工人真係咁   嗰時得我喺家姐屋企   佢拎完件三文魚出嚟解凍就即入房傾電話   仲傾到好大聲   因為我睇電視都聽到佢把聲   我喺度兩個鐘咁上下   佢傾足咁耐   完全無理過 Berry 女呀 ~     

佢一入房就好難引佢出廳

我拎咗啲零食比家姐   咁佢就順便執個櫃啦   仲話依家好似我咁鍾意執嘢喎   真係笑死   我話妳買咗好多嘢   每次見個櫃都有唔同新嘢嘅   佢話平吖嘛   無理由唔買呀嘛   呢樣我都好認同嘅   哈哈 ~

之後話佢都鍾意抹嘢   最鍾意將啲碗碟係咁捽捽捽   嗰時佢工人放假   佢抹水龍頭真係抹到好乾淨㗎   同埋洗碗碟又係好乾淨   我話點解佢做女又唔係咁樣嘅   佢話佢都唔知點解   哈哈 ~

難得出廳坐

想瞓覺

仍然鍾意用衰眼望我   哈哈

話佢就扮嘢周圍望

好醜樣   哈哈

呢個坐姿好 Lady

家姐講阿莊番工啲嘢   本身有間請咗佢   咁佢番工前一晚問大約幾點番工 ?!   間店話請咗人   我話如果阿莊唔打比佢   一陣直接番咗工咪慘囉 ?!   同埋請咗阿莊就唔好再請人嘛   一係就要通知番阿莊囉   不過好在阿莊又番去舊公司做   仲要加多 4 位數字人工   咁真係替佢開心呀 ~

之後又傾下將來嘅計劃   真係樣樣都要感恩呀 ~

甩毛

同佢梳毛   真係即刻諗起朱朱

12 點半走 lu   依家天氣熱就唔帶 Berry 落街   所以家姐就直接送我搭車喇 ~

我哋兩姐妹買嘢比對方   同埋買嘢比媽咪都唔會問番媽咪攞錢   呢啲係我哋嘅習慣   但如果係我我主動叫家姐幫我買嘅   我多數會比番錢   依家有支付寶就好好多   唔駛成日搵地方攝錢   最慘自己又無記性   唔記得攝咗喺邊就麻煩啦   哈哈

無落雨就去買半隻燒鴨   之後職員話加多半隻雞只係 $108   咁都好吖   咁我唔駛再買午餐   就咁煮個麵就搞掂 ~

家姐之前喺 Uny 買嘅牛肉   只係 $99/3 盒   但姐夫唔鍾意食   家姐就比埋我喇

半隻豉油雞

半隻燒鴨

里奧大人 2 點番到屋企   咁我叫佢沖涼   我就開始焗王子麵喇 ~

食完都諗住瞓下   因為對眼好澀   但瞓唔到囉   里奧大人食完抖陣就瞓晏覺 ~

睇 Youtube 聽下歌又 5 點半   里奧大人都起身   之後佢去做機喇 ~

唔係咁餓   所以今晚 6 點 50 分先開餐 ~

是日晚餐 - 燒鴨 (外賣)

燒鴨 (外賣) - 呢個真係方便餸   焗熱就搞掂   啱哂我啲懶人   哈哈 ~

洗埋碗就開機洗衫   之後沖涼休息   里奧大人就熨衫   等佢搞掂就一齊睇 "中年好聲音 4" ~

睇完再睇陣 Youtube   今晚 10 點 20 分瞓覺 ~