辣汁洋蔥豬扒 ( 14-MAY-2024 )

家姐比嘅冬蔭味道 MAMA 麵   估唔到落咗包奶粉   味道係同餐廳食嘅一樣   哈哈

( 14-MAY-2024  TUE )

感恩一覺瞓天光呀   好耐無試過喇   我估自己應該 7 點 15 分左右醒咗   不過等鬧鐘響先起身   之後里奧大人就發出鼻鼾聲   好在我起咗身咋   呵呵 ~

今朝出去食早餐   咁可以比自己抖下 ~

菇場忙呀   所以時間好快過 ~

Lunch Time 出去行陣再食水餃上海麵   呢期都應該食上海麵㗎喇 ~

食完又行陣   不過今日有啲熱   所以行到 12 點 35 分都番菇場喇 ~

阿花問我係咪好忙 ?!   我話係呀   唔係扮㗎   哈哈   因為我做 Excel 表   私人嘢一定唔會做呢啲嘛 ~

放工即走   我叫里奧大人幫我買麵包   咁我可以直接番屋企喇 ~

里奧大人應該遲我一部 Lift 上嚟   我見佢放咗 2 碗嘢入雪櫃   之後估到係糖水啦   佢星期一已經話買比我食   不過我話食得太密啦   尋晚又問食唔食   我話唔喇   估唔到佢點都要買   仲諗住比驚喜我啦   但可惜我無啦啦叫佢買包   哈哈 ~

我就奇怪   佢頭先講咗幾次話唔好煮咁多餸   我話兩塊豬扒咋   唔多喇啩   佢話總之唔好煮咁多餸   等我仲驚佢係咪唔舒服添 ~   

是日晚餐 - 辣汁洋蔥豬扒

辣汁洋蔥豬扒 - 依家都會買定啲新鮮豬扒同排骨做儲備   今晚焗完豬扒再加汁炒兩炒   咁樣真係好方便呢 ~

洗埋碗就沖涼   里奧大人就去做運動   之後就食糖水喇 ~

抹茶凍同仙草凍嘅份量都唔少

依家我最鍾意食係芋丸 + 地瓜丸 + 粉粿

仲有珍珠 紅豆 綠豆   真係成碗都係料

再有幾嚿芋頭   所以食呢碗糖水真係可以當正餐   哈哈

難得聽日假期   所以同里奧大人睇 1 集 "死期將至"   之後再睇 "周處除 3 害" ~ 

不過今晚我都係 10 點半瞓   咁等里奧大人自己繼續睇 lu ~

泡菜牛似炒烏冬 ( 13-MAY-2024 )

( 13-MAY-2024  MON )

尋晚半夜去咗 2 次廁所呀   下次真係要 6 點前飲湯   哈哈 ~

早餐食趣脆芝士牛角酥   我覺得 MAMA Bakery 買嘅真係好香牛油味   但奶茶就無味茶味 ~

菇場超級忙呀   想抖下嘅時候   家姐打嚟搵我   咁又傾咗 20 分鐘電話   望一望個時間已經 11 點 25 分   好快就放工 ~

阿蟲 11 點 42 分打嚟話有嘢叫我做   我話我放下午   之後佢話其實啲嘢唔急    不過就算急都唔會同妳做囉 ~

放工即走   打埋簿就去里奧大人公司坐陣喇 ~

約咗家姐 1 點 25 分尖沙咀地鐵站等   但佢 1 點 15 分到咗   最邪係我哋反而要 1 點半先到   唉 ~

唔想行咁遠   咁喺診所附近食算喇   見到 PROSIT BAR & RESTAURANT 無咩人   所以入去食喇 ~

半自助沙律吧拎嘅沙律   估唔到幾好味喎   我鍾意有啲洋蔥粒呢

醃青瓜同醃蘿蔔都好吁呀   因為夠酸   可以消滯嘛

家姐坐我隔離   我影相嘅時候   聽到佢話咁核突嘅   原來里奧大人唧咗個哈哈笑比家姐同我

蘑菇湯味道 OK 啦   我覺得最緊要夠熱

德國香脆鹹豬手 (半份) 配烚薯 ($128) - 味道都唔錯呀 

個皮好脆

西冷牛扒 ($138) - 家姐話份牛扒超級細塊   佢話喺公司附近食同樣都係百幾蚊   但大塊好多同埋靚好多   哈哈

味道都係一般

炸魚薯條 ($98) - 呢個都 OK   但我哋其實都已經好飽   所以無食到啲炸皮   同埋都食唔哂啲薯條囉

食完就去診所   3 點 20 分左右開始睇   差唔多 3 點 45 分就睇完 ~

感恩家姐報告正常   其實醫生一睇個報告已經話無事   但最好半年要做一次檢查呢～

今次真係好感激里奧大人陪我哋呀   頭先有啲問題都係佢問醫生㗎咋   家姐成日聽啲又聽唔到啲咁   真係我哋仲緊張過佢囉   比佢激死～

家姐要去整嘢   咁一齊去搭地鐵 lu ~

番到屋企休息一下   終於每月一到喇   其實都覺得係㗎喇   因為呢排無啦啦好攰   平時唔會咁嘛 ~   

雖然唔餓   但 6 點左右都要預備晚餐呢 ~

是日晚餐 - 泡菜牛似炒烏冬

泡菜牛似炒烏冬 - 之後特登買 2 Pack 牛梅花肉做儲備   前一晚解凍就可以   所以好方便   加埋用泡菜炒就更加方便   最開心係清咗 2 個烏冬   雖然里奧大人帶 Lunch Box   但都剩番一碗仔   咁留番聽晚食 lu ~

洗埋碗就開機洗衫   之後休息喇 ~

小台芒 ($30/3 磅)   里奧大人話呢隻芒果好香芒果味   之前豬腰芒無咁好味

睇下 Youtube   同里奧大人一齊 10 點半瞓覺 lu ~

沙茶節瓜蝦米粉絲 + 瑤柱紅燒鮑魚 + 芫茜皮蛋魚片湯 ( 12-MAY-2024 )

 

( 12-MAY-2024  SUN )

今朝里奧大人 7 點起身   我好快瞓番   之後 8 點又醒咗咁   但覺得好早咁   所以又瞓番   但最後瞓到 9 點 15 分都起身 lu ~

尋晚睇福寶   喊濕咗 2 張紙巾   今朝起身對眼好澀呀   咁我都比埋家姐睇嘛   佢都話條片話好慘 ~

早餐食椰絲包   焗到外脆內軟都幾好味   但食嘅時候要好小心   因為超級多椰絲跌落嚟呀 ~

食完早餐抖咗 1 個鐘就去買餸   條街勁焗熱   我已經慢慢行   但番到屋企都係流哂汗呢 ~

管理員見到我入嚟   就拎住支花同我講母親節快樂   其實我唔想要   但佢笑得好開心咁有誠意   咁點都要收啦 ~

番到屋企即開機洗衫同沖涼   抖陣又執下嘢 ~

拎番公司擺都好噃

趣脆芝士牛角酥 ($16/個) + 奶茶 ($14)   呢份早餐要 $46   其實同我出去食差唔多價錢   所以有時自己買早餐都唔係話平好多咋

里奧大人要開會   差唔多 2 點 40 分先開完   所以即刻去食下午茶喇 ~

今日都係同埋榴槤兩公婆一齊食   傾到差唔多 4 點   個天原來已經黑哂   所以要即走人啦 ~

番到屋企都係休息   本來想瞓陣   但都係唔喇   費事一陣夜晚瞓唔到呢 ~  

我咁樣擺比里奧大人睇   佢話因為送埋兩個包先開心    我話兩個包係自己買㗎大佬   管理員只係送支花咋

6 點左右預備晚餐   咁啱兒生仔一家喺屋企附近買糖水   所以買埋比我哋   真係好乖仔呀 ~

我拎住兩碗糖水都覺得好重下   所以我唔煮飯   里奧大人就話焗福麵食   我話最緊要一陣食得落糖水就得喇   哈哈 ~

是日晚餐 - 沙茶節瓜蝦米粉絲 + 瑤柱紅燒鮑魚 + 芫茜皮蛋魚片湯

沙茶節瓜蝦米粉絲 - 好想清埋包粉絲   又好想清埋樽沙茶醬   所以諗到呢個餸喇 ~

瑤柱紅燒鮑魚 - 水姑比咗好多罐鮑魚比我哋   味道都 OK 嘅   但真係好細粒   下次可以一次開 4 罐   哈哈 ~

芫茜皮蛋魚片湯 - 係時候清清熱   同埋覺得好耐無湯水咁    咁簡簡單單滾呢個湯喇 ~ 

洗埋碗就沖涼   之後食糖水 ~

姑奶話呢碗好似叫綜合丸   聽見綜合就覺得正喇   哈哈   即刻諗起台北啲綜合丸

材料有芋頭 + 抹茶凍 + 仙草凍 + 綠豆 + 珍珠 + 芋丸 + 地瓜丸 + 粉粿

睇下 Youtube  今晚 10 點 50 分都瞓 lu ~

百樂金宴國際宴會廳 @ 九龍灣 ( 11-MAY-2024 )

乳鴿 (3 隻) - 細個成日食   依家有啲驚

姑奶話唔切   但我覺咁食法係好恐怖

鳳梨咕嚕肉 ($128) - 無食呀

脆果小炒皇 ($128) - 我鍾意食小炒皇

金銀蛋浸菜苗 ($118) - 啲菜好多渣

琥珀牛仔粒 ($138) - 琥珀合桃係脆卜卜   好味過牛仔粒   哈哈

上湯焗澳洲龍蝦伊麵 ($368) - 今次整得幾好味

兒生仔女自己叫嘅餸

( 11-MAY-2024  SAT )

尋晚都係比里奧大人嘈醒   但感恩好快瞓得番 ~

今朝出去食早餐   我覺得出去食真係飽啲   同埋呢間嘅咖啡都好大杯   所以飲完杯咖啡   其實都已經幾飽下 ~

諗住菇場唔忙   但點知 11 點先嚟忙   咁都好呀   好快就到 1 點呢 ~

今日同里奧大人屋企人一齊去拜山   咁諗住同里奧大人喺堅尼地城食嘢   之後里奧大人話兒生仔接佢放工   再接我放工去佢屋企附近食埋嘢先出發拜山 ~

船頭同我行同一方向   佢話佢等佢細佬接佢   我話我都係等兒生仔接我   之後佢話去拜山   我話我都係喎   再話佢係去田灣   我話我都係呀   佢話睇下到時見唔見到   哈哈 ~

去到餐廳見到九龍姑奶們同兒生仔老婆   原來兒生仔特登嚟接我哋㗎   真係好錫老人家   哈哈 ~

6 個大人加 2 個細路仔   所以 5 個套餐都好夠   同埋今晚又早食   咁仲更加唔駛叫咁多呢 ~

頭抽叉燒煎蛋飯 ($55) - 無食呀   但佢哋話啲叉燒唔錯

四川口水雞 ($58) - 一般啦

兒生仔個仔話油飯係生日蛋糕   真係好搞笑

欖菜肉碎炒飯 ($62) - 無食呀

肉絲炒麵 ($62) - 呢個幾好味

川椒雞柳 ($62) - 配菜先正呀   哈哈

食完飯就去買棉花糖比兒生仔個仔   我成日話買嘢比佢食   但又唔知佢鍾意食咩   難得佢屋企附近有得夾糖   所以即買喇 ~

我話夾多啲啦   但佢爸爸唔比   哈哈

買完就出發去拜山   不過墳場附近無得泊車   要去另一個停車場泊完車再搭巴士先可以去到 ~

大家都好似 3 點 45 分左右到   今日見到兒生仔女啲仔女   好少咁長時間同佢哋一齊   所以我都好開心呀   哈哈   另一個兒生女個仔笑咪咪咁叫我舅婆   真係冧死   因為之前好怕羞㗎 ~

大埔兒生仔問我係邊度番工 ?!   之後話有日中午見到有個人好似我   但戴咗口罩   佢唔敢肯定   因為佢又過緊馬路   咁佢再比個地點我睇   我話應該係我㗎喇   哈哈   原來佢喺我公司附近做嘢   又會咁啱嘅   我初初以為係同區   但原來係咁近 ~

好耐之前我放工等巴士   另外一個兒生仔又係問我係咪喺邊度等巴士 ?!   仲問我係咪着件桃紅色衫   我話呢個就真係我喇   所以我成日都話   究竟呢個世界係大家細呢   咁都會見到   哈哈 ~      

今次差唔多 4 點鬆啲就走得   雖然 Book 咗 6 點喺酒樓食飯   但番到九龍灣都只係 5 點   所以去姑奶屋企坐陣先 ~

6 點左右到酒樓   一張枱係 7 個人   另一張就 9 個人   本身諗住叫套餐   但兩個 8 人餐份量真係太多   最後都係各自各叫餸 ~

食下傾下   今晚我好開心呀   真係食咁多次飯   今次真係好開心   感恩感恩 ~

好快又到 7 點半   係時候走人喇 ~

番到屋企即沖涼呀   之後休息休息 ~

睇陣 Youtube   今晚 11 點先瞓 ~

麻辣手撕雞 (外賣) ( 10-MAY-2024 )

( 10-MAY-2024  FRI )

感恩一覺瞓天光呀   7 點 18 分都起身 lu ~

早餐食芝士沙律條   估唔到都幾好味 ~

菇場唔忙又 Skype 啦   阿渠係咁大聲咳又唔戴口罩   真係好衰格   佢次次都係咁   我呢排喺菇場都有戴番口罩   今朝小說見到我   以為我唔舒服呀   之後我話唔係   佢就知我保護自己   哈哈   尋日 BG 又以為我唔舒服呀   真係好搞笑囉   有病嘅人唔戴   反而無病嘅人要戴 ~

依家起碼有 4 個同事唔舒服   幾乎個個都係咳同感冒   一咳就好似交響樂咁   今日阿齋都病埋添呀   坐我後面兩個同事都病埋   唉 ~  

Lunch Time 出去萬寧買染髮劑   之後再去麥當勞食午餐 ~

麥芝蛋 + 芬達 (免費)   呢個係親子會嘅母親節禮遇   家姐好奇怪點解會食呢啲   我話 5 月 12 日前要食呀

食完再行陣   今日涼涼哋都唔錯   所以行街好過行商場   不過行到 12 點 50 分都要番菇場喇 ~

無啦啦又忙呀   但我其實都鍾意忙嘅   哈哈 ~

Berry 瞓得好林   因為手仔腳仔伸到咁直

放工即走   買埋手撕雞就番屋企喇 ~

是日懶餐 - 麻辣手撕雞 (外賣)

麻辣手撕雞 (外賣) - 我要小小辣   但今次都好辣下   里奧大人以為青瓜係連埋手撕雞一齊   我話係我切㗎   我覺得咁樣食仲   唔駛又特登淥碟菜 ~

食完抖陣就自己行公園先   因為里奧大人鍾意抖 45 分鐘   我話唔等喇 ~

番到屋企已經 8 點   里奧大人都出咗去做運動   所以我鍾意早啲做呢   可以早啲休息嘛 ~

開埋機洗衫就沖涼   睇下福寶   今晚 10 點 20 分都瞓覺 lu ~