稻香 @ 九龍灣 ( 31-DEC-2014 )

鳳城水餃

A 級安格斯肥牛

手唧蟹籽麵

田園菜籃

馬來沙嗲鍋

次次個開口都好細   今次阿姐好好人   拎把較剪出嚟幫我哋剪大啲個開口   但剪得太大   好似食魚肉腸咁   哈哈   

里奧大人一定要飲啤酒   話打邊爐熱氣喎

綠豆沙材料好足呀   又唔太甜   食完好似無咁燥熱   平時就唔食喇   驚涼得滯會頭暈呀


食完熱又食凍   啲牙又酸又痺   唔知點咁   哈哈

( 31-DEC-2014  WED )

2014 最後一日喇   話咁快就一年 lu   今年好鬼忙呀   覺得啲時間唔夠用添呀   哈哈 ~

早餐唔太餓   食奶醬多 ~

菇場忙呀   其實個心成日掛住有無得放早   所以無咩 Mood 做嘢添 ~

11 點幾收到 Email 話今日放 4 點   勁開心呀   所以要開行 turbo 做嘢喇 ~

今日個 Lunch Box 夠哂大盒   食飯食到驚囉   所以慢慢食到 1 點先食完   之後幫家姐同事去阿信屋買蟹柳   最搞笑阿齋問我買咩   我話買蟹柳   因為好抵   佢又話買 6 條   哈哈 ~

準時開工   發咗顛咁做做做   做哂啲 Urgent 嘢先   其他留番下年做 lu   年年有餘嘛   哈哈 ~

里奧大人無得放早   所以我去媽咪屋企陪媽咪   一齊睇電視真係好開心   不過我坐到 6 點就走 lu   想去 Pizza Hut 食嘢   所以早啲去攞位 ~

去到睇 Menu 又覺得唔係太啱   因為晏晝食飯食到好飽   唔想再食飽肚嘢   所以即去稻香喇   因為我想打邊爐多啲呀 ~ 

好感恩里奧大人 6 點 35 分走人   7 點 15 分嚟到   食到差唔多 9 點就番屋企 lu ~

番到屋企里奧大人就上網整嘢   我就即沖涼喇   之後睇電視 ~

咁里奧大人話瞓覺   果時原來已經 11 點 50 分   我話一齊倒數啦   一齊迎接美好感恩 2015 年嘛   所以最後 12 點幾先瞓   哈哈 ~

螞蟻上樹 + 芥蘭炒臘腸 ( 30-DEC-2014 )

( 30-DEC-2014  TUE )

依家天氣凍   真係要懶床先起身   之後沖咗熱水涼都覺凍呀 ~

唔太餓   所以食奶油多   不過今朝有啲攰   要飲咖啡   但我其實只係飲 1/3 杯   飲哂會覺得好反胃   依家飲熱奶茶咖啡   都會係少奶   同埋我一定唔會加糖   家姐話好苦喎   不過我飲咗咁年都慣哂   呵呵 ~

菇場唔忙   同 8 卦睇有咩好團   但無咩好團囉 ~

Lunch Time 出去食   行下阿信屋   又比我見到家姐鍾意食嘅蟹柳   原價 $10   依家 $7 仲有 8 折   超勁抵啦   打比家姐   家姐以為我睇錯   咁我問咗 Staff 先話佢知家嘛   唔信我都有嘅 ~

財散人安樂   次次出街都買嘢咁唔掂   但唔帶銀包又好無安全感喎 ~

諗住 Hea 過   2 點幾無啦啦超級忙呀   真係要開行 Turbo 做   因為如果聽日放 4 點   做唔哂就唔係咁好啦   不過放工都未做完架   但聽日應該半日就搞掂   所以放工都走 lu   同埋今日所有大粒都唔喺度   唔準時走對唔住自己呀   哈哈 ~

去完街市買餸    搞掂哂就去換喇叭   番到屋企抖陣就煮飯喇 ~   

呢幾晚都係 9 點幾飲咗一細杯芝麻粉沖水   但半夜三更就會熱醒   唔知關唔關事呢   所以我今晚都係番到屋企即飲好啲   如果半夜都係熱   即係唔關事啦   咁要開哂啲窗先得喇   哈哈 ~  

7 點半煮完   自己食先 lu   想去徑步嘛   咁里奧大人 7 點 50 分先放工   咁等埋佢先一齊徑步囉 ~   

是日晚餐 - 螞蟻上樹 + 芥蘭炒臘腸 

螞蟻上樹 - 浸咗 1 包仔粉絲   好似唔夠咁   咁浸多包啦   反正想清哂去   點知整嘅時候就覺得勁勁勁多   好後悔呀   因為今晚同 Lunch Box 都要食好多 ~

芥蘭炒臘腸 - 前晚買 2 斤芥蘭   只煮咗 1 斤   咁今晚要清埋果 1 斤啦   灼完再加臘腸炒炒炒   好鬼攰囉   下次都係唔好兩個餸都係炒喇 ~  

洗埋哂碗   抖到 9 點半就去徑步喇   今晚如果里奧大人唔去徑步   我都照去   因為今晚煮多咗飯   我足足食咗兩碗   衰里奧大人食少少就話唔食   咁我個 Lunch Box 已經有成碗飯   加埋大量粉絲   無位放囉   咁唯有我食埋佢啦 ~

徑咗半個鐘   番到屋企即沖涼喇   之後睇陣電視   11 點幾瞓 lu ~

黑椒三文魚骨 ( 29-DEC-2014 )

1 Pack 有 5 件   真係好抵呢   但光波爐每次只可以焗 2 件   所以要分 3 次焗   有啲麻煩   哈哈 

( 29-DEC-2014  MON )

今朝又好凍呀   好似得 12 度   房嘅玻璃窗直頭濛查查添呀  室溫真係相差咁大 ?!

里奧大人無啦啦同我講   話我尋日去找數嘅時候   媽咪同佢講話唔知點解我咁火爆   里奧大人就同媽咪講   佢最憎比人屈   哈哈   因為家姐唔會理佢媽咪講咩   都懶得理佢   但我唔會囉   我都同里奧大人講㗎   如果佢屋企人屈我   我都會發顛鬧㗎   一視同仁   哈哈 ~

餓呀   要食芝腿治 ~

番到菇場做 Report   搞掂就 Hea 過 lu   好難得呢 ~

食完 Lunch Box 就幫家姐去一田買白胡椒粉   之後再去買頸巾比姐夫   行多陣就番菇場喇 ~

實在太好喇   忙咗陣又 Hea 等放工   呵呵 ~

放工諗住搵人整廚房燈   點知話啲師傅放哂假   要下星期先得   咁由佢 lu   下星期再搵 ~

行行下有人叫我   原來係 "煩單"   以前喺菇場真係唔覺得佢會講嘢   木木獨獨咁   依家做咗基金呢行   完全係開籠雀咁   不過都係講基金呢啲   所以我傾咗 10 分鐘左右都走喇 ~

番到屋企醃好三文魚骨   之後抖陣   今晚煮丁麵   所以就自己食先 lu ~    

是日懶餐 - 黑椒三文魚骨  

黑椒三文魚骨 - 同光波爐焗真係十級方便   因為唔駛啲油彈到周圍都係   同埋最正係 "必" 哂啲油出嚟   唔駛入口油林林   上次用煎 Pan 煎勁多油呀   食完好滯   所以家姐教我用光波爐呢   呢 Pack 三文魚骨係佢買比我㗎   仲有 1 Pack 喺冰格   下次會叫家姐再買   因為平靚正呀 ~   

里奧大人 8 點半番到屋企   一話煮丁麵佢食就勁開心 ~

搞掂哂都 9 點幾   咁諗住徑步   不過對眼好痛呀   所以都係唔徑 lu ~

沖埋涼就食生果   睇陣電視   11 點瞓喇 ~  

蒜頭豆豉蒸排骨 + 蠔油芥蘭 + 蕃茄薯仔瘦肉湯 ( 28-DEC-2014 )

( 28-DEC-2014  SUN )

今朝同里奧大人瞓到差唔多 11 點   鬧鐘完全無響過   里奧大人都唔知係咪校錯咗嘢   咁都番唔切教會   所以約媽咪同家姐 12 點飲茶呢 ~

媽咪話食呢碟飯嘅   咁家姐嚟到見到   話咁多人   做咩唔叫炒嘢食   咁媽咪就話咪係囉   碟飯係阿妹叫   我即刻發哂顛咁鬧媽咪呀   話妳叫就妳叫啦   做咩話我叫   我最憎人咁屈我   家姐都話媽咪又係衰嘅   自己叫咪自己叫囉   又唔會話妳   里奧大人就話媽咪做咩講大話呢   第時無人信妳   不過最後我都同媽咪講對唔住   因為覺得咁惡鬧媽咪真係唔啱呢

家姐喺一田買嘅士多啤梨   話好甜喎   所以特登拎比我哋食呢 

我哋依家全部用 Samsung   Note 4 影相真係唔錯    

飲到 2 點   今次又係畫鬼腳   我輸咗   呵呵 ~

我哋各自歸家   我就自己去買餸   里奧大人就番屋企做公司嘢喇 ~

3 點鐘無啦啦好鬼眼瞓   頂唔順入房瞓   平時會喺梳化瞓   因為出過街嘛   但真係好鬼凍   所以真係要入房瞓   入到被竇都要郁幾郁   個身先暖呀 ~

瞓到 4 點   勁精神呀   之後滾湯   搞掂哂就熨衫   好鬼凍呀   唔郁唔得囉 ~   

7 點準時食飯   實在太好喇   早啲食早啲徑步 ~   

是日懶餐 - 蒜頭豆豉蒸排骨 + 蠔油芥蘭 + 蕃茄薯仔瘦肉湯

蒜頭豆豉蒸排骨 - 次次整呢個餸   都覺得自己超級懶   但我想徑步嘛   唔想煎嘢囉   今晚里奧大人居然爬飯   佢似乎好鍾意食呢個餸咁喎 ~        

蠔油芥蘭 - 唉   灼得太耐喇   無哂口感 ~  

蕃茄薯仔瘦肉湯 - 我休養嘅時候買咗幾嚿瘦肉   諗住燉肉汁   但媽咪成日煲湯比我飲   所以啲瘦肉到依家先食咋   今個星期媽咪無煲湯   所以我先可以滾湯咋   但仲有 1 嚿瘦肉喺冰格   真係要快啲清埋佢先得 ~ 

搞掂哂就抖陣   8 點 15 分出發去徑步喇   勁凍囉   急步徑咗 2 個圈   對手先唔凍咋 ~        

徑徑下見到教友同牧師   仲以為自己眼花添   哈哈 ~

番到屋企即沖涼喇   之後食生果   睇電視睇到 11 點幾   係時候瞓喇 ~   

明輝茶餐廳 @ 九龍灣 ( 27-DEC-2014 )

( 27-DEC-2014  SAT )

今朝要番工   但起身又唔係話好辛苦喎   呵呵 ~

平時同里奧大人一齊行去地鐵站   我次次都行到冒汗   但自己一個人行就唔會   所以我成日話里奧大人行得太快囉   不過佢話唔係   咁其實又唔算太快   只不過我係想慢行啫   反正大家都預早咗好多時間番到公司   唔駛咁急囉 ~

勁想食麵餐   但真係食唔哂   所以都係食三文治算喇   家姐好多時星期六就會喺屋企整三文治   佢話好好味   我話咪搞我   哈哈 ~

菇場無嘢做呀   上下網又放工   勁正 ~

去牛頭角藥房買完嘢就番屋企   經過戲院   睇到 "翻生侏羅館 Night of the Museum 3" 有好多位   仲係 7 點 50 分添   打比里奧大人   佢又聽唔到電話   所以番到屋企即同佢講   之後一齊去買飛喇 ~

今日去舖頭   所以又約水姑食 Tea   差唔多 2 點幾先出發   搞掂就一齊去食 Tea ~

食完就去佢屋企坐陣   諗住搞掂啦   點知仲未得   咁里奧大人話去麥記食雪糕喎   咁鬼凍   我話食一兩啖㗎咋 ~

番到屋企都 4 點 lu   里奧大人就做下公司嘢   我就開機洗衫   之後就 Hea 過 lu ~

抖到 7 點半就出發喇   睇戲一定要食爆谷   今次最勁   買大杯裝   不過食極唔完咁   都幾辛苦   哈哈 ~

呢套 "翻生侏羅館 3" 都幾好睇   之前 1 & 2 都好好笑   今集幾好笑之餘   仲有啲感人添啦   喊到我呢   好在係 Happy Ending 咋 ~  

睇完都係 9 點半   唔係好餓   但要食囉   驚半夜餓醒仲慘 ~

食完要即走喇   番屋企即沖涼   之後睇 "上班族楚漢誌"   原來今晚大結局   無得睇佢哋有啲唔慣添 ~

今晚整呢樣嗰樣   又 12 點幾先瞓   真係唔得囉   太夜瞓   對身體唔好家嘛 ~

元氣壽司 @ 九龍灣 ( 26-DEC-2014 )

野菜餅烏冬

飛魚籽軍艦 / 海膽墨魚軍艦 / 芥辣八爪魚軍艦
海鹽赤海蝦 / 三文魚壽司 

蟹肉三文魚籽丼

鵝肝壽司

三文魚手卷 / 軟殼蟹手卷


彩虹卷

三文魚腩壽司 / 吞拿魚壽司

炸蝦天婦羅壽司

中華沙律

里奧大人只配給一隻手指甲 Size 嘅 Wasabi 比我

( 26-DEC-2014  FRI )

好嘢   今日又係假期   瞓到 10 點起身 lu ~

諗住唔係尋日就今日行山   但天文台話今日仍然會落雨   咁唔行喇   改為 Shopping ~

食完早餐   最後決定去荃灣   因為我幾鍾意行荃灣呢啲舊區   好多 "林沉" 嘢買 ~

好有聖誕氣氛咁噃

番到屋企沖完涼就出發 lu   今晚約咗家姐   所以都要爭取時間   哈哈 ~

面對現實搭地鐵啦   我成日同里奧大人講話不如搭小巴去官塘   再搭小巴去荃灣   因為我真係好憎搭地鐵   不過佢話仲嘥時間喎 ~

我只係識去剪髮表妹果頭咋   但我記得去佢嗰度係經過一個商場   咁就去行下啦   都有幾多嘢睇咁 ~

里奧大人主攻買 Cord   我就主攻買衫同鞋   咁我無興趣睇電話嘢   佢又無興趣睇女人嘢   咁我話分開行   行下行下我見到有 Burger King   咁就約定里奧大人去 BK 等   之後我行咗唔知邊   開始有啲驚喇   因為我搵唔番 BK   正想打比里奧大人   估唔到行多幾步就迎面見到佢   我當堂定啦   哈哈 ~

我話買完對靴就去食嘢   因為我驚一陣搵唔番間舖頭呢 ~ 

蘑菇雙層芝士安格斯牛堡 - 激死我呀   我其實想食華堡   咁上次喺山頂華堡係 5 號   所以我話 5 號餐   但買嘅時候都覺得好似唔係呢個名   點知坐我哋隔離嘅男人食華堡餐   我先知自己叫錯呀   嗚嗚 

雙層燒烤煙肉堡

2 點喇   里奧大人話餓喎   咁去 BK 食嘢啦   食完又再食過 ~    

好開心呀   買咗 3 件長 Tee 比自己   再買咗 2 件衫同隻杯比家姐   最開心人人有份   我覺得買嘢比人係好開心   因為妳見到佢開心嘅樣   妳就會更加開心呢 ~

買完嘢都係 3 點半   咁去搵剪髮表妹   本來諗住買豪大大雞粒比佢食   比個驚喜佢   不過最後都打比佢先   因為豪大大無咗   唔知佢想食咩嘛   佢話想要杯梅子綠茶喎   我成日整鬼佢㗎   間唔中會打電話比佢   叫佢望出面   佢真係次次都望   之後就會鬧爆我   哈哈 ~

咁里奧大人話頭先唔太飽喎   諗住睇有咩小食啦   不過又唔啱食   所以直接去搵表妹喇 ~

假期無咩人   所以可以坐低傾偈   加埋佢個朋友一齊傾   傾呀傾   佢哋問我去咗邊個商場行   我話新之城   衰表妹叫個 朋友唔好信我呀   話我求其噏   因為佢知我唔認路嘛   我之前搵佢幾次都係問警察點去㗎   佢話我黐線   駛唔駛問警察呀   我話警察成日行"必"   問佢哋實識啦 ~

傾呀傾   傾到 5 點 15 分   係時候要走喇 ~ 

搭小巴番屋企   20 分鐘唔夠就出到九龍灣   咁買埋暖手器同喇叭同就番屋企喇 ~ 

暖手器 ($109) - 都 OK 㗎   差電 10 分鐘   可以暖到 2-8 個鐘  個 Range 都好大下噃   但我試咗啦   兩個鐘已經唔太暖囉   不過算啦   菇場真係好鬼凍   手指僵硬哂真係好辛苦   呢個真係一年四季都啱用呀

感應喇叭 ($229)   唔駛插線勁正啦   擺部手機喺頂   咁就可以聽歌   擺喺廚房最好   一路聽歌一路煮嘢最開心  

今日唔知點解腳痛呀   之後行幾個鐘都唔痛架喎   唔通酒精入骨所以痛 ?!   哈哈   不過應該唔會啦   飲果半杯 Balieys   又唔係白蘭地 ~

今晚同家姐去元氣   好感恩有卡位坐呀   咁樣傾偈舒服啲   唔駛成日擰埋臉傾   哈哈 ~

7 點食到 8 點   今晚我話輸咗請食飯   但唔想玩猜情尋   家姐話玩劃鬼腳   咁佢哋叫我劃   我劃到里奧大人請   不過佢簽卡   用哂啲 Cash Dollar   咁咪即係 Free Dinner   又好喎 ~      

即番屋企整電話喇   不過無話比家姐知   但叫佢帶齊電腦如 Tab   話幫佢 Update 嘢   咁我哋又將電話同電話套包埋一齊   變咗一個大盒咁   家姐以為係相架   因為佢知道我記得佢想買相架   咁佢拆禮物嘅時候   見到啲電話套覺得好奇怪   之後見到部手機就勁開心啦   不過我話係二手   但佢都一樣咁開心   因為佢話玩釣魚   條魚都大啲   好玩好多呀   哈哈 ~

一睇已經好鍾意   咁家姐成日話想買杯   咁就買比佢啦   咁啱呢間嘢做限時特價   樣樣都係 $39 咋   所以即買

佢哋整嘢   我就沖涼先   之後睇 "來生不做香港人"   我仲追埋 "上班族楚漢誌"   又係好好睇   我真係好耐無追劇喇   仲要係 10 點先做呢   對我嚟講係夜㗎喇   因為睇埋都 11 點嘛 ~

今晚又飲 Baileys 喇   但一定要加冰   之後比埋家姐飲   佢話幾好飲喎   差唔多飲哂成杯   之後仲懶勁   話想飲啲唔加冰   不過我無比佢飲呀   差唔多 10 點左右   佢無啦啦話塊臉好慶呀 ?!   係咪紅卜卜 ?!   我話直頭成個關公咁啦   條頸都紅哂呀   哈哈 ~

里奧大人叫我加 3 粒冰   我加夠 8 粒呀   哈哈   

最搞笑係我之前叫佢幫我交稅   咁佢就會有啲唔知咩 Coupon   佢話諗住今晚喺我屋企用 PPS 過數    咁多個人聽住啲 Number 無咁驚   之後里奧大人話叫佢聽日先交   依家大家都醉燻燻   我覺得里奧大人最搞笑啦   用 "醉燻燻" 形容   人哋唔知   以為我哋劈酒   但其實我地 1 杯加冰 Baileys 三個人飲   哈哈 ~

11 點幾先搞掂呀   等埋家姐番到屋企 Whatsapp 我安全到埗先瞓 ~

睇多陣電視   12 點幾自己瞓先   聽日要番工嘛 ~