香茅豬扒 + 香草牛油粟米 + 地瓜丸紅豆沙 ( 18-DEC-2014 )

下次用紫蕃薯整先

( 18-DEC-2014  THU )

今朝都凍呀   又乾燥喎   但就無咩太陽咁囉   如果陽光普照就更好啦   因為啲衫快啲乾嘛   冬天啲衫褲又厚   洗一機冬天衫等如洗兩機夏天衫   所以快乾係好緊要呢   哈哈 ~

飽飽滯滯咁   咁食奶醬多啦   咁好入神睇報紙   無啦啦有人喺我耳邊講嘢   原來係 8 卦嚇鬼死咩 ~

菇場忙呀   係咁做呀做 ~

好鬼凍呀   啲手指僵硬哂   所以要出去食粥   之後去買聖誕禮物比爺爺麻麻同姑奶   行多陣就番菇場 lu ~

忙到 4 點幾   之後 Hea 等放工 ~

行咗陣 Taste   咁諗住買埋芝士啦   見條隊好多人   所以唔買 lu ~   

番到屋企即開機洗衫   之後開始打仗喇  ~

里奧大人喺大陸準時放工   車程又暢順   所以 7 點 15 分已經到上水   咁我差唔多搞掂   所以我自己食先 lu   我想去徑步 ~   

食完又煲番熱啲紅豆沙   里奧大人 8 點左右番到屋企   咁佢就食麵   我就食紅豆沙   陪下佢嘛   哈哈 ~

是日晚餐 - 香茅豬扒 + 香草牛油粟米 + 地瓜丸紅豆沙  

香茅豬扒 - 醃咗兩晚好入味呀   但我又 Overcook 啦   如果唔係更好食   下次都係用光波爐焗算喇   反正都係 "鞋"   咁唔駛煎到我成身油   哈哈 ~  

香草牛油粟米 - 之前買咗好多粟米   咁今晚食 3 條   仲有 2 條就留番星期日滾湯啦   唔想餐餐粟米   哈哈 ~     

地瓜丸紅豆沙 - 特登買木薯粉整地瓜丸   好在都算煙韌   不過我覺得再煙韌就更好呢 ~

洗哂碗   諗住去徑步   點知里奧大人又話想去徑步   咁等埋佢抖陣先啦   9 點半先出去徑   徑到 10 點就番屋企 lu ~

沖完涼就休息   11 點幾就自己瞓先喇   今晚番到屋企無停過   有啲攰   哈哈 ~