潮館 @ APM ( 官塘 ) ( 8-DEC-2014 )

芋蓉香酥鴨 - 好似食芋角   都幾好味噃

潮式椒醬肉 - 我好鍾意食㗎   不過家姐就唔太鍾意食有豆板醬嘅嘢   佢只愛指天椒嘅辣

韭菜豬紅 - 媽咪要食呀   我聽到經過嘅男人叫呢碗做豬菜生紅   笑死我   

滷水拚盤 - 樣樣有啲   不過媽咪同家姐都話以前嘅潮館好食啲喎   果時佢哋成日嚟   我無去㗎   所以比較唔到   哈哈

蠔仔肉碎粥 (窩) - 我鍾意食   最緊要落埋胡椒粉   好味好多呢   

細細隻蠔仔   今次無咩蠔仔咁呀

馬蹄綠豆爽 - 無味嘅

( 8-DEC-2014  MON )

今日要去覆診   所以里奧大人就請假黎陪我呢   順便清埋假   呵呵 ~

唔記得熄鬧鐘   所以 7 點半響咗   嚇鬼死   哈哈   不過今朝都要 9 點 45 分起身喇   唔想咁趕 ~

食完早餐就番屋企沖涼   抖陣就出門口 lu   今日好熱呀   但遲兩日又話凍喎 ~ 

搭地鐵去尖沙咀   里奧大人去 Canon 問嘢   我就自己去診所先   去到啱啱好 12 點   里奧大人差唔多 12 點半到   佢仲話無咩人   以為我好快有得睇   我話啲人出哂去咋   哈哈 ~   

雖然 Book 咗 12 點   但我都要等到 1 點先到我囉 ~

搞掂哂都差唔多 1 點 15 分   咁我哋又未餓   所以周圍行下睇有咩嘢食   行到差唔多 2 點半   里奧大人話開始餓喇   咁去食印尼菜啦   咁啱呢間下午茶時間係 2 點半開始   都唔錯喎 ~

我鍾意呢啲燈

我哋上到佢見到得一枱客   仲以為落場添   之後佢叫我哋入去坐   其實無人都唔錯   因為好靜   點知員工多過客   仲要佢地傾偈又大聲   最驚係咁   

呢個係餐   有絲苗白飯兩碟   食幾多就比幾多   唔夠食可以再添   都唔錯   唔駛嘥嘢

雞肉沙爹 - OK 啦

煎粟米餅 - 我想食好耐㗎喇   不過唔脆嘅   但里奧大人話我哋太遲先食喎

馬拉盞炒通菜 - 好鹹呀

咖哩牛腩 - 但呢個又無味   想點呀   哈哈
綠豆冰 / 珍多冰 - 因為係餐   所以好細杯

綠色蚯蚓   嘻嘻   

好舊式餐廳嘅字體

食完就去尖東攞喼   之後搭地鐵番九龍灣   我最怕冬天搭地鐵   因為一入地鐵站入面就已經好鬼焗   車廂又係好鬼焗   我焗到好眼瞓同鼻塞添呀 ~

番到屋企都已經 5 點   抖陣就煲菊花茶   差唔多 6 點又要出發   咁兜埋媽咪一齊去   陪埋媽咪去奇華拎餅   之後去潮館 lu ~

媽咪要去洗手間   咁我就企喺洗手間出面等佢   不過最後我又去埋啦   見到有個背影好熟面口嘅人排緊隊   原來係家姐 ~

今晚當做冬啦   唔想成日都咁遲   哈哈 ~

7 點食到 8 點幾   咁媽咪又整咗餸又買咗生果比我同家姐   咁家姐去洗手間   所以工人幫佢拎袋嘢啦   之後搭 lift   家姐好緊張問工人袋嘢呢 ?!   之後我話咪佢自己繞住喺手囉   痴線   佢話有時戴住眼鏡   會問人地佢對眼鏡喺邊添 ~

夜晚落毛毛雨   所以又有啲凍喇 ~

番到屋企即沖涼   之後睇 "警界線" 喇   真係好好睇呢 ~

10 點幾睇聖經   睇完都 11 點都要瞓喇   今日有啲攰 ~