蒜泥白肉 + 金銀蛋莧菜 + 炒油麵 ( 18-MAR-2015 )

( 18-MAR-2015  WED )

尋晚瞓得唔錯喎   一覺瞓天光   感恩感恩 ~

今朝有啲餓   所以食芝腿治烘底   今次好好味呀   鹹鹹香香咁 ~

之後 8 卦打嚟話一齊食早餐   好奇怪做咩唔 Whatsapp 我   原來佢話我無反應   幾驚以為部電話又 Shot 咗呀   哈哈 ~

菇場唔忙就最好啦   呢排有啲攰   同埋想整哂啲相先   了咗心事嘛 ~

出去食嘢   行陣就番菇場   好似好耐無出去行咁   感恩今日天氣都 OK ~

諗住繼續 Hea 過   點知 3 點先嚟忙 ~

今日有同事請食 Tea   因為佢中咗 2 獎   咁阿後叫茶記係跟住我哋張 List 一份份寫好 Number 比我哋   其實駛咩咁做喎   所以 3 點幾叫 Tea   差唔多 5 點先送到嚟   同埋每人一份   用咗 3x 個膠袋   好唔環保囉 ~

拿拿聲食完就要做埋啲手尾   咁就放工喇   今晚直接番屋企   最鍾意呢   哈哈 ~

番到屋企即浸菜   真係最唔鍾意浸菜   又要拻又要洗   洗完又浸   浸完又洗   咁諗住今晚都係自己食先   點知里奧大人 6 點 45 分打嚟話放工   咁即係無得抖喇   因為今晚多嘢煮呢   所以佢番到嚟   都要等 10 分鐘先有得食呢 ~

是日懶餐 - 蒜泥白肉 + 金銀蛋莧菜 + 炒油麵 

蒜泥白肉 - 第 1 次用五花腩整   不過其實我地都唔食啲肥豬肉嘅   哈哈 ~

金銀蛋莧菜 - 啲菜老到呢   食到我差啲哽親呀   食咗一半真係唔食喇   太多渣喇 ~ 

炒油麵 - 里奧大人話好食   但無餸㗎喎   只係落生抽老抽黑醬油   佢話佢鍾意食麵   咁好喎   同佢一齊 Green Monday   呵呵 ~

搞掂哂   抖到 9 點就出去徑步   差唔多 10 點就番到屋企   今晚出勁多汗呀   所以要開冷氣   沖埋涼就抖喇 ~

睇 Just for Laugh 睇到差唔多 12 點   無諗過咁夜囉   所以要即瞓喇   好在都眼瞓   哈哈 ~