煎沙尖魚 + 蒸石斑仔 + 皇帝菜 + 當參蓮子鱷魚肉湯 ( 20-MAR-2015 )

( 20-MAR-2015  FRI )

雖然仍然潮濕   但今朝終於見到陽光喇   勁開心 ~

依家朝早聽收音機   所以無咩時間睇報紙   又想 9 點前番到菇場   變咗好似小咗時間睇報紙咁   咁我就只睇重點新聞   有咩嘢好食同埋有咩特價嘢買就搞掂   哈哈 ~

菇場唔算忙   但老細同西瓜隔離房開會   透明玻璃呀   所以唔敢上網   好在 9 點幾開完會   又可以無限上網 lu ~

Lunch 出去食   之後去買寧買清熱酷   買開係 $19.9/盒   依家 $35/2 盒   仲 Enjoy Card 95折   所以買番 2 盒   雖然屋企仲有   但覺得咁樣 "鄧" 番勻   心理上舒服啲   之後去百佳買七味粉同淮鹽   又見到 Pocky Chocolate $15.9/包   上星期我買 $18.9 㗎   所以又再買多包 "鄧" 番勻   真係人都顛呀 ~

4 點無啦啦忙   做到 5 點就搞掂哂   了咗心事 ~  

西瓜無啦啦請食蛋撻   所以食完抖陣就放工 lu ~    

唔想去街市   咁就去 Taste 買菜同蔥   買下買下又買咗 2 罐粟米湯   2 Pack 超力米同 1 包熟食帆立貝   最開心係樣樣都有特價呢 ~

番到屋企即浸菜喇   搞掂哂就開機洗衫   抖多陣就煮嘢   諗住自己食先嘛   點知里奧大人 8 點打嚟話收工   咁我等埋佢啦   反正都唔餓 ~       

是日晚餐 - 煎沙尖魚 + 蒸石斑仔 + 皇帝菜 + 當參蓮子鱷魚肉湯  

煎沙尖魚 - 媽咪尋晚買比我㗎   其實我好驚食呢啲細魚   因為好多骨呢   同埋我次次煎完魚   個廚房勁大煙   煙到出廳㗎   好恐怖 ~    

蒸石斑仔 - 又係媽咪買㗎   媽咪要頭我要尾   因為我勁驚魚眼   哈哈   今次勁呀   蒸到啱啱熟   如果 Over 咗啲肉就好 "鞋"   但其實我鍾意食好 "鞋" 嘅魚   哈哈 ~     

皇帝菜 - $6.9/Pack   里奧大人唔鍾意食   不過我話唔想成日食唐生菜   同佢講呢啲菜唔係成日有架   一有就買嚟食囉   但佢話真係好唔鍾意食   有陣草青味喎 ~ 

當參蓮子鱷魚肉湯 - 媽咪煲㗎   如果唔買菜   呢餐餸係媽咪包辦   哈哈 ~   

呢排間唔中就暈暈哋   所以洗埋碗   抖陣就沖涼   都唔去徑步 ~

今晚睇 Just for Laugh   好清呀   唔駛濛查查咁睇真係好舒服   但就唔係集集都咁清囉   睇下笑下又 12 點   要瞓喇 ~