譚仔 (三哥) 雲南米線 @ 大埔 ( 31-DEC-2009 )

酸菜腐竹麻辣米線 / 豬潤牛肉麻辣米線 / 土匪雞翼

( 31-DEC-2009  THU )

今朝食蛋牛治烘底少蛋   呢個三文治真係半年食一次好喇   因為實在太漏喇 ~

番到菇場忙到震   忙到 Lunch Time   諗住一陣可以早收   所以買菠蘿包 + 半杯麥皮   無咁飽嘛   可以同里奧大人 Tea   點知原來無得放早   餓到震呀   放工即刻買個芝麻餐包頂肚呀   要一路行一路食    唔係就捱唔到番屋企咯 ~

突然好想食麻辣米線   所以同里奧大人去譚仔喇 ~

同里奧大人一把年紀   都唔會出去倒數   未迫過咩   喺屋企睇碟靜靜咁過就算 lu ~

2009 年最後一日 lu   真係不經不覺咁過咗呢一年咁   年紀大咗   覺得啲時間好似過得特別快咁㗎   呢一年真係麻麻哋開心   因為我最愛嘅朱朱離開咗我   不過我好感恩就係當我唔開心嘅時候   會用另一個想法嚟諗呢件事   人生常有不如意事發生   所以任何事都要用積極開心嘅態度去面對嘛   我仍都好感恩   我有個對我唔係時時太好   但都唔係差嘅嘅里奧大人陪住我   讓我每當有困難唔開心嘅時候   佢都會安慰我   氹我開心呢   "人生有不如意嘅事有十之八九   倒不如多看那如意嘅一二件事   如此   我們就會知足常樂啦"        

住家飯 @ 媽咪屋企 ( 30-DEC-2009 )

豉油王蝦碌 / 黑椒牛仔骨 / 蒸紅鮪 / 蒸蟹 / 炒豆苗 / 當參鳥雞湯 / 飯後果 - 菠蘿 / 飯後甜品 - 恆香老婆餅 / 美心荷蘭撻

( 30-DEC-2009  WED )

今朝超想食糯米雞   其實呢間嘅糯米雞真係唔好食   啲飯唔煙韌㗎   但好想食就無計啦   照食可也   不過唔會再食下次囉 ~

菇場超靜   因為好多同事出 Trip   如果老闆一齊出埋 Trip 就更好啦  ~

唔想出街   所以食即食粉絲   3 點幾個胃有啲唔舒服   但又覺得好肚餓喎   都唔知係乜 ~

里奧大人今晚約全男班朋友打邊爐   所以我就番媽咪屋企食飯喇 ~

番到屋企第一件事就煲菊花茶比里奧大人清熱氣   佢話聽到都好感動喎   唔係嘛   我平時好多嘢都以佢為出發點㗎啦   真係吖   難道男人真係唔可以下下對佢咁好 ~

打邊爐 @ 媽咪屋企 ( 29-DEC-2009 )

雜丸 / 魚蛋 / 魚片 / 蟹仔 / 瀨尿蝦 / 泥猛魚 / 肥牛 / 豆苗 / 腐竹 / 蟹柳 / 芋絲 / 炸魚皮 / 粟米蘿蔔芫茜皮蛋湯底 / 蒜蓉辣椒豉油 / 紅醋 / 飯後果 - 蕃石榴  

( 29-DEC-2009  TUE )

今朝一樣咁凍   不過又無想像中咁凍喎   但落毛毛雨就好煩囉 ~

  
車程又係非常之暢順   仲要隔雜位係無人坐添   但得我隔離無人坐咋   我即刻拎塊鏡出嚟   照下自己係咪披頭散髮嚇親人先   但又唔係吖   好端裝整齊喎   只係黑眼圈比較深少少啫   好得人驚咩   哈哈 ~

早餐食三文治   方便嘛   唔駛咬咁耐 ~

尋日無做嘅嘢   今朝要做番哂 lu   依家真係好少寫字   真係有口啲唔慣囉 ~

    

今朝腦海成日諗起咖哩烏冬   所以 Lunch Time 即刻去 7-11買嚟食   啲咖哩真係好香好辣   烏冬又煙韌喎   便利店有呢啲水準算唔錯喇 ~

今晚即興去媽咪屋企打邊爐   所以放工就約埋里奧大人一齊去街市買丸丸   之後就去媽咪屋企開餐 lu   好少一家人一齊打邊爐    所以好開心呀 ~

椰林閣 @ 大埔 + 自家製湯丸 & 蕃薯糖水 ( 28-DEC-2009 )

( 28-DEC-2009  MON )

放咗 3 日假   天氣又急凍   起身嘅時候都好掙扎呀   鬧鐘響兩次先迫不得意起身咋   諗起沖涼同埋用凍水洗臉嘅時候就驚咯 ~ 

好多人仲放假   所以無人等車   車程又順   真係唔錯呢   他他條條食早餐最舒服 ~

老闆放假 Free 到呢   全日上網   有嘢做都留番聽日做呀   唔係對唔住自己呀 ~ 

媽咪屋企搵人整電線   家姐請假幫手打點   所以就同埋家姐 媽咪一齊去飲茶喇 ~

番到菇場又繼續上網 Load 相   真係 Load 到眼濛呀 ~

里奧大人想打邊爐   但樓下間酒樓又有人 Book 咗   所以無得打喇   最後去椰林閣   咁有 Cash Coupon   到期日係 31-12-2009   唔用就會浪費喇   但我其實唔鍾意去椰林閣   因為個個侍應都好無禮貌呀   真係次次都要咁講 ~ 

番到屋企抖陣就整蕃薯糖水同埋湯丸   第一次自己整無餡湯丸   又係好好味呀 ~

教會聚餐 + 麥當勞 @ 大埔 ( 27-dec-2009 )

( 27-DEC-2009  SUN )

早餐 - 今朝番教會   所以食咗早餐先   呢間係第一次食   好在味道都 OK 呢 ~

午餐 - 2 點半食 Tea   今次反而里奧大人食冬蔭功鮮牛肉湯河   話天氣太凍要食辣嘢   食辣啲好吖   咁可以陪我食辣啲嘛 ~

晚餐 - 喺姑奶教會食聚餐   之前去過一次都係唔飽   估唔到今次更加唔飽   仲要係大部份人都唔飽   唔知點解唔 Oorder 多啲呢   最怕食唔飽要再去食嘢   最後都同里奧大人去屋企附近麥當勞 Share 一個餐呢 ~

 
番到屋企即刻放好喺工展會買嘅食物入廚櫃   買嘢嗰刻真係好開心   因為有人同妳拎   但番到屋企就要自己執   就覺得有啲煩囉   因為里奧大人唔知我將會放啲嘢喺邊   所以一定係我執囉 ~     

即烤脆豬肉乾 - $60/3 包

豆豉 $10 / 乾貝鹹魚醬 $35 / 義香麻油 $20 / 蒜蓉豆豉 $10 

火腿豬肉 - $40/3 盒

超力銀絲米粉 - 1 箱 (30 包) $60 

壽核牌河粉 / 粉絲 + 禮品 1 Set - $60

長洲一天遊 ( 26-DEC-2009 )

( 26-DEC-2009  SAT )

呢日仍然係聖誕假期   雖然都係天陰陰   但里奧大人話唔想浪費個假期   所以食早餐嘅時候就一齊諗下去邊   最後決定去長洲喇 ~

由於係即興   所以樣樣都係以隨緣心態呢   咁樣都好舒服呀   有時無 Planning 反而會有驚喜 ~

又係好好彩屋企附近有車到中環碼頭   一落車就可以上船去長洲喇 ~

去到差唔多 2 點幾   有啲餓呀   所以一出碼頭就轉左邊去食海鮮餐   4 餸餐只不過係 $168 咋   再加多個楊洲炒飯   埋單 $206 抵呀   因為飽到反肚呀   我哋初初諗啲餸唔會好多   里奧大人又話食餸一定要有飯喎   所以叫多個楊洲炒飯   心諗又係估份量唔多   點知一上枱嚇到目瞪口呆啦   咁大碟嘅   之後就同里奧大人講   老規矩   邊個叫邊個食哂呀   好在我幫下口咋   同埋啲炒飯唔油   最後食剩一碗左右   算係咁啦 ~

豉椒炒聖子 / 椒鹽瀨尿蝦 / 蒜蓉蒸扇貝 / 豉汁蒸黃立倉 / 楊洲炒飯

呢餐太飽   非行不可呀   見有路就行   又周圍影下   不過拎大機好重   都唔係咁啱我呢 ~

經過海灘   超舒服呀   如果日日可以食飽散步吹海風就好喇   離遠見到有人釣魚   但當時都幾大浪  我覺得好危險囉 ~

之後行到唔知邊度   見到有間廢屋   有好多人食豆腐花    好似幾好咁   所以叫咗碗凍豆腐花同大菜糕   已經唔敢期望啦   點知仲極度失望  我覺得同大埔嘅阿婆豆腐花無得比呀   不過人哋話九龍城有間又係好好味   真係得閒要食下先   睇下係咪鳝犒   因為又係阿蘇介紹嘛 ~

長洲啲消防車同警車都好迷你   因為條街好窄   正常嘅 Size 係無可能入到去呢 ~

去到藍球場附近   見到有間屋好特別   好古色古香咁   所以走近啲影相   點知影到好入神嘅時候   有個男人話 " 妳喺度做咩呀"   嚇到我即刻望後面   里奧大人行到好開都聽到   佢都以為我比人話呀   原來佢係問緊佢朋友做啲咩   唔駛咁大聲嘛   真係吖 ~

行完哂左邊就行海灘嗰邊   經過好出名好猛嘅東堤小築   真係有啲心寒呢 ~

度度小食都有人排隊   所以同里奧大人分頭行事   上網睇資料見到好多人讚紅豆餅好好味   所以里奧大人話兩個嚟試   又真係好味喎   個餡唔太甜   個皮又煙煙韌韌咁   有驚喜呢   而我就買咗條冰果葫蘆   超凍呀   食冰咁   無厘味道   由於係我要買嘅關係   里奧大人迫我要食哂呀 ~

6 點幾行到碼頭   因為啲船係半個鐘頭一班   啱啱走咗一班   所以又周圍行   引唔住要買棉花糖同薯捧   不過呢個薯捧超唔好味   唔脆嘅   點解咁㗎   台灣整得好好味㗎 ~ 

呢日好開心呀   同埋實在口不停   所以都無出去食晚餐   番屋企食生果算喇  ~

大澳一日遊 + 大家樂 @ 大埔 ( 25-DEC-2009 )

( 25-DEC-2009  FRI )

終於等到放假喇   里奧大人一早諗定呢日入大澳   所以 10 點要起身食早餐 lu ~ 

食完再梳洗就出發喇   好彩屋企樓下有車到東涌   之後再搭車入大澳   唔駛轉九萬幾輛車咁煩呢 ~  

呢一日好大霧   但我出門口時仲陽光普照㗎   所以唔知咁大霧   望到碼頭嘅時候仲以為有船燒咗   所以好大煙添呀   點知上網先知原來好大霧   能見度好低   去到青馬大橋收費站   好似進入咗雲海咁   出面濛濛一片   睇唔到青馬大橋添呀 ~ 

差唔多 1 點去到東涌   再坐 11 號巴士就到大澳喇   一落車望到個海覺得好舒服   之後就漫無目的咁周圍行 lu ~

一入到見到有紫背天葵同雞屎滕就即買嚟試   點知大失所望呀   嘢飲無味   嘢食又唔煙韌喎   同埋個阿姐又唔理人咁   黑人憎呀   無禮貌 ~

行下又見到隱世茶果   因為唔想食太多呢啲咁飽肚嘅嘢   問佢收幾點   依依哦哦細細聲唔望人答 7 點收   點解啲人咁無禮貌   真係對大澳人大大打拆扣咯 ~

有啲餓   所以買啲鴛鴦砵仔糕   炸蕃薯同炸蘿蔔餅   之後見到有檔阿婆阿伯擺街邊賣桂花糕好多人買   所以又嚟試   好香桂花同好超煙韌   有驚喜呀 ~

食完又周圍行   經過整蝦醬嘅地方   咁勁蝦醬味真係好難頂   又污糟   里奧大人問我仲敢唔敢食蝦醬   我話會囉   咁好多嘢你都唔知製造過程都食啦   係咪先 ~

行到開始有啲餓   所以都係求其去間酒樓食飯   叫咗個海蜇併墨魚餅 + 排骨炒麵   點知等碟排骨炒麵等咗半個鐘   炒咗都唔鬼要呀   火滾呀   最憎啲人成日話追緊追緊   但其實就無追   最慶係我哋最早嚟   但人哋遲嚟嗰啲嘢食到咗七七八八   火都嚟 ~

之後就坐艇仔睇白海豚呀   $20/位   如果真係睇到就唔貴啦   估唔到去到海中心真係見到白海豚呀   好好彩見到 3 次   粉紅色好靚   之後再睇棚屋   呢廿蚊真係好抵玩呢 ~

睇完又周圍行周圍影   人影我又影   見到有個阿伯拖住個小朋友   知我哋影即黑住塊臉 ~

臨走前再食多次炸蕃薯同炸蘿蔔   食埋烤魷魚  再買埋嘢就走 lu   回程時候   見到好多牛喺街邊食草   好可憐呀   比人遺棄真係好慘 ~

呢晚好想打邊爐   但里奧大人又想食扒   最好就係去大家樂啦   不嬲覺得大家樂得啲火鍋份量唔係好多   但今晚覺得食到好飽好辛苦   真係唔行都唔得呢 ~ 

仿膳飯莊 @ 九龍灣 ( 24-DEC-2009 )

燻魚 - 我鍾意食乾身啲脆啲嘅 

榨菜肉粒配薄餅 - 雖然榨菜粒好惹味   但食得多就覺得好鹹囉

叉子燒餅 - $36/4 塊   貴得嚟又唔掂   係絕對唔掂呀   腍嘅   超級極度失望呀 

糖醋排骨 - 呢個最正呀  

片皮鴨半隻 - 我覺得麻麻哋囉   丹桂軒好味好多呢   

( 24-DEC-2009  THU )

好多人都開始放假   所以無乜人等車   好快已然番到菇場附近 lu   難得咁早   所以食麵喇 ~

呢日無 Mood 做嘢啦   Lunch Time 又好快到喎   諗食乜真係好煩   最後去 7-11 買糯米飯   十二蚊雞超細碗之餘仲唔好食   哈哈 ~

終於知道今日係無得放早   所以無哂心機啦   不過算啦   上網都好開心呢 ~

  
里奧大人接我放工   之後去 Haagen Dazs 食雪糕   因為有張 Coupon 年底到期呀 ~ 

今晚約咗水姑同晴晴   所以食完行陣德福就去食晚飯 lu ~

食完就同埋晴晴加埋媚媚番自己教會   聽完見証之後   更覺得神真係每日都比我無數恩典   時常都保守着我呢   感恩感恩 ~

食完片皮鴨要排毒   所以又食龜苓膏喇   假期嘅許留山真係超級多人   最慘係啲位好迫   坐得好唔舒服呢 ~

酸梅麵豉蒸排骨 + 菜心 + 自家製糖不甩 ( 23-DEC-2009 )

薑蔥蒜茸 - 里奧大人感冒   特登整比佢殺菌   

迷你牛脷蘇 - 掛住影相   焗燶咗少少

( 23-DEC-2009  THU )

今朝食沙爹牛肉蛋通粉 + 凍檸茶   可能好少食通粉   所以覺得好好味呀   我鍾意食無紋嘅通粉   因為滑嘟嘟   但好多人鍾意食有紋通粉   反而我唔鍾意呢 ~

番到菇場諗住忙完   點知做完抖陣又有嘢做   想抖下都唔得添 ~ 

晏晝勁想食咖哩雜菜意粉   但菇場對面茶餐廳又無喎   又唔想行咁遠   所以去 7-11買咖哩魚蛋芝士腸烏冬   估唔到都幾辣   正呀 ~ 

本來今晚係去食婆婆生日飯   但里奧大人感冒   所以我都唔去啦   照顧佢嘛 ~  

呢排好似成日出街食咁   所以都係煮飯好啲 ~

是日懶餐 - 酸梅麵豉蒸排骨 + 菜心 + 自家製糖不甩

酸梅麵豉蒸排骨 - 酸酸咪咪開胃嘛   真係好想加隻指天椒   不過一陣里奧大人話辣唔食就煩   所以唔落 lu ~

菜心 - 哈哈笑菜心   人哋話爆口先甜 ~

自家製糖不甩 - 想整好耐啦   上次見眼瞓唔想瞓    所以搓啲粉玩下   再擺入冰格   唔敢大量生產   因為驚唔好食就慘   但估唔到超煙韌呀   仲煙韌過許留山嗰啲   以後自己整嚟隨時食都得呀   真係超級無敵勁開心呀 ~

做冬 @ 和民居食屋 (官塘) ( 22-DEC-2009 )

( 22-DEC-2009  TUE )

今朝唔知食乜好   所以食吞拿魚治烘底   不過我開始有啲厭喇   同埋覺得啲沙律醬好漏呀 ~

番到菇場即 Check Email   求其喺菇場食杯麵算喇   因為想知有無得放早 ~

1 點幾食 Lunch 先收到 Email 話放 4 點   好開心呀   但唔明點解唔一早 Send 囉   家姐公司連聖誕節同元旦都知到放幾點喇 ~

4 點收工諗住接媽咪出院   點知媽咪之前已經比人趕走   因為有人入院   所以我只係去醫院幫媽咪拎藥就搞掂 ~

   
去媽咪屋企放低啲藥就去 APM   呢餐里奧大人叫埋姑奶一齊   多個人真係唔知點咁    我一心諗住一家人食飯   無啦啦多個人   氣氛即刻唔同哂囉   講嘢要就住就住   食都食得唔開心呀 ~

新之食 @ 官塘 ( 21-DEC-2009 )

牛展刀削麵 / 辣炸醬手攪麵 / 蒜蓉菜心 / 煎韭菜餃

( 21-DEC-2009  MON )

今朝 6 點幾電話響   仲以為有人玩電話   點知原來係平安鐘打嚟話媽咪氣促   啱啱入咗醫院   聽完都睇唔着喇 ~

  
平時食芝菇治覺得好味   但今朝食覺得唔好味 ~

番到菇場都無哂心機   只想快啲放工去睇媽咪   晏晝都係喺菇場食杯麵   唔想出街呀 ~

終於放工同埋里奧大人探媽咪   見媽咪精神唔錯   放心哂   同埋姑娘又講解媽咪情況   咁我就知道發生乜事   第時知點樣處理   感恩可以見到有個咁有愛心嘅姑娘呀 ~

同里奧大人又食刀削麵   啲辣椒菜甫真係好惹味   就咁一碗湯麵加菜甫已經好好味㗎喇 ~ 

梨和園韓國燒烤 @ 銅鑼灣 ( 20-DEC-2009 )

印尼炸蝦片 - 超好味呀   脆卜卜辣辣哋   真係留肚食佢㗎   幾想可以拎走呀   哈哈
青口 - 我無食   但里奧大人話 OK

椒鹽瀨尿蝦 - 預咗無肉食   但啲椒鹽辣椒超辣   勁好味呀

白菜 / 芽菜 - 中間唔知乜菜   我好鍾意食 

魚仔 / 酸青瓜 / 酸菜 - 魚仔鹹咗啲   可能無送飯   酸青瓜都唔酸嘅

壽司 - 啲 飯唔算硬   都 OK 啦

酸辣無骨鳳爪 - 家姐話唔好食喎

牛肉 / 牛肋骨 / 蟹柳 - 牛肉同牛肋骨好入味

多春魚 / 魷魚仔 / 辣豬肉 - 多春魚好難燒   成日黐底   就算想食都唔食 lu

蜜糖腸 / 蝦 - 其實呢啲係打邊爐食物   不過我想食   所以拎咗少少

魚柳 - 都 OK 喎   不過又係好難燒   所以放棄

西米露涼粉 - 里奧大人次次都會食幾碗㗎   無咁熱氣喎   但我驚唔受得太涼   所以無食呀

朱古力大王雪糕 -  估唔到都幾濃朱古力味   仲有朱古力碎添

椰絲花生糯米磁 - 煙煙韌韌好味呀

椰汁西米糕 - 無味嘅

( 20-DEC-2009  SUN )

瞓到自然醒   不過都係瞓到 10 點半左右就醒㗎喇   可能習慣食早餐   所以好少會瞓過 11 點呢 ~

拿拿聲梳洗去食早餐   之後再 Join 家姐去工展會 lu ~ 

同埋家姐一齊去南記粉麵   里奧大人成日話冬天好快餓   所以就算頭先早餐食麵   一陣食米線都無問題   點知最後都係食唔哂   要我哋幫手   都話啦   公仔麵好飽肚家嘛   又唔信我喎 ~ 

豬腩肉拚春卷酸辣小鍋米線 x 2 / 墨魚丸拚春卷河粉

食完就去工展會喇   好多人呀   但又無年宵咁多人咁迫囉   又話呢日係最凍得 10 度   真係一啲都唔覺囉 ~

本來想拖喼   里奧大人話拖喼仲麻煩   去到發覺真係拖喼仲煩   因為人都行唔到呀 ~

今次又去阿波羅食乳酪   好似年年都係 $25/杯 (藍梅加任何一款生果)   呢檔最多人買   又開四面   真係收錢收到手軟呀 ~ 

食完再行陣就走喇   4 點幾真係唔拖唔水咁   所以坐公園傾下一陣食乜好   坐咗陣真係舒服好多呢 

最後決定去韓燒   因為太耐無食   同埋多人食開心啲   平時兩個真係食唔到啲乜㗎 ~

大食會 @ 姑奶屋企 ( 大埔) ( 19-DEC-2009 )

 蝦 / 金沙骨 / 炸雞塊 / 咖哩雞 / 西蘭花 / 椰菜花 / 芝士肉醬意粉 / 臘腸粒炒飯 / 雜果沙律 / 蒜蓉包 / 桂花糕

( 19-DEC-2009  SAT )

天氣凍   真係唔願起身番工呀 ~

早餐食芝蛋治少蛋   食嘅時候都覺得好怪   點解會有食肉嘅口感   當我撩啲蛋黃先發覺原來係芝腿蛋治   唔怪之得啦   一陣啲人以為我咁大食就慘啦   哈哈 ~

星期六番菇場   就算唔做嘢就咁上網都覺得好悶   好想快啲放工囉 ~

放工番去同里奧大人食 Tea   真係好開心   一個人食 Lunch 真係好悶呢 ~

冬蔭功魚片頭雞翼湯河 / 沙爹牛肉粒炒飯

番到屋企坐陣就番教會 lu   里奧大人又話天氣凍好餓   所以又去食餃子   之後再去姑奶屋企做冬 ~

今次我焗咗 brownies   估唔到大人細路個個都話好味   真係好開心呢   其實我驚唔好味   因為我自己改咗食譜份量   好在個個話好食   唔係就慘咯 ~

Brownies ( 18-DEC-2009 )

( 18-DEC-2009  FRI )

因為屋企有 2 Pack 朱古力   單憑我同里奧大人根本食唔落咁多   所以就整比里奧大人屋企人試下   但就比里奧大人試下先   好味就比人食   唔好味就要自己食哂喇 ~

焗出嚟嗰樣超肉酸   真係好驚又唔好味   好在里奧大人試完話好味   咁就當好味㗎喇   拎比佢哋食   佢哋個個都話好味   真係好開心呢 ~

住家飯 @ 媽咪屋企 ( 18-DEC-2009 )

粟米豬扒 / 蘿蔔魚鬆 / 臘鴨 / 芋頭 / 蕃薯 / 外賣牛雜河

( 18-DEC-2009  FRI )

今朝坐車   又見到尋朝見到嘅女人   點解會有印象呢   係因為我見到佢額頭上面有 2 粒大頭皮   望真啲原來係頭箍嘅閃石嚟   嚇得我吖   無理由家嘛   咁大粒頭皮都睇唔到   仲要係差唔多位置添   原來係自己眼花 ~

終於又 Happy Griday 喇   超開心呀   所以食啲自己鍾意食嘅早餐呢 ~

忙咗一個朝早   終於可以抖下   Lunch Time 又未餓   所以又出去行半個鐘   之後再去美心買糙米芝士包番菇場慢慢食 ~

今晚里奧大人去飲   我就番媽咪屋企黐餐   不過無同媽咪講㗎   媽咪見到都嚇咗一跳呢   仲話我唔早啲話佢知   等佢煲湯同買魚喎   我就係特登唔早講   因為媽咪呢排腳腫   唔想佢滕嚟滕去咁辛苦呀 ~

番到屋企就即刻整 Brownies   因為聽晚去姑奶屋企做節   想整啲甜品佢哋食   同埋我想盡快清咗排朱古力呀 ~

焗嘢期間又做下家務   開機洗衫   因為嚟緊兩日都唔喺屋企   所以做埋先   唔想咁污糟呀 ~  

終於焗好拿拿聲拎出廳放涼   唔係唔駛瞓呀   今次嘅 Brownies 又係焗到好香呀   沖涼都聞到添呀 ~

味千拉麵 @ 大埔 ( 17-DEC-2009 )

蟹肉蟹籽沙律 / 九洲辣麵 / 豬軟骨 . 定食 / 芽菜 / 日式手造餃子 / 麵豉湯

( 17-DEC-2009  THU )

今朝又係好眼瞓   成晚發夢真係慘   等如無瞓過咁 ~  

家姐成日叫我試下麥記嘅板燒雞腿包   今朝去咗食啦   都 OK   最緊要塊雞柳唔好大大件就得喇 ~ 

番到菇場又忙喎   做到眼都濛   真係好似睇驗証碼咁辛苦呀  啲字黐住哂咁   成日要 "烘" 到好埋先睇到係乜   所以一睇得耐就會好辛苦囉 ~

  
天氣凍   所以 Lunch 食湯粉麵就最好喇   不過食完有啲熱呀 ~

今日真係好攰好攰   咁啱里奧大人又話想打邊爐喎   咁真係唔煮喇   點知去到酒樓無得打   因為佢地擺酒呀   又唔想去大家樂   唯有轉場去味千拉麵   里奧大人怕凍   唔想行咁遠呀   食完行陣先番屋企   好爽呀 ~  

住家飯 @ 媽咪屋企 ( 16-DEC-2009 )

煎倉魚 - 點沙律醬真係絕配呀

蒸嘉美雞 - 好滑好好味呀   同雪藏雞真係好大分別呢

薑蔥蓉 - 我食雞一定要有薑蔥蓉   好味好多呢   真係食薑蔥蓉多過食雞㗎

炸魚仔 -  細細條又脆卜卜   好味呀

荷蘭豆炒鮮魷 - 我其實對炒鮮魷麻麻哋   因為好多時媽咪成日整   有啲厭呀   
灼菜心 - 呢碟菜好甜   好好味呀

蒜頭辣椒豉油 - 最鍾意係呢碟   就咁送飯都無問題呀
外賣咖哩魚蛋 - 上次家姐買   今次里奧大人買   味道唔一樣   但其實係同一間嚟喎

    

( 16-DEC-2009  WED )

今朝開始凍   但我又唔覺得凍喎   唔知係咪之前幾日食咗豬腳薑醋   個人無咁凍呢 ~ 

尋晚打邊爐好飽   所以朝早食三文治算喇   本來想食出前一丁   但唔餓食麵會好飽好辛苦呢 ~ 

菇場有個女同事個口真係好臭   真係超級難頂   10 點幾行過佢個位   佢講緊電話   經過都聞到成陣味呀   超難頂   所以同 8 卦改咗佢個名叫渠王呀 ~   

晏晝出去行陣先買 Lunch   突然好想食撈麵   所以就去 7-11 買嘢食喇 ~

番到菇場無啦啦又忙喎   不過我都慢慢做   唔想破壞好開心嘅 Mood 呀 ~

今晚番媽咪屋企食飯   所以又買兩件 Cake 一齊食喇 ~

依家天氣凍   所以寶寶會瞓床   同佢影相嗰陣   佢想咬我個鏡頭呀   好在我身手敏捷縮得切咋   唔係佢就知味道

大家樂 @ 大埔 ( 15-DEC-2009 )

( 15-DEC-2009  TUE )

今朝落毛毛雨又天陰陰   真係好想瞓覺唔番工呀 ~

菇場相當寧靜   仲更加想瞓覺呀 ~ 

晏晝同媽咪飲茶   飲到唔知食乜好 ~

叉燒餐包 / 炸雲吞 / 煎鍋貼 / 鹹肉糉 / 荔芋鴨腳扎

放工同里奧大人一齊去屋企附近剪髮   好耐無一齊剪髮喇   突然間好有拍拖啲感覺呀   妳知啦  拍拖做乜都要一齊家嘛 ~

見凍凍哋   所以就去大家樂打邊爐啦   其實我幾鍾意大家樂打邊爐   一人一鍋又無酒樓咁嘈   又唔係樣樣大大碟食唔哂喎   唔錯呢 ~

飽到反肚呀   所以一定要行陣消化下先番得屋企   好難想像有啲人食完宵夜飽一飽就瞓   我覺得好辛苦囉 ~

蜜汁燒排骨 + 菜心 + 自家製豬腳薑 + 蕃薯糖水 ( 14-DEC-2009 )

( 14-DEC-2009  MON )

瞓得唔好呀   超級眼瞓呀   好似好耐無試過咁眼瞓咁呢 ~  

又遲咗出門口喎   又要食三文治早餐喇 ~

好在忙咗陣就好 Free 咋   因為根本無心機做嘢 ~

Lunch 食燒賣腸粉   今次兩樣都唔好食嘅   勁唔開心呀 ~

尋晚醃好哂嘢   又買埋菜   所以直接番屋企就我呢   最鍾意係咁呀 ~

  
是日懶餐 - 蜜汁燒排骨 + 菜心 + 豬腳薑 + 蕃薯糖水

蜜汁燒排骨 - 今次整得好好味呀   里奧大人唔鍾意食金沙骨都覺得好好味呀   叉燒醬萬歲 ~

菜心 - 尋晚剩嘅一斤菜心   連續兩晚食都唔係咁好   好悶咁   但唔買定又會連續幾日都想食喎 ~   

豬腳薑 - 媽咪整㗎   里奧大人唔食㗎   得我一個人食咋   要快啲清埋佢先得呀   因為仲有 3-4 碗咁多   唔想留咁耐呀 ~ 

蕃薯糖水 - 蕃薯買咗成個星期啦   買嘅時候好想整   點知依樣嗰樣又唔想整   問里奧大人食唔食   估唔到佢好開心話正呀   令我好有原動力整呢   同埋整都整得開心啲呢   不過估唔到屋企得好少薑   切埋得 4-5 片 好在都有薑味咋 ~ 

呢兩日都無出街散步   有啲唔慣   雖然唔會出哂汗嗰隻   但郁下都差好遠呢   個人舒服啲咁㗎 ~

牛油曲奇 ( 13-DEC-2009 )

( 13-DEC-2009  SUN )

因為同自己講過   盡量希望唔好再浪費任何食物   材料等等   所以我就焗牛油曲奇喇   因為有 100g 無鹽牛油將會喺17/12 到期   難得假期   咁開爐試下焗啦 ~

無期望就會有無限驚喜   估唔到無變黑炭之餘   仲有入口鬆化添   里奧大人都估唔到我整到咁嘅水準呀   差啲感動到相擁而哭呀 ~

希望下次會再係咁好味咁鬆化就好喇   不過曲奇又唔可以成日食   好漏家嘛   對我嚟講都幾難熟能生巧咯   哈哈 ~

臘腸蒸排骨 + 菜心 + 冬蟲草當參烏雞瘦肉湯 ( 13-DEC-2009 )

( 13-DEC-2009  SUN )

朝早番教會呀   所以又係喺教會附近食早餐呢 ~   

番完教會就買餸   之後就番屋企啦   尋日行得多腳痛呀 ~ 

3 點同晏晝飲茶   原來只係有指定嘅食物係平啲咋   等我仲以為有下午茶時刻添 ~    
上湯小籠包 / 鮑翅灌湯餃 / 潮州粉果 / 檸蜜炸蛋散 / 皮蛋瘦肉粥 / 壽眉 

見有時間又 Mood 到喎   所以焗 牛油曲奇   因為牛油就到期嘛   唔想又浪費呀   今次仲好成功添呀   真係開心到暈咁滯呀 ~

  
是日懶餐 - 臘腸蒸排骨 + 菜心 + 冬蟲草當參烏雞瘦肉湯

臘腸蒸排骨 - 里奧大人話啲汁好好食   我當然好謙虛話 OK 啦  求其整咋   其實個心真係好開心㗎   聽到自己鍾意聽嘅嘢   當然想聽多次啦   之後再問佢係咪真㗎   佢好認真話係真㗎   對於我唔識煮嘢嘅人覺得好好食   乜意思先 ~

  

菜心 - 依家菜心又平喎  $10/2 斤   買多斤留番聽日   又唔特登駛去街市買菜   正呀 ~   

冬蟲草當參烏雞瘦肉湯 - 係時候又要補下   如果唔係又唔記得屋企有冬蟲草喇 ~

霸王山莊 @ 荃灣 ( 12-DEC-2009 )

燈影牛肉 - 紙咁薄又脆卜卜   甜甜辣辣咁   超好味呀

小籠包 x 2 - 同廣告嘅差九萬九千賠呀   食落肉汁都唔係好多啫   皮又唔夠薄   不過唔想食飯先叫 2 籠咋   廣告影到好吸引 Fing 到個包好多肉汁咁   我 Fing 咗好多隻㗎喇   都唔係咁嘅   邊樹有咁多肉汁喎   又或者我唔識影啦

蟹粉小籠包 - 完全同小籠包一樣味   超級無敵勁失望呀
蒸銀絲卷 - 無特別

前菜 - 無味道嘅

( 12-DEC-2009  SAT )

終於又等到每月一次嘅 Off 喇   瞓到 9 點半   食完早餐再梳洗就出街 lu ~

今次去挪亞方舟   因為又要坐車又要坐船   所以早啲出發   唔想去到趕頭趕命   想慢慢觀光呀   但去到碼頭走咗一班船   應該係開早咗   咁又要等多半個鐘   無嘢做就周圍影相   時間過得快好多呢 ~

喺碼頭行陣啲風一吹   一陣臭味   都唔明阿叔仲釣魚嚟做乜   唔好話我知係食呀   好嘔心呀 ~ 

12 點半就到挪亞方舟   同我哋預計時間差唔多   再睇埋個 Map   三至四個鐘頭應該行完 ~    

首先行咗方舟多媒體博覽館   原來唔比影相   好失望呢   因為我會唔記得睇過啲乜㗎   之後行方舟生命教育館   差唔多 2 點去食嘢 lu   啲嘢食麻麻哋   但環境就正啦   不過可能有旅行團嘅關係   嘈到拆天咁   真係乜興致都無哂呀   都唔明點解啲人可以講嘢咁大聲嘅 ~

咖哩牛腩飯 - 為咗影相   所以個咖哩飯凍哂   哈哈

羅漢齋炒麵 - 好在個麵都脆卜卜   我食呢啲麵一定會點醋同辣椒醬   但啲醋同辣樣醬唔好味囉 

食完就充滿力量啦   繼續行埋珍愛地球館同方舟劇院   再去買紀念品   就去方舟公園   見到好多動物又好多花   影得好痛快呀 ~

已經 5 點幾   行埋大自然公園就走喇   本來諗住去馬灣碼頭搭船到荃灣   但好感恩比我哋見到有巴士去青衣   所以就出青衣再去荃灣食晚飯喇 ~

今次去霸王山莊食晚飯   因為見到電視廣告拍到啲小籠包好好味咁   所以去試下呢   但整體食物都係麻麻哋呢 ~

 
臨坐車前  去咗佳記買椒鹽魷魚鬚   超好味呀 ~

住家飯 @ 媽咪屋企 ( 11-DEC-2009 )

紅棗杞子蒸雞 / 蒸魚 / 釀尖椒 / 茄子 / 蓮藕淮山粟米栗子豬展湯 / 蛤蚧淮山圓肉瘦肉湯 / 外賣咖哩魚蛋 / 飯後果

 

( 11-DEC-2009  FRI )

Happy Friday 真係好開心呀   知道聽日 Off 仲天加開心呢   仲會覺得食乜都覺得好食咁 ~

番到菇場忙喎   諗住 Hea 住等 Off 家嘛   點知又忙喎 ~

晏晝又同 8 掛同事出去食上海嘢   其實真係好想睇 Blog   不過佢話過如果無帶飯就陪我出去食   唔想我做孤獨精喎   見佢咁好   又同佢係唯一一個好傾嘅同事   唔推佢啦 ~

今晚去媽咪屋企食飯呀   順便買芝士包比家姐做早餐   同埋買兩件 Cake 同佢哋 Share 食   又估唔到里奧大人又食喎   家姐又唔知點解話雖然好飽   但都會好想食   里奧大人呢啲咪叫做為食囉   不過點講都好啦   最緊要有得食   理得妳吖   一齊 Share 食嘅感覺真係好開心呀 ~

燒汁鯰魚柳 + 腐乳唐生菜 + 豉油王炒飯 + 自家製豬腳薑 ( 10-DEC-2009 )

( 10-DEC-2009  THU )

好耐係食芝士火腿菠蘿包呀   所以今朝要去食喇 ~

終於可以抖下喇   超級開心呀 ~

朝早太飽   所以出去行陣先買嘢番菇場食   今次又食蕃茄芝士吞拿魚 Pizza 包   無上次咁熱辣辣同多料喎 ~

今晚又係好舒服   就咁去街市買菜就搞掂 lu   好快開得飯呢 ~

是日懶餐 - 燒汁鯰魚柳 + 腐乳唐生菜 + 豉油王炒飯 + 自家制豬腳薑

燒汁鯰魚柳 - Jusco 買㗎   今次我仲好有心機煎   加埋燒汁好好味呢   最開心係啲魚肉唔腥呀   我覺得龍脷柳有啲腥㗎   所以好耐無買囉 ~

腐乳唐生菜 - 淥生菜最方便啦   唔熟都唔驚嘛 ~

豉油王炒飯 - 呢個飯加咗啲脆蒜蓉馬拉盞一齊炒   但我無食呀   里奧大人就成日話啲魚嘅燒汁係辣   我話無理由   唔辣㗎噃   百思不得其解之下   我咪發火囉   以為佢唔想食魚嘛   但差唔多瞓覺終於諗到   就係我唔記得個飯加咗蒜蓉馬拉盞   所以會辣   鬧錯里奧大人添 ~

 

自家製豬腳薑 - 媽咪整㗎   超好味呀 ~

搞掂哂所有嘢就同里奧大人散步啦   行到商場   里奧大人打側企樓梯   點知差錯腳跌到   初初諗住佢會鯉魚大翻身   點知最後相手跪拜   好在係兩級樓梯啫   唔係就大穫啦   成日唔睇路   仲話叫我即刻指去另一邊   轉移人地嘅視線   佢就即刻起身走   唔好比人見到喎    顛啦   其實佢有時拖住我嘅時候都試過差啲跌㗎架喇   一陣我又跌埋就慘啦   到時佢扶起我   我又扶起佢   樣衰到爆啦   鬧咗幾百次都係咁   煩呀 ~

豉油王海鮮炒意粉 + 咖哩薯仔雞翼意粉 ( 9-DEC-2009 )

( 9-DEC-2009  WED )

今朝好想食牛扒餐   所以點樣都要食呀 ~

終於無咁忙喇   心情都輕鬆好多呢 ~ 
晏晝同 8 掛同事食粉麵   平時多數同里奧大人一齊去呢間茶餐廳食   依家同 8 掛同事食   有啲唔慣呀 ~

里奧大人又有得見工   見完先知道呢份工要長註大陸   星期一至星期五都喺大陸喎   咪等如無咗個家囉   我唔制㗎   多啲錢都唔制   我接受唔到要分開   佢以前出 Trip 我會喊㗎   好唔捨得咁款架 加上佢又無住家飯食   好唔健康   我又會超級擔心佢安唔安全   咁咪搞啦   一陣佢身體又唔好   我身體又唔好   唔係大口氣   咁真係要錢都無用啦   補一補身要用唔少錢同時間   真係賺咗都補唔番呀  
是日懶餐 - 豉油王海鮮炒意粉 + 咖哩薯仔雞翼意粉

豉油王海鮮炒意粉 - 唔知煮乜好   唯有煮意粉   順便清倉   正呀 ~ 

咖哩薯仔雞翼意粉 - 尋晚食唔哂啲咖哩就等我食啦   里奧大人話太辣唔食喇   我加啲意粉都不知幾好味呀 ~

  
食完又散步   無啦啦好想食蝴蝶酥   點知搵咗 4 間都無喎   所以去美心買咗個荷蘭撻補數   里奧大人比錢時   個 Cashier 好開心話 "老婆買嘢   老公比錢   真係好好呀"   我又唔係次次係咁   今次無帶銀包之嘛   不過算啦   里奧大人開心   我又有着數   大家開心 ~

咖哩薯仔雞翼 + 印度薄餅 ( 8-DEC-2009 )

( 8-DEC-2009  TUE )

今朝落毛毛雨   天氣又潮潮濕濕咁   真係唔舒服喇 ~  

一落雨就多數塞車   影響哂心情   不爽呀   因為代表要趕頭趕命食早餐呀 ~

又係忙   睇數字真係睇到頭暈眼花   明明 10490 可以打到 14090   仲要 Check 咗幾次都唔知自己打錯   真係要停一停   醒一醒先可以 Check 過呢 ~

晏晝同媽咪飲茶   本來約咗 8 掛同事食   不過媽咪叫到就無辦法啦   同埋就嚟搬 Office 就無得飲   所以依家一有機會就會同媽咪飲囉 ~

尋晚已經煮定今晚嘅餸   所以好輕鬆咁番屋企呢 ~

咁 2 姑奶話姑奶感冒   想去我屋企食飯同休息   不過我話今晚煮咗咖哩唔啱佢食啦   同埋我想講感冒就番自己屋企休息啦   一陣傳染埋比我哋咪慘囉   呢啲人真係好自私 ~

是日懶餐 - 咖哩薯仔雞翼 + 印度薄餅

咖哩薯仔雞翼 - 今次用咗半樽油咖哩   所以好辣   本來加咗隻指天椒   但試味覺得太辣   拿拿聲拎番出嚟呀   我又買定支鮮奶比里奧大人解辣   佢仲好感動話我好細心   其實我驚佢嫌辣唔食咋 ~

印度薄餅 - 里奧大人話我煎得唔夠香喎   所以打後嗰啲就比佢煎啦   見佢咁 Enjoy   我當然又要讚下佢啦   之後佢煎完放低個鏟話: 搞掂   佢指住啲薄餅叫我放上碟   自以為大廚上身呀   真係吖 ~

整完哂所有嘢就落街散步   順便去許留山食龜零膏   幫里奧大人清清熱氣   唔係一陣話我整得太辣   整到佢依樣嗰樣   以後唔食咖哩就煩   因為我仲有半樽油咖哩要清埋佢呀 ~

焗豬扒飯 + 粟米蘑菇蛋花湯 ( 7-DEC-2009 )

( 7-DEC-2009  MON )

天氣無啦啦又凍番   超勁唔想起身番工呀 ~

早餐去麥當勞   我覺得比較 Relax 啲   星期一嘛   唔想咁趕 ~

忙呀忙   忙到震   好在飲咗咖啡提提神   唔係真係唔願做呀 ~

落雨濕濕又凍喎   唔想行咁遠   去附近買車仔麵算喇 ~

無啦啦咁凍   里奧大人話打邊爐   我話唔好喇   成日出街食   橫掂我又醃咗豬扒   所以煮飯啦   我都估唔到自己會咁堅持煮飯囉   賢妻是也 ~

是日晚餐 - 焗豬扒飯 + 粟米蘑菇蛋花湯

焗豬扒飯 - 材料有 2 塊豬扒 + 2 個蕃茄 + 1 個洋蔥 + 半罐蘑菇 + 1 隻蛋 + 2 碗冷飯 + 芝士粉   再整個茄汁茨   放入焗爐    焗起真係超級勁香呀   我好少咁讚自己㗎 ~

粟米蘑菇蛋花湯 - 今次個蛋花好滑呀   全靠  mimi 教路   唔該哂妳呀 ~