蕃茄肉碎 + 唐生菜 ( 9-NOV-2026 )

尋晚食剩嘅叉燒炒麵   今晚都食埋去 lu

鴻福堂嘅杞子醬汁燒賣 & 芫茜魚肉燒賣   我覺得超級難食呀   好似食麵粉咁   之後我話今朝又食咗燒賣   今日總共食咗 15 粒燒賣呀   真食食到有啲驚   哈哈

( 9-NOV-2026  MON )

感恩一覺瞓天光呀   瞓到 7 點左右醒咗   不過就繼續瞓到鬧鐘響呢 ~

早餐食魚肉燒賣   下次要半份燒賣+粉果好啲   因為唔駛食一樣嘢咁悶   哈哈 ~

菇場忙呀   咁就好喇   時間過得快好多㗎 ~

Lunch Time 去一田買嘢   估唔到行咗 20 分鐘就買完   咁再行多陣先番菇場叮飯 ~

S&B 金牌辛口咖哩 X 2 ($34/2 件) / 丹麥堡三重芝士 ($62/2 包)

樂淇珍寶蘋果4粒裝 ($69.90/2 件) /泵瓶 ($8)

獅球嘜初榨濃香花生油 900毫升 (買滿 $150 用 $28 換購價)

忙下停下   之後 8 卦 Whatsapp 話下年做 "SPY x FAMILY"   嗰時我好鍾意 Anya 㗎   估唔到佢仲記得   哈哈 ~

傾下傾下又半個鐘   同佢真係乜鬼嘢都可以講   所以佢走咗嗰陣時候   我真係有啲唔慣㗎 ~

諗住做靜靜哋做自己嘢   點知聽到阿後問司機嘢   但司機好勞氣咁答佢   真係全公司都聽到咁滯   不過應該係阿後理解能力有問題   成日做咗自己嗰部份就當做完   我最憎啲人係咁   佢同溫總係同一類人   所以每個同事同佢哋傾嘢   個個都好勞氣㗎 ~

放工即走   番到屋企都即刻煮晚餐喇 ~

是日晚餐 - 蕃茄肉碎 + 唐生菜

蕃茄肉碎 - 之前喺一田買咗 2 盒蕃茄   我又醃咗肉碎   所以就煮呢個餸喇   里奧大人話好味道呀   因為佢鍾意食蕃茄汁嘅餸 ~

唐生菜 - 差啲唔記得食呀   其實依家都開始唔買咁多嘢喺雪櫃喇   唔記得食就浪費㗎喇 ~

洗埋碗抖陣就同里奧大人去散步   行咗半個鐘就番屋企 lu ~

開埋機洗衫就沖涼   因為里奧大人今日熨咗衫同埋洗咗被   我就可以休息 ~

睇 Youtube 見到有 "臥底旅行團 6.0"   所以同里奧大人一齊睇呀 ~

睇完都已經 11 點   係時候瞓覺   今晚覺得凍呀   所以唔駛開冷氣喇 ~

叉燒炒麵 + 海底椰枇杷響螺鷓鴣湯 ( 8-NOV-2026 )

( 8-NOV-2026  SUN )

今朝里奧大人出門口   我就啱啱起身沖涼喇 ~

同家姐去食早餐   之後去埋 A1 買三文治就番屋企 lu ~

煙肉+蜜味火腿+炒蛋+薯餅+麥包多士+熱咖啡 ($45) - 家姐鍾意飲港式伯爵奶茶   我今次飲熱即磨咖啡   但唔好飲嘅

蘑菇炒蛋牛角包 ($25) - 家姐揀嘅時候   聽到佢係咁講鍾意食蘑菇   哈哈

Berry 女一見我就尖叫   叫咗半分鐘都有呀   真係好似好激動咁 ~

周圍望但唔望我

係都要我跪喺度影佢

家姐比個環保袋我裝嘢   咁我就順便幫佢掉啲環保袋   之後再放入櫃桶   咁樣就整齊好多啦 ~

搞掂就再幫佢分好啲文件   原來佢都有整理   但就求其咁囉 ~

本身 Berry 女喺房   但見我同家姐一齊坐梳化   佢就一定出嚟呢喺枱底   好似陪住我哋咁

想瞓覺

家姐同姐夫 11 點 15 分要出去一陣搞啲嘢   所以我喺屋企等家姐   點知 Berry 女即刻出嚟瞓喺房門口   再望住大門口等家姐呀   佢好似好驚我咁囉   好記得有次得我同佢喺屋企   佢直頭嗚嗚聲添呀   可能今次 U 姐都喺度   所以佢先無喊咋   哈哈 ~

點都唔上梳化瞓

家姐差唔多 11 點 45 分番到嚟   但佢要去何文田   咁同佢一齊搭地鐵喇 ~

本身家姐叫我唔好嚟   因為驚我好趕   但我話好掛住佢同 Berry 呀   所以我點都要嚟呢 ~

我要買叉燒同麵餅   最後買埋午餐就去里奧大人公司 lu ~

燒肉拚燒鴨飯

食完就幫手做嘢   差唔多 2 點半先走 ~

我問叻叻個袋幾時有呀 ?!   之後大餅笑住話我買咗個靚袋喎   肯定叻叻同佢講啦   我話依家直接叫佢幫我買呀   因為里奧大人唔幫我買㗎   哈哈 ~

我同里奧大人講話大餅知我買咗個袋呀   佢即刻話我知啦   叻叻同我講咗啦   話妳老婆買咗個袋呀   之後阿妹話佢做咩幫人哋老婆買袋呀 ?!   妳要問咗佢老公先得家嘛   但叻叻無理佢   直接比張相比里奧大人睇   仲話一定要比里奧大人知家嘛   唔係佢都唔知買咗個咩袋喎   咁又講得啱喎   哈哈 ~

番到屋企諗住抖下先   但里奧大人話水龍頭漏水呀   所以同佢出去搵工程公司   感恩屋企附近有呀   約咗師傅 5 點半嚟屋企整呢 ~

經過鴻福堂   我話換埋燒賣啦   因為 11 月到期   我唔駛成日記住呀 ~

我換完就睇其他飲品   里奧大人突然走嚟問我增唔增值 ?!   話增值 $500 就送湯包 燒賣同埋唔知咩   我話梗係唔增值啦   我就係想用哂張卡啲錢呀   佢話無諗過我唔會增值   哈哈 ~

海底椰竹蔗馬啼水 ($28 買一送一) / 楊枝甘露 X 4 ($45/2 支)

因為師傅半個鐘頭後就到    佢要關水喉整嘢唔可以開水   所以我番到屋企都預備晚餐喇 ~

鴻福堂嘅杞子醬汁燒賣 & 芫茜魚肉燒賣 - 水姑之前做咗 2 張卡嘅會員   所以換咗 2 份   因為 11 月到期呀   咁就拎嚟比里奧大人做聽朝早餐喇

家姐買比我㗎   我上次如果買開就幫我買   因為我仲有好多護髮素   所以真係唔急   估唔到咁快就買咗比我囉   之後係都要比埋 Tempo 濕紙巾   佢話訂咗好多   本身佢話比 1 盒我㗎   但我話要 10 包就夠喇

越飛龍嘅桂花肚 & 阿一嘅竹笙

快車肉乾嘅櫻花蝦杏仁香脆肉紙 & 安記嘅花菇皇

師傅 5 點 40 分到   整到 6 點 20 分呀   感恩呢個師傅整得好好   仲教咗我哋好多嘢呢 ~

今晚 7 點鬆啲先開餐   好在頭先煮咗啲咋   唔係仲遲呀 ~

是日晚餐 - 叉燒炒麵 + 海底椰枇杷響螺鷓鴣湯

叉燒炒麵 - 里奧大人鍾意食   所以特登整比佢食㗎   佢仲食咗 2 碗   真係好比臉呢 ~

海底椰枇杷響螺鷓鴣湯 - 味道都唔錯   最緊要唔駛自己煲   哈哈 ~

洗埋碗就要做清潔喇   搞掂就沖涼   之後就同里奧大人睇 "試真D唷"   今晚最後 1 集 lu ~

睇完再睇陣 Youtube   本身 10 點已經想瞓   但驚半夜會醒   所以忍到 10 點 20 分先瞓呀 ~

白菜豬肉餃 (外賣) + 椰子雪耳百合竹絲雞 ( 7-NOV-2026 )

里奧大人話又買咗隻新碟   真係無諗過佢會留意呀

今朝食剩嘅牛油多士   我加咗塊芝士去焗   因為想快啲清哂包芝士

里奧大人中午食剩半盒咕嚕骨同蕃茄炒蛋飯   咁今晚要食埋去喇

( 7-NOV-2026  SAT )

今朝 9 點起身   沖埋涼就出去食早餐喇 ~

五香肉丁煎蛋即食麵 ($39) - 突然好想食即食麵呀

鮮茄粟米素鮑魚絲火腿湯通粉配蒜香牛油多士 ($39) - 里奧大人食唔哂多士   咁當然打包啦

食完就同里奧大人去惠康買嘢   因為買滿 $168 有 88 折可以用 $59 (換購價) 買洗衣珠   雖然家姐今朝都買咗 5 包   但我都想睇下有無得買呀 ~

里奧大人趕住番工   所以我叫佢唔好等我呢 ~

我又再慢慢行下先   估唔到比錢要排半個鐘呀   好在條人龍係郁咋 ~

諗住買個購物袋裝飲品   但好感恩原來我個細環保袋都裝得哂呀 ~

家姐話鈣思寶 ($20) 好抵   咁我唔買洗衣珠改為買 3 Packs 鈣思寶喇   因為家姐講過幾次好抵   同埋我之前買嘅已經比哂里奧大人   咁之後幫家姐買 4 個大裝艾菲蘋果   佢話 $26.40 抵喎

番到屋企放低哂嘢   之後發現廁所個櫃有水滲出嚟   所以即刻搵師傅整喇   師傅話 4-5 點到   咁即係今日要留喺屋企   唔可以去事奉呀   我又要急急搵人代替我   感恩 ML 可以代替我呢 ~

咁又已經 1 點   我又開始執下嘢喇 ~

師傅 3 點半到   佢話條管無滴水   但就無話滴水源頭喺邊   如果再滴先搵佢喎 ~

里奧大人 5 點番到屋企   我話我中午只係飲咗包香蕉奶咋   估唔到唔駛食嘢呢 ~

今晚 7 點開餐   呢啲時間係最好 ~

是日晚餐 - 白菜豬肉餃 (外賣) + 椰子雪耳百合竹絲雞

白菜豬肉餃 (外賣) - 喺樂園魚蛋大王買㗎   咁啱做特價只係 $50/2 盒   味道都唔錯喎 ~

椰子雪耳百合竹絲雞 - 煮咗 2 包   但其實都算多栗子同雞肉呀   今次個湯就唔鹹喇 ~

里奧大人話買殺蟲水   所以洗埋碗就去惠康喇   里奧大人好好奇問點解唔去百佳買 ?!   因為同樣都有折   我話因為想買洗衣珠呀 ~

本身銀碼係啱啱好 $168   但我要買支煉奶就變咗 $178   家姐以為我特登買夠 $168 呀   哈哈 ~

買完都番屋企   今日滕嚟嚟去有啲攰   唔想再周圍行下 ~

沖埋涼就休息   睇陣 Youtube 又已經 11 點   係時候要瞓喇 ~

康姨小廚 @ 紅磡 ( 6-NOV-2026 )

菠蘿咕嚕肉 ($85) - 里奧大人話佢叫一定係呢個餸呀   炸得唔夠脆身   但個汁都好味道

紅燒豆腐 ($78) - 水公叫㗎   我覺得好食呀   以前食呢個餸一定蘸辣椒油   但依家唔駛 lu

羅漢齋炒麵 ($98) - 呢個係我叫㗎   又係好味道

極具中國特色嘅杯碗

( 6-NOV-2026  FRI )

感恩瞓得都唔錯   其實鬧鐘未響都醒醒哋   不過就瞓到鬧鐘響先起身   咁等里奧大人瞓耐啲嘛 ~

依家開細冷氣瞓覺真係舒服好多   咳咗 3 個星期   個人真係弱咗好多呀 ~

早餐食芝麻包   我覺得就咁食都好食   不過我遲啲都拎樽花生醬番公司   好過唔食就咁擺嘛 ~

菇場忙下停下   婦科診所打嚟聽唔到   咁之後即番比佢啦   姑娘話子宮抹片報告正常   感謝主 ~

Lunch Time 同船頭 阿齋去一田呀   今日係冬日購物賞   所以我哋之前已經睇定哂買啲咩   真係做足功課㗎   哈哈 ~

日本廣島急凍蠔 500g ($63) / 蘇格蘭頂級牛肋條 ($119.90)

芝士辣椒煙燻腸 & 芝士香草煙燻辣腸 ($79.90/2 件)

四海碗仔翅 5 件裝 ($42) / 三祖 X J-VILLE 經典午餐肉 X 3 ($28/件)

維多 C 3重功效水溶片 ($60/2 件) / 馬來西亞高原有枝茄 X 2 ($23.90/件)

船頭好鍾意食魷魚絲

阿齋就多數買點心   咁假期就唔駛出去買嘢食喇

3 人 3 車就最好   唔駛買完又分嚟分去   我同阿齋買咗差唔多 $500   船頭買咗 $1,200 呀

我就 1 袋搞掂   船頭同阿齋就要 2 袋喇

買完已經 12 點半   要番菇場開餐喇 ~

今次我買得最少   我話好輕鬆呀   之後一個叫我收聲   一個叫我慳啲啦   哈哈 ~

我買咗嘅嘢就打大交叉   阿齋話佢都係咁   唔係又重覆買咗就慘   再話如果諗緊買唔買好就畫個問號   依家真係唔想買完嘥嘢呀   不過其實只係我一個係咁啫   哈哈 ~

家姐形容得好搞笑

忙下停下   但網絡唔穩定   咁可以攞正牌傾偈   同埋又難得 3D 嘛 ~

放工即走   里奧大人就幫我拎藥   我同佢講話做咩唔晏晝飲呀 ?!   佢話呢劑藥係我㗎   我真係完全唔記得添   哈哈 ~

今晚係即興同水公食晚飯   其實佢之前約我哋   但我同里奧大人都仲係病緊就唔出去囉 ~

去到食店   估唔到爆場   職員話 4 人枱有人訂咗   所以要搭枱坐 6 人枱   感恩最後都無人搭枱 ~

食下傾下   水公話食物份量唔係好多   佢喺澳洲食嘅份量係呢度 3 倍   但都只係 AUD30   又問我做咩唔去酒樓 ?!   我話費事行去黃埔咁遠呀 ~

水公話味道好淡   但我同里奧大人覺得夠味喎   同埋最緊要食完唔口渴呀 ~

因為水公約咗朋友   所以 7 點半都走喇   我哋又啱啱有車番屋企   感恩感恩 ~

里奧大人話去買朱古力鬆餅   咁我都買 3 件黃油年糕試下先

沖埋涼抖陣就熨衫   之後同里奧大人一齊睇 "璀璨之城" 大結局   好感恩今晚睇到   因為我尋晚熄咗電視呀 ~

睇陣 Youtube   差唔多 11 點半先瞓覺 ~

蕃茄炒蛋 + 油麥菜苗 ( 5-NOV-2026 )

( 5-NOV-2026  THU )

尋晚瞓瞓下覺得好凍好凍呀   好想叫里奧大人校細啲冷氣   不過驚校細咗又熱   所以都係由得去喇 ~

感恩瞓得都唔錯   起身嘅時侯同里奧大人講話想校細啲冷氣   佢話尋晚都覺得凍呀   哈哈 ~

早餐食魚肉燒賣   因為我想飲提神咖啡 ~

菇場忙呀   咁就好喇   最鍾意就係忙 ~

我自從搬咗位之後   多數同船頭傾陣偈先開工   佢都話以前呢邊好靜   阿花都唔會咁傾偈   哈哈

Lunch Time 同船頭一齊去一田   因為佢想買雞翼   咁我哋去 DAISO 睇下嘢先   之後去一田買雞蛋   不過無貨   我就買咗金奇異果   買完就去 OP 睇嘢   最後去埋韓印紅買辣椒醬就走   因為已經 12 點半   要番菇場叮飯食喇 ~

紐西蘭金奇異果袋裝 5 個 ($25.90) & 噴壺 ($8)

仍然忙呀   船頭話今日居然無得買雞蛋   我話我有 Pack 喺公司呀   之後比 2 隻比佢   仲用埋之前買嘅裝蛋器皿   我話終於用到   哈哈 ~

放工即走   番到屋企都預備晚餐 lu   好似好耐無煮飯咁   真係要啲時間呢 ~

里奧大人 6 點 45 分番到屋企   可以即刻開餐喇 ~

是日晚餐 - 蕃茄炒蛋 + 油麥菜苗

蕃茄炒蛋 - 第一次煮呢個餸   里奧大人話好味呀   佢話鍾意食蕃茄嘢   好似焗豬扒飯嗰啲   咁我第時都多啲煮蕃茄嘢先 ~

油麥菜苗 - 有蠔油真係好食好多   第時食菜都加蠔油都好   反正屋企有好多支   可以快啲清哂去呢 ~

洗埋碗就執下廚房   搞掂就開機洗衫   之後沖涼休息喇 ~

同里奧大人一齊飲中藥   飲完就啱啱好睇 "璀璨之城" ~

睇多陣 Youtube   今晚 10 點 45 分都瞓覺 lu ~

雞肉丸撈麵 & 出前一丁 + 油麥菜苗 ( 4-NOV-2026 )

魚肉春卷就帶飯嘅

( 4-NOV-2026  WED )

感恩一覺瞓天光呀   郁多兩郁就鬧鐘響 lu ~

早餐食芝麻包   今朝想食齋包呀 ~

菇場忙下停下   里奧大人今朝請半日假   因為約咗師傅睇個浴室寶   感恩 10 點半到咗   之後換個新嘅就搞掂   佢仲洗咗 2 機窗簾   分擔下家務真係唔錯   哈哈 ~

Lunch Time 去買菜同蕃茄  之後又忍唔住買咗蒜頭 黃薑 乾蔥同指天椒   買完都即刻番菇場叮飯食 lu ~

船頭整咗節瓜燜魚肚   我同阿齋都覺得魚肚燜得好好食呀   同埋個節瓜好甜

佢話比啲魚肚比我煮   我話浪費食物啦   我話妳煮比我食好過啦   哈哈 ~

忙下停下   時間好快過 ~

船頭話頭先唔記得買蒜頭添   我話我頭先買咗 1 磅呀   所以比咗個比佢 ~

放工即走   番到屋企都預備晚餐   好耐無煮飯咁   所以咩都慢慢嚟呀   哈哈 ~

是日晚餐 - 雞肉丸撈麵 & 出前一丁 + 油麥菜苗

雞肉丸撈麵 & 出前一丁 - 里奧大人食丁麵   我就食冬蔭功撈麵   我覺得好辣呀 ~

油麥菜苗 - 今晚煮咗半斤   但下次可以食哂 1 斤   因為煮埋上嚟唔係好多咁呢 ~

洗埋碗又執下廚房   之後同里奧大人一齊飲中藥   好在有得加錢煎藥   我覺得比藥粉好啲咁呢 ~

差唔多 8 點 15 分先沖涼   抖陣就熨 2 機衫   一路熨一路睇 "璀璨之城"   但其實都無咩點睇   哈哈 ~

睇多陣 Youtube   今晚 11 點先瞓覺 ~