黃豆醬燜雞柳年糕 + 蒸節瓜粒 ( 22-JUL-2026 )

( 22-JUL-2026  WED )

感恩一覺瞓天光呀   瞓到 7 點 15 分都醒 lu ~

早餐仍然食巴馬臣雙重芝士吐司   但下次唔會再買嚟食   哈哈 ~

我趕唔切班車   所以去里奧大人公司坐陣   最搞笑佢揹背囊想出門口咁   我話冷氣又未熄   電視又未熄噃師兄 ~

菇場唔忙   同阿 Man 喺 Pantry 傾咗 15 分鐘呀   唔係阿齋入嚟擺嘢   都無留意時間添 ~

出到去又同船頭佢哋傾睇韓劇陸劇   傾到 10 點幾呀   所以坐埋一齊真係可以傾好多嘢   哈哈 ~

之後唔記得船頭講開咩   佢笑住話要講感恩   我話梗係要啦   好多嘢唔係理所當然家嘛 ~

Lunch Time 蒸完飯就去藥房買藥   之後去買菜   最後去埋 759 買腸就番菇場開餐喇 ~

Sajo 扒房燒烤豬肉腸 ($48.9/2 包) - 初初新出買嘅時候好似 $25/包   之後就加哂價   要依家做特價先 $25/包

船頭整咗炒粒粒比我同阿齋   我哋兩個都好鍾意食呀

船頭問我食蛋計劃進行未 ?!   我話仲有 4 隻蛋要清囉   所以計劃要延遲   哈哈 ~

阿齋同船頭都有一個3 尺雙層櫃裝私人嘢   阿齋就擺得好整齊   船頭就亂咁擺   洗碗棉都分開咗左中右咁擺   我話下次幫佢執好啲   之後阿齋話我有強迫症   我話唔鍾意啲嘢到歪歪斜斜   我鍾意整整齊齊囉 ~

阿齋話佢都會執嘢   但未到我咁樣係好鍾意執嘢嘅地步   哈哈 ~

忙下停下   好快就放工喇 ~

放工即走   里奧大人 6 點半番到屋企   不過未有咁快食得呢 ~

是日晚餐 - 黃豆醬燜雞柳年糕 + 蒸節瓜粒

黃豆醬燜雞柳年糕 - 上海年糕就嚟過期   所以加埋落去煮呀   估唔到又幾夾 ~

蒸節瓜粒 - 我同船頭講話就咁蒸節瓜粒   佢話加啲雞湯都好啦   我話無喎   再問係咪加豉油熟油 ?!   我話唔係喎   之後佢話咁點食呀   我話加蒜蓉都好味喎   呵呵 ~

洗埋碗抖陣就同里奧大人去做機   依家聽聽話話做 20 分鐘   唔駛一陣腳痛又做唔到   咁就得不償失㗎喇 ~

開埋機洗衫就沖涼   之後食橙同龍眼   天氣熱真係好想食生果 ~

睇多陣 Youtube   今晚 10 點 45 分先瞓覺 ~

蕃茄洋蔥雞柳 + 油麥菜苗 ( 21-JUL-2026 )

( 21-JUL-2026  TUE )

尋晚去完廁所   感恩都算快瞓得番呀 ~

早餐食巴馬臣雙重芝士吐司   口感都 Soft   但好少芝士粒囉   可能食開嘉多娜嘅芝士包呀 ~

咁嘅份量就啱啱好食兩餐

我加咗 4 粒芝士一齊焗   之後再拻開去   因為我唔想就咁食白麵包   哈哈

菇場唔忙   可以抖下 ~

Lunch Time 蒸完飯去一田買嘢   買完再行多陣就番菇場開餐 lu ~

赤之帽子曲奇 ($45/盒) - 買比麵包同舞王嘅   因為佢哋特登過幫里奧大人

日匠本物什豆 ($35) - 我番到菇場話買咗呢包零食   船頭話鍾意食呀   咁就好喇

桃哈多牛油醬油味波浪薯脆 ($13/2 包) - 1 包喺菇場食   另 1 包係比家姐嘅   我覺得佢會鍾意食呢個味道   哈哈

唔忙又做自己嘢啦   時間就會過得特別快㗎喇 ~

放工即走   番到屋企都即刻預備晚餐   估唔到里奧大人 6 點 15 分番到屋企   仲要食零食   咁就好喇   之前佢攰到無哂心機咁㗎 ~

西瓜去完中山   有好多龍眼比我哋呀

是日晚餐 - 蕃茄洋蔥雞柳 + 油麥菜苗

蕃茄洋蔥雞柳 - 之前買咗啲車厘茄   再唔食就壞㗎喇   所以就諗到整呢個餸呢   好似好耐無用啦蕃茄煮汁   食落嘅味道真係好食好多㗎 ~

油麥菜苗 - 終於清哂喇   其實 1 斤煮埋真係唔多   不過唔想食就係唔想食   哈哈 ~

洗埋碗就沖涼   今晚覺得冷氣好凍   所以就熨衫喇   搞掂就食麻糬做甜品 ~

里奧大人問點解有得食嘅 ?!   我話食唔切又唔想擺咁耐   所以咪要夜晚食囉

同里奧大人講開雞蛋   佢話就咁雞蛋叉燒炒麵都好食   又話我煮炒麵好食喎   之後問嗰啲麵叫咩麵 ?!   我話蛋炒麵   佢話係個麵叫咩名呀 ?!  我話個麵嘅名稱係蛋炒麵呀   佢以為係雞蛋炒麵叫蛋炒麵   因為尋晚我雞蛋炒飯叫蛋炒飯   哈哈 ~

里奧大人 10 點已經瞓覺   我就 10 點半先瞓覺 ~

燒汁燜牛肋條 + 老干媽風味雞油辣椒炒油麥菜苗 ( 20-JUL-2026 )

朱古力麻糬好味喎   好濃朱古力味   下次經過會再買嚟食

( 20-JUL-2026  MON )

感恩瞓得都唔錯   星期一真係要好夠精神番工呢   哈哈 ~

早餐食牛油多士+烚蛋   係尋朝食剩㗎   但我再加咗蒜蓉醬   咁就無咁乾喇 ~

菇場忙呀   個 Report 無啦啦無咗公司名   明明做法係一樣   最離奇係幾間公司 Run 出嚟嘅做法係唔同囉   搞到我要翻手做   呢啲先最嘥時間   搞到 10 點鬆啲先做完 ~

一輪緊張之後就胃痛呀   平時嘅 Report 點遲都無問題   但呢個 Report 係老細都有份睇   所以真係特別緊張㗎 ~

11 點半落好大雨仲行雷   我都諗住唔出㗎喇   點知 11 點 43 分又無雨   所以蒸完飯就同阿齋一齊出去喇 ~

幫船頭去 OP 睇完嘢   之後就去一田買雞蛋 lu ~

守山乳業香濃可可 ($28) / 包裝爵士蘋果 6 個 ($25) / CP泰國新鮮雞蛋 L 10隻 ($40/2 件)

我一坐低   船頭問我買咗咩 ?!   我話買咗雞蛋   佢話一係唔食等到到期   一係就想成日食   佢話佢日日食都只會買 1 Pack 先   我話 2 Pack 先特價呀   哈哈 ~

船頭比咗啲梅菜肉餅比我同阿齋   我哋覺得好好味呀

唔忙又做自己嘢   咁就好快放工㗎喇 ~

放工即走   今日里奧大人番咗公司   所以 6 點半先番到屋企 ~

是日晚餐 - 燒汁燜牛肋條 + 老干媽風味雞油辣椒炒油麥菜苗

燒汁燜牛肋條 - 里奧大人話好味道呀   咁就好喇   其實煮呢個餸真係超級簡單呢 ~

老干媽風味雞油辣椒炒油麥菜苗 - 唔想蘸豉油就用老干媽辣椒炒啦   又係一個簡單菜式   哈哈 ~

洗埋碗就開機洗衫   搞掂就沖涼喇   里奧大人就去做機   不過 Full 哂無得做   所以佢都即沖涼休息下喇 ~

熨埋衫就食生果   里奧大人問大樹菠蘿邊度買 ?!   我話另一邊   之後佢話即係邊度呀 ?!   我都忍唔住笑   我話其實我都唔知點講呀   因為我唔知條街係咩名   又無留意附近有啲咩店舖 ~

好甜好多汁   希望下次再買都係咁啦

睇多陣 Youtube   今晚 10 點 20 分都瞓覺喇 ~

蛋炒飯 + 油麥菜苗 ( 19-JUL-2026 )

 

( 19-JUL-2026  SUN )

尋晚半夜好暈呀   係瞓喺度都感覺好暈咁   好在唔駛去廁所咋 ~

感恩今朝起身無事   可以同里奧大人出去食早餐   我食完就番屋企喇 ~

食飽有氣力   所以都即刻開機洗衫同執食物櫃   搞掂就網上敬拜喇 ~

敬拜完就做大清潔   今日要大執位   之後覺得拎嘢真係方便好多呀 ~

沖埋涼抖陣   差唔多 12 點就出發去買麵包同雞扒   最後埋買菜同大樹菠蘿都即刻去麥當勞買午餐   因為個天想落雨咁   我一袋二袋唔唔想開遮   點知里奧大人 Whatsapp 話佢啱啱開完會   咁實在太好喇   因為初初驚佢開好耐會   啲嘢食會凍哂嘛 ~

朱古力麻糬 ($20/5 個) - 好似幾好味咁就買嚟試下

巴馬臣雙重芝士吐司 ($20) - 強調 "裡面粒粒芝士"   所以又買嚟試下喇

去到里奧大人公司就即刻放低哂嘢再放份午餐   點知隻手突然無力跌咗杯可樂呀   搞到里奧大人要拖地   我話唔好意思呀   佢話小事   跌瀉咪跌瀉囉   其實如果係里奧大人跌瀉   我應該會黑面㗎   所以其實自己真係好臭脾   哈哈 ~

至尊漢堡餐+麥香雞 ($62) - 我話新出至尊漢堡呀   佢話其實咪即係漢堡包   我話好耐無食真係完全唔記得呀

食完都番屋企做家務喇   阿妹話點解咁多家務要做 ?!   我話平時無咩點做囉   只係用除塵氏抹地同抹下櫃咁咋   之後阿妹叫我休息多啲   哈哈 ~

做多陣小清潔就可以休息喇   原來又已經 4 點半了   之後睇睇下 Youtube 都瞓咗 15 分鐘 ~

5 點半都預備晚餐   里奧大人 7 點 15 分番到屋企   可以即刻開餐喇 ~

尋晚食剩啲丸同魚腐 午餐肉   我剪開一粒粒嚟炒飯

是日晚餐 - 蛋炒飯 + 油麥菜苗

蛋炒飯 - 里奧大人鍾意食炒飯   但今晚要清蛋先煮咋   哈哈 ~

油麥菜苗 - 又淥咗幾棵   今次 1 斤要食 3 晚添 ~

洗埋碗就沖涼休息   里奧大人話要雪定我啲啤酒   我話今晚唔飲喎   佢話雪定之嘛   之後就幫我擺幾罐入雪櫃   我話其實雪定又未必要飲   都唔知點解頭先咁答你   哈哈 ~

我尋晚擺咗 2 罐   佢開雪櫃又擺多 2 罐   真係好搞笑   驚我無得飲咁 ~

洗埋碗就沖涼   之後同里奧大人一齊睇 "中年好聲音 4" ~

我買咗大樹菠蘿 ($38)   但係要自己拻嘅   呢度只係一半   所以都好抵食   如果有人拻埋   呢度都起碼要 $40 呀

睇完又睇 Youtube 啦   里奧大人 10 點半瞓覺   我就 10 點 45 分先瞓覺 ~

遇見小麵 @ 紅磡 ( 18-JUL-2026 )

豬骨丸子小鍋冒菜套餐 ($51) - 今次大家都係食豬骨丸子   但食剩 5 粒同埋啲魚腐再加一碗半飯   又要留番聽晚了

( 18-JUL-2026  SAT )

感恩瞓得都唔錯   瞓到 6 點半去廁所   好在都好快瞓得番咋 ~

今朝同里奧大人去食早餐   佢尋晚臨瞓前好興奮咁話要食豬扒麵   但今朝又食兩餸   佢話因為豬扒麵太飽都係唔想食呀 ~

食完就去里奧大人公司坐陣先番工   星期六唔會咁早番菇場呢 ~

菇場唔忙啦   家姐 Whatsapp 買咗包忌廉味粟米捧   話幾好味比啲我   我話妳好耐之前唔鍾意食比過我喎   佢話因為喺 HKTVmall 買咗 $990 唔夠錢送貨   所以買呢包嘢喎   我話真係好邪   尋日船頭又係講諗住喺 HKTVmall 買油   但懶懶閒擺喺購物車無理到   到想買就已經無咗特價   佢話即刻 Delete 成架購物車   哈哈 ~

放工即走   里奧大人仲開緊會   所以我有時間去買衫喇 ~

原價 $189 & $199   依家減到 $79 & $89   仲要買 3 件減 $20   真係超過抵呀   同埋質料唔錯㗎

買完就去買午餐去里奧大人公司   佢都係啱啱開完會咋 ~

百芳豬扒便當 & 台灣鹽酥雞便當 - 因為飲完杯奶茶真係好鬼飽   只係食哂啲餸   所以有個飯要留番聽晚食 lu

里奧大人仲未走得   咁我都番屋企先喇 ~

番到屋企即熨衫   之後燜牛肋條   搞掂就執下嘢   本身想做大清潔   但又唔人里奧大人幾時放工   費事做到一半又話走嘛   所以都係抖下先   留番聽日先做 ~

其實都已經 5 點   咁睇 "人肉叉燒包" 嘅故事   但睇咗一陣都係唔睇喇   因為一陣仲要食嘢 ~

依家最鍾意睇 Shorts   咩題材都有真係無咁悶㗎 ~

里奧大人 5 點 45 分放工   所以一齊去黃埔食嘢喇 ~

諗住食 Jollibee 炸雞   不過我最後都係想食濕濕哋嘅嘢 ~

食完就行奇趣天地   想買 Baby Yoda 盲盒   但有兩款唔鍾意都係唔買 lu ~

KYOWA 濕紙巾 ($15/2 包)   買咗 7 包   只係 $105   職員問我試過未 ?!   我話頭先試咗先再嚟買   佢話買咁多要試咗先好買   頭先里奧大人又係咁講   哈哈

依家真係要番到公司再抹臉同搽 Cream   成個人真係爽好多㗎   所以我都會比 2 包比船頭   里奧大人話當然好啦   一齊 Share 開心啲嘛 ~

我話要去 AEON 買炸餃子   咁順便同里奧大人睇下背囊   睇完就去超市喇   咁我睇緊意粉   但唔見里奧大人喺隔離   之後打嚟叫我拎購物車   原來佢又第一時間去睇啤酒位置   感動感動 ~

TV BP CHU-HI 有汽酒 蘋果白葡萄味 / 菠蘿芒果味 ($15/2 罐) 再 95 折 - 里奧大人話買夠 12 罐啦   最正係 2027 年 1 月先到期

行到一半先醒起無買到餃子呀   不過一定唔會翻轉頭買囉   呵呵 ~

里奧大人要番公司做少少嘢   咁我都番屋企先喇 ~

沖埋涼就休息   今晚出咗成身汗   真係要抖下   哈哈 ~

里奧大人 9 點先到屋企   第一時間問雪咗啤酒未 ?!   我話雪櫃無位呀   要聽日先雪呀 ~

睇多陣 Youtube   今晚 11 點先瞓覺 ~

燒汁炒豬柳 + 蒸節瓜粒 ( 17-JUL-2026 )

( 17-JUL-2026  FRI )

感恩瞓得都唔錯呀   但依家成日腰骨痛   又係時候睇中醫了 ~

今朝同里奧大人出去食早餐   食完就去佢公司坐陣先番工 ~

菇場忙呀   船頭有時買咗啲麵包   會叫我同阿齋試下   今朝佢買咗藍莓芝士鬆餅   我話我家姐又係好鍾意食鬆餅   同埋麵包曲奇呢啲   佢話其實同我家姐都幾似   之後再話我之前同佢講   佢啲語氣都同家姐一樣   我話驚第時叫錯妳做家姐   哈哈 ~

阿齋好想買我隻玻璃杯   我話嗰次得 3 隻咋   好在我買咗 2 隻   船頭串串共話度度都有得買啦   我即刻話唔係8蚊   佢呆咗無反應呀   仲話我突破盲腸   之後叫我食紙啦   哈哈   又話我之後買哂佢嘅食物籃   我話買咗 1 個之嘛   嗰時叫妳買多個又唔買   依家又後悔喎 ~

我同佢講話乳酪變番原價 $25 喇   佢話好在跟我買 4 杯   我話我未食住都買 4 杯   何況妳呢排食就梗係 4 杯啦 ~   

Lunch Time 蒸完飯就出去韓印紅同一田買嘢   依家咁熱   真係只想行商場 ~

韓印紅買嘅韓國洋蔥 1 Kg ($20) / 三色蕃茄 (換購價 $15)

福崗秋香園製袋本菇 ($12.90) /  韓國迷你馬鈴薯 ($19.90) / 日本製吸盤式置物架 ($8)

NATORI 芝士魚肉腸袋裝 (特價 $40) - 買咗先同家姐講話 Share   點知佢話好唔好食先 ?!   我話唔知喎   但日本出嘅應該好食嘅   哈哈

今日係慢慢睇嘢   所以買完又已經 12 點 25 分   要拿拿聲番菇場開餐喇 ~

忙下停下   差唔多 3 點幾就會口痕   所以船頭話開包蝦條   芥辣味真係出過帆立貝   唔怪得佢話喺屋企食哂成包啦 ~

粗身嘅蝦條

放工即走   依家唔駛咁趕都真係唔錯   同埋我依家又轉咗搭快車   所以有更多時間   仲更加唔駛趕   哈哈 ~

今晚煮河粉同撈丁   里奧大人一入屋見我將河粉同麵一齊落鍋   問咁煮得唔得㗎 ?!   我話麵檔都一樣係米粉同麵一齊煮啦   唔同時間撈上嚟咪得囉 ~

是日晚餐 - 燒汁炒豬柳 + 蒸節瓜粒

燒汁炒豬柳 - 又係炒豬柳喇   不過今次就係用燒汁   其實好感恩里奧大人對食無咩要求咋   哈哈 ~

蒸節瓜粒 - 仍然又係節瓜粒   我承認自己真係好懶㗎 ~

洗埋碗抖陣就同里奧大人去做機   我呢排都只會做 20 分鐘   估唔到里奧大人同我一齊走   不過佢其實都攰   但想郁下咁囉 ~

沖埋涼就食蕃薯糖水   但食完無耐就胃痛   之後仲胃酸倒流咁   我同里奧大人講話係咪唔熟呀 ?!   佢話腍哂都唔熟 ?!   我都忍唔住笑咗出嚟 ~

其實有一刻好想入醫院添呀   感恩過咗一個鐘頭就無事咋 ~

睇多陣電視   今晚 10 點半都瞓覺 lu ~

老干媽風味雞油辣椒炒豬柳 + 蒸節瓜粒 ( 16-JUL-2026 )

 

( 16-JUL-2026  THU )

感恩一覺瞓天光呀   瞓到鬧鐘響先醒   我按咗之後再瞓到里奧大人鬧鐘響   諗住可以繼續瞓   但其實又唔係咁   因為我點瞓都瞓唔到   哈哈 ~

今朝里奧大人去買早餐   買完就去佢公司一齊食喇 ~

菇場忙下停下   船頭話佢行行下唔小心將杯咖啡按到把遮個制   所以把遮突然間收咗   我話咪成頭濕哂囉 ?!   後面見到妳無啦啦咁樣都覺得奇怪   勁樣衰呀 ~

之後船頭話真係要用妳口頭禪 "笑死"   佢話我好鍾意講笑死㗎   我話我真係唔知喎   哈哈 ~

船頭又買咗卡樂B絕品北海道芥辣味蝦條

講開世界盃   又講下網球明星   佢話有啲網球明星係好無品   成日發脾氣㗎   我話咁啱嘅   我前排都係咁睇呢啲片   仲睇埋啲足球明星   所以就鍾意咗 Haaland 喇   因為佢對管理員好好呀 ~

Lunch Time 蒸完飯就同船頭一齊行一田   我話拎唔拎車 ?!   佢笑住話拎啦拎啦   咁反正真係有嘢買嘛   乳酪又凍冰冰   拎完隻手凍哂好唔舒服㗎 ~

壹品粒粒涼粉 X 2 ($9.90/盒) - 見到有就買比里奧大人食喇   因為惠康都唔係成日有得買呀

KOLIOS 藍莓希臘乳酪 0%脂肪 ($42/2件) / KOLIOS 香桃 0%脂肪 /石榴紅莓希臘乳酪 ($42/2件) - 船頭話好食   咁我即買 4 盒   佢就買 2盒   我話買多 2 盒啦   佢話成日都有嘛   我話但係唔係成日特價囉   之後佢就買 4 盒喇

日本製TRIM收納籃 ($8) - 我同船頭講話買個番公司裝零食   佢都話呢個 Size 啱啱好

我講開做家務   話做家務流汗多過做運動   佢話佢都係呀   做家務真係體力勞動 ~

去大生買完花雕酒再行 DAISO   行完都已經 12 點半   係時候番菇場開餐呢 ~

家姐之前比嘅烏冬   真係及時雨喇   哈哈

阿齋買咗包薯片   我話頭先都想買薯片   但船頭話食哂先   我話頭先買咗籃嚟裝零食呀   之後話呢個部門係零食關愛隊   哈哈

菇場忙呀   所以好快放工喇 ~

放工即走   番到屋企都即刻預備晚餐   之後再煮埋蕃薯糖水 ~

里奧大人都係 7 點左右先番到屋企   可以即刻食得喇 ~

是日晚餐 - 老干媽風味雞油辣椒炒豬柳 + 蒸節瓜粒

老干媽風味雞油辣椒炒豬柳 - 估唔到好味喎   咁下次會再咁樣煮  順便清埋樽醬料都好 ~

蒸節瓜粒 - 好耐無食   所以買咗 4 個   因為諗住食兩餐唔駛諗   哈哈 ~

洗埋碗抖陣就同里奧大人去做機   都係 20 分鐘就夠喇 ~

開埋機洗衫就沖涼   搞掂就食蕃薯糖水 ~

今晚試另一個牌子嘅板粟蕃薯   口感比賽實在   哈哈

里奧大人話我好鍾意聽 Haaland 首歌   我話因為一睇佢嘅 Shorts 就係呢首歌咋   哈哈 ~

呢排都係 10 點半就眼瞓   唔錯唔錯 ~