短宣 + 吐司工房 @ 九龍灣 ( 14-JUL-2019 )

泰式雞椰漿飯套餐 + 檸檬薏米 ($66) - OK 啦   但江魚仔唔脆嘅

呢件雞扒係脆   但無咩味道囉

巴東牛肉黃薑飯套餐 + 凍檸檬薏米水 ($68) - 里奧大人話啲牛肉好乾呀

( 14-JUL-2019  SUN )

今朝 6 點 45 分起身   沖埋涼再執埋啲嘢就出發食早餐喇 ~

咁我一定會帶大嘅黑咖啡上去嘅   我拎咗 2 支出來   弟兄 ML 以為我要飲 2 支   哈哈   我多數飲最多 2 細杯仔㗎咋   因為有其他弟兄姊妹都會飲   咁就 Share 最好   我最多拎 3 支㗎咋   因為都好重下   哈哈 ~

今日 9 點開始聚會   我仍然負責兒崇   之後我同里奧大人 & 姊妹 M 就有家訪   逗留 45 分鐘左右就番番聚會嘅地方   食埋 Lunch   差唔多 12 點 50 分就出發番香港喇 ~

今次會停 2 個加油站   咁去完一個加油站之後   弟兄 WW 叫我哋盡食盡飲   哈哈哈哈   但行咗好似 20 分鐘左右   師傅話仲有 10 分鐘就到加油站   之後就無㗎喇   咁問停唔停 ?!   我哋話唔停啦   之前去完廁所無耐 ~

不過我習慣坐長途車唔飲咁多嘢   始終好怕塞車呢 ~

去到落馬洲即刻個個去廁所   弟兄 ML 話飲咗成支涼茶呀   哈哈   姊妹們就話問嘅時候唔駛去   但問完無耐就覺得想去   哈哈   我都係咁㗎   唔好提就唔想去廁所咁囉 ~

7 點左右到九龍灣   咁食埋嘢先番屋企 lu ~

番到屋企第一時間開機洗衫   沖埋個涼都休息喇 ~

睇多陣電視   11 點幾先瞓 ~

短宣 ( 13-JUL-2019 )

( 13-JUL-2019  SAT )

尋晚瞓唔到呀   勁緊張囉   所以今朝 5 點 50 分要起身   真係有啲攰喇 ~

6 點 20 分出門口   去到火車站要等多 1 班車先去落馬洲   所以又搭羅湖班車喇   坐頭真係舒服好多   因為我真係想瞓覺 ~

去到落馬洲   里奧大人就食早餐   我就未餓   所以唔食住喇 ~

今日都幾好天氣  



8 點 40 分齊人   同姊妹 YY 一路行一路傾   熱到我哋呢   塊臉完全係汗水   哈哈 ~

9 點 10 分出車   祈禱之後再講哂所有程序   大家可以安心瞓覺了 ~

瞓呀瞓   今次加油站居然無熱食   不過對我嚟講無所謂   因為我本身有帶早餐   只係如果有得食   都會買啲嚟一齊 Share 食啫   哈哈 ~

差唔多 11 點上車   到我食早餐喇   食完又好快瞓得着   哈哈   今次比較攰 ~

居然見到 Berry 嘅疏堂表妹   好得意呀

1 點幾到飯店   但飯店壞咗冷氣   好在頭先架車嘅冷氣好夠   我都可以頂住頂住   唔會話太熱 ~

食完就去崇拜嘅地方   我同里奧大人係唔同嘅服侍崗位   所以有時都唔知佢去咗邊㗎 ~

散會都 5 點幾   練埋歌就番酒店休息   6 點半就出飯去飯店食飯喇 ~

食完抖陣就去聚會地方   今晚我同里奧大人負責帶遊戲   我負責諗遊戲同預備工具   里奧大人就負責講解遊戲玩法   互相補足   哈哈 ~
   
我黐咗啲紙條   姊妹 M 話我整得好靚   仲黐得好實淨呀   哈哈   咁我都覺靚㗎   因為我一係唔做   一做就做到最好嘛   唔鍾意求求其其 ~

其實要我負責遊戲嘅話   我最主要係想分享聖經金句喺遊戲當中呢   感恩呢兩個遊戲比到呢個訊息出來   真的感謝神   遊戲順利完成   其實當初話要負責   我係驚嘅   始終無試過嘛 ~

不過今晚玩遊戲只係用咗好少時間   等我再諗定多啲遊戲先 ~

聚會完整都接近 10 點   係時候番酒店休息喇 ~

番到酒店即沖涼   11 點左右都瞓覺   今日出咗勁多汗   個人真係好攰呀 ~

短宣 + 永發廚房 @ 九龍灣 ( 26-MAY-2019 )

五香牛雜湯米 ($34) - 無味嘅

香濃芝味鮮蝦扒伊麵 ($48) - 里奧大人話無味   咁我唔食啦   之後我突然又想試下係咪無味 ?!   點知食第 1 啖已經覺得啲汁係酸   但因為我食湯米加咗醋   之後飲啖水   再食真係有酸味囉   即同個類似經理嘅人講話呢碟汁酸嘅   佢話取消張單

之後見佢無同廚房講嘢喎   因為佢拎完碟嘢就行番出來   我同里奧大人講話以後唔好再嚟呢間食店食嘢   再問里奧大人點解會食唔出係酸味 ?!   我話佢一定係由細到大都係食呢種酸叔味道嘅食物   同埋係未煮熟嘅食物   無理由咁大個人都唔識分   因為嗰時喺佢屋企食炸豬扒   幾乎每次都唔熟   救命

( 26-MAY-2019  SUN )

今朝 6 點幾比雨聲嘈醒咗   之後都瞓得唔係咁好   因為 7 點 15 分要起身   我會倒數時間   呢樣最唔好囉 ~

8 點出發去食早餐   之後收到消息去唔到聚會地方   所以臨時改為去另一個聚會地方崇拜 ~

9 點即出車   感恩準時到聚會地方   咁我哋真係純粹去崇拜   但佢哋邀請我哋牧師証道   再邀請我哋一齊唱詩歌讚美主   好在佢哋練習我有聽到咋   唔係真係唔識唱呢 ~

因為佢哋同我哋愛宴   佢哋要預備   咁我哋全部人就即刻去另一個姊妹屋企做探訪 ~

番到聚會地方   大家又一齊傾偈   我覺得短宣呢段時間   當中大家都有分享   更加認識對方   最搞笑係姊妹 W   佢問我啲嘢   我答完之後佢就話: 係喎  上次妳講咗   哈哈   但無計啦   次次喺教會傾親都匆匆忙忙   今次就可以多啲時間傾偈喇   步伐都唔駛咁快添呀   哈哈 ~

所以我依家真係好鍾意去短宣   可以事奉神同服侍人   又可以同弟兄姊妹相交   實在有太多嘅恩典呢 ~

食完飯接近 1 點   我哋要番香港喇 ~

感恩分享之後就休息   今日好焗熱   大家都出咗一身汗   所以好攰 ~

我今次真係感受到神嘅恩典   因為我星期六朝早臨時臨急帶多件短 Tee 放喺自己個袋   咁今日就可以着短袖 Tee 咋 ~

平時我一定唔會兩手準備   因為我同里奧大人只拎個大袋   如果樣樣兩手準備   個袋一定超級重呢   所以真係好感恩 ~

牧師同弟兄 ML 又係好似我咁   因為上次短宣落雨   突然間超級凍   咁我哋知道呢幾日會落雨    所以個個長袖 Tee   咁牧師都好啲   有帶埋短 Tee   弟兄 ML 就要全程長袖 Tee 喇 ~

4 點左右有個 Break   個個都買嘢食   好似買手信番香港咁   哈哈 ~

感恩車程順利   5 點 20 分到落馬洲喇 ~

同牧師 + 弟兄 ML 兩公婆 + 弟兄 A & K + 姊妹 A 一齊搭火車   我哋諗住比牧師坐啦   點知有個女仔攝埋嚟坐   仲要啤咗牧師一下   真係黐鬼線 ~

之後去九龍塘轉車   講番頭先攝位單嘢   姊妹 A 都話唔知發生咩事   無啦啦攝埋嚟 ~

我哋喺九龍灣落車   去 A1 買麵包同埋去 Circle-K 拎嘢   之後就去食晚餐喇 ~

食完都即番屋企沖涼喇   開埋機洗衫就休息 lu ~

10 點唔夠已經想瞓   不過大食打嚟又同佢咗陣   傾咗 15 分鐘真係頂唔順   我話勁攰要瞓覺   里奧大人都話我好早瞓   哈哈 ~

短宣 ( 25-MAY-2019 )

( 25-MAY-2019  SAT )

今朝里奧大人 5 點 50 分起身   到佢搞掂哂   我都起身沖涼喇 ~

感恩唔太攰   但喉嚨有啲痛囉   嗚嗚 ~

6 點 25 分出門口   去到火車站要等多 2 班車先去落馬洲   所以里奧大人話搭羅湖班車   咁坐頭等就無咁多人   舒服好多呢   始終拎多 1 個袋   唔想企囉 ~

去到落馬洲   8 點半齊人   9 點 15 分開車   感恩感恩 ~

似乎想落雨

黑咖啡唔少得   我次次都會買多 2 支   因為有 3 個弟兄姊妹鍾意飲   我哋可以 Share   反正我次次飲 1 杯仔就夠

我見里奧大人食個朱古力蛋糕食到 "呢咁 Hea"   咁我諗住 10 點幾喺車上面食家嘛   但我驚整到架車好污糟   所以去美心買個珍寶叉燒包   我見腸仔包都要九蚊雞   呢個十蚊雞㗎   好似抵食啲咁   但唔好食嘅

上到車就齊齊用詩歌讚美主   再為事工上祈禱   之後就休息 ~

話咁快就 12 點   望到個天就嚟落勁大雨了

向後望   個天仲更加黑   哈哈

12 點幾有個 Break   好在停雨咋   因為真係要鬆一鬆腰骨   咁食下小食又傾下偈   所以短宣真係好開心呢 ~

1 點 15 分到飯店   今餐餸菜超好味   可能有啲酸菜   個人特別開胃   哈哈 ~

2 點半左右到聚會地方   大家各自 Set-up   依家我喺兒童牧區幫手   牧師會做栽培   我又可以學習   實在太好了 ~

5 點 15 分左右再一齊練歌   練完就番酒店休息 ~

6 點半去飯店   一路食一路傾   弟兄 ML 話同我咃喺大陸食飯多過喺香港   話時話又真係喎   香港真係比較難夾時間   始終個個放工時間唔同   咁短宣時間就係固定   一定可以一齊食早午晚餐呀   哈哈 ~

7 點半到聚會地方 Set-up   感恩今晚好多弟兄姊姊到咗   一齊詩歌讚美主   一齊玩遊戲   一齊聽証道   真係好開心好開心   期望越嚟越多人參與啦 ~

9 點 50 分左右完畢   番到酒店沖埋涼   就一齊去牧師間房食燒嘢 ~

10 點 40 分人齊開餐   今晚只得弟兄 ML 兩公婆同埋弟兄 A + K   又係一路傾一路食   笑到肚痛 ~

講起麥當勞   佢哋好怕漢堡包入面塊酸青瓜   家姐同里奧大人又係好怕   但我非常之鍾意食喎   我會覺得食塊漢堡無咁油膩囉   雖然我唔係食得好酸   但又勁鍾意食酸瓜㗎喎 ~

次次都係臨散會先食哂啲嘢   所以個個都會話好飽   哈哈 ~

原來都 12 點   怪不得開始攰啦   所以番到房都即刻可以瞓覺喇 ~

短宜 + 豆漿大王 @ 九龍灣 ( 24-MAR-2019 )

五香牛肉麵 - 好想食豆板醬   所以就食湯麵

上海排骨酸辣麵 - 里奧大人都唔飲酸辣湯   其實下次同佢 Share 仲好   我可以飲哂啲湯

招牌正宗上海粢飯 - 份量越來越少



酥炸雲吞 - 好想食   但食完 1 隻已經好飽   好後悔叫嚟食呀   哈哈

( 24-MAR-2019  SUN )

今朝 7 點 15 分起身 lu   瞓得都 OK   只係間唔中有啲熱咁   因為張被實在太暖喇   哈哈 ~

Check-out 完就即出發去食早餐   上次有弟兄姊妹都有飲 Black Coffee   所以今次買多 2 支一齊 Share   佢哋見到支 Black Coffee 仲要寫個極字   以為我好飲得黑咖啡   我話我喺外地   係唔飲有奶類嘅咖啡   怕肚屙囉 ~

早餐遲咗   所以去到聚會地方比較趕   樣樣要快快手 Set-up ~

今日係去兒童牧區幫手   感恩係小朋友都好乖   但玩遊戲贏獎品就有啲失控喇   哈哈 ~

完畢之後又同其他弟兄姊妹傾偈   認識多咗   真係最開心呢 ~

11 點 45 分左右食飯喇   差唔多 1 點就走喇 ~

感恩車程好暢順   3 點左右有個 Break   差唔多 5 點 15 分就到落馬洲   感恩神保守帶領   我哋呢兩日行程非常之順利呢 ~

其實今次都不太在狀態   因為呢排個肚無啦啦有啲赤赤痛   痺住痺住咁呢   咁呢兩日個量又無啦啦多咗   真係估唔到咁樣   所以個人真係好攰   但感恩事奉嘅時候係精神呢 ~

搭車去九龍灣食嘢   食完都番屋企喇 ~

洗埋一機衫就沖涼   之後休息 ~

家姐今日同 Berry 去西貢   佢朋友都帶咗隻黑柴出來   家姐話 Berry 無同佢玩   成日呢埋喎

有無暈車浪呀 ?!

佢今日出咗街玩   今晚應該好好瞓

又心野

好似 BB 樣咁

佢隻衰眼   哈哈   咁樣瞓唔辛苦咩 ?!

家姐話佢隻耳仔好大隻

如果佢咁樣瞓   我實即刻抱佢落我身呢   哈哈

終於番入房即瞓喇   家姐話有時夜番   都會開門拎佢出嚟抱下   但工人話唔知家姐入咗嚟先搞笑   哈哈

里奧大人就熨衫   我真係好攰   個肚仲有啲赤赤哋痛   唔想郁呀 ~

今晚勁喇   10 點 15 分都要瞓覺喇   哈哈 ~

短宣 ( 23-MAR-2019 )

( 23-MAR-2019  SAT )

今朝 5 點 50 分起身   搞掂哂就出門口喇 ~

天氣凍咗好多呀   本來想着件薄身長褸   但里奧大人堅持要我着件有帽嘅厚褸   仲要好似氹細路仔咁   係咁話件褸幾咁好幾咁好   哈哈 ~

去到落馬洲只係 7 點 20 分左右   里奧大人就食蛋糕   我就唔食住 lu ~

8 點半已經齊人喺落馬洲過關   所以 9 點已經可以出車喇   感謝神 ~

今次總共有 17 位弟兄姊妹一齊出隊   真係好感恩有機會去另一個地方做服侍 ~

車程非常之暢順   12 點一個 Break   一落車個個都覺得好凍呀   我仲話尋晚仲開緊冷氣添呀 ~

所以個個都買啲熱嘢食   今次我都要買餃子食喇   食完個身會暖啲 ~

鬆一鬆又再上車   1 點唔夠就到聚會地方   實在感恩 ~

我見弟兄 CP 着短袖 Tee   叫佢快啲着番件褸啦   因為真係比香港凍幾度咁   但原來佢以為自己帶咗件厚褸喺背囊   點知原來係無嘅   所以弟兄 MK 就比佢件長袖厚 Tee 佢着啦   佢又係每日要換衫   但咁情況之下   都一定要比 CP 着先啦 ~

我哋個個都估唔到凍得咁緊要   所以我都好感恩里奧大人叫我着番件厚褸呢   哈哈 ~

食完飯就去聚會嘅地方   今次去兒童牧區幫手   呢個真係神嘅安排   因為我成日話去短宣無咩幫到手   咁弟兄 MK 就叫我試下幫佢手   睇住小朋友就可以   我即話好呀   之後 2 月幾佢打比我   再問我係咪幫佢手   哈哈   我話梗係啦   話咗幫就幫嘛   同埋呢個係事奉   唔係隨便應承呢 ~

兒童牧區本來係 MK 兩公婆負責   但佢老婆今次唔出隊   所以我做呢個崗位就啱啱好   神嘅安排實在太奇妙喇 ~

團契完畢就番酒店休息   之後再番教會食飯   因為傳道人老婆想煮飯比我哋食   佢真係好勁   仲要係 2x人食   每枱 6 餸 1 湯   個個食到好飽   哈哈 ~

食完飯就團契   再玩遊戲同分組祈禱   我為弟兄祈禱   居然緊張到唔記得弟兄姓咩呀 ~

聚會完畢   姊妹又煎年糕同蒸蛋糕比我哋食   食完都已經 10 點幾   所以今晚我都唔同佢哋食宵夜喇   實在太飽   哈哈 ~

番到酒店即沖涼   同里奧大人傾陣偈   11 點 15 分都一齊瞓喇 ~

短宣 + 豆漿大王 @ 九龍灣 ( 13-JAN-2019 )

餈飯 ($15)

上海排骨麵 ($34)

酸辣餃子麵 ($38)

酥炸雲吞 ($20) - 好想食炸嘢   但食咗 1 隻已經好後悔 order   因為食麵已經好飽

( 13-JAN-2019  SUN )

今朝 7 點 15 分起身   感恩一覺瞓天光 ~

8 點出發去食早餐   9 點左右就去到聚會嘅地方 ~

里奧大人今日有新嘅事奉崗位   感恩神喺當中嘅保守帶領   我仍睇到里奧大人不斷嘅練習   期望下次我同里奧大人都有事奉崗位   可以專一專心去事奉神呢 ~

散會之後   牧師同里奧大人 & 弟兄 ML 去家訪   其餘就留低同其他弟兄姊妹交談同分享 ~

我哋今日喺聚會嘅地方同弟兄姊妹一齊食飯   未夠 12 點就開餐喇   牧師佢哋就 12 點幾番到嚟   總共有 6 圍枱呀 ~

差唔多 1 點就起行番香港喇   一大班弟兄姊妹一齊唱歌送我哋走   拚命揮手同我哋拜拜   佢哋嘅熱情令我哋好感動好感動 ~

今次團隊唔多人   但感恩神嘅保守帶領   每個過程都非常順利   超乎我哋各人所想的   求神繼續大大使用我同里奧大人呢 ~

2 點半有個 Break   牧師話佢剛剛進入睡眠狀態又要起身   哈哈哈哈   我都係咁呀 ~

里奧大人話我一見到買嘢嘅地方就會即刻醒哂   咁弟兄 A 買咗酸辣粉   我又買   之後牧師同弟兄 ML 又買   咁我就再買咗薯片同 8 筒喉糖   佢哋覺得我好誇張   我話係預咗一陣上車大家食一齊呢 ~

圍埋一齊食嘢嘅時候   里奧大人話做咩買咁多   我話想試紫色果個老坑酸菜   佢之後話係老壇呀   笑到佢哋顛咗   弟兄 A 話唔緊要   只係呢度講好喇   哈哈

之前喺惠州買咗 4 筒   只係 RMB2/筒   但加油站就一定貴啲㗎喇   1 筒要 RMB3   不過我都想買囉   呢期口味轉哂   想食酸甜嘅糖   唔想食薄荷   所以依家將薄荷糖比哂里奧大人食

5 點半到落馬洲   之後齊齊搭火車同地鐵   我同弟兄 ML 兩公婆就喺九龍灣落車 ~

去到九龍灣已經 7 點   里奧大人話想去銀咖哩   但我話食咗 3 餐飯   想食濕嘢呀   所以去食上海麵 ~

食完即番屋企喇   第一時間開機洗衫   沖埋涼就休息 ~

今晚里奧大人 10 點都瞓覺   我就 10 點半都瞓覺喇 ~

短宣 ( 12-JAN-2019 )

( 12-JAN-2019  SAT )

今朝 5 點 50 分要起身喇   里奧大人起身刷牙沖涼   我就可以懶下床   哈哈 ~

關好哂所有水制煤氣制   6 點 20 分可以出門口了 ~

好感恩我哋一上月台   就見到係去落馬州嘅火車   咁樣可以慳番 10 分鐘時間呢 ~

去到落馬洲都只係 7 點半左右   可以坐低食個蛋糕   我無食呀   反而里奧大人食到呢 ~

因為有 2 個弟兄姊妹遲咗   所以差唔多 8 點半先出發   佢哋見我戴口罩   都話好感恩見我帶病都上陣   我話其實只係幾聲咳   無咩大礙 ~

弟兄 ML 先搞笑   佢話以為我哋尋晚喺落馬洲住一晚呀   但佢記得尋晚我哋小組完咗一齊走   哈哈   不過佢已經唔係第一次咁問   我哋去落馬洲等   個個真係以為我哋喺落馬洲一晚   第朝喺落馬洲等呢 ~

咁弟兄 P 換咗新卡   放咗喺另一個新袋   去到落馬洲先發現無帶新卡   所以今次團隊得 10 人 ~

感恩車程順利   12 點有個 Break   又食少少嘢啦   因為天氣比較凍   我都要食番啲熱嘢暖暖身 ~

食完就上車   差唔多 1 點去到飯店   不過頭先食咗半條糯米粟   其實都飽飽哋   哈哈 ~

接近 2 點去到聚會嘅地方   之後即開始預備 + 活動 + 練習   差唔多 6 點就完畢 ~

番酒店休息一陣   6 點半再出去飯店食飯 ~

7 點半再到聚會嘅地方   有分享 + 遊戲   我玩 Bingo 居然中哂   團隊遊戲我哋又贏   但其實我犯規   哈哈   所以應該係平手呀 ~

9 點半散會   10 點飯到酒店   咁弟兄 A 同姊妹 L 兩公婆話想食宵夜   但其他弟兄姊妹想練習多啲   所以最後得我同里奧大人 + 弟兄 A + 姊妹 L 兩公婆食宵夜   其實都旨不在食   只係想大家一齊傾下偈 ~

宵夜要等嘛   所以我同里奧大人都番房沖涼先   等埋牧師番嚟   10 點半可以開餐喇 ~

本身剩咗盒金菇同茄子   但個個都唔想浪費   最終執執下嘢都食埋   哈哈

其實我都鍾意咁樣傾偈   大家都好放開一切咁傾   傾呀傾   傾到 11 點 50 分呀   所以大家都要休息喇   始終今朝個個都早起身   同埋聽日又要早起身呢 ~

番到房   刷埋牙都即刻瞓 lu ~

短宣 + 赣芸轩 @ 深圳 ( 11-NOV-2018 )

京醬肉絲 (RMB58) - 個醬鹹嘅   肉絲又鹹   真係麻麻哋





藜蕎炒腊肉 (RMB46) - 藜蕎好味喎   就係因為有腊肉   所以叫多個炒飯



野菜炒飯 (RMB38) - 我 "北"  嘅時候係漿住咁   好似糯米飯質地

粒粒飯都充滿油喎   食剩一大半   所以打包番香港   但其實覺得真係好油   但食剩咁多又好似好嘥咁   



( 11-NOV-2018  SUN )

感恩一覺瞓天光呀   7 點 05 分起身無難度   同埋次次都係里奧大人起身梳洗先   佢想我瞓多陣 ~

沖完涼搞掂哂啲嘢   咁我哋早咗 15 分鐘去食早餐   諗住早啲到   食完番酒店   但最後都係等齊人才食   哈哈 ~

估唔到早餐好味道呀   食到飽飽夠哂精神 ~

一路食一路傾   原來有位弟兄係里奧大人舊公司個客   世界係咪咁細呀 ?!   哈哈 ~   

9 點去到聚會嘅地方預備   感恩一切順利   我哋差唔多 11 點 40 分就走喇   之後去飯店食飯   食完就番香港了 ~

午餐又係好好味呀   一路食一路傾   好快又 12 點幾   係時候坐車番香港喇 ~

大家喺車度一齊分享   勁開心   因為弟兄姊妹講嘢好好笑   幾乎笑唔停咁滯   哈哈 ~            

之後有個 Break   姊妹話榴槤雪條好味   所以我叫里奧大人幫我買   之後弟兄問我食唔食榴槤 ?!   姊妹即話: 頭先佢幫我開支雪條   佢一開就話好香呀 ?!   點會唔食呀 ?!   笑死我   我都完全唔記得我係咁答添 ~

姊妹仲搞笑   話青瓜味薯片好味   好多人買   我話係呀   妳都知呀 ?!   之後佢話因為我等咗妳開包薯片好耐   尋日等到依家   因為尋日姊妹話食   所以我就買嘛   哈哈哈哈   笑死我   我話里奧大人唔比我開呀   話驚食到成車都係喎   唔關我事㗎   咁我一陣再開吖 ~

之後上到車   我叫里奧大人即開包青瓜味薯片 Share 食   再開包朱古力同陳皮   估唔到佢哋好鍾意食   哈哈 ~

我之前係買比家姐食㗎   佢話粒粒唔同款   咁我又買包來試下   真係食唔停囉   我兩日食哂呀   咁我覺得好味道    所以買比弟兄姊妹分享

牧師話我哋咁多弟兄姊妹雖然同一教會   但來自唔同牧區   唔同事奉崗位   根本好難會相聚一起   但藉着今次短宣機會   令到我哋聚埋一齊   同心合意去服侍   我聽完之後   覺得好感動 ~

咁我今次又同里奧大人一齊去事奉   所以覺得更開心   因為大家可以一齊學習   同埋過程當中可以互相提點   互補不足呢 ~

去到落馬洲就散隊喇   都差唔多 6 點了 ~

里奧大人知我上次想食片皮鴨   所以同我去萬象天地   但去到食店話要等 25 分鐘   我哋唔等喇   始終要搭車番香港   唔想浪費時間 ~

咁里奧大人係咁講唔好意思啦   話帶我嚟到又無得食   我又無失望喎   因為我預咗要等位   但里奧大人堅持要去   因為佢真係真係好想我食到呢   所以我覺得感動多過失望   食唔到咪下次食囉   我食其他都無問題   有得食就得啦   哈哈 ~

想去嘅食店都要等位   咁去到呢間無人等位   咁試下囉   最緊要格局乾淨 ~

但呢間真係麻麻哋好味   哈哈   所以里奧大人更覺唔好意思   我話坐低食下嘢傾下偈   都好舒服喎 ~

又叫里奧大人幫我影張相留念   如果唔係   我唔會記得喺萬象天地食嘢   哈哈

咁里奧大人睇手機 Apps   顯示萬象天地去深圳灣口岸同皇崗口岸差唔多距離   所以里奧大人話去皇崗口岸   因為直通巴士密啲   咁問的士司機又話兩個口岸都差唔多   但去到咁上下   里奧大人已經見到深圳灣口岸呀   但我哋已經轉咗右邊了   咁我哋繼續去皇崗口岸啦   坐咗成 RMB60 的士呀   真係第一次喺大陸坐咁貴的士   衰的士司機呃人啦   點會話兩個口岸差唔多喎 ~

里奧大人話呢次教訓   下次一定記得深圳灣口岸落車   笑死我 ~

咁等直通巴上車嘅時候   有人叫里奧大人   原來係佢大學同學   真係乜咁啱呀 ~

開咗車大約 10 分鐘   我先記得開番電話   里奧大人話頭先妳上車都可以開啦   我話驚係漫遊喎   之後里奧大人話過咗香港海關就等於妳已經喺香港啦   妳唔係唔知嘛   已經嚟過幾次喇喎 ?!   我話真係唔知喎   唔係點解成日話到大埔先開電話喎   哈哈   堅覺得自己豬兜呀 ~

呢兩日我完全無咩用過手機   連影相都無乜影   因為想專心去事奉 ~

同埋無得上網嘅日子   其實真係好舒服   起碼對眼可以休息 ~

咁我番到香港即 Whatsapp 家姐啦   之後原來我唔記得同佢講我喺大陸過夜呀   咁啱大食搵我唔到就搵家姐   問我去咗邊 ?!   因為想約我同婆婆飲茶   之後家姐話佢都唔知我去咗邊呀   因為完全無覆佢   哈哈   實在太大意喇 ~

番到屋企都 10 點半   即沖涼啦   里奧大人勁驚我開機洗衫   其實我想㗎   不過佢話唔好   早啲休息好過 ~

我 11 點 15 分對眼 Dup 哂落嚟呀   所以即瞓覺   真係好在無洗衫咋   哈哈 ~

短宣 ( 10-NOV-2018 )

( 10-NOV-2018  SAT )

尋晚瞓到半夜就醒一醒   之後又諗番起尋晚打邊爐嘅搞笑嘢又笑   笑完又即刻瞓番   所以里奧大人話我真係好開心   同埋真係好唔捨得走  哈哈 ~

今朝 5 點 40 分起身喇   里奧大人沖涼洗頭先   之後到我喇   佢多數比我瞓晏啲呢 ~

搞掂哂都 6 點 20 分   即出發喇 ~

我同里奧大人就喺落馬洲等   因為里奧大人話落馬洲嘅洗手間乾淨啲 ~

感恩一到車站就有去落馬洲嘅火車   仲要有位坐   里奧大人話平時無位坐㗎   哈哈 ~

7 點半到咗落馬洲   咁我買咗麵包同蛋糕   有張長櫈   可以坐喺度食   唔錯唔錯   見好多人都係咁   原來里奧大人 如果平時早咗到車站   佢都會咁做呢   今次可以體驗下佢番工嘅實況   係辛苦的   加油 ~

我次次叫里奧大人幫我影張相做紀念   佢一定即刻幫我影   之後又會叫我咁影咁影   所以會係由影 1 張變到 10 張呢   哈哈

尋晚勁飽   所以真係未餓   但食咗半個麵包頂住肚先   咁一陣上車可以瞓覺   哈哈 ~

我特登買多啲㗎   所以里奧大人一見到都嚇一嚇   蛋糕可以留   其他就最遲一定要聽日食哂

我哋早咗 10 分鐘到落馬洲集合   但等咗 20 分鐘仍未見團隊   原來其中一個組員肚屙   所以要等   呢下堅擔心   始終車程要 5 個鐘嘛 ~



勁開心見到耶穌光呀   不過手機影得唔太清楚



感恩隊員最後無事   但我哋比預期遲咗 1 個鐘   所以之後行程變得好緊湊呢 ~

好多人都問我哋點解落馬洲等   以為我哋前晚喺深圳玩一晚   所以今早喺落馬洲等呀   之後佢哋知道里奧大人尋日都上咗大陸   仲話做咩唔喺大陸住一晚   咁今朝就唔駛再嚟   哈哈 ~

呢罐咖啡唔幾好味喎   最緊要無奶   因為我坐長途車就一定唔會飲有奶嘅飲品呢    



高速公路勁塞車   原來有人抄車呀   過咗佢哋之後就路路暢通了 ~

12 點幾有個 Break   食下嘢又傾下偈   之後又上車繼續行程 ~

里奧大人一定買尖叫比我飲   比超市貴一陪呀   薯片就買來一陣同隊員 Share 食



我買咗 1 支粟米   不過好乾呀   但見隊員果支粟米粒粒脹卜卜好 Juicy 咁   只怪我自己揀得唔好啦   哈哈      



我哋又可以瞓喇   哈哈



雖然車程好耐   所以用嚟補眠就最啱   瞓醒真係精神好多呀   感恩感恩 ~

3 點到聚會地方附近食嘢   真係要快   但其實又唔係食得好快 ~

今日加加埋埋   其實比預期遲咗 2 個鐘   所以時間變得好緊湊   感恩一齊順利   當日真係感受到神嘅保守帶領 ~

聚會完畢之後就去酒店 Check-in   大家抖半個鐘   6 點半就食啲嘢   因為 7 點半要去另一個聚會地方 ~

9 點散會   番到酒店就 Join 埋其他隊員一齊宵夜   其實有位弟兄知我同里奧大人係第一次參加呢個活動   所以想一齊食宵夜   傾下偈呢 ~

一路食一路傾   真係勁開心   但食到咁上下   有位智障嘅男仔成日企喺我哋後面   之後行為開始有異樣   最恐怖係拎起啲竹係咁打   咁有位隊員就即刻開始全程昅實佢   同埋有時會企喺身   因為驚佢拎起啲磚掟我哋   所以快快食完就走喇 ~

之後牧師話佢應該想食嘢   咁我哋走嘅時候   佢坐咗喺男隊員個位   仲以為佢示威可以霸佢個位   我仲喺度笑佢搞笑   點知無耐佢就食我哋枱上嘅食物   但其實我哋好似無咩嘢剩咗   嗰下我覺得佢好可憐呀   頭先我仲笑佢添   覺得自己好衰呀   唉 ~

真係好討厭佢嘅父母   生出來點樣都好   妳都應該要好好照顧佢一世啦   特別係佢媽媽   十月懷胎嘛   十個月喺妳肚入面同妳一齊食住瞓㗎   點可以咁殘忍對自己仔女   唔理佢死活 ~

         
今日幾乎無睇過時間   跟住大隊仲更加唔駛睇添   之後番到酒店原來已經 11 點幾 ~

沖埋涼就執嘢   我哋習慣係執好哂嘢   聽朝沖埋涼   就可以即放埋毛巾睡衣牙刷呢啲入袋   咁就唔駛再花時間再執嘛   搞掂哂都即刻瞓喇 ~