行程 : Jalan Petaling Ikan Bakar (燒魚) --> Bestari @ Soho KL --> KLIA
今日要番香港喇 好唔捨得添 ~
今朝又係 10 點左右起身 出去兌換錢就番酒店 Lobby 等阿表喇 ~
阿表帶我哋去食燒魚 馬拉人檔口 其實真係好感恩 因為呢度係大排檔 12 點到大排檔喎 可想而知會幾咁熱 不過今朝個天好暗 所以就完全唔覺熱呢 感恩感恩 個老闆娘仲好好人 叫我哋坐另一張無咁熱嘅枱 又加多張椅比我哋擺袋添呀 勁好人 因為當時已經好多人嘛 ~
刨冰中 我覺得個肥妹仔好為食咁呀 望到實一實 唔知以為個冰係佢添呀 哈哈
好多都帶埋小朋友出嚟看檔
燒魚中 我睇見都熱呀
自助形式 - 我影嘅時候先知阿表原來排緊隊拎嘢食 又唔叫我陪
排隊拎嘢 當中有唔少 Office 嘅人 着哂長袖裇衫西褲黎食 又係睇見都熱
燒蝦 & 燒 Sotong
燒蝦 - 好香好好味呀
燒 Sotong - 又係好香 又爽 燒嘅真係特別好味
燒浦魚 - 點埋醬汁 一流呀
(左) 燒浦魚 / (右) 燒 Kembong 魚 - 印象中 Kembong 比較多骨
Sambal Belacan 炒豆角 + 白飯 - 我鍾意食呀 但阿表知我唔鍾意食淺色嘅豆角 所以唔敢拎咁多 所以我話鍾意食 佢好愕然呢 呵呵
椰菜炒 + 白飯 - 阿表架 佢之前去泰國好多時都食呢 D 椰菜炒 所以我親眼見到覺得似曾相識 其實我好想試 不過食下食下又唔記得試
(左) 凍奶茶 / (右) 椰水 - 阿表話嚟呢啲馬拉檔係飲椰水 奶茶係 Mamak 先好飲 但我飲完凍奶茶 真係飲唔落杯椰水 所以無試 小寶要負全責呀 雖然奶茶無咩味 不過試咗無妨 但下次一定唔飲 因為無咩味 其實應該係我飲慣香港好濃嘅凍奶茶呢
醃生果 - 我以為樣樣係酸 原來唔係 因為香港好多都係酸嘛
Buah Ciku - 小寶係都要人試 不過又好味喎 好似梨仔呀 同埋好多水份 所以食完就飽到上喉嚨囉
里奧大人影㗎 話黑白好有 Feel 喎
食完就去 Soho KL 嘅 Bestari 食 Roti Tissue 作 Farewell Lunch 喇 之後再番阿表屋企拎榴槤就去 KLIA 喇 ~
馬版益力多 - 阿表話記得我尋晚無試到呀 所以特登帶比我試 真係連想喺車度抖下把口都唔得添 好在呢枝嘢食酸酸哋咋 可以幫助消化 相對香港嘅益力多就真係好甜喇
Roti Tissue - 又甜又鹹又脆 真係好正
終於等到雙子塔喇 哈哈 因為腍咗唔好食 同埋最大問題係會塌落嚟呀 本來諗住等唔到雙子塔咁影㗎喇 正想食嘅時候 另一個又啱啱到 感恩感恩 所以要快手快腳影 因為真係驚之前嗰個會倒塌咗落嚟呀
(前) Sirap Ice - 終於飲番原味 正呀
ABC - 飽嘅時候食呢個 ABC 真係好似食咗一年都食唔完咁呀
溶咗好多喇 但根本食唔切 因為好凍呀
話咁快就結束 5D4N 幸運感恩遊 一樣好唔捨得佢哋啦 雖然阿表沿途都好多嘢講 分散下我注意力 等我唔駛咁多嘢諗 哈哈 不過我無咩心機傾 見到指示去 KLIA 嘅牌真係好唔捨得佢哋囉 落車放完行李 影相之後攬下就要走喇真係 諗住喺車喊完唔會喊 不過當真係要講再見時 真係好難唔喊囉 好唔捨得呀 小奧仍都係話好心酸 不過我無喊得上次咁嚴重 因為我知好快又會見面呀 ~
今次早過上次一個鐘頭番香港 其實唔開心囉 少咗一個鐘頭見面呀 不過網上 Check-in 又可以只雖開機前 45 分鐘到機場 咁即係見面時間同上次一樣 所以真係好開心呀 ~
入到機場即 Check-in 估唔到超重 3 Kgs 但明明買嘅嘢無上次咁多㗎喎 ~
我哋 17:40pm 起飛 但 17:05pm 己經要到閘口 因為我哋坐機尾 所以我哋要上機先 ~
再見喇 吉隆坡 好快再見
一上機覺得好焗 開機之後先無咁焗咋 我好似未開機已經瞓咗添呀 瞓咗成個鐘先起身 之後喉嚨好痛 所以我好無儀態咁丫大個口瞓呀 之後起身食飛機餐 因為想食魚呀 ~
之前同坐喺前面個小朋友玩 2 歲未到 又肥嘟嘟好得意 就咁比隻手指同佢玩咋 佢已經笑到格格聲 又成日裝我 撩我玩 又撩隔離個叔叔玩 之後我瞓咗 個叔叔同里奧大人話個小朋友望咗我好耐呀 好鬼搞笑 ~
9 點半準時降落 今次又係 2 喼 3 箱番香港 所以又要打的喇 ~
呢 5D4N 真係好鬼開心同好鬼巨飽 嚴重嘅飽 聞食色變 呢次 Trip 又係阿表小寶安排行程 又管接管送 我覺得自己只係負責上車落車食嘢講好飽 上車落車食嘢講好飽 不斷重覆咁做呢個動作 ~
今次最開心係可以有好多時間傾偈 唔係食完就即去另一個地方 同埋今次大家都無乜影相 我實在太享受當下相聚嘅時刻喇 今次個個都玩得好放 無話驚依樣驚嗰樣 特別係小寶 所以啲時間過得好快好快 阿表話行程已減去一半 有啲再減咗 但都覺得時間完全完全唔夠囉 ~
多謝妳哋呀 阿表同小寶 好快又再見㗎喇 ~
超幸運感恩豪食貓山王榴槤忙玩飽飽飽探親遊圓滿結束 再次多謝阿表 & 小寶熱情捨命款待 Terima Kasih
