泡菜汁豚肉鍋 (外賣) ( 26-AUG-2024 )

( 26-AUG-2024  MON )

今朝我同西瓜講話身體狀況都 OK 可以番工   不過佢叫我休息多日呀 ~

咁瞓到 10 點半起身   里奧大人要幫菜仔影相   所以都唔陪我食早餐 lu ~

早餐食甜餐包夾芝士   依家唔係咁想食芝士   好在仲有 1 包要清咋 ~

食完再食藥   之後開機洗衫 ~

瞓下覺又睇下 Youtube   里奧大人就買埋午餐番屋企   原來都已經 3 點了 ~

里奧大人話食豬扒飯   我第一個反應話又豬扒飯 ?!   之後佢都話唔知食咩好   咁我話是但啦   最緊要佢鍾意食就得   同埋佢成日滕來滕去都攰   我都唔敢咁多要求喇 ~

唔知係咪食咗粒好勁嘅特效藥   隔咗一陣就搞肚痛但無力去廁所   之後覺得係要暈嗰隻   所以大聲叫里奧大人入嚟   我攬住佢之後話好暈   之後都唔知發生咩事 lu ~

我起身時聽到有人叫醒呀醒呀   佢話我突然 "嘻嘻" 聲就無哂知覺   大約暈咗十幾秒左右   之後我就醒喇   我醒嘅時候   聽到有人大叫醒呀醒呀 ~

之後全身係冷汗   拿拿聲坐喺梳化   又瞓咗個幾鐘 ~

今晚唔太餓   咁啱里奧大人又要喺屋企補影相   影咗個幾鐘   所以 8 點半先去買晚餐 ~

食完抖陣就沖涼洗頭   抖陣就食月餅 ~

睇多陣 Youtube   今晚 10 點 20 分瞓覺喇 ~

台式滷肉飯 (外賣) ( 25-AUG-2024 )

( 25-AUG-2024  SUN )

今朝瞓到 10 點半起身   食埋早餐就休息下 ~

早餐食腿蛋包   兒時味道   所以食起嚟會好開心   哈哈 ~

朝早唔駛沖涼洗頭都幾爽   感到唔駛做咁多嘢咁   哈哈 ~

食埋藥就睇 Youtube   里奧大人 12 點左右買埋午餐番屋企   食完就要再番工   辛苦佢了 ~

我仍然都係食完藥就休息咁啦   基本上攰到都唔想郁咁滯 ~

呢幾日食藥   食完無耐就好眼瞓   瞓咗個幾鐘就會醒   之後就睇 Youtube   到時間又食藥   之後無耐就瞓   瞓個幾鐘就醒   真係準時過番工   哈哈 ~

里奧大人 6 點幾先番到屋企   抖到 8 點左右就出去買晚餐 ~

我就沖埋涼先食晚餐   真係爽 ~

食完都即食藥喇   又再睇下電影   今晚 10 點半瞓覺 lu ~

泰式乾炒河 (外賣) ( 24-AUG-2024 )

( 24-AUG-2024  SAT )

今朝 9 點半起身但仍然有燒   所以里奧大人要我再去睇家庭醫生   好在佢今日補假唔駛番工咋 ~

睇完醫生就即番屋企   沖埋涼再食早餐   唔係食咗藥就沖唔到涼㗎喇 ~

食完藥再瞓   瞓到 1 點就起身   食咗特效藥真係無喉嚨痛喎   感恩感恩 ~

開機洗衫就休息下   3 點半左右食午餐 ~

呢排睇 BAO Family 一係聽韓文一係就咁齋睇佢哋   好似好耐無聽廣東話咁   不過其實 Youtube 都多數係聽國語   我覺得多嘢睇啲 ~

不過睇下睇下都瞓着咗   無計啦   食咗藥   所以有時起身覺得睇嘅嘢唔同咗   哈哈 ~

里奧大人 6 點左右要番公司做嘢   買埋晚餐   差唔多 8 點半先番到屋企 ~

基本上喺屋企無流汗   我都唔會再沖涼洗頭   因為覺得要花好大氣力咁   我好怕暈 ~

食埋藥又抖下   今晚都係 10 點瞓覺 ~

招牌焗鮮茄豬扒飯 (外賣) ( 23-AUG-2024 )

之前戰勝恐懼唔再怕食豬扒飯   但呢排唔舒服又唔知食咩   里奧大人就只會話豬扒飯   依家又食到驚咗 lu

( 23-AUG-2024  FRI )

尋晚喉嚨超級超級勁痛呀   最慘係吞口水仲痛   所以好似無瞓過咁 ~

今朝里奧大人晏少少番工   可以陪到我食早餐喇 ~

我估呢幾日里奧大人都係買通粉   因為我同里奧大人講話醫生叫我食通粉或者粥

我都係食完早餐食藥   之後又唔知幾點又瞓   瞓醒又睇下電視咁 ~

家姐問我喉嚨痛到火燒咁 ?!   我話係好痛囉   唔知係咪火燒嘅感覺呀   哈哈 ~

里奧大人 1 點左右番到屋企   又係我開餐嘅時候喇 ~

食完藥都係繼續瞓   咁都好   瞓多啲快啲好 ~

里奧大人 6 點左右放工   所以叫佢買埋晚餐番屋企食呢   咁我就沖涼等佢喇 ~

沖埋涼就抖下   呢幾日都係重覆食嘢食藥瞓覺   不過仍然有啲燒同喉嚨痛   所以都係好攰   呆呆滯滯又過咗一日咁 ~

睇下電視   今晚 10 點都瞓覺 lu ~

泰式濕炒豬肉河 (外賣) ( 22-AUG-2024 )

家姐問我食咩 ?!   我話泰式濕炒豬肉河   佢話做咩唔食清啲 ?!   之後我比張相佢睇   佢話都好清喎   哈哈

( 22-AUG-2024  THU )

今朝 9 點幾起身   所以里奧大人即去買早餐   我話我唔餓㗎   唔駛咁心急去買啦 ~

里奧大人請多一日假陪我   今日仲要係佢生日   真係唔好意思   但佢話實記得今年生日點過喎   呵呵 ~

一早諗住同里奧大人生日就去食泰國菜   咁菜就無得食   但生日利是一定有嘅

我都係食完早餐就食藥   睇下電視就會瞓着   有時起身都知自己之前做過咩咁   哈哈 ~

1 點幾食午餐   同里奧大人 Share 食半個芝士圈同埋尋晚剩嘅意粉   仍然無咩胃口   只係想食飽食藥 ~

好在冰姑提我買 100 Plus   之前 $7.0 唔買   之後加到 $8.0 都唔買   依家再加到 $16.60/2 支呀   但唔買唔得囉

食完又睇下電視   之後又係瞓   瞓完又睇下電玩   睇睇下又瞓   真係前所未見咁好瞓 ~

6 點半就食晚餐   其實我唔餓   但里奧大人都要食晚餐家嘛 ~

食埋碗綠豆沙清熱   但其實真係喉嚨唔舒服嘅時候   覺得無咩效   哈哈 ~

沖埋涼就食埋藥   又係好自然咁瞓咗 ~

睇下 Youtube 就食埋最後一次藥   再抖多陣   今晚都係 10 點就瞓覺 ~

焗肉醬意粉 + 招牌焗鮮茄豬扒飯 (外賣) ( 21-AUG-2024 )

( 21-AUG-2024  WED )

尋晚發冷呀   今朝瞓到濛濛瀧瀧聽到里奧大人掛號   之後佢話要再同我去睇家庭醫生   因為尋晚摸咗我兩次   我仍然發緊燒呀 ~

Book 咗 10 點 15 分   去到只係 10 點   估唔到有得睇呀   感恩感恩 ~

喉嚨仍然超級痛同埋發燒   之後即做快測   真係中咗 Covid 呀   不過都攞定兩日病假紙   最多番到工先再嚟改日子呢 ~

里奧大人本身聽日清假   但因為我唔舒服   所以調咗今日清假   佢話諗住休息   但我話依家無得休息 lu ~

感恩大快活無咩人   所以同里奧大人食埋早餐先   食完之後就去超市買嘢   買完再去睇手機   番到屋企都 11 點半   即開機洗衫   搞掂就沖涼洗頭   食埋藥就瞓覺 ~

2 點左右同里奧大人 Share 食半個芝士圈同綠豆沙   之後食完再食藥   呢幾日都應該過呢啲生活   辛苦里奧大人了 ~

估唔到又 3 點半瞓到 4 點半   其實 5 隻藥有 3 隻藥係食完會昏昏欲睡   所以真係好好瞓咁   哈哈 ~

今晚 6 點半都食晚餐喇   雖然唔係太餓   但想早食早休息 ~

仍然未退燒   所以個人真係好鬼攰   今日沖一次涼就算喇   好在個人無出汗   唔係就點都要沖涼囉 ~

睇下 Youtube   今晚 10 點瞓覺喇 ~

鳳城水餃拚招牌雲吞 (外賣) ( 8-JAN-2023 )

( 8-JAN-2023  SUN )

今朝好似瞓死咗咁   鬧鐘響嘅時候係昏昏迷迷咁呀   感恩都起到身   哈哈 ~

里奧大人買早餐   我話我食少少米線就夠   因為真係無咩胃口咁   可能未瞓醒   哈哈哈哈 ~

食完就去里奧大人公司   同頂爺傾咗 1 個鐘   後尾阿妹又嚟埋   要我背囊開箱   因為阿妹同佢實在太好奇我個背囊裝咩   點解成日要咁大個 ~

我個銀包係脹卜卜的   因為多卡同埋 Coupon   所以好重囉   頂爺拎上手時   佢以為我銀包裝埋部手機呀   話點解銀包會咁重㗎   哈哈 ~

咁我話有個紙巾袋係裝住紙巾   佢以為我將紙巾拎出嚟放入一個袋呀   我話唔係呀   係整包紙巾再放喺紙巾袋   佢同阿妹即刻話所以個袋咁重囉   話駛唔駛特登又放落個紙巾袋度喎   其實我好多時都有袋中袋   因為樣樣嘢一齊放入袋   會好亂咁   我好唔鍾意囉 ~

傾多陣都要去番主日學   之後就崇拜 ~

番完崇拜就去買餸   買完都已經 2 點   里奧大人又啱啱放工   咁我番屋企放低嘢再去買午餐喇 ~

好想食巨無霸   因為好想食嗰片酸瓜   但就唔會食漢堡包   十幾年前食過一次漢堡包   麵包同漢堡扒又乾又凍   真係人生食過最難食嘅嘢囉   之後都無再食咯   我又鍾意巨無霸個醬汁   以前好鬼大個   依家係以前 1/3 Size 咋 ~

薯條留番今晚食   因為食個巨無霸都好飽了

又有禮物   勁開心   但好似同上次差唔多咁噃

我問里奧大人邊個同事送㗎 ?!   爆炸式的想你   哈哈哈哈   不過粒薄荷糖又好好味喎

買埋呢 3 個蕃鬼荔枝就真係覺得好重喇   真係好大個㗎

煲完羅漢果茶就聽 ASTRO   諗住 6 點 15 分食得   但最後係 6 點 15 分先開始煮 ~

是日懶餐 - 鳳城水餃拚招牌雲吞 (外賣)

鳳城水餃拚招牌雲吞 (外賣) - 特登買 1 Pack 韭王 ($6)   因為我都幾鍾意食   白蘿蔔都好多汁   估唔到仲好甜添呀 ~

洗埋碗就沖涼休息   之後睇電視 ~

工人話朱古力好食   新媽咪太太買嘢食好叻   家姐話咁佢呢 ?!   佢話家姐買薯片好叻   哈哈 ~

細細個木瓜都唔錯   因為一定食得哂唔駛留

一叫佢就頭側側咁   好得意

落雨涼咗好多咁   諗住涼涼哋會眼瞓   點知睇到 11 點半先瞓添 ~

花枝丸魷魚粒拚雜菜 + 皮蛋酸薑 ( 7-JAN-2023 )

( 7-JAN-2023  SAT )

尋晚瞓到 2 點幾起身去廁所   之後好難先瞓得番呀   今朝 7 點 10 分都醒咗   咁起身整早餐 lu ~

早餐食甜餐包夾芝士   真係唔想食多士呀 ~

成日都烘燶麵包

菇場忙呀居然   又係星期六忙   哈哈   感恩都精神   我成日覺得瞓幾個鐘   真係好似啲阿婆嘅生活模式咁樣   我唔係咁想住呀   哈哈 ~

放工即走   感恩好快有車去家姐屋企呢 ~

一開門   Berry 又撲我   係要我摸下佢先唔撲   但因為我次次要洗咗手先摸佢   所以佢會撲好耐   好得意呢 ~

成日舔手仔

佢本身瞓緊覺   我嚟咗所以嘈住佢   哈哈哈哈

真係瞓喎

差唔多 2 點左右先食午餐   工人煮嘅煎蛋米粉   食完唔駛洗真係勁嘆呀   哈哈 ~

家姐好搞笑   好多時買咗啲咩都會同我講   佢今朝去買黃糖   我話一早叫妳買啦   佢話依家唔買唔得喇   我話點解呀 ?!   佢話有次落糖變咗落鹽呀   所以依家睇到顏色就知係鹽定糖囉   真係搞笑   不過唔好話佢   我都要喺個調味架貼住"鹽"同"糖"   因為煮起飯嚟又急   真係好易落錯呢 ~

抖陣就飲西洋菜湯   上次姐夫話煲湯定咩   我話咁下次煲比我飲   估唔到佢記得   佢今朝叫家姐 Whatsapp 我   問我飲唔飲湯呀 ?!   真心好感動   因為無諗過佢記住   但佢唔知我依家係第 4 星期六 Off   以為係月頭呀   所以好感恩今日都見到佢哋呢 ~

   

成半個鐘都係咁   係咪咁攰呀 ?!

不過咁都好   任摸唔嬲

之後又碌大對眼

食完又同家姐傾下偈啦   雖然 Whatsapp 都成日傾   但見到面係開心好多   會多嘢講好多囉 ~

工人都成日陪 Berry 玩㗎   有時一路睇手機一路摸住佢   又一齊瞓梳化   真係羨慕呀   哈哈

郁都唔郁

下半身完全無郁過   哈哈哈哈

幾乖呀

瞓啦

叫下佢又醒醒哋   我覺得自己勁衰呀   哈哈

其實根本佢都唔會理我

睇到佢咁樣   睇到我都想瞓埋   哈哈哈哈

點摸都得   咁就乖喇

3 點幾同家姐一齊出門走啦   工人抱住 Berry   之後話新媽咪同舊媽咪一齊走喇   笑死   佢都好叻呀   知道有新就有舊   哈哈 ~

講開話我唔敢睇抽血   家姐話媽咪嗰時撞親腳   醫生幫佢吸啲血係吸唔到   因為已經凝結咗   所以我要陪媽咪做植皮手術囉   但我見到塊皮係點樣反而唔驚喎   因為醫生都有問我驚唔驚 ?!   我話唔驚囉   塊皮係克力架 Size 咁   之後家姐話我好好   陪媽咪做手術又覆診   所以唔好成日話對媽咪唔好喇   咁我話有時間實陪   始終做手術嘛   同埋我都唔放心   喺度心掛掛擔心佢   咁不如陪佢好過 ~

家姐尋日去針灸   話醫師同佢講單搞鬼嘢   話有個人去針灸   佢朋友又跟住嚟話想睇下點針   點知佢朋友見到醫師落針   佢話嚇到頭暈呀   醫師咪話囉   又要睇又要驚   反而仲嚇親個醫師   咁我都以為佢朋友唔驚先去睇呀   哈哈 ~

感恩同家姐都好快有車   我就去探 Y 姑   順便比利是佢新年買嘢食呢   同佢傾咗半個鐘都走人喇   因為我想快啲去奇華拎蘿蔔糕呢 ~

頭先家姐喺屋企   係咁話好激氣好激氣   真係講咗 6 次都有   原來係話唔記得幫我拎蘿蔔糕   要我自己去拎喎   我話我自己拎仲好啦   反正我要探姑奶   又唔係直接番屋企嘛 ~

番到屋企就抹地同做小清潔   依家間唔中做小清潔   咁唔駛做大清潔   咁樣舒服好多   哈哈哈哈 ~

里奧大人仍然自我隔離   咁我今晚淥嘢食就搞掂   所以 6 點半可以開餐 ~

是日懶餐 - 花枝丸魷魚粒拚雜菜 + 皮蛋酸薑

花枝丸魷魚粒拚雜菜 - 清廚餘大行動   本來想煮烏冬   但見到菜心苗同椰菜都好多   所以就咁食菜算喇 ~

皮蛋酸薑 - 想清埋隻皮蛋   好在無壞咋 ~

洗埋碗就休息   睇 Youtube 睇到 9 點半都瞓咗    一醒已經 10 點 10 分   但之後又繼續睇 Youtube   睇到 11 點半都瞓 lu ~