住家飯 @ 家姐屋企 ( 9-APR-2019 )

燒鵝上裝 ($120) - 姐夫話唔夠油香   同埋話貴呀   海港都只係 $98 咋

梅菜蒸豬肉 - 無咩味噃   呢個餸都好送飯   可惜今次工人煮啲飯好腍   咁我頭先仲同家姐講話要 1 碗飯   好日唔講   一講就出事   哈哈

鹹魚

炒菜心

西洋菜湯

( 9-APR-2019  TUE )

里奧大人今朝上大陸   我叫完佢帶咖啡   之後都即刻瞓番 lu ~

早餐食奶醬多   想食甜嘢 ~

菇場忙呀   時間過得好快 ~

Lunch Time 未餓   所以出去行半個鐘   再買埋牛筋丸河番菇場食 ~

忙下停下又放工   諗住等埋里奧大人一齊食飯   點知佢話好餓   今晚自己喺上水食嘢先番屋企   好少聽佢話餓呀   哈哈 ~

咁我即話去探 Berry   今日真係好似整定咁   因為家姐今日請假   所以佢已經喺屋企   如果佢今日要番工   我就唔會去㗎喇 ~

咁我即打比家姐   話去佢屋企食飯   佢以為咩事   哈哈哈哈 ~

佢咁啱想出車去買餸呀   我話我買燒味啦   咁我買完就搭小巴   感恩好快滿座開車 ~

去到家姐屋企只係 6 點 15 分   我一入屋咋   Berry 熱情到呢   大大力撲唔停呀   梗係啦   彤彤姐姐見到我即行埋落我度嘛   喺咁爭寵 ~

洗完手就即摸彤彤   人生第 1 次摸咁大隻狗   哈哈

無人理   哈哈哈哈   其實係佢唔理我哋咋

4 粒膠都比佢咬勻

全程坐我前面   因為我成日摸住彤彤

彤彤會挨住我㗎

之後 Berry 姐就會行埋嚟   但我一伸手   佢就會走鬼咗去

家姐話依家 Berry 勁乖   成日跟住彤彤   咁彤彤係阿婆嘛   所以行得慢   但就超級嗲人   成日將個頭托住喺妳大脾度   要摸佢個頭   家姐話佢唔會舔人   但我話佢頭先舔我下巴同手喎   呵呵 ~

我攬住彤彤   叫家姐即刻幫我影相   話比里奧大人知我唔驚大狗   但其實佢乖咋   如果係家姐屋企附近啲大狗呢   我會好驚 ~

7 點左右開飯   唔駛煮有得食真係好幸福   哈哈哈哈 ~

以為佢咁嗲我啦   坐我腳底   原來佢咬緊粒膠

佢好搞鬼   無啦啦又想瞓覺

影到好肥呀   哈哈哈哈

食完飯就同 Berry 玩下   咬完我之後   隻牙仔都甩咗落我隻手掌度 ~

家姐成日吖大佢口   睇佢啲牙仔甩哂未   咁樣影到好肉緊咁   其實家姐好細力㗎咋   佢對啲狗真係好溫柔   咩都細細力   驚整親佢咁   打佢好似掃佢咁   所以 Berry 姐咪成日咬佢囉   呵呵

呢張好 BB   諗起佢細細隻真係好鬼得意   任抱唔嬲

好肥咁呀

8 點幾就同佢哋一齊放狗   彤彤唔肯番屋企㗎   好搞笑   一到屋企條路就會擰轉頭唔行   原來佢要行一個鐘㗎   但今晚就唔得咯   因為家姐要送我番屋企嘛   但朝早就會同佢行一個鐘囉   咁都好   等家姐可以一齊做下運動   哈哈 ~

Berry 姐就鍾意番屋企   佢見到街坊又要行埋撩人   但人哋一想摸佢就驚到縮開 ~

咁因為彤彤想繼續行   咁我同家姐就陪佢行多陣   Berry 就跟工人番屋企   之後家姐係咁叫 Berry   佢都唔理我哋呀 ~

彤彤真係好乖   所以依家工人話要彤彤唔要 Berry 呀   衰得佢   不過始終 Berry 都係我哋養嘅狗   我哋一定會錫佢   家姐好肉緊咁攬住 Berry   話最錫 Berry   哈哈 ~

Berry 姐 9 點食晚餐   咁等埋佢食   同佢玩多陣   我都走喇 ~

家姐又比包韓國手信比我   但我話太大包喇   Share 食得喇

咁我坐喺梳化   家姐喺我隔離執袋   之後我話: 妳唔駛送我喇   家姐即擰轉頭好愕然咁望我   我當時其實係望住 Berry 講   "妳唔駛送我喇 Berry"   但家姐反應太快   哈哈 ~

家姐一開門   兩隻狗想跟埋出門口   咁我着鞋嘛   工人無啦啦抱 Berry 喺個窗口望我哋   嚇鬼死我呀 ~

番到屋企即沖涼   里奧大人好驚咁話點解今晚會咁快餓 ?!   我話梗係餓啦   行咗成日廠又出咗汗   之後佢話係喎   唔醒起添 ~

今晚 11 點半都瞓喇   呢排啲天氣悶悶熱熱   真係想瞓多啲 ~

雞全翼沙律 ( 11-MAR-2019 )

( 11-MAR-2019  MON )

今朝里奧大人好早起身上大陸   所以之後我都瞓得唔係幾好 ~

早餐食芝腿治烘底   我呢個月都唔會同 8 卦食早餐   因為佢肺炎呀   自問身體唔係好   都係保持距離好啲 ~

菇場忙下停下   雖然手唔停   但個人好鬼攰囉   好想瞓一陣   哈哈 ~

Lunch Time 食麵包   一日兩餐包係極限   今晚一定要食濕嘢 ~

8 卦仲大獎   所以請食 Tea   咁又好喎   因為放工要去青林買嘢 ~

5 點先到   食完都 5 點 15 分   但無啦啦有 Urgent 嘢囉   好在 10 分鐘搞掂 ~

放工即去青林   之後里奧大人打嚟話個司機又慢慢行   搞到 Miss 咗一班火車   要 9 點先番到嚟   咁我驚佢餓   叫佢喺上水食嘢   反正我頭先食咗個下午茶   今晚食生果都得 ~

買完嘢再去買紅豆大菜糕比里奧大人   之後即番屋企喇   重鬼到呢 ~

番到屋企都 7 點幾   抖陣就沖涼喇 ~

其實今晚里奧大人夜番   係我做哂所有家務嘅好時機   但真係好攰   咩都唔做喇   睇 Youtube 等里奧大人番來 ~

8 點幾食埋 2 條大蕉   買咗成個星期   仲有 2 隻等住食 ~

里奧大人差唔多 9 點半先番到屋企   叫佢食埋大菜糕就快快沖涼休息喇   始終今朝好早起身呢 ~

今晚大家都好攰   11 點唔夠都瞓 ~

御苑皇宴 @ 九龍灣 ( 14-FEB-2019 )

( 14-FEB-2019  THU )

尋晚 12 點同 4 點起身去廁所   下次真係唔好飲湯好喇   哈哈 ~

里奧大人今朝上大陸   佢起身之後   我都即刻可以瞓番 ~

已經攰   仲加埋潮濕天氣變得更攰 ~

早餐食吞拿魚治烘底   之前完全唔記得有呢款三文治呀 ~

菇場唔忙   繼續 Load 相 ~

有時家姐會問工人 Berry 姐做緊咩 ?!   工人就會影相比家姐睇   之後家姐就會 Send 比我睇   一見到 Berry 姐   個人當堂精神好多   哈哈 ~

我話今日咁熱唔駛要被仔啦   但工人成日都會幫佢蓋被   堅當佢 BB 仔咁   哈哈

Lunch Time 行陣再買酸辣米線番菇場食   本來想食 Flakes   但菇場好鬼凍   真係要食啲熱嘢囉 ~

仍然 Load 相   其實我覺得 Load 相先攰   因為眼定定望住個 Mon   哈哈 ~

放工約咗里奧大人喺 megaBOX 等   因為今日係水姑生日   九龍嘅姑奶們 + 兒甥仔兩公婆一齊同佢食生日飯 ~

Book 咗 7 點   所以同里奧大人周圍行下先   之後收到電話話 7 點 10 分先到   咁我哋 7 點都到酒樓坐下   因為行到有啲攰 ~

7 點食變 8 點食   最唔鍾意咁   浪費等嘅時間   里奧大人都知我唔 Like   我話如果佢搭飛機都會遲   咁我就永遠都唔會話佢遲到囉 ~

食完都 9 點   之後同里奧大人買底衫   番到屋企已經 10 點   即沖涼喇 ~

頭先急住走   唔記得多謝兒甥仔請呢餐飯   咁我 Whatsapp 打比佢   問佢係咪 xxx ?!   佢好認真話係   之後我話你認唔認我我呀 ?!   佢又好認真答: 唔好意思   我唔認得你   我忍笑忍得好辛苦   之後我再話: 你真係唔認得我呀 ?!   之後佢先好開心話係舅母   哈哈   佢話以為我係佢同事打比佢呀 ~

今晚 11 點都瞓   呢啲天氣真係令到個人勁攰呢 ~

住家飯 @ 家姐屋企 ( 26-JAN-2019 )

仲有排骨粥   但無味道嘅   本來家姐話今晚食粥 + 炒麵   但最後總共有 5 樣嘢

我喺海景買嘅 2 條油炸鬼 + 1 條牛脷酥   咁都要 $33   不過佢真係好大條呢

豉油王炒麵係我炒㗎   因為家姐真係好怕食工人煮嘅嘢   哈哈

喺海港買嘅鵝掌翼   好似都要 $50

涼拌豬耳   得我同家姐食咋   難得佢陪我食呢

( 26-JAN-2019  SAT )

今朝瞓到 9 點半都自己醒 lu   但其實都要起身㗎喇   因為里奧大人一陣要去見客呢 ~

食完早餐就番屋企   里奧大人 11 點就出發去九龍灣見客喇   我就執衣櫃   好開心清咗 1 大袋衫褲   其實好多都喺曼谷買   買完無着過 ~

家姐咁啱打嚟問我做咩 ?!   我話執咗好多衫出嚟   咁家姐叫我比佢前工人   咁我話好喎   最緊要有人要呀 ~

搞掂哂就沖涼   11 點半就去九龍灣   咁里奧大人仲見緊客   我又周圍行下啦   勁開心呀   好似好耐無行過街咁   哈哈 ~

佢差唔多 1 點 40 分先見完客   但佢要 2 點出發去羅湖   所以我話去 Delifrance 食 Lunch 算喇   唔想周圍走 ~

拿坡里大蝦蜆肉炒天使麵   我覺得德福呢間整得好味道喎   淘大嗰間就無厘味道囉

里奧大人今日上大陸食團年飯   撞正我 Off   不過算啦   反正我今日都好忙   哈哈 ~

我 Book 咗 3 點剪髮   咁我 2 點 40 分去到   不過未剪得住   所以我又周圍行   買咗 2 個頭箍同 3 對耳環   勁開心呀 ~

買完啱啱好 3 點   即去剪髮喇 ~

今次再剪短啲   本來想剪到更短   但依家天氣仲凍   都係唔好搞住喇 ~

呢個髮型師剪得唔錯   咁傾下偈啦   點知出哂事   佢多嘢講到不得了   全停口唔停咁講   我洗頭嗰陣已經合埋眼   佢都仍然係咁講   我覺得好煩囉 ~

剪完髮就去買麻辣豬耳同油炸鬼   之後就搭巴士去家姐屋企 ~

旺角塞車   所以我班車要等 40 分鐘   咁我唔等啦   搭巴士去官塘再轉另一架巴士好過 ~

咁我打比問家姐坐咩巴士嘛   佢聽到我把聲就問我咩事   因為我笑到好似喊咁   哈哈 ~

去到差唔多 5 點   家姐啱啱洗完牙   所以車埋我   因為我真係唔認到路   如果佢唔車我   就叫工人出來接我㗎喇 ~

一入屋   Berry 好驚我呀   避我呀   嗚嗚嗚嗚   勁傷心 ~

家姐話之前姐夫班朋友嚟佢屋企   Berry 都好驚佢哋   仲以為驚男人   點知連我都驚   應該係驚陌生人 ~

我咪話囉   我睇住妳大㗎   不過只係 2 次   哈哈 ~

之後我話可能佢嗰時真係好病好呆   邊個抱都唔鬼理妳囉 ~

我成晚係咁 "Berry 嗚嗚嗚嗚"   家姐喺度笑   我話笑唔出   嗚嗚 ~

衰女幾唔願意呀   哈哈哈哈   我明明抱得佢好好   佢係咁想逃走

佢個樣好攰咁喎   驚得滯呀 ?!   哈哈哈哈

Berry 姐對手長哂呀   但其實又唔係好大隻

衰女包係咁郁   所以對錯哂焦

家姐去沖涼嘛   咁 Berry 係咁咬我呀   我用滕條扮打佢啦   之後佢仲惡過我   吠咗我好多下呀   衰女包   比佢嚇番我轉頭添   工人都望住我做咩 Berry 咁吠我呀   我覺得自己勁樣衰   哈哈   家姐一出嚟   我同佢講衰女包吠我呀   佢話仲以為出面啲狗吠呀 ~

家姐一抱佢   佢幾嗲呀

乜都咬   但始終都係最鍾意咬家姐   哈哈   同埋只咬家姐對拖鞋   家姐對手手腳腳比佢咬到損哂   有時比佢咬到流血添呀

無啦啦又走去瞓覺   我抱番佢出來   呵呵

之後 Berry 一過嚟我度   我就好開心同家姐講話 : Berry 係咪跟我呀 ?!   家姐都無咁好氣話    妳鍾意咩就咩啦 ~

7 點左右開餐   食埋生果都 8 點幾   咁我繼續抱住 Berry ~

真係好嗲家姐喎

好 BB 樣呀

想瞓添呀

我一抱就咁樣

妳個樣   唔好咁唔願意好噃

估唔到又想瞓喎

差唔多 9 點   家姐話想去惠康買米   我話一齊啦   反正里奧大人無咁早番 ~

我電話又唔記得叉電   咁用家姐電話打比里奧大人啦   我都同家姐講   佢見到係妳個名   應該會好驚   以為有咩事   點知我一打比佢   佢第一句都話嚇死佢   因為知我同家姐一齊   咁家姐無啦啦打比佢   以為有咩事呀   哈哈 ~

去到廣良興我買咗半磅豬肉鬆 ($30) 同半磅齋燒鵝 ($30)   之後諗住陪家姐買衫   最後佢只係買咗對鞋   佢係咁話要買嘢飲   我估啲麻辣豬耳好多味精   因為佢之前無食過嘛   食完話口渴   仲唔係佢 ?!

咁喺茶湯會買咗杯百香蘆薈綠 ($25)   原來都 10 點   家姐話惠康收咗   我話定啲嚟   即上網 Check   原來係收 11 點呢 ~

買完 2 包米   家姐再買 2 條盒裝 Tempo   我又買 2 Pack 飲品   之後都要走喇   無手拎喇 ~

將啲嘢放哂上車   簡直有解脫嘅感覺   哈哈 ~

番到屋企都 11 點   即沖涼喇   里奧大人 11 點就番到屋企   佢話要食杯麵   原來佢話間酒樓唔好味道   都無咩點食嘢呢 ~

之後又上網睇下嘢   成 12 點幾先瞓呀 ~