煙燻燒鴨 (外賣) ( 3-AUG-2025 )

( 3-AUG-2025  SUN )

今朝同里奧大人食早餐   食完就去佢公司幫手喇 ~

差唔多 10 點幾都要走 lu   我要番自己教會事奉 ~

之前成隻窗都濛哂㗎   當我拎手機影嘅時候就細番啲   但都算係超級大雨   哈哈

落車嘅時候落超級大雨加上又有風   所以我條裙下半身濕哂咁滯   好在薄身咋   叫做好快乾囉 ~

見到姊妹 A 又傾下偈   佢話我煮嘢食叻咗   我話我煮得就唔係叻啦   佢話妳真係煮嘢叻咗   我話好啦好啦   係都要讚我我都會收哂嘅   哈哈 ~

之後同弟兄 A 傾偈   好在我崗位都係同人傾偈咋   唔係好似唔做嘢咁   嘻嘻 ~

今次事奉好順利   比平時早半個鐘呀   所以可以去買隻燒鴨 ($130)   再買個兩餸飯 ($35) 就搭車喇   時間啱啱好 ~

坐巴士見到弟兄 MC   即同佢傾偈   因為咁啱有嘢問佢   咁我今日又早咗   佢又唔駛開會   其實有時喺屋企附近都見到   但真係 Say Hi 就走囉 ~

里奧大人仲未放工   咁我去佢公司一齊食喇   阿妹話我去完街買餸咁   我話去事奉唔係去街呀   哈哈 ~

估唔到咕嚕骨又係外皮脆卜卜   但睇過樣唔似囉   所以我無買到淨餸   激死我

諗住食完飯同里奧大人一齊番屋企   點知佢突然間有 Urgent 嘢要整   咁我都番屋企先喇   因為約咗師傅 3 點嚟整個水龍頭呀 ~

里奧大人 3 點番到屋企   無耐師傅就到   真係好喇   等佢哋搞掂就得喇   整咗差唔多半個鐘就整好   感恩感恩 ~

咁睇下 Youtube   里奧大人唔記得拎隻 USB 番嚟做嘢   話聽日番公司做   我話咁不如今日做喇   聽日可以全日休息呢 ~

我又唔攰   所以熨 2 機衫   之後里奧大人番到屋企   佢話諗住快啲做完番嚟熨衫添   話無諗過我熨得咁快 ~

差唔多 5 點左右就煮蕃薯糖水   搞掂就預備晚餐喇 ~

是日晚餐 - 煙燻燒鴨 (外賣)

煙燻燒鴨 (外賣) - 買咗 1 隻但唔斬嘅   估唔到都好重好大隻   因為我無睇到 1 隻幾大呀   所以一拎起手有啲後悔   哈哈   睇嚟都要食幾餐 lu ~

洗埋碗就啱啱好睇培靈會   之後再一路食糖水一路睇 "麻雀樂團" 同 "臥底旅行團 5.0" 喇 ~

今次好少蕃薯   所以加埋芝麻湯丸

今晚 11 點鬆啲都瞓覺喇   里奧大人話聽朝早啲起身陪我食早餐   我話買咗包呀   梗係瞓晏啲休息下好過陪我啦 ~

麻辣手撕雞 & 招牌水餃 (外賣) ( 29-JAN-2021 )

( 29-JAN-2021  FRI )

尋晚發得超級多夢   估唔到今朝起身仲記得   即刻同里奧大人講哂啲夢   佢都話咁多夢仲記到先好嘢   哈哈 ~

佢話呢兩晚瞓得好差   我話可能捱咗一晚夜睇大結局呀   之後佢笑住話唔好同人講 11 點半係捱夜呀   哈哈   咁我覺得真係算夜嘛 ~

同里奧大人食早餐   食完抖陣又番工喇 ~

菇場超級忙   一做就做到 11 點 15 分 ~

Lunch Time 出去行陣   再買紅腸酸辣米線番菇場慢慢食 ~

放工即走   買埋外賣就番屋企 ~

真係激死我   今次蒸餃子   之前買咗蒸籠布   點知今晚蒸完係痴底嘅   好在唔係小籠包咋   不過蒸出嚟嘅餃子皮又好煙韌   但下次都係淥算喇 ~

里奧大人話又洗衫 ?!   我話點解你連續兩晚講同一說話嘅 ?!   我話啱啱夠大半機咪洗囉   之後佢再強調話只喺想妳抖下   唔好成日番到屋企係咁做 ~

咁其實都開心嘅   起碼佢知我成日做家務   又驚我攰驚我暈   佢都好㗎喇   會主動熨衫   咁樣真係幫輕我好多   因為有時企得太耐條腰會痛 ~

8 點半開始睇聖經   睇咗一個鐘   之後就睇 Youtube ~

里奧大人10 點就瞓  我睇到 10 點 45 分都瞓   呢排真係 10 點幾就眼瞓 ~

大快活 @ 九龍灣 ( 9-AUG-2015 )

( 9-AUG-2015  SUN )

今朝里奧大人 9 點唔夠醒咗   我其實都醒咗   不過懶床到 9 點半先起身呢 ~

沖埋涼就落去食早餐   之後去 Taste 買果汁比媽咪   咁我打比家姐問媽咪想飲啲咩   我收完線就放番電話喺袋啦   之後家姐打嚟   話聽到電話入面 "時時 Sa Sa" 聲   嚇死佢   以為我喊呀   其實我應該未收線就放入袋呢   實在太論盡喇 ~   

買完就番屋企   諗諗下又喊   嗚嗚 ~

今日特登早啲番教會   因為我想搵傳道人為媽咪急切祈禱   不過佢無番   所以即搵牧師   祈禱完之後    心情又平靜番好多   之後入去崇拜喇   不過諗諗下又係喊 ~

心情唔係咁好   經過 Circle K 見到梳乎蛋   所以買呢個筆盒 ($29.9)   因為呢期好鍾意呢隻梳乎蛋   覺得佢好樣衰             

仲有 4 塊曲奇   

坐陣就去舖頭   順便約埋水姑食 Lunch   佢又順便比埋啲喉糖同蜜糖我哋呢 ~

家姐之前喺香港買 1 包大嘅好似要 2 百幾蚊   所以我叫水姑幫我買   澳洲買平好多呢   不過呢包係細嘅   我都唔記得問幾錢添

本來我要 2 樽大嘅 UMF 10+ 蜜糖   不過水姑買咗 5 樽   但佢放喺 Hand Carry 嘅喼   所以比海關充公哂啦   其實佢仲特登買咗 1 支大嘅防敏感 Cream 同沐浴露比里奧大人㗎   點知最後都比海關沒收哂啦   嘥咗心機同啲錢   因為里奧大人一早同佢講咗話 Hand Carry 唔可以帶液體嘛  

姑奶又送咗呢 2 個  Stubby Holder 我哋   話喺  Penguin Tours 買嘅   我睇到價錢牌係 AUD7.99   但唔知香港買幾錢呢 



食完嘢   申請埋信用卡   拎埋嘢就打的番屋企   今日好鬼熱   里奧大人着件 Tee 嘅膊頭位係黑色   所以佢話膊頭位置比啲陽光曬到辣肉咁呀   之後我話佢衰啦   成日唔比我買白色同灰色衫   話我着到好肥好肥   買黑色又話件件一樣   所以只能夠買深色衫   所以妳要知我真係好鬼熱   成日要開冷氣咁解囉 ~

喊得多真係好攰   5 點瞓着咗呀   好在 5 點半醒咗   因為要去探媽咪呢 ~

今晚接埋工人一齊去探媽咪   啱啱好 6 點去到   咁媽咪就可以即刻有得食魚蛋粗麵呢 ~

我見佢差唔多 "北" 哂啲魚蛋魚片   咁我見到好開心呀   叫佢食多啲   因為佢之前食嘢係樣樣食一啖咋   驚佢無力   抵抗力弱呢 ~   

之後里奧大人去搵姑娘   姑娘叫佢入病房等   咁啱我出嚟   我話不如喺出面等   好感恩姑娘啱啱番到嚟   姑娘好詳細同我哋講   話佢尋日啱啱接更睇媽咪   但其實 File 都未開嚟睇   媽咪就喊哂同姑娘講    話醫生同佢講會死   姑娘第一時間話好肯定醫生一定唔會咁講   咁我都相信醫生唔會咁講   媽咪應該係好驚先會亂哂龍呢   最搞笑係媽咪隔離床嘅婆婆同姑娘講   話醫生無話會死   只話媽咪心臟發大咗   同埋可能要洗腎呢 ~

姑娘話心臟發大會導致氣喘同腳腫等等問題   咁腎功能唔好就真係有好多因素影響   但如果洗腎   一日要三次或四次   同埋一定要屋企人清楚點洗   唔好靠工人   因為佢哋會唔做同埋會放假嘛   所以一定首要係屋企人知呢   之後話今朝已經轉介去腎科   但因為醫院無腎科醫生   所以唔知幾時先嚟   咁醫生評估完就再到護士評估病人適唔適合洗腎   因為病人唔可以洗洗下唔駛呢 ~

如果媽咪無乜事   咁都轉去靈實   但依家幫佢排咗靈實先   因為佢驚媽咪喺屋企唔安全呀   姑娘真係超級細心   佢解釋得好清楚比我哋知   差唔多傾咗 20 分鐘呀   聽佢講解完   我個心定好多呢 ~

入番房就第一件事同媽咪講   叫佢唔駛驚   總知唔好當自己係病人   有咩嘢我幫妳頂   唔駛驚   其實講完我都差啲喊出來   不過點都要忍住 ~

之後同埋里奧大人同工人一齊急切祈禱喇   工人都係信主   佢話尋晚見到家姐喊   佢叫 "太太唔好喊   要祈禱   記得要祈禱   唔好喊"   我覺得場面好搞笑   工人成日都為媽咪祈禱㗎   我超級感恩有呢位非常心地善良嘅工人   我依家叫媽咪聽佢話   工人係佢媽咪呢 ~

媽咪食咗半碗魚蛋麵   我勁開心呀   咁我買咗細細盒蘋果汁比佢嘛   佢又自己開嚟飲   起碼佢肯食肯飲   又話要飲啖熱水   又肯郁   我真係開心到就嚟暈呀   哈哈 ~

咁工人幫媽咪抹身   我又幫下手   佢真係好細心   抹得好乾淨   我自己真係無佢咁細心乾淨   真心覺得自己正一死女包呢   剩係惡死鬧媽咪   只係識得嘈嘈嘈鬧鬧鬧 ~

同媽咪一齊睇電視啦   啱啱做 "街坊廚神"   喺韓國介紹甜品   咁工人見到個盆哉甜品   我同佢講話個盆哉係朱古力整   可以食得嘅   點知食到最後   個盆哉係一個真盆嚟嘅   哈哈   超勁樣衰啦我 ~

媽咪隔離床嘅婆婆個工人應該係新請番嚟   因為婆婆個女教佢買雲耳   但佢完全唔明   所以問媽咪工人   突然覺得工人好勁做翻譯喎   哈哈   之後睇睇下電視   我聽到婆婆個女叫個工人   唔識就打比 xx   我嚇一嚇啦   同媽咪工人一樣名呀   我以為佢比咗電話號碼人哋呀   之後我叫佢唔好亂比電話號碼人哋   我哋唔知佢係咩人   一陣有嘢就麻煩咯 ~

無啦啦黃雨警告   之後睇住閃電   所以 7 點 55 分走喇   同埋工人一齊打的   一上車就落大雨喇   所以去大快活食嘢算喇 ~

諗住徑步   依家唔駛啦    咁就沖涼啦   哈哈   其實我都有啲攰 ~

睇下電視   諗住 11 點瞓   點知整呢樣嗰樣變咗 11 點半先瞓呀 ~

麥當勞 @ 九龍灣 ( 12-JUL-2015 ) (禁)

( 12-JUL-2015  SUN )

今朝 8 點半起身   其實勁想再瞓   不過要番主日學   所以要起身啦    食埋早餐就番屋企抖陣   10 點出門口喇 ~

番埋今堂就上完喇   之後真係要抖下   唔報主日學住喇 ~

散會之後就番屋企   無啦啦好鬼餓   所以 2 點就出去食嘢喇 ~

今日真係勁攰   但已經 4 點   又唔敢瞓   驚夜晚瞓唔着   不過睇睇下電視都瞓咗   4 點 40 分醒咗   精神好多呀   感恩 ~

5 點半出門口喇   兜埋工人一齊去探媽咪呢 ~

一見到媽咪   佢又乸住塊臉扮到好辛苦咁   不過我同里奧大人無理佢㗎   問都唔問   佢應該知衰啦   因為隔咗幾個字   佢叫我坐下呀   又同我講今朝飲咗包果汁   之後話隔離阿婆有流感   隔離阿婆成日自言自語   講嘢超勁大聲   仲要係鄉下話   嘈到拆天   真係瞓着都比佢嚇醒 ~

家姐無耐又嚟埋   又係無問媽咪點   之後媽咪又同家姐講嘢囉   講真   我哋唔探妳   我哋仲舒服   係妳慘咋   妳點對人   人點對妳   我依家都企硬咗   因為有時激氣到我自己都好辛苦   我表面好人好姐   但都可以有機會激一激心臟病發㗎 ~

今晚 7 點 45 分一齊走喇   要避開坐的士嘅人潮呢 ~

想去麥當勞換杯   咁唯有食埋麥當勞啦 ~

食完行陣就番屋企喇   沖埋涼抖陣就睇 "人在囧途之泰囧"   不過睇到 11 點    我頂唔順要瞓先喇   聽晚再睇個結局   哈哈 ~

四川紅莧菜苗 ( 21-JUN-2015 )

( 21-JUN-2015  SUN )

今朝 8 點半起身喇   食埋早餐   番屋企抖陣就番主日學喇 ~

今日有兩樣事奉   搞掂哂就去 Beauty Net 買嘢 ~

途經德福商場   估唔到有 Canon Roadshow   咁就玩下啦   哈哈 ~

終於試咗部正常 G7X   不過我覺得太輕   都係想要 G1X Mark 2 多啲 ~

仲係心大心細   所以去 Beauty Net 買完嘢再諗諗先 ~

買完差唔多 2 點   咁要食嘢喇   次次食完銀咖哩都好飽飽滯滯 ~

我同里奧大人講話今次要少飯   上次食唔哂好嘥   不過佢話今次唔駛少飯   佢好餓所以食得哂   咁好啦   到最後食剩兩個拳頭 Size 嘅飯團呀

好喇   里奧大人話去旺角買 G1X 比我喇   不過佢話部機已經出咗一段時間   無貨都唔定㗎 ~

搭地鐘出旺角   永成要 $4,400   所以里奧大人話去華仁睇下  但咁啱有人喺英京出 Lift   咁我哋又睇下啦   估唔到只係 $4,130   咁里奧大人即買 lu   整埋保護貼 ($30)   買多嚿後備電 ($120) 就走 lu ~

之後再去星際買相機套   真係好在格價   因為睇第一間係 $148   之後 $130   到我買嗰間係 $120   所以真係唔好心急   哈哈 ~

今日啲雨落下停下   所以都唔周圍行喇   直接坐小巴番九龍灣 ~

我去惠康買 Tempo 廁紙   咁叫里奧大人自己番屋企先啦   同埋佢要幫我整部相機   哈哈 ~

番到屋企都 5 點   今日勁焗熱又勁攰   所以都係沖個涼先 ~

6 點幾煮嘢   今餐超勁簡單   只係焗嘢同淥菜   無出過汗   呵呵 ~

食完都 8 點   搞掂哂就沖涼   里奧大人好驚訝話又沖 ?!   我話頭先都無洗頭   因為唔想煮完出汗又再洗多次頭嘛 ~

搞掂哂就抖喇   11 點幾要瞓喇 ~ 

壽司 (外賣) ( 14-JUN-2015 )

( 14-JUN-2015  SUN )

今朝 8 點半起身 lu   食完早餐就番屋企   沖埋涼抖一陣就番主日學 ~

散會之後就去舖頭   約埋水姑食 Lunch   順便送個銀包比佢呢   里奧大人唔知我買咗銀包比水姑㗎   所以里奧大人都覺得好驚喜   哈哈 ~

好感恩 3 點搞掂哂   即去 Crabtree 買指甲底油   之後去睇相機   再買埋壽司就番屋企喇 ~

又要沖涼喇   之後開機洗衫   又執下嘢咁啦   6 點半要食嘢喇   因為我哋去影藝睇 7 點 20 分嘅 Jurassic World (侏羅記世界 4) 呢 ~

今晚唔食爆谷喇   其一好飽   其二係佢哋啲 爆谷唔好食   哈哈 ~

估唔到套戲都好緊張喎   官能刺激一流   哈哈   睇到 9 點 20 分散場   咁去埋徑步啦   徑 20 分鐘就番屋企 lu ~

沖埋涼就睇下雜誌   又係 11 點幾瞓 ~

吉野家 @ 九龍灣 ( 31-MAY-2015 )

我要濃湯底   咁依家有得無限 Refill 澴湯底   好好呀呢   但加咗佢哋嘅濃湯底之後   就當堂無哂味囉   我同里奧大人講話根本只係有顏色嘅水   哈哈  

里奧大人話啲飯好腍   對我嚟講係爛飯啦   哈哈   但以前吉野家啲飯係珍珠米好好食㗎喎

( 31-MAY-2015  SUN )

今朝要番主日學   所以 8 點半起身   但其實我尋晚瞓唔好   唔想番㗎   懶床 10 分鐘之後都係決定番   唔想成日咁多籍口咁 ~

海棉寶寶真係好得意喎   成日笑   不過佢對手有啲問題   要搞搞佢先得   哈哈    

好在今日番主日學咋   因為我換完衫   一開機就收到 Whatsapp 問我可唔可以幫手做事奉 ?!   咁無問題啦   反正我都番崇拜   但就要即刻換番斯文衫呢   哈哈 ~

食完早餐番屋企抖陣先   之後就番教會喇 ~

散會之後就去買嘢就去舖頭   諗住去水姑屋企整嘢先   點知原來佢已經到咗酒樓   又要行番番轉頭   哈哈 ~

鯪魚球係五千年不變嘅點心     

呢個點心拚盤   仍都係五千年不變  

我唔知叫咗拚盤   所以叫咗潮州粉果  

佢都叫咗叉燒包   重覆哂

飲到 3 點就去水姑屋企整嘢   之後去埋舖頭拎嘢就番屋企喇 ~

番到屋企已經 4 點   里奧大人做公司嘢   但我勁眼瞓   所以試下合埋眼   睇下瞓唔瞓到   估唔到瞓到 5 點先醒   我喺梳化瞓嘛   里奧大人驚我冷親   所以幫我蓋被   其實我都醒咗㗎喇   最搞笑里奧大人以為佢整醒咗我   同埋唔知我原來瞓咗  因為我無鼻寒聲喎   佢好衰㗎   成日話發夢聽到獅子老虎咆哮   一係就話個場境好嘈   聽唔到人哋講嘢   點知原來佢係瞓瞓下跌咗耳塞出來   嗰果咆哮係我啲鼻鼾聲呀   都唔知係咪真係咁誇張   哈哈 ~

6 點半出去食嘢   其實唔餓   但又勁想打邊爐   不過佢又唔想打   咁去吉野家囉 ~

食完去商場拎埋 Head Phone 就行陣   之後番屋企 lu   今晚唔徑步喇   因為超級焗熱 ~

沖埋涼   食埋生果就睇電視   11 點幾瞓 lu ~