燒汁焗鮪魚 + 司華力腸拚炸蝦餅 + 菜心苗 ( 2-APR-2022 )

( 2-APR-2022  SAT )

今朝 8 點起咗身   但試下再瞓   不過都係瞓到 8 點半   哈哈 ~

刷埋牙又整下其他嘢   差唔多 9 點先食早餐 ~

食完早餐就再大清潔屋企   因為下星期正常時間番工   我想再抹得乾乾淨淨咁呀 ~

沖完涼就抖下先   之後再執好哂里奧大人書枱   整理好佢所有文件   估唔到整到 1 點   咁要快快食 Lunch 喇 ~

食完 Lunch 就的起心肝執哂所有保險文件   因為買得太多保單   有啲其實都供完   我要寫低幾時可以拎錢   如果我仲不斷交保費就麻煩啦 ~

終於 4 點幾搞掂哂   個人真係安樂哂   因為我最無心機係整保險文件 ~

里奧大人 5 點幾先番到屋企   我都預備晚餐了 ~

今晚 6 點半先開餐   真係無諗過咁簡單都要整一個鐘   哈哈哈哈 ~

是日懶餐 - 燒汁焗鮪魚 + 司華力腸拚炸蝦餅 + 菜心苗

燒汁焗鮪魚 - 終於清哂啲鮪魚   我後期買嘅鮪魚有好多細骨   我有次差啲鯁親魚骨添呀   所以勁驚   食埋今次應該唔買住㗎喇 ~

司華力腸拚炸蝦餅 - 好想食司華力腸   所以焗 2 條   但食剩 1 條   哈哈   蝦餅就係尋晚食剩嘅 ~

菜心苗 - 自己買菜都係來來去去嗰啲   最緊要每晚有碟菜就搞掂   嘻嘻 ~

洗完碗就休息一下先   里奧大人話好攰   所以唔跳舞   咁我自己跳啦 ~

沖埋涼就睇 Youtube   呢排又睇緊啲新頻道   所以成日睇到好夜 ~

今晚又涼咗好多呀   所以 11 點唔夠都瞓 ~

泰式炸魚肉蝦餅 + 滑蛋粟米魚塊 + 菠蘿咕嚕肉 (外賣) ( 1-APR-2022 )

( 1-APR-2022  FRI )

今日里奧大人 WFH   所以 8 點幾要食早餐 lu ~

以免令到里奧大人食到悶   所以剪開一條條   比啲新鮮感比佢   哈哈

佢食完就即開工   我就沖完涼等工開 ~

1 點幾開餐   點知溫總打嚟問嘢   搞咗好耐   佢做嘢真係太過驚驚青青   真係明明簡單都變咗好複雜 ~

芝士漢堡芝麻包 + 酸辣粉 + 粟米鬚茶

好在無比里奧大人帶番公司食咋   我無諗過係咁多湯料包   同埋都好大陣味   喺公司食真係唔好囉

一到 4 點半   個人就會放鬆哂   因為我唔駛成日昅住手機有無公司 Whatsapp ~

所以其實我喺屋企做家務或者溫書   間唔中就要睇下手機   因為我所有訊息係唔會有通知鈴聲   我成日同家姐 Whatsapp   係咁嘟嘟嘟真係會人都顛囉 ~

今晚唔想煮呀   所以叫里奧大人買外賣番屋企食 ~

早食早跳舞   今晚 7 點 45 分可以跳喇 ~

沖埋涼就睇 Youtube   之後又聽下歌   聽到 11 點幾都瞓 lu ~

辣醬焗金沙骨 + 鹹蛋菠菜 ( 31-MAR-2022 )

尋晚食剩嘅臘腸同白飯

好想食煎堆   所以又買嚟食

( 31-MAR-2022  THU )

尋晚瞓得好一般   其實呢排都係咁   唔知係咪個人有肝火   哈哈 ~

今朝里奧大人鬧鐘響   我話我起身先   因為要做快測   之後里奧大人話 7 點幾咋   因為尋晚無熄鬧鐘   真係比佢激死囉   咁之後我都瞓到 8 點 10 分先起身 lu ~

雖然里奧大人 WFH   但佢會陪我食早餐呢 ~

我同里奧大人講話聽日記得校啱鬧鐘   唔好再響兩次   之後叫佢 "醒定啲"   佢話妳啲語氣都幾夠霸氣   哈哈 ~

番到菇場   阿齋話又見到我   我話掛住妳嘛   佢話我講大話   之後我同 8 卦講話佢瘦咗   因為佢嘅女神無番   阿齋聽到又話我講大話    我話好喇喎   今朝成日話我講大話   我話唔係真心話啫   但唔代表係大話   哈哈 ~

勁忙呀   咁都好   真係眨下眼就到 11 點 45 分咁 ~

Lunch Time 去買菜同咖啡   之後買醬料同麵包   加加埋埋又好重   所以買埋炒麵就番菇場喇 ~

仍然超級忙呀   感恩做哂啲 Urgent 嘢   其他可以慢慢做 ~

4 點半準時放工   沖完涼又抖下   其實都接近 6 點   又要預備晚餐了 ~

我覺得 WFH 期間   真係好自然買定多啲嘢食   因為我唔會出街食嘢嘛   同埋如果同里奧大人一齊 WFH   就更加要買定多啲嘢食添呀

是日懶餐 - 辣醬焗金沙骨 + 鹹蛋菠菜

辣醬焗金沙骨 - 其實我都鍾意整金沙骨   因為就咁焗完加醬汁就搞掂 ~

鹹蛋菠菜 - 又清咗呢兩樣嘢   實在太開心 ~

洗完碗就一個鐘先   但其實依家仲未習慣   成日差啲走去沖涼呀   哈哈 ~

跳完舞都即開機洗衫   唔想搞到咁夜   咁再等到無流汗先沖涼 ~

睇陣 Youtube   話咁快就 12 點   係時候要瞓喇 ~

今個月只係番咗 9 日工   感覺真係好似放假   所以之後回復正常番工時間   真係要早啲瞓   始終要 7 點幾起身呢 ~

蒸臘肉 & 臘腸 + 菜心苗 ( 30-MAR-2022 )

里奧大人中午食剩半個飯盒   可以留番做晚餐   我話第時叫佢買定多一個都好   之後佢話都可以呀   番到嚟唔駛整就食得   我話我要再焗熱架   放咗半日點可以就咁食㗎

( 30-MAR-2022  WED )

尋晚瞓得勁差   里奧大人都係咁   可能無開風扇有啲熱   但我上床瞓覺係覺得好凍喎   咁無理由開風扇嘛 ~

9 點唔夠都醒咗   但整呢樣整嗰樣   差唔多 9 點半先食早餐 ~

抖陣就拖地   之後抹雪櫃   再將所有嘢入儲物盒   咁樣整齊好多嘛   所以又整咗個幾鐘 lu ~

沖埋涼就抖下   差唔多 1 點就食 Flakes + 乳酪   抖陣再飲雞骨草   好在無肚屙   哈哈哈哈 ~

呢隻 Flakes 都幾好味

對手仔好長咁

咩料呀   哈哈

佢應該係想瞓覺

3 點左右溫書   一溫就溫到 5 點半   時間過得真快   我以為溫咗個幾鐘咋 ~

里奧大人接近 6 點放工   咁我都要預備晚餐喇 ~

是日懶餐 - 蒸臘肉 & 臘腸 + 菜心苗

蒸臘肉 & 臘腸 - 想多一樣餸又唔想開焗爐   所以就蒸臘味 ~

菜心苗 - 食埋今餐又要諗食咩菜   可能又買番菠菜 ~

洗埋碗就抖陣   今晚 7 點 45 分可以跳舞喇 ~

又出咗成身汗   希望好瞓啲啦   哈哈 ~

沖埋涼就睇陣 Youtube   11 點鬆啲都瞓喇   尋晚瞓得唔好   今晚真係好早眼瞓   哈哈 ~

粉絲蝦米旺菜 + 蒸臘潤腸 + 蕃薯糖水 ( 28-MAR-2022 )

( 28-MAR-2022  MON )

今朝 9 點唔夠都醒咗   咁都整早餐 lu ~

抖陣就做下家務   之後熨衫   沖埋涼都已經 12 點 ~

見佢咁樣   我都想瞓   哈哈

1 點半食 Lunch   我想同平時番工食飯時間差唔多咁   唔想 2 點食下午茶時間先食呀 ~

整理下啲文件又用咗成個鐘   之後里奧大人瞓覺   我就溫書喇 ~

又係 6 點唔夠都預備晚餐   依家比多咗時間預備   個人舒服好多   煮完唔會發睥氣   哈哈 ~

是日懶餐 - 粉絲蝦米旺菜 + 蒸臘潤腸 + 蕃薯糖水

粉絲蝦米旺菜 - 醒起雪櫃有蝦米   所以即刻拎出嚟浸喇   其實我唔鍾意食蝦米   但家姐係都要比我   咁我都要食嘛   唔想浪費呢 ~

蒸臘潤腸 - 仲有一大碗咖哩雞肉   所以今晚蒸臘潤腸算喇 ~

蕃薯糖水 - 我買栗子蕃薯   所以覺得好香好甜   今晚嘅晚餐同糖水   真係老人家餐   哈哈 ~

洗埋碗就休息   差唔多 9 點先開始跳舞 ~

跳完舞再 Cool Down   加埋都要 45 分鐘   所以早啲跳係好啲嘅   哈哈 ~

沖埋涼就睇 Youtube   今晚仍然唔駛開風扇瞓覺   呢啲天氣舒服   但就潮濕囉 ~

睇下睇下又 11 點幾   要即刻瞓喇   聽日大家都要番工呢 ~

麻辣肚絲 + 夫妻肺片 + 紅油蒜茸青瓜 + 炸墨魚餅 + 傷心酸辣粉 + 海帶綠豆沙 (外賣) ( 25-MAR-2022 )

麻辣肚絲 - 好辣  但好鬼正   哈哈

夫妻肺片- 呢個都係辣   我覺得份量少咗

紅油蒜茸青瓜 - 想食好耐啦   依家小青瓜都貴   所以唔會買住

炸墨魚餅 - 呢個好味呀

傷心酸辣粉 - 我食紅薯粉   里奧大人就食米線

海帶綠豆沙 - 每人食一碗清清熱氣

( 25-MAR-2022  FRI )

尋晚瞓到半夜   個上顎有啲痛   但就唔係喉嚨痛   可能我丫大個口瞓覺呀 ~

感恩起身個上顎無痛咋   真係又要食炸嘢又要驚   之前真係晚晚食薯片都唔驚㗎   但依家就真係無食薯片好耐   始終好怕喉嚨痛呢 ~

8 點幾都食早餐喇   里奧大人 WFH   我都要早啲起身 ~

天氣勁潮濕呀   感恩個人又唔係好攰 ~

食完早餐就大清潔屋企同廚房   抖陣再大清潔廁所   沖埋涼就要休息了 ~

好掛住 Berry 女呀

1 點半食 Lunch   之後聽下歌 Relax 下 ~

尋晚唔記得食燒餅呀   所以今日再焗熱食

里奧大人 5 點放工   所以即出去剪頭髮 ~

我話今晚會煮飯   但里奧大人係都話買傷心酸辣粉   話難得出去喎   買埋番嚟食   咁唔駛我煮咁辛苦 ~

食完抖到 8 點就跳舞   依家鍾意喺屋企跳舞   因為唔駛換衫出街咁麻煩   哈哈哈哈 ~

沖埋涼都休息 lu   今晚 11 點居然眼瞓   所以自己瞓先喇 ~

泡菜汁豚肉鍋 + 雞扒夜貓大碗飯 (外賣) ( 23-MAR-2022 )

泡菜汁豚肉鍋 - 仍然未食厭   因為我鍾意食啲菜同黃蘿蔔   哈哈

 

雞扒夜貓大碗飯 - 呢個唔熱氣   所以里奧大人都係揀呢個

( 23-MAR-2022  WED )

今朝 9 點幾都要醒   不過今朝只係焗熱麵包就搞掂   方便好多啦 ~

之前里奧大人話其實唔駛整雞蛋腸仔都得   咁就好喇   唔係我想懶喎   係我其實食麵包都夠飽   我以為里奧大人要食飽啲先整雞蛋腸仔咋   見佢平時早餐都係米粉餐嘛   點知佢話食包都飽   咁我梗係就咁整包就算啦   哈哈 ~

食完又休息下   之後沖涼   始終習慣每日沖涼洗頭   就算全日喺屋企   都要咁做呢 ~

里奧大人 12 點都出發番工   咁我溫下書啦 ~

1 點幾食午餐   之後又睇 Youtube ~

里奧大人今晚好夜放工   所以我陪佢食晚餐喇 ~

差唔多 6 點就出發   買埋晚餐就去里奧大人公司 lu ~

食完好想郁   所以就去買下嘢   哈哈 ~

感恩里奧大人 8 點半可以放工   可以番到屋企抖下就開始跳舞呢 ~

沖埋涼就休息   今晚難得 11 點幾有睡意   所以即去瞓覺   里奧大人就要做埋少少公司嘢先可以瞓呢 ~