住家飯 @ 媽咪屋企 ( 9-MAY-2016 )

冬菇瑤柱蠔豉 - 今晚所有餸都係工人佢哋自己諗   其餘就買媽咪鍾意食嗰啲   食呢餐飯   真係好多好多感觸

 

燒鴨 (半隻)

我覺得工人擺得好靚

燒腩仔 (半斤)

滷水雞翼

煎釀孖寶

雲耳炒西芹

白菜豆腐魚湯 

( 9-MAY-2016  MON )

呢排瞓得都唔好   所以成日都唔想起身咁   但一醒嘅時候   又唔想合番埋對眼 ~

有啲餓   咁食芝蛋治啦   食咗細半件已經好鬼飽添   好在今朝又早到咗   可以慢慢食呢 ~

菇場忙下停下   時間都好快過 ~

Lunch Time 出去買包糖   之後又行下一田   再買 2 盒 Tempo 紙巾就買燒賣粉果番菇場食   嗰下又係好想食   之後又唔想食咁囉 ~

放工去買乳豬同燒鴨   又係無乳豬   咁唯有買燒腩仔啦 ~

買完就番媽咪屋企   今晚家姐工人都嚟埋   咁都好   等媽咪工人無咁驚 ~

里奧大人今晚 7 點半放工   係咁叫佢記得自己食   唔係等埋我就搞笑喇 ~   

我沖埋涼就等食   家姐 8 點先番到屋企   一路食一路傾   差唔多 8 點 40 分   我叫佢唔好講喇   快啲食   因為 8 點 45 分到 9 點呢段時間要擺好啲食物呢 ~

真係唔知媽咪係咪番咗嚟   定係家姐開包果汁唧咗出嚟   因為個盒係扁咗   同埋啜飲筒位置有幾滴果汁   媽咪工人特登開一包新嘅出嚟   仲話如果我哋就咁唧出嚟   個盒唔會扁   係都話媽咪番嚟飲   哈哈 ~

佢哋洗埋碗   家姐就沖涼   之後到佢哋沖涼   搞掂哂就一齊睇電視   睇到 12 點一齊瞓   我話媽咪今晚 1 點至 4 點番嚟   但唔駛驚   唔好郁就得喇   同埋唔可以去廁所   哈哈 ~

住家飯 @ 媽咪屋企 ( 14-MAR-2015 )

1 隻滷水鵝 @ 唯豐潮州鹵味專門店 - 食咗 1/3   其他我拎走啦   媽咪根本食唔到咁多  

鵝掌翼 + 鵝腸 + 豆腐 - 又係食咗 1/3 咋   又係要我拎走

蒸鮑魚 - 媽咪話罐鮑魚要 $400   對我嚟講真係覺得貴㗎   同埋我又唔鍾意食鮑魚嘅   不過媽咪話難得里奧大人一齊食飯   所以開嚟食喎   但其實都唔駛開啦   1 隻鵝根本一定食唔哂     

炒蜆 - 我又係同媽咪講話根本唔駛煮啦   哈哈 

炒合掌瓜

( 14-MAR-2015  SAT )

今朝 7 點 40 分起身   但星期六真係做咩都慢吞吞   所以 8 點 10 分先出門口   無諗過咁遲添 ~

好在今日好快有小巴   所以有好多時間食早餐喇 ~

實在太好喇   菇場唔忙   咁又可以 Load 到放工   呵呵 ~

今日要拎電飯煲比 Fat Fat   所以同里奧大人 Join 埋喺鑽石山地鐵站等喇 ~

出到深水埗都差唔多 1 點 45 分   咁食埋嘢先去 Fat Fat 屋企 lu ~

札肉肉碎金邊粉

泰國海南雞飯

去到 Fat Fat 屋企即刻換電飯煲   之後再整好啲膠墊   因為電飯煲要用海棉百潔布   但 Fat Fat 屋企無呢啲   所以同里奧大人再落去買   搞掂哂都 4 點半   咁原來頭先 Fat Fat 走去九龍城買滷水鵝同魚比媽咪   咁即係我哋一定要番媽咪屋企   本來諗住探完 Fat Fat 就去探婆婆   不過里奧大人話探完 Fat Fat 先打比婆婆   好在真係無一早約定婆婆咋   唔係一定要 Cancel 啦 ~

坐巴士去媽咪屋企   差唔多 6 點就到   6 點 45 分左右食飯   家姐喉嚨痛   所以唔嚟   如果一齊食就更加好呢   因為太多餸   食唔哂   哈哈 ~

差唔多 8 點幾就走喇   我個袋好重呀   所以行咗 1 個圈晨運徑就番屋企 lu ~

番到屋企即開機洗衫   之後沖埋涼就睇戲   無諗過咁血腥   但又想睇囉   所以諗瞓前要睇 Just for Llaugh 笑番下   唔想今晚發惡夢呀 ~

睇完都 12 點幾   要瞓喇 ~

咖哩雞飯 + 四寶飯 (外賣) @ 媽咪屋企 ( 13-APR-2014 )

( 13-APR-2014  SUN )

今朝 8 點電話響   係媽咪打嚟   聽佢把聲好精神   仲以為佢叫我去鴻星飲早茶   點知原來佢話頭暈   叫我去佢屋企陪佢   咁我即刻刷牙洗臉出門口喇   之後再飛去打的   到我頭暈腳軟   哈哈 ~

去到媽咪屋企即問佢有無喘啦 ?!   之後佢話有少少小   但個頭就好暈   咁我話入醫院喇   即 Call 平安鐘   等多 10 分鐘   白車都到 lu ~

救護員叔叔問媽咪咩事啦   媽咪話咁咁咁   之後話頭先聽完收音機   聽到腎病會腰痛   依樣痛嗰樣痛咁   聽聽下好驚喎   咁救護員叔叔咪話佢心理病多啲   我直頭話係嚴重添啦   量佢血壓又高   我叫佢哋唔駛驚   因為媽咪見到你哋驚嘛   所以血壓咪高囉   次次都係咁 ~

上到救護車   Check 哂所有嘢就開車喇 ~

今次只係去分流房睇醫生   醫生話媽咪對腳無腫   血氧又好好   唔似哮喘   應該係耳水不平衡   所以幫佢打枝止暈針   再比啲藥拎番屋企就得 lu   唔駛入院   感恩呢 ~

因為我初初諗住媽咪要入院   所以拎埋啲日用品呀  廁紙紙巾咁啦   又帶埋外套同拐杖   一袋二袋   又推住輪椅   咁婆婆之前打咗 2 次我都唔聽啦   因為見緊醫生   無理由聽電話家嘛   之後我入 Lift 又打嚟   講真   我真係覺得好煩   我話依家唔得閒一陣打比佢   之後去到藥房   電話又響   原來係里奧大人   咁我會聽啦   因為我要約佢番媽咪屋企   講完之後我打比家姐   話媽咪唔駛入院   佢話婆婆頭先打比佢   話有個人講話唔得閒唔傾住   問係工人定係我喎   叫家姐打比我問咩事   家姐同我講話人哋都話唔得閒   咁做咩仲要打   我知妳關心媽咪   但人哋做緊嘢   妳係咁打嚟真係好煩囉 ~

咁等拎藥期間   媽咪話平時去遠啲嘅公園做運動   咁一陣去近少少嘅公園做運動   我話妳仲做咩運動呀   頭暈仲做運動 ?!   之後佢話咁講啫   我話都唔知妳講嚟做咩   而妳講緊嘅係一陣妳係會做運動囉   佢話我誤會佢意思喎   咁我其實都想發火㗎喇   不過忍住   我話一陣將妳呢兩句說話同里奧大人同家姐講   睇下妳想講嘅意思係咩囉 ~

咁我約好里奧大人喺媽咪屋企樓下等   因為要行段路先番屋企   又無輪椅喎   所以叫媽咪企一陣先   之後我扶佢行啦   佢無啦啦 Fing 開我隻手呀   呢下我即發顛呀   我話我係妳個女   我都覺得妳勁無禮貌好得人憎   人哋扶妳   妳唔駛人扶   講話唔駛咪得囉   做咩 Fing 開人隻手呀   之後我都唔鬼彩佢   去管理處借咗張椅比佢坐   我就即行開打比家姐   話媽咪 Fing 開我隻手好無禮貌呀   真係火都嚟 ~

咁反正等緊里奧大人   咁我上屋企推張輪椅落樓啦   一落到去已經見到里奧大人 lu   咁就一齊上屋企   因為已經 10 點幾喇   咁我叫里奧大人陪媽咪   我落去麥當勞買早餐番屋企食 ~

今日原來 Plan 好拜爸爸   之後行街再拜老爺奶奶   不過計劃有變喇   我要全日陪住媽咪呢 ~

12 點同里奧大人一齊落去買飯比媽咪   同埋順便去家品店買個熱水壺比媽咪   之後里奧大人同我講   話佢見到媽咪嘅時候   問佢有無嘢   媽咪話只係頭暈暈   之後話我發脾氣唔彩佢呀   話 Fing 開隻手係因為唔知邊個拖佢喎   咁咁咁咁   之後里奧大人咪話唔想人拖都唔應該咁 Fing 開人隻手   咁我問里奧大人咁媽咪講嘅時候係驚定係好惡話我先   佢話媽咪個樣係驚   咁係喎   我事實真係無錯喎 ~

里奧大人約咗屋企人 3 點半集合   所以 1 點 45 分就同佢落附近餐廳食 Lunch   食食下佢屋企人又話改 4 點   咁好啦   食完番上屋企抖陣   佢差唔多 2 點半就出發   我送佢搭車   順便買杯凍啡 Relax   哈哈 ~

味菜牛柳絲炒麵   好味呀

今日上上落落   又早起身   其實攰   不過又瞓唔着 ~

差唔多 6 點就去買飯比媽咪   番到屋企里奧大人就打嚟   話差唔多番到嚟   咁我抖咗陣又要落番去一齊買飯食   今晚勁想食咖哩   所以去大家樂買飯喇 ~

好感恩媽咪之後無咁頭暈   仍都好感恩里奧大人陪我頻頻樸樸   舒緩一下我嘅情緒 ~

工人 8 點番到屋企   咁我同里奧大人都功成身退喇 ~

我就番屋企沖涼先   里奧大人就去徑步 ~

睇埋心計   我 11 點自己瞓先喇   今日好鬼攰呢 ~

住家飯 @ 媽咪屋企 ( 3-APR-2014 )

陳皮絲蒸鮑魚

蒸斑

炒菜心

炸乳鴿 (外賣)

沙薑雞腳 (外賣) - 呢期我勁想食沙薑雞腳   

髮菜眉豆淮山瘦肉湯

( 3-APR-2014  THU )

今朝起身見到陽光   感覺好似見到彩虹咁振奮呀   實在好耐無見到陽光喇 ~

里奧大人今朝要見客   所以又陪我食早餐呢   開心開心 ~

菇場忙啦   好在抖下又忙下   忙下又抖下咁囉 ~

Lunch 食吞拿魚燒餅   係今朝喺聖安娜買㗎   因為驚晏晝落雨   估唔到晏晝又灰灰暗暗 ~

好喇   忙下停下又收工   今晚番媽咪屋企食飯   實在太好喇 ~

家姐今晚快咗   所以 6 點 45 分番到屋企 lu ~

食下傾下又打下機   食埋生果都已經 8 點   家姐要番屋企揸車去糟糟度   所以坐多陣就走喇 ~

最搞笑係家姐一出門口就講佢同事啲嘢   頭先喺屋企又唔講   之後講到去車站   咁我其實已經有車   不過都等埋家姐講完先   之後到佢有車就叫佢走喇   我就自己再等車呢 ~

差唔多番到屋企佢又打嚟講呀講   講呀講   到佢落車就唔講喇   都講咗成半個鐘  ~   

番到屋企即開機洗衫   之後就即沖涼休息喇   里奧大人好慘   9 點半先放工   番到嚟都係食杯麵同橙   佢仲話好慘喎   要自己淥杯麵食   因為我叫佢自己淥嘛   之後我咪話囉   一路食杯麵一路睇電視都唔係慘啦   呵呵 ~

今晚 11 點都瞓喇   潮潮濕濕嘅天氣真係令人特別攰呢 ~

住家飯 @ 媽咪屋企 ( 14-MAR-2014 )

陳皮蒸鮑魚仔

炸乳鴿 (外賣)

叉燒 (外賣) - 因為媽咪唔知家姐會番嚟   所以我同家姐講話媽咪買咗叉燒   仲話食唔哂叫我拎走   家姐好愕然啦   因為佢知我都唔鍾意食叉燒嘅   估唔到媽咪都買喎

烚菜心 / 冬瓜 / 淮山

髮菜眉豆蠔豉瘦肉湯

楊桃 / 台灣柑

( 14-MAR-2014  FRI )

又 Happy Friday 喇   今日里奧大人唔駛上大陸   我仲 Happy   因為唔想佢頻頻樸樸嘛 ~   

唔知係咪真係早瞓關係   發啲夢都開心啲咁   尋晚夢見好靚好靚嘅海底世界   同埋聞到好香嘅食物添呀 ~

早餐食芝腿治烘底   細細個食片裝芝士真係覺得鹹   依家啲芝士真係無味   不過都慶幸食過有鹹味嘅芝士嘅 ~

菇場唔太忙   又可以 Skype   其實我以前打中文字係超級慢   仲要慢慢睇 Keyboard 啲中文碼   依家 Keyboard 無碼都無問題   都記得哂啲咩位置   有時里奧大人問我啲字   我直頭講得出咩碼第幾頁第幾個添呀   佢覺得我好勁   其實因為佢問嗰啲字   我成日打呢   哈哈 ~   

Lunch Time 出去買酸辣米線番菇場食   居然見到陽光   實在太開心喇 ~

我買咗 2 包   $5.5 一包好似好抵咁   咁問家姐要唔要   但我係咁講 Tam Tam   家姐都唔知我講咩   後尾我睇番原來係 Tim Tam   笑爆咀      

打比家姐   佢話姐夫今日 2 點可以出院喇   感恩感恩   同埋佢今晚可以番媽咪屋企食飯呢 ~

放工即走喇   本來家姐同媽咪講話今晚開 OT 唔番嚟食   其實唔想同媽咪講話姐夫入咗院要佢擔心   咁我朝早仲同媽咪講話 6 點半可以開飯   依家唔得啦   起碼要 6 點 45 分   同埋唔講比媽咪知   嚇下佢   哈哈   所以我同媽咪講話好飽   要晏啲先開飯   其實係想等埋家姐一齊開飯呢 ~

媽咪啱啱 "北" 湯比我   咁啱家姐番嚟   好在我一早叫佢細細力開門   最搞笑係媽咪居然好專注 "北" 湯   完全唔知家姐番嚟    我叫家姐拿拿聲坐我個位扮我飲湯   之後媽咪一出嚟   個樣都嚇咗一嚇呀   話點解會係家姐   笑爆咀   本來家姐話想呢入廁所   不過我話唔好啦   一開門黑媽媽見到個人   真係好鬼驚囉 ~

食完飯就食生果   又比我見到楊桃   真係火都嚟   因為食楊桃係最傷腎   媽咪個腎之前唔係咁好   不過依家就無事   但我之前已經叫佢唔好買嚟食  佢都成日買   之後我話是但妳啦   妳鍾意食就食啦   我無咁好氣理妳 ~

之後講完又覺得自己好衰   所以同媽咪講對唔住   不過我真係好擔心媽咪家嘛   但硬係控制唔到情緒   好在媽咪又唔會出聲鬧我   唔係實家嘈屋閉   之後媽咪自己都講   依家會好錫身體    唔敢亂食嘢   因為為咗我哋   話如果無咗我哋   佢就咩都照食   唔理㗎喇   咁我同媽咪講   就算無我哋   都要好好珍惜身體囉 ~

差唔多 8 點半就同家姐走喇   咁我打咗 3 次電話比里奧大人   佢都聽唔到   我心諗真係慘   咁夜仲要開會   點知我一入大堂   管理員同我講話里奧大人番咗嚟無耐   我好愕然話 : "下 ?!   佢番咗嚟喇 ?!"   之後管理員仍都好愕然話 : 下 ?!   妳唔知佢番咗嚟㗎 ?!"   我覺得好搞笑   佢好似講咗啲秘密出嚟咁   同埋佢仲以為我唔會煮飯   晚晚叫外賣喎   可能佢次次見到我夜番   里奧大人又買外賣   比佢錯覺啦 ~

一入屋就話鬼里奧大人啦   唔聽電話   仲見到食剩嘅薯條   佢話想掉喎   不過我話我要食   嘻嘻 ~

估唔到佢仲開埋機洗衫   咁我可以即刻煲中藥呢 ~

沖埋涼就睇 "守業者"   因為想睇下邊個殺死 2 小姐   媽咪頭先話係麥包殺嘅   講到似層層   所以我同家姐都信   我因為唔係成日睇   所以更加信 ~

咁最後知道唔係麥包殺嘅   咁等廣告時間就打比媽咪啦   同佢講話麥包唔係兇手喎   頭先講到似層層   咁啱家姐又打比我   不過我無聽啦   之後同媽咪傾完就再打番比家姐   佢第一句又係話原來麥包唔係兇手   同埋佢話都同媽咪講咗   我話我頭先都同媽咪講咗喎   咁原來佢打比我之前已經打咗比媽咪   咁媽咪收咗線   又收到我電話   我哋之後笑爆咀啦   媽咪真係慘   車輪戰比我哋話   之後里奧大人都覺得好笑   不過加多句我哋好無聊   哈哈 ~

又睇 "心計" 喇   睇開就想睇   今晚 11 點幾先瞓呀   好在聽朝 8 點起身   咁都好啲囉 ~

住家飯 @ 媽咪屋企 ( 7-MAR-2014 )

蒸多寶魚   加埋蝦乾同白飯魚一齊蒸

炸乳鴿 (外賣)

白切雞 (外賣)

炒菠菜

青紅蘿蔔無花果豬筒骨湯 - 今次我叫媽咪問家姐工人點煲呀   終於有正常嘅味道啦   勁開心

大樹菠蘿

( 7-MAR-2014  FRI )

終於 Happy Friday 喇   如果聽日 Off 就好啦 ~

今朝食魚柳包   咁我要大火嘛   點知出嚟嘅係燶嘅   黑色喎   點食呀   之後我聽到佢同師傅啲對話   仲好叫我教佢點大火   唔係呀嘛   咁我話要正常算喇   之後阿姐話呢啲包係唔知咩咩   所以好難大火   咁個師傅係咪一早就應該同我講唔可以大火   咁咪唔駛搞咁多嘢囉   我點知妳點整個包喎 ~

菇場忙咗陣呀   忙到 11 點   好似好快就到 Lunch Time 咁   唔錯唔錯 ~ 

Lunch Time 出去食牛腩河   之後再行陣就番菇場 lu ~   

里奧大人唔駛上大陸   不過我都會番媽咪屋企食飯   同埋月頭最緊要番媽咪屋企食飯添呀   因為要比家用媽咪嘛   唔想成日心掛掛 ~

家姐又係 7 點番到屋企   佢同事去完北歐旅行   比咗啲手信我添呀   勁開心   哈哈   有得食嘛 ~

之前已經想試辣椒朱古力㗎喇   估唔到終於有得試     

喺阿信屋買   $6.9 咋   所以買包比家姐食   

家姐最鍾意食 Panash 嘅丹麥酥   所以間唔中都買比佢   氹佢開心   哈哈

家姐又買番比我   如果住附近就好啦   唔駛拎嚟拎去

依家去媽咪屋企   除咗拎湯走之外   仲會拎埋生果   因為媽咪話啲生果靚就會買埋我同家姐嗰份   所以我次次番到屋企   個膀頭都好痛呢 ~   

差唔多 8 點 15 分就走喇   又比我喺巴士站見到家姐   家姐上次幾勁呀   佢一見我打比佢   佢即刻望住我個方向先聽電話   如果唔係就見唔到我㗎喇   今次就咁啱有人落車   我好開心咁叫家姐家姐   佢先知   人哋唔知以為我黐線   哈哈 ~

番到屋企即開機洗衫   之後就沖涼   里奧大人差唔多 9 點半先番到屋企呀 ~

睇完心計就瞓 lu   呢排天氣凍凍地   差唔多 11 點就會好眼瞓咁呢 ~