金禾田餐廳 @ 官塘 ( 28-FEB-2010 )

( 28-FEB-2010  SUN )

今朝本來番自己教會   點知遲咗少少出門口再加上無車   所以臨時轉番屋企附近教會   咁就唔駛咁趕   同埋有時間食早餐 ~

番完崇拜就去將軍澳同水姑一家飲茶   差唔多 3 點就上去佢屋企   之後再同里奧大人去會所篤波   $40/小時   抵啦   包房喎 ~

5 點走人喇   因為 6 點鐘要到自己教會舉辦嘅元宵節活動   見番自己教會朋友好開心   傾多過食   仲好好彩咁比人抽中上台玩遊戲   第啲好嘢又唔見抽中喎 ~

同里奧大人 8 點半走喇   早啲番屋企休息   因為里奧大人聽日番新工呢 ~

BBQ @ 家姐屋企 ( 27-FEB-2010 )

墨魚丸 / 芝士丸 / 紅腸 / 雞中翼 / 黑椒雞翼 / 椒鹽雞翼 / 薑汁雞翼 / 黑椒牛扒 / 洋蔥豬扒 / 雞腎 / 蒜蓉法包 / 燒咗嘅蒜蓉包 / 蒜蓉金菇 / 紫蕃薯 / 粟米 / 腐竹糖水

( 27-FEB-2010  SAT )

星期六食早餐最舒服最 Relax   因為一路食一路諗住番半日真係好開心呀 ~

菇場無嘢做   真係上網等放工呢 ~

晏晝同里奧大人入元朗同家姐整電腦   所以又去田中開餐   兩個人食兩個餐都好飽   不過盡量會食哂   唔好浪費嘛 ~

雖然好飽   但都要飲杯珍珠奶茶   因為我覺得放假飲珍珠奶茶會感覺特別 Relax 㗎 ~

差唔多 3 點半去到家姐屋企   坐陣就整機 lu   電視播緊 "嚦咕嚦咕新年財"   其實我哋 3 個已經睇過 N 次   如果一個人喺屋企睇就會覺得好悶   但 3 個人睇感覺又唔同   一齊笑下講下好開心呢 ~

6 點半開始燒野食 lu   同埋姐夫一齊燒嘢食   燒下傾下   話咁快就 9 點   同啲大狗玩下   再食埋糖水就走人 lu ~

呢隻叫布拉或者阿拉 - 好大隻呀   不過好乖   我終於夠膽近距離摸佢   不過一定要里奧大人同家姐喺我隔離先得   因為我摸佢   佢咬我就比家姐隻手佢咬   佢撲我呢   我會推里奧大人擋住   哈哈

呢隻叫 BB 或者屎屎 - 呢隻唔敢摸呀   家姐話佢最鍾意撲人   我好驚囉   同埋佢成百磅   推跌我咪慘   呵呵

呢隻叫牧牧 - 我第一次摸大狗就係佢呢   好純呢   一摸就成個身挨埋落嚟㗎   同埋叫佢番入籠就番入籠   好乖呀

呢隻叫豆豆 - 呢隻豆豆活潑到呢   一抱佢就會好似 BB 咁攬住妳咁   超可愛呀

呢隻叫麥包 - 好黐人㗎   呢兩次都坐喺里奧大人附近   好似陪佢做嘢咁   不過就有狂燥症囉   好易掹   又成日咬 B 仔   唔小心踩到佢   佢都走到老遠咬 B 仔   好搞笑
呢隻叫 B 仔 - 唔知係咪紮咗關係   所以好純   好似乸型咁   呵呵

和民居食屋 @ 大埔 ( 26-FEB-2010 )

( 26-FEB-2010  FRI )

今日係我生日   加上係 Happy Friday   所以更加好開心   雖然天氣一樣係咁濕潮   個人一樣咁攰   但都好開心呢 ~

里奧大人今朝會見工   所以會同我一齊 Lunch   仲比咗一份好大嘅禮物   就係星期一可以番工呢   感謝神當中嘅保守帶領 ~

鹽酥雞擔仔麵 / 台南擔仔麵 / 凍珍珠奶茶

番到菇場無 mood 做嘢 lu   只係好想快啲放工   如果生日有一日假期就好咯 ~ 

同里奧大人又去和民慶祝   因為又係用生日嘅 $100 Cash Coupon 呢 ~

食完同里奧大人行陣   買啲嘢就番屋企 lu ~

其實我生日唔會點特別慶祝   因為我唔會諗   同埋里奧大人實話我鍾意點就點   其實佢無諗   不過唔緊要啦   最緊要大家開開心心食一餐啫   無禮物唔緊要喎   但後補都無所謂   我做人無乜所謂嘅啫   哈哈 ~

今日係我生日呀 ^^

今日就係我生日

生日利是唔小得

但係一樣無禮物因為平時收到突唔好意思要禮物再係咁貪好核突生日願望好簡單開心健康有 3 餐做人感恩唔好貪無憂無憂笑哈哈知足常樂咁至啱

祝自己生日快樂  身體健康呢

雜丸辛辣麵 + 鮮蝦雲吞福字麵 + 腐乳唐生菜 ( 25-FEB-2010 )

( 25-FEB-2010  THU )

今朝又去另一間食早餐   又係好平   沙爹牛肉麵 + 熱奶茶   只係 $14   份量幾多   但啲牛肉係無牛肉味   超唔掂   不過杯茶都 OK   下次試第啲早餐   希望有驚喜啦 ~

呢排無咁忙都唔錯   因為天氣潮濕   個人超攰   好難集中精神做嘢嘛 ~

Lunch Time 未餓   所以又出行周圍行   之後再買沙律蘑菇腸仔包 + 粉果番菇場食   多豉油辣油嘅粉果真係好好味呢   最難得係啲皮係煙煙韌韌呀 ~

今晚煮麵算喇   最緊要快   因為要睇埋第 2 Part 林海峰   如果唔係趕唔切 9 點前還碟呢 ~

是日懶餐 - 雜丸辛辣麵 + 鮮蝦雲吞福字麵 + 腐乳唐生菜

雜丸辛辣麵 - 之前打邊爐食剩嘅雜丸   加埋辛辣麵真係好正呀 ~ 

鮮蝦雲吞福字麵 - 雲吞 $12/6 粒   今次好似細粒咗喎 ~

腐乳唐生菜 - $5 份咋   相對菜心嚟黎講真係好抵呢   同埋唔駛點浸就最好啦 ~  

住家飯 @ 媽咪屋企 ( 24-FEB-2010 )

蒜蓉指天椒蒸蝦 - 新鮮嘅蝦真係好彈牙   唔知幾時自己可以夠膽整呢
釀尖椒 - 今次啲尖椒唔辣   如果唔係仲正呀

冬菇鮑魚生菜 -  媽咪話當慶祝我生日   所以又開罐鮑魚   其實我麻麻哋鍾意食鮑魚

煎魚 - 唔記得乜魚   總之唔駛自己整嘅魚就最好味

冬瓜瑤柱滾瘦肉湯 - 回南天最好飲冬瓜湯去水呀

( 24-FEB-2010  WED )

呢朝早餐食五香肉丁出前一丁 & 凍珍珠奶茶   $15 咋   真係好平呀   不過杯茶就麻麻哋   無茶味   但啲珍珠就好甜好煙韌囉   但朝早最緊要杯茶   都係鍾意濃啲   感覺上精神啲嘛 ~

依家菇場地方大咗   空間多咗   個人真係開心好多   舒服好多   最正係我唔再坐喺 8 卦隔離   因為佢成日裝到我寫 Blog 同 Load 相   佢會問我啲相係咪乜乜物物   就算佢明明睇到我 Load 一大塊火腿   我都話唔係   咁你就識做啦   擺明唔想答你   自此之後無再問   不過佢一樣咁 8 會裝我做啲乜   依家佢坐喺我斜對面   佢再無機會裝我做啲乜   所以我好鬼開心   因為我真係好憎人咁 8   仲係男仔添   所以更加討厭   但同佢又好傾喎   只要唔好牽涉到好私人嘅問題   我就乜都可以傾   話哂始終仲未到交心嘅階段呢 ~  

晏晝無 Lunch Box   又未餓   所以行陣先買嘢食   想係炒米粉又無喎  超級失望    最後買咗腸粉同粉果  要多豉油多辣醬    食嘅時候好好味   但食完隔一個鐘就 Feel 到好滯囉 ~

今晚去媽咪屋企食飯   順便預祝媽咪同自己生日   所以去大班買咗個迷你栗子蓉蛋糕   無計啦   菇場附近得大班   我又唔想轉車又轉車喎   求其算喇   反正媽咪鍾意食栗子蓉呢 ~

之前 Reserve 咗 "林海峰是但嗡 x 我願意"   所以今晚有得睇   但睇咗 1 Part 咋   因為睇完已經 11 點   好眼瞓要瞓覺呀 ~

大家樂 @ 大埔 + 花膠烏絲雞燉湯 ( 23-FEB-2010 )

爵士牛扒 (黑椒汁) / 炸蕃薯條 / 薯蓉焗田螺 / 穀飼肥牛雜錦鍋 x 2 / 泡菜湯底 & 豬骨湯底 / 特飲 x 2

( 23-FEB-2010  TUE )

回南天快啲過啦   個人成日好攰咁   無厘精神   啲衫又成日唔乾又煩   真係做乜都好唔得心應手咁呢 ~

今朝食芝腿飛碟 + 奶茶   $13 咋   抵到爆   平過下午茶呀 ~

太攰呀   幾經辛苦先做哂啲嘢呀   人攰真係無原動力做嘢呀 ~ 

晏晝又食 Lunch Box   唔駛落街有得食真係好方便   不過最唔鍾意都係又要洗碗囉 ~

夜晚同埋里奧大人嘅最細兒甥仔一齊去大家樂開餐   呢個兒甥仔好乖   將所有制是錢比哂媽咪   仲話比利是錢佢   佢會亂駛同買嘢食   所以都係比哂媽咪   我真係好感動呀   咁乖嘅   見佢咁鍾意食嘢就請佢食啦   仲同我慳添   話食 Pizza Hut 貴唔食   去到大家樂又揀啲平嘅嘢食喎   真係好抵錫 ~

唔知係咪太油膩   所以無啦啦又肚屙   辛苦到呢   但里奧大人又特登朝早去超市買竹絲雞   燉湯比我飲   佢一番心意   唔飲唔得啦 ~   

沙薑雞翼 + 西蘭花炒帶子 ( 22-FEB-2010 )

( 22-FEB-2010  MON )

依家知道菇場附近仲有更平嘅餐廳食早餐   不過要行多 2 條街   所以就早 10 分鐘起身   咁就唔駛咁趕   早咗 15 分鐘出門口   點知無啦啦搞肚痛   即刻番屋企   最後反而變咗遲過平時出門口   都係去番菇場樓下食早餐算 lu ~

呢排天氣勁潮濕   已經好攰   仲加埋瞓得唔好   真係好鬼慘呢 ~

菇場雖然忙   個肚又少少痛喎   所以好難集中精神   幾辛苦先做啲嘢呀 ~

Lunch 又係帶飯啦   方便又慳錢   不過我帶嘅係玻璃盒   所以好鬼重   有時真係好想唔帶飯囉 ~  
今晚唔駛買餸   因為尋日已經整好哂買好哂 lu ~

是日懶餐 - 沙薑雞翼 + 西蘭花炒帶子

沙薑雞翼 - 上次醃咗一晚嘅柱侯雞翼超鹹   所以今次都唔咁落咁多沙薑粉   同埋唔落豉油豆粉呢啲基本嘢   點知里奧大人話無乜味   食落又真係無乜味嘅   不過算啦   健康啲 ~

西蘭花炒帶子 - $12/2 個西蘭花   再加埋蔥同韭王一齊炒   好似大碟好多咁呀 ~

之前行年宵   買咗隻公仔   咁 $100 應該唔係正貨啦   但我呢期又好鍾意呢隻公仔   所以就買喇   依家晚晚攬住佢瞓   唔知係咪咁所以成晚都好熱咁呢 ~ 

蒜蓉豆豉蝦仁粉絲 + 芥蘭炒臘腸 + 花膠響螺肉眼竹絲雞燉湯 ( 21-FEB-2010 )

( 21-FEB-2010  SUN )

今朝同里奧大人食早餐   星期日食早餐就最舒服   唔駛趕   慢慢食   如果日日係咁就真係人都長命啲 ~

假期多數留喺屋企 Hea 或者做家務   我一係唔做   一做就做唔停   同埋好似樣樣都好想做咁   所以呢   真係頭痛到唔知做邊樣   要食粒 Panadol 定定神   諗做啲乜嘢好   最後決定只係抹櫃同拖地   天氣潮濕   拖完要開抽濕機   真係好煩呀 ~

同里奧大人去大埔墟街市食東記豬扒麵   閒閒哋要等半個鐘   不過就可以叫其他檔嘅食物   咁都唔錯   因為我無耐性   有嘢咬下好啲嘅   食完去圖書館借書   話咁快就過咗大半日 lu ~

炸豬扒 - 第一次好鬆軟好好食   今次都好鬆軟   但就好多肥膏囉

粗麵 - 加埋豆辣醬就好食好多呢 
炸雞翼 - 無乜特別 
榨菜幼麵 - 又係無乜特別
即制牛腸 - $13 得兩條咋   我覺得貴呀

是日懶餐 - 蒜蓉豆豉蝦仁粉絲 + 芥蘭炒臘腸 + 花膠響螺肉眼竹絲雞燉湯

蒜蓉豆豉蝦仁粉絲 - 整呢個餸嘅原因係要清哂啲蝦仁   因為將近到期   唔整就要掉喇 ~

芥蘭炒臘腸 - $18 斤芥蘭   唔知啲菜幾時先平番呢 ~

花膠響螺肉眼竹絲雞燉湯 - 又係里奧大人親自燉㗎   唔駛做有得飲真係好嘆 ~ 

呢晚都仲係有啲凍   所以唔出去跑步   留喺屋企玩 Wii 嘅乒乓波   呢部 Wii 係晴晴㗎   佢買咗之後一次都無玩過   所以佢媽咪話比我哋   唔好浪費喎   我哋只係買隻火牛同手制就玩得   發達啦 ~   

住家飯 @ 姑奶屋企 (大埔) ( 20-FEB-2010 )

炸豬肉春卷 x 2 / 茄汁豬扒 x 2 / 蒸魚 x 2 / 雞 x 2 / 薑蔥炒慈菇 x 2 / 瑤柱蛋白豆苗 x 2 / 唐生菜 x 2 / 花膠沙參玉竹瘦肉湯

( 20-FEB-2010  SAT )

今朝菇場附近啲茶餐廳仲未開   所以行遠少少食早餐   估唔到相隔 3 個街口   價錢平咁多   平均每樣早餐都平 $3   第時都係早少少起身   行遠少少食早餐先 ~

老闆 Off 所以勁 Free   今日係人日   無啦啦有蛋糕食   係美心嘅魔鬼蛋糕   但無脆脆嘅   如果唔係更好食啦   一路食一路上網到放工   爽呀 ~

呢排慣咗晏起身   所以呢幾日早起真係好辛苦   我平時好少瞓晏覺   但我一番到屋企居然話要瞓陣先去食 Tea   不過瞓咗半個鐘真係精神好多呢 ~ 

食咁多次冬蔭功湯河   最好味就係呢次   因為夠辣呀 ~

食完番屋企坐陣就番教會   之後去姑奶屋企食飯   順便慶祝兩位兒甥女生日   食完飯再去會所篤波就番屋企 lu ~

冬菇燜排骨 + 西蘭花 + 勁薑炒飯 ( 19-FEB-2010 )

( 19-FEB-2010  FRI )

今日開始番工 lu   假期就日日瞓到 10 點幾   今朝回復正常 7 點半起身好唔慣呀   又凍喎    不過知道晏晝食完 Lunch 就唔駛番   就有啲原動力起身番工咁囉 ~ 

好多茶餐廳都未開   所以買早餐番菇場食   慢慢嘆都唔錯喎 ~

年年新年菇場都會拜神   今年唔例外   之後就影相   派下利是又開工喇 ~

今日開年飯又係去飲茶   又係食完就可以放工   有得食   有假放   真係好開心呀 ~  

同里奧大人行陣買嘢   再去街市買餸就番屋企瞓陣   再預備久違咗嘅自家煮晚餐咯 ~

是日懶餐 - 冬菇燜排骨 + 西蘭花 + 勁薑炒飯 + 雜果沙律

冬菇燜排骨 - 水姑前一日整比我嘅   就咁蒸番熱就搞掂   其實我麻麻哋鍾意食呢個餸   所以同里奧大人講下次叫水姑唔駛再比我哋喇 ~

西蘭花 - $12/2 個算抵啦   因為菜心要 $20 斤   超貴啦   我同事話仲係唔甜嗰隻喎   所以我會買平菜   邊樣平買邊樣 ~  

勁薑炒飯 - 天氣勁凍   所以加超勁多嘅薑炒飯   食完成身暖哂呀 ~

雜菜沙律 - 呢排天氣雖然好凍   但都好想食沙律   所以最後都係忍唔住整喇   不過真係越食越凍囉 ~

海港酒家 @ 將軍澳 ( 18-FEB-2010 年初四 )

生扣花膠十年龍躉斑翅 - ($388) - 初初覺得幾貴   同埋個 Waiter 係咁 Hard Sell   又話好大煲夠 4 個人食   但又叫我哋叫多幾個餸   咁即係點   不過最後都叫咗   因為新年啲小菜款式都唔平   但原來都好大煲   材料有花膠 / 龍躉 / 燒肉 / 腐竹 / 白蘿蔔   份量都唔少呢
皇啊瑪鮑魚雞煲 - 味道幾濃   不過對鮑魚同雞都無乜興趣

紅豆沙湯丸 - 紅色起沙   唔甜都幾好   但粒湯丸就唔煙韌喇 

( 18-FEB-2010  THU )

今朝凍到呢   真係唔願起身呀   不過假期又唔想瞓得太晏喎   所以同里奧大人食完早餐再去篤波   12 點前去就平好多嘛   今次又係篤咗 1 個鐘   又係好好玩   不過其實波樓真係幾雜   同埋有人食煙喎   成件褸吸哂啲煙味好難頂呀 ~

今日係最後一日嘅假期   所以同里奧大人出尖沙咀行下   其實無地方想行   不過又唔係太想留喺屋企   好似好嘥咗日假期咁囉 ~

差唔多 2 點幾去到尖沙咀   所以去海防道嘅合利食牛丸河同咖吔多士   最有驚喜係啲辣椒油   好香好辣   好耐無食過咁好味嘅辣椒油 lu ~

出面超勁凍   商場超勁焗   越行越攰咁   仲以為自己賤骨頭   瞓得多反而攰   點知出咗商場   個人即刻醒神哂喎   超勁凍嘅天氣都係唔好行多人嘅商場好啲喇 ~

之後搭地鐵去將軍澳   其實我想坐巴士多啲   因為瞓得舒服啲嘛   不過又唔知坐乜巴士   所以最後都係搭地鐵   唯有喺油麻地上車   咁就實有位坐啦   瞓唔到都有得坐 ~

 越凍越想食雪糕   所以去麥當勞食雪糕新地   今次又係多醬多花生   但今次唔知點解   食完覺得好漏咁噃 ~

食完上水姑屋企喇   同隻貓貓玩下   影下相   水姑應該有購物狂病態   次次都買好多嘢   一鍾意就會買一箱   之前鍾意食麥片   所以一買就廿幾盒    鍾意罐頭 Peach 同豆辦醬   又一次過買一箱   真係多多地方都唔夠位放呀   佢話買完有啲後悔   話我嚟得啱啱好   幫佢清咁啲貨喎 ~

本來諗住去海港打邊爐   點知得晚飯   但兒甥女話想去海港食晚飯    所以最後都係去海港呢 ~  

柱候焗雞翼 + 煎蘿蔔糕 + 煎馬蹄糕 + 蒜蓉多士 ( 17-FEB-2010 )

( 17-FEB-2010  WED )

呢日又天陰陰又好凍   本來想去山頂   最後都係唔去 lu   我唔想凍到病呀 ~   

同里奧大人食完早餐就去銀行   之前有兩個保險箱戶口   但覺得其中一個無用   所以取消   點知另一個間銀行要內部裝修   變相被迫取消   即係兩個保險箱都無哂   所以拎埋哂啲首飾出嚟   之後啲屋契文件又超厚   同埋覺得放喺屋企超唔方便   好彩姑奶佢唔要個保險箱   所以加名轉比我哋   咁我哋又有番保險箱   兜兜轉轉都係用番之前間銀行嘅保險箱   真係唔知好嬲定好笑呀 ~

搞埋哂嘢已經到 Tea Time 喇   其實又未餓   不過唔想周圍走   所以食 Tea 囉 ~

呢日喺屋企 Hea   越坐越凍   忍唔住拎暖爐出嚟喇   開咗暖爐簡直係另一個世界呀 ~

唔想出街食   又有好多糕   所以都係煮飯好啲呢 ~ 

是日懶餐 - 柱候焗雞翼 + 煎蘿蔔糕 + 煎馬蹄糕 + 蒜蓉多士

柱候焗雞翼 - 用埋最後 1/4 樽醃一晚   鹹到呢   依家諗起都有啲驚呢 ~ 

煎蘿蔔糕 - 煎到燶邊   再加甜醬同桂林辣辣醬就最好味 ~ 

煎馬蹄糕 - 隔離屋阿婆比㗎   好好味   同街嗰啲無得比 ~

蒜蓉多士 - 突然間好想食   想食又有得食嘅感覺   真係好到不得了 ~ 

煎蘿蔔糕 + 煙三文魚 (外賣) + 自家製芝麻湯丸 ( 16-FEB-2010 年初三 )

( 16-FEB-2010  TUE 年初三 )

今朝 11 點 15 分先起身   所以無得出街食早餐 lu   同里奧人一齊煮早餐   佢煎午餐肉   佢強調話自己煎得好香好好味   我係做唔到喎   咁我就負責煮米粉呢 ~

之後睇下電視   睇下雜誌又到食 Tea   點解假期時間過得特別快㗎 ~

食完又行陣商場   再去 Jusco 買嘢就番屋企 lu ~

是日懶餐 - 煎蘿蔔糕 + 煙三文魚 (外賣)

煎蘿蔔糕 - 姑奶比嘅美心蘿蔔糕   超難食   食麵粉咁   估唔到美心會有如此差勁嘅蘿蔔糕   里奧大人話鴻星好味啲   不過我無試到呢 ~

煙三文魚 (外賣) - 想清埋樽壽司豉油   所以買煙三文魚番屋企食喇 ~ 

芝麻湯丸 - 今次第一次整呢   加埋勁薑糖水   里奧大人好鍾意食喎   但我都係鍾意食糖不甩多啲   無咁甜嘛 ~  

食完飯就同隔離屋阿婆拜年   阿婆 96 歲喇   但精神好好㗎   朝朝晚晚都做運動   就算坐喺度到會周身郁   血氣渾行嘛   次次見到阿婆咁勤力做運動   真係覺得自己好懶呢   呢幾年阿婆都會比佢姪女婿蒸嘅馬蹄糕比我哋   好好味㗎   煙韌又有馬蹄味   所以依家我好少再喺出面食馬蹄糕呢 ~

開年飯 @ 姑奶屋企 (官塘) ( 15-FEB-2010 年初二 )

炸帶子 x 2 / 茄汁蝦碌 x 2  /蒸魚 x 2 / 西蘭花鮑魚 x 2 / 白切雞 / 豉油雞 / 髮菜蠔豉燜冬菇 / 南乳齋

( 15-FEB-2010  MON )

今朝 10 點要起身 lu   因為去媽咪屋企食開年飯呀   同里奧大人買麥當勞早餐去媽咪屋企食算喇   咁就唔駛咁趕啦 ~ 

12 點幾開始食飯   食下傾下又到 2 點幾 lu   之後同里奧大人去姑奶屋企打牌同食開年飯   年年嘅年初二都係最忙呢 ~

黃芽白鮑片 / 冬菇髮菜燜魚肚 / 鵝掌翼 (外賣) / 豉汁蒸白鱔 / 粟米魚肚羹

食完飯就陪水姑去 APM 買電話   再去 Food Court 滿記食糖水   估唔到 10 點幾都仲係好多人呀   食完番到屋企已經 12 點幾   今日無停過   成個人好似散哂咁呀 ~

苑記粉麵茶餐廳 @ 大埔 ( 14-FEB-2010 年初一 )

( 14-FEB-2010  SUN )

今日係大年初一喇   一如以往都係同里奧大人食完早餐   番屋企梳洗後就會去婆婆屋企食飯 ~  

同埋媽咪 舅父舅母 表妹佢哋一路食飯一路傾偈   真係好開心呢   因為好難得齊人呀 ~

南乳齋 / 白切雞臘腸 / 潤腸 / 臘鴨糖醋排骨 / 生菜鮑片 x 2 / 薑蔥蒸蝦

食完之後就同大食表妹去天水圍探細舅父   去到 4 點幾   所以食埋 Tea 先上去   因為知道一陣要有排先走得呢 ~

呢個父有焦慮症   所以特登去開解下佢   了解下佢   其實只係聽下佢呻   因為屋企人個個都比佢嚇親   呻到煩哂   叫佢睇醫生又唔睇   咁我哋都真係幫唔到啲乜   唯有好言相勸   希望之後佢肯睇醫生啦 ~ 

諗住去元朗食嘢   點知要還碟   所以即番屋企啦   番到已經 9 點   好彩還得切咋 ~

9 點食飯對我嚟講係好夜   所以食粉麵算喇   因為我食得太飽好難瞓得着㗎 ~  

祝大家虎年快樂

今 年 生 肖 係 虎 年

祝 願 大 家 喜 連 連

股 票 投 資 賺 大 錢

無 憂 無 慮 好 笑 臉

 

嘩哈哈哈   祝大家笑口常開   日日都開開心心   虎年快樂喔

泰星泰菜 & B 仔涼粉 @ 元朗 ( 13-FEB-2010 年三十 )

泰式生蝦 / 海南雞飯 / 蒜蓉包 / 無骨鳳爪 / 沙爹串燒 (牛 / 雞 / 豬) / 椰青 / 珍多冰 / B 仔涼粉 / 蒜蓉雞翼尖

( 13-FEB-2010  SAT )

放假喇放假喇   又可以同里奧大人一齊早餐好開心呀 ~

依家突然間好鍾意睇桌球   咁啱屋企附近有桌球室   所以就同里奧大人篤番場波咁啦   真係好好玩   不過如果 12 點前仲平   平一半呀   下次 12 點前去玩先 ~

之後再去附近年宵市場買花   $25/3 束   買咗 6 束   屋企當堂有生氣好多呢 ~

同里奧大人番屋企梳洗後就去銅鑼灣   去到都 3 點鐘   所以去南記醫肚再去維園 ~

落毛毛雨呀   不過比我想像中唔係咁多   總之唔駛限制人流已經好好架喇   其實我同里奧大人都係行喺中間   兩邊睇唔到嘢   不過無啦啦啲人停咗唔行   就知係有正嘢買   我哋就會慢慢移埋去睇   今次用咗 $100 買咗隻公仔   同埋買咗啲慈善揮春   有啲收鑊都唔錯 ~  

之後約家姐喺元朗食壽司   點知收爐唔開喎    所以就周圍行邊搵邊食   後尾去咗街邊檔食泰菜   天氣好清涼   第一次覺得坐街邊食嘢咁舒服呢 ~  話過要食 B 仔涼粉  所以留肚   因為想試埋蒜蓉雞翼尖   如我哋所料   又係飽到反肚先番屋企呀 ~

打邊爐 @ 屋企 ( 12-FEB-2010 )

( 12-FEB-2010  FRI )

里奧大人尋晚開通宵   所以今朝可以一齊喺太興食早餐喇 ~     

無啦啦又忙喎   幾驚做唔切呀   最怕廠收爐   因為樣樣都會變得好 Urgent 呢 ~ 

老闆 11 點半就走人 lu   心諗都應該無得放早   但估唔到放 4 點喎   所以真係超級開心呀 ~ 

晏晝去菇場對面買炒米粉 + 粉果   $10 咋   米粉仲有唔少菜絲   真係好抵   味道又唔錯喎   食完 Lunch   真係無 Mood 做嘢等放工喇 ~ 

今晚凍凍哋咁   所以買嘢番屋企打邊爐   因為今次每樣買少少   所以好方便呢 ~

食完就再大清潔廚房同廁所   清潔完真係好乾淨   人都開心好多呀 ~    

Shakey's Pizza @ APM ( 11-FEB-2010 )

龍蝦忌廉湯 / Caesar Salad / 水牛城雞翼 & 吉列脆蝦 / 維京勇士 - 煙三文魚 / 洋蔥 / 馬檳榔 Capers / 炭燒羊扒 / 鮮茄醬海鮮意大利粉 / 煙三文魚意大利飯 / 雲石芝士餅 / 提子特飲

( 11-FEB-2010  THU )

依家番工真係無以前咁趕   唔怪之得搬咗之後心情好咗咁多啦   應該都有關係呢 ~ 

早餐都係去公司樓下食算喇   不過如果有更好嘅都應該會轉下場   無咁悶嘛 ~

晏晝同 8 卦出去食 Lunch   其實唔知食乜好   所以跟人行   行到盡頭無人行就去果間呢   即係代表嗰間唔好食啦   但我哋唔再搵喇   試咗先算   不過我嘅星洲炒米都唔係太差呢   加埋一個湯或者凍飲都係 $32   唔貴咯   因為大家樂同美心就咁一樣炒粉麵都要接近 $30 嘛   唔計嘢飲喎 ~ 

今晚超開心呀   因為同最愛嘅屋企人食團年飯   地點係 APM 嘅 Shakey's Pizza   因為我有生日月份 7 折 Coupon   感覺抵好多咁呢   同埋今次食物水準唔錯喎   其實我自己又覺得可能同屋企人一齊好開心   所以食乜都好味道呢 ~ 

呢晚里奧大人要幫佢家姐舖頭開通宵   所以佢就走先   媽咪想食冰糖葫蘆   所以就同佢食埋先走   好少 3 母女一齊企喺度食零食   啲感覺好特別   突然覺得好似去番以前做細路仔嘅感覺咁呀 ~

美新名廚茶餐廳 @ 大埔 ( 10-FEB-2010 )

( 10-FEB-2010  WED )

無啦啦感冒   真係好攰   食乜都無味 ~

晏晝食杯麵   點知個杯麵好難食   食咗幾啖就掉咗   雖然好浪費   但真係唔想食到自己反胃囉 ~ 

實在太攰   所以決定出去食   勁想食蒜蓉蝦   點知啲蒜蓉鹹到爆   好失望囉   本來勁想食   依家嚇到唔敢再食喇 ~ 

同里奧大人去百佳辦年貨   估唔到無乜人喎   可能啲人一早買哂 lu ~

 
食完餐飯口渴到爆   番到屋企即刻飲咗一碗湯 + 2 大杯冰凍利賓納   個人先舒服啲咋 ~  

( 7-FEB-2010 ) + ( 8-FEB-2010 ) + ( 9-FEB-2010 )

( 7-FEB-2010  SUN )

呢日同里奧大人食早餐再行陣就番屋企 lu   每月一到   所以只係瞓同食呢 ~

( 8-FEB-2010  MON )

無啦啦作傷風   鼻塞到暈   所以索性請病假休息   瞓足一日好好多呀 ~ 

( 9-FEB-2010  TUE )

呢日番工啦   買咗腿治同熱朱古力番公司食   但好鬼攰呢   最怕食傷風藥   實眼瞓   真係除咗 Lunch Time 好好咁瞓之外   其餘時間都中中下咁   相當辛苦呀 ~

本來想食壽司   諗諗下都係唔好食咁多生冷嘢   所以食酸辣米線   點知小辣一啲都唔辣   得個酸字   呢間米線真係唔想再幫襯喇   次次都令人好失望呢   但其他分店又唔會咁喎 ~

豬軟骨蘿蔔小鍋米線 - 小辣 / 豬腩肉小鍋米線 - 小辣

團年飯 @ 姑奶屋企 ( 大埔) ( 6-FEB-2010 )

咖哩魚蛋 墨魚丸 魷魚 牛柏葉 / 焗金沙骨 / 雜菜鍋 / 黑椒牛仔骨 / 白切雞 + 叉燒 (外賣) / 勁薑炒飯 / 白汁吞拿魚意粉 / 芒果布甸 / 馬豆糕 / 藍梅芝士蛋糕 (外賣)

( 6-FEB-2010  SAT )

呢日 Off 所以瞓到自然醒   好在瞓到 10 點 45 分   仲趕得切食早餐啫 ~

番到屋企之後先再諗去邊喇   天陰陰又想落雨喎   所以唔會去室外   我話去沙田行下   里奧大人話無問題   所以決定去沙田喇 ~

去到沙田新城市廣場嘅時侯   第一時間係好想走   因為好焗呀   度度都好焗   又人多   同里奧大人求其行下   食埋 Tea 再行一田就走 lu   因為焗到有啲鼻塞   個人唔多舒服咁喇 ~

番到屋企睇陣電視就出去姑奶屋企食團年飯   順便同另一個姑奶慶祝生日呀 ~

住家飯 @ 媽咪屋企 ( 5-FEB-2010 )

( 5-FEB-2010  FRI )

早餐又係扒芝腿治   真係好好味呀 ~

午餐又係 Lunch Box   一樣係咁好味 ~

 
晚餐去媽咪屋企食呀   因為里奧大人約咗朋友嘛   最好就係番媽咪屋企食飯啦 ~

芥蘭炒臘腸 ( 4-FEB-2010 )

( 4-FEB-2010  THU )

呢朝去另一間食早餐   環境比較嘈   又要坐膠椅   再加埋見到同老闆好 Frd 嘅同事   仲更加唔會去食喇 ~

今日番到菇場又無咁凍喎   但另一啲部門嘅房就一樣咁凍   其實太凍做嘢真係幾辛苦   手指頭都凍到硬哂   好難打字呢 ~ 

晏晝又 Lunch Box   真係好方便呀 ~

依家放工去巴士站都好快   2-3 分鐘就到   今晚仲連續見到 3 架巴士一齊嚟   見到都唔可以追   因為有警察喺交通燈位都捉人呀   眼白白睇住 3 架巴士走咗   真係想喊呀   因為知道之後會等好耐同埋實超多人   如我所料啦   第 1 架爆哂   我要上第 2 架   上多 3 個人又爆埋 lu ~

是日懶餐 - 芥蘭炒臘腸

芥蘭炒臘腸 - 第一次食芥蘭苗   我覺得好味過芥蘭喎   但唔係成日有得買呢   我今次好好心機整呢個餸   就係將啲臘腸隔水蒸完再切片煎香   食落好似無咁油膩呀   唔錯呢 ~ 

呢晚里奧大人唔開心呀   因為有份工佢好想做   覺得好適合佢   點知最後都落空   但我話唔需要氣餒呢   因為要相信神   依家你要喺呢段時間更加要親近神   倚靠神   學識馴服   等待   我相信神會比我哋最好嘅 ~

但那等候耶和華的   必從新得力   他們必如鷹展翅上騰   他們奔跑卻不困倦   行走卻不疲乏 (以賽亞書 40 : 31) 

金泰泰式美食 @ 大埔 ( 3-FEB-2010 )

( 3-FEB-2010  WED )

今朝早餐又食扒芝腿治   麵包煙煙韌韌   加埋半溶嘅芝士   正到爆呀 ~

自從搬咗之後   好多同事都好早番   包括我在內   因為無嘢行關係   所以早咗番呀 ~

依家我個位 Very Good 啦   對住個窗   精神爽利   同埋坐最入嘛   最怕坐近 Printer 同走廊位   因為實好多人出出入入好嘈囉 ~

又食 Lunch Box 喇   之後再同 8 卦出去行下   見到有大班 蛋撻王 幾間麵包舖   搵食唔係太艱難喎   唔錯唔錯 ~  

忙咗陣又 Hea 下   又放工啦   好開心呀 ~

今日里奧大人去咗圖書館   搞到我心大心細唔想煮   因為圖書館樓下就係熟食中心   好吸引嘛   所以就同里奧大人講   如果我放工佢仲未走就一於食泰國菜   如果走咗就番屋企求其煮咁囉 ~

最後都係食泰國菜   因為我好想食呀   去食之前買啲菜肉餃子孝敬里奧大人先再 Order   依家食飯食剩都唔怕   因為我可以帶飯呢   食完行番屋企   再抖陣去徑步   相當之健康咁呢 ~

之前買咗啲豬肉   覺得有陣味   其實我係好抗拒啲豬肉味   所以無理   之後再整   又聞到陣味   所以都無理   但當雪櫃無哂豬肉仍都有嗰陣味   我開始覺得好嘔心   仲以為自己開始對肉類抗拒   所以聞到呢陣味想嘔呢 ~

之後再 Check 雪櫃又有陣味喎   以為太多嘢   所以即放檸檬   總之一句講哂   廚房一陣味啦 ~

但我好奇怪   我清潔廚房好乾淨家嘛   無理由會咁   之後里奧大人仲諗住聽日大清洗條喉   佢之後又問掛喺櫃門嘅膠袋有無垃圾   我肯定咁話無   因為我唔會將垃圾放喺掛喺度嘅   佢再 Check 啦   終於真相終於大白啦   原來膠袋入面有唔知擺咗幾多日前嘅垃圾呀   里奧大人仲好意思話我話膠袋無垃圾   我話係你自己放㗎   唔好屈我   因為我唔會將啲垃圾掉喺掛住啲膠袋囉   佢即刻唔敢出聲   知道衰嘛 ~

肉醬長通粉 + 白磨菇炒甜豆 ( 2-FEB-2010 )

( 2-FEB-2010  TUE )

尋晚 10 點半瞓覺   所以今朝好精神呀 ~

 
公司樓下有間環境同食物水準都唔錯嘅茶餐廳   不過   最緊要啲人都係斯斯文文   最怕嘈冤巴閉又講粗口   真係食都食得唔開心咁㗎 ~

菇場依家係中央冷氣   所以好鬼凍   我最憎着冷衫   不過依家都要着年冷外套先頂得住啲冷氣呀 ~

晏晝基本上都會帶 Lunch Box   慳錢又健康   又唔駛出街搵食   都唔錯呢 ~ 

今晚好在趕到巴士   所以 6 點 12 分已經番到屋企   好快呀   如果晚晚係咁就好喇 ~

是日晚餐 - 肉醬長通粉 + 白磨菇炒甜豆

肉醬長通粉 - 本來想用芝士焗   不過懶呀   所以就咁整就算 lu   味道一樣咁好味 ~

白磨菇炒甜豆 - 用黑椒調味   又係好香好好味   啲豆又爽脆   正到不得了呀   但里奧大人唔鍾意食豆㗎   所以佢又問我係咪鍾意食豆   我話肉醬意粉無理由配菜心   唐生菜家嘛   係咪先   佢無出聲啦   煮埋仲咁多嘢講   唔想晚晚有住家飯食定啦 ~

呢晚又跑步   其實係徑步   但我就無出汗   所以依家期待夏天   因為勁想出一身汗再沖個熱水涼呀   感覺上好似會好舒服   好好瞓咁呢 ~  

酸梅麵豉蒸排骨 + 菜心 ( 1-FEB-2010 )

( 1-FEB-2010  MON )

今朝超大霧   真係大霧到嚇咗一跳呀 ~ 

老闆話今朝一定要 9 點前番到   因為公司要拜神   雖然我唔拜   不過都要 9 點前番去呢   本來仲有時間喺樓下食早餐   但等咗 10 分鐘先到喎   所以最後都要打包番公司食呢 ~

差唔多 10 點開始拜神   又影下相咁就番位做嘢喇   因為好忙呀 ~

晏晝出去買嘢食   兜兜轉轉都係喺公司樓下間茶餐廳買午餐   買咗碗雜菇肥牛魚湯米線   呢間茶餐廳都好細心   將啲湯分開上   仲有肥牛啲份量都唔少   味道又唔錯   好感恩呢 ~

食完又開始再忙過喇   無哂時間上網 lu ~ 

是日懶餐 - 酸梅麵豉蒸排骨 + 菜心

酸梅麵豉蒸排骨 - 依家開始番工帶 Lunch Box   所以都會以肉同菜為主 ~  

菜心 - 尋晚剩咗啲   再買多 1 斤菜心   食多啲菜健康啲呢 ~