住家飯 @ 媽咪屋企 ( 31-MAR-2010 )

( 31-MAR-2010  WED )

呢排瞓得都唔係咁好   個人好攰咁 ~

早餐都唔想食咁飽   奶醬多算喇 ~

今日有 Lunch Box   估唔到食完又瞓到喎   雖然得 20 分鐘   但都唔錯   瞓醒都精神咗啲呢 ~

呢晚番媽咪屋企食飯   里奧大人因為要拎住部電腦同文件番屋企   所以無去食飯   早啲講嘛   預哂餸家嘛   好在有啲可以留番唔駛整啫   如果唔係又食到反肚㗎喇 ~

蕃茄芝士海鮮焗長通粉 + 蒜蓉包 ( 30-MAR-2010 )

( 30-MAR-2010 TUE )

星期一喇   不過今個星期一好開心   因為今個星期只係番 4 日   之後連放 5 日   咁多假放   點會唔開心喎 ~ 

今日無帶 Lunch Oox   所以陪里奧大人食早餐   唔駛拎個飯盒真係差好遠   左一袋又一袋好煩   我又唔會放個飯盒喺袋喎   我覺得整到個袋好污糟咁   萬一漏汁咪好大鑊   如果用布袋咪一路行一路滴汁   咁就真係好樣衰咯 ~

話咁快又到 Lunch Time   買粉果 & 腸粉番菇場食   我鍾意拉開啲腸粉嚟食   咁就成條都有豉油   好味好多呢 ~

呢晚嘗試放慢腳步去買餸   感覺唔錯喎   其實係因為里奧大人放 7 點   所以唔駛咁趕去買嘢   不過番到屋企就一樣要快手快腳整嘢   因為我想里奧大人一番到屋企就可以開飯呀 ~

是日晚餐 - 蕃茄芝士海鮮焗長通粉 + 蒜蓉包

蕃茄芝士海鮮焗長通粉 - 海鮮只不過係急凍魚柳同蝦   都唔錯吖   加埋 3 個大蕃茄 + 1 個紫洋蔥 + 2 塊芝士 + 1 罐細茄膏 + 半包長通粉   估唔到份量都好多   里奧大人又話熱氣   唔想食咁多焗嘢   我咪話焗唔熱氣囉   佢又唔知講乜   我話下次你煮喇 ~

蒜蓉包 - 好想食呀   所以特登買 4 塊方包   諗住里奧大人會食   點知佢唔食喎   食完飽到我呢 ~   

苑記粉麵茶餐廳 @ 大埔 ( 29-MAR-2010 )

( 29-MAR-2010  MON )

尋晚食咗半個榴槤   夜晚熱到呢   搞到瞓得唔好   無哂精神番工添 ~

本來想食奶醬多   但驚唔飽仲眼瞓   所以食扒芝腿治喇 ~

番到菇場仲慘   靜到無倫   最慘係我左右嘅同事成日中眼瞓   睇見佢我都覺得好攰呀 ~

晏晝又 Lunch Box   唔知點解   晏晝有啲唔舒服   好反胃   好似作傷風咁   本來整好哂啲餸   但最後都出街食   加上里奧大人又傷風   我都覺得自己要休息多啲   唔好比細菌打倒呢 ~

呢晚又要食埋啲蛋糕   依家開始對蛋糕抗拒了 ~

肉絲炒米 + 南瓜紅蘿蔔粟米栗子豬展湯 ( 28-MAR-2010 )

( 28-MAR-2010  SUN )

呢朝 10 點起咗身食早餐 lu   早咗起身啲時間真係好用好多呢 ~

食完番屋企抖陣   里奧大人去跑步   我就去買餸   煲祛濕茶   拖地   難得咁好天氣又洗下 Cushion 同公仔   攪住香噴噴嘅公仔瞓覺   正呀 ~

唔好講笑   對手真係未停過   所以覺得話咁快就食第二餐咁   今次唔食咁飽   因為留肚食蛋糕呀 ~

里奧大人趕住做功課   食完即番屋企 lu   佢有佢忙   我就睇報紙鬆弛一下先   之後就煲湯同燙衫   燙咗個半鐘   攰到呢   我又唔鍾意分開燙   鍾意一氣呵成喎   望下個鐘已經 6 點 15 分   係時候煮飯   時間過得非常之充實呀 ~   

是日懶餐 - 肉絲炒米 + 南瓜紅蘿蔔粟米栗子豬展湯

肉絲炒米 - 本來諗住午餐肉炒米   但突然間醒起啲湯有豬展   唔食就掉   倒不如整肉絲   咁好過浪費嘛 ~

南瓜紅蘿蔔粟米栗子豬展湯 - 好想飲呢個湯   覺得非常之好味呀 ~

今餐又係唔可以太飽呀   因為仲有蛋糕要食呀   我就食埋榴槤   好香榴槤味   食咗幾粒超滿足呀 ~ 

照燒汁野生三文魚扒 + 素鵝扎 + 福字麵 ( 27-MAR-2010 )

( 27-MAR-2010  SAT )

每逢星期六要番工嘅日子   早餐都會食飽啲   如果唔係頂唔到去 Tea 呢 ~ 

番到菇場呢   個個唔係玩 FB 就上網睇報紙   真係好期待每個星期六都 Off   雖然得半日   但咁樣啲時間就好用好多   唔駛樣樣迫住星期日做   他條好多㗎 ~

終於等到放工   同里奧大人去食 Tea   之後買埋生果就要即刻番屋企啦   因為約咗 Cable 整機   之前買咗部 DVD 錄影機   但搞唔掂   錄唔到 Cable 節目   所以搵師傅上嚟睇睇   又要換個盒   好在終於搞掂   又可以錄鍾意嘅節目   真係好鬼開心呀 ~

搞掂就同里奧大人番教會   見仲有半個鐘先開始   所以就食碗豆腐花先喇 ~

是日懶餐 - 照燒汁野生三文魚扒 + 素鵝扎 + 福字麵

照燒汁野生三文魚扒 - Jusco 買㗎   無骨嘅都唔錯   加黑椒去醃   不過唔夠時間解凍   所以唯有整碎嚟炒   再加燒汁兜勻   估唔到好好味喎   又唔腥   正呀 ~

素鵝扎 - 第一次買嚟食   就咁煎香   蘸泰式甜酸醬一齊食又唔錯喎 ~

福字麵 - 未餓無飯癮   所以就煮麵喇 ~

同里奧大人食完飯就去出去散步   番屋企就食喺教會買嘅花生糯米糍   超好味呀   啲皮好煙韌   又唔厚   啲料嘅份量啱啱好   真係好有驚喜   但里奧大人又唔食喎   隔晚又唔好食   我一個人食哂 4 個   但又唔漏喎 ~

雲桂香米線專門店 @ 大埔 ( 26-MAR-2010 )

( 26-MAR-2010  FRI )

終於 Happy Friday 喇   天氣又好喎   有風又有陽光   所以心情都特別好呀   如果日日都咁嘅天氣就好喇 ~

朝早啲時間過得好快   眨下眼又 Lunch Time   今日又 Lunch Box   超方便呀 ~

晏晝啲時間就難過喇   又靜再加上飯氣攻心   好想瞓覺   要拿拿聲沖杯茶醒一醒神呀  
呢晚同家姐喺天后做 Research   7 點 15 分 開始   8 點半就搞掂   家姐聲帶發炎   所以無胃口食嘢   咁我就叫里奧大人食少少嘢先   再陪我食米線喇 ~

冬菇蒸雞翼飯 + 欖菜炒脆肉瓜 + 芫茜皮蛋魚片湯 ( 25-MAR-2010 )

( 25-MAR-2010  THU )

呢朝食早餐要食兩份   因為第一份好唔飽   我比份餐牌老點咗啦   餐牌寫明火腿、餐肉、腸仔   我以為有 3 樣   原來只得 1 樣   咁佢應該 火腿 / 餐肉 / 腸仔嘛   咁我就知係得 1 樣囉   本來想轉另一樣早餐   但睇下份量係點先   點知一睇就知唔夠飽啦   我又唔食蛋黃   加上飲埋熱檸茶   真係覺得無食嘢落肚咁   最後要多份奶油多   咁就啱啱好喇 ~

菇場又好靜呀   靜到有耳鳴   呢啲氣氛真係好鬼眼瞓 ~

今日 Lunch Time 好開心呀   因為里奧大人特登過嚟陪我食完 Lunch 先去見客   人開心真係食乜都好味同零舍飽啲咁㗎 ~

呢晚突然想滾湯   所以又要去街市喇 ~

是日晚餐 - 冬菇蒸雞翼飯 + 欖菜炒脆肉瓜 + 芫茜皮蛋魚片湯

冬菇蒸雞翼飯 - 第一次咁整   扮下煲仔飯   氹下里奧大人開心   佢鍾意食煲仔飯嘛   不過佢番到嚟第一句就話 "又 A 貨"   無飯焦唔算係煲仔飯   下次就咁蒸雞就算   唔駛擺到煲仔飯咁喎 ~

欖菜炒脆肉瓜 - 今次用欖菜兜一兜   因為唔想蒜頭豆豉同 XO 醬   好似好悶咁 ~ 

芫茜皮蛋魚片湯 - 下火清熱湯   間唔中飲下   成日食薯片都唔驚呢 ~

住家飯 @ 媽咪屋企 ( 24-MAR-2010 )

( 24-MAR-2010  WED )

今朝陪里奧大人食早餐   開心到佢飛起呀 ~

依家電咗頭髮   所以都會早少少起身整下個頭   因為我嘅頭髮比較薄   所以特登買個 For 電頭髮嘅風筒   咁樣啲頭髮會鬆啲   睇起上嚟會厚啲   唔錯唔錯 ~

Lunch Time 喇   買包波浪薯條番菇場食   一路等 Lift 一路聞到香噴噴嘅薯條味呀   有人一齊等 Lift 咋   如果唔係實拎條出嚟咬呀 ~

今晚去媽咪屋企食飯   因為媽咪話買咗新鮮雞喎   可惜里奧大人要幫公司拎 Sample   如果唔係可以一齊番媽咪屋企   咁樣我就更開心啦 ~

糖醋魚柳 + 特辣 XO 醬炒脆肉瓜墨魚丸 ( 23-MAR-2010 )

( 23-MAR-2010  TUE )

今朝好精神呀   因為尋晚瞓得好好呢   加上又有時間食早餐   所以心情十分之靚呀 ~

菇場無嘢做   又周圍搵下食譜   諗定一個星期食譜   咁樣就唔駛日日諗咁辛苦呢 ~ 

今日又帶 Lunch Box   食完洗碗   上網睇下報紙   好快就一個鐘   如果有個半鐘 Lunch Time 就最好   但肯定唔會有咁嘅事發生囉 ~ 

一早諗定好煮乜   所以就咁去街市買菜就得 lu   我真係好怕行街市   啲人嘅聲浪簡直係震天呀   真係留多陣都會顛囉   街市有間新開茶餐廳   我喺街市中間聽到有人叫   仲以為有人鬧交或者搶嘢   點知去到原來係間茶餐廳嘅女人   佢間嘢喺正魚檔同菜檔中間   又濕又一陣腥味   應該無乜人願意去食   除非好好食啦   不過見佢無乜生意   應該唔係好囉 ~   

是日晚餐 - 糖醋魚柳 + 特辣 XO 醬炒脆肉瓜墨魚丸

糖醋魚柳 - 第一次整   但唔知點解加咗生粉都無脆嘅感覺   好失望   好在個汁好好味咋 ~    

特辣 XO 醬炒脆肉瓜墨魚丸 - 上次一湯匙聞起上嚟好辣   點知食落唔辣   點知今次兩湯匙就聞起上嚟唔辣   食落就好鬼辣   搞乜鬼 ~ 

呢晚煲咗袪濕茶   希望飲完個人無咁攰   排哂啲濕毒出嚟就好喇   人都輕啲呀 ~   

椒醬肉 + 腐乳唐生菜 ( 22-MAR-2010 )

( 22-MAR-2010  MON )

呢朝我陪里奧大人食早餐   佢必定好開心   哈哈 ~

番到菇場都只不過係 9 點 10 分   比我想像中快   依家唔同喺九龍灣咁多嘢行   所以好多同事都喺 9 點15 分前番到   我都無謂太遲喇 ~

依家想減肥食少啲   所以買咗盒雜錦果麥 + 豆奶   不過撈埋一齊就麻麻哋   我唔鍾意啲腍與唔腍之間嘅口感   所以下次會分開食   脆卜卜先好食嘛 ~

話咁快又放工   依家諗定好兩晚嘅餸   入哂喺手機度要買啲乜嘢   咁就方便好多啦   其實我係記得買乜   但都要 Reminder   咁樣好似穩陣啲   都唔知係好定唔好 ~

番到屋企咋咋淋開機洗衫   再殺入廚房洗洗切切   基本上最快都要一個鐘先可以開飯   不過煮麵就唔駛   所以希望以後一星期其中一餐係食麵或者米粉   咁樣就無咁辛苦喇 ~

是日晚餐 - 椒醬肉 + 腐乳唐生菜

椒醬肉 - 材料有 $5 豬肉碎 + 2 塊豆腐乾 + 3 隻細青椒 + 10 條菜甫 + 炸花生 + 1 湯匙甜麵醬 + 1/3 湯匙辣豆辦醬 + 1/3 湯匙豆豉   因為驚菜甫好鹹   所以將辣豆辦醬同豆豉減份量   不得了啦   正到爆燈   里奧大人今晚扒飯食呀   平時佢一啖一啖食咋   佢仲一路食一路話好惹味   睇得出佢係相當之真心咁樣讚美我   令我好開心呢   辛苦切粒都值得呀 ~

腐乳唐生菜 - 唔記得菜檔阿姐話呢啲係乜乜唐生菜   話好好食   好爽脆   是但啦   乜都好啦   我買唐生菜係最緊要係唔駛洗咁耐   唔駛淥咁耐就得㗎啦 ~

襯里奧大人去跑步   我就拖地   徹徹底底咁拖到乾乾淨淨   攰到呢   之後沖完涼就即做腳按摩同睇電視   爽呀 ~

煙三文魚 (外賣) + 蒿麥冷麵 + 姬松茸螺片湯 + 蘋果沙律 ( 21-MAR-2010 )

( 21-MAR-2010  SUN )

依家多數比自己瞓到自然醒   再食早餐   然後晏晝先番教會   咁樣啲時間無咁趕   舒服好多呢 ~ 

呢朝又係食完買餸就番屋企執陣嘢   沖完涼諗住番教會   點知無啦啦暈一暈咁要抖抖   咁啱里奧大人又記錯時間   咁趕去到都會遲到   最後都無去 lu ~

抖陣無事   所以就煲湯   咁就唔駛成日心掛掛喇   想做乜都得啦 ~   

因為要去 Jusco 買嘢   所以就同里奧大人去大家樂食 Tea   咁樣唔駛行嚟行去呀 ~

唔知點解   覺得今日特別 Relax   所以食完又想行陣     估唔到又可以買到衫    真係無心去買嘢    反而有收穫   咁都唔錯    買完去 jusco 買餸就番屋企 lu ~

是日懶餐 - 煙三文魚 (外賣) + 蒿麥冷麵 + 姬松茸螺片湯 + 蘋果沙律

煙三文魚 (外賣) - 買 Pack 細嘅   情願少食多滋味   好過買 Pack 大嘅格硬食哂囉 ~    

蒿麥冷麵 - 晏晝整定   凍啲好味啲咁呢 ~

姬松茸螺片湯 - 湯包嚟嘅   加 $20 豬展煲兩個鐘搞掂   有湯包真係好方便呀 ~

蘋果沙律 - 呢餐無菜嘛   所以就食沙律喇 ~

沙士亞印度餐廳 @ 大埔 ( 20-MAR-2010 )

薄脆 Papadam - 脆卜卜  不過好鹹

蘸薄脆嘅醬   紅色酸酸辣辣唔錯   綠色唔記得乜味   不過我好驚係印度菜呢啲綠色醬料

什菜咖哩角 Vegatable Samosa - 熱辣辣脆卜卜   裡面係薯仔嚟   食完都幾飽肚

串燒雞件 Chicken Tikka - 好香串燒味喎   不過真係覺得加埋啲沙爹醬就更好啦   無咁乾

香料雞 Chicken Masala - 唔覺特別   啲味應該調校到啱港人口味

薯仔椰菜花 Aloo Gobi - 最怕椰菜花浸哂啲汁   腍上加腍   口感唔好

薄餅 Nan - 就係呢個 Nan   我決定唔會再嚟   因為我覺得食印度餐嘅薄餅好緊要家嘛   呢塊好似食麵粉咁   超難食呀   最後加多支啤酒

( 20-MAR-2010  SAT )

呢日要番工   不過老闆 Off   所以我就可以他他條條食個早餐   再他他條條行番菇場   因為星期六實在好唔想番工呢 ~

家姐之前比咗 Free Ticket   所以同里奧大人一齊出九龍灣睇戲喇   睇 "歲月神偷"   因為無其他戲好睇 ~

同里奧大人去稻香飲茶   好耐無飲茶啦   點知啲 嘢唔好食嘅 ~

煎餃子 - 唔夠熱呀

菠蘿叉燒包 - 美心皇宮好味好多呀
XO 醬炒蘿蔔糕 - 無 XO 醬嘅   加幾粒紅椒青椒碎就當係   搵笨

豆苗蝦餃 - 個皮煙煙韌韌都唔錯

柚子蒸鴨掌 - 個汁鹹咗啲   同埋柚皮係苦 

南瓜果 - 一拻開張底紙就知唔煙韌喇 
楊枝甘露 - 我無食   但無料囉   加加埋埋啲料都唔知有無兩湯匙

蓮子紅豆沙 - 一啲都唔甜   又無紅豆味   如果合埋眼食   真係唔知自己食緊乜

辣椒油 - 係 XO 醬   不過一碟得嗰少少   要咗 4 碟都唔夠   不過費事再叫 lu

里奧大人好細心   我次次食親辣椒油   佢都會幫我隔哂啲油先呢

見仲有時間   所以行陣淘大   見到個袋幾靚   所以里奧大人話買   仲話買多個紫色比我家姐添喎   對我地又幾好喎   買完之後行去搭電梯   有個女人向我邊方向叫靚女靚女   原來叫我呀   依家好多時係唔係都叫靚女   所以我唔會認   因為我唔記得拎番張 Credit Card 呀   唔係佢比番我   我都唔知幾時先知道自己無咗張卡呀 ~

到戲院時心大心細   因為其實食到好飽   但覺得睇戲食爆谷先有睇戲 Feel   所以最後買杯細嘅自己食   正到爆呀 ~

呢套戲非常非常之感人細膩呀   真係喊到我呢   睇完戲媽咪打嚟我仲喊緊呀   一心以為呢套戲係啲開開心心戲   原來係咁感人   最正係啲主角又識做戲   特別係個細路仔   唔作狀   收放自如   話喊就喊   如果個個演員都有咁嘅演技就好喇 ~

睇完戲周圍行   好感恩呀   因為終於買到部 DVD 錄影機   仲送埋貨添   咁就唔駛拎住部機周圍行啦   爽呀 ~

出咗街就唔想番屋企煮飯啦   里奧大人又話想試新嘢   所以走去大埔墟間沙士亞印度餐廳食印度菜   原來呢間嘢係真正印度人開   落單仲要講英文   我覺得喺大埔好少有囉   不過啲食物就麻麻哋啦   差唔多樣樣食剩一半   好失望呀 ~

食完行陣 Jusco 就番屋企 lu   喊完個人好攰呀   要快啲番屋企休息先得呢 ~  

住家飯 @ 媽咪屋企 ( 19-MAR-2010 )

( 19-MAR-2010  FRI )

呢排成日發夢   仲係次次都喺夢中好鬼激氣先慘喎   真係好驚起身個樣老咗幾年呀   成日咁鬼激氣   唉   係時間搵啲嘢發洩喇 ~

真係激開有條路   明明 Hppy Fiday 好開心啦   點知早餐由 8 點 45 分等到 9 點 10 分先有   離鬼哂大譜   整隻飛碟啫   有幾難呀   討鬼厭   我又唔想拎番菇場食喎   因為會唔脆邊嘛   搞我又要拿拿聲趕頭趕命食   人家明明諗住他他條條食家嘛   激氣 ~

今日又係帶飯喇   尋晚食啲燒鴨覺得好羶   但今日又無嘢喎   應該係尋晚唔舒服   食乜都覺得難食定啦 ~

超級期待放工   因為番媽咪屋企食飯   今晚家姐無番   所以無整咁多餸 lu   食完就同里奧大人買 DVD 錄影機   點知又唔啱喎   講起都傷心   之前錄咗好多自己好鍾意嘅 Cable 節目   依家乜都無哂   望住部機真係欲哭無淚呀 ~

燒鴨 (外賣) + 菠菜 + 燕麥炒飯 ( 18-MAR-2010 )

( 18-MAR-2010  THU )

呢朝又好似好大霧咁   真係令人無乜心機呢   雖然我怕熱   但我都意有陽光   人都精神啲㗎   同埋感覺周圍無咁多菌咁呢 ~

幾辛苦先等到 Lunch Time 呀   不過無乜胃口   所以買腸粉算 lu ~

今日有人請食 Tea   係中大獎果位同事   點知要 5 點 25 分先有得食   好在我叫 Blueberry Cheese Cake   好快可以食完   不過食完個肚超唔舒服呀 ~

幾經辛苦先番到屋企附近超市呀   本來諗住買雞柳脆肉瓜整炒飯   不過個肚陰陰痛   都無乜心機整咁多嘢   求其買燒鴨 + 菠菜算喇   好過唔煮   雖然唔係煮啲乜好嘢 ~

是日懶餐 - 燒鴨 (外賣) + 菠菜 + 燕麥炒飯

燒鴨 (外賣) - 平時最唔鍾意里奧大人食燒味飯   所以呢   佢番嚟一見到啲燒鴨就陰陰濕濕笑住話 : 咁同大家樂啲燒味飯有乜分別   唔好煮嘛   出去仲方便   我無話可說啦   唯有笑笑口唔鬼理佢   又佢發噏瘋   其實我好想食燒鴨好耐啦   上次唔靚之嘛   點知一食落口就叫哂救命   好鬼羶呀   點解㗎   我至愛食燒鴨   依家諗起都有啲驚呀 ~

菠菜 - $10/2 Pack   依家覺得菠菜幾好食   好爽口咁呢 ~ 

燕麥炒飯 - 加埋薑粒同魚露一齊炒真係好好味喎 ~

明新焗飯小廚@ 大埔 ( 17-MAR-2010 )

豆卜燜坑腩 - 里奧大人問坑腩係乜   我好認真同佢講話係火腩   係瘦嘅燒肉部位   點知上碟先知原來係牛腩   個人未在狀態都係唔好亂答人嘢呀
豉汁蒸魚 - 落單前問侍應   條魚係瞓低定楝起   佢話係瞓低   所以就 Order 喇   因為上次楝起咗好恐怖呀

(17-MAR-2010  WED )

尋日到今日都無食嘢   不過又唔會話好餓   只係好眼瞓   所以喺公司中到晏畫   一到 Lunch Time 就大昏迷個半鐘   瞓得好   人都精神哂喇 ~ 

放工即番屋企   無啦啦超餓呀   里奧大人又未咁快番嚟   所以買咗隻茶葉蛋   好細隻呀   不過算啦   無咁滯 ~

呢晚同里奧大人出街食   食咗少少已經覺得好飽咁   仲以為個胃唔舒服   番到屋企先記得原來之前食咗隻茶葉蛋   唔怪之得好似好快飽咁啦 ~

元氣壽司 @ 大埔 ( 15-MAR-2010 ) + ( 16-MAR-2010 )

( 15-MAR-2010  MON )

星期一 lu   新嘅開始   懷着 Happy Friday 嘅心情番工   感覺真係開心好多呢 ~

Lunch Box 又食番尋晚嘅咖哩魚蛋 +  脆肉瓜   食完個胃又隱隱作痛   屋企其實仲有一盒剩   不過我應該唔食喇   兩次食完都胃痛   好辛苦呢 ~ 

夜晚同里奧大人去元氣壽司   因為我要儲分換 Cash Dollor 呀 ~

(16-MAR-2010  TUE )

每日一到   瞓得又唔好   所以請病假瞓過夠呀 ~   

咖哩薯仔魚蛋 + 炒脆肉瓜 ( 14-MAR-2010 )

( 14-MAR-2010  SUN )

今朝瞓到 10 點 45 分   所以同里奧大人食完早餐就行陣番屋企   坐一陣   又整呢樣嗰樣咁   之後梳洗就番教會 lu ~

晏晝去熟食中心食炸豬扒麵   坐喺隔離枱嘅男人不知所謂   佢傾電話問人係喺邊度   但就係咁講粗口   講 "你 xxxx 喺邊呀   你 xxxx  我食緊嘢呀   你 xx 你嚟唔黎呀   你 xx "   係咁 xxxx   佢仲衰格到講粗口就特別大聲   扮勁咁   無厘家教   失禮死人呀   見到呢啲人   真係覺得佢樣特別衰   食相都特別衰過人咁㗎 ~

食完同里奧大人買餸   之後番屋企喇 ~

是日晚餐 - 咖哩薯仔魚蛋 + 炒脆肉瓜

咖哩薯仔魚蛋 - 今次用咗半樽李錦記咖哩醬   因為就過期   不過試味嘅時候唔覺有辣味   只係得個鹹味   把幾火   所以加 2 隻指天椒   但再比里奧大人試味嘅時候就覺得好辣喇   我本來想加一隻指天椒咋   但上次加 1 隻唔辣   所以今次加 2 隻   點知今次 2 隻都好辣喎    咁加咗 1 碗水沖淡啲   不過最後都係好辣   但我好言安慰里奧大人話咪咁啦   天氣潮濕嘛   食辣咖哩會祛濕   今晚個人會好瞓啲呢 ~ 

炒脆肉瓜- 清清哋炒就算喇   中和番咖哩嘅辣 ~ 

呢次嘅咖哩真係好辣   因為我睇電視嘅時候   個胃無啦啦超級痛   我好怕呢種痛   因為係長命痛   所以即刻食胃藥   食完無耐就無事 lu   所以再可以食我至愛嘅大樹菠蘿喇 ~

公司春茗 ( 13-MAR-2010 )

( 13-MAR-2010  SAT )

呢朝勁想食炒米粉 & 燒賣   所以去咗菇場對面間超懷舊茶餐廳食早餐   不過下次唔會再食呢間炒米粉   唔好食嘅   乾爭爭同埋好硬呀 ~

星期六番工   多數係上網上到放工   咁樣唔知係好定唔好呢 ~  

今晚係公司春茗   不過唔想周圍去   所以同里奧大人食完 Tea   行陣先番屋企抖下好過 ~

呢期好鍾意睇 Supernatural   雖然係電視劇   但啲特技都好勁下   最緊要係一個靚仔   一個身型勁好   真係睇極唔厭呀 ~

5 點 15 分出門口   去到 6 點左右   差唔多 7 點幾開始玩遊戲   之後食飯   再玩個人遊戲    今次我好好彩   非常感恩   因為細老闆抽中咗 3 獎   但佢拎番出嚟比我哋再抽   可以再有 2 位同事 Share 呢個獎金   好感恩我同阿 Head 可以瓜分佢嘅 3 獎   真係好鬼開心呀 ~

食到 11 點就散 lu   好在喺火車站附近   唔駛行好遠   不過都要成 12 點先番到屋企   超攰呀 ~

甜麵醬蒸鯇魚 + 金銀蛋菠菜 ( 12-MAR-2010 )

( 12-MAR-2010  FRI )

終於又到 Happy Friday 喇   但今朝無啦啦肚痛要番屋企   所以遲咗就喺屋企樓下等巴士   等咗好耐已經心知不妙   點知真係無位坐喎   不過唔再等下班車喇   唔想遲大到   企就企啦 ~  

8 點 45 分落車   所以求其喺菇場樓下食早餐算喇 ~

坐坐坐   睇睇睇   等等等   終於等到 Lunch Time   去 7-11買咖哩烏冬   點知咖哩唔辣   烏冬唔煙韌   無哂心機   其實我不嬲都唔鍾意食烏冬   但係九龍灣間 7-11 咖哩烏冬好煙韌   所以先鍾意食咋   點知依家呢間唔好味   搞到我又怕食番烏冬 lu ~

坐到悶悶哋   又攰攰咃   所以食熊仔餅   細細包無咁飽   食下嘢會感覺到啲時間快啲過咁㗎 ~

是日晚餐 - 甜麵醬蒸鯇魚 + 金銀蛋菠菜

甜麵醬蒸鯇魚- 呢嚿鯇魚 $25   係魚佬叫我買   話呢嚿好喎   無乜骨   本來想整梅菜蒸鯇魚    但又唔想再駛多隻鑊   所以用甜麵醬 + 2 隻指天椒嚟蒸   大火蒸咗 10 分鐘   估唔到唔熟喎   同埋唔知點解   明明條魚唔係咁厚   但蒸完成隻 "鐵達尼號" 咁   又要再驚   次次都係咁   暈喇 ~  

    
金銀蛋菠菜 - 見菠菜 $7 斤咁平   所以就買黎食   橫掂好耐無食   加埋皮蛋鹹蛋同埋乾蒜蓉馬拉盞   惹味又無咁寡呀 ~

雲桂香米線專門店 @ 大埔 ( 11-MAR-2010 )

( 11-MAR-2010  THU )

依家里奧大人會早我 20 分鐘起身   所以實會聽到佢鬧鐘響先   呢晚瞓得又唔多好   佢個鬧鐘啲音樂又比較大聲   嚇一嚇   嚇到有啲頭痛   所以醒咗都瞓唔番 lu ~  

唔想行咁遠   所以喺菇場樓下食早餐算喇 ~

番到菇場凍到震   尋日就焗到暈   最怕咁樣呢 ~  

晏晝食 Lunch Box 呀   就咁帶蕃茄肉絲 + 炒粒粒   無飯架   可能太多蕃茄汁   好鬼酸呀   食完有啲胃痛   撞鬼 ~

呢日真係無啦啦好唔舒服   成個人唔知點咁   想煮飯都真係有心無力咯   不過唔煮又好衰咁   所以就同自己講   如果去到超市見到靚嘅燒鴨就煮火鴨絲炆米   但如果唔靚就唔煮   啲燒鴨真係唔靚喎   無乜肉嘅   唔通買 2 Pack 咩   買 2 Pack 要 $5x   咁出去食好過啦   仲唔駛又煮又洗   水費都慳番 ~

最後同里奧大人去食酸辣米線   呢間本來要 Black List 佢㗎   不過今次要中辣都好辣   但里奧大人嘅小辣又無乜味喎   所以第時我會叫中辣   雖然對我嚟講都算辣   但係食酸辣米線唔辣唔過癮呀 ~

 
自從新年買咗啲花喺屋企之後   里奧大人就話間屋多咗好多生氣   生活和諧好多   心情都靚啲   所以依家都定時定候買啲花   今次買咗隻唔知乜花   不過就好香囉 ~   

蕃茄雞絲 + 三色椒脆肉瓜粒粒 + 腐竹糖水 ( 10-MAR-2010 )

( 10-MAR-2010  WED )

今朝里奧大人第一日番另一份新工   所以我又陪佢   喺佢公司附近食早餐   等佢開心啲 ~

天氣非常之乾燥   加上菇場又焗   真係焗到塊臉珠紅卜卜 ~

晏晝要去 Bank   所以出去食 Lunch   又係食中辣嘅冬蔭功米線   咁凍食辣嘢   食完暖笠笠好爽呀 ~

放工去買餸   好似好耐無一個人買餸咁呀 ~

  
是日晚餐 - 蕃茄雞絲 + 三色椒脆肉瓜粒粒 + 腐竹糖水

蕃茄雞絲 - 今次用 4 個蕃茄 + 1 大塊雞扒整   加埋茄汁 + 喼汁 + 蠔油 + 生抽做汁   非常之好味呀 ~

三色椒脆肉瓜粒粒 - 三色椒 $12/份   不過見到隻紅椒好大隻好吸引   所以貴啲都買呢   再加多 4 條細嘅脆肉瓜   夠哂多蔬菜啦   番到屋企放低個袋   之後即入廚房忘我境界係咁切切切   切完之後有啲頭暈兼手痛呀 ~

腐竹糖水 - 天氣太乾燥啦   係時候煲啲糖水潤一潤下喇 ~

好感恩里奧大人間公司嘅 Offer 同同事都唔錯   感恩   感謝神嘅保守帶領 ~ 

打邊爐 @ 大家樂 (大埔) ( 9-MAR-2010 )

( 10-MAR-2010  TUE )

今朝好凍好大風呀   一落車覺得好似打風咁呀 ~ 

早餐又去另一間茶餐廳試下   但杯奶茶仲唔掂   無茶味可言   所以唔會再去 lu   點解搵杯好飲嘅奶茶都無㗎 ~

凍到手指都硬哂   但着褸打字又唔方便喎 ~

晏晝有 Lunch Box   好在我好少係食飽要小睡   唔係胃腩有排減喇 ~

無啦啦咁凍   無理由唔打邊爐啦   本來想去樓下酒樓自助打邊爐   點知有婚宴包場   無得打   又唔想再行去稻香   所以大家樂算喇 ~

次次里奧大人打完邊爐都會食涼粉   諗住去滿記   點知佢哋 Annual Dinner   唔係嘛   咁邪嘅   想去邊到食嘢都摸門釘   好在附近仲有得食涼粉啫   天無絕人之路呀 ~

滷水雞翼 + 特辣 XO 醬炒西蘭花 + 薑粒炒飯 + 燉湯包 ( 8-MAR-2010 )

( 8-MAR-2010  MON )

今朝里奧大人出去幫舖頭做嘢   所以我就陪佢去池記食早餐   我算唔話得啦 ~

菇場忙咗陣就 Hea 到 Lunch Time   呢啲寫字樓生活都唔錯   但有嘢忙都唔錯   時間過得快好多   不過最好就星期一至四有啲嘢做   星期五同六無嘢做都無問題   Holiday Mood 嘛 ~  

食 Lunch Box 都唔錯   唔駛下下諗食乜   不過就一定要有兩樣餸囉   一樣食多啲   另一樣食小啲   咁食 Lunch Box 就無咁悶喇   自己覺得 ~ 

今晚就咁煮菜就得 lu   因為尋晚已經整好個餸呢 ~    

是日懶餐 - 滷水雞翼 + 特辣 XO 醬炒西蘭花 + 薑粒炒飯 + 燉湯包

滷水雞翼 - 因為知道星期一實無 Mood 煮嘢   所以尋晚整定   隔咗一晚   雞翼非常之非常之入味呀 ~

特辣 XO 醬炒西蘭花 - 用咗 1 湯匙 XO 醬   炒嘅時候聞到好辣   食嘅時候又唔係咁覺   下次再落多啲先 ~

薑粒炒飯- 好耐無炒飯   其實炒飯真係好好味   但唔可以成日食   其一好熱氣   其二好肥呀 ~ 

燉湯包 - 里奧大人靜靜雞燉㗎   將個湯包用嚟燉   唔係煲喎   我就未聽過湯包用嚟燉囉   佢仲好有心機加咗半隻竹絲雞同埋 1 個響螺頭   明明係煲到 8 碗湯   依家燉到 3 碗湯   味道相當之濃呢 ~

今日 8 號   零食物語會員有 8 折   所以又買咗啲零食番屋企 lu ~

釀尖椒 + 欖菜肉碎芥蘭粒 ( 7-MAR-2010 )

( 7-MAR-2010  SUN )

今朝瞓到 11 點先醒   所以同里奧大人食早餐   再去街市買餸   買埋雲吞做 Tea   番屋企做一陣家務先番教會喇 ~

崇拜完畢都已經 3 點   朝早特登買咗雲吞   所以就咁煮米線   加多過炸魚皮   咁就搞掂一餐喇   食完又做家務   之前天氣太潮濕   真係無心機做家務 ~

呢日凍番少少   個人無咁攰   就要做番之前無做嗰啲嘢喇   做呀做   眨下眼已經 6 點   又要預備晚餐 lu ~

是日晚餐 - 釀尖椒 + 欖菜肉碎芥蘭粒

釀尖椒 - 見到好大隻尖椒   所以即買   但可惜唔辣   如果唔係就更好 ~

欖菜肉碎芥蘭粒 - 尋晚食完唔錯   所以自己又整下   味道當然無咁惹味啦   但都好好食喎 ~  

黃金海岸 + 陳記潮州菜館 @ 荃灣 ( 6-MAR-2010 )

滷水鵝片 - 切到好薄   好味呀
滷水鵝掌翼 - 好大隻好厚肉   好耐無見過咁大隻嘅鵝掌翼   加上里奧大人唔食   所以我可以獨吞   好滿足呢   鵝片同鵝掌翼嘅底部都係有花生同豆腐呢
欖菜肉碎芥蘭粒 - 呢個菜好惹味   不過就油咗少   估唔到份量都好多喎   我唔知原來欖菜可以炒芥蘭   因為好多都係四季豆   但里奧大人唔鍾意食豆類   所以我見到呢個餸就第一時間同里奧大人講   我會整呢個餸比佢食   佢當堂眼泛淚光好感動呀   哈哈

方魚肉碎蠔仔粥 x 2 - 都幾足料   最鍾意有啲脆卜卜嘅方魚

( 6-MAR-2010  SAT )

今日 Off   當然瞓到自然醒啦   不過都係慣咗瞓到 10 點左右就自然會起身   同里奧大人食早餐就番屋企梳洗出發去屯門黃金海岸 lu ~

好在唔係等好耐先有車   所以啲時間比預期中早咗   不過天色時暗時陽光   呢度好多都係 Piazza   但好鬼熱   無乜心機睇嘢同影相呀 ~

行咗陣就去香辣屋食 Lunch   坐露天位   好在食嘅時候有風   唔係好熱   但食完就開始有太陽喇   同埋食嘅時候唔曬同好好風   感恩 ~

印度咖哩牛腩 / 洋蔥茄椒烤包 / 芝士蒜蓉烤包

同里奧大人走去畫人像畫嘅 Piazza   見到佢畫得都幾似   我哋又比佢畫   $150/雙人卡通   畫咗 45 分鐘   又唔係坐好耐咁喎   當佢比幅畫我哋睇嘅時候   我覺得佢畫得我好似呀   好有福相呀   同埋點解佢會將我身材畫得咁好嘅   哈哈 ~

   
喺 Piazza 見到八哥袋仔   所以買比家姐   佢超級無敵勁鍾意八哥   我自己買咗兩隻戒指同髮夾就收手 lu   黃金海岸實在無乜嘢行   所以決定坐小巴出荃灣行下算 lu ~

去到荃灣行陣 Shopping Mall 就去食飯   勁想食潮州菜   所以去咗呢間陳記潮州菜館   食物份量都唔少   味道唔錯   有機會再去   之後番到屋企附近   里奧大人話想食涼粉   所以陪佢食埋先番屋企喇 ~

住家飯 @ 媽咪屋企 ( 5-MAR-2010 )

豉油王九節蝦 / 炒菜心 / 蕃茄魚 / 粟米紅蘿蔔魚唇豬展湯 / 豬腰芒 / 楊桃

( 5-MAR-2010  FRI )

呢朝豐富咯   食五香肉丁米線 + 腸仔炒蛋 + 凍胚芽珍珠   但都係 $16 咋   不過杯茶真係無味囉   茶精嚟嘅   但又唔想飲咖啡喎   希望再搵到間又平   杯茶又好飲嘅茶餐廳啦 ~

番到菇場又係無乜搞作   Lunch Time 又未餓   所以行陣先買嘢番菇場食呢 ~

今晚去媽咪屋企食飯   不過家姐又唔得閒喎   唔係仲開心   之前媽咪想要揼揼鬆   所以就買比媽咪做生日禮物喇 ~

收到 Blog 友 冰姑 送比我嘅日禮物   好窩心呀   記得我生日之餘   仲記得我鍾意 Chip & Dale 呢 ~

Shakey's Pizza @ 大埔 ( 4-MAR-2010 )

凱撒沙律 - 之前係有啲煙三文魚㗎   同埋份量細咗囉

羅宋湯 - 最不知所謂   得半碗咋   好似唔夠分   要 1 碗分做兩碗咁   同埋都唔知加咗幾多次水   無味   一生人最飲過最難飲嘅湯   非佢莫屬 

辣肉腸芝士 Pizza (薄批) - 最好味呢個 Pizza   次次食都好好味呢 

鮮茄肉腸長通粉 - 份量少咗 1/3 呀   之前食呢個餐   粉類係要打包   依家樣樣都細哂   加上無飲個湯   所以今次食得哂呢個長通粉呢  

巨蜂提子特飲 - 會員免費提升到特飲   當然叫個最貴嗰杯啦

芝士蛋糕 - 食過幾次二人餐   係今次先有咋   定係之前佢哋漏咗比呢   因為呢間嘢好多時唔會問妳要唔要   妳唔出聲就等如唔要㗎喇   好有性格   呢啲服務態度真係好有問題

( 4-MAR-2010 THU )

今朝早餐食炒米粉 + 凍鴛鴦   $14 咋   又係好抵   我好鍾意食粉米粉   加甜豉油同辣椒油   真係食唔停呢   但呢度無甜豉油   所以我就咁加辣椒醬   不過都好好食呢 ~

我 Partner 真係好鬼自私   今日一齊去洗手間   正常明知有人喺妳後面   隔 1 個身位   妳開門之後都會用手 Hold 住一陣門   等埋人入嚟先放手家嘛   佢就咁開就算喎   無啲禮貌   不過我以為我唔鍾意佢先有咁嘅想法   點知咁啱我同同事一齊出洗手間門口   佢都會 Hold 住等埋我先放手啦   我 Partner 真係好唔掂呀 ~

晏晝買冬蔭功豬潤米線 (中辣) $24   我覺得唔平喎   因為無嘢飲   不過味道唔錯   可能辣得滯   食完個胃有啲唔舒服 ~

放工等咗廿分鐘巴士   仲要無得坐   攰到呢   都係同里奧大人出去食算喇 ~ 

因為仲有 Shakey's Pizza 嘅 Cash Coupon   所以就去食啦   唔係間嘢執咗就無得食㗎喇   我唔係咒佢哋㗎   我哋去到得一張枱有人   佢哋走咗就再有一枱有人坐   我哋走嘅時候得兩枱人咋   包括埋我喎    之後行一陣   差唔多 8 點 15 分   經過見到得 7 張枱咋   其中一張係我走嘅時候仲坐喺度   大佬   食飯黃金時間得 7 枱人食喎   其他爆哂   仲唔等執咩   服務又唔係好喎  自己有自己世界咁   點得㗎 ~  

沙爹王 @ 官塘 ( 3-MAR-2010 )

避風塘豆腐 - 熱辣辣又好惹味呀
越南蒸豬肉粉卷 - 啲皮煙煙韌韌  好味
蟹肉扒西蘭花 - 份量唔少  有驚喜

蒜蓉牛油雞翼 - 去沙爹王必食啦

香芒鮮蟹肉炒飯 - 啲飯炒到好乾身   又係有驚喜呀
芒果多多 - 仲諗住好甜   點知原來無味嘅

( 3-MAR-2010  WED )

今朝無咁濕喇   不過真係好耐無見太陽伯伯咁囉 ~

早餐食沙爹牛肉出前一丁   無沙爹汁嘅   啲牛肉又韌   同埋丁麵唔係太熟咁   要浸一陣先食得   今次好唔掂呀 ~

番到菇場繼續忙   所以話咁快就 Lunch Time 喇 ~  

里奧大人去完家姐舖頭幫手就過嚟同我食 Lunch   好開心呀   不過呢間食店又係唔掂呢   同埋最唔鍾意係食完之後成件衫都好大陣油煙味呀 ~

4 點就搞掂哂啲嘢   成個人都鬆哂 ~   

CC 今晚請我食生日飯   我提議去沙爹王   因為果度都幾多選擇   又唔太貴   份量又 OK   由 6 點 30 分坐到 10 點   一路食一路傾   呢餐飯真係食得好開心呢 ~ 

御泰坊 @ APM ( 2-MAR-2010 )

酸辣扎肉雞爪子 - 配料多過鳳爪
釀豆卜 - 無特別   勝在熱辣辣

香蔥蒜蓉包 - 脆卜卜   牛油又塗滿哂成塊麵包   非常之好食呢

明爐烏頭 - 我對烏頭麻麻哋

軟殼蟹蘋果沙律 - 呢個配搭唔錯呢

馬拉盞炒芥蘭 - 個汁好濃好惹味呀

肉碎冬蔭功炒飯 - 啲飯炒到好乾身   好正
冬蔭功 - 超酸呀  啲蝦又霉   最唔掂呢個呀



( 2-MAR-2010  TUE )

今朝又食芝腿飛碟   熱辣辣脆卜卜真係好好味呀 ~

番到菇場好忙   忙到有啲虛脫同埋好掹呀 ~   

今日 Lunch Box   第時有時間都係夜晚煮兩樣餸好啲   咁樣 Lunch Box 就無咁悶 ~

忙到放工   不過啲時間就過得好快呢 ~

今日媽咪正日生日   所以同埋里奧大人 家姐 姐夫一齊去 APM 食泰國菜   之後再去滿記食甜品   好滿足嘅一日呀 ~

豆豉鯪魚炒油麥菜 + 芝麻湯丸紫蕃薯糖水 ( 1-MAR-2010 )

( 1-MAR-2010 )

里奧大人今日第 1 日番新工   所以我陪佢去佢公司附近食早餐   以前去開嘅兩間餐廳居然執咗   唯有去麥當勞啦 ~

番到菇場好忙   不過反而精神   有嘢做真係唔錯   但唔好太多就最好   做下抖下咁樣先開心嘛 ~

唔知點解逢星期一唔多想講嘢   又特別攰喎   所以都唔同 8 卦出去食 Lunch   喺菇場食即食河粉算喇 ~

放工就咁買菜就得   屋企有罐頭真係好方便呢 ~

是日懶餐 - 豆豉鯪魚炒油麥菜 + 芝麻湯丸紫蕃薯糖水

豆豉鯪魚炒油麥菜 - 想整好耐啦   之前啲菜太貴   所以唔整   依家油麥菜回落 $6/斤   所以買嚟整喇 ~

芝麻湯丸紫蕃薯糖水 - 又係勁想食好耐啦   所以一定要整   啲芝麻湯丸等里奧大人番屋企期間搓嘅   不過衰心急   搓到個樣好衰   係扁嘅   唔係圓嘅   同埋厚粉咗少少   食完好滯囉   真係要再隔一排先會想食咯 ~

食飯期間   里奧大人話唔番今日呢份工 lu   因為有一份請佢   好奇妙呀   因為我向神祈禱   如果今日呢份工唔適合里奧大人嘅話   求神保守會有另一間公司打比里奧大人   點知 3 點幾里奧大人接到另一間公司打嚟請佢呢   但當時仲諗緊繼續番到放工為止   定即刻話唔做好添   好感恩呀   感謝神垂聽我急切嘅禱告   感恩感恩 ~

今晚咁開心   所以順便拆利是   今年係結婚以嚟最豐收一年   因為家姐同里奧大人家姐都無啦啦加碼   好感動呀 ~