灣仔鮮蝦水餃 + 辛辣麵 + 油麥菜 ( 31-AUG-2010 )

( 31-AUG-2010  TUE )

呢朝又係超焗熱   依家搭地鐵番工   車程超快   但最怕上上落落   同埋番菇場嘅出口係無瓦遮頭   真係好鬼熱囉 ~

今朝食炒米粉   好似好耐無食   同埋好似大碟咗好多咁呀 ~

唔知點解今朝啲 時間過得好快   好快就到 Lunch Time 咁   同 8 卦去菇場附近茶餐廳食   估唔到呢間茶記都好多選擇呢   又多個地方落腳 lu ~

太耐無食飯   飯氣攻心   好在都頂得住   唔係望住啲時間一秒一秒咁過真係好痛苦呢 ~

差唔多成兩個星期都出街食   唔駛煮係好   但出面啲味精真係好勁   次次食完都要飲超多水   大佬   夜晚要去廁所好煩呀   所以呢晚要自家煮啲簡單嘢喇   本來諗住去街市買餸   但實在太焗熱喇   反正只買菜   所以去百佳買算喇 ~ 

是日懶餐 - 灣仔鮮蝦水餃 + 辛辣麵 + 油麥菜

灣仔鮮蝦水餃 - 我都係鍾意食韭菜豬肉餃多啲   但之前無得買   所以買呢個頂檔呢 ~

辛辣麵 - 好耐無食辛辣麵   超正呀 ~  

油麥菜 - 我覺得食湯麵係配油麥菜同埋生菜係最正囉   又爽脆   索哂啲湯仲好鬼正添㗎 ~   

別府 @ 九龍灣 ( 30-AUG-2010 )

什錦魚生飯 / 鬼山地獄拉麵 (小辣) / 炒野菜 (內有金菇 / 冬菇絲) / 麵豉湯

( 30-AUG-2010  MON )

星期一喇   唔經唔覺喺新屋都住咗一個星期   好感恩呀   好習慣呢   我真係估唔到第一晚已經好習慣囉   因為里奧大人成日話我適應能力低㗎 ~ 

不過之前我去媽咪屋企度瞓   或者去里奧大人家姐屋企瞓   真係瞓得唔好囉   可能始終唔係自己屋企啦 ~

今朝同里奧大人一齊食早餐   不過真係好鬼熱囉   等遲啲無咁熱再同佢食早餐   因為我好怕沖完涼又立黐黐番工呢 ~

喺菇場做咗少少嘢就 Hea 到 Lunch Time 喇   本來想買炒米粉   但又無喎   所以食腸粉 + 燒賣   都唔好食嘅 ~

放工就番屋企等里奧大人   之後就去別府開餐   估唔到仲有 9 折   感覺好似無啦啦有優惠咁   好開心呢 ~ 

番到屋企都唔想再執嘢住   就咁洗衫就算喇   聽晚再努力過   仲有 5 箱就執哂間屋   算勁架喇 ~  

活力餐廳 @ 九龍灣 ( 29-AUG-2010 )

西芹腰果雞柳 / 豉汁蒸黃花魚 / 蠔油生菜

( 29-AUG-2010  SUN )

今朝同里奧大人瞓到 10 點就自然醒 lu   之後食完早餐就番教會   番自己教會真係開心好多呢 ~ 

沙爹牛肉麵 / 西煎雙蛋 / 火腿絲鮑片通粉 / 餐肉煎蛋 + 方包

散會之後同教友傾陣偈又要去買嘢咯   呢日熱到爆   我都忍唔住要去許留山買番杯嘢飲   一路行一路飲爽好多呢 ~

巨峰提子蘆薈爽 / 西柚蘆薈爽

番到屋企 Hea 到下午茶   食飽先有力執嘢嘛 ~

燒鴨湯瀨 / 咖哩三寶 (魚蛋 / 豬皮 / 蘿白) - 免費的 / 叉燒湯瀨 / 奶醬厚多

同里奧大人拎嘢去舖頭   之後行陣德福   就去食晚飯 lu ~

好想食魚呀   所以去呢間茶餐廳食   因為之前食過佢哋嘅家庭小菜都唔錯呢 ~ 

富記車仔麵 + 金滿堂甜品 @ 九龍灣 ( 28-AUG-2010 )

咖哩螺肉 + 豬皮 + 蘿白米粉 / 咖哩螺肉 + 酸齋 + 魚卷 + 蘿蔔幼麵

生磨芝麻糊 @ 金滿堂

( 28-AUG-2010  SAT )

難得同媽咪住得咁近   所以今朝早啲起身   同埋媽咪 家姐 姐夫 工人一齊去鴻星飲茶   好開心呀   不過掛住傾偈   都無乜點食嘢   有好多嘢都要打包拎走呢 ~

炸雲吞 / 潮州粉果 / 叉燒腸 / 煎蘿蔔糕 / 炒米粉 / 叉燒包 / 帆船餃子 / 牛肉飯 x 3

番到菇場又係無嘢做   上網渡日   簡直覺得自己好似去咗網吧咁   都唔錯 ~

今日舊屋要驗樓   所以里奧大人就番去清潔同等人驗樓   我就番屋企繼續努力執嘢   Lunch 去麥當勞食啦   因為家姐鍾意兒童套餐隻公仔呢 ~

食飽有力啦   終於執好哂個廚房   經過呢次搬屋   我真係唔會再買咁多嘢囉   一個廚房有 7 大箱嘢   真係執到頭都暈呀 ~

同里奧大人都攰到無乜胃口   食車仔麵算喇   最緊要濕濕哋   之後食埋糖水就去買埋濾水器   希望快啲執完哂嘢可以煮到飯啦 ~       

大快活 @ 九龍灣 ( 27-AUG-2010 )

咖哩牛腩配意粉 / 焗豬扒飯

( 27-AUG-2010  FRI )

又到星期五喇   啲時間過得好快咁呀 ~

終於有胃口食早餐喇   食完個人真係精神好多呢 ~

番到菇場仲係忙到震   一係就咩都唔駛忙   一忙就公私兩忙   做到人都顛呀 ~ 

Lunch 食聖安娜嘅毛巾蛋糕   都唔好食嘅   食咗半條即想反胃   同埋啲 Cream 好難食呀   好 "鞋" 口   最後忍痛掉埋剩低嗰啲   同埋未食果件都掉埋添呀 ~ 

放工番屋企執下嘢就同里奧大人去食飯   本來想去食以前食開嘅茶餐廳   但里奧大人話好似執咗   無心機呀   求其去大快活食算喇 ~ 

海皇粥店 @ 九龍灣 ( 24-AUG-2010 ) + ( 25-AUG-2010 ) + ( 26-AUG-2010 )

( 24-AUG-2010  TUE )

今朝喺屋企樓下大家樂食埋早餐先番工   唔駛坐長途巴士嘅感到真好呢 ~ 

番到菇場超超超忙呀   一望個鐘已經係 12 點   不過呢排都唔會帶 Lunch Box 喇   個廚房仲未執掂   希望可以快啲搞掂啦 ~   

無乜胃口   所以清埋包麥片算喇 ~ 

放工即番屋企喇   之後同里奧大人去海皇食粥   再行陣傢私舖就番屋企執嘢 lu ~ 

( 25-AUG-2010  WED )

原來每月一到   個人超攰呀   雖然個肚都痛   但唔係劇痛   都頂得住嘅   同埋唔想番咗一日又請病假呀 ~ 

放工打的番屋企   依家咁近   真係打的都唔心痛呀   番到屋企即刻沖熱水涼   超舒服呀   次次番到 ~

屋企個肚都唔會痛   仲有啲胃口食嘢   唔錯喇 ~  

( 26-AUG-2010  THU )

呢朝瞓晏啲   又係打的番菇場   一早起身無事喎   但番到菇場個肚就有啲痛囉   Lunch Time  叫 8 卦幫我買碗例湯   點知飲完個胃超唔舒服 ~

今晚有啲胃口   黐咗里奧大人幾啖焗豬扒飯   不過唔知點解啲番茄好甜好假囉 ~   

板長壽司 @ 九龍灣 ( 23-AUG-2010 )

帆立貝壽司 / 金三文魚壽司 / 三文魚醬油漬壽司 / 醋鯖魚壽司 / 紫菜蝦卷 / 軟殼蟹卷 / 芥辣墨魚軍艦 / 蔥粒吞拿魚腩杯飯 / 醬燒三文骨腩

( 23-AUG-2010  MON )

呢日一定要請假啦   唔係搞唔掂呀   所以又早啲起身食早餐再 Un-pack 喇 ~

晏晝里奧大人都請假   一齊食埋 Lunch   之後再去訂傢私就番屋企喇   因為約咗 Cable   搞掂哂又搵人整水箱   成日無停過 ~ 

豬潤酸辣米線 / 羅宋湯螺絲粉 / 炒蛋腸仔多士

個人超攰   又想食飯   但唔想食熱嘅飯   所以就去食壽司喇 ~ 

真係感恩呀   原本 PCCW 約咗 4:00-6:00 pm 嚟   但食飯嘅時候里奧大人話 PCCW 仲未嚟喎   我仲以為佢哋太忙唔記得   我打比 PCCW 人員又打唔通   心諗算啦   聽晚嚟都 OK   咁我番到屋企大堂見到 PCCW 人員   咁我即刻上前問係咪嚟駁線   佢話見屋企無人所以留咗張便條    同埋佢手機無電   所以打唔到比我哋囉   真係感恩   咁就可以搞掂好一樣嘢唔駛煩嘛 ~ 

聽日要番工啦   所以都唔執咁夜 lu ~ 

仿膳飯莊 @ 九龍灣 ( 22-AUG-2010 )

( 22-AUG-2010  SUN )

呢朝同里奧大人食完早餐   咁啱姑奶佢哋又嚟咗   里奧大人又講啲衰格嘢   都費事理去   食完即番屋企再執嘢 ~

執到 12 點幾就同埋姑奶佢哋去飲茶   之後就番屋企等搬運公司電話 lu   今次搬屋總共有 10 件傢俱 + 57 個大箱   估唔到咁多嘢呀   平時真係唔覺屋企原來可以放咁多囉 ~

  

搬運公司差唔多 3 點到   6 個人嚟搬   但 3 點半就已經搞掂   真係好快手   佢哋真係好勁   啲箱好重家嘛   但佢哋好似唔多駛用力就搬到   同埋里奧大人話佢哋搬嘢好似快鏡咁   勁呀 ~

去到新屋又要 Un-pack   真係好攞命囉   不過有啲就原封不動放入櫃就算喇 ~ 

今日係里奧大人生日   所以所有姑奶都出嚟同佢慶祝   實在真係好難得囉   因為同里奧大人一齊咁耐   都未試過特登同佢慶祝㗎   今日無同里奧大人講生日快樂架   因為佢今朝講咗啲難聽嘅說話   好得我憎呢 ~

食完番屋再 Un-pack   原本諗住一兩日會搞掂   但睇黎都唔得囉   搬一搬真係好攰   但我比自己一個星期時間搞掂哂   因為一箱箱嘢好 "阻掟" 囉 ~  

Cheese Chicken @ 大埔 ( 21-AUG-2010 )

( 21-AUG-2010  SAT )

今日都係請咗假   又係早啲起身食早餐   之後又繼續努力 Pack 嘢喇 ~

Pack 到同里奧大人番嚟就一齊食 Tea   一齊 Pack 快好多嘛   唔講以為間屋得我一個人住添 ~

食 Tea 嘅時侯唔太餓   所以食沙律   點知 5 點左右就餓到呢   6 點即走出去食嘢喇 ~  

突然好想食 Pizza   所以就去食喇   再去埋許留山食甜品就番屋企喇   呢晚 Pack 到 12 點先瞓   真係未到搬屋嗰日都好難瞓得好呀   我都算勁喇   自己一個人 Pack 咗 7 成   其餘 3 成係里奧大人啲嘢同埋電器   所以呢兩晚都周身骨痛瞓唔到呢 ~

梅菜扣肉飯 + 蒜泥西生菜 (外賣) ( 20-AUG-2010 )

( 20-AUG-2010  FRI )

今日都係要請假   所以今朝 8 點要起身喇   實在緊張兼有壓力   瞓得都唔耐呢   嘆完份早餐就立即開工喇 ~

埋頭苦幹 Pack 呀 Pack   差唔多 2 點半先食嘢   今日體力勞動較大   所以都好餓下呀 ~

食完又有力再 Pack 喇   我都好勁啦   自己 Pack 咗 7 成都有呀   等埋里奧大人番嚟先停手    無啦啦想食梅菜扣肉飯   不過我唔會食啲肥豬肉   其實最想食應該係甜甜哋嘅梅菜先啱 ~

11 點幾要收工喇   腰酸背痛   都係早啲抖   留番聽日再 Pack 過 ~ 

星悅鮮廚 @ 官塘 ( 19-AUG-2010 )

椒鹽魚雲 / 炸乳鴿 / 椒絲腐乳炒通菜 / 楊洲炒飯

( 19-AUG-2010  THU )

今日請咗假   所以呢朝 9 點起身   執下嘢   熨埋衫就出去拎鎖匙喇 ~ 

拎完鎖匙就同埋媽咪同工人去鴻星飲茶   今日好感恩   因為我諗住自己抹屋   但工人唔駛煮飯   所以分工合作做清潔   感恩 3 個鐘頭就搞掂哂 lu ~   

炸韮菜餃 / 上湯鮮竹卷 / 荔芋鴨腳紮 / 鹹菜胡椒豬肚湯 / 牛肉飯 / 榨菜肉眼根飯 / 流沙奶皇包

今晚里奧大人要喺大陸同客食飯   所以我又同埋媽咪食晚飯喇 ~

依家搬近媽咪好多好多好多   媽咪好開心呢   我都好開心呀   有親人喺附近   感覺真係差好遠呢 ~   

味千拉麵 @ 大埔 ( 18-AUG-2010 )

( 18-AUG-2010  WED )

早餐食豬柳炒蛋公仔麵   不過里奧大人借咗我部相機   所以無影相   好唔慣呀   哈哈 ~ 

依家都無乜私人嘢搞 lu   只係諗下點 Pack 箱   里奧大人成日話叫佢兒甥女嚟幫手 Pack   我話唔駛   因為我連點 Pack 都未知   咁點叫人 Pack 呢   同埋教得嚟我又要 Pack 又要搬   得鬼閒咩   倒不如自己一個人快手快腳好過啦   仲話我唔識用人   我覺得有個人仲阻頭阻掟囉   同埋點會咁細心同妳寫埋喺啲咩呀   咁我之後 Un-pack 咪仲煩 ~

午餐食香草包   估唔到又幾好味喎   其實我都幾鍾意食齋包   熱辣辣嘅鏝頭我就最鍾意   但唔知點解家姐同里奧大人會覺得好出奇囉 ~  

終於放工啦   番到屋企最後一次認真諗點 Pack   唔係 Pack 唔切喇 ~

同里奧大人去食味千拉麵   依家都幾抵   有 1 人餐同 2 人餐   反正我都係食餐入面嘅食物   套餐抵好多呢 ~

大家樂 @ 大埔 ( 17-AUG-2010 )

( 17-AUG-2010  TUE )

星期二喇   呢朝無啦啦超勁想食扒芝腿治   好好味   不過都係好漏呢 ~

番到菇場又忙打電話啦   打比 Cable 最煩   尋日打咗成日都唔通   今朝問佢點解尋日由朝打到晚都唔通   好似比人 Cut 咗線咁長嘟   佢話多人申請睇波喎   我忍唔住冷笑同佢講   係咪咁多人睇波呀   成日喎   成日都打唔通 ?!   有無咁犀利呀   之後佢叫我留電話   叫我等有關部門回覆   之後我再問多次佢個名   佢隔咗陣先答   心諗   問得名都唔方好   因為佢服務態度唔好嘛   驚係應該呢 ~

 
晏晝同 8 卦出去食   順便陪我去埋 Post Office   又搞掂一樣嘢   好開心呀 ~

番到菇場第一時間再打比 Cable   我話今朝留咗電話   不過妳哋今日實唔會覆   所以再打嚟   好啦   比埋新地址佢   佢都可以講錯嘅   仲話我無講邊座添    我發火話   我咪話咗乜座囉    收線之前又再問多次佢叫乜名   佢又係隔一陣先答我   把聲仲有啲驚   做嘢醒啲咪唔駛驚比人投訴囉   雖然我都唔會扳訴妳   不過合約期滿就唔會再睇 Cable 囉 ~ 

今晚真係慘   等咗半個鐘頭先有車   仲要架架都 Full 哂   不過都有位企嘅   但我好攰   同埋好眼瞓   所以想坐囉 ~

里奧大人上咗大陸   又要等到 8 點先食飯   突然好想食牛扒   所以去大家樂喇 ~   

終於嚟哂 50 個紙箱喇   其實都唔知駛唔駛咁多   不過就多好過少囉   唔係一陣執唔切仲煩 ~   

學利魚蛋 @ 大埔 ( 16-AUG-2010 )

古法炸魚蛋河粉 / 炸魚皮 / 水餃粗麵 / 菜心

( 16-AUG-2010  MON )

星期一啦   攰啦   要飲埋咖啡提提神呀 ~

番到菇場就忙搞私人嘢   又要 Book 時間   又要改地址   Contact 阿乜水阿物水咁   頭都暈埋 ~ 

食完 lunch box   再去埋 Post Office 整嘢   熱到呢   真係好想番屋企沖涼呀 ~

放工買咗一大卷 Bubble 紙   抱住嚟坐   好在唔會阻到其他人咋 ~ 

呢個星期主力執嘢    都應該唔會煮飯咯    今晚里奧大人話想去學利    就下佢啦   其實真係麻麻哋好食囉 ~ 

粟米龍脷柳 + 潺菜鹹蛋肉片湯 ( 15-AUG-2010 )

( 15-AUG-2010  SUN )

尋晚睇完 "証人"   都預咗自己會發惡夢   點知仲打孖上   里奧大人仲話我嗌咗兩聲添呀   不過我喺夢中真係嗌咗兩聲㗎   所以瞓得都唔係咁好囉 ~ 

其實 8 點幾醒咗   不過懶床懶到里奧大人起身為止   都差唔多 10 點先起身   梳洗之後就出去食早餐喇 ~ 

食完抖個幾鐘就去跑步   番完屋企沖涼再出去睇傢私同食 Lunch   番到屋企都 4 點 lu ~ 

吉列魚柳雜菜沙律 / 干炒牛肉意粉 / 招牌凍咖啡

抖到 6 點就煮飯   煮埋今晚就收爐喇 ~ 

是日懶餐 - 粟米龍脷柳 + 潺菜鹹蛋肉片湯

粟米龍脷柳 - 特登清埋條龍脷柳   里奧大人叫我唔好再買嘢   我都無買好耐啦 ~  

潺菜鹹蛋肉片湯 - 之前買咗斤幾潺菜食唔哂   所以呢日再煲埋   唔好浪費嘛 ~ 

食完飯又同里奧大人買嘢   諗住去去開嗰間家品店買嘢   點知執咗喎   之前好似仲收緊會員㗎喎   仲要比 $250 添   好記得我問佢哋有無殺蟲水   佢哋話佢哋唔殺生所以無   依家收完入會費就執埋   呃人錢仲衰格啦 ~

依家好似間間舖頭一收會員   無幾耐就執咁嘅   好在我唔係佢會員咋   呢單嘢又令我記得 N 年前好興派報紙上門   點知比咗幾百蚊之後   佢無啦啦執咗喎   呢單嘢上埋報紙㗎   我仲打去警告備案   仲記得第一句就同警察講我比人呃錢呀   之後我喺度笑   個警察又笑埋一份喎   之後我登記完即收線   覺得自己好似黐線   第一句同人講比人呃錢   唔知以為呃妳十萬九千七呀   哈哈 ~ 

Hot Dog Formula @ 九龍灣 ( 14-AUG-2010 )

( 14-AUG-2010  SAT )

呢日要番工   所以早餐又會食飽啲呢 ~

連續上幾個鐘頭網都幾悶   睇到唔知睇乜咯 ~ 

放工即走   食完麥記就去睇樓 lu ~

呢日好焗呀   行嚟行去真係想暈呀   不過好在有心水單位啫   依家有相機實在太好啦   影完相就番屋企比里奧大人過目就可以了   依家邊度都好少租盤   真係一睇啱就要好快決定   唔係就好快比人租㗎喇 ~   

番到屋企即比里奧大人睇相   其實覺得佢好鬼麻煩   一齊睇樓咪仲好   又要我行嚟行去   好在佢都睇啱個單位   所以即打比地產   點知地產話如果有興趣就再過去同業主傾   又要同里奧大人一齊再出去   超級攰呀   同埋好嘥時間囉 ~ 

同業主見完面   睇埋文件就簽約喇   嗰刻真係鬆咗一口氣呢   搬一搬屋真係瘦咗幾磅呀 ~

同里奧大人睇陣傢私就去食嘢 lu   今次試呢間 Hot Dog Forulma   但我覺得唔好味囉   唔好講笑   我整啲肉醬好味過佢多多聲呀   搬好哂屋   加埋有 Mood 嘅話   我實會整嚟食㗎 ~ 

蒜蓉豆豉蒸排骨 + 潺菜鹹蛋肉片湯 ( 13-AUG-2010 )

( 13-AUG-2010  FRI )

Happy Friday 喇   真係好令人振奮嘅一日呢 ~ 

呢朝食吞拿魚蕃茄生菜沙律三文治 + 熱檸檬茶   覺得呢朝嘅早餐好酸呀 ~

番到菇場又係忙喎    好少可咁忙    所以今日出去食 Lunch   順便抖下氣 

食完行埋超市   比我見到個鬼佬   成個史力加咁款呀   個鼻同個口都好大   好恐怖呀 ~ 

太熱啦   出咗成身汗   番到菇場好鬼攰   勁想瞓覺呀 ~ 

今晚又係買完餸再去跑步   跑完就番屋企煮飯喇   趕到呢 ~ 

是日晚餐 - 蒜蓉豆豉蒸排骨 + 潺菜鹹蛋肉片湯

蒜蓉豆豉蒸排骨 - 最緊要方便   去街市買 $5 瘦肉同 $10 排骨蒸就搞掂喇 ~ 

潺菜鹹蛋肉片湯 - 第一次滾呢個湯   媽咪教我炒咗啲菜先滾湯   下次都係就咁滾算喇   唔駛做多個步驟嘛 ~  

煎魚餅 + 芥蘭 ( 12-AUG-2010 )

( 12-AUG-2010  THU )

星期四喇   早餐又食番甜嘢   一日鹹一日甜都唔錯喎   無咁悶咁 ~

菇場又忙到震喎   啲時間過得超快   無哂私人時間添 ~   

晏晝有 Lunch Box   食番尋晚媽咪煮嘅餸   覺得好好味呀 ~

放工買餸   之後番屋企換衫再跑步   唔等里奧大人一齊跑啦   佢太夜放工   食埋飯抖陣都 9 點半   人哋都 Closed lu ~

 
是日懶餐 - 煎魚餅 + 芥蘭

煎魚餅 - 好耐無煎魚餅   唔記得落生粉先煎   只係醃嘅時候落咗少少咋   所以有啲係煎到咁上下先落生粉   不過都無補於事 lu   唔香口嘅 ~ 

芥蘭 - 唔想食菜心同脆肉瓜呀   好彩有芥蘭賣咋   唔係突然間要諗其他菜都幾煩   因為我好怕想買果樣嘢無得買   會無心機同埋唔想諗買乜囉 ~ 

住家飯 @ 媽咪屋企 ( 11-AUG-2010 )

( 11-AUG-2010  WED )

今朝勁想食燒賣粉果   加埋啲辣椒油真係好正   超級滿足呀 ~

估唔到今朝好忙   連上網都唔想住   因為想專心啲快快手做哂啲嘢 ~

有嘢做啲時間過得特別快   眨下眼已經到 Lunch Time 喇 ~

食完又要再忙過 lu   忙到 3 點幾先搞掂   好耐無咁忙   忙完之後感覺好似成身散哂咁呀 ~

呢晚番媽咪屋企食飯   咁啱里奧大人今晚要同客喺大陸食飯   不過佢應該情願早啲番屋企休息好過呢 ~

食完飯坐陣   之後同家姐去買香水   同家姐買嘢最好   因為佢買嘢好快   一啱就買   做佢生意真係唔錯㗎 ~

茄汁洋蔥豬扒 + 特辣 XO 醬炒脆肉瓜 ( 10-AUG-2010 )

( 10-AUG-2010 TUE )

星期二喇   又係好眼瞓咁嘅   依家晚晚 11 點先瞓   因為實在好想睇 "千奇百趣 Summer Fun"   叮噹配音好鬼得意呀   次次睇親到好開心咁   真係瞓都瞓得舒服啲㗎 ~

早餐又食炒蛋   真係好味   不過真係好高膽固醇囉 ~

番到菇場   真係 Hea 到 Lunch Time   食完 Lunch Box 仲瞓咗 20 分鐘   當堂精神哂呀 ~  

呢晚煮飯喇   真係好耐無煮咁喎   番到屋企第一樣嘢就係煲飯   試過有次太耐無煮   煮餸煮到七七八八先記得煲飯   真係餸都凍哂咯   自此之後就記得如果耐無煮飯   乜都唔好理   最緊要煲咗飯先呢 ~ 

是日晚餐 - 茄汁洋蔥豬扒 + 特辣 XO 醬炒脆肉瓜

茄汁洋蔥豬扒 - 好想食茄汁嘅餸   所以就煮喇 ~ 

特辣 XO 醬炒脆肉瓜 - 想清埋樽特辣 XO 醬   但原來仲有大半樽喎   算啦   咁慢慢清算喇 ~    

魚味 @ 將軍澳 ( 9-AUG-2010 )

珍寶三文魚刺身 (3 件) / 鰻魚壽司 / 芥末八爪魚軍艦 / 醋鯖魚壽司 / 帆立貝壽司 / 香瓜卷 / 蟹籽沙律

( 9-AUG-2010  MON )

今朝唔知點解好鬼攰   終於頂唔住要飲咖啡   否則應該好難頂到一日囉 ~

做完少少小嘢   應該無驚無險等食飯同放工喇 ~

晏晝有 Lunch Box   本來想出去行   但又好攰   都係唔想郁囉 ~  

終於等到放工   里奧大人上咗大陸   所以我約家姐陪我去睇樓   睇完樓再去新都城食壽司喇 ~

叉燒炒麵 + 菜心 ( 8-AUG-2010 )

( 8-AUG-2010  SUN )

今朝里奧大人起身之後就出咗去剪髮   我仲瞓緊   點知佢話無得剪   走咗去食早餐   真係吖   咁衰格嘅   唔等我都有 ~

好在咁啱家姐過嚟大埔買嘢喎   家姐打嚟咁啱我又起身   所以約埋一齊去食早餐喇   有人同我食幾好呀   里奧大人就慘啦   自己一個人食   呵呵 ~

同家姐食完早餐   買完嘢就各自歸家 lu   我就順便買埋餸先番屋企 ~   

抖到 3 點半先叫外賣   但唔食咁飽   因為想早啲食飯呀 ~ 

是日懶餐 - 叉燒炒麵 + 菜心

叉燒炒麵 - 里奧大人鍾意食就整啦   雖然佢今日咁衰格   不過整呢個無難度   好過諗食乜餸呀 ~ 

菜心 - 啲菜唔係咁甜噃   不過又唔想食其他菜喎 ~ 

香辣屋 @ 將軍澳 ( 7-AUG-2010 )

春卷 / 香茅雞翼豬扒凍濛 / 大蝦冬蔭功湯河

( 7-AUG-2010  SAT )

終於每月一次嘅 Off 喇   同里奧大人食完早餐   佢就番屋企休息   話感冒未清喎   咁我就同埋家姐一齊去睇樓呢 ~

真係好邪   茄子都係住我搵緊樓嘅屋苑   之前睇樓打比佢又搵唔到   點知當我咃走嘅時候就見到佢 ~

之後同埋家姐上去佢屋企坐   估唔到 2 點幾傾到 5 點   反正里奧大人去姑奶屋企食飯   我咪話奇怪囉   朝早話感冒未清唔睇樓   夜晚就去食飯   不過咁都好   我哋 3 個可以一齊出去新都城食嘢   食到差唔多 6 點幾就走 lu ~

灣仔水餃米粉 + 油麥菜 ( 6-AUG-2010 )

( 6-AUG-2010  FRI )

Happy Friday 喇   聽日又 Off   所以真係好開心囉 ~

呢期無啦啦鍾意食炒蛋   點茄汁好好味   不過唔可以食得太多炒蛋   膽固醇好高呢 ~

整下呢樣整下嗰樣好快就 Lunch Time   諗住食粉米粉   點知兩間食店都無喎   所以就叫個兩餸飯試下   味道都唔錯噃 ~  

放工諗住買生嘅水餃   點知又無喎   所以去超市買灣仔水餃算喇 ~ 

是日懶餐 - 灣仔水餃米粉 + 油麥菜

灣仔水餃米粉 - 里奧大人想食濕濕哋嘅嘢   屋企無哂公仔麵   又唔想特登買 2 包   所以煮超力米粉算喇   順便清倉 ~

油麥菜 - 呢期太鍾意食油麥菜   所以見到有都會買嚟食咁呢 ~ 

車仔麵 (外賣) ( 5-AUG-2010 )

( 5-AUG-2010  THU )

呢朝超眼瞓呀   居然要懶床   仲要響咗三次鬧鐘先捨得起身呢 ~

早餐超想食麵同飲咖啡   食完覺得好開心呀   哈哈 ~

番到菇場有啲嘢做咁啦   不過好快就做完   又係 Hea 到 Lunch Time   朝早咁 Heavy   所以 Lunch 就好立克沖 3 湯匙麥片   食嘅時候就好飽   但之後餓到九彩呢 ~ 

本來話煮飯   但里奧大人話唔想食飯嘛   麻煩到爆   又話想出去食粥   到最後又話食車仔麵   不過佢話買番黎屋企食   咁都好   唔駛我滕嚟滕去 ~  

住家飯 @ 媽咪屋企 ( 4-AUG-2010 )

茄汁蝦 / 蒜蓉菜心炒鮮魷 / 蒸石斑仔 / 五指毛桃姬松茸粟米豬展湯 / 哈蜜瓜

( 4-AUG-2010  WED )

話話話咁快就星期三   真係喎   啲時間過得好快咁嘅   後生嘅時候真係覺得啲時間過得好慢咁   呢 ~

依家真係盡量戒澱粉質   但越戒越想食喎   不過咁   早餐食都唔怕嘅   夜晚唔好食咁多咪得囉 ~

講開又講   尋晚 7 點睇無線唔知乜嘢節目   講到男仔化妝出街   我真係接受唔到囉   出街化妝   日日做 Mask   一星期兩次深層   又依樣又嗰樣   仲多嘢搞過我呀   我覺得乾淨咪得囉   同埋間唔中深層都 OK   我覺得最緊要乾乾淨淨   整整齊齊就得   唔好咁姿整囉   男仔要 Man 啲家嘛 ~  

晏晝食 Lunch Box   好似好耐無食咁   覺得好好味呀 ~

呢排搞搬屋啲嘢都搞到有啲唔開心   所以今晚番屋企食飯傾下偈   親人真係好緊要呢 ~

蒜蓉豆豉蒸排骨 + 油麥菜 ( 3-AUG-2010 )

( 3-AUG-2010  TUE )

今朝真係好好彩   可以有位坐   因為估唔到樓上得一個位囉   平時好少會咁 ~

早餐食到唔知食乜好   試下呢款烚蛋生菜沙律三文治烘底   好有新鮮感呀 ~

搬一搬屋真係好多濕濕碎碎嘢搞   感恩我有時間搞咋   唔係都幾煩   食完 Lunch 又要去銀行搞嘢   街又熱喎   真係有啲虛脫嘅感覺呀 ~

今晚去街市買排骨同菜就搞掂   里奧大人又喺大陸無咁早番   可以熨埋衫先煮飯   時間啱啱好 ~ 

是日懶餐 - 蒜蓉豆豉蒸排骨 + 油麥菜

蒜蓉豆豉蒸排骨 - 好似好耐無整蒜蓉豆豉   加埋指天椒   覺得好好味呀 ~ 

油麥菜 - 我覺得油麥菜爽口過生菜   所以我好鍾意食呢 ~  

雲桂香米線專門店 @ 大埔 ( 2-AUG-2010 )

木耳絲 + 豬腩肉小鍋米線 (中辣)

豬軟骨小鍋米線 (小辣)

唐生菜

( 2-AUG-2010  MON )

話咁快就 8 月咁嘅   人越大覺得啲時間過得特別快咁 ~

 
今朝試下食番扒芝腿治   以前食覺得好味同埋啱啱夠飽   果時仲飲埋奶茶添   但依家覺得轉飲檸茶   都覺得好漏好滯咁囉 ~

番到菇場無耐就寒到呢   手指硬哂   打 Keyboard 超辛苦呀 ~

晏晝 Off   所以同媽咪去鴻星飲茶   好耐無飲茶喇   覺得好開心 ~ 

炸鮮蝦韭菜餃 / 黃沙豬潤腸粉 / 叉燒包 / 鮑汁花生雞腳 / 牛肉飯

3 點就出去廣華醫院拎鐵丸呀   話貧血喎   唔知乜乜指數係 9.1   正常嘅係 11-12   所以驚我暈   要食鐵丸   最憎食鐵丸   因為會便秘囉   同埋始終唔鍾意食西藥   太多副作用喇 ~ 

諗住煮飯   點知 5 點先搞掂   番到屋企都 6 點幾 lu   里奧大人又啱啱喺大陸放工   所以都唔煮喇   等我睇完中醫再去食飯 ~ 

食完飯就去律師樓   之後再去跑步   今日真係好充實呀 ~     

梅菜蒸鯇魚 + 菜心 + 蔥花炒飯 ( 1-AUG-2010 )

( 1-AUG-2010  SUN )

呢朝瞓到 9 點半就醒   今次同里奧大人去椰林閣食早餐   用埋最後 1 張 Cash Coupon   之後應該都唔會再幫襯呢間餐廳 lu ~

食完番屋企 Hea 夠 1 個鐘就去跑步   出一身汗真係好爽呀 ~

跑完步就去買餸   呢日午餐都係自己煮   因為想清哂啲麵同醬料呀 ~

喺屋企啲時間真係過得特別快架   今晚早啲煮飯食   早啲消化無咁肥 ~ 

是日懶餐 - 梅菜蒸鯇魚 + 菜心 + 蔥花炒飯  

梅菜蒸鯇魚 - 今次蒸一啲都唔腥喎   里奧大人仲好主動食好多   真係好開心   因為好少見佢咁積極食魚呢 ~ 

菜心 - 唔落油唔落鹽   就咁淥熟就搞掂   清清甜甜唔錯 ~  

蔥花炒飯 - 用買菜搭嘅蔥嚟整呢個飯   加多隻蛋黎炒   香好多呢   顏色都靚好多添呀 ~