擔擔麵醬蝦仁炒飯 + 節瓜豬橫脷湯 ( 30-SEP-2010 )

( 30-SEP-2010  THU )

番埋今日就連放 3 日   真係超級勁 Happy 呀 ~

今朝清埋包 Special K   唔知係咪 Happy 得滯   覺得唔多飽   所以買咗燒賣番菇場食   早餐唔飽個人好易眼瞓㗎 ~

番到菇場又係忙   不過一定要搞掂哂   唔鍾意拖咁耐呀 ~

晏晝去美心快餐食六寶飯   因為有 Cash Coupon   唔駛錢食飯嘅感覺真係好好呢 ~

里奧大人要開會   又唔知開幾耐喎   所以上媽咪屋企坐陣   飲碗湯   仲可以拎埋比里奧大人    又食埋媽咪自己醃嘅酸薑   真係 Very Good 呀 ~

是日懶餐 - 擔擔醬蝦仁炒飯 + 節瓜豬橫脷湯

擔擔醬蝦仁炒飯 - 因為要清醬呀   但估唔到用擔擔醬炒飯又幾惹味噃   仲有少少醬剩   炒多次飯就會清哂樽醬   唔浪費真係好呢   呵呵 ~

節瓜豬橫脷湯 - 真係好感恩   因為今晚我無諗過煮菜   咁啱媽咪又煲咗節瓜湯   實在太好啦 ~  

節瓜鹹蛋肉粒湯飯 ( 29-SEP-2010 )

( 29-SEP-2010  TUE )

尋晚食壽司飲咗茶   成晚眼光光   碌嚟碌去都瞓唔着   又瞓下醒下   辛苦到呢 ~ 

今朝食芝腿治   滯到呢   肯定晏晝都食唔落呀 ~

番到菇場忙到呢   簡直連洗手間都懶得去呀   係咁做做做   做到 Lunch Time 要停下喇   又未餓   所以出去行下   順便買沙律番菇場食喇 ~ 

忙呀忙   忙到 3 點幾就忙完   之後腰骨痛到呢   痛到標哂眼水呀   可能坐得太耐無乜郁   加埋尋晚瞓得又唔好喎   真係行又痛   坐又痛   企都痛呀 ~

點痛都好啦   都唔可以搵藉口唔煮飯嘅   呢排里奧大人都無餐住家飯食   好可憐咁   所以係咁易求其煮啦   好過出街食嘛 ~ 

是日懶餐 - 節瓜鹹蛋肉粒湯飯

節瓜鹹蛋肉粒湯飯 - 都唔知整過幾多次 lu   不過我覺得次次都整得好好食   哈哈 ~

沖完涼即叫里奧大人幫手按摩下條腰   唔係人都顛呀   雖然我搽咗安美露   但係比佢按完之後真係舒服好多囉 ~

爭鮮迴轉壽司 @ 九龍灣 ( 28-SEP-2010 )

( 28-SEP-2010  TUE )

今日終於有精神番工喇   仲有少少胃口食早餐   算唔錯喇 ~

喺菇場 Hea 住做嘢   無乜力呀 ~

晏晝其實無咩胃口   但唔食又唔得   最後買咗沙爹牛肉米粉番菇場   買咗唔想食   唯有迫自己食啦   唔通掉咩 ~

里奧大人上咗大陸   夜晚都係決定唔煮喇   等埋佢一齊去食壽司   唔知點解每月一到果幾日特別想食壽司   次次都係咁㗎喎 ~

吉野家 @ 九龍灣 ( 25-SEP-2010 ) + ( 26-SEP-2010 ) + ( 27-SEP-2010 )

( 25-SEP-2010  SAT )

呢朝又同埋媽咪 家姐飲茶   真開心 ~

晏晝同里奧大人 姑奶一齊去大快活食 Tea   食完就各自歸家   估唔到我可以瞓到晏覺   咁我真係好攰呢 ~  

都係唔好煮飯喇   所以去吉野家試下牛肉火鍋   我覺得都 OK   不過里奧大人就唔鍾意個芝麻醬   話好漏   同埋話鍾意蕃茄湯底   咁即係下次唔會同我食囉 ~   

( 26-SEP-2010  SUN )

每月一到   好在今日係星期日   可以瞓足成日呀   里奧大人自己三餐搞掂   佢就開心啦   有得食辛辣麵 + 豬肉乾   因為我講過一星期只可以食一次麵   佢見我唔舒服無力話佢   佢就得得戚戚咁   夜晚佢應該食叉燒飯啦   因為我次次一聞到啲叉燒飯就超級無敵勁反胃   搞到我即刻狂搽白花油呀 ~

( 27-SEP-2010  MON )

今朝個肚仲係痛痛哋   所以請病假喺屋企休息   瞓到夜晚先去睇醫生   之後里奧大人番到屋企   佢居然又自已煮辛辣麵   仲懶慘話唔知食咩好添   真係吖 ~ 

梅菜蒸肉餅 + 菠菜 ( 24-SEP-2010 )

( 24-SEP-2010  FRI )

終於 Happy Friday 喇   咁開心   咁當然同里奧大人一齊食早餐慶祝一下先啦 ~

晏晝有 Lunch Box   食完上網都唔錯啦 ~ 

放工去買餸   街市熱到暈   如果所有街市都有冷氣就好喇 ~ 

是日懶餐 - 梅菜蒸肉餅 + 菠菜

梅菜蒸肉餅 - 好耐無整呢個餸喇   真係簡單又好味呀 ~ 

菠菜 - $12/斤都幾貴   不過食下唔同嘅菜就無咁悶囉 ~ 

煎野生三文魚柳 + 煎雜菜餅 + 菜心 + 豬腳薑 ( 23-SEP-2010 )

( 23-SEP-2010  THU )

今日假期   同里奧大人瞓到 10 點就起身 lu   又去 KFC 食早餐   因為里奧大人好少去 KFC   等佢無咁悶 ~  

芝士雞扒包 / 秘制醬汁雞扒包 

食完就去買嘢   之後諗諗下不如一齊剪髮   好在唔駛等咋   剪短頭髮真係無咁熱   超爽呀 ~ 

晏晝自家煮   好過出去食   因為都唔知食乜好 ~

韭菜蝦肉餃米粉 / 韭菜蝦肉餃辛辣麵

難得今日可以做運動   所以抖陣就出發喇 ~

是日懶餐 - 煎野生三文魚柳 + 煎雜菜餅 + 菜心 + 豬腳薑

煎野生三文魚柳- 今次好有心機煎   完整無缺咁上碟 ~

煎雜菜餅 - 唔知煮咩好呀又   所以開冰箱睇有乜就煮乜囉 ~  

菜心 - 今期啲菜心都幾甜   呢包菜心喺百佳買 $ 8.1   佢哋半磅差唔多 $12   其實唔知係咪同街市差唔多嘅呢   如果超市用斤做單位就最好啦   咁就可以同街市比較下嘛   我最怕計數 ~  

豬腳薑 - 媽咪之前煲㗎   我寒底   所以間唔中食都唔怕   唔食啲肥膏就無問題啦 ~  

小草屋 @ 將軍澳中心 ( 22-SEP-2010 )

( 22-SEP-2010  WED )

今日超開心啦   聽日放假喎   唔開心先奇呀 ~

早餐去 KFC 食   因為有 Coupon 只係 $13.8 咋   我覺得一份早餐唔過 $15 都好抵囉 ~ 

無啦啦又好忙   好在無影響到我嘅 Holiday Mood 啫   呵呵 ~

突然好想食公仔麵   所以買沙爹牛肉麵做 Lunch   我覺得好似食緊早餐咁 ~

今日放 4 點   不過要番咗屋企先再出去   因為要幫家姐去超市掃飲品   之後再 Join 里奧大人一齊去將軍澳   同佢屋企人做節呢 ~   

住家飯 @ 媽咪屋企 ( 21-SEP-2010 )

( 21-sep-2010 tue )

仲以為尋晚會 8 號風球   點知 11 點幾話 8 號風球機會唔大   幾咁失望   所以我覺得今日要番工係好似額外番咁呀   哈哈 ~ 

今朝試下另一間茶餐廳嘅早餐   估唔到都幾大份   個餐包要留番做 Lunch ~

忙到 12 點   再上下網就好快食 Lunch 喇 ~

今日唔知點解   覺得啲時間過得好慢   應該係有超強勁 Holiday Mood 所致呀 ~ 

里奧大人上咗大陸   我就番媽咪屋企食飯   再拎湯比里奧大人飲   咁我又可以煲少一晚湯   無咁辛苦喇 ~  

午餐肉 + 薑粒蛋炒飯 + 油麥菜 + 蕃薯糖水 ( 20-SEP-2010 )

( 20-SEP-2010  MON )

星期一喇   係攰啲嘅   通常無乜胃口   今次食奶油多 + 咖啡   今次真係最緊要杯咖啡喇   因為真係要用佢嚟提神   好彩佢都發揮到佢嘅作用呢 ~ 

番到菇場忙到震   好似好快就到 Lunch Time 咁   有 Lunch Box 就最好啦   不過今日食完都想出去行陣   郁下會好啲 ~

晏晝 3 號風球又落大雨   放工我都就咁去百佳買菜算喇   去到好多菜都無哂   勁似 8 號風球咁   乜嘢都比人掃哂   走嘅時候勁樣衰   因為防盜響咗呀   行幾次都響   之後佢哋叫我入房   因為想知我擺咗啲乜嘢喺手袋導致會響   幫我搵個原因出嚟   如果唔係去另一啲有防盜嘅舖頭都會響喎   我哋一路搵嘅時候   我聽到一個類似經理嘅講話   住得遠就要快啲走   因為可能掛 8 號風球   我聽完超開心呀   最後我走嘅時候個防盜都係響   都唔知乜事 ~  

是日懶餐 - 午餐肉 + 薑粒蛋炒飯 + 油麥菜 + 蕃薯糖水

午餐肉 - 呢個午餐肉啱哂打風 Feel 啦   其實我真係諗唔到煮乜   所以有罐頭長駐喺屋企絕對係好事 ~ 

薑粒蛋炒飯 - 今次只係用咗 2 粒蒜頭 + 薑 + 1 隻蛋 + 魚露   但食嘅時候好似食緊椒鹽蝦嘅味道   我覺得好好食   好香口呀 ~ 

油麥菜 - 得番菜心同油麥菜咋   尋晚食咗菜心   所以今晚食油麥菜 ~    

蕃薯糖水 - 之前諗住整甜品比媽咪食   但嗰晚太飽   所以都無整到   今晚想整蕃薯餅   但都係唔想開火煎   所以整蕃薯糖水   今次整得好好味呀 ~

焗叉燒 + 菜心 + 紅豆黑糯米糖水 ( 19-SEP-2010 )

( 19-SEP-2010  SUN )

呢排里奧大人好攰   所以今朝瞓晏咗無番教會呀   食完早餐就去舖頭拎嘢   之後番屋企   今日好焗呀   一啲 風都無   番到屋企又要再沖多次涼先再出街呀 ~

好感恩   里奧大人可以陪我睇中醫   因為之前 Check 咗星期日唔開嘛   但今個月就會開星期日   所以就去睇喇 ~

都係調理身體   雖則我肥斯大隻   但身體又虛又貧血   今次我仲針灸   初初好驚㗎   但其實又唔係好痛   最緊要係對身體好   我咩都會試囉 ~ 

今次係藥粉   咁就最好不過啦   最怕煲藥   又要睇火   又會煲到成間屋一陣味   好煩呢 ~

咁我等藥期間   里奧大人話出去行   佢好少會咁   多數陪我呢   原來佢係去商場附近   睇下有無桂花茶   其實佢對我又真係幾好幾細心嘅   如果唔依依哦哦嘅時候 ~

4 點終於搞掂哂   一早諗定食米線   所以又去星林居喇   食完再去旺角 PCCW 拎嘢   之後就番屋企喇 ~

豬軟骨小鍋米線 / 豬腩肉豬潤小鍋米線

雖然出咗成日街   但我都想煮飯   因為唔想雪櫃擺咁多嘢呀 ~ 

是日懶餐 - 焗叉燒 + 菜心 + 紅豆黑糯米糖水

焗叉燒 - 今次整得好好味呀   好 Juicy 呢   仲以為媽咪係特登讚我添   估唔到又真係好味喎    里奧大人都話好似出面食嗰啲   因為我之前焗到好 "鞋" 嘛 ~ 

菜心 - 喺百佳買又唔錯   里奧大人問百佳買同街市買係咪差唔多   我話一啲啲啦   佢話街市平會唔會有好多係要掉   咁我話有時都會   但我話如果買得少就肯定去超市   因為唔想行咁遠囉 ~  

紅豆黑糯米糖水 - 媽咪特登煲㗎   好多料   食一碗已經飽哂喇 ~ 

煙三文魚 (外賣) + 冷麵 + 餃子 + 五香肉丁炒年糕 + 皮蛋酸薑 ( 18-SEP-2010 )

( 18-SEP-2010  SAT )

今朝同媽咪 家姐飲茶   我覺得自己好似做女咁   因為做女嘅時候   朝朝都會同家姐媽咪一齊食早餐   食完先番工呢 ~ 

老闆 Off   番到菇場超勁 Free   真係上網上到眼都攰呀 ~ 

放工約咗家姐去超市買嘢   之後再 Join 埋里奧大人去麥當勞食嘢   因為家姐要食兒童套餐換 "滑嘟嘟" ~

食嘢嘅時候   媽咪打嚟話比人哋架輪椅撞親隻腳   好在已經到咗我屋企附近   里奧大人就即刻出去扶媽咪上屋企   之後我哋都打包食物番屋企   上次醫生教媽咪   如果撞到   就即刻敷冰同埋舉高隻腳   好感恩   因為我諗住整冷麵   所以有好多冰咋 ~

頭先睇到里奧大人二話不說衝出去扶媽咪上屋企   又幫手包冰   又 Set 好個位媽咪坐   又出去買藥膏   我覺得里奧大人對媽咪好好呀   好細心   真係令我係好感動呀   好感恩有呢位咁細心嘅好老公呀 ~

搞咗成個鐘   感恩媽咪隻腳無腫   如果唔係就要入院㗎喇   唔想拖呀 ~

就喺呢個鐘頭裡面   我要去冷靜一下   唔係我會發顛鬧人   所以就去煮冷麵同焗豬肉乾喇 ~ 

差唔多 3 點幾就開始打牌   打到 7 點幾   里奧大人就出門同朋友食飯   好在工人喺我哋打牌嘅時候煮定嘢   咁我哋就好快可以開餐喇 ~ 

是日晚餐 -  煙三文魚 (外賣) + 冷麵 + 餃子 + 五香肉丁炒年糕 + 皮蛋酸薑

煙三文魚 (外賣) - 係家姐之前訂比我㗎   佢哋啲同事成日訂日本嘢   平過出面好多㗎 ~

冷麵 - 晏晝整定   雪幾個鐘都夠哂凍 ~

餃子 - 又係家姐訂比我   不過如果煎得脆邊就更好 ~ 

五香肉丁炒年糕 - 家姐想食年糕   但今次我買嘅年糕一啲都唔煙韌   激得氣 ~  

皮蛋酸薑 - 好似無乜嘢食咁   所以整個皮蛋酸薑   佢哋好鍾意食   媽咪仲問啲酸薑係咪我醃    我有鬼咁叻咩 ~ 

食完我就焗叉燒比媽咪拎番屋企   即場比佢試   佢話勁似出面食嘅叉燒   同埋今次啲五花腩真係好靚   諗番起買五花腩嘅時候   我同豬肉佬講話係用嚟整叉燒   佢兩眼閃閃咁話好叻呀   叉燒都識整   我話我用叉燒醬醃   之後焗之嘛   有幾難喎 ~

送埋媽咪坐車就同家姐行超市買嘢   行咗 1 個鐘   同家姐行超市最開心   計下度下咁   里奧大人唔係㗎   佢一入到去就去買要買嘅嘢   買完就走   所以唔鍾意同佢行   家姐就唔同   因為佢會幫我計   同埋最好就係可以 Share   咁唔駛樣樣要買咁多嘛   我真係唔想屋企擺咁多嘢囉 ~ 

粟米雞粒 + 洋蔥炒蛋 ( 17-SEP-2010 )

( 17-SEP-2010  FRI )

Happy Friday 喇   所以出去食早餐   食乜都開心   放假前夕真係好令人振奮呢 ~

今日老闆出 Trip   後面位同事又放假   諗住睇下雜誌   我第一次咁做咋   點知無啦啦有位同事嚟問嘢   真係邪呀   不過佢原來問我 Lunch Box 點整   話整得好入味咁   我話炒意粉好易   難都唔識整啦 ~

其實今晚好想整茄汁蝦   但里奧大人又唔係咁想喎   本來我又想整生炒骨   但又唔想連續 3 餐都食三色椒   最後都係買埋聽晚煮嘅餸就番屋企   因為屋企已經有今晚嘅餸呢 ~

是日懶餐 - 粟米雞粒 + 洋蔥炒蛋

粟米雞粒 - 清清地都唔錯   最緊要係簡單 ~  

洋蔥炒蛋 - 印象中係第一次整   求其啦   最怕炒嘢 ~

依家實在太好喇   里奧大人放工好快就番到屋企   而德藝會又開到 12 點   咁真係做運動都唔駛趕頭趕命咁呀 ~

黑椒雞絲炒意粉 ( 16-SEP-2010 )

( 16-SEP-2010  THU )

呢朝試下藍莓乳酪 + 麥片   又凍又酸   我唔得㗎   下次都係用番朱古力奶算喇 ~

天氣太熱   都係紮起頭髮再開埋遮   但一樣咁熱   一樣咁辛苦囉   流咗咁多汗又唔見得瘦喎   唔係點流都得呀 ~

我覺得今日好勁   因為無飲咖啡   濃茶同檸檬茶都唔眼瞓呀   唔飲茶都唔錯   因為唔想啲牙咁黃呀 ~ 

Lunch Time 同 8 卦出去食   食完本來想自己行陣   但一出去就覺得好熱   都係番菇場上網睇嘢算 lu ~

里奧大人要喺公司開視像會議   所以今晚我自己食先   食完可以做家務當運動   真係唔錯 ~ 

是日懶餐 - 黑椒雞絲意粉

黑椒雞絲意粉 - 加埋三色椒同洋蔥   夠哂爽口   里奧大人話唔食呢個黑椒意粉   所以我加多 2 隻指天椒   再加黑椒碎   辣到呢   好耐未食過自己煮咁辣嘅意粉呀   爽到爆呀 ~

食完坐陣就拖地   之後再整個干炒雞絲意粉比里奧大人食   感動得佢吖   因為佢覺得我特登再煮比佢架   但事實都係喎   不過見佢番工咁辛苦   我都唔想佢成日食出面嘢   雖然我煮得唔係好食   但話哂無味精嘛   點都健康過出面食嘅   我辛苦少少無所謂呢 ~ 

住家飯 @ 媽咪屋企 ( 15-SEP-2010 )

( 15-SEP-2010  WED )

今朝又食朱古力奶 + 麥片   估唔到差唔多 KO 咗一盒   其實食落都幾好味   下次應該買盒大   咁樣唔駛下下買咁煩 ~ 

真係熱得太犀利喇   都係紮住邊出門口   番到菇場附近先放番頭髮落嚟   我真係好怕比人見到我塊大臉盤呢 ~ 

唔知點解今朝好眼瞓   所以頂唔順喺 Pantry 拎罐咖啡飲   不過都唔係太精神   都係茶餐廳沖嗰啲會令人精神啲 ~

有嘢做   所以好快到 Lunch Time   今日 Lunch Box 又係食麵   蘸點埋沙爹王嘅 XO 辣椒醬就當堂惹味哂喇 ~

呢排想健康啲   又想減肥   都好少買零食   餓嘅時候飲番支 Yogurt 都唔錯 ~

里奧大人今日上大陸   所以我又去媽咪屋企食飯喇   食完飯又生果又月餅   真係飽到爆呀 ~  

爭鮮壽司 (外賣) + 節瓜魚湯 ( 14-SEP-2010 )

( 14-SEP-2010  TUE )

尋晚 10 點半睇睇下電視就瞓着咗   之後入番房瞓喇   我覺得睇住電視覺真係好易瞓得着    特別係賣廣告嘅時候仲特別易瞓着呀 ~ 

今朝飲完杯暖水   之後再食麥片 + 朱古力奶   個肚好脹呀 ~

番到菇場真係攞我命三千   熱到呢   真係搵日要剪頭髮   應該無咁熱 ~ 

11 點幾超餓呀   好耐無試過餓嘅感覺喇   好在仲有一個鐘就 Lunch Time   今日有 Lunch Box   超正呀 ~ 

終於放工勁開心呀   正想入電梯嘅時候接到里奧大人電話   佢問我食乜餸   我話三色椒炒雞柳   佢話佢唔係咁開心   想出去食   但又唔知想食咩   我話我買咗餸同埋諗住滾湯   佢話滾湯無所謂   但想出去食喎 ~   

上到屋企擔心里奧大人乜事唔開心   但估佢應該係好攰   打番比佢話不如賣壽司番屋企食啦   佢聽完好開心話好喎   我終於明喇   佢係聽到三色椒唔鍾意食   就話唔開心定啦    因為佢話三色椒難消化   但三色椒有益嘛   又唔係要你食哂   我諗住無菜帶飯   先買三色椒當蔬菜咋   真係你想食多都無呀   真係吖 ~

不過可能搬出嚟唔開心都未定   但我無問   我住大埔咁耐都絕對唔開心啦   我咪住咁耐 ~

是日懶餐 - 節瓜魚湯

節瓜魚湯 - 今晚去咗街市買餸   買咗 1 份 (2 條) 嘅大眼雞   $15 咋   超抵   我好鍾意食大眼雞架   咁我可以成日滾魚湯啦   感恩感恩 ~

呢晚又 10 點半睇睇下電視瞓着咗   咁樣即係我個作息時間應該係 10 點半   咁都好   太夜瞓第朝唔夠精神仲慘   同埋對皮膚唔好先大件事呀 ~

叉燒炒麵 + 芥蘭 ( 13-SEP-2010 )

( 13-SEP-2010  MON )

本來想食麥片   但真係好攰   加上又係一星期嘅開始   所以都係出街食   咁星期二至四就食麥片   Happy Friday 又出街食   星期六同媽咪飲茶   星期日就同里奧大人一齊食   呢個安排真係唔錯 ~ 

突然勁想食芝士火腿   其實自己整都得   如果自己整我就咁芝腿方包就算喇   不過我又唔想買一包火腿   因為我真係麻麻地哋鍾意食火腿   唔想一陣又過期要掉呀 ~

今日終於有 Lunch Box   感覺好新鮮呀 ~ 

今晚要用好快速度買餸   因為約咗家姐去我屋企附近超市一齊買嘢   之後佢就去媽咪屋企    住得近真係好   可以一齊買嘢   又可以 Share   最鍾意係咁呢 ~

是日懶餐 - 叉燒炒麵 + 芥蘭

叉燒炒麵 - 里奧大人真係好鍾意食呢個麵   點埋甜醬同桂林辣椒醬真係好味好多 ~

芥蘭 - 又甜又脆   覺得好好味呀 ~  

呢排頭暈暈   可能貧血   所以今晚食埋媽咪整嘅豬腳薑嚟補補身先   做哂嘢睇電視嘅時候    又突然好想食芝麻糊   我覺得 "多多" 呢個牌字真係唔錯   但包裝同 "杯杯" 差唔多   又係寫明香港製造   所以上次買錯咗 "杯杯" 以為係 "多多"   睇單嘅時候仲以為 Show 唔同嘅名   無諗過自己買錯添   有時真係好頂自己唔順呀 ~

甜辣醬炒雜豆雞粒 + 日式雜菜魚餅 ( 12-SEP-2010 )

( 12-SEP-2010  SUN )

呢朝好早起身同媽咪 家姐 姐夫一齊飲茶   佢哋估唔到我會到呢   我都話依家咁近   早啲起身咪早啲起身囉   一家人見下面傾下偈都好嘛 ~

飲完茶番屋企洗衫   再等里奧大人醒咗就煮早餐佢食喇 ~

抖陣就番教會   之後里奧大人要番工呀   我陪佢食完 Lunch   我就番屋企做家務喇 ~

屋企有冷飯 + 今朝食剩嘅五香肉丁   所以整個五香肉丁炒飯   超好味   珍珠米真係好食好多呀 ~

食飽有力喇   熨衫 + 執屋 + 拖地   做完成身汗   真係做跑步機都無咁多汗呀 ~

本來媽咪同我哋食晚飯   但又落超大雨   所以唔嚟 lu   好在我屋企雪櫃有存貨   唔出街買餸都可以煮到一餐飯仔嘅 ~ 

是日懶餐 - 甜辣醬炒雜豆雞粒 + 日式雜菜魚餅

甜辣醬炒雜豆雞粒 - 諗住用鰻魚汁   但都係想清哂啲甜醬辣醬   初初驚同啲味同雜豆唔夾㗎   但又估唔到 OK 喎 ~   

日式雜菜魚餅 - 係家姐訂比我嘅   不過煎得唔夠香   唔係仲好味 ~

食飽抖陣又去跑步喇   呢間德藝會都唔錯   有電視睇不過無聲   同埋有我鍾意玩嗰啲器械   無咁悶嘛 ~

清補涼豬骨湯 ( 11-SEP-2010 )

( 11-SEP-2010  SAT )

星期六喇   早餐實會食飽啲呢 ~

又係喺菇場 Hea 到放工   其實有嘢做   不過無 Mood 做囉 ~  

放工去超市入貨   之後再同里奧大人食 Tea   好耐無去 KFC   不過啲蜜蜜燒雞翼無咁好味 lu   第一次食嘅時侯係超級好味呢   點解啲水準唔可以成日都 Keep 住咁好㗎 ~

今晚只係煲湯食渣   所以食完 Tea 抖陣就同里奧大人一齊去做運動喇 ~  

是日懶餐 - 清補涼豬骨湯

清補涼豬骨湯 - 真係食豬骨都飽哂呀   蘸豉油辣椒蒜蓉一齊食   真係好好味 ~

豆豉鯪魚炒油麥菜 + 芫茜皮蛋魚片湯 ( 10-SEP-2010 )

( 10-SEP-2010  FRI )

今朝喺屋企食 Special K 做早餐   用朱古力奶沖黎食   再加一杯熱茶   不過我覺得早咗半個鐘頭食早餐   好似無乜胃口咁   但唔理喇   遲啲慢慢習慣   喺屋企食早餐真係幾 Relax 呢 ~

MSN 仲係傻   好在有嘢做   好快又到 Lunch Time   本來想買炒米粉   但又賣哂喎   所以買肥牛湯濛粉   睇過樣好似好淡咁   但其實又幾好味噃 ~ 

今晚開始煮飯喇   煮啲簡簡單單先 ~ 

是日懶餐 -  豆豉鯪魚炒油麥菜 + 芫茜皮蛋魚片湯

豆豉鯪魚炒油麥菜 - 唔知食咩好   所以就諗到呢個餸喇 ~  

芫茜皮蛋魚片湯 - 里奧大人話熱氣   所以就滾呢個下火湯咁啦 ~  

結婚紀念日 & 中秋做節 @ Ruby Tuesday (九龍灣) ( 9-SEP-2010 )

精選和牛芝士漢堡 (Wagyu Buger) / 蜆肉意大利幼麵 (Clam Linguini) / 露比三合一拚盤 (Triple Play) / 自助沙律 (One Visit) / Stella Artois / Ruby Refresher

( 9-SEP-2010 THU )

咁就同里奧大人結婚週年喇   時間過得好快   真係唔覺唔覺 ~

今朝超勁想食辣椒豉油   所以就食燒賣 + 粉果喇   真係好好味呀 ~

番到菇場晴天霹靂啦   MSN 傻咗呀   個個有得 M   得我無得 M 喎   幾咁慘呀   I.T.人又唔嚟整   都唔知幾時先 M 得   好在都有嘢做   唔係真係唔知點算好喇 ~

做嘢時間過得好快   好快就 Lunch Time   呢一刻都仲係勁想食豉油辣椒油   所以又食炒米粉 + 牛肉球喇 ~

放工同媽咪 里奧大人行陣 Market Place   買咗 d 生果就去 Ruby Tuesday 食飯 lu ~

今晚超開心呀   因為同埋媽咪 家姐一齊同我哋慶祝結婚週年   順便提早做節   本來星期五先做節想去食上海嘢   但又無得 Book 位又話要 Walk-in   一陣無位咪煩   所以就提早今晚順便做節喇 ~   

韓食一番地 + 金滿堂甜品 @ 九龍灣 ( 8-SEP-2010 )

傳統炒年糕 - 我見媽咪一夾條年糕就斷開咗   咁肯定唔煙韌啦    點知真係唔煙韌   好似食腸粉咁   唔好食呀
泡菜餅 - 酸酸辣辣咁囉   一樣係唔好食 
石頭鍋飯 (牛肉) - 好在加咗辣醬   唔係又係無味嘅
傳統炒粉絲 - 一樣係無味
榴槤翡翠杯 - 有榴槤同豆腐花    我最鍾意食啲珠珠   反而無乜點食榴槤
黑馬王子 - 黑珍珠同涼粉啲份量都好少
龍吐珠 - 最唔好味係呢個   無味囉

( 8-SEP-2010  WED )

呢日請假   因為之前訂地櫃嘅送貨部話唔知咩時間送嚟   所以我請一日就最好啦   唔駛煩    反正仲有大假扣嘛 ~ 

諗住瞓到 9 點半   不過瞓到 8 點都醒 lu   再懶床到 8 點半就起身食早餐   食完又做下家務    執下柜   拖下地   啲汗真係滴答滴答咁流架   不過出完一身汗真係好爽   同埋沖完涼之後就會好攰   好想瞓 ~

約咗家姐媽咪 12 點幾出去   諗住瞓陣   點知想瞓嘅時候家姐就打嚟叫我 Ready   係咪咁邪呀   唔瞓唔打嚟咁嘅 ~

 
家姐今日去拎車   所以順便叫埋糟糟一齊遊車河呢   今次由糟糟楂車   因為佢係車神   安全好多呢 ~  

首先去咗元朗唔知邊度買泥   再去元朗食壽司喇   之後就送泥去粉嶺朋友屋企   再踩入青龍頭探婆婆   坐咗半個鐘諗住去深井食甜品   點知送柜師傅打嚟話櫃到   所以就出番市區喇 ~

佢哋明明約我 6 點至 8 點   無啦啦 4 點半就話送嚟   不過家姐話如果佢哋肯等   咁情願出去   唔係會最尾嗰轉先送櫃比我喎 ~

雜錦壽司拚盆 /鹽燒雞軟骨 / 軟殼蟹天婦羅 / 餃子釀雞翼 / 鹽燒雞腎

媽咪就上我屋企坐陣   家姐佢哋就拎架車去打腊   差唔多 7 點就一齊開餐喇 ~

今次去呢間韓食一番地試下   不過唔會有下一次   因為樣樣無味   我哋一致認為 City'super Food Court 嘅梨花園仲好味過佢呀   唔怪之得食飯時間仲有大把位啦 ~

食埋甜品   話咁快一日就咁過咗 lu   呢日唔係坐就係食   我同媽咪最舒服   糟糟就辛苦喇    因為我覺得揸車係好傷神呢 ~ 

Ruby Tuesday @ 九龍灣 ( 7-SEP-2010 )

露比三合一拚盤 (Triple Play)

特色加洲墨西哥烤薄餅  (California Club Quesadilla)

Ruby Refresher 濃情朱古力 (Chocolate Tallcake)

( 7-SEP-2010  TUE )

今朝好開心   因為終於可以陪里奧大人食早餐喇 ~ 

行到塊臉紅卜卜   啲同事以為我由屋企行路番嚟添呀   哈哈 ~ 

晏晝食個橄欖香草包   再加杯高纖好立克   咁當堂飽哂啦 ~

放工同里奧大人一齊去 Join 德藝會 Member   好感恩呀   終於可以喺屋企附近做運動   之前諗住去政府嘅 GYM Room 做   但又要出席個簡介會   再通過測試合格先可以做   麻鬼煩煩    我純粹做跑步機   仲要唔係勁跑嗰隻   旨在郁下之嘛 ~

同里奧大人搞掂哂都成 8 點喇   餓到震   今晚同里奧大人預祝結婚週年   所以去 Ruby Tuesday 喇   今次做埋 Member 仲抵   所以我即刻叫埋家姐嚟食甜品   食完大家都飽到震呀 ~ 

文記傳統車仔麵茶餐廳 @ 九龍灣 ( 6-SEP-2010 )

煎釀三寶 (魚蛋 / 豆腐 / 尖椒) / 蘿蔔絲餅 / 沙爹螺肉 + 水魷米粉 / 沙爹螺肉 + 酸齋 + 水餃伊麵

( 6-SEP-2010  MON )

今朝本來陪里奧大人食早餐   不過等咗好耐車都無喎   所以最後都係各自食早餐 lu ~

唔知點解覺得今朝啲時間過得好快   可能部腦 Load 嘢好慢   所以 Load Load 下都 Load 到 12 點幾   晏晝同 8 卦出去食   突然好想食粥   好在依家都有少少涼風   所以行番到菇場都唔覺熱呢 ~

放工去旺角 PCCW 拎嘢   記錯哂地方   行咗半個鐘頭冤枉路   熱到暈咁滯呀 ~

坐巴士番屋企   一上車聽到有個阿叔好大聲好勞氣咁同隔離行嘅阿婆講嘢   我以為佢哋係識嘅   後尾發覺又唔似識   因為阿婆合埋眼無理佢   但阿叔仲繼續係咁講   個個人靜哂   咁好明顯阿叔係傻啦   之後聽阿叔係咁講 "我係阿 Sir   荔枝角啲人都識我㗎   我有張証    呢張係阿 Sir 先有   妳哋要唔要吖   哈哈哈   我有兩間屋   一間喺大陸   依家無樓   捐哂喇    衫紐就有   揸波唔駛錢   妳揸唔揸吖   哈哈哈   我係龍鳳胎嚟   有個家姐喺台灣   妳估咁易龍鳳胎呀   陳祖澤見我窮   話比張証我一世免費坐巴士   我話唔駛啦   咁肉酸   我最驚佢講咗呢句 "我唔係傻㗎   我都唔知幾正常" ~

我即刻望下佢個袋有無開咗   我驚佢拎把刀出嚟斬人呀   好在無開咋   不過我實在大攰   阿婆走咗我坐咗佢個位   但阿婆走咗佢又無再講嘢喎   佢望咗我兩眼   我就合埋眼扮瞓   好在佢無同我講嘢咋 ~

無驚無險落車   突然勁想食煎釀三寶   所以叫里奧大人去食車仔麵喇 ~ 

爭鮮迴轉壽司 @ 九龍灣 ( 5-SEP-2010 )

( 5-SEP-2010  SUN )

瞓到 10 點半就起身梳洗出發食早餐就番教會   但計錯時間   所以都幾趕呀 ~

11 點幾先食完早餐   都同唔到教友食 Lunch   所以番屋企執嘢算喇 ~ 

2 點半去食 Tea   飽到呢   行咗 1 個鐘先番屋企   感恩搵到跑步嘅地方呢 ~

出咗一身汗   個人真係有啲攰   都係 Hea 下睇電視好啲 ~

真係勁想食希靈魚   所以里奧大人話再陪我去爭鮮壽司   今晚要等位   不過都係等咗 20 分鐘   都算快呀 ~  

大快活 @ 九龍灣 ( 4-SEP-2010 )

( 4- SEP-2010  SAT )

呢日 Off   不過冷氣師傅話 10 點至 1 點上嚟整冷氣   所以同里奧大人就 9 點半起身食早餐呢 ~

里奧大人就喺屋企等冷氣師傅   我就去銀行同 Post Office 整嘢   番到屋企又執下嘢就梳洗出發去睇戲 lu ~

 
我又未餓   要留肚食爆谷   里奧大人就話想食熱狗   我就幫手食薯條   未餓食薯條覺得好鬼飽肚咁 ~

依家上網訂戲飛真係好方便   雖然要比 Extra   但都覺得值   因為可以第一時間揀靚位呢   今次睇 2 點 10 分嘅 "Inception"   估唔到上咗畫咁耐都仲有咁多人睇呀   呢套戲都幾好睇   兩個半鐘真係話咁快就過囉 ~

里奧大人成日問我餓唔餓   話我無食嘢   我話食咗薯條 + 爆谷   熱量超爆燈   所以唔駛食嘢都得   點知再問佢係咪餓   佢話食嘢都得   原來自己餓   但又懶好驚我我咁   最後陪佢食車仔麵   好似多啲選擇   同埋唔想咁飽 ~

8 點先去開餐   勁想打邊爐   好期待好興奮咁去大快活   因為上次見到隔離個女人食得好好味咁   點知食完呢次唔會再食呢度嘅麻辣邊爐囉   唔好食嘅   食完行番屋企時候仲搞肚痛   唔知係咪油得滯呢 ~ 

爭鮮迴轉壽司 @ 九龍灣 ( 3-SEP-2010 )

( 3-SEP-2010  FRI )

呢日請假  不過 8 點半就起咗身 lu  去 KFC 慢慢嘆份早餐   再去超市買嘢就番屋企執嘢喇 ~

番屋企第一時間開機洗衫   之後就好認真執好過廚房   執完成件衫濕哂   真係做運動都無咁多汗呀   執開有條路   執埋書柜   再沖番個靚涼就同媽咪去飲茶 lu ~

今次試下去稻香   因為我實在太唔鍾意鴻星啲服務態度呀   11 點幾去到   坐正喺大魚缸隔離   仲要見到幾條大鯇魚   即刻諗起有次去超市買鯇魚   個魚佬即刻轉身拎一條大鯇魚出嚟   嚇到我即刻走人唔要   後面兩個師奶就好愕然做乜我走得咁快   佢可能覺得我有新鮮鯇魚都唔要好怪囉   我到依家都唔掂新鮮嘢㗎   想食就一係去媽咪度   一係出街食   我知道如果比我整   我整完都唔會食   仲會怕咗以為唔敢食呢 ~

呢碗係媽咪煲嘅老黃瓜豬展湯   超甜超好味呀

飲完茶媽咪佢哋就上我屋企坐陣   之後我就去大埔交鎖匙比地產喇 ~ 

交完鎖匙都係 4 點   本來諗住去剪髮   感恩里奧大人打嚟話可以早走過嚟陪我   感恩律師樓可以提早到 6 點簽收   反正有半個鐘   所以我就行商場   買幾條褲就走 lu ~

同里奧大人去大家樂 Hea 到 6 點就去律師樓 lu   搞掂哂都係 6 點 20 分   都係番九龍灣先食嘢   點知無啦啦塞車   7 點半先去到九龍灣 ~

經過爭鮮壽司   睇食評話啲壽司雖然碟碟 $8   但都好新鮮   咁啱見無人等   所以去試下   估唔到又真係幾新鮮喎   我覺得好味過元綠   同埋啲刺身都厚身過元綠囉   下次會再食過 ~  

富記車仔麵 (外賣) ( 2-SEP-2010 )

魚卷 + 豬腸 + 豬皮 + 生菜米粉 / 牛腩 + 蝦卷 + 魚蛋 + 生菜幼麵

( 2-SEP-2010  THU )

晚餐 - 今晚有人黎裝冷氣   所以里奧大人話買車仔麵番屋企食   一路食一路流汗   爽呀 ~

午餐 - 橄欖香草包   因為朝早食得太 Heavy 喇 ~

早餐 - 炒蛋漢堡公仔麵   落埋辣椒油   超級好食呀 ~

住家飯 @ 媽咪屋企 ( 1-SEP-2010 )

白灼蝦 / 蒜蓉辣椒豉油 / 蒸斑 / 鵝掌翼 / 豬耳 (外賣) / 炒菜心 / 無花果粟米紅蘿蔔沙葛豬展湯 / 梨

( 1-SEP-2010  WED )

星期中喇   好快又 Off   唔怪得今個星期心情咁好啦 ~

超焗熱呀又   真係無乜胃口食早餐   食件奶醬多都好辛苦   但唔食早餐又驚餓喎   一餓就眼瞓   我唔想呀 ~

晏晝同 8 卦出去食   掛住傾都無影相添 ~ 

里奧大人上咗大陸   所以我又番媽咪屋企食飯喇   依家住得咁近   真係晏啲走都唔驚呀 ~