住家飯 @ 媽咪屋企 ( 30-NOV-2010 )

煎鯧魚 / 麵豉蒸排骨 / 炒椰菜 / 滷水乳鴿 (外賣) / 菜乾瑤柱皮蛋鴨腎豬骨粥

( 30-NOV-2010  TUE )

尋晚瞓得好差呀   無乜胃口食嘢   只想飲杯咖啡   所以去 KFC 喇   食鬆餅 + 薯餅 + 咖啡都係 $11 咋   不過薯餅都唔好食嘅 ~

番到菇場忙咗成朝   好快到咗 Lunch Time   叮番之前食剩嘅 Pizza   好彩仲食得啫   如果加埋黑椒 + Tabasco + 芝士粉就好啦 ~ 

里奧大人上咗大陸   我又驚過兩日會每月一到   所以即興去媽咪屋企食飯 lu ~

創發茶餐廳 @ 深水埗 ( 29-NOV-2010 )

( 29-NOV-2010  MON )

星期一喇   今朝好想食辣嘢呀   所以食燒賣粉果   好好味呀 ~

菇場都一般忙咁啦   呢朝都係 Hea 住咁等 Lunch Time   今日有 Lunch Box   咁就唔駛諗食乜 ~

食完飯之後就忙咯   差唔多 5 點先搞掂 ~

今晚同里奧大人去醫院探佢嘅親戚   之後就同埋姑奶一齊食飯   都無乜胃口   所以食粉麵算喇   因為好想快啲番屋企休息呀 ~ 

鰻魚汁煎豬扒 + 大眼雞 + 蒜蓉炒西蘭花 + 黃薑炒飯 ( 28-NOV-2010 )

( 28-NOV-2010  SUN )

今朝同里奧人 9 點 15 分就醒咗 lu   佢去沖涼   我都唔懶床 lu   早起啲時間好用好多呢   同埋又約咗大食表妹同朋友一齊番教會   都唔想太遲先出門口呢 ~

崇拜完之後里奧大人就陪朋友買相機   我就去睇護膚品   之後再一齊去 Pizza Hut  食 Lunch   叫咗個二人餐   根本份量多到 4 個人都食唔哂   都唔明點解叫 2 人餐 ~

食完番屋企 lu   熨埋幾件衫就比自己 Hea 喇   坐喺梳化睇下電視   又涼涼哋   都不經意瞓咗陣   之後就有氣有力煮飯喇 ~

是日晚餐 - 鰻魚汁煎豬扒 + 大眼雞 + 蒜蓉炒西蘭花 + 黃薑炒飯

鰻魚汁煎豬扒 - 唔知食乜好   所以又用鰻魚汁做醬汁   甜甜哋唔錯 ~  

大眼雞 - 又係媽咪比㗎   不過食埋呢條就食完 lu   今晚唔記得整豉油胡椒粉   但記得嘅時候已經太遲喇   因為差唔多食完   里奧大人就話佢都覺得奇怪   點解無嘢蘸   咁你可以開聲問家嘛   真係呢 ~

蒜蓉炒西蘭花 - 其實我想食菜心苗   不過費事里奧大人話又食   所以就整西蘭花喇   同埋 $8.8/3 個又好抵呢 ~

黃薑炒飯 - 懶得切蒜粒   所以加黃薑粉炒   都幾好味 ~ 

食完飯抖 1 個鐘就同里奧大人出發去跑步   好耐無一齊做運動喇 ~   

沙爹王 @ 官塘 ( 27-NOV-2010 )

牛油雞翼 / 豉椒炒蜆 / 避風塘賴尿蝦 / 印度薄餅配咖哩汁 / 沙爹西生菜 / 青檸柑梅蜜

( 27-NOV-2010  SAT )

今朝自己一個人食早餐呢   本來想食燒賣   點知有個同事喺門買外賣   我都唔好意思入去食啦   嗰時已經 8 點 50 嘛分   所以我即轉場食扒芝腿治 lu ~

菇場都忙喎   忙到差唔多 12 點   點都要比少少私人時間自己 Relax 嘛 ~ 

晏晝快快口食完個 Lunch 就去針灸   早去早回   我實在好怕好怕一個人等嘅感覺呢 ~

今晚好想出街食飯   所以同里奧大人就近近哋去官塘沙爹王喇   真係好感恩   因為之前同影子食過一次沙爹王   所以有 $24 Cash Coupon   即係等如唔駛加一喎   同埋我以為上次無拎到   原來係比咗里奧大人   感覺好似又無變有咁   真係份外開心 ~

食到爆肚   一定要行下呀   去 APM Logon 睇嘢   比錢嘅時候又記得自己有 City'super 卡    原來又有 Discount 喎   所以又好似慳咗咁   實在太好喇 ~ 

我仲諗住行埋 Jusco 十蚊店家嘛   點知里奧大人話睇時間喎   仲有嘢未做   真係無癮呀 ~ 

今晚無無聊聊玩個唔知乜嘢心理測驗   我睇完個結果真係好爆笑呀   哈哈 ~

鰻魚汁炒日本蟹餅 + 大眼雞 + 蒜蓉炒豆苗 ( 26-NOV-2010 )

(26-NOV-2010  FRI )

Happy Friday 喇   所以就去椰林閣 Hea 住嚟食早餐   仲有卡位坐   真係好 relax 咁呀   但係坐坐下有陣噏味   諗住轉位   點知都係蹹味   如果唔係飲咗啖咖啡先發現   我就走㗎喇   好難頂呀 ~

呢朝無咁忙喇   但整呢樣嗰樣   都差唔多到 Lunch Time   尋晚去媽咪屋企食飯   所以順便帶埋 Lunch Box   又可以慳番一餐 ~ 

無嘢做就諗下今晚煮乜啦   不過其實諗唔諗都一樣   煮嚟煮去咪又係嗰啲 ~

是日晚餐 - 鰻魚汁炒日本蟹餅 + 大眼雞 + 蒜蓉炒豆苗

鰻魚汁炒日本蟹餅 - 比我就咁煎呢   一係燶   一係就唔香咁   所以我加埋鰻魚汁一齊炒   又好似一樣新餸咁   唔錯吖   最緊要個腦識急轉彎   哈 ~

大眼雞 - 媽咪比我㗎   好大條呀   我好鍾意食大眼雞   但煲湯嗰啲就食唔到喇   因為好細條好多骨呢 ~ 

蒜蓉炒豆苗 - 今次係第 2 次整   記得第一次整得唔好食   所以唔敢整   但依家覺得自己都應該會整得幾好味   所以就整喇   同埋我真係好鍾意食豆苗   如果整得好   咁多過選擇嘛 ~

今晚食完飯就要好快咁熨衫加拖地   因為里奧大人話今晚唔駛做公司嘢   可以陪我睇戲喎   揀咗之前錄咗嘅 "禮儀師"   估唔到都幾好睇   同埋最尾好感人   喊到我呢   最驚臨瞓前喊㗎    第朝對眼會好腫呢 ~ 

住家飯 @ 媽咪屋企 ( 25-NOV-2010 )

原來寶寶都鍾意睇義海豪情㗎

( 25-NOV-2010  THU )

尋晚涼涼哋   真係瞓到唔願起身呀   雖然飲埋咖啡   但都覺得好攰咁囉 ~

菇場超得閒   成日上網有啲唔慣呀   因為實在太傷神喇   所以仲更加攰   更加想瞓呀 ~ 

晏晝有 Lunch Box   諗住食完瞓陣   但又瞓唔到喎   唯有又上網睇嘢啦 ~ 

 
終於等到放工   今晚里奧大人又要上大陸   所以我又去媽咪屋企食飯喇   又可以拎埋湯   買嘢又可以 Share   但其實以前住大埔都可以咁   但點解又唔會咁做嘅呢   可能唔想拎咁遠啦 ~ 

食完飯傾下偈   差唔多 8 點半就走人 lu   唔駛急急腳走嘅感覺實在太好喇 ~ 

黑椒扎肉腸仔米粉 + 炒菜心苗 + 黑糖蕃薯糖水 ( 24-NOV-2010 )

( 24-NOV-2010  WED )

呢日里奧大人上咗大陸   差唔多 7 點半就番到屋企   我又可以早啲食飯喇 ~ 

是日懶餐 - 黑椒扎肉腸仔米粉 + 炒菜心苗 + 黑糖蕃薯糖水

黑椒扎肉腸仔米粉 - 其實我好憎食扎肉   覺得啲口感好怪   依家終於知點解咁憎食   係因為好多都無煎過呢   原來煎咗之後係好好味   依家我都鍾意食   呢隻 "梭羅牌" 扎肉都幾好味呢 ~ 

炒菜心苗 - 都係買番菜心苗穩陣啲   同埋帶飯會好啲   無咁易出水咁 ~

黑糖蕃薯糖水 - 星期日買咗嘅蕃薯   所以要煮啦   糖水就用永安買嘅黑糖都幾香   下次要掃多幾樽先 ~ 

鐵匠 @ 九龍灣 ( 23-NOV-2010 )

蕃茄豬軟骨手打烏冬 - 個湯底都幾好味   都有唔少蕃茄  最正係啲烏冬煙煙韌韌呀
九洲味僧拉麵 - 個湯底都好濃味   啲麵就一般喇

三文魚壽司 / 螺肉壽司 - 啲料都幾多   同埋飯都幾新鮮呢

( 23-NOV-2010  TUE )

今朝好想食甜包   所以就食菠蘿油   飲埋熱檸檬茶消滯   唔錯㗎 ~

菇場忙到九彩   做完哂嘢覺得有啲頭痛   因為太忙   都唔得閒着番件外套   就咁樣就攝一攝喇 ~

晏晝有 Lunch Box   如果食完有阿姐洗碗就好啦   我真係好唔鍾意洗嘢   平時夜晚仲洗唔夠咩   如果朝早喺埋屋企食早餐   真係好似日洗夜洗   由朝洗到晚嘅感覺咁呀 ~

 
今日好攰呀   個頭又有啲痛   加埋里奧大人又上咗大陸   差唔多成 8 點先番到屋企   所以都係唔煮喇   早啲休息好過 ~

本來諗住做運動   但番到屋企都 9 點   要等 1 個鐘先可以做運動   我唔做喇   咁夜做好攰囉    仲慘過乜   所以改為熨衫   郁下點都係好啲嘅 ~  

生炒排骨 + 炒芥蘭 ( 22-NOV-2010 )

( 22-NOV-2010  MON )

又到星期一喇 今朝去 KFC 食鬆餅飲咖啡   其實我唔太鍾意食鬆餅   不過就想 Hea 下   所以先去 KFC 咋 ~

忙忙忙   不過都好過悶悶悶嘅   咁菇場有生意都係好事嚟嘅 ~

晏晝有 Lunch Box   唔知點解覺得食炒米炒係唔多飽咁 ~

放工去超市買排骨同菜就搞掂   依家煮飯比較趕啲   所以好多時番屋企就要 Ready   因為里奧大人最多 25 分鐘就番到屋企呢 ~ 

是日晚餐 - 生炒排骨 + 炒芥蘭

生炒排骨 - 又係好有心機整㗎   幾咁辛苦先搵到支 OK 汁呀   呢次應該整得好好食   因為里奧大人裝飯呀   如果佢次次都食到咁開心就好喇 ~ 

炒芥蘭 - 啲芥蘭仲老過我呀   之得買菜心苗啦   不過無理由連續幾餐都係菜心苗嘛   好似好悶咁 ~  

雪菜火鴨絲燜米 + 清補涼豬骨湯 ( 21-NOV-2010 )

( 21-NOV-2010  SUN ) 

呢朝 10 點起咗身   不過真係好攰   同里奧大人講話瞓多陣   點知瞓到 11 點   都趕唔切番教會 lu   之後又整呢樣嗰樣   搞到 11 點 20 分先出門口食早餐   真係有啲趕   因為 11 點半就無早餐喇 ~

食完早餐去超市買嘢   諗住買豬骨就算   點知又買咗出前一丁杯麵   因為有餐具送呀 ~

番到屋企預備煲湯   又做家務喇   熨 2 機衫   熨咗個幾鐘   企到腰骨痛呀   但我又唔鍾意坐喺度熨   因為好唔就手呀 ~ 

3 點半去食 Tea 喇   食完就飲湯   因為唔想夜晚先飲   次次飲完半夜都要去廁所   真係得不償失呀 ~

是日晚餐 - 雪菜火鴨絲燜米 + 清補涼豬骨湯

雪菜火鴨絲燜米 - 好耐無整   所以好想食   不過平時就唔想整   因為又切絲又要浸都用唔少時間   假期整就最好   多時間預備嘛 ~ 

清補涼豬骨湯 - 本來想唔煲湯   不過見豬肉 85 折   咪買豬骨嚟煲湯囉 ~ 

今晚里奧大人都有時間做運動   太好啦   一個人做真係好悶   雖然都係各有各做   但行去同番屋企都有個人傾下嘛   咁就唔覺得條路太長咁囉 ~

板長壽司 + 許留山 @ 九龍灣 ( 20-NOV-2010 )

( 20-NOV-2010  SAT )

呢朝媽咪約咗朋友飲茶   所以我就自己食早餐喇   咁啱 8 卦又黎食早餐   不過佢次次都食得好快   同埋食完就走   我好趕咁呢 ~

星期六都忙到震   不過 Holiday Mood 無乜心情做   情願留番星期一再博殺過呀 ~

里奧大人約咗朋友去南丫島行山   我之前約咗 3 點半針灸   所以唔去得行山   仲諗住今日會孤零零一個添   因為尋晚問咗媽咪同家姐   佢哋兩個都唔得閒 ~

實在係神嘅安排   好感恩呀   今日家姐晏晝覆診完可能陪到我食 Lunch   佢平時要 1 點先可以走   今日 12 點已經可以走   仲可以喺菇場附近食   咁就唔駛咁趕   因為菇場附近有巴士去到針灸嗰度嘛 ~

今次真係 3 點半開始針灸    4 點半搞掂哂   上次要 6 點先搞掂呀   等到個人都呆哂   點知媽咪今晚又得閒喎   所以一齊去板長呀   因為家姐好鍾意食壽司   不過依家板長越嚟越唔抵食   明明呢間嘅壽司係以一碟兩件計   依家改為每款壽司都係一件計   變相貴咗   同埋如果做 Promo 三文魚嗰啲壽司飯係細好多㗎   正常價嗰啲就正常飯量喇   同埋廣告話碟碟 $8   根本就係呃人   應該講明某啲先係 $8   咁唔老實    所以唔想再幫襯佢囉   反正附近都有壽司店 ~  

食完壽司再去許留山食甜品   之後再上我屋企坐陣就走 lu   而我就去做運動喇 ~

傾偈嘅時候   突然望到張 Menu 隻公仔點解會咁立體   原來係自己電話繩嘅公仔嚟 ~

我叫里奧大人去南丫島要買魚皮花生比我呀   因為我無份去嘛   佢又買埋檸汁薑比我   知我鍾意食喎   講到好好咁   梗係要啦   我 Off 都唔陪我喎   仲唔買嘢我食   咁就要買其他嘢比我㗎喇   心靈創傷喎   梗要補償啦 ~

臘腸蒸雞翼 + 炒菜心苗 ( 19-NOV-2010 )

( 19-NOV-2010  FRI )

今朝同里奧大人食早餐   之後就幫菇場掃貨   再入埋票   10 點先番到菇場   爽呀 ~

終於無咁忙喇   可以整下其他嘢 ~

晏晝就同 8 卦一齊食 Lunch   今次去試另一間茶餐廳   因為寫住有泰國菜食想試下   如果好味就可以多個地方選擇嘛 ~

呢晚要煮啲非常簡單嘅嘢   其一攰   其二就係想去跑步呀 ~

是日懶餐 - 臘腸蒸雞翼 + 炒菜心苗

臘腸蒸雞翼- 我無醃雞翼   反正臘腸咁鹹   所以我叫里奧大人一大啖雞翼一少啖臘腸   咁就中和哂就 Good 喇 ~ 

炒菜心苗 - $10/2 包   食咗 1 包咋   依家啲菜心苗都幾甜幾好味呢 ~ 

住家飯 @ 媽咪屋企 ( 18-NOV-2010 )

( 18-NOV-2010  THU )

今朝食突然好想食燒賣   因為好想食辣椒油呀   食燒賣點豉油 + 辣椒油真係絕配呀 ~

呢朝無咁忙   不過都有嘢做   所以都好快到 Lunch Time   呢日 Lunch Box 又係肉醬意粉   唔好浪費嘛   但食埋今次之後真係要隔一排先食喇   食到好驚呀 ~ 

依家里奧大人星期二同四先番大陸   所以我又改星期四先番屋企食飯喇 ~

呢晚差唔多 9 點先走   家姐順便車埋我番屋企   食完又拎又有順風車   好爽呀 ~  

瑤柱蒸水蛋 + 腐乳炒唐生菜 ( 17-NOV-2010 )

( 17-NOV-2010  WED )

話咁快星期三喇   一忙啲時間就會過得好快咁   今朝食朱古力奶溝麥片   不過睇電視話飲朱古力奶會生腎石   搞到我有啲驚添   但我又唔鍾意飲維他奶同麥精喎   咁點好呢 ~ 

忙咗成朝   好快又到 Lunch Time 喇   Lunch Box 係肉醬意粉   好在尋晚只係食咗幾啖意粉   咁今日食就無咁悶呀 ~ 

尋晚唔記得還 Locker Key   佢打比里奧大人話今日一定要還   唔係要罰款   咁我放工即還啦   佢叫我比 Credit Card   我問乜事要比   佢話因為要罰 $100   我即話妳啲同事都無講   再打比里奧大人問清楚係咪話今日還咗唔駛罰   佢都話係喎   我叫佢哋 Waive   擾擾攘攘最後都係要比 $100   話因為 Policy 係咁   同埋要換鎖   佢仲話申請嘅時候職員會重點講話唔見 Key 要罰 $100   呢下先最慶   因為我同里奧大人無聽過   我話如果我知   我就唔駛比你哋罰 $100 啦   唉   下次都係落 Reminder 交 Key   咁樣就無可能唔記得囉   又嬲又無哂心機呀 ~ 

 
今晚去超市買菜就算喇   如果唔係浸咗瑤柱   我直頭無心機到唔想煮呀 ~

是日懶餐 - 瑤柱蒸水蛋 + 腐乳炒唐生菜

瑤柱蒸水蛋 - 諗放工先上網睇食譜點整   跟阿蘇方法啦   因為易記   就係 1  4  7   即係 1 盒雞湯 + 4 隻雞蛋 + 7 分鐘   我記得哂   不過最緊要一樣嘢唔記得就係 "北" 走哂啲泡   所以起豆皮   里奧大人一見到就話係咪無 "北" 走啲泡呀   估佢唔到又識嘢喎   想呃都呃唔到添 ~

腐乳炒唐生菜 - 就咁淥菜原來好涼   所以我依家開始係唔係都炒下   反正我又唔多油   應該唔會油得去邊呢 ~

本來想去跑步   點知玩 Game 玩到對眼好攰   無哂運動 Mood   所以唔做 lu   熨兩機衫當做運動算喇 ~

芝士焗肉醬意粉 + 蒜蓉包 + 雜果沙律 ( 16-NOV-2010 )

( 16-NOV-2010  TUE )

今朝又去椰林閣食早餐   不過今朝飲杯咖啡都唔熱嘅   因為我食燕麥糠嘅時候食到粒粒黃糖呀   如果唔係加咗燕麥糠   我實會換過杯㗎 ~

又係忙到爆炸   所以依家個膊頭好鬼痛呀 ~ 

晏晝食麥片啦   原來過咗 3 日期都唔知添   不過唔理喇   3 日都無問題嘅 ~

今晚家姐即興嚟我屋企食呀   住得近真係好喇   咁可以有人陪下我嘛 ~

是日晚餐 - 芝士焗肉醬意粉 + 蒜蓉包 + 雜果沙律

芝士焗肉醬意粉 - 家姐睇住我整汁   搞住傾計   所以唔記得加豉油老抽調味   所以今次淡咗啲   好在今次加埋芝士腸   咁就平衡番喇 ~

蒜蓉包 - 今次買咗一個好新鮮熱辣嘅法包   同埋一個硬過石頭嘅法包   真係好彩買兩個咋    因為用新鮮熱辣焗係唔好食囉   都唔脆嘅   話哂家姐特登嚟食   整得唔好食我會唔開心㗎 ~

雜果沙律 - 今次食材有蘋果 + 椰果 + 粟米 + 紅腰豆 + 罐裝菠蘿 + 罐裝大樹菠蘿   食之前再加埋脆卜卜煙肉碎   真係好好味呀 ~ 

呢餐樣樣食剩一半   聽晚又要食埋   我真係唔識控制份量   唔係太多就係太少咁 ~   

家姐差唔多 9 點半走人   我就送埋家姐搭車就去做運動喇   今次真係論盡呀   番到屋企先知拎埋條 Locker Key   不過唔理 lu   我唔會再番轉頭比番佢哋呢   反正聽晚都會做運動   同埋打比佢哋   佢哋話聽晚還都無問題呢 ~  

梅菜蒸鯇魚 + 鹹魚干貝茸炒芥蘭 + 炒飯 + 酸齋兩味 (外賣) ( 15-NOV-2010 )

( 15-NOV-2010  MON )

尋晚瞓得唔好呀   加上今日係星期一   個人真係無厘神氣咁 ~ 

今朝食菠蘿油   一上枱就壓平個包   諗住試下食哂啲牛油   不過最後都唔得   要撩番出嚟   真係好鬼油呀   同埋唔鍾意滯嘅感覺 ~

番到菇場不得了啦   忙到叫阿娘呀   不過咁都好   唔係真係會中眼瞓囉   因為我 Partner 真係瞓咗   都唔明點解佢可以 10 點幾就中   真係瞓着果隻喎   同埋晏晝 2 點幾又中喎   中都唔係問題   但個個經過都見到就唔係咁好啦   咁大個人自律下嘛   真係好唔掂呀 ~ 

雖然星期一   但今晚好有 Mood 煮嘢喎   一番到屋企就預備   仲整埋沙律   真係唔覺唔覺就企咗個幾鐘咁呢 ~ 

是日晚餐 - 梅菜蒸鯇魚 + 鹹魚干貝茸炒芥蘭 + 炒飯 + 酸齋兩味 (外賣)

梅菜蒸鯇魚 - 今次好有心機整呀   梅菜又好味   條魚又夠熟   因為之前幾次都唔熟呀   所以今次里奧大人講咗好多次   今次好好味   因為條魚熟喎 ~

鹹魚干貝茸炒芥蘭 - 加埋 1 湯匙鹹魚干貝蓉一齊炒   不過都唔夠香嘅   等我仲驚鹹添 ~

炒飯 - 里奧大人 Lunch 食唔哂嘅炒飯呀   唔好浪費嘛   如果我炒到咁靚就好喇   不過一定係用好多油囉   因為我見到個盒底超多油呀 ~ 

酸齋兩味 (外賣) - 無啦啦勁想食酸齋同齋鴨腎   依家真係乜都貴   之前 $15 依家 $18   真係要學下自己整先 ~   

今晚唔知乜嘢上身咁   突然好有 Mood 煮飯同好有 Mood 想跑步   如果日日都係咁就好喇 ~

滷水雞翼 + 蒜蓉炒西蘭花 + 牛大力土伏苓湯 ( 14-NOV-2010 )

( 14-NOV-2010  SUN )

呢朝同里奧大人食完早餐   之後就喺屋企等家姐車我哋去拜爸爸   所以番唔到教會 lu ~

大家又唔餓喎   最後都係各自歸家休息呢 ~ 

我就去超市買嘢喇   抖多陣就出去食 Tea ~

星期日係屋企就最忙   唔係做家務就係要預備煲湯 ~

是日晚餐 - 滷水雞翼 + 蒜蓉炒西蘭花 + 牛大力土伏苓湯

滷水雞翼 - 無啦啦好想食雞翼   諗住焗   不過里奧大人話唔想食焗   所以整滷水雞翼喇 ~ 

蒜蓉炒西蘭花 - 好耐無食西蘭花 lu   覺得好有新鮮感呀 ~  

牛大力土伏苓湯 - 湯包嚟㗎   材料有牛大力 + 土伏苓 + 大生地片 + 赤小豆 + 扁豆 + 蜜棗   我再加埋 2 條粟米 + 1 條紅蘿蔔 + $20 豬骨   估唔到都好濃味   又幾好飲噃 ~

煙三文魚 + 出前一丁 ( 13-NOV-2010 )

( 13-NOV-2010  SAT )

呢朝同媽咪 家姐飲茶   之後家姐車埋我番工   真係好爽呀 ~

尋日掛住傾   今日要博老命做番哂啲嘢喇 ~ 

今日 3 點半先針炙   咁啱里奧大人要番工   所以尋晚約佢食 Lunch   點知佢今日自己約咗去姑奶屋企食飯   順便拎衫   仲好話我話晏晝自己食添   如果我真係自己食   我就唔駛約喺邊度等啦   真係呢 ~

本來諗住睇完針灸同家姐去超市掃貨   依家改為我食完 Lunch 再同家姐掃貨   之後里奧大人就打嚟話陪我食   太遲啦   我都費事改嚟改去喇 ~

掃完要即走喇   呢朝又早起身   所以其實都好鬼攰呀   上車都瞓咗陣添呀   今次約 3 點半   點知差唔多 6 點先搞掂哂   番到屋企已經 7 點   咁就無咗成日 lu ~  

是日懶餐 - 煙三文魚 + 出前一丁

煙三文魚 - 如果唔係朝早拎咗出嚟解凍   我真係唔食呀   實在太攰喇 ~ 

出前一丁 - 我都攰到無心機煮   所以呢個麵係里奧大人煮㗎   又幾好味喎   之後佢懶叻啦又   我話你試下日日煮嘢吖   睇你有無心機煮   仲有喎   我幫你煲埋水   你就咁放個麵就得    我仲要洗埋呢   真係吖 ~ 

呢日唔知咩事   眼瞓到頂點呀   10 點坐喺梳化都瞓咗呀   瞓到 11 點先醒   之後先入房瞓咋 ~

豆豉鯪魚炒油麥菜 ( 12-NOV-2010 )

( 12-NOV-2010  FRI )

終於又 Happy Friday 喇   喺屋企食 K 做早餐   加多杯熱茶   因為有啲眼瞓呀 ~

仲諗住涼涼哋坐地鐵   點知原來都好鬼熱    番到菇場都有汗出呀 ~

忙咗成朝    好在有 Lunch Box   一夠鐘就可以食喇 ~

之後又掛住 MSN 喎   成個晏晝無做過嘢呀   好在聽日要番工   留番聽日做 ~

是日懶餐 - 豆豉鯪魚炒油麥菜

豆豉鯪魚炒油麥菜 - 其實諗住整鹹魚茸炒芥蘭同埋焗雞翼   但又要煲飯   唔想開九萬幾樣嘢   所以最後整豆豉鯪魚炒油麥菜喇   話哂有菜又有魚夠飽肚嘛 ~ 

呢晚自己去跑步   雖然只係 30 分鐘   但都好過唔郁囉   係咪先 ~

住家飯 @ 媽咪屋企 ( 11-NOV-2010 )

白灼蝦 / 蒸斑 / 炒勝瓜 / 燜蠔豉冬菇 / 煎扎肉 / 合掌瓜花膠紅蘿蔔粟米雞腳豬展湯 / 好香嘅辣椒油 / 好蒜嘅蒜蓉 

( 11-NOV-2010  THU )

今朝去椰林閣食早餐   用 $14 嘅 Coupon 食原價 $19 嘅早餐   加埋一都係 $15   都好抵   如果無 Coupon   我係唔會去椰林閣食嘢嘅   因為啲服務態度好唔掂呀 ~

忙呀忙   忙到有啲煩咁   可能呢排唔夠瞓   個人比較燥啲 ~   

里奧大人嘅咳仲未好番   晏晝打嚟話喺公司咳得好犀利   所以請假番屋企   佢又唔睇西醫   雖然西藥係唔好   但食咗 2 劑中藥都未好   倒不如睇西醫   好番再調理囉   唔係一陣惹埋我就煩啦 ~

好在晏晝有 Lunch Box   唔係咁鬼熱去買嘢食   又好燥㗎喇 ~ 

今晚番媽咪屋企食飯呀   又有湯可以拎走   真係好好㗎   因為有時真係攰到無煲湯   依家話哂都一個星期有一次湯水嘛    一個人無湯水   皮膚同臉色都無咁好呢 ~

焗豬扒飯 ( 10-NOV-2010 )

( 10-NOV-2010  WED )

早餐食扒芝腿治呀   好似好耐無食咁   覺得好好味呀 ~

忙呀忙   忙到 Lunch Time   又係食 Lunch Box   雖然唔駛諗食咩   但兩餐食同一樣嘢都幾厭   不過算啦   無咁油又健康啲   同埋慳唔少錢   咁樣諗會開心啲呢 ~  

今晚經過吉野家   見到有對中年人食火鍋   仲拎個出前一丁出嚟淥   比着我唔會咁明顯囉   或者叫里奧大人拎出嚟淥啦   哈哈   話哂我成日喺商場遊蕩   比人認得就樣衰啦 ~

我依家多數去超市買菜   $10/2 包真係好抵   同埋可以食兩種菜   買菇類又得   總之包裝貼咗 $10/2 包就任妳點揀   同埋有時見到個價錢係 $9.8   感覺真係好似半價買到咁   好開心㗎   好似慳咗好多錢咁 ~ 

是日晚餐 - 焗豬扒飯

焗豬扒飯 - 豬扒醃好   冷飯又有   蘑菇同芝士屋企都有   只係買蕃茄 + 洋蔥 + 罐頭蕃茄湯   惠康買嘅洋蔥都好 Juicy   一路切一路喊   辛苦到爆   今次加咗 3 塊芝士   不過味道唔夠濃咁   下次都係買啲自己磨嘅芝士   應該會好味啲 ~ 

今晚唔理三七廿一   自己都去跑步喇   唔想蝕呀   番到屋企樓下商場見到教友    傾咗陣就走喇    今次真樣衰啦   我一路諗緊嘢一路笑喎    佢都話知我諗緊嘢咁呀 ~

麵豉蒸排骨 + 菜心 ( 9-NOV-2010 )

( 9-NOV-2010  TUE )

抖咗一日   真係精神好多呢   就算食 K 唔飽都精神過人呀   嘻嘻 ~

忙咗一個朝早   個人一忙呢   都特別快餓咁架   Lunch 好想食炒米粉   不過預咗無架喇    所以唔會好失望   反正我只係想食辣椒豉油   所以買咗炒麵 + 粉果   正呀 ~

諗住早啲食飯去做運動   點知頭痛痛   里奧大人又 8 點先放工   咁都應該唔駛做運動啦 ~

是日懶餐 - 麵豉蒸排骨 + 菜心

麵豉蒸排骨 - 尋日超市買豬肉 85 折呀   所以買埋排骨   順便醃埋   今日就唔駛搞咁多嘢   我連酸梅都懶得買呀   不過無酸梅都幾好食喎 ~ 

菜心 - 又係尋日嗰啲嚟㗎   淥哂就裝滿一隻大碟   不過啲葉有啲苦囉 ~ 

食完飯都仲係頭痛痛   咁無可能做運動啦   熨衫算喇   最緊要係郁下呢 ~  

韭菜豬肉雲吞 + 菜心 ( 8-NOV-2010 )

( 8-NOV-2010  MON )

尋晚瞓得好差好差   今朝真係好唔想起身番工   諗住懶床   點知里奧大人佢話唔舒服唔番工   叫我都唔好番喎 ~

醒咗又瞓唔番喎   睇下雜誌又到 9 點幾   打番菇場請病假   了咗件心事 ~    

里奧大人 10 點幾都醒咗   落街食早餐再睇醫生   之後再去買餸   咁就無咗半日 lu ~

因為我有 Lunch Box   唔想浪費   所以我唔想出街食嘢   咁就將原本 Lunch Box 嘅叉燒同菠菜   演變成為叉燒炒麵 + 菠菜   真係 Very Good 呀 ~

食完再煲雪梨蘋果川貝茶   之後瞓埋晏覺   一瞓就個半鐘   有得瞓晏覺真係好爽喎 ~

是日懶餐 - 韭菜豬肉雲吞 + 菜心 

韭菜豬肉雲吞 - 今次用上海雲吞皮   $7 有成 30 塊   再加 $ 4 韭菜 + $13 梅頭豬肉   多菜少肉唔錯呢   同埋今次我好有心機包   所以覺得好好食呀 ~

菜心 - $10/2 斤   好大條同埋爆口   淥咗 4 條已經可以擺滿一隻碟   勁呀 ~  

焗叉燒 + 江魚仔炒飯 + 菠菜 ( 7-NOV-2010 )

( 7-NOV-2010  SUN )

今朝食完早餐就番教會喇   之後再去超市買菜就番屋企   買定就唔駛咁趕呢 ~   

里奧大人又要做功課   所以我晏晝就同影子 小寶去 UCC 食 Tea 喇   佢哋今晚走喇   諗住去機場前再聚一聚呢   所以得個半鐘咋   真係唔多夠   唔知幾時可以再見到佢哋呢 ~

分離嗰刻真係好唔捨得   但我又唔敢大喊喎   我驚人哋以為我發生咩事呀   好在依家科技咁發達   喺網上可以成日見到面   大家嘅距離又會變番相當之近呢   呵呵 ~

去埋舖頭拎嘢就番屋企   都差唔多 6 點   係時候預備晚餐喇 ~ 

是日懶餐 - 焗叉燒 + 江魚仔炒飯 +  菠菜

焗叉燒 - 今次整得又係唔錯呀   但其實焗叉燒都要好多時間咁   我次次用鍚紙包住去焗   都好似幾世都未得咁   所以我次次都無咁做   下次真係跟住食譜做好啲 ~

菠菜 - 食食下嘅時候   里奧大人好似啃親   之後話唔鍾意食菠菜   我正想鬧佢之際   突然醒起我無切開啲菜   成條咁食真係好易啃親   因為我覺得菠菜都幾難咬斷   所以都無話佢   算佢有運行 ~  

洋蔥豬扒 + 蕃茄薯仔魚湯 + 雪梨蘋果川貝茶 ( 6-NOV-2010 )

( 6-NOV-2010  SAT )

每月一 Off   真係令人好振奮呢   今朝 10 點有電話響   原來係晴晴打嚟話一齊食早餐   佢同媽咪睇完醫生就話約我哋食早餐喎   又幾乖噃   之後上蹳屋企坐下   傾下偈 ~

傾開依家啲年青人唔鍾意父母打蹳問喺邊   幾時番咁   覺得好老土   但我又唔覺㗎喎   可能我由細到大都有交帶    同埋出嚟做嘢之後   媽咪都會早午晚打電話比我   佢唔打比我呢    我到時到侯就會心掛掛   就會打比佢   就算依家結咗婚都係咁   我有時 Off 或者假期遲咗啲打比媽咪   佢會以為我唔舒服   點解瞓咁晏咁 ~   

時代唔同   真係諗嘅嘢都唔同   有父母關心都不知幾好啦   唔珍惜之餘仲覺得煩厭   咁樣真係唔得囉 ~

諗住去買餸   點知媽咪話 12 點幾街市好多都休息   無乜嘢買   咁我就打道回府啦   落雨濕濕都唔想周圍行呀   喺屋企整下嘢好過 ~ 

做完家務都差唔多 2 點半   係時候食 Tea 喇   又係大快活   唔知幾時會食厭呢 ~

食完 Tea 就自己去買餸 lu    見里奧大人咳 所以買埋雪梨同蘋果   番到屋企即煲雪梨蘋果川貝茶   N 年無煲    覺得好鬼滋潤咁呀 ~

時間過得真係快   郁兩郁就到煮飯時間喇 ~ 

是日懶餐 - 洋蔥豬扒 + 蕃茄薯仔魚湯

洋蔥豬扒 -  其實係茄汁豬扒   不過今次落重咗豉油   所以比較鹹 ~

蕃茄薯仔魚湯 - 今次買 $10/5 條細嘅大眼雞   因為我唔捨得買 $28/2 條大嘅大眼雞呀   好在味道都一樣咁清甜啫 ~     

Ruby Tuesday @ 九龍灣 ( 5-NOV-2010 )

Buffalo Shrimp / Combo Crab Cake / Combo Clam Linguini / Combo Ribs & Wings / 我飲 Smoothie / 影子飲 Ruby T  / Chocolate Tallcake

( 5-NOV-2010  FRI )

Happy Friday 喇   話唔開心實比人打啦   哈哈 ~ 

今朝里奧大人要見客   所以就陪佢喺屋企樓下食早餐   大快活啲早餐真係幾好味   我覺得好味過大家樂呀 ~

好鬼凍呀   要着毛毛靴添呀   我覺得凍就真係好凍㗎喇   因為我超怕熱呢 ~ 

今朝又係忙到九彩   今朝豐富咗啲   所以晏晝都係沖麥片算喇   無咁罪惡感 ~ 

今晚好開心呀   因為又可以見到影子   佢特登約星期五㗎   因為知我每月嘅第一個星期六係 Off   細心到呢   里奧大人都唔會記得囉 ~  

因為約咗影子家訪   佢今日有啲咳   我真係好驚佢唔到囉   同埋呢日里奧大人又感冒喎   我都好驚佢唔嚟食飯   好在大家最後都出席呢 ~

終於又見面喇   約咗喺地鐵站等   之後就一齊番屋企喇 ~ 

我好少邀請朋友上屋企   因為地方唔大   又要特登再執屋   不過今次唔同啦   老遠嘅朋友喎   一場嚟到梗係要上嚟坐坐   了解下我嘅生活點滴嘛   哈哈 ~ 

今次小寶嘅感覺比我好老朋友嘅感覺   因為佢自動坐喺地下睇報紙雜誌   好似喺香港生活咁   好搞笑   後尾番到屋企先知   其實係因為梳化擺咗衫   所以無位   最衰里奧大人無手尾呀   坐咗差唔多一個鐘就去食飯 lu   今次去 Ruby Tuesday   要佢哋就我哋真係唔好意思呢 ~

今晚超多人   感恩都有卡位坐   我覺得咁樣 Relax  好多   食下影下又傾下   不斷循環咁做呢啲動作   之後有 Waiter 叫我哋埋單   我都無為意幾點   後尾有個 Waiter 話差唔多要關門   我先知原來已經 11 點半喇   啲時間過得好快咁嘅   所以我哋要快速再影全家福呀   好在有影子喺度   話咁快就影到十幾張   正呀 ~ 

其實唔知之後幾日仲有無機會再見   不過都唔緊要   因為可以送機再見   如果佢哋肯比我送嘅話 ~

影子送比我嘅手信呀   Terima Kasih ~ Muack

爭鮮迴轉壽司 @ 九龍灣 ( 4-NOV-2010 )

( 4-NOV-2010  THU )

今日都算有番啲精神   都有啲胃口食早餐   唔錯㗎喇 ~

菇場又忙囉   本來晏晝 8 卦約我食 Lunch   我無胃口唔去喇   點知 4 點幾又開始餓喎   諗住飲豆奶   又過期   但又懶得沖好立克喎   忍到放工又買燒賣   一日食兩餐燒賣   食到最後嗰兩粒有啲反胃   真係要隔一排先好再食喇 ~

今晚要去官塘 Jusco 買嘢   點知想買嘅嘢又無喎   激鬼氣 ~

里奧大人喺大陸未番   咁我上媽咪屋企坐陣   差唔多 7 點半就走 lu ~

又係食爭鮮   又平又近嘛 ~

海皇粥 (外賣) ( 3-NOV-2010 )

( 3-NOV-2010  WED )

今日好番啲喇   不過都係好攰囉   早餐去大家樂食炒米粉   點知食咗一啖唔想食   所以打包留番 Lunch 喇 ~

真係好鬼攰   所以豪啲打的番工   我唔想暈喺街呀 ~

菇場又係忙啦   我都攰到傻下傻下唔知做啲乜   幾辛苦先頂到 Lunch Time   諗住叮熱米粉    不過真係無胃口   最後都係掉咗算喇 ~ 

番到屋企   沖個熱水涼就舒服好多喇   仲開始有啲胃口   所以叫里奧大人快啲番屋企   因為我好想食粥呀   不過海皇啲粥好似唔係真係用米煲咁   好糊仔呀   總之一句講哂唔好食   食完又口渴   忍唔住飲咗成罐汽水添呀 ~

富記車仔麵 @ 九龍灣 ( 1-NOV-2010 ) + ( 2-NOV-2010 )

( 1-NOV-2010   MON )

星期一 lu   都係有啲攰咁啦   去 KFC 食鬆餅早餐   2 個鬆餅 + 1 杯熱飲只係 $11   仲可以分兩餐食   所以真係好抵呢 ~

菇場忙到暈   不過好似作每月一到咁   所以 Lunch Time 即瞓   瞓醒先食鬆餅 ~

唔好講笑   勁有每月一到 feel 呀   所以睇定醫生   拎定病假紙   咁就可以係咁瞓係咁瞓   唔駛特登落街睇醫生呢 ~

同里奧大人去食車仔麵   不過好奇怪啲沙爹汁係甜甜哋囉   我鍾意辣辣哋   咁先夠惹味嘛 ~

( 2-NOV-2010  TUE )

真係每月一到   瞓得唔好呀   所以都係請病假   反正攞咗醫生紙 ~ 

今次雖然痛   但就唔會話痛到痛不欲生咁   感恩感恩 ~

呢日全日無食嘢   因為根本食唔落   咁都好   可以清下腸胃瘦幾磅 ~