茜廊 @ 九龍灣 ( 28-FEB-2011 )

( 28-FEB-2011  MON )

好感恩呀   瞓覺嘅時候無咳醒   之前晚晚咳  咳到里奧大人扯火咁滯呀   幾咁驚呀我 ~ 

雖然瞓得唔錯   但食西藥好鬼散   瞓極都唔夠咁啊 ~ 

無咩胃口   所以食包   我都好鍾意食呢個腿蛋包   啲蛋甜甜哋   好好味呀 ~

番到菇場呢   眼瞓到呢   但又要扮有做緊嘢喎 ~ 

好在有 Lunch Box   唔駛落街買   食完好眼瞓   但又瞓唔着喎 ~ 

今日里奧大人 Off   本來佢諗住同水姑 4 點幾食 Tea   再等埋我放工一齊嚟食   點知水姑有突發事要走先   得番里奧大人一個   佢哋又叫咗個飯無食   所以我就食埋當晚餐喇   咁早食晚餐   真係第一次呀 ~

臘潤腸蒸排骨 + 蒸大眼雞 + 菜心苗 ( 27-FEB-2011 )

( 27-FEB-2011  SUN )

諗住食完早餐番教會   之後再睇中醫   點知原來中醫係假期休息   但將咭片明明寫住星期六休息咋噃   好在打電話問下啫   唔係就白行 ~

咁咳法唔對路   最慘連里奧大人都無得瞓嘛   所以都係再睇多一次西醫   好在佢哋都有開診   感恩感恩 ~ 

諗住去 Uniqlo 買嘢   所以去 Piago Food Court 食喇 ~

藥力開始散喇   番到屋企瞓咗 40 分鐘就醒 lu   時間啱啱好   可以煮飯   太耐無煮   要用多啲時間咁㗎 ~

是日懶餐 - 臘潤腸蒸排骨 + 蒸大眼雞 + 菜心苗

臘潤腸蒸排骨 - 個人無咩胃口   豆豉汁就最好啦   夠惹味嘛 ~ 

蒸大眼雞 - 年初二放入冰格   真係再唔食就驚變壞喇 ~

菜心苗 - N 年無食菜咁   好好味呀 ~   

泰地道 @ 九龍城 ( 26-FEB-2011 )

鐵板蠔仔煎蛋 - 第一次食咋  估唔到好好食   同埋都好多蠔仔   不過我覺得 $98 都幾貴 ~

蒜蓉包 - 真係超級超級好味呀   外脆內軟   成塊包索哂啲牛油咁   蒜蓉味又啱啱好  好正呀 ~

泰式香葉豬肉炒河 - 睇個樣無咩嘢  不過佢加咗啲辣椒粒   所以越食越辣   越食越過癮 ~
蝦膏黑汁飛天通菜 - 明明叫鐵板家嘛   但都費事叫佢換喇 ~  
木薯 - 又係第一次食咋   軟軟糯糯都幾好味 ~

( 26-FEB-2011  SAT )

今日係我生日呀   好感恩今日係 Off 呢   可以瞓夠先食早餐   今朝喺屋企整醬占厚多呀   突然好想喺屋企整早餐食呀 ~

里奧大人今晚要去公司 Annual Dinner   話不如食完早餐出去行下   不過我又唔想呀   都仲係好攰咁   同埋我想做家務呀   抹完櫃仲一口氣熨兩機衫   之後再沖個熱水涼   爽呀 ~

抖到差唔多 2 點半就出去食 Lunch   今日好想飲茶呀   所以又去海寶漁港飲下午茶   感恩等咗 30 分鐘就有位喇 ~

榨菜牛肉腸 / 瑤柱菜餃 / 雞扎 / 山竹牛肉 / 鳳爪排骨飯 /蒜蓉拍青瓜 / 雪耳燉木瓜糖水

飲完茶喺商場行陣   咁啱里奧大人舊同事見到我哋   咁買完嘢我就番屋企   里奧大人就約舊同事一陣傾下偈喇   同呢個舊同事真係好有緣   之前喺大埔又見到佢   依家搬咗出嚟又見到   邪呀 ~

今晚我約咗媽咪去九龍城食泰國菜   媽咪鍾意坐得舒服啲   所以又揀咗泰地道喇 ~  

元綠壽司 @ 將軍澳 ( 25-FEB-2011 )

冷辣辣麵 / 蟹足捧壽司 / 吞拿魚壽司 / 太卷 /  蠔情卷 / 醬汁三文魚腩 / 海鮮一品鍋 (豉油湯底) / 肥牛 (免費) / 柑檸什飲

( 25-FEB-2011  FRI )

今朝要幫菇場入貨   所以要食飽啲 ~

今日有 Farewell Lunch   又係飲茶呀 ~

今晚同里奧大人去新都城食元綠壽司   因為有 $100 Cash Coupon   依家九龍區得番藍田一間咋   不過覺得藍田無咩嘢好行   所以就去新都城喇   食完再去 izzue 買衫就番屋企 lu  好攰呀 ~  

麻酸樂米線專門店 @ 九龍灣 ( 24-FEB-2011 )

( 24-FEB-2011  THU )

仲係咳添   真係好煩呀 ~

今朝去麥記食早餐   真係覺得嗰班阿婆越嚟越衰   明明對面係無人坐   一有人問呢   就話有人   佢哋又坐得衰   一排咁坐   咁對面嗰排又霸住   咁就無咗 6 個位啦   呢間麥記又細   真係覺得佢哋好自私呀 ~

食抗生素又令到我手震震眼朦咁   超辛苦   打比診所問點算好   佢叫我停咗咳藥水   但要照食抗生素   又話抗生素唔會令人手震   但我上網 Search 話會手震喎 ~

啲藥勁眼瞓   Lunch time 就咁食蛋糕仔算喇   懶得出去買嘢呀   食完即瞓   不過瞓唔夠   個人溫溫燉燉咁 ~

終於放工   不過真係煮唔到飯   個人攰到不得可了呀   只想瞓覺 ~ 

里奧大人又上咗大陸   要 7 點幾先番到屋企   咁都好   我可以 Hea 下 ~

口淡淡其實真係好想食壽司   但里奧大人話唔好   食米線喎   是但啦 ~  

大家樂 @ 九龍城 ( 23-FEB-2011 )

( 23-FEB-2011  WED )

啲藥好散呀   沖完涼都好眼瞓   食埋早餐飲埋咖啡都一樣好眼瞓 ~

番到菇場眼琼琼   無 Focus 咁㗎   幾隻藥都話令人昏昏欲睡呢 ~

終於等到 Lunch Time   食咗抗生素個人無咩胃口   食完 4 粒麻糬就瞓住瞓   但又瞓唔到   差唔多 1 點 25 分先瞓到   瞓到 2 點   好在老細未番嚟啫 ~

半夢半醒最難頂   幾經辛苦終於頂到放工   今晚打的番學喇   唔敢行呀   一陣暈咗就慘咯 ~

同大食表妹去大家樂食嘢   之後番學   不過我番完上半 Part 就走 lu   估唔到自己喺短短車程都瞓着咗   好在差唔多到屋企附近醒咗咋   感恩感恩 ~

餃子米粉 + 菜心苗 ( 22-FEB-2011 )

( 22-FEB-2011  TUE )

尋晚一路瞓一路咳   嘈到里奧大人要我起身飲水   辛苦到爆 ~

依家食嘢一係覺得好鹹   一係覺得無味   慘呀 ~

番到菇場都有嘢做   但一路做一路咳   咳好似肺癆咁呀 ~

食完 Lunch Box  就去買咳藥水   我真係好怕飲咳水  好似成個口都咳藥水味咁 ~

放工即睇醫生   原來支氣管炎   要食抗生素   其實無咩必要我唔食抗生素   不過今次覺得都要食   因為咳到甩肺   再係咁咳   真係命都無 ~ 

番到屋企襯自己有精神   快快手咁抹嘢執屋   整整齊齊真係人都開心啲㗎 ~

是日懶餐 - 餃子米粉 + 菜心苗

餃子米粉 - 反正出街食都係味精   我又有啲精神   所以煮米粉食算數 ~ 

菜心苗 - 好耐無食菜咁喇   覺得啲菜好甜呀 ~

叙苑粉麵茶餐廳 @ 九龍灣 ( 21-FEB-2011 )

京都豬扒 - 用鬆肉粉醃嘅  最怕囉  下次唔會再食豬扒

欖菜肉碎四季豆 - 呢個就整得好惹菜喇

老黃瓜湯 - 無咩味嘅

蕃薯湯丸清心丸 - 里奧大人食咋

蛋白杏仁露 - 我覺得超級難食囉   唔知點形容呀

( 21-FEB-2011  MON )

又星期一喇   唔舒服唔夠瞓加上係星期一   真係好想唔番工添 ~ 

早餐去麥當勞   之前飲即磨咖啡唔駛加   依家要加 $1   我唔要 lu   呢間麥記比較細   但好多都係一個人   所以多數一人一張枱咁   今朝個阿婆勁衰格   佢自己坐咗一張圓枱梳化   咁有個男人問佢係咪一個   個阿婆話好多地方都有位   咁個男人就去另一張枱   好心個阿婆啦   咁鬼自私   衰格都無人有呀   個個學佢咁就慘啦   不知所謂 ~

番到菇場都有嘢做   不過吽下吽下咁囉   又咳到甩肺   辛苦到震 ~ 

Lunch Time 出去買嘢食   好在有意粉   再加杯菜蜜   當堂潤哂啦 ~

里奧大人今日請咗病假   所以我今晚都唔煮飯 lu   本來想食粉麵   但見到有中菜又想食喎 ~

今晚家姐拎湯比我哋   所以一齊去食糖水喇   我同事話咳飲杏仁茶唔錯   不過呢間得蛋白杏仁露   唔理喇   照殺 ~

上海婆婆 @ 九龍灣 ( 20-FEB-2011 )

五香燻魚 / 漁香茄子 / 婆婆粒粒炒飯

( 20-FEB-2011  SUN )

尋晚咳到甩肺   瞓得唔好   今朝無番教會喇   都懶得落街   蒸燒賣食就算喇 ~

食完藥又溫溫燉燉   只係坐喺梳化睇電視   睇到攰就瞓   瞓到 2 點 40 分就落街食 Tea   諗住買餸   

但里奧大人話唔好喎   最緊要休息   咁好啦   反正我真係好攰 ~

里奧大人好主動熨衫   我無本事熨喇   只係灘喺梳化睇電視   睇睇下都瞓埋   瞓到 6 點幾就起身 ~

今晚去上海婆婆食嘢   估唔到要等位   好在等咗 10 分鐘就有位 ~

食完去德福行下   不過個人唔在狀態   行咗半個鐘已經有虛脫嘅感覺   要即番屋企抖抖 ~

公司春茗 ( 19-FEB-2011 )

( 19-FEB-2011  SAT )

攰到呢   所以今朝 8 點先起身   今朝豪啲加 $ 2 食出前一丁   不過覺得好鹹呀   食剩一半   嘥咗錢添 ~

明明有嘢做   但食咗咳水   只係想瞓囉 ~ 

同里奧大人去海皇食粥   之後番屋企瞓陣就出發去食春茗喇 ~

今次約咗住喺屋企附近嘅同事一齊去   咁都好啲   因為我都唔記得點去 ~ 

又話 6 點 45 分開席   點知等到 7 點半先問席   仲要玩下遊戲   我同事話 8 點 15 分先第一度菜呀   唔怪之得我玩嘅時候覺得餓啦 ~

差唔多 10 點半先散席   又係同同事一齊坐車走   里奧大人係都要去地鐵站接我   又幾好噃 ~

麻酸樂米線專門店 @ 九龍灣 ( 18-FEB-2011 )

豬仇家米線 (蕃茄炸菜湯底) - 手打肉丸 / 豬潤 / 豬軟骨 / 薄切黑豚肉
自選米線 (酸辣湯底) - 魚腐 / 薄切黑豚肉 / 炆冬菇

( 18-FEB-2011 FRI )

呆呆滯滯呀   不過又有胃口喎   呵呵 ~

番到菇場仲係呆㗎   所以唔敢食藥住   食完 Lunch 先食藥   咁樣眼瞓都無咁辛苦   因為好快可以放工 ~

今晚唔煮啦   又有兩機衫要洗   唔想一次做太多嘢呀 ~ 

同里奧大人去麻酸樂   不過麻哋好食嘅   我覺得個湯底好鹹   但里奧大人話無味喎 ~

大家樂 @ 九龍灣 ( 17-FEB-2011 )

( 17-FEB-2011  THU )

本來里奧大人想留喺香港   驚我有事都可以即刻番嚟睇我   點知佢有隻 Urgent 辦要帶上大陸   所以最後都要上大陸   不過我其實都無乜嘢   只係攰啲啫 ~   

9 點半打番菇場請假   之後食包再食藥   過咗一個半鐘啲藥就嚟料   要瞓覺喇 ~ 

差唔多 1 點半又醒咗   又幾好喎   瞓到食藥嘅時間就起身   今次自己煮出前一丁做午餐   因為好凍   好想食熱嘢呀   差唔多 4 點又要瞓   瞓到 6 點半   如果唔係里奧大人打嚟   我應該仲可以瞓

呀   不過算啦   反正都要食藥 ~

見幾精神   所以同里奧大人去大家樂食晚飯   同埋想用埋兩張 $ 5 Cash Coupon 呀 ~  

海皇粥店 (外賣) ( 16-FEB-2011 )

( 16-FEB-2011  WED )

今朝又係陰陰天   又濕咁   個人更加攰呀   好在食完早餐之後   個人就精神啲咁   唔係好難頂呀 ~

有嘢做   但唔願做呀   個人開始唔舒服   只想 Hea ~

食完 Lunch Box 就仲慘   直頭係發冷咁呀   都應該係發燒   又頭重重骨痛痛   放工即睇醫生   燒到 100 度   又咳又鼻水   好在唔係流感   不過都好辛苦囉 ~

今晚真係咩都唔做呀   只係等里奧大人買外賣番屋企食   佢差唔多 8 點先收工   餓到我呢   同埋等佢番嚟開暖風機呀   我好少話好凍要開機嘛   所以佢都知我超級唔舒服呢 ~

里奧大人 9 點要關房門開 Conf. Call Meeting   咁我食完藥又唔係話太想瞓   所以睇電視   里奧大人就差唔多每半個鐘頭就開門示意要我飲水   一係就示意要我瞓覺   估唔到佢 Meeting 都會關心我噃 ~  

洋蔥肥牛炒意粉 + 油麥菜 + 粟米湯 + 粟米椰果沙律 ( 15-FEB-2011 )

( 15-FEB-2011  TUE )

星期二喇   今朝超級唔願意起身   喉嚨又痛痛哋喎   所以鬧鐘響咗再教遲 15 分鐘先起身   不過都係好唔夠瞓呀 ~ 

今朝食腿蛋治 + 咖啡   佢比單嘅時候   話加咗少少價要 $16   其實我都唔記得佢本身幾錢   不過依家間間餐廳喺新年後都加哂價 lu   有啲仲加咗 $2   不過我覺得 $18 之內嘅早餐真係算係平喇   雖然麥當勞都有啲特價早餐   但唔知點解   梗係覺得佢哋啲早餐唔多健康咁囉 ~

番到菇場都有啲嘢做嘅   不過真係好攰   所以拖到臨尾一刻先做呢 ~

Lunch Box 係尋晚打邊爐食剩嗰啲   又幾好味喎 ~

 
今晚一定要煮呀   因為仲剩咗啲肥牛同菜   無理由咁嘥家嘛   雖然攰   但都要煮囉 ~

是日懶餐 - 洋蔥肥牛炒意粉 + 油麥菜 + 粟米湯 + 粟米椰果沙律

洋蔥肥牛炒意粉 - 剩餘物資   但又唔想去街市買金菇整肥牛卷   所以整炒意粉   最緊要快呀 ~ 

油麥菜 - 又係剩餘物資   就咁灼熟就算 lu   無拍薑   無蘸豉油   懶呀 ~

粟米湯 - 依家嘅 "地們" 粟米湯真係差哂呀   之前啲粟米係原整一粒脹卜卜   依家就溶溶爛爛咁   同埋粟米粒份量少咗好多呀   真係得番 2 湯匙嘅粟米粒咁咋   雞蛋又過期喎   如果唔係蛋花粟米湯會好飲好多囉 ~

粟米椰果沙律 - 無睇包裝   開咗先知係粟米   平時都會整埋落粟米湯度嘅   不過今晚真係無咩胃口   唔想咁飽   所以用黎整沙律   好聰明呀 ~

今晚整咗沙律就打比家姐   問佢嚟唔嚟食   估唔到佢又嚟食喎   順便比埋手信佢   太好喇 ~

打邊爐 @ 屋企 ( 14-FEB-2011 )

芋絲 / 金菇 / 炸魚片頭 / 黑椒牛丸 / 蟹籽丸 /  / 炸魚皮 / 肥牛 / 油麥菜 / 辣椒豉油 / 芫茜皮蛋 / 沙爹湯底

( 14-FEB-2011  MON )

今朝里奧大人無啦啦好風騷同我講情人節快樂   又問我送咩比佢   真係唔知黐咗邊條根呀   哈哈 ~

早餐飲咖啡   超勁掛住台灣飲嘅咖啡呀   唔太濃味   但好香滑   唔識點形容呀 ~

又要適應菇場生活   呢兩個星期   里奧大人日日喺身邊   依家回復正常   有啲唔慣添 ~

晏晝出街買 Lunch   覺得非常之凍呀   本來想行遠啲都唔行喇   費事一陣又冷親 ~

真係好耐無喺屋企食飯咁   所以我同自己講   每月一到之後一定要多啲喺煮飯   出街食真係好無益   同埋最主要係想慳錢呀 ~

今晚好凍呀   勁想打邊爐   估唔到里奧大人話好喎   咁就一於喺屋企打啦 ~

愛愛愛 ♡ 台北 DAY 4 ( 13-FEB-2011 )

( 13-FEB-2011  SUN )

今朝約咗司機 10 點去機場   所以 9 點就要起身梳洗   時間都係啱啱好咋 ~

車程非常之順呀   半個鐘頭就到桃園機場   Check-in 後就食早餐喇 ~

泡菜豚肉拉麵 - 都無味嘅   好在有七味粉咋

Burger King - 里奧大人食咋   我食咗兩日包   唔想食住呀

坐 12 點 40 分飛機番香港   食埋個超級極度難食嘅飛機餐   再打下機   話咁快就結束 4 日 3 夜台北行 lu ~

番到香港都 3 點半   個飛機餐又超難食   根本都唔飽   但番到屋企又差唔多 4 點幾   食 Tea 又覺遲   食飯又覺早喎   所以都係喺機場嘅翡翠拉麵食啲嘢算喇   不過呢間嘢呢   唔會再幫襯   服務質素係惡劣呀   無禮貌   無 Heart   人哋未食完又想嚟收嘢   一句講哂   不知所謂呀 ~

依家住喺九龍   真係感覺到搭車嘅方便快捷呀   又係差唔多 35 分鐘就番到屋企   所以同里奧大人講   真係好耐未試過喺機場   咁快番到屋企   以前真係計埋等車   真係最小要少個半鐘頭㗎   真係由香港去台灣都唔駛咁耐呀   哈哈 ~  

番到屋企痴咗線   係咁抹屋呀   可能之前唔舒服   根本無心機打理屋企   依家有番啲精神   所以一入屋   行李都未 Un-pack 就抹嘢喇   咁多日唔喺屋企好多塵   鼻哥仔好唔舒服 ~ 

里奧大人話想食煲仔飯   我話唔好喇   太 Heavy   仲諗住食米粉   點知一路執嘢一路睇飲食節目   餓到我呢   最後決定食煲仔飯喇 ~

今次去台北都幾辛苦   可能病病地關係啦   個人比較攰   無咩火   好似無脾氣咁呀   熱唔會鬧   攰唔會嘈   只會講笑問里奧大人係咪想我死囉   我真係超鍾意同里奧大人去旅行㗎   佢好細心   去到邊都影個 Map   又會記住我想食咩同埋邊度買   同埋佢最醒係唔會諗住靠我呀   佢真係事事照顧周到   真係令我好感動呀 ~

雖然呢幾日都落雨   但又真係無話唔開心喎   又因為落雨唔想影相   反而可以好好享受同里奧大人一齊去旅行嘅樂趣呀 ~

10-FEB-2011  (13:45pm - BR868) - 13-FEB-2011 (12:40pm - BR869)

Package 費用: HK$2,439 x 2
Stay Behind: HK$690/Night
離境稅: HK$120 x 2
燃油附加費 + 手續費: HK$326 x 2
香港機場離境稅: HK$33 x 2
台灣離境稅: HK$82 x 2
保險: 約 HK$300 

愛愛愛 ♡ 台北 DAY 3 ( 12-FEB-2011 )

麻辣魚蛋 / 咖哩魚蛋 - 麻辣都幾辣   但個咖哩就完全唔掂呀

豪大大雞扒 - 排長龍呀   等咗 20 分鐘   都算快架喇   第一次食覺得 OK   今次食覺得一般

蚵仔煎 - 里奧大人好鍾意食   所以又食喇   不過好少蚵仔

蕃鬼荔枝 - 無上次咁好食囉   唔夠凍呀

哈蜜瓜 - 都幾甜   買咗 NT200   超貴呀   份量得整個哈蜜瓜嘅 1/4 咋

滷水鴨掌 - 尋日喺淡水買咗老天滷嘅鴨掌覺得好好食   所以又試下買其他人整嘅鴨掌   不過都係麻麻哋

滷水雞肶 / 雞腎 / 雞腳 - 啲雞無咩味   反而鹹酸菜仲惹味

( 12-FEB-2011  SAT )

間飯店唔知係咪開咗暖氣   尋晚熱到呢   瞓得好差呀   咁今朝又特登 9 點就起身落去食早餐   我已經無期望有好嘢食㗎喇   但估唔到連最基本嘅炒蛋都無   因為好餓呀   所以食咗少少粟米同菜就打道回府   梳洗之後再出去番尋朝嘅地方食早餐喇 ~

歐式招牌堡 (超厚牛肉芝士) - 真係好好味   所以又 encore

Bagel (卡啦雞腿) - 即係炸雞腿   不過今次就麻麻咃好味   因為我唔鍾意個包

今日又係天陰陰又落下毛毛雨   所以 Plan 咗晏晝去鼎泰豐食小籠包   唔知係咪因為星期六   所以捷運站都幾多人噃   同埋鼎泰豐都好多人等位   我地攞咗飛就去 Food Court 坐下   食粉圓粉粿   煙煙韌韌我最鍾意呢 ~

粉粿 / 粉圓 / 豆花 @ Food Court - 都幾煙韌  真係食完一碗都飽哂

周圍行下睇下   都差唔多行咗一個鐘就番去睇下有無位   但都要等   咁里奧大人去洗手間   我又入哂神望住啲師傅整包   之後佢話聽到叫咗我地張飛嘅號碼喎   咁入去問一問   原來真係叫咗喎 ~

今次再食   水準一樣無變   服務態度又好   如果香港所有食肆都係咁就好喇   真係比錢都比得開心啲囉 ~

蟹粉小籠包 x 3 - 水準無變到   超級好味呀  

紅油抄手 - 啲菜切到超細粒   好有心機咁   皮薄餡靚

紅油拍青瓜- 都唔係拍青瓜黎嘅   失望呀

食飽就去搵珍珠奶茶   第一次去台灣飲嗰杯珍珠奶茶   係用天仁茗茶沖   所以好好飲   今次特登再搵   點知無 lu   因為珍珠奶茶都唔係咁 Hit 喇 ~

台灣嘅 Shopping Mall 好鬼好鬼焗   行兩行已經好攰   缺氧咁   所以去咗 Food Court 買杯珍珠奶茶坐陣喇   見到隔離個女仔食蒟蒻   我話好似好好味咁   之後里奧大人就睇天書   之後又去洗手間   佢去咗幾耐咁   我突然間心諗   會唔會特登去買蒟蒻比我食呢   估唔到真係買咗喎   嗰刻好感動呢 ~

食完之後就去誠品 lu   逗留咗兩個幾鐘   初初仲諗住無咩書想買   估唔到又買咗唔少   仲有 9折   好開心呀 ~ 

今次打的番飯店喇   超舒服呀   我終於明白點解今次台灣行好似好辛苦咁   原來係因為今次去所有地方都坐捷運   上次就次次打的   唔怪得啦 ~

今晚順便 Book 埋的士聽朝去機場   NT1,000   同上次一樣   我情願比多少少錢   都唔鐘意拎住行李上車落車   好辛苦嘛 ~ 

番到飯店休息 15 分鐘又再出發去市林夜士喇   今晚食完 Donut 再去夜市   因為我驚之後可能唔會經過呀   去到市林覺得無咩驚喜   同埋今期興起司馬鈴薯呀   咁漏點食喎   同埋見到好多好多醬汁喺薯仔上面   真係見到都漏   所以點都唔食呀 ~

行咗一個圈都諗唔到食咩   所以就去排隊買雞扒   再入室內夜市食蚵仔煎   但我真係唔飽囉   同埋我真係好鍾意買嘢番酒店慢慢食   咁先有旅行 Feel 嘛   所以最後買咗啲嘢食同生果就打的走人 lu   呢餐飽到胃痛呀 ~

愛愛愛 ♡ 台北 DAY 2 ( 11-FEB-2011 )

蚵仔大腸麵線 - 都係第一次去台灣嘅好食啲
麻辣豆腐湯 - 叫錯咗   其實想叫炸豆腐   不過算啦   無咁熱氣
黑椒腸 - 又係裡面微熱   點解咁㗎   上次度度都好好食㗎

糯米腸 - 我無食   見到咁巨都有啲驚   同埋個樣十分之衰囉   真係睇見唔想食

紅燒牛肉麵 - 個麵條好煙韌   有驚喜呀

小籠包 - 無特別   最怪係只供應白醋   無紅醋

紅豆抹茶銅鑼燒 - 里奧大人想食咋   我食咗一啖   不過里奧大人話好甜好漏

( 11-FEB-2011  FRI )

唔好講笑   瞓咗成晚   10 點起身   今朝真係精力十足呀 ~

呢間飯店包早餐   諗住去食早餐   點知原來早餐時間只係到 10 點   咁無計啦   出去食啦   又係天黑黑呢 ~

歐式招牌堡 - 新鮮整㗎   超好味

Pita 堡 - 都係新鮮整   又係超好味

家姐想買黑糖   所以比咗張 List 我   話酒店會幫客人訂   點知呢間衰嘢呢   話唔幫我地打電話喎   咁我咪同里奧大人講   家姐啲同事都係經酒店訂   所以根本佢哋唔想打   我咪黑面指住張 List 嘅 Fax 號碼   叫佢哋 Fax   佢哋先肯   做少少嘢都咁   下次唔會再住呢間飯店呀 ~ 

今日又係天陰陰   不過又無影響到心情喎   老土啲講   因為里奧大人一整日會喺我身邊   有佢一齊我已經好開心   天氣點樣都無咩所謂呢 ~

尋晚決定今日會去淡水   所以就算落雨都照去㗎喇 ~ 

一出捷運站都幾大雨   好在之後無咁大雨   感恩感恩   之前𠼦過淡水   但掛住影相   所以都無留意淡水呢個地方   今次因為落雨關係   無乜影相   可以同里奧大人邊行邊傾   感覺好好呀 ~

泡菜臭豆腐 - 唔知食咩好   求其食下嘢咁咋

黑豆花芋圓 - 都唔好食嘅   好在叫咗一碗先咋

黑橋牌珍珠腸 - 超好味呀   食咗 2 串  

魚丸湯 - 普普通通   無咩特別   旨在有地方可以坐下

蝦卷 - 又係要排隊   新鮮炸起真係好好味   不過都唔覺有蝦   得少少豬肉咁囉

細過成日玩 "健子"   依家真係好難有得買 lu

細個都成日食 "朱古力眼鏡"   爸爸次次買零食比我同家姐都係每人兩件嘅   咁家姐唔捨得食   我偷埋佢嗰排食   佢喊呀   諗番起都覺得自己好衰呀   哈哈

明明買糖果玩具   無啦啦有真嘅鹹蛋   咁里奧大人仲唔知係真   好大力咁楂住   仲話好真   之後同佢講話係真㗎   唔好亂玩呀

又係行下食下咁囉   咁就差唔多 5 點   因為買咗啲手信   所以番咗飯店   再出去食嘢 ~

今晚就係去 Bell Boy 介紹嘅年宵夜士食嘢   不過都唔係好多嘢食啫   到最後喺附近舖頭食臭豆腐   再去捷運站附近食嘢   再行下地下街就番飯店喇 ~

愛愛愛 ♡ 台北 DAY 1 ( 10-FEB-2011 )

白苦瓜蜂蜜 - 清熱氣首選

鹽酥菇 (金菇 / 冬菇 / 雞肶菇) - 好香口   不過食得太多都幾漏   我依家先知個老闆舉 V 字   其實我唔係影佢   我影菇咋

蔓越莓 + 檸檬 - 買最大杯嘅   酸酸咪咪好消滯呀

水煎包 - 好好味   個包濕濕哋   我唔識形容   總知我覺得好好食囉 

蚵仔煎 - 嚟台灣必食   其實真係無乜特別   不過梗係覺得台灣係正宗啲咁囉

燒腸 - 我要黑椒腸   但今次唔好食嘅   內面微暖咋   上次好好食㗎

胡椒餅 - 居然要排隊喎   好在唔係排咗好耐   一口氣買 4 個   原來好飽囉   留番 2 個番飯店食   食完我同里奧大人講   呢幾日唔會再食胡椒餅呀

芒果沙冰 - 其實想食粉圓   不過有啲熱   所以食呢個喇   超好味呀

( 10-FEB-2011  THU )

今朝 9 點起身   食完早餐再番屋企梳洗就出發去機場 lu ~

我咃搭 12 點 40 分飛機   所以 11 點半就要到機場   車程好順呀   覺得超快呀   35 分鐘就到機場   諗諗下先記得原來以前住大埔   搭架 E41   起碼要個幾鐘   仲要兜黎兜去先到   所以依家覺得 35 分鐘係超快呀 ~

Check-in 之後就周圍行下   不過我好攰   同埋開始流鼻水   所以里奧大人話唔好行喇   搵個地方坐低食啲嘢好過喎 ~     

最後都係要食藥   仲要係里奧大人之前睇醫生嘅藥   話收鼻水一流喎   但就會令人昏昏欲睡囉 ~

諗住坐飛機瞓下   但又瞓唔到喎   不過個人就好呆呆滯滯咁囉   話咁快就到台灣   仲快過以前由大埔去機場呀   勁呀 ~

台灣天氣天陰陰   我都預咗呢幾日會落雨   最緊要唔好大風大雨就得㗎喇 ~  

一落機就去兌換站   再去買電話卡   之後就坐飛狗巴士去飯店喇 ~ 

我次次去旅行   媽咪都特別擔心咁㗎   所以我次次一到埗   第一時間會打電話報平安   佢知我安全到埗就會安心好多呢   養兒一百歲   長憂九十九絕對係事實呀 ~  

今次住嘅飯店係 "中源大飯店"   係翻新過㗎   不過啲服務員就唔多想做嘢咁囉 ~

呢間飯店都幾多日本團   原來飯店隔離係三溫暖   唔怪之得啦 ~  

一入間房都幾乾淨   但就好暗   令到人好想瞓覺囉   我又好鬼攰   所以我沖個熱水涼   等自己精神啲再出發去食嘢喇 ~

飯店 Bell Boy 話附近有個地方幾多嘢食   咁諗住行去   不過又搵唔到   所以最後打的去饒河街夜士食嘢算 lu ~

今晚 8 點幾就番酒店休息喇   里奧大人話休息夠   抖足精神   留番聽日玩好過喎 ~

和民居食屋 + 金滿堂甜品 @ 九龍灣 ( 9-FEB-2011 )

刺身冷麵 / 炸軟殼蟹 / 和風 Pizza / 相樸火鍋 / 串燒盛合 / 和民沙律 / 雜果拉麵 / 四寶粥 /咖啡雪芭

擂沙湯丸

( 9-FEB-2011  WED )

今日 Off   想陪里奧大人嘛   瞓到夠先出街食早餐   超爽呀 ~

食完去買平安藥   之後又喺屋企 Hea 喇   簡直係前所未有咁 Hea 呀   鬼咩   病完又每月一到   真係打孖嚟辛苦咁呀   所以我真係唔係要食嘢   我都唔願郁囉 ~

 
3 點幾先去食 Tea   屋企樓下食算喇 ~  

聽日去旅行   所以媽咪實會比出門利是   所以之前約定今晚   同埋家姐一齊去和民食飯   我都唔醒起原來今日係人日   估唔到今晚會齊人食飯   好開心呀 ~  

和民真係無咩好選擇   望住個 Menu 好耐   都無咩話特別好想食   但又未飽   所以最後都係去食甜品   食埋甜品就真係好飽喇 ~  

鐵匠 @ 九龍灣 ( 8-FEB-2011 )

( 8-FEB-2011  TUE )

終於要番工喇   好在個肚都無乜點痛   不過如果痛都照番喇   唔想第一日開工就請病假囉 ~

早餐食 KFC 嘅蕃茄湯貝殼粉   酸酸咪咪幾開胃嘅   食完打的番菇場   唔想行呀 ~

番到菇場坐到 11 點半就出去食開年飯 lu   食到 1 點就再番菇場拜神同影大合照   諗住無得早走   點知 4 點左右   阿 Head MSN 我同 partner   我仲以為叫我哋做嘢   原來係話無嘢做可以走   太好喇 ~

難得放早   我就去睇醫生   真係超多人病呀   醫生話我可能流感   好在無發燒   最緊要食藥休息   佢比咗抗生素   不過我都無食   我覺得唔係咁嚴重   唔需要食囉 ~

今晚茄子嚟我屋企拜年   我真係無動力去執屋   個人又攰   腰骨又痛   好在里奧大人 Off   佢可

以幫手執屋   但都係唔夠整齊   所以我 Hea 住嚟執喇 ~

我地差唔多 7 點半就到鐵匠開餐先   差唔多 9 點半就上我屋企坐 lu   傾下傾下原來已經 12 點   茄子都要走 lu   好在大家聽日都 Off   咁可以瞓晏啲 ~

盤菜 (外賣) @ 姑奶屋企 (官塘) ( 4-FEB-2011 年初二 ) + ( 5-FEB-2011 ) + ( 6-FEB-2011 ) + ( 7-FEB-2011 )

( 4-FEB-2011  FRI )

今日好咗啲咁喇   有心情同里奧大人去食早餐   順便睇下有無得睇醫生   如我所料   係無嘅 ~

食完就番屋企梳洗   再出發去媽咪屋企拜年   食開年飯   個人呆呆滯滯   又無得睇醫生   所以飲三冬茶   希望會好啲   因為次次作感冒一飲   好快會好番   希望今次都係啦 ~

估唔到糟糟同蘿蘿今日嚟媽咪屋企拜年   所以等埋佢嚟一齊食湯丸   再傾下偈   差唔多 3 點就走人 lu ~

番到屋企又係第一時間瞓覺   瞓咗兩個鐘又要起身出發去姑奶屋企食開年飯   今晚係食盤菜   唔好食嘅   又油喎   諗起都驚呀 ~

( 5-FEB-2011  SAT )

今日終於可以休息 lu   加上今日每月一到   所以都無胃口   只想瞓   瞓足全日 ~

( 6-FEB-2011  SUN)

唔知係咪之前狂飲三冬茶 + 念慈奄太涼   所以今次第二日都好痛   無嘢想食   只想飲嘢同沖熱水涼再瞓覺   咁又過咗一日 lu ~

( 7-FEB-2011  MON )

諗住呢日會好啲   點知都係痛   我覺得真係應該係三冬茶太涼    所以令到我個肚仲痛   好在呢幾日係假期唔駛番工   唔係都唔知點捱 ~

見到里奧大人食咗幾餐糕   我依家聞到見到聽到蘿蔔糕已經好反胃喇 ~

煎蘿蔔糕 @ 屋企 ( 3-FEB-2011 年初一 )

( 3-FEB-2011  THU )

里奧大人今朝 7 點 45 分起身蒸燒賣做早餐   之後要去老闆屋企拜年   本來我應承咗陪佢一齊食   不過我真係好唔舒服   所以繼續瞓 ~ 

瞓到 11 點就要起身喇    一起身已經覺得超級特級無比勁唔舒服   個喉嚨劇痛   吞口水都痛到呢   心知不妙   一探熱原來已經 101.2 度   嚇得我即刻食粒 Panadol   食完抖陣再沖涼   好似好咗少少咁 ~  

今日要去婆婆屋企拜年   如果唔係嘅話   我真係好想喺屋企休息   但唔去嘅話   媽咪仲擔心   所以幾辛苦都要去喇 ~

差唔多 3 點幾就番屋企 lu   我都唔理咁多   沖完涼即瞓   又覺得好少少咁   新年流流無得睇醫生   唯有瞓多啲   希望可以快啲復原 ~

今晚唔想諗食咩   又唔想出去食   所以叫里奧大人煎糕就算喇   仲要強調一樣嘢   就係我唔會洗碗   只係食咋 ~ 

Ruby Tuesday @ 九龍灣 ( 2-FEB-2011 )

( 2-FEB-2011  WED )

今朝同 8 卦一齊食團年早餐   番到菇場無人有 Mood 做嘢啦   所有大粒又唔喺度   Free 到爆炸呀 ~

無耐收到 Email 放半日   超過無敵勁興奮呀   因為里奧大人已經 Off   家姐又放半日   咁就可能早啲行年宵   之後睇戲食飯嘛 ~

里奧大人交完功課   就同我一齊去南記食米線   超多人又焗   同埋今次個湯底淡咗好多咁呀 ~

諗住 3 點無咁多人行   點知一樣好迫   我覺得有啲焗到頭痛   不過一場嚟到又唔想咁早走囉 ~

行到差唔多 5 點就番屋企 lu   喺屋企坐陣就出發去 Ruby Tuesday 食嘢喇 ~

今晚睇 7:45pm   "非常外父 3"   唔知係咪因為我無睇過 1 & 2   所以覺得一般好笑囉 ~

應該作感冒喇   喉嚨超唔舒服   番到屋企即飲杯 Hot Lemon 就瞓覺喇   邪邪邪呀   呢幾年嘅農曆新年都病㗎 ~

沙爹王 @ 官塘 ( 1-FEB-2011 )

豉椒炒蟶子- 都幾多肉嘅   不過如果再辣啲就更惹味喇
芝士白汁焗餃子- 灣仔水餃嚟嘅   不過都幾好味   同埋唔係咁漏
印度薄餅配咖哩- 必叫㗎
避風塘炒瀨尿蝦- 越食越辣   好惹味   不過就超熱氣
豬肉粉卷- 粉皮超煙韌   里奧大人知我超級 Like   所以咬咗一啖就比哂我食
青檸柑梅蜜- 酸酸甜甜幾好飲   可以消滯

( 1-FEB-2011  TUE )

今朝去到餐廳食早餐   都無咁多人 lu   好多人都開始放假呢 ~

番到菇場都無嘢做 lu   上網過日晨   等到 Lunch Time 就即刻開餐 ~

想煮又唔煮   最後問里奧大人點算好   佢話出去食   咁就出去食啦   去佢鍾意嘅沙爹王   當係做團年飯啦 ~

食完去九龍灣買戲飛   今年啲時間好唔夠用咁呀   好多嘢都係臨急臨忙先去整咁 ~