芝士焗肉醬扁意粉 + 牛油蒜蓉包 + 粟米蛋花湯 ( 31-MAR-2011 )

個包好似心型咁呀

( 31-MAR-2011  THU )

星期四喇   今朝里奧大人上大陸   佢出咗門口我都瞓唔着   係床度典下典下等鬧鐘響   其實都唔知有無瞓到呢 ~

今朝超想食炒米粉呀   估唔到都幾多料 ~

晏晝有 Lunch Box   真係好 Like 食金菇牛肉卷呢   下次整多啲先 ~

依家要做埋少少 A/C 嘅嘢   不過算啦   反正悶起上嚟   有啲嘢做都好嘅 ~  

今晚經過吉嘢家   以為新出咗雪糕   因為離遠見到一個女人 "北" 咗一更白色嘅物體   行近啲睇先知係湯飯 ~  

是日晚餐 - 芝士焗肉醬扁意粉 + 牛油蒜蓉包 + 粟米蛋花湯

芝士焗肉醬扁意粉 - 尋晚特登買豬肉分兩餐煮   咁就唔駛再去買喇   超醒   今次用咗 1 磅百合茄做蕃茄蓉   好似好味過用一大個嘅蕃茄   本來想開包芝士粉   但又想留番整其他嘢   所以用芝士片再切碎   估唔到自己咁有心機呢 ~

牛油蒜蓉包 - 個脆包喺 Yamazaki 度買要 $8.5   之前買 $8 咋   不過我鍾意用呢個包做蒜蓉包   因為大大塊易搽牛油蒜蓉呀 ~

粟米蛋花湯 -  1 盒地們粟米湯 +  1 罐金寶粟米粒   咁先好飲   因為超多粟米粒   里奧大人以為 1 盒粟米湯有咁多粟米粒添呀   真係食嘢唔知米貴 ~

本來 10 點半超勁想瞓   里奧大人又超想沖涼   但就想睇番之後錄左嘅 "Medium"   點知睇咗一 Part 就超勁想追呀   最後又 11 點半先瞓 ~

金菇牛肉卷 + 雙色蛋蒸肉餅 + 炒菜心 ( 30-MAR-2011 )

( 30-MAR-2011  WED )

星期三喇   心情開始興奮   因為好快星期六 ~ 

今朝食沙律芝士腸仔包   超正呀   好軟糯呀   呢間茶餐廳嘅包包真係唔錯   同埋好重手架   唔似聖安娜果啲輕飄飄咁   如果里奧大人上大陸   我夜晚會買齋包比佢做早餐   我以前買聖安娜嘅細麥包比佢   真係買 3 個都唔及依家喺呢間茶餐廳買 2 個咁重手呀 ~

晏晝買咗肥牛湯檬   都幾好味   因為我鍾意有啲芽菜呢 ~

Partner 又喺到中中下   所以我同 8 卦會諗計仔嘈醒佢   8 卦就打 Keyboard 大聲啲   同埋講電話大聲啲   我就特登咳兩聲勁嘅   但最 Work 都係我嗰果招   萬試萬靈呀 ~

今晚好有 Mood 煮晚呀   里奧大人又 7 點番到屋企   所以我就比較趕啲喇 ~

是日晚餐 -金菇牛肉卷 + 雙色蛋蒸肉餅 + 炒菜心

金菇牛肉卷 - 超勁想食好耐喇   所以點都要整   加埋黑椒汁   真係正都不能再正呀 ~ 

雙色蛋蒸肉餅 - 呢個整比里奧大人食   啖啖肉佢最 Like 呢 ~

炒菜心 - 今晚將碟菜平均分兩份   咁里奧大人就唔會又話嫌多   又話好飽喇   真係煩   食菜之嘛   又唔係叫佢食乜喎 ~

今晚做咗一陣功課就瞓喇   呢排好似瞓極都唔夠咁嘅   但又唔係夜瞓噃 ~

嘉華大酒樓 @ 官塘 ( 29-MAR-2011 )

( 29-MAR-2011 TUE )

今日又係天陰陰   凍凍哋咁   不過就超乾燥喇 ~

早餐去麥記   嗰班阿婆真係朝朝食麥記   唔厭嘅咩 ~ 

菇場都一般忙啦   但一樣係靜英英 ~

尋晚食飯傾開偈   里奧大人話間唔中食常餐   搞到我今日都好想食常餐呢 ~

今晚放工去拎中藥   之後就同埋媽咪 家姐 姑丈同兩個姑姐一齊晚飯   因為其中一個姑姐後晚番加拿大 lu   不過依家聯繫都好方便   有 Email 又有 FB   再唔係打 IDD 都好平   只不過係時差問題啫 ~  

佢喺加拿大生活咁多年   節奏步伐都慢過香港人好多好多   我話香港人咩都快   就算睇醫生都好快   最多 2 分鐘   有啲分半鐘咋   佢難以置信呀   佢話加拿大果邊規定最少 15 分鐘睇一個症   我話香港 15 分鐘可以睇好多個症咯   總之香港人咩都快   行路快   講嘢快   食嘢快   所以我哋去到另一個國家   好自然就會覺得人地好慢喇   其實人哋可能係正常速度呢 ~  

8 點幾食完飯 lu   家姐又嚟食雪糕   咁食法真係要狂做運動先得呀 ~

美心 MX @ 牛頭角 ( 28-MAR-2011 )

蒜香骨雲南米線 / 叉燒炒蛋

( 28-MAR-2011  MON )

星期一 lu   都唔係話好攰   感恩感恩 ~

早餐食菠蘿包   因為想齋呀 ~ 

老闆 Off   所以一早諗好咗做功課   點知忙到 12 點   邪呀 ~

Lunch 食 7 仔嘅咖哩烏冬   好耐無食   覺得好好味呀 ~

放工睇中醫   之後去買麵粉同牛油   今晚又坐小巴番屋企   8 分鐘咋   真係快過的士   因為的士無佢哋咁狼嘛 ~ 

今晚又同埋家姐一齊食飯   因為媽咪去睇大戲   佢無飯食   但點知媽咪無睇   所以佢喺媽咪屋企食咗少少飯   再嚟 Join 我哋   因為佢又買咗雪糕比我哋呢 ~

 
我有美心 MX $80 Cash Coupon   但 31/3 喇   所以用埋佢啦   大拿拿 $80 呀   我又買咗三寶   所以叫兩個餐就夠喇 ~

食完就番屋企   食下雪糕傾下偈   家姐 9 點幾走   我就送佢搭車喇 ~  

稻香 @ 九龍灣 ( 27-MAR-2011 )

( 27-MAR-2011  SUN )

今朝無番崇拜   起咗身就去大快活食早餐   食完就番屋企做功課 lu ~

家姐晏晝又嚟同我哋食   順便買嘢   今晚佢同事去佢屋企 BBQ   佢嚟我屋企之前就去惠康買啲豬肉   再買兩包炭   佢話買豬肉個阿姐好愕然問佢買兩包炭嚟做咩   之後佢嚟我屋企   佢話管理員同埋啲人都望住佢喎   咁又係喎   如果買炭 BBQ 嘅話   就直接去 BBQ   點會拎上屋企喎   啲以為佢想燒炭都未定   哈哈 ~ 

家姐打機   里奧大人熨衫   我就做功課   差唔多 1 點 45 分就去爭鮮食壽司   因為家姐未試過呀   今次我哋食咗 23 碟   飽到爆肚 ~

之後一齊番屋企   里奧大人就約埋屋企人去拜奶奶   里奧大人叫我唔好去   要做功課   不過我都唔去㗎喇   來回三個鐘   真係又無咗半日咁喇   咁家姐就陪我到 4 點就番屋企 lu ~ 

差唔多 6 點半又要去稻香食晚飯   我真係覺得稻香麻麻哋囉   同埋佢哋十幾年都食嗰啲   真係超級無敵頂級悶爆呀 ~ 

今晚拎埋之前焗嘅曲奇比佢哋食   其實我食唔哂唔想掉   所以比佢哋食   佢哋個個話好食   不過我唔信囉   事實我覺得真係麻麻哋好食   而家姐啲同事直頭話唔好食添呀   仲話唔似曲奇   我會信家姐同事多啲   因為佢哋食慣好嘢嘛   家姐幾驚我唔開心呀   我又點會喎   我特登叫佢比同事試   聽多啲意見就最好   咁先得到改善嘛 ~

水雲間 @ 皇崗 + 沙爹王 @ 官塘 ( 26-MAR-2011 )

青檸柑梅蜜 - 里奧大人必叫   事實又真係幾好飲呢

印度薄餅配咖哩汁 - 都係里奧大人必叫㗎

蟹肉扒西蘭花 - 想食菜呀  所以點呢個喇 ~
豉椒炒蜆 - 又係里奧大人必叫  今次都幾多蜆肉
避風塘炒賴尿蝦 (一斤) - 必叫啦   超正   我食哂啲避風塘料㗎   所以次次食完都好口渴

( 26-MAR-2011  SAT )

每月一 Off   心情興奮到難以形容呀   今朝家姐過嚟同我食哋早餐   真係好開心呀   食完就一齊上屋企   等埋我沖涼換衫就出發   家姐就去元朗買 BBQ 食物喇 ~

同里奧大人坐直通巴去皇崗   佢係識途老馬   坐到熟哂啦   因為佢坐呢架車上大陸呢   其實我真係好驚上大陸   所以一過關就會好緊張   我居然拎咗香港身份証   好在里奧大人喺前面   我有時間拎回鄉卡   唔係阻住人就唔係咁好啦   個個男人趕住慰妻嘛 ~

今次係第一次去水雲間   上網睇評語都唔錯   又有專車送到門口都幾方便   好過自己坐的士   都唔知會兜去邊 ~

呢間大堂 OK 啦   最緊要感覺都幾乾淨   同里奧大人各自換衫就去按腳一個鐘   呢個按摩係送㗎   因為我哋會再按雙鐘全身按摩呢   如果 3 個鐘仲送埋 Lunch   咁又幾好喎   估唔到星期六無咩人   可能人仔升值   無以前咁抵玩   所以少咗人去   咁都好   我好怕太多人要等呢 ~ 

我哋多數搵女師傅   因為男師傅太大力喇   同埋好似唔係咁方便咁   今次我主力按腰   佢話大力先可以鬆到啲筋   之後會好舒服   我其實半信半疑㗎   不過比佢咁大力按完又即時覺得條腰無咁痛喎   不過真係超超超超大力囉   佢叫我嗌出嚟會舒服啲   我唔啦   唔想變咗劏豬場呀   仲有按個半鐘喎   唔通要我嗌個半鐘咩   到時喉嚨都痛啦    加上我覺得按摩係要寧靜嘅環境   咁咪嘈住里奧大人囉   所以佢次次幫我按完   我都會呼好大啖好長嘅氣   按摩師都忍唔住笑呀 ~ 

呢間話就話按 1 個鐘   其實係 45 分鐘   不過算啦   好多都係咁   有啲就 50 分鐘   但對於我嚟講   個半鐘都夠喇 ~

同里奧大人又坐番專車去皇崗   今次過關仲大穫   我將回鄉卡插咗入 E 通道   好在彈番出嚟咋   唔係就要等佢哋拎番出嚟就煩喇 ~   

番到官塘差唔多 6 點   所以去沙爹王食喇   今次好感恩呀   仲有卡位坐   我鍾意坐卡位   因為可以擺袋同擺衫嘛   唔駛攬住咁辛苦 ~

家姐今晚又黎喎   同埋里奧大人一齊去睇波鞋   不過買唔到囉   之後同佢去超市買嘢   之後上嚟食雪糕再打機   差唔多 10 點幾先走   住得近真係唔錯   佢可以成日上水嚟嘛   咁佢唔駛咁悶呢 ~

住家飯 @ 媽咪屋企 ( 25-MAR-2011 )

白切雞 - 新鮮雞嚟㗎   有雞味   同食雪藏嘅分別真係好大呢   不過我呢一世都唔會整新鮮雞   我覺得好殘忍   但其實冰鮮都係嘅

薑蓉 - 加埋指天椒一齊爆香   佢一路炒我一路咳   不過無咗蔥就覺得失色好多呀 

鵝掌翼 / 豬頭肉 / 生腸 - 超勁想食鵝掌翼   所以尋晚打比媽咪   叫佢買呀   佢話食呢啲就唔蒸魚  我話食鵝掌翼   因為我好少見到有得買呢

炒菜心苗 - 好甜喎   甜過哈哈笑菜心

豬肚 (湯渣) - 蘸豉油胡椒粉食超好味   令我諗起及第粥添

合桃淮山圓肉鮑片豬肚豬展湯- 我第一次飲合桃湯咋   都幾好飲   不過我最鍾意都係食圓肉呢

又擰埋臉   寶寶依家唔同哂喇   肯出竇瞓覺   諗番起佢之前嗰兩年  佢只會哩埋喺櫃入面   對眼係咁望住妳   唔食嘢唔飲水   等我哋走咗先出動   但依家好好啦   會出嚟食嘢又敢瞓覺   咁先正常嘛

( 25-MAR-2011  FRI )

今日係 Happy Friday   真係超級 Happy   因為聽日 Off 嘛   如果啲人係逢星期六都 Off   心情應該無我咁興奮呢 ~ 

今朝等車又耐又塞車   去到菇場附近都 9 點 05 分   所以今次都係買早餐番菇場食算喇 ~

呵呵   又做功課啦   不過膽戰心驚咁睇囉   話哂私人嘢唔係咁好   但我真係無嘢做嘛   好過上網啦 ~ 

今日有 :unch Box 就好喇   咁樣多啲時間做功課嘛   呢兩日有入無出   個肚想爆咁呀   好煩 ~

本來今晚里奧大人都會番媽咪屋企食飯   但又調咗今日上大陸   所以得我自己去食 lu ~

牛油炒菠菜粟米 + 干炒豬扒意粉 + 皮蛋鹹蛋粥 ( 24-MAR-2011 )

( 24-MAR-2011  THU )

今朝好餓呀   食咗碗餐蛋麵   食完有啲滯 ~

菇場一般忙啦   都有啲時間做功課嘅 ~

Lunch Time 仲未餓   所以行一陣   無啦啦超勁想食薯條   所以去買麥記喇   同家姐傾電話   佢話我間唔中就會好想好想食薯條   之後等 Lift 同同事傾偈   佢都係話間唔中就好想食薯條   新鮮炸起真係好好味呢 ~

放工拎中藥   再去街市買餸   明明記低買豬扒   點知掛住諗煮唔煮蕃薯   諗到唔記得買   好在屋企附近有超市   唔係我會顛 ~ 

今晚好有 Mood 煮飯呀   可能煮新嘢呀   哈哈 ~ 

是日晚餐 - 牛油炒菠菜粟米 + 干炒豬扒意粉 + 皮蛋鹹蛋粥

牛油炒菠菜粟米 - 無聊之作啦   不過又幾好玩   咁樣食菠菜無咁悶嘛   粟米又用牛油炒香   加咗少少黑椒都唔錯   所以我好鍾意睇免費報紙   有埋食譜喎   唔太複雜嘅話就可以即買料即煮   正呀 ~

干炒豬扒意粉 - 本來想煮蕃茄蜆肉   但醫師話咳唔好食蕃茄   同埋去到超市又無蜆肉   咁就腦袋急轉彎   煮豬扒意喇 ~

皮蛋鹹蛋粥 - 無啦啦超勁想食粥   應該咁講   其實想食好耐   不過無動力去煲   今晚想清清哋   所以就煮喇   不過唔識控制份量   所以食呢碗粥仲飽過食 3 碗飯   我要抖 10 分鐘先可以再食 ~  

滇品．米線 @ 九龍城廣場 ( 23-MAR-2011 )

糖醋魚柳椒鹽蒜香骨芥蘭菜心

( 23-MAR-2011  WED )

尋晚 11 點瞓喇   瞓咗 8 個幾鐘   精神哂呀 ~

今朝想去麥記食早餐   因為好想飲即磨咖啡囉 ~

行去搭車嘅時候   見到個警察帶眼鏡   唔通依家近視都可以做警察 ?!   同埋成日見到啲警察應該得 5 尺 4 吋左右   有啲有個大肚腩   我印象嘅警察係好 Fit    唔係矮   同埋絕對唔會帶眼鏡囉 ~

番到菇場咩都唔理   做功課要緊呀 ~  

晏晝有 Lunch Box   就係前一晚嘅叉燒炒麵喇   一次炒麵可以食幾餐   真係唔錯呢 ~

今晚番學   所以就同大食表妹食飯呀   叫佢食粉又唔食   仲話叫我食牛肉餅添   我唔去囉   咁遠   食完又要趕番學   好辛苦啫 ~

麻酸樂 @ 九龍灣 ( 22-MAR-2011 )

( 22-MAR-2011  TUE )

今朝又超想食包呀   好味道 ~

尋晚 12 點先瞓   難得細老闆唔喺度   所以喺菇場睇功課   但唔夠瞓   入唔到腦呀 ~

晏晝有 Lunch Box   食完又溫下書咁囉   睇得幾多得幾多 ~ 

放工出旺角睇中醫 里奧大人要去見 Agent   所以我要等埋佢先食飯   好在佢 9 點就去到九龍灣   咁夜唔想食飯   所以去麻酸樂食米線   食完今次   真係唔會再食   因為食完超級口渴呀 ~ 

今晚食飯真係覺得好搞笑   因為坐喺我哋隔離枱係一對女性朋友   里奧大人未嚟之前   我聽到阿 A 講咩嘢   阿 B 都 Ban 嘅   又話唔好咁諗   人哋講咩就聽咩咁   之後佢哋仲激   阿 A 講到人壽保險   阿 B 又 Ban 啦   又話唔好買   妳又未結婚   死咗之後比邊個   死咗之後   求其搞咪得囉   咁阿 B 好扯火好激動話   咩叫求其呀  最憎妳成日話求其   點求其呀   我好少講到發火   但今次真係發火   咩叫求其呀   妳有仔女更咁講啦   阿 B 就解釋   我覺得妳將供嗰啲錢用嚟養老仲好啦   唔駛特登去供人壽啫   阿 B 話我都供咗人壽好耐啦   如果唔係死咗搵人搞   邊個出錢同妳搞呀   妳成日話求其   點求其呀   我最憎妳講求其   妳成日都唔用人哋立場諗嘅   其實我都覺得阿 A 唔用人哋立場諗㗎   同埋佢講嘢技巧好唔掂   一講就 Ban 人   咩都自己係啱咁   點會有人想同妳講嘢喎 ~   

叉燒炒麵 + 炒菜心 ( 21-MAR-2011 )

( 21-MAR-2011  MON )

里奧大人今朝請半日病假   搞到我都唔想起身番工添   唔係想照顧佢   係真係想瞓耐啲呀  哈哈 ~

又唔覺好餓   所以食菠蘿包   甜甜哋都幾好味 ~

今朝超勁開心呀   因為坐我後面嘅同事   阿 Head 都唔喺 office   所以我做功課呀   今次終於覺得自己身在圖書館咁呀 ~

晏晝突然想食多啲瓜菜   所有買三餸飯呀 ~

好在朝早做咗功課   因為晏晝啲 人番哂嚟   不過我都偷偷哋做呀 ~

里奧大人想食木瓜   所以放工特登去遠少少嘅生果檔買木瓜   佢話好味嘛   點知無喎   簡直晴天霹靂呀   好唔老嚟囉   又要去番街市附近買   好在有咋   一口氣買 6 個   唔駛煩 ~

黑開有條路   所以我由街市尾行去街市頭   咁如果買開嗰啲檔無開   咁我都知邊度有得買嘛   真係發覺自己好醒呀   因為想去平時菜檔買菜心   點知得番幾條   去另一檔買   想買生麵呢   居然放假   要到 24 號先開   咁好啦   又去另一檔買   講真   唔係里奧大人想食   我真係會放棄整囉   我好憎買嗰樣無嗰樣 ~

上次喺明星買叉燒係 $56 斤   今次要 $68 斤   貴咗好多呀   下次都係自己焗算喇   不過可能同買嘅差唔多   因為依家啲豬肉好貴   好記得幾年前買 $30 豬骨覺得好多同埋好重   依家 $30 就好少囉 ~ 

是日懶餐 - 叉燒炒麵 + 炒菜心

叉燒炒麵 - 有血有汗有淚水嘅叉燒炒麵   不過今次用咗李錦記老抽   啲麵好似深色啲咁   我覺得好靚仔呀 ~

炒菜心 - 好耐無見過哈哈笑菜心喇   所以買嚟食   但唔係太甜囉 ~
 

今晚家姐配完眼鏡打比我   問有無飯食   因為佢突然想食嘢   但無叫媽咪留飯   好彩我次次炒麵都會炒一大盤   但其實只係用兩個麵餅   佢嚟食當然無問題啦   好過我要帶多兩餐 Lunch Box 嘛   食完再一齊食士多啤梨同雪糕   佢話超級勁飽呀   我最鍾意人哋地食到飽飽咁走呢 ~

我都想行下   所以送家姐去巴士站   依家天氣勁潮濕   本來唔想熨衫   但又驚一陣噏住有味   所以就熨埋啦   當做運動 ~  

焗雞翼 + 焗朱古力曲奇 ( 20-MAR-2011 )

( 20-MAR-2011  SUN )

今日我想專心做功課   加上里奧大人又唔舒服   所以唔番崇拜喇   10 點半起身食早餐   之後就開始焗曲奇   再做功課喇 ~ 

不過原來都焗咗唔小時間   無做到功課添呀   2 點半去池記食 Tea    番嚟再焗 ~

焗下又做下功課咁囉   啲時候好唔夠用咁呀 ~  

第一批牛油無放軟   因為我覺得自己用罐裝牛油   所以唔需要放軟   但打得唔夠滑   但無繼續打   一句講哂衰心急   但就唔忿氣   覺得無理由唔打得滑 ~

第二批就等啲牛油放軟   即係等咗兩個鐘之後先打   其實我唔知放軟同唔放軟有咩分別   同埋今次好有心機打   打出嚟好滑咁   定係因為放軟咗呢   不過點都好   見到咁滑真係好有成功感囉   不過應該厚咗啲   再薄身少少應該會更脆   我覺得 ~

焗完都差唔多 5 點   不過口感同味道都麻麻哋囉   但焗得太多喇   我又唔好曲奇   所以叫家姐嚟拎啲比媽咪同佢啲同事食   自己留番十塊八塊就夠 lu ~

家姐坐到 6 點幾就去媽咪屋企 lu   我就開始煮嘢喇   今晚唔想煮飯   就咁煮米粉就算喇 ~ 

是日懶餐 - 焗雞翼

焗雞翼 - 本來今晚約咗媽咪 家姐出去食飯   但媽咪話買咗餸   所以家姐就要番去食飯囉   但又唔想再落街買嘢   所以就焗雞翼喇 ~ 

估唔到今日全日無咩點做功課   食完飯抖陣   再沖個靚涼就要開行 Turbo 喇   快啲搞掂唔駛心掛掛呢 ~

稻香 @ 九龍灣 ( 19-MAR-2011 )

( 19-MAR-2011  SAT )

要番工呀   今朝早餐食腸粉   好似好耐無食咁   都 OK 好味啦   不過太多花生醬   所以都幾漏 ~

菇場有嘢做噃   仲要係 Urgent   唔做唔得啦 ~

放工睇中醫   真係越嚟越覺得呢個中醫好有醫德   同埋同佢傾偈好舒服呢 ~ 

睇到 2 點就打比里奧大人   今日又想飲茶呀   老餅生活從此起 ~

叉燒腸 / 荔芋鴨腳扎 / 鳳爪排骨飯 / 山竹牛肉球 / 紅油抄手 / 雪耳燉木瓜糖水 / 陳皮紅豆沙

飲到 3 點半就番屋企坐陣   4 點幾再去拎藥   滕嚟滕去都幾攰 ~

今晚好開心呀   因為同喺加拿大番嚟嘅姑姐一齊食晚飯呀   加埋姑姐姑丈  2 表哥表嫂  自己屋企人一共 10 個人食飯   其實唔想去稻香   但鴻星比人包咗場   所以要去稻香囉 ~

住家飯 @ 媽咪屋企 ( 18-MAR-2011 )

蒸桂花魚 / 燜冬菇江瑤柱蠔豉 / 豬腳薑醋 (媽咪朋友整嘅) / 蓮藕紅蘿蔔栗子鮑片豬展湯

我一影相佢就擰埋塊貓臉   所以我捽佢   咁唔俾面    我估我應該摔得佢幾舒服   所以瞓埋添呀

( 18-MAR-2011  FRI )

Happy Friday 喇   今朝食完早餐就去 Shopping   10 點先番菇場   爽呀 ~

番到菇場好似好快又到 Lunch Time 咁   如果日日番 10 點就好喇 ~ 

Lunch Box 就係尋晚食剩嘅肥牛 金菇同蘿蔔   自己再加多 Pack 芋絲  但都係好唔係咁飽囉 ~

睇書睇到 1 點 40 分   突然好眼瞓   咁嘗試瞓下啦   又瞓到喎   2 點先醒 ~ 

里奧大人感冒呀   請咗半日病假   原來佢尋朝已經冷親   所以夜晚其實唔想打邊爐   但見我咁興奮要打   所以佢話無所謂   累到佢唔舒服添 ~

感冒最緊要休息   所以我今晚都會番媽咪屋企食飯   咁可以拎湯比佢嘛   幾咁好呢 ~

打邊爐 @ 屋企 ( 17-MAR-2011 )

魚片頭 (潮興) - 家姐喺潮興買㗎  佢話好好味  真係好好味呢

水餃 / 雲吞 (潮興) - 好新鮮啊  真係皮薄餡靚呢

貢丸 / 魚蛋 / 牛丸 (潮興) - 好彈牙噃  有驚喜
蟹柳 - 家姐指明要食   呢包蟹柳 (12 條) 都要 $29.9   我覺得好貴呀 
響鈴 - 家姐托同事買   我第一次食響鈴   好好味呀   浸兩浸就食   啲口感好得意

牛柏葉 / 魷魚 - 我問家姐食唔食  佢好開心話食   原來佢鍾意食   但驚我唔食   所以無叫我買

雪花肥牛 (半磅) - $72/磅   我想話要半磅   點知講錯咗半斤   好在後尾講番啱咋

炸魚皮 (潮興) - 超薄又超脆   超級正呀

唐生菜 (2 棵) - 家姐話食唐生菜   反而我好少唐生菜打邊爐  但又幾好味喎
辣椒豉油 - 家姐第一件事問有無辣椒豉油   咁我當然會用多啲隻指天椒啦   平時我最多 5 隻咋  今次差唔多 15 隻

生蒜 / 蔥花 - 多啲配料開心啲咁呢   哈哈

鴛鴦湯底 (沙爹 + 白蘿蔔 / 芫茜皮蛋) - 啲白蘿蔔索哂啲汁   超好味又無渣

松花皮蛋 - 估唔到 $2 隻都有松花皮蛋呢   真係好鬼靚呀

( 17-MAR-2011  THU )

星期四 lu   假期尾最令人開心啦   雖然我唔係個個星期六都 Off   但番半日都好開心架喇   咁諗又開心又正面   哈哈 ~

今朝想食腿蛋包   但時間關係   因為已經 8 點 45 分   我驚一入餐廳門口就見到老細出嚟   所以去另一間食餐蛋治喇 ~

菇場唔忙呀   所以要自己搵啲嘢做下咁啦 ~

Lunch 食又食辛辣杯麵呀   因為趕住做功課   所以最緊要快 ~

依家日本漏幅射   所以要搶鹽   話可以防幅射   我同事食完飯番嚟話超市無哂鹽   雞粉都無   之後媽咪打嚟話連豉油同米都比人搶哂   有啲仲顛去買碘丸   唔該啦   人哋日本都未咁   妳駛唔駛咁驚呀 ~

今晚家姐嚟我屋企打邊爐   所以我要多啲時間準備   因為想佢一嚟到就有得食嘛 ~

人算不如天算   諗住里奧大人喺大陸要 8 點先開餐   家姐會早到   但估唔到反而里奧大人 7 點 20 分番到屋企   家姐 7 點半先到   因為佢想拎士多啤梨比媽咪食   同埋喺媽咪屋企拎雪糕比我   所以最遲係佢   不過唔緊要   因為我都未整好 ~

差唔多 7 點 45分開餐   一齊食好開心呀   因為可以多啲嘢嘛 ~

次次打完邊爐都會超勁想食甜嘢   所以開雪糕食喇   咁先夠完美呀 ~

泰北美食 @ 九龍城 ( 16-MAR-2011 )

冬蔭功湯河 ($35) - 家姐話好好味  無咩奶味  但原來佢係要加辣  我唔記得咗  所以都覺好重奶味囉

泰式炒雜菜 ($38) - 好惹味  同埋鍾意有唔同嘅菜  因為自己唔會咁整呢

生菜包 (豬肉) ($38) - 大食表妹話想食喎   陪佢食啦   其實我唔鍾意食肉碎   同埋唔係太鍾意薄荷葉嘅味道

生菜- 好新鮮脆綠   好靚仔呀  同埋比我感覺係乾淨囉
海南雞飯 ($39) - 大食表妹食咋   我無試到   佢咁大食   費事食佢啦

辣汁 - 試咗一細啖   無我想像中咁好味  但講唔出想像中係咩味   哈哈 

冰水 - 有啲椰汁味咁喎  唔錯  因為我好少飲餐廳提供嘅水  同埋今次比我感覺啲嘢食好辣   一定要飲冰水咁呢

( 16-MAR-2011  WED )

又話得 14 度   但又唔係覺得好凍喎   可能之前兩日太熱喇 ~ 

今朝搭地鐵   見到個學生妹有兩部手機   係咪真係咁多電話要講呀   咁即係有兩張咭啦   即係一張同父母傾   一張用嚟同 Friend 傾偈同 Send SMS   依家細路真係物質豐富   放學就拎住杯 Starbucks   真係識嘆   我真係唔捨得飲囉 ~ 

早餐食扒芝腿治   原來真係上次無加到半油去煎   雖然加牛油好肥   但真係好味好多呢 ~

菇場又一般忙咁啦   今日沖花茶飲   慢慢飲好 Relax 咁呀 ~

好快就到 Lunch Time 喇   今日有 Lunch Box   我鍾意排到 Lunch Box 整整齊齊   咁樣見到都開胃啲啦   最怕啲餸好似打風咁   好肉酸呀 ~

今晚要番學   所以又同大食表妹食飯   今次我想食冬蔭功   所以就去食泰菜喇 ~  

呢晚里奧大人幫手熨衫   但我番到屋企嘅時候   佢話唔想摺衫   因為有其他自己嘢要做   我笑笑口話我平時都係又熨又接再做自己嘢啦   其實我超想發脾氣   不過我唔會   只係黑面   我唔想臨瞓前有嘢令自己唔開心而瞓得唔好   不過佢應該知我唔 Like   因為我喺睡房睇書   用好平淡加啲重嘅語氣問佢係咪睇電視   係我就關門   我 Feel 到佢眼神好驚囉   但事實我真係唔開心   我唔想開口講   因為我知我會好火   咁依家最好啦   我唔駛發火而你知我唔開心   應該下次識點做喇啩 ~

梅菜炒豬肉 + 脆肉瓜炒蟹餅 ( 15-MAR-2011 )

( 15-MAR-2011  TUE )

今朝好鬼餓呀   所以去麥記食豬柳蛋漢堡   其實我之前最憎食呢個包   但唔知點解依家又 OK 喎 ~

細老闆無番真係好   我上網時唔駛下下望後面   因為咁做係人都知我上網啦 ~ 

晏晝有 Lunch Box   食完又做功課   真係好喇 ~  

里奧大人上咗大陸   所以差唔多 8 點先食飯   好嘅係可以有好多時間準備   唔好嘅就係太遲食飯囉 ~

是日懶餐 - 梅菜炒豬肉 + 脆肉瓜炒蟹餅

梅菜炒豬肉 - 超好味呀   如果加啲辣椒仲正   不過里奧大人話唔想辣 ~

脆肉瓜炒蟹餅 - 第一次用蠔油做汁 (1 湯匙蠔油 + 1 茶匙糖 + 生粉)   原來有汁嘅瓜菜係幾好味喎 ~

4 月 6 日要交讀書報告   時間實在十分之緊迫   所以依家夜晚嘅時間對我嚟講係十分之重要   好在依家無電視劇追咋   不過有都唔睇喇   為了做好份功課   有時都要作出一啲犧牲呢   我依家覺得原來里奧大人之前做功課真係好辛苦   因為佢做公司嘢已經好忙   番到屋企又要再做   只有假期先做功課   之前仲怪佢陪我行街又催我番屋企做功課   我依家明白哂啦   唔好睇少一個半個鐘頭   用嚟做功課可以做到好多嘢㗎 ~ 

蒜蓉拍青瓜 + 回鍋肉 + 川貝黃耳淮山鱷魚肉湯 ( 14-MAR-2011 )

( 14-MAR-2011  MON )

Monday 喇   一個幾熱嘅 Monday   不過星期三又話凍番   呢啲天氣真係玩謝人喇 ~

早餐食芝士沙律腸仔包 + 咖啡   同餐蛋治 + 咖啡一樣價錢   我覺得食餐蛋治抵啲咁   不過間唔中又好想食焗嘅包   如果新鮮出爐   個包軟軟糯糯好好味 ~

菇場都忙喎   都好   無咁易眼瞓 ~

Lunch 食辣白菜辛辣杯麵   都唔辣嘅   不過我好鍾意食辛辣麵嘅質感㗎 ~

今晚呀   點都要煮   因為我好想煮飯呀 ~

時日晚餐 - 蒜蓉拍青瓜 + 回鍋肉 + 川貝黃耳淮山鱷魚肉湯

蒜蓉拍青瓜 - 想整好耐啦   但又唔想喺街市買佢地話日本溫室嘅小青瓜   所以尋日去 Piago 見到日本小青瓜   我就買咗一 Pack 喇   $12 有 5 條   都好抵喎   又爽脆   用嚟做沙律都好喎 ~

回鍋肉 - 里奧大人喉嚨唔多舒服   所以唔加勁辣青椒   如果唔係會更好味 ~

川貝黃耳淮山鱷魚肉湯 -  我次次同媽咪講電話都有幾聲咳   所以媽咪尋日特登煲比我㗎   真係做病人就最舒服囉   難為身邊關心自己嘅人   真係要好好愛惜自己身體呀 ~

Saizeriya ( 薩莉亞意式餐廳 ) @ 將軍澳 ( 13-MAR-2011 )

水牛芝士伴蕃茄 ($20) - 我未食過水牛芝士  所以試下  點知無味嘅

黑胡椒煎鴨胸 ($16) - 媽咪想食咋

凱撒沙律 ($20) - 反而呢個有驚喜   因為份量都唔少

卡邦尼蜆肉鐵板煮 ($16) - 無特別囉

吞拿魚比薩 ($28)- 估唔到都幾多吞拿魚  不過批底唔係脆  好似 Pita 包咁

海鮮意大利飯 ($24) - 我未食過意大利飯架  但覺得呢啲唔係意大利飯囉   根本係爛飯   超唔掂呀

特選鐵板牛扒 160g ($39) - 我無啦啦想食牛  熱辣辣好好味呀  不過啲肉係 "鞋"   但我又好鍾意食喎

( 13-MAR-2011  SUN )

今朝里奧大人 9 點幾已經起咗身   咁我都瞓唔着   所以就出去食早餐喇 ~

見有時間   所以去埋惠康買嘢先番屋企   之後就番教會 lu ~ 

崇拜完畢就再去 Piago 買番尋日未買嘅嘢   點知原來個 Special Price 係有優惠時段   至到 1 點咋   從來無諗過會咁囉   不過算啦   向好方面諗   就係慳番啲錢 ~ 

里奧大人無啦啦話想食 Mos Burger   所以順便食埋 lunch 喇   其實我未餓   不過難得里奧大人話想食嘢   我咪陪佢食囉 ~ 

鱆魚燒拚日本炒麵 / 金平牛蒡珍珠堡

番到屋企又溫書   里奧大人出去做運動   今晚佢同事結婚要去飲   我就同媽咪 家姐去新都城食嘢喇 ~

無啦啦勁塞車   所以要等個幾鐘頭先有得食   不過上菜好快   都唔知好定唔好囉   好嘅就係快   唔好嘅就要好快食哂囉 ~

中華沙律 + 螺肉 (外賣) + 辛辣麵 ( 12-MAR-2011 )

( 12-MAR-2011  SAT )

差唔多 1 點先瞓   極之唔願意起身番工呀 ~

其實無咩胃口   但又想食丁米喎   好彩食得哂咋   唔好浪費食物嘛 ~

老闆 Off   幾大都唔做嘢呀   其實有嘢做㗎喎   不過後尾細老闆無啦啦番咗工   咁我就回復正常   做番我應該做嘅嘢喇 ~

同里奧大人去 Piago 買嘢   今次又衰咗   諗住買咖啡   不過價錢同單張嘅唔同   但我話照買  最多記得比錢時 Check 清楚   仲話呢間超市成日整錯價錢   但係里奧大人太清楚我鍾意睇啲唔睇啲嘅性格   所以佢幫我睇   又要我去問 Cashier   原來係聽日先做特價呀   真係好彩問一問   唔係真係好核突呀 ~

買完嘢都差唔多 2 點半   所以同里奧大人飲茶喇   今次又係好飽   但寫點心嘅時候又唔覺得叫咗好多咁架喎 ~

帶子炸雲吞 / 牛肉腸 / 紅油抄手 / 山竹牛肉 / 魚湯鮮竹卷 / 蟹籽燒賣 / 灌湯餃 / 冰鎮鵝掌翼

番到屋企執屋打掃   再煲埋菊花茶   咁就乖乖咁坐定定做功課喇 ~

是日懶餐 - 中華沙律 + 螺肉 (外賣) + 辛辣麵

中華沙律 + 螺肉 (外賣) - 喺 Piago 買㗎   $19.9/盒   用嚟做餸都唔錯   不過唔知點解   我食完呢啲凍嘢一定要食番熱嘢   唔係個人會好唔舒服咁㗎 ~

辛辣麵 - 里奧大人知我攰   所以係佢煮   只係煮咋   不過唔知點解佢煮麵煮到啲個蓋都污糟囉   下次都係我煮算喇   唔駛洗咁多嘢呀 ~ 

皇馬餐廳 @ 官塘 ( 11-MAR-2011 )

豉椒排骨炒河 (下午茶餐) - 幾好食喎  雖然預咗細份  但真係好細囉

惠洲梅菜扣肉飯 (下午茶餐) - 駛唔駛咁難食呀  肉又乾  梅菜又唔甜

越式春卷拚雜果沙律 (下午茶餐) - 又話越南春卷  呃人嘅  超衰呀

( 11-MAR-2011  FRI )

今朝真係一個意想不到嘅 Happy Friday 呀   好開心呢   一早家姐打嚟話糟糟多咗兩張王菲演唱會飛   問我要唔要   咁問里奧大人睇唔睇   佢話睇   咁我就要囉 ~

尋晚啲三文魚骨腩好漏   今朝都無咩胃口   所以食個歐陸早餐算喇 ~

番到菇場都一般忙   不過有啲零零碎碎嘢要做囉 ~ 

糟糟喺 Lunch Time 特登拎飛比我   超級感動呀   拎完飛   我就買嘢番菇場食喇 ~

雞翼喇沙米線超級勁難食   不過其實我又未食過真正喇沙喎   哈哈

好感恩呀   原本里奧大人要自己喺大陸去機場   點知佢 2 點幾番咗香港   咁我哋就可以一齊去啦 ~  

放工即走 lu   同里奧大人喺茶餐廳食嘢算喇   最緊要夠快   因為真係好趕   估唔到呢間茶餐廳下午茶係至到 6 點 45分   不過份量唔會多   同埋唔好食呀 ~ 

搭 A22 去機場博覽館   預咗塞車    好在 8 點 30 分先開場咋 ~

講真   $680 一張飛我真係唔會買囉   同埋我唔係話好鍾意王菲   不過都有聽佢啲歌   因為把聲好靚   今晚演唱會係無嘉賓   無 Dancer   連唱兩個鐘   講咗 5 次多謝   無 Encore   佢唱 Live 同聽 CD 差唔多   好勁呀 ~

10 點 30 分準時散場   城巴加開 A 車出市區   不過都差唔多 50 分鐘先番到屋企   沖埋涼   過哂平時瞓覺時間   所以好難先瞓得着呀 ~

板長壽司 @ 九龍灣 ( 10-MAR-2011 )

醬燒三文魚骨腩 x 2 ($20/碟) / 穴子天婦羅卷 ($25/碟) / 黃旗吞拿魚壽司 ($8/件) / 芒果蟹籽沙律 ($25/份) / 帆立貝壽司 ($12/件) / 火灸三文魚 ($6/件) / 珍味廣島蠔壽司 ($8/件) / 三文魚壽司 ($5/件) / 蔥粒吞拿魚腩軍艦 ($10/件) / 安康魚肝壽司 ($8/件) / 芥辣墨魚軍艦 ($9/件)

( 10-MAR-2011  THU )

今朝有番啲胃口喇   去麥記食芝蛋包 + 咖啡   食完超級反胃呀   短期內唔會再食麥芝蛋 ~

之前嗰幾日無做嘅嘢   今日要做哂喇   前所未有咁忙呀 ~  

Lunch 要食辣呀   好感恩今日有炒米粉呀   覺得好好味呢 ~

忙呀忙呀忙呀   做到腰骨都痛埋   好在搞掂哂 ~

今晚都唔會煮 lu   里奧大人今日又無上到大陸   咁可以早啲食飯嘛   突然好想食醬燒三文魚骨腩   所以去板長喇 ~

呢排隻腳成日作抽筋   里奧大人話因為我着短褲   隻腳成日好凍就好易抽筋   但我又真係唔鍾意着長褲囉   好熱咁   不過尋晚着咗又真係好好多喎 ~ 

滇品．米線 @ 九龍城 ( 9-MAR-2011 )

涼拌青瓜 / 雲南酸辣米線 / 椒鹽蒜香骨 / 芥蘭

( 9-MAR-2011  WED )

今朝有啲胃口   所以去 KFC 食蕃茄湯貝殼粉   酸酸咪咪真係唔錯唔錯 ~

番到菇場都無做嘢呀   唔想做呀 ~ 

Lunch 就咁食車厘茄就算   想瞓又瞓唔到添 ~

今晚要番學呀   大食表妹約我食飯   不過我想坐得舒服啲   所以去試呢間食店喇 ~

日式炒烏冬 + 蒜泥油麥菜 ( 5-MAR-2011 ) + ( 6-MAR-2011 ) + ( 7-MAR-2011 ) + ( 8-MAR-2011 )

( 5-MAR-2011  SAT )

今朝同平時一樣時間起身   咁樣唔駛咁趕   其實可以遲啲番菇場嘅   不過今次又唔係好想喎 ~

番到菇場一樣無嘢做啦   勁想放工呀 ~

今日放工去睇中醫   清埋啲咳先   不過位元堂都幾貴   兩劑藥 + 診金 + 煎藥要 $340   同平時睇開嗰個中醫差一陪   但無計啦   睇開果位又未番   我又唔想拖   驚變哮喘呀 ~

同里奧大人去食 Tea 再去 Piago   睇到一個 Mochichi 電話套都幾得意   我就肯定唔會用   問里奧大人會唔會用   佢話唔會用   點知我話如果我比 $6,000 咁用唔用   佢即話用   咁我就即刻改為話 $1,000   佢仲嘈   我決定封盤   之後比佢煩到我呢   話無信用喎   真係唔明   我對佢唔差吖   又會買嘢比佢食   但佢成日 "喉" 住我啲錢咁嘅  ~    

番到屋企發奮做家務呀   連窗都抹埋   又拖地洗衫熨衫   仲煲埋川貝雪梨茶添呀   之後抖咗半個鐘再煮飯   勁充實呀 ~

是日懶餐 - 日式炒烏冬 + 蒜泥油麥菜

日式炒烏冬 - 啲日本烏冬煙煙韌韌超好味呀   不過唔知點解   啲汁越炒越杰咁   但街嗰啲好乾身喎   真係要研究下先得喇 ~

蒜泥油麥菜 - 蘸點埋甜豉油好好食㗎   又簡單   真係好鍾意食油麥菜呢 ~

( 6-MAR-2011  SUN )

同里奧大人 10 點起身 lu   食完早餐就番教會   仲諗住今日做運動   點知每月一到   有啲唔舒服   所以里奧大人自己食 Tea   之後做運動   同埋食晚飯   我就係咁瞓喇 ~

( 7-MAR-2011  MON )

今次又係好唔舒服咁呀   又請病假   係咁瞓同沖熱水涼   沖完真係舒服好多   但今次好攰好攰呀   攰到連落街睇醫生都唔想呀   所以最後變為請 A/L 算喇 ~

( 8-MAR-2011  TUE )

要番工啦   慘呀   唔願食嘢   唔願做嘢  呆呆咁坐喺度   好在 Lunch Time 瞓咗半個鐘都好啲   不過都係好唔舒服咁   所以捱到放工即走喇 ~

里奧大人上咗大陸   所以我等佢買嘢比我食   今晚有啲胃口食嘢   食咗少少雙丸麵   不過啲麵好重好重梘水味   好難食呀 ~ 

住家飯 @ 媽咪屋企 ( 4-MAR-2011 )

( 4-MAR-2011  FRI )

Happy Friday 喇   不過今日真係好開心   唔知點解 ~

早餐食又腿蛋包喇   如果自己識整包都幾好   不過我試過啦   整到唔知似乜   無心機呀   成包粉都掉埋   不過依家唔會亂掉粉喇   因為依家乜都貴哂   唔想咁嘥嘢呀 ~

好在有啲嘢做   開心嘅情況下做嘢   真係做得衝勁過人咁 ~

 
話咁快就 Lunch Time   今日咩都想食   想食麥記魚柳包餐   $20 真係好吸引   不過又覺得好無益咁   所以最後食車仔麵喇 ~

今日里奧大人無啦啦又要上大陸喎   搞到無得去媽咪屋企食飯   今晚家姐又 Annual Dinner   得番我同媽咪 工人一齊食咋   不過都好開心   最緊要唔駛煮有得食嘛 ~

板長壽司 @ 九龍灣 ( 3-MAR-2011 )

黃旗吞拿魚壽司 / 煙鯖魚壽司 / 海膽壽司 / 安康魚肝壽司 / 珍味廣島蠔壽司 / 芥辣墨魚軍艦 / 金三文魚壽司 / 三文魚醬油漬壽司 / 蒲燒宮城秋刀魚壽司 / 稻燒宮城海鰻壽司 / 炸墨魚軟骨 / 炸軟殼蟹 / 綠茶冷麵

( 3-MAR-2011  THU )

今朝好想食甜嘢   所以去麥記食熱香餅   煙煙韌韌又幾好味   依家去到邊都聽到啲人講 $6,000 點用   班阿婆又喺度講   有個話整牙   另一個話整 $6,000 整金牙都得   有個仲搞嘢   話 $6,000 買金都有排買   另一個話 $6,000 半兩都買唔到啦   依家一兩金接近 $14,000   依家啲錢好唔見駛啦   但有得派好過注資落 MPF 囉  講真  依家有 $6,000 同埋退稅   我都好滿足架喇   都唔明點解仲有啲人喺度嘈嘈嘈   派又嘈唔派又嘈   真係好鬼煩呀 ~

番到菇場忙咗啲煩嘢就無嘢做 lu   時間過得好慢咁呀 ~ 

今日有 Lunch Box   因為上次煮肉醬意粉時   特登買多啲豬肉嚟炒飯   咁又唔駛嘥咗啲冷飯 ~

今晚同家姐  媽咪去板長壽司呀   因為家姐睇親 "魚躍在飛見"   見到有人食壽司   就好想食   所以佢尋晚忍唔住打嚟話要請埋我哋去食壽司囉 ~ 

里奧大人又上咗大陸   所以食唔到   但家姐又超想食煎釀三寶   所以等埋里奧大人番嚟一齊去買   之後上我屋企食喇 ~