入院 ( 30-JUN-2011 ) + ( 1-JUL-2011 ) + ( 2-JUL-2011 ) + ( 3-JUL-2011 ) + ( 4-JUL-2011 )

( 30-JUN-2011  THU )

本來諗住今朝自己一個人入院   估唔到里奧大人請假陪我呢   真係好感動   因為佢知我係好驚   但又要扮醒嗰隻 ~

食完早餐就唔可以食嘢喇   所以食至 Heavy 嘅麥記早晨全餐   咁應該可以頂到好耐呢 ~

食完番屋企梳洗就出發去浸會醫院喇   一入到去登記   我覺得好似去咗酒店咁呀   招呼好到不得了   個個都好有禮貌   如果政府醫院都係咁就好喇   咁病人唔會咁驚囉 ~

辦理哂入院手續就上房喇   今次住大房   雖然我保險係買 2 等房   但我實在驚無人陪我   所以一定要住大房   我張床係窗邊   好在用深色窗簾   唔係肯定好早就曬醒 ~

搞掂哂就陪里奧大人去 Canteen 食嘢   之後就周圍行下就番房 lu ~

5 點半做手術   所以 4 點要換定衫   換完衫開始有啲緊張喇   因為好驚種豆呀 ~

4 點 55 分準備入手術室喇   左 Check Check 右問問都差唔多 5 點幾   一過手術床又唔係話好驚   只係覺得好暖   咁 Check 心電地圖嘅時候   姑娘叫我放鬆   所以比啲音樂我聽   等我無咁緊張喎   之後見到霍醫生   第一句話就同我講   話我貧血   我即刻問做唔做得手術 ?!   好在霍醫生話做得   只係唔想同我輸血   無耐就有麻醉師幫我種豆 & 打麻醉藥   嘩   第一針唔得呀   痛到飛起呢   要第 2 次先得   之後我好快瞓着 lu ~

5 點半開始做   醒咗先可以推出手術室   里奧大人話做咗差唔多 2 個鐘   因為佢喺手術室門外由 6 點等到 8 點   肯定心急到佢咩咁   感謝主   手術非常之成功   不過我醒嘅時候第一句就話傷口好痛呀好痛呀   難以形容   廿級痛楚呀   之後打咗支止痛針就即刻唔痛   勁呀 ~

里奧大人一見到我就拍我塊面   有仇報仇咁拍啦   哈哈   上到房聽到里奧大人同人傾偈   原來 CC 嚟咗   仲 7 點嚟到   又買埋車厘子   不過我實在太攰   佢同我傾咗兩句就走   同埋我都隱約聽到霍醫生同里奧大人講嘢   話一個纖維瘤用咗 5 分鐘就搞掂   另一個線肌瘤就用咗個幾鐘慢慢掘出嚟   之後我又瞓咗喇 ~

醒咗嘅時候又見到家姐同糟糟   我又係傾咗幾句又瞓 lu   之後叫埋里奧大人番屋企休息   因為我都係瞓覺 ~

之後有姑娘幫我輸 2 包血   之後就每個鐘嚟 Check   有個姑娘超勁好呀   摸我塊臉   睇下我有無嘢   不過我啲麻醉藥都未過   望完佢一眼我就咗 ~

( 1-JUL-2011  FRI )

今朝無胃口   好在吊緊鹽水   我覺得自己最勁係唔知道自己插緊尿喉   同埋傷口插咗條 Tube  用嚟放啲污糟嘢   但我只係見到成包血囉   超恐怖 ~

左面插 Tube   下面插尿喉   肚下面又傷口   右手又吊鹽水   根本我都唔敢郁   雖然都黐得好實   但都驚囉 ~

里奧大人 10 點幾到喇   但我都好攰   佢有佢做公司嘢   我有我瞓   之後家姐又嚟   坐到 2 點幾就走   因為我又係咁瞓   佢驚阻住我瞓 ~

姑娘要我食飯   但我真係無胃口   所以要我再吊鹽水   我都話好喇   好過無嘢落肚   暈咗仲煩 ~

差唔多 7 點幾   姑奶 & 2 姑奶嚟探我   傾咗陣就走   之後到水姑一家嚟   晴晴好乖呀   全程坐喺到捉住我隻手   好擔心好緊張嗰隻咁呀   我覺得好窩心呢   佢哋傾到 9 點就走   里奧大人就陪到我 10 點呢 ~ 

( 2-JUL-2011  SAT )

尋晚瞓得勁差   原來隔離床嘅太太係腦退化   所以成晚要見老公   半夜 1 點幾喊哂要見老公   陪瞓搞佢唔掂   所以姑娘最後都 Call 咗佢老公   不過只可以喺出面瞓   佢老公一見到老婆就話   唔駛驚   我呢幾日唔會走   陪到妳出院為止   總知妳想幾時見到我就 Call 我   我喺出面   妳唔駛驚   我聽完都好感動呢 ~

因為插住條尿喉好痛呀   痛到瞓唔到   每半個鐘醒一次   幾辛苦先等到 8 點醫生巡房   好在醫生話可以拆尿喉   估唔到每月一到嚟探埋我添   呵呵 ~

之後諗住瞓   點知隔離位太太嘅老公講嘢好大聲   所以我瞓唔到   等里奧大人嚟嘅時候   就叫佢細聲啲   因為我真係需要休息   感思佢都好合作   之後講嘢細聲咗好多呢 ~

今日試下食嘢   因為我唔想再吊鹽水   所以姑奶晏晝拎咗啲陳皮粥比我食   我叫做有啲胃口   同埋驅咗唔少風出嚟   舒服好多呢 ~

里奧大人無啦啦話呢兩晚瞓到點幾就醒   諗到我唔喺佢身邊會點   做咩咁感性呀   等你平時成日話我煩   話我煮嘢唔好食   依家知我好呢 ~  

之後本來家姐同 4 姑奶話嚟   我叫佢哋今日唔好嚟呀   我真係好唔舒服   好想休息 ~

里奧大人又係留到 10 點先走呢   見佢咁辛苦   我個心都好痛呢 ~

( 3-JUL-2011  SUN )

今朝食咗兩啖麥皮就食唔落啦   但唔食又唔得   又要我吊鹽水㗎   咪搞 ~  

霍醫生 10 點巡房   今次我又要求拆傷口條 Tube   好在霍醫生話無問題   不過估唔到拆都好痛囉   仲感覺到一拆就有好多血噴出嚟咁   好恐怖呀   不過身上無哂 Tube 真係舒服好多   唯一一樣令我最難頂嘅就係無得沖涼洗頭囉   雖然抹身   但都覺得唔乾淨囉 ~

醫生仲話我無食嘢   所以呢兩日唔比我出院   嗚嗚 ~

差唔多 11 點   姑奶就拎咗啲陳皮瑤柱瘦肉粥比我食   叫做有啲胃口呀  好開心呢 ~

里奧大人話要做公司嘢   所以晏啲嚟   叫家姐早啲嚟陪我   所以家姐差唔多 12 點就到   姑奶就走喇 ~

里奧大人就 1 點幾先到   同家姐一齊 Order 午餐   反正有得 Claim  又有人餐   如果落去買要自己比㗎 ~

家姐差唔多 3 點走   我又瞓啦   估唔到霍醫生會巡房   睇下傷口   再講埋個 Report 情況就走人 lu ~

終於可以拆豆喇   點知個肥妹姑娘超過粗魯   好大力咁拻啲膠布   我幾驚膠布未拻完   粒豆都比佢抔咗出嚟先呀   里奧大人都忍唔住叫姑娘細力啲   但姑娘話啲膠布黐得好實    根本係佢個人唔細心   因為之前個姑娘係好細心   慢慢咁按住我隻手   將啲膠有慢慢拻出嚟㗎 ~

4 姑奶 & 老公 & 兒甥女就 5 點幾嚟到   坐個一個鐘就走喇   我又繼續休息   同里奧大人 Share 蒸飯   好感恩呀   有胃口   之後再加多個竹笙羅漢齋   不過麻麻哋好味囉 ~

今晚強烈要求里奧大人早啲走   聽日要番工嘛   雖則的士來回   但都好攰家嘛   不過佢最後都係早 10 分鐘走 ~

( 4-JUL-2011  MON )   

瞓得唔好其實真係無胃口食早餐囉   今朝勁㗎喇   食咗 10 幾啖麥皮 ~

7 點半霍醫生巡房   話我可以換防水膠布   咁即係我沖得涼喇   但姑娘話驚我暈   所以沖涼之前要同佢講聲   好細心呀 ~

沖完涼成個人醒神哂呀   香噴噴先係沖咗涼嘛   今日姑奶拎梅菜蒸肉餅飯 + 燉肉汁比我   我有胃口喎 ~

之後兒甥女同同學一齊探我   12 點幾傾到 5 點先走   勁呀   之後我好餓   Order 蕃茄煙肉三文治   我好想自己食多啲嘢   因為我好想快啲出院   唔駛里奧大人咁辛苦呢 ~

里奧大人放工即到啦   不過啲飯差唔多遲一個鐘先到   今晚超飽啦   因為我高估自己食力   叫咗菠蘿咕嚕肉  + 蕃茄什菌天使麵   再加白飯同菜心   菜心係姑奶煮嘅   但見到有幾隻蟻喺菜心上面囉   所以里奧大人話掉哂去呀   最後食唔哂個天使麵   但唔想咁浪費   我 10 點幾當消夜食埋去喇   勁呀 ~

今日肚屙咗起碼 10 次   同埋我落床真係係好辛苦   所以勁想喊 ~

我覺得係姑奶煮嘅嘢污糟囉   因為我見到飲剩啲湯係有幾隻黑色嘢   飲完之後就係咁屙   辛苦到爆呀 ~

里奧大人又係 10 點先走   睇見佢都辛苦呢   頻頻樸樸   所以我出院之後要好好調理身體   咁先係愛錫屋企人呢 ~

板長壽司 @ 九龍灣 ( 29-JUN-2011 )

( 29-JUN-2011  WED )

今朝超想食麵   再加杯凍咖啡   真係好鬼滿足囉 ~

好忙呀   次次放假前都好忙咁嘅 ~

Lunch 食羅漢齋炒麵   不過今次無咁好食囉 ~

放工探媽咪   里奧大人要 9 點先番到屋企   所以同家姐番屋企坐陣   再食埋甜筒   之後就同里奧大人去板長   今次到我好想食壽司呀 ~

打邊爐 @ 吉野家 ( 九龍灣 ) ( 28-JUN-2011 )

( 28-JUN-2011  WED )

今朝食包   食埋今次   唔知幾時會有機會再食 lu ~

晏晝有 Lunch Box   因為尋晚食唔哂呢 ~ 

無啦啦好忙呀   搞到幾咁緊張   樣樣都要好急好快咁做   我想準時走   準時探到媽咪呀 ~ 

好在我喺菇場落定 Order   咁去到餐廳即有得攞   6 點準時到醫院呢 ~

同家姐 8 點一齊走   約埋里奧大人一齊去吉野家打邊爐   之後迫家姐上嚟食甜筒   因為之前我仲咗獎   我想睇下會唔會再仲呀   因為  截止日期係 7 月 5 日   要盡快清哂呀   所以迫埋里奧大人食   我自己又要食   好感恩都有 1 個仲獎   不過我哋食完個個都覺得想爆肚囉 ~ 

家姐差唔多 10 點就走 lu   我就沖涼   又無電視啱睇   所以熨衫   因為實在太飽   好想郁下囉 ~  

日月星餐廳店 (外賣) ( 27-JUN-2011 )

( 27-JUN-2011  MON )

呢排瞓到半夜   去完洗手間就好難瞓得着   不過點都要瞓囉   唔係更無精神番工呢 ~ 

早餐食豐富啲   但原來得好少米粉咋 ~

晏晝好想食飯呀   所以又去食盅頭飯   咁啱同事仙姐又喺度食   所以過嚟同我坐   最搞笑係話我入院請病假   所以請我食飯   我當然唔駛啦   真係無咁嘅必要囉 ~

菇場無嘢做   梗係等放工啦   今晚要去剪髮   所以唔探媽咪喇   之後家姐打嚟話媽咪做咗手術   感恩感恩   我安樂哂 lu ~

 
剪完就番屋企喇   呢排實在太攰   只係想快啲番屋企休息   今晚又係叫外賣   喺屋企舒舒服服咁食呢 ~

南瓜紅蘿蔔粟米豬骨湯 ( 26-JUN-2011 )

大蕉 - 之前都買過幾巨嘅大蕉比家姐   但今次真係巨蕉囉   所以買咗 6 隻比家姐   咁巨真係唔駛食飯   就咁食一隻已經飽哂呀

( 26-JUN-2011  SUN )

次次買咗啲雞蛋都食唔哂   過哂期唔敢食   所以今次見到雪櫃仲有 4 隻雞蛋   我就的起心肝   整芝蛋治喇   自己整先知餐廳係好少蛋整囉   因為我食半件已經好鬼飽呀 ~

梳洗之後就番教會喇   崇拜完畢就去買餸   番到屋企已經 2 點   尋晚食唔哂啲意粉   所以就焗番黎食   唔好浪費嘛 ~

食完就煲湯   再拖地執嘢   沖完個沖就抖下   唔想一下子太攰呀 ~ 

同里奧大人一齊去探媽咪   又係 7 點 50 分走   如果 8 點先走   等的士要等好耐   如果 8 點前走   就係的士等人喇 ~ 

是日懶餐 - 南瓜紅蘿蔔粟米豬骨湯

南瓜紅蘿蔔粟米豬骨湯 - 好耐無飲湯啦   順便拎埋比媽咪飲   好在今次好甜咋   唔係我會唔開心囉   今晚食飲湯 + 食湯渣當晚飯   真係幾飽下呢 ~ 

Pizza & Chicken (外賣) ( 25-JUN-2011 )

環遊世界 (薄批) / 辣海鮮闊條麵 / 香蒜肉絲意粉 / 炸雞 (免費) / 田園沙律

( 25-JUN-2011  SAT )

里奧大人明明教咗鬧鐘 10 點起身架喎   但唔響嘅   好在樓上鑽嘢   我哋先扎醒   原來已經 10 點 40 分喇   要即刻起身梳洗呢 ~

無時間去餐廳食早餐   里奧大人喺屋企食麥片   我唔想食呀   所以我買麵包   之後再出發去驗眼 ~

因為遲咗一個鐘頭   所以樣樣都好趕咁   本來諗住 11 點半去拎入院信   12 點 15分 就去驗眼   點知 12 點 15分先見醫生   同里奧大人一齊見醫生   佢做我 Back Up 最好啦   因為我一緊張就會聽啲唔聽啲咁   不過聽完醫生講解之後   我就好輕鬆呢 ~

之後急急腳去驗眼喇   好在真係里奧大人陪我咋   因為驗眼會包埋驗青光眼   所以要放大瞳孔   對眼會濛查查   無人伕住我真係唔知中咗去邊   感恩對眼係無事   只不過眼皮發炎   散光 100   同埋醫生話我對光好敏感   所以對眼會痛   今次 Consultation $430 + Medication $100   我覺得好貴呀   不過買過安心都值得嘅 ~

約咗家姐去星林居食米線呀   每人叫唔同餸 Share 嚟食   今次份量同味道都無變   但價錢就貴咗好多呀   3 個人食咗 $170   不過依家咩都貴   都明白嘅  但真係貴咗好多   又唔係咁值咁囉 ~

我的小鍋米線 (中辣) - 蘿蔔 / 魚腐 / 豬紅
家姐的小鍋米線 (大辣) - 豬腸 / 豬軟骨
里奧大人的小鍋米線 (中辣) - 豬腩肉 / 豬潤 / 紫菜

對眼濛查查呀   又猛太陽   同家姐買完香水就一齊番屋企喇 ~

番屋企又要沖涼喇   同埋我哋 3 個都好鬼口渴呀   唔知係碗米線多味精   定係飲咗杯鹹檸七呢   佢哋係都話鹹先好飲   我話太鹹好似飲緊鹽水咁   但佢哋無理我   照篤爛哂個鹹檸檬 ~

我瞓咗半個鐘   家姐話我扯鼻寒添呀   我話我真係好鬼攰   里奧大人喺房度瞓到豬頭咁   所以我都唔叫佢一齊探媽咪   我同家姐一齊去就得 lu ~

家姐坐到 7 點 15 分就走喇   我就坐到 7 點 50 分   之後一上車就打去叫外賣   一個鐘頭後就有得食   好少 9 點 半先開餐   不過晏晝太飽   太早食唔落嘢呢 ~ 

KFC @ 九龍灣 ( 24-JUN-2011 )

( 24-JUN-2011  FRI )

Happy Friday 喇   食餐蛋治   飽啲會開心啲 ~

菇場淡季   無嘢做   等 Lunch Time   今日同 8 卦出去食   一齊食盅頭飯   我食 1/3   佢已經食哂   點解可以食得咁快㗎   我食嘢已經好快喇喎 ~

飯氣攻心   飯氣攻心   同埋唔知係咪好耐無 Lunch 食飯   好似好滯咁 ~

放工又探媽咪喇   次次都會買嘢比媽咪食   又買報紙   買下曲奇   蛋糕咁   所以次次去都一袋二袋   唔怪之成日咁攰啦 ~

里奧大人上咗大陸   差唔多 9 點先番到黎   無啦啦又話想食 KFC   其實我真係唔想食   不過我次次都唔比佢食   佢唔會諗食咩囉   一次半次算啦   最緊要唔好要我諗就得喇 ~

唔知係咪因為聽日 Off 關係   心情好好   好有 Mood 做家務呀   10 點開始幾熨咗兩機衫   熨咗個幾鐘   又唔覺攰添喎   不過唔想咁夜瞓   所以先瞓覺呢 ~

錦日本料理 @ 九龍灣 ( 23-JUN-2011 )

炸生蠔帶子壽司 / 三文魚腩壽司泡菜豚肉拉麵蟹子沙律

( 23-JUN-2011  THU )

尋晚都瞓得唔錯   感恩感恩 ~

今朝個人未餓   不過點都要食早餐家嘛   所以食菠蘿包喇 ~

媽咪打嚟話報告無問題   應該安排聽日做手術   我個人安心好多喇   心情都即刻好好多呢 ~

忙咗陣就等 Lunch Time 喇   今日食炒麵餐   如果有炒米粉就好啦   無咁肥嘛 ~

今日要 Pack 箱   個衰 Partner 自己 Pack 完又唔幫我 Pack   妳精我都唔笨   我 Pack 咗一箱就問佢係咪 Pack 完 ?!   Pack 完就幫我 Pack   好在佢都有幫我 Pack   唔係我會拖慢嚟做   之後等佢自己慢慢 Pack ~

放工探媽咪   之後姑娘見到我   就同我講媽咪點解一撞到   啲血就會咁快凝固   同埋媽咪啲手手腳腳好易瘀黑   話媽咪做咗好多化驗   報告都係正常   唔知點解會咁樣   唯一懷疑係媽咪因為腎上線偏低   要食肥仔丸   同埋媽咪噴哮喘藥   又有類固醇   加加埋埋應該可能導致咁樣囉 ~

今晚里奧大人 8 點先喺羅湖   所以我同家姐去惠康買嘢   呢排情緒比較低落   所以買咗好多雪糕雪條   個冰格差唔多裝到爆哂   不過買咁多雪糕雪條都唔駛驚   因為引一引家姐   佢就會嚟食   唔會過期呢   其他嘢就唔敢講喇 ~

里奧大人差唔多 9 點先番到九龍灣   今晚又去番錦日本料理試其他嘢   都唔錯   可以多過選擇喇   感恩感恩 ~ 

打邊爐 @ 稻香 (九龍灣) ( 22-JUN-2011 )

美國牛肩 x 2 - ($19.8) 一碟   上次份量無咁多   所以我一次過叫咗 2 碟   食到有啲驚   好在無肥膏咋   唔係會好漏囉

蟹籽墨魚麵 - 必食   不過家姐話今次有啲腥

綠色一籃子 - 又係必食
魚皮餃 / 韭菜餃 / 菜肉餃 - 樣樣都好味   無肥肉   基本上係好少肉添   我鍾意呀

沙爹湯底- 濃味湯底最啱我呢

醬料 - 一定要有指天椒 + 生蒜 + 生蔥   咁先好味   正呀 

( 22-JUN-2011  WED )

今朝都幾大風   好在唔係落好大雨咋   唔係褲腳濕哂就好煩   同埋對腳會好凍囉 ~

早餐又想食麵喇   不過坐對面嗰兩位阿姐講嘢好大聲   好影響我嘅食慾呀 ~

晏晝要 Pack 箱   所以比自己再食飽啲   咁先有氣有力做嘢呢 ~

諗住 Pack 箱先食 Big Mac 餐   點知無啦啦有嘢做   無得 Pack 箱 ~ 

放工又探媽咪 lu   依家等緊組織報告   有咗報告先再植皮   植完皮就可以出院   咁都好   唔駛又出又入醫院   一次搞掂哂出院就最好呢 ~

今晚同家姐坐到 7 點 45 分就走人喇   因為無落雨想早啲走   約埋里奧大人去稻香打邊爐   今日我連續 3 餐都好 Heavy   想唔肥都難   仲要家務都唔想做添呀   不過呢排好鬼攰呀   比自己放縱下都好嘅   哈哈 ~ 

錦日本料理 @ 九龍灣 ( 21-JUN-2011 )

錦上魚生飯套餐 ($98) / 日式茶碗蒸蛋 / 天婦羅烏冬 ($49) / 軟骨餃子 ($36) / 日式鱆魚丸燒 ($20) / 豆腐沙律 ($30)

( 21-JUN-2011  TUE )

想打風呀   好鬼焗呢   最怕咁嘅天氣 ~ 

今朝食火腿絲通粉餐   餐包食唔落   留番做 Lunch 呀 ~

菇場有嘢做   眨眼已經 11 點 lu   眨多兩眨就到 Lunch Time   今日清埋包麥皮   加埋個餐包   所以都好夠飽呢 ~ 

放工即探媽咪   唔知幾時可以出院呢 ~ 

今晚同家姐 里奧大人去錦日本料理   都幾好味噃 ~ 

今餐唔玩包剪揼   估今餐幾錢   雖然我同家姐都知價錢   但突然間要估   所以都無時間諗啦   不過我好好彩   估得最接近   里奧大人第 2 接近   所以又係家姐請喇   佢話簽卡總好過比現金   所以今餐比得好開心咁話喎 ~  

活力餐廳 @ 九龍灣 ( 20-JUN-2011 )

涼瓜斑腩煲 / 西檸炸軟雞 / 例湯

( 20-JUN-2011  MON )

又星期一喇   好攰呀   超唔想起身 ~ 

早餐食菠蘿油   好耐無食喇   突然覺得鹹鹹香香好好味呢 ~

菇場靜呀   真係超級想瞓覺囉 ~ 

幾咁眼瞓咁等到 Lunch Time 呀   又係食肉醬意粉   不過我自己食嘅就會加 Tabasco 同黑椒粉   惹味好多架 ~

個人超級攰呀   都唔方好嘢   所以食完 Hea 陣   之後瞓咗 10 分鐘   點知瞓醒超唔舒服呀   好似發燒咁喎   食咗粒 Panadol 好啲咁囉   不過真係好鬼好鬼好鬼凍呀 ~

放工去探媽咪   媽咪精神好好呀   感恩感恩   希望快啲植皮   快啲出院   因為我真係好攰呀   但唔探又唔安樂   心靈上嘅攰比肉體上嘅攰   係攰好多好多倍囉 ~ 

家姐今晚唔同我哋食呀   所以我就同里奧大人去活力餐廳食喇 ~  

活力餐廳 (外賣) ( 19-JUN-2011 )

椒鹽豬扒 / 南乳羅漢齋

( 19-JUN-2011  SUN )

今朝同里奧大人一齊 9 點起身   食埋早餐就番主日學喇 ~

崇拜完畢就去 Piago 買嘢   家姐探完媽咪就約埋我喺屋企食 Lunch   買埋煎釀三寶   依家真係咩都貴哂   由之前 $10/7 件   加到依家 $10/5 件   不過呢間嘅魚蛋真係好好味   所以都會買嚟食嘅 ~

家姐上嚟一陣就收到姐夫電話   叫佢去飲下午茶   所以家姐食咗啲三寶就走 lu   我同里奧大人就食埋啲意粉   仲有一盒留番我聽日做 Lunch Box ~ 

食完都差唔多 3 點幾   我又熨衫   仲要熨裇衫   最花時間呢   所以熨完都差唔多 5 點   沖埋涼又要出發探媽咪   好攰呀 ~

里奧大人唔多舒服   所以我自己去探媽咪   傾下抖下話咁快 7 點 50 分走人 lu ~

今晚叫外賣番屋企   沖埋涼先食飯   超爽呀 ~ 

景福宮韓國餐廳 @ 官塘 ( 18-JUN-2011 )

( 18-JUN-2011  SAT )

今朝要番工   家姐又要去媽咪屋企整嘢   所以就同我去麥記食早餐喇 ~

菇場無啦啦有急嘢做   想抖下都唔得添 ~  

放工去百佳買嘢   點知又比我買到湯包   之前 $100/4 包   依家 $110/4 包   不過呢個牌字湯包真係唔錯   唔過 $30/包都算平囉   我買咗 8 包   得閒煲下   有時想飲湯但又唔想買料洗料   煲湯包就最好不過呢 ~  

番到屋企放低啲嘢就出發食 Tea 喇   好耐無去大快活   所以又好想去喇 ~

食飽有氣力   好在里奧大人幫我開咗機洗衫   又熨埋兩機衫   所以我可以好專心咁抹嘢   抹完嘢就開始煮肉醬意粉喇 ~

尋晚問媽咪食唔食肉醬意粉   媽咪話好喎   所以我就煮啦   差唔多煮咗一個鐘   好攰呀 ~

洗埋嘢就即刻沖涼   之後同里奧大人一齊去探媽咪呢 ~  

好感恩媽咪做咗手術   咁又有胃口食嘢喎   我又整多一少盒比家姐食   家姐話好好味   媽咪都話好味   但就甜咗啲   酸番少少就更好   我因為煮埋聽日 Lunch   里奧大人又唔鍾意咁酸嘛   如果唔係我都鍾意酸啲   開胃啲家嘛 ~  

今晚 7 點 50 分走人   居然無人等的士   之前兩晚 8 點鐘走   落到的士站係無的士   下次都係早少少走好啲 ~

大家都想食韓燒   所以就去景福宮喇   等咗差唔多半個鐘就有位   $118/位 + 10%   任食兩個鐘   不過   呢間嘢永遠唔會再去   請都唔會再去   因為啲嘢食係無味嘅   衰到醃都唔醃嘅   好唔掂呀 ~

因為我哋猜包剪揼   基本上我次次都輸   好難得今次贏   咁因為我同家姐出拎嘢食嘅時候   餐廳要埋數   所以里奧大人就比錢   其實我哋都諗住比㗎啦   咁我等車嘅時候   家姐打嚟話放咗 $400 喺我袋入面   話願賭服輸咁話喎 ~

漁米之香 @ 九龍灣 ( 17-JUN-2011 )

沙爹金菇肥牛煲 - 都好大煲喎   肥牛份量 OK   但太多粉絲   無咩金菇囉

菠蘿咕嚕肉 - 里奧大人一坐低已經話要呢碟餸   唔叫唔得啦   不過又真係幾好味嘅

燒鴨 - 仲以為自己食緊臘鴨   我第一次食到咁鹹嘅燒鴨咋

粟米魚肚羹 - 無味嘅   Ivy 又話好好味

( 17-JUN-2011  FRI )

今朝等咗 20 分鐘巴士   真係等到腰骨痛呀   搞到我又要好趕咁食早餐   不過點趕都好   我真係唔想買早餐番菇場食囉 ~

菇場真係靜到好恐怖架   之前有位新同事都話好靜   原來尋日 Last Day 添   做咗都唔夠一星期   咁靜雖然係好難頂   但唔代表妳之後間公司唔靜喎   我覺得如果妳上司或者部門同事玩針對   咁唔做係正常   但因為靜唔做   就有啲怪囉   公司唔係比妳傾偈家嘛 ~

晏晝同 8 卦出去食   今次到我請番去喇   無拖無欠   我仲要佢唔準自己食先   要一齊叫炒嘢   咁就唔駛好似得我自己一個人食咁喇   我唔鍾意人哋望住我食囉   周身唔自在咁 ~

放工探媽咪   仲喺排緊手術室   之後 6 點幾姑娘話仲有 5 個人排隊   我哋心諗實唔得啦   咁媽咪全日無食嘢家嘛   我 7 點半去 Canteen 買嘢比媽咪   番到病房 7 點 50 分   再問問姑娘食唔食得嘢   姑娘話唔好住   可能有機做到   要等到 8 點半先好食喎 ~ 

我 8 點 10 分走喇   同里奧大人又去漁米之香   我間唔中就好想食中菜   可能呢度無咩好選擇啦 ~   

差唔多 8 點半媽咪打嚟話姑娘要佢 9 點先可以食嘢   咁我都好希望可以做到手術嘅   唔駛又要餓成日嘛   咁之後我 9 點 10 分打比媽咪   媽咪聽電話   即係唔做得啦   咁希望聽日可以做啦   咁樣餓唔係辦法囉 ~

板長壽司 @ 九龍灣 ( 16-JUN-2011 )

( 16-JUN-2011  THU )

尋晚知道媽咪入院   自己又激氣又擔心   好在瞓得到咋   唔係人都顛 ~  

早餐去麥記   想食啲煙煙韌韌嘅包呀 ~

今朝忙咗陣就等食飯喇   今日又有 Farewell Lunch   又有得飲茶   又可以食到 2 點   唔錯唔錯 ~

放工就去探媽咪 lu   不過仲排緊做手術   點知 8 點正想走嘅時候   姑娘話今晚無得做   所以我同家姐就即刻飛落樓下 Canteen 買飯比媽咪食喇 ~  

同家姐食飯   壽司係首選   同里奧大人講話食壽司   估唔到佢咁啱又想食喎   所以近近地哋板長   估唔到佢咁啱又想食   之後奧大人就叫家姐上屋企食雪糕   因為家姐成日話食完鹹嘢要食甜嘢   所以里奧大人成日都咁話佢   但我都係咁㗎喎   食完鹹就想食甜   食完甜又想食鹹   沒完沒了   所以依家咁有福相喇   哈哈 ~

擔擔麵 + 粟米蛋花湯 ( 15-JUN-2011 )

( 15-JUN-2011  WED )

尋晚瞓得唔好呀   里奧大人將冷氣又教大又教細   郁黎郁去   我好醒瞓家嘛   所以起身嘅時候都話比佢累到我瞓唔到覺呀 ~ 

早餐又食粟米沙律包   覺得無肉好健康咁呢 ~

之前同新同事傾偈   話菇場靜到一粒聲都無   係咁妖妖聲   又話講下 8 卦嘢   家常閒話   粗口都好吖   我好大反應話講粗口就唔好啦   佢咁講之後   佢都應該係可能係會講粗口嘅人   如果唔係無理由會接受到人講粗口囉   都係同佢保持距離好啲 ~

菇場 9 點半就開始靜架喇   我都習慣 lu ~

晏晝有 Lunch Box   都係一路食一路上網睇嘢   一個人清清靜靜唔錯 ~

放工打比媽咪   佢又撞到隻腳   又有瘀血   我仲以為係啱啱整到   原來係朝早 10 點幾整到   唉   應該一早入院嘛   今日里奧大人上咗大陸   差唔多 8 點幾先番到屋企   我仲諗住行下買下嘢   依家無哂心機啦 ~ 

我番屋企等埋家姐電話先決定煮唔煮飯   家姐話媽咪應該入院囉   因為撞到嘅範圍大過之前嗰次   媽咪仲話唔入   想睇電視   嬲都我大聲鬧佢呀   好在喺屋企啫   唔係啲人以為我發顛都似呀   好在佢最後都肯入院   有家姐陪   我先放心去煮飯 ~

是日懶餐 - 擔擔麵 + 粟米蛋花湯

擔擔麵 - 又係用担担麵醬撈上海麵呀   今次將里奧大人嘅辣度減半   好在佢話唔辣   又話好味   唔係我又發火㗎喇 ~ 

粟米蛋花湯 - 尋晚特登買定 3 條節瓜   諗住滾湯   點知啲節瓜有兩節顏色   所以我都唔要喇   咁唯有開粟米湯啦   今次又無睇包裝開咗粟米粒以為係粟米湯   好在開呢盒先咋   唔係開咗兩盒粟米粒都唔知點算 ~ 

食完飯搞掂哂所有嘢就打比家姐   佢話等緊照 X-ray   之後我再打去   話醫生幫媽咪抽啲瘀血   但啲瘀血已經凝固咗啦   好似 Jelly 咁   所以應該又要植皮   之後終於上骨科   醫生都話啲瘀血似豆腐   應該要植皮   兩個醫生都咁講   咁即係要啦   救護車人員都講話   如果撞到嘅時候   見到啲皮膚係瘀黑色就應該即入院   咁樣就抽到啲血   依家拖咁耐   想抽都難啦   明明無事變有事   真係自己攞嚟   妳話我衰都咁話囉   好鬼慶呀 ~

脆肉瓜炒鯪魚肉 ( 14-JUN-2011 )

( 14-JUN-2011  TUE )

尋晚瞓得好淋呀   起身嘅時候   發覺自己應該無郁過   好在無手痺腳痺咋 ~

今朝無啦啦超勁想食麵   不過就一定要飲凍飲囉   唔係會食到成身汗 ~

菇場好忙呀   好在今日超級精神啫 ~

晏晝有 Lunch Box   呢排天氣咁鬼焗   真係帶飯係最好呢 ~ 

放工去買餸   買埋聽晚嘅瓜菜   重到呢   但又唔想晚晚去街市囉 ~ 

是日懶餐 - 脆肉瓜炒鯪魚肉

脆肉瓜炒鯪魚肉 - 用現成蒜頭豆豉醬嚟炒   不過都幾鹹   今次都幾有心機煎魚餅   但唔知點解次次都煎唔到金黃色嘅呢   但媽咪又煎到金黃色喎   唔通落得太少生粉 ~

啲豆豉醬好鬼鹹呀   要食好多西瓜先解到喝   不過大熱天時   沖完涼   開住冷氣嘆西瓜真係一大享受呀 ~

蝦仁叉燒炒飯 + 炒蕃薯葉 + 鵝翼 (外賣) ( 13-JUN-2011 )

( 13-JUN-2011  MON )

成晚瞓唔着   加加埋埋都唔知有無三個鐘   不過今日係里奧大人番新工日子   我就特登 7 點鐘起身   陪佢去太興食早餐喇 ~

今朝菇場好忙喎   咁都好   咁先有存在價值嘛 ~

晏晝有 Lunch Box   係尋日里奧大人食唔哂嘅 Tea 嚟㗎 ~

惠康今日 95 折   諗住掃貨   咁筍實打比家姐   估唔到佢都有嘢買    所以我就咁買菜就番屋企   食完飯有氣有力先再同佢掃貨 ~

是日懶餐 - 蝦仁叉燒炒飯 + 炒蕃薯葉 + 鵝翼 (外賣)

蝦仁叉燒炒飯 - 飯係尋晚食剩   清埋冰箱嘅急凍虎蝦仔   再加 $20 太興叉燒   見啲飯咁乾身   我都無謂加隻蛋去炒喇 ~

炒蕃薯葉 - 第一次見到咋   所以即買   不過唔識煮   又炒又蓋都係好似生生哋咁嘅   里奧大人一食就話未熟   我話呢啲菜嘅口感係咁   順利過關   雖然佢都係食好少 ~

鵝翼 (外賣) - 無啦啦超勁想食   所以買 2 隻番屋企   自己慢慢嘆 ~

洗完碗   家姐就打嚟話去惠康買嘢   無問題啦   如果意志力唔夠嘅話   同佢行超市真係會破產   我睇一樣嘢佢就叫我買   大佬   屋企好大咩   諗住無咩嘢買   都買咗三百幾蚊   真係無事出街少破財呀 ~

家姐又上蹳食雪糕   里奧大人陪佢食啦   我就唔食 lu   實在太飽   所以佢有佢哋食   我就去沖涼   實在太熱喇 ~  

活力餐廳 (外賣) ( 12-JUN-2011 )

豉椒涼瓜炒排骨 / 粟米蟹柳斑塊 / 沙爹金菇肥牛煲

( 12-JUN-2011  SUN )

腰骨又痛喇   唔知係咪之前瞓得太多呢 ~

同里奧大人去大家樂食早餐   多人到呢   咁我去 Cashier 排隊   之後里奧大人行咗一轉就話無位   話買番屋企食   我唔制呀   所以我去搵位   次次佢無心機搵位嘅   望一望就走   咁更無位啦   我隔壁張枱係四人枱嚟   一家三口   小朋友最多 1 歲   加埋一個袋   但食一份早餐   咁就霸哂成張枱   啲人真係好自私呀 ~

食完番屋企梳洗就番教會喇   之後我去驗眼   因為對眼好濛咁呀   原來散光深咗   左 100 右 125   之前好似係 左 100 右 75   再搵另一間驗下先再決定配眼鏡 ~

今日好開心呀   家姐同媽咪嚟我屋企打牌   打到 2 點半我同里奧大人餓喇   要叫下午茶外賣   之後再打 ~ 

打到 7 點又叫外賣喇   不過我今次話唔想食 Pizza   所以又叫番下午茶間餐廳喇 ~ 

食完飯就走人 lu   我就拖地洗衫熨衫   難得有精神力氣做嘢呀 ~

煎．餃子專門店 @ 九龍灣 ( 11-JUN-2011 )

( 11-JUN-2011  SAT )

今日要番工呀   勁想食麵   不過食咗一半就覺得超飽   唔想食喇 ~

番到菇場就忙喇   做番哂之前未做嘅嘢   多麼的充實呢 ~

放工同家姐 里奧大人一齊飲茶   依家要 2 點先派下午茶飛   之前唔係咁㗎 ~

飲到 3 點幾就各自歸家 lu   今日都仲係不在狀態   唔想做家務   更加無諗過煮飯煲湯   難得我咁唔想做嘢   所以就同里奧大人睇 Fringe   我地依家多數錄哂啲電視劇集   咁留番假期一次過睇   飛哂廣告蹳睇真係好爽 ~

本來想去赤丸   但個人好攰   只係想屋企附近食嘢   所以食煎餃子喇 ~

阿牛哥 (外賣) ( 10-JUN-2011 )

( 10-JUN-2011  FRI )

今朝去 KFC 飲咗杯凍檸茶   諗住食個鬆餅   點知無胃口  咁留番做 Lunch 啦 ~ 

番到菇場只係想瞓囉   一到 Lunch Time 就即瞓   瞓到 1 點半   啱啱好開工呢 ~

個鬆餅乾爭爭   咬咗兩啖真係唔想食   我唔想越食越反胃呀 ~

真係好彩搬咗出九龍   咁我唔舒服打的番屋企都無咁肉痛呢   我呢 3 日打的嘅錢就等如以前打的入大埔嘅一程車錢呀 ~

今晚叫做有啲胃口   所以等埋里奧大人放工   叫佢買嘢番屋企食喇 ~ 

漁米之香 @ 九龍灣 ( 7-JUN-2011 ) + ( 8-JUN-2011 ) + ( 9-JUN-2011 )

菠蘿咕嚕肉魚湯魚腐浸菜苗燒腩仔粉葛生魚燉湯

( 7-JUN-2011  TUE )

好在尋晚都瞓得着   唔係今日都幾慘下咯 ~ 

今朝食完早餐就去 Shopping   今次無咩嘢買   所以好快手搞掂  咁就順便做下私人嘢   去銀行入數咁囉 ~

晏晝同 8 卦出去食   佢加咗人工   所以請我食飯呢 ~

放工去睇中醫   不過都係無乜用嘅 ~ 

本來想打邊爐   里奧大人又唔想   我又無啦啦好想食中菜喎   所以去漁米之香喇   $138 全包   真係抵過茶餐廳呀 ~

( 8-JUN-2011  WED )

每月一到   朝早個肚少少痛   不過唔想心掛掛   所以睇咗醫生先   真係好感恩呀   原來診所開到 1 點咋 ~  

一落街有啲暈呀   唔知係咪曬得滯   全部嘢都好白咁   急急腳行去診所   暈咗都有人知啦 ~

 
番到屋企即沖涼瞓覺呀   今次比較辛苦 ~

( 9-JUN-2011  THU )

要番工喇   個肚仲陰陰肚   有嘢都唔做住喇   幾咁辛苦先捱到放工呀 ~

有啲胃口   所以叫里奧大人買生菜魚肉比我食   不過食咗半碗就唔想食喇   覺得好多味精咁 ~ 

Saizeriya ( 薩莉亞意式餐廳 ) @ 將軍澳 ( 6-JUN-2011 )

凱撒沙律 ($19) - 細碟哂呀

蒜蓉焗田螺 ($19) - 無咩特別   想試下咋

邦哥尼蜆肉鐵板煮 ($16) - 又細碟哂啦  

黑胡椒煙鴨胸 ($16) - 媽咪鍾意食   所以又叫嚟食喇

香蒜佛西亞意大利包 ($8) - 比里奧大人試下咋   都係有芝士味好味啲

牛肉漢堡比薩 ($28) - 想食 Pizza  叫呢款試下   無特別

煙肉辣汁長通粉 ($22) - 無料嘅   雖然我知道一分錢一分貨   但都唔好少得咁交關囉   同埋無味嘅   我煮好食過佢呀

野菌肉醬意大利粉 ($24) - 呢碟好味過長通粉   不過都唔係叫做好味囉

( 6-JUN-2011  MON )

呢日假期唔駛番工   所以由尋晚 12 點 45 分 打到今朝 8 點 10 分   好耐無試過打通頂喇   好在飲咗杯咖啡   唔係應該頂唔信囉 ~

同埋家姐食完早餐就番屋企瞓喇   9 點瞓到 4 點   好在瞓到咋   唔係就慘喇 ~

起身梳洗完就等家姐   車我哋同埋媽咪一齊去新都城食飯呢 ~

今次 6 點去到   等到 6 點 40 分先有位   我覺得算快喇 ~

蔥粒炒肉絲 + 青紅蘿蔔粟米豬展湯 ( 5-JUN-2011 )

( 5-JUN-2011  SUN )

里奧大人今朝起到身番主日學   我就 10 點半先起身   所以自己食早餐   之後再番教會喇 ~

差唔多 1 點幾崇拜完畢   之後同里奧大人一齊食 Lunch   食完我就去街市買餸   條街又熱又焗   超辛苦呀   買完餸番屋企又要再沖涼呀 ~

里奧大人瞓晏畫    我就 4 點開始預備煲湯   搞掂哂就熨衫洗衫   反正又瞓唔到   又無電視睇   做下嘢好過 ~

是日懶餐 - 蔥粒炒肉絲 + 青紅蘿蔔粟米豬展湯

蔥粒炒肉絲- 諗住用煲湯嘅豬展黎炒麵   點知淥完之後   覺得個蛋麵好淋   又勁梘水味   根本唔係我買黎炒麵果嗰麵   但平時買開㗎喎   激鬼氣   所以最後就咁加蔥粒蒜粒炒下就當餸算數 ~

青紅蘿蔔粟米豬展湯 - 勁想飲湯呀   食埋啲湯渣都夠哂飽喇 ~

食完飯洗完碗就拖地   之後就等埋里奧大人姐夫 11  點放工嚟我屋企打牌   家姐 9 點幾就到我屋企等   點知等到 12 點半先開始打呀 ~ 

海港酒家 @ 將軍澳 ( 4-JUN-2011 )

( 4-JUN-2011  SAT )

呢朝要番工啦   本來想食豐富啲   不過唔餓   所以食個包就算喇 ~

番到菇場當然唔忙啦   超勁想快快放工呀 ~

晏晝約咗姑奶去海港飲茶   飲完茶都差唔多 4 點幾   之後上佢屋企打麻將   因為兒甥女要溫書   我哋再轉去會所再打過   6 點打到 9 點就去海港食晚飯   順便同兒甥女預早慶祝生日喇 ~

諗住食完飯再打   但姑奶話唔想打到咁夜   所以叫我家姐嚟頂佢喇 ~

我哋食飯食到 11 點幾   之後打到 2 點就打的番屋企 lu ~

住家飯 @ 媽咪屋企 ( 3-JUN-2011 )

陳皮蒸泥猛 / 冬菇瑤柱燜節瓜 / 腐乳炒通菜 / 乳豬半斤(外賣) / 紅豆糭 (外賣) / 髮菜眉豆蒜頭雞腳湯 / 車厘子 / 榴槤 / 蝴蝶酥

( 3-JUN-2011  FRI )

今朝勁想食燒賣粉果   雖然燒賣唔好食   但都好想食囉 ~

番到菇場一坐低   先聞到自己身上有油煙味呀   我噴咗香水都無用   好想番屋企換衫呀 ~ 

差唔多 11 點半   老闆 MSN 叫我入佢房   見佢間房兩度門都關咗   我其實真係好驚   之後我一坐低   佢笑一笑比咗個信封我   我心卜卜卜咁跳呀   心諗唔知係咪因為我要請病假   所以炒我   之後佢話 Review 咗人工   嚇得我吖   我估唔到會有人工加嘛   所以覺得好開心好感恩   之後仲同老闆傾工作上嘅麻煩   好在老闆都係挑通眼眉嘅人   同埋佢話好多同事人格係點   佢都知   佢仲用衰格嚟話我 Partner 呀   因為原來好多人都知佢好衰格呢   佢仲話我身體唔好   唔好比情緒影響   有咩就講   唔係講人是非   只係令公司運作更加暢順喎 ~

同老闆傾到 12 點 50 分   好在我係諗住食麥皮做 Lunch 啫 ~

今晚番媽咪屋企食飯   但里奧大人太多嘢做嚟唔到   不過我都照去媽咪屋企食飯   由得佢自己食咩都好啦 ~ 

食到超勁飽   所以抖到差唔多 9 點先走呢 ~

明星海鮮酒家 @ 九龍灣 ( 2-JUN-2011 )

片皮鴨一食 / 餅皮 x 2 / XO 醬小炒王 / 南乳粗齋煲 / 什菜煲

( 2-JUN-2011  THU )

今朝想食濕嘢呀   食五香肉丁炒蛋公仔麵   飽到震呀 ~

菇場都係咁啦   靜英英   不過依家淡季   基本上都唔會好忙囉 ~

終於 Lunch Time 啦   仲未餓呀   我差唔多 1 點先食 Lunch Box ~

放工喇   本來想整雪菜火鴨絲燜米   但諗諗下買 1/4隻鴨都要 $30-$40   依家明星做緊片皮鴨 $38/隻   所以即打比里奧大人話唔煮飯 lu   再叫埋 Ivy 兩公婆一齊食   四個人可以食多啲嘢呢 ~

呢排約人多數即興先成事   星期二番教會想約 Ivy 星期日食 Lunch   點知佢唔得閒   其實兩次都係咁   好邪   反而今次即興就 OK   佢又係好鍾意食片皮鴨㗎   咁就好啦   里奧大人食好少㗎咋   如果叫一隻片皮鴨   根本再食唔落其他嘢囉   依家有人陪真好喇 ~

7 點半到酒樓   食下傾下差唔多 9 點半走   大家住附近真係好喇   唔煮飯 Join 埋一齊食   又可以傾下 ~

節瓜甫 + 酸齋兩味 (外賣) ( 1-JUN-2011 )

( 1-JUN-2011  WED )

呢排瞓得唔好   好在唔會話太攰唔想番工果隻   因為我番工好開心呢 ~

早餐食菠蘿包   熱辣辣   正到爆 ~ 

菇場忙咗陣   忙到以為 11 點   原來 10 點都未夠 ~  

晏晝有 Lunch Box   我超鍾意食牛仔骨   所以食番隔夜嘢都覺得好好味 ~

終於放工啦   我 Partner 之前同我傾偈   問我係咪搬咗   因為以前我放工準時走   要趕車同買餸嘛   依家就唔駛咁趕   多數遲 5-10 分鐘走   咁佢更係想我第一個走啦   佢無咁異相嘛   所以依家我係佢不動   我不動   反正我有時間   呵呵 ~

今晚就咁去惠康買豬肉就得 lu   超爽 ~

是日晚餐 - 節瓜甫 + 酸齋兩味 (外賣)

節瓜甫 - 第一次整咋   其實我唔鍾意用節瓜做餸   因為我記得第一次燜節瓜   啲節瓜好似酸咁架   好鬼驚囉   今次將啲豬肉加埋臘腸粒   惹味啲嘛   不過就懶   無用蠔油   我食覺得有味喎   但里奧大人就誓願咁食   我心知咩事啦   佢話無味   又話啲肉 Over Cook   我都知嘅   咪清啲囉   同埋我覺得真係好味喎 ~ 

酸齋兩味 (外賣) - 知道節瓜甫係清淡   所以買番啲外來食品   咁里奧大人就會無咁痛苦   其實係自己唔想煮多樣餸 ~  

之前買咗幾隻大蕉   諗住同家姐 Share   所以叫家姐今晚落黎拎   佢順便又拎埋糖水比我   仍都順便食埋雪糕   坐一陣先走呢 ~