日月星餐廳 (外賣) ( 31-JUL-2011 )

( 31-JUL-2011  SUN )

今朝早餐就係喺屋企蒸燒賣食   唔駛咁趕   正呀 ~

里奧大人要做 Present   所以我就上網啦   電視又無節目好睇喎 ~ 

差唔多 2 點幾就去食 Tea   無啦啦好想食粉麵   雖然咁熱   不過都好想食囉 ~

無啦啦個肚有啲痛喎   但都頂得到   因為都有胃口食嘢 ~ 

今晚唔想出去食   叫外賣算喇 ~

金加利餐廳 @ 九龍灣 ( 30-JUL-2011 )

牛油厚多士 / 羅宋湯 / 豬助骨雜果沙律 / 咖哩牛腩意粉 / 燒春雞餐 (忌廉汁) / 芝士龍脷柳農夫包

( 30-JUL-2011  SAT )

今朝同里奧大人去茶餐廳食早餐   因為實在唔想去太興   來來去去都係得 6 個餐   雖然坐得好舒服   但食到好厭 ~

食完番屋企 Hea 喇   因為每月一到嘛   個人比較攰   之後家姐同我哋一齊食 Tea   食完佢番屋企   我哋就去買嘢 ~

里奧大人做咗陣公司嘢就去瞓覺   我就睇報紙   啲時間都好快過   呵呵 ~  

本來想出九龍城食泰菜   但媽咪又話唔食得   里奧大人又話想我食清啲   所以最後同埋媽咪 家姐 工人一齊去金加利食嘢   淘大真係無咩好食   但又唔想過德福   因為德福仲多人呀 ~ 

食完就陪里奧大人買衫   我好專心幫里奧大人睇衫   突然有隻超巨大黑嘢飛喺我面前   嚇到我彈開   原來有個女人揀緊拖鞋   唔小心飛埋嚟   我話以為係老鼠呀   哈哈   家姐送埋媽咪搭車之後就一齊買衫   買完就走喇 ~

脆肉瓜炒雞件 + 滷水牛展 + 髮菜眉豆豬骨湯 by 鐘點 ( 29-JUL-2011 )

( 29-JUL-2011  FRI )

Happy Friday 呀   所以去麥記食早餐   咁我食完就睇一陣報紙   正想飲啖咖啡嘅時候   見到杯邊有隻細飛蛾   嚇到我呢   幾驚佢飛走呀   因為佢飛走咗我就無証據換一杯新嘛   我飲咗 3 啖咋   好在隻飛蛾都好乖   自己跳入咖啡湖   等佢唔郁我就即蓋好   拎番去 Counter 換一杯新嘅   之後就番屋企 lu ~

今日無諗住出街   睇下電視睇下報紙都好快過咗半日   所以又要整 Lunch   就無煲翻尋晚飲唔哂嘅一碗魚湯   同埋之前啲紅豆沙就算喇 ~ 

鐘點嚟到又傾下偈   不過佢就有分寸   知道自己傾偈呢   之後做嘢就會加快   唔會呃鐘咁囉 ~ 

家姐今晚嚟比嘢我   咁叫做無咁悶啦   不過佢 9 點就要走   趕住番屋企睇 "真相" 大結局呀 ~ 

里奧大人差唔多 9 點半先番到屋企   好在我又飲咗湯咋   不過咁夜食   大家都無咩胃口   真係好想叫鐘點唔駛煮飯   反正次次都食剩好多   雖然我可以留番做 Lunch Box   但都唔食得咁多家嘛   始終都要掉 ~

嘉美雞 + 節瓜紅衫魚湯 by 鐘點 ( 28-JUL-2011 )

( 28-JUL-2011  THU )

自己整早餐   因為尋晚食唔哂啲墨西多辣肉醬香腸呀   又要清埋兩塊方包   所以又整埋牛油多士   加埋包朱古力奶   食完飽到震 ~

之後又係睇電視   差唔多 2 點再整 Lunch   又係尋晚無食過嘅香蒜肉絲意粉 + 墨西哥辣肉醬香腸   呢餐又係飽到上喉嚨   下次無咩必要都係唔好叫 Pizza 餐   搵自己嚟搞 ~

鐘點 4 點嚟咗   咁我唔知係咪飽得滯   同埋呢日唔知點解好攰   所以瞓咗半個鐘   瞓醒舒服哂 ~ 

里奧大人今晚成 9 點先番到屋企   所以飲咗湯先   唔想太夜飲湯   半夜又要去廁所   同埋唔想眼腫腫囉 ~  

Chicken & Pizza (外賣) ( 27-JUL-2011 )

( 27-JUL-2011  WED )

今朝 9 點就醒咗   所以就早啲食早餐喇 ~

睇陣電視就梳洗出發同媽咪飲茶喇   媽咪傷口仲痛   所以只能喺佢屋企附近酒樓飲茶 ~

飲到差唔多 2 點就陪媽咪去百佳   今日鐘點唔嚟   所以我就出旺角行陣喇 ~ 

平時真係唔會出旺角   出親旺角都係有嘢買先去   今次買咗 4 條裙 + 2 件外套 + 1 對涼鞋   再去花園街買咗 6 條睡裙   再買塊燒餅比家姐就番屋企喇   又熱又重又攰   不過就好開心囉 ~  

番到屋企第一件事係開冷氣   之後再沖涼呀   舒服到呢 ~ 

今晚唔想出街呀   所以外賣 Pizza ~    

家姐今晚又去我屋企   因為佢同我 Share 朋友比佢啲手信   同埋我幫佢買咗 3 條睡裙同燒餅嘛   唔嚟唔得呢 ~

豆豉涼瓜燜支竹排骨 + 紅豆沙 by 鐘點 ( 26-JUL-2011 )

( 26-JUL2011  TUE )

尋晚里奧大人同客食飯再飲嘢   所以差唔多 1 點先番到屋企   我喺廳度一路睇電視一路瞓一路等   因為佢未番到屋企我都會真正瞓到囉 ~ 

今朝好有 Mood 整扒芝士黑椒火腿三文治   好好味呀 ~

食完睇電視   日日咁都真係幾悶   不過休養嘛   好人好姐就可以出下街   同媽咪飲茶  約家姐食 Lunch   做下家務   整下嘢食都唔錯   咁啲時間過得快好多 ~

呢朝沖咗 1 Jar 檸檬水   唔知係咪酸酸咪咪關係   個人好快餓呀   所以 1 點半就煮番啲粥   好鬼熱   差唔多 2 點先想食 ~

鐘點 4 點嚟到   又係熨衫   我覺得好似日日有衫熨咁   但我已經無乜出街   都唔明點解可以有咁多衫洗 ~ 

今晚食飯嘅時候   里奧大人話唔好煮咁多飯   我話已經叫鐘點煮半嘜   再少啲就好難煮   不如唔好煮飯啦   不過妳食燜餸唔送飯得唔得先   佢諗咗陣話唔得   煩到呢   唔係我煮我都覺得好煩   嫌乜嫌物咁   不過算啦   佢做嘢壓力好大   夜晚真係食得唔多   就算佢自己鍾意食嘅都食得好少   但星期五六日就好有胃口呢 ~

皮蛋瑤柱鹹瘦肉粥 + 炒麵 by 鐘點 ( 25-JUL-2011 )

( 25-JUL-2011  MON )

眨下眼就差唔多月尾   時間過得好快呀   今朝食米粉   食完睇睇下電視就瞓着咗   風扇吹吹下真係好易令人瞓着呀 ~

無啦啦覺得好悶   所以落商場行下   買咗件外套就走喇   唔想一悶就買嘢   要慳啲 ~

好想食海南雞飯呀   估唔到柏檔都有下午茶餐   即叫個迷你海南雞飯餐   覺得好好味呀 ~

鐘點 4 點到   佢有佢做嘢   我有我睇電視   家姐放工去我屋企附近買嘢   所以又上嚟坐下   今晚里奧大人同客食飯   鐘點又煮咗好大碟炒麵   同埋啲麵好腍   我唔鍾意呢啲口感   所以叫家姐幫手拎比媽咪食   唔好浪費嘛 ~ 

鐵匠 @ 九龍灣 ( 24-JUL-2011 )

( 24-JUL-2011  SUN )

諗住番教會   不過條腰骨好痛呀   成晚又瞓得唔好   所以同里奧大人食完早餐就番屋企休息喇 ~

喺屋企 Hea 住咁等到 Tea Time   好熱呀   叫外賣算數 ~

里奧大人做公司嘢   我就睇電視咁囉   不過星期日啲電視節目都唔好睇嘅 ~

同里奧大人早啲落去買鬧鐘   之後試過教咗但唔響呀   好在我啱啱醒咗望下個電話原來已經 7 點   即刻叫里奧大人起身咋   唔係遲到就唔好啦 ~

買完就去鐵匠食飯   近近哋嘛 ~ 

Riso Café @ 九龍灣 ( 23-JUL-2011 )

( 23-JUL-2011  SAT )

今朝同里奧大人一齊 10 點起身   食完早餐   番屋企梳洗就出發去 Mega Box 喇 ~

我其實只係想去 Ikea 買平底鍋   所以先去 Mega Box   12 點幾無乜人行   幾咁開心呀   最憎多人嘅地方   去完 H & M 買嘢就去 Jusco   估唔到里奧大人買到個合心水嘅背囊   好感恩呀 ~

見差唔多 1 點幾   放工時間應該開始多人   所以去 Ikea 食咗 Lunch 先 ~

去完 Jusco 買嘢   再去 Ikea 買平底鍋   不過依家好多都係易潔鑊   我唔用㗎   對人體有害嘛   諗住無得買不鏽鋼嘅平底鍋   估唔到行行下又有   我睇到有個價錢牌寫住不鏽鋼 $59   即刻拎個鑊嚟睇   再比里奧大人睇   話好重手喎   真材實料   $59 好抵   諗住叫人拎個新   點知里奧大人再睇清楚個價錢牌   原來 $59 係不鏽鋼匙   好在里奧大人睇一睇咋   唔係一陣比錢先知買錯嘢就肉酸啦   不過好彩最後都買咗個不鏽鋼鍋仔 $199   我覺得貴   但想用嚟整甜品   所以先買咋   最後再買埋肉丸就走人 lu ~

本來諗住坐 Shuttle Bus   不過好多人呀   都係打的算喇   好熱呀   唔想等 ~  

番到屋企攰到呢   里奧大人就瞓咗覺   我又瞓唔到喎   但就一路睇電視一路中咁囉 ~

都係仲係好想食意粉   所以去 Riso Cafe 試下   最緊要近呀   今日行咗好耐   唔想再行咁遠呀 ~ 

煎釀三寶 by 鐘點 ( 22-JUL-2011 )

( 22-JUL-2011  FRI)

今朝喺屋企蒸魚肉燒賣   平時覺得好好味   可能同里奧大人一齊食啦   今朝一個人食   突然覺得好孤單咁 ~

食完睇陣電視   Hea 到 11 點就梳洗同媽咪去飲茶喇   之後再上媽咪屋企   因為我買咗啲防滑墊   幫佢貼哂啲角位   咁就無咁易撞傷   整完就要走喇   因為鐘點 4 點到呢   我又唔可以行得太快   要比多啲時間自預備呢 ~

今次叫鐘點抹我間房   呵呵   我覺得好乾淨呀   其實我都會抹   但無佢咁仔細囉 ~

里奧大人又上咗大陸   好在 8 點左右就番到屋企   咁就唔駛咁夜食飯呢 ~

西芹炒雞柳 + 冬菇蒸雞飯 + 蕃茄薯仔魚湯 by 鐘點 ( 21-JUL-2011 )

( 21-JUL-2011  THU )

今朝晨早 8 點幾有人 Dup 嘢   我仲以為發緊夢添   之後懶下床就起身 lu ~  

去完麥記食早餐就去惠康買嘢就番屋企   睇下電視   杠呢樣嗰樣都差唔多 1 點半 ~

早啲食 Lunch   就係尋晚食剩大半碟嘅婆婆粗炒   唔好睇佢咁深色   原來一啲味都無   不過我又唔想落辣豆板醬喎   下次一定叫里奧大人唔好再叫   我真係唔鐘意食粗炒囉 ~

鐘點 4 點到   今次叫佢抹窗   抹到好乾淨呀   我真係無佢咁乾淨囉   過年大掃除一定要搵佢幫手呀 ~

里奧大人上咗大陸   差唔多 9 點幾先番到屋企   雖然我唔想咁夜食飯   但佢做嘢做到咁夜先可以番屋企食飯   佢仲辛苦   算啦   等埋一齊食啦   我相信有我陪佢一齊食會開心啲嘅 ~    

上海婆婆 @ 九龍灣 ( 20-JUL-2011 )

( 20-JUL-2011  WED )

今朝喺屋企整扒芝士治   終於清哂 d 方包喇 ~

突然覺得好悶呀   所以梳洗完   12 點就出旺角買衫   咁嘅時間出去旺角就最好   因為無乜人   舒舒服服咁行   行到 2 點就去香港仔魚蛋粉食嘢   又係無乜人   真係好難得呢 ~

依家出旺角就會買拿破崙同椰撻做手信   真係好好味囉   見家姐話嚟   所以買咗每樣兩個比佢食 ~

番到屋企好攰呀   灘喺梳化唔願郁   差唔多 5 點半就陪家姐去萬寧買嘢   買完途經買和風遮嘅舖頭   家姐話把遮好靚   睇佢個樣好鍾意咁   所以我就同 Sales 講我比錢先再揀遮   佢同家姐都呆一呆   因為我想送比家姐嘛   如果我唔咁做   家姐就唔買呢 ~

之後佢番屋企 lu   我就等里奧大人放工喇 ~ 

今晚佢差唔多 8 點先喺大陸放工   所以番到嚟都 9 點幾   今次去上海婆婆   不過太晏食飯   都唔想食太多嘢 ~ 

冬菇雲耳紅棗蒸雞 + 節瓜鹹蛋肉片湯 by 鐘點 ( 19-JUL-2011 )

( 19-JUL-2011  TUE)

懶呀   所以又係花生醬包 + 麥精 ~

雖然今日都係天黑黑   但都想見下媽咪   所以都係去媽咪屋企喇 ~

 
本來想去飲茶   但無啦啦個天黑哂   又落超大雨   最後都係叫工人買外賣番屋企食算喇 ~

坐到 2 點幾   咁啱媽咪有朋友探佢   咁我都走 lu ~

依家覺得自己都幾健康咁   食車厘子做 Tea ~

今日鐘點 4 點半到   幫我洗衫同抹書房   執到好整齊   我真係好耐無幫里奧大人執書房   依家有人執到整整齊齊   乾乾淨淨真係好開心囉   希望里奧大人唔好又搞到周圍都係嘢啦   唔係我唔會放過佢   因為我康復完就係我做啦嘛 ~

鐘點都識煮嘢   同埋佢好耐之前都做過婦科手術   所以佢話我都可以食新鮮雞   佢就整比我食   一隻雞要 $128   好貴呀   不過算啦   難得有人整   我呢世人唔會整新鮮雞   見到啲頭頭腳腳好鬼驚   但我又食雞腳㗎喎   總之唔好比我見到佢由生變死   再經我手煮成食物就得㗎喇 ~  

麵豉蒸排骨 + 蒜蓉炒菜心 + 芫茜皮蛋肉片湯 by 鐘點 ( 18-JUL-2011 )

( 18-JUL-2011  MON )

唔駛番工嘅星期一又唔會覺好悶喎   如果番工都覺得係咁就好喇 ~

今朝喺屋企整花生醬包   再加包麥精   好難想像自己會食咁嘅早餐   我覺得咁樣好健康 ~

不過里奧大人話想食花生醬包做早餐   所以咪去山崎啲白麵包囉   但佢一個人點食 8 塊喎   山崎啲包真係好 Soft   雖然我覺得貴咗啲   但好過買美心 聖安娜嗰啲囉 ~ 

食完又睇電視啦   無無聊聊咁過   之後睇飲食節目   搞到我勁肚餓   所以外賣炸肶餐   超飽呀 ~

今日會用番第一日用嘅鐘點   鍾意佢快手快腳唔多嘢講   佢做嘢真係有紋有路   一嚟到就醃餸浸菜   之後就同我熨衫   抹廁所同拖地   佢見有時間就會抹櫃   之後就煮飯   3 個鐘做幾多嘢   真係值囉 ~

煎釀孖寶 & 生菜 (外賣) + 辛辣麵 ( 17-JUL-2011 )

( 17-JUL-2011  SUN )

今朝同里奧大人去大快活食早餐   之後就番屋企抖 lu   咁先有精神之後再出街呢 ~

我就上網   里奧大人就做公司嘢   差唔多 2 點幾就出發食嘢   突然好想食腸粉同車仔餸呀   食完再去百佳買車厘子   雖然我食到驚   但為咗補血   都係要食   因為依家又未可以補身呢 ~

里奧大人一喺屋企   我就唔想瞓   雖然同一屋簷下   但佢晚晚好夜放工   食完飯又入房做嘢   真係想見佢都難呀 ~

今晚清埋辛辣麵   所以買煎釀孖寶做餸   依家我落少少辣粉都覺辣   反而里奧大人要落一包   勁呀 ~ 

板長壽司 @ 九龍灣 ( 16-JUL-2011 )

( 16-JUL-2011  SAT )

終於等到星期六   可以同里奧大人一齊食早餐真係好開心呀 ~
 

食完番屋企沖涼   見里奧大人做公司嘢   我都寫 Blog 同 Load 相   整到差唔多 3 點先食 Lunch   唔想叫外賣   所以叫里奧大人買麥記番屋企食 ~

食完又寫   寫到 4 點半   對眼好攰   條腰又開始痛   係時候停 lu ~

今晚家姐同我哋一齊食   所以我睇埋報紙再 Hea 陣就出發去板長喇 ~

食完之後上嚟屋企食雪糕   傾陣偈就走 lu ~  

肉絲炒麵 + 青紅蘿蔔粟米豬展湯 by 鐘點 ( 15-JUL-2011 )

( 15-JUL-2011  FRI )

雖然仲喺休養   但一到星期五都好開心呢 ~

諗住慢慢食一份豐富啲嘅早餐   點知望到地下有隻小強   當堂無哂胃口   真係三扒兩撥食哂快快走呀 ~

番到屋企又係睇電視   再等到 2 點半外賣 Tea ~

食飽又有 d 風吹住   所以瞓咗半個鐘   爽呀 ~

鐘點 5 點半到   熨 7 件衫   煲湯煮飯   咁就 7 點半喇   之後我同佢講下星期唔駛再嚟   好在佢無乜太大反應啫 ~

里奧大人今晚 8 點半先番到呀   好在聽日係星期六   夜少少食無所謂呢 ~

茄汁洋蔥豬扒 + 蒜蓉炒菜心 by 鐘點 ( 14-JUL-2011 )

( 14-JUL-2011  THU )

今朝早餐食菠蘿油   不過食咗手指尾指甲 Size 嘅牛油咋   因為覺得就咁食個包已經好飽咁 ~

世界變喇   我居然覺得開冷氣好凍   唔通做完手術真係元氣大傷   個人會好虛   開咗一個鐘頭冷氣就要關喇   覺得好鬼凍   同埋呢日有風   自然風好舒服呢 ~

我之前一個星期驚有汗醃住傷口   所以基本上真係 24 小時開住冷氣   但唔開又焗喎   不過唔知係咪得一個人喺屋企   又唔駛點郁   所以覺得好凍咁呀   但已經開最細㗎喇 ~

諗住打比鐘點問佢嚟唔嚟   諗諗下都係唔打   無理由我打囉   但估唔到 12 點佢打嚟問今晚買乜嘢 ~

晏晝食辛辣麵   不過只係落咗 1/3 包辣粉   其實都唔辣   不過算啦   要錫住個 Body 嘛 ~

食麵唔開冷氣唔得嘛   不過又係開咗個幾鐘就熄 lu ~

鐘點 5 點到   之後就話做嘢比較慢   一快就會好亂   話如果兩個鐘頭做唔哂   過咗時間唔駛比   我話唔好   話哂妳都係做嘢   我好肯定第一個鐘點講咗我要求嘅嘢囉 ~ 

佢今日用咗一個鐘熨咗 9 件衫   再用個半鐘拖地   煮飯   不過算啦   用埋聽日都唔再用佢   都唔好要求咁多喇 ~

今晚問里奧大人個豬扒汁好唔好味   佢話好味   梗係啦   又係我調味嘛   哈哈   無得煮就想煮   有得煮又唔想煮   女人真係好煩呢 ~

錦日本料理 @ 九龍灣 ( 13-JUL-2011 )

( 13-JUL-2011  WED )

今朝去大快活食早餐   塊魚柳好腥   超勁難食呀 ~

休養期間   真係得食啦   瞓啦   睇電視啦   無乜搞作   同埋個人真係好攰咁   想去遠啲都唔得 ~

早餐太難食   搞到個人都無胃口   但唔食又唔得   所以開罐粟米湯做 Lunch   夠哂飽呀 ~

呢個鐘點係之前第一個鐘點介紹嚟嘅   所以尋日同佢嘈完之後   佢應該同咗第一個呻   話同我唔係咁啱   我只係話佢做錯嘢唔認   做嘢比較慢   其他我都無謂再多講   總之佢認為唔啱佢做   就唔好做喇   我對住佢都辛苦 ~

里奧大人今日唔駛上大陸   所以 7 點幾就可以食飯   今晚好想食拉麵   所以去錦日本料理喇 ~

真係好感恩   水姑打嚟問我同鐘點情況點   我話同佢炒大穫   所以水姑就讓佢嗰個鐘點   即係第 1 日嚟我屋企嗰個   逢一二四五嚟我嗰邊   三六就去佢嗰邊   太好喇   因為里奧大人成日驚我無住家飯食   所以依家又可能用番第一個   我覺得好開心好感恩   因為佢做嘢真係快手快腳   一話做就做   唔會同妳講多句嘢囉   呢啲先叫做嘢嘛 ~

椒醬肉 + 絲瓜炒雲耳 by 鐘點 ( 12-JUL-2011 )

( 12-JUL-2011  TUE )

今朝自己整扒芝士吞拿魚三文治   好好味   不過好鬼飽 ~

食完睇電視   差唔多 2 點先食 Lunch   抖陣再食車厘子   個個知我貧血都會買車厘子比我   不過我叫佢哋唔好買   我唔想食到驚囉 ~

洗衣機師傅 2 點幾嚟到   鐘點 5 點嚟到   咁我叫佢幫我洗衫   之後我就睇雜誌喇 ~  

今餐整椒醬肉   佢就咁切 ($13) 瘦肉 + 1 隻青椒 + 1 塊豆腐乾 + 2 湯匙菜甫 +  1 條絲瓜 +  1 碗仔雲耳   居然切咗一個鐘   無嘢呀嘛 ~

之後我心血來潮去睇下部洗衣機   點知一睇我就發火   佢又亂按   我即刻叫佢嚟睇   佢話係我教佢咁按   我話唔好話我教   我肯定無咁教妳   之後佢話以為係咁   話開唔到   所以就按 On/Off 制   見佢無反應   所以就再按   我已經成日講話要等 3-5 分鐘先可以開蓋嘛   同埋我好唔客氣話妳唔好以為就當係   唔識就問嘛 ~

我覺得錯要認囉   仲要屈我教佢   好不知所謂   慶到我幾想叫佢走呀 ~

之後無幾耐佢話聽日唔得閒嚟   我話好呀   心諗肯定之後唔會再嚟   所以我問佢星期四嚟唔嚟   佢話睇得唔得閒   我想話妳都黐線   講明一至五嚟   答我睇下得唔得閒先嚟 ~

里奧大人番嚟   我即刻同佢講番呢單嘢   佢笑笑口   佢話佢唔在場   所以不願置評   不過就知道佢做嘢好慢   有眼見嘛 ~

今餐嘅醬汁係我自己調校㗎   當堂覺得好好味   希望個傷口可以快啲復原   咁我可以煮番自己鍾意嘅口味呢 ~ 

脆肉瓜炒鯪魚肉 + 清補涼豬展湯 by 鐘點 ( 11-JUL-2011 )

( 11-JUL-2011  MON )

今朝喺屋企整芝士治   食完即梳洗喇   之後姑奶陪我去覆診呢 ~

超級無敵勁大雨   真係有遮都無用 ~   

Book 咗 11 點   差唔多 12 點半先有得睇   我同醫生講話瞓覺側身好辛苦   一側個肚入面好似有一抽嘢頂住   根本側唔到   醫生話可能塊膠布太緊   點知醫生一拻塊膠布   我個肚真係舒服好多呀 ~

但我貧血仲未改善   所以開咗鐵丸同葉酸比我喇 ~

睇完就同媽咪飲茶   因為咁啱媽咪又係呢日 11 點覆診呢 ~

飲到 3 點就走喇   因為鐘點 4 點鐘到   佢一嚟到   我就同佢講所有肉要醃味先   上次嘅洋蔥豬扒無味   點知佢居然話諗住用蕃茄燴到入味   我心諗 10 分鐘就可以燴到入味咩   當我唔識煮飯呀 ~

尋日買咗一梳大蕉比家姐 $12 有 5 隻   今次隻隻都好巨   原來有 4 磅重   其實之前都買過比家姐   佢啲同事個個爭住同隻蕉影相   話未見過咁巨喎  ~

隻蕉同家姐手腕差唔多咋 / 一隻手楂唔哂㗎

家姐嚟到   當然叫佢食雪糕啦   快啲食哂唔好引我 ~ 

大快活 @ 九龍灣 ( 10-JUL-2011 )

( 10-JUL-2011  SUN )

今朝同里奧大人去大快活食早餐   不過里奧大人話唔好番教會   人多驚撞親傷口喎 ~

里奧大人今朝好乖好主動洗衫   點知洗完呢   個洗衣機蓋 Click 住開唔到   仲以為係部老爺機壞   咁再脫水   睇下得唔得   點知都係 Click 住開唔到   我就覺得係佢關唔實個蓋囉   打咗兩間維修店都係唔維修洗衣機   之後佢出去睇有無第間整   但有啲都無開   咁無計啦   唯有等聽日打比惠而浦囉 ~  

難得有人扶   所以我去遠少少食 Tea   咁啱比我望到有間維修店整洗衣機   咁即刻 Call 啦   好感恩呀   里奧大人頭先都有去睇到   但居然睇唔到呢間係可以整洗衣機 ~

師傅差唔多 5 點半先到   一睇就話關唔實個蓋   咁都好   好在整到   同埋好在係里奧大人整壞咋   唔係又話我㗎喇   所以我乘機話里奧大人   你整壞嘢   我只會話唔緊要   反正部機都壞壞哋   依家一次過 Check 埋仲好   如果係我整壞呢   第一句就語氣極差咁話妳搞過啲咩   一定係妳咁咁咁   我咁講完佢   佢都好尷尬咁笑呀 ~  

整一整要 900 大元   無計   因為過哂保養期   所以如果叫惠而浦嚟整   肯定仲貴呀   不過今日無配件   最快可能要聽日或後日先整到 ~

終於可以拎番哂啲衫出嚟   所以即刻拎去洗呀   唔係勁臭都似 ~

去大快活食晚餐   因為突然好想食鐵板餐呀 ~

Chicken Pizza (外賣) ( 9-JUL-2011 )

( 9-JUL-2011  SAT )

超開心啦   可以同奧大人一齊食早餐   之後佢去剪髮   家姐打嚟話喺我屋企附近   所以買埋早餐上我屋企食   無啦啦又有人陪   真係好開心呀 ~

番到屋企寫 Blog 喇   再唔寫   我會唔想再寫㗎喇 ~ 

唔想出街呀   所以叫外賣 ~

今晚勁想食 Pizza   好耐無食濃味同香口嘢   覺得好好味呀 ~  

蕃茄洋蔥豬扒 + 蒜蓉炒菠菜 by 鐘點 ( 8-JUL-2011 )

( 8-JUL-2011  FRI )

Happy Friday 啦   好耐無食茶餐廳早餐   所以叫咗外賣炸菜肉絲腸仔麵餐 + 咖啡   我好期待㗎   不過啲麵發脹哂   好難食   食咗 1/3 要放棄 ~

之後個人開始唔舒服   睇完電視就瞓   醒咗之後唔想食 Lunch   又係睇完電視就瞓   瞓到 4 點半   啱啱鐘點就到喇 ~

今次個鐘點令我發火啦   我好唔鍾意啲人唔識又唔問   亂搞我啲嘢   之前已經知佢亂按熱水壺   因為成日有音樂響   我仲以為佢有電話   點知尋晚我發現個熱水壺啲時間制錯哂   咁應該係佢亂按啦   今日又比我聽到   我即走去話妳唔識要問   妳咁亂按   好易整壞我啲嘢 ~ 

其實佢喺度做嘢   我唔會瞓覺   因為我唔想我瞓着佢又問我嘢   又驚佢見到我瞓唔敢問我嘢   自己懶醒搞掂 ~ 

4 點 45 分開始開機洗衫   無理由 6 點 45 分仲洗緊   咁我個洗衣機有時會 Shot Shot 哋   所以我去睇究竟乜事   點知一睇   見到個制嘅方向錯哂   我問佢點解   佢話部機停咗開唔到   所以就亂按   我塊面當堂黑哂   話唔明就問   整壞部洗衣機好煩㗎   妳唔清楚就要問   唔好亂搞囉 ~

  
佢又成 7 點先煮飯  我見佢喺雪櫃拎袋豬扒出嚟   我覺得好怪   但又諗唔到點解怪   之後佢煮完出嚟   我終於知點怪啦   佢無醃同埋拍塊豬扒   又無點煎   好似烚咁囉   我已經無咩要求   但都覺得無味囉   之前個鐘點仲話佢識煮飯   煮廿幾人飯添喎   佢做嘢咁慢   真係好難想像煮廿幾個人嘅飯囉   我哋兩個人食都用個幾鐘煮 ~

其實我請鐘點係想每日 3 個鐘   做家務 & 煮一餐簡單飯   但我覺得佢真係好慢   所以我叫佢一三五做 3 個鐘   二四做 2 個鐘   同埋之後我會講明 3 個鐘頭做哂要做嘅嘢囉 ~  

蒜蓉豆豉蒸排骨 + 蒜蓉炒西蘭花 + 木瓜雪耳糖水 by 鐘點 ( 7-JUL-2011 )

( 7-JUL-2011 THU )

今朝又比樓上鑽嘢嘈醒   算啦   起身食米粉再睇電視   依家睇緊 "蝸居" 又幾好睇喎 ~

睇完又瞓   瞓完又食 Lunch Box   鐘點 3 點到   比樓上鑽到好頭痛添 ~

今日叫佢就抹嘢   拖地   佢係咁跌嘢   我覺得好煩   搞到我個頭更痛 ~

佢又係做 4 個鐘   今次我睇住佢抹嘢   真係好慢囉   抹就抹嘛   又睇下裝啲咩先抹   唔怪得咁慢啦   我平時抹埋里奧大人書房都係差唔多一個鐘   佢就咁抹兩個櫃都個幾鐘 ~

今晚嘅排骨好多油   啲排骨又無味   我估佢無醃囉   里奧大人都話啲飯好腍   佢鍾意食腍飯都話林   何況我最憎食腍飯添 ~

肉絲炒麵 + 蒜蓉炒西蘭花 by 鐘點 ( 6-JUL-2011 )

( 6-JUL-2011  WED )

諗住屋企床瞓得好   點知都係瞓得唔好   就住傷口瞓   成日手痺   超辛苦 ~ 

樓上又鑽嘢   所以 9 點半就比佢哋嘈醒咗   無計啦   起身食早餐 ~

食完早餐睇電視   之後瞓覺   再睇電視   2 點就食 Lunch Box   日日咁樣唔肥都難   不過個個都要我食嘢   咁樣身體會快復原啲喎 ~ 

今日新嘅鐘點 4 點到   傾咗幾句都知佢係多嘢講   佢一講嘢就停手係咁講   所以之後我就唔出聲   等佢專心嘢 ~

佢做嘢都幾慢   4 個鐘頭只係熨兩機衫同煮一餐飯   同埋我 Expect 每日用 3 個鐘   比我感覺佢拖慢嚟做咁 ~

佢 8 點走人   里奧大人就番到   之後問佢做過啲咩   我話只係熨兩機衫同煮一餐飯   佢 O 哂咀   話 4 個鐘頭做得 2 樣嘢 ?!   不過我話等我再觀察先睇下佢有無改善 ~

依家食完飯就係里奧大人洗碗   我真係無力   同埋佢都叫我唔好洗   整親傷口仲煩呢 ~

媽咪一定要家姐今晚嚟探我   影埋相   睇我面色好唔好呀   之後叫埋家姐食雪糕   同埋佢要睇我嗰 2 粒大瘤嘅相呀   佢同里奧大人都成日問我有無相睇   因為佢哋好想知道點解可以咁大粒喺個肚咁耐都得喎 ~

出院 & 梅菜蒸肉餅 + 炒菜心 by 鐘點 ( 5-JUL-2011 )

( 5-JUL-2011  TUE )

霍醫生今朝 8 點 15 分就到   我問佢可唔可以今日出院 ?!   佢話可以   之後佢收到 Call 要去執仔   所以執完仔再番嚟睇我 ~

差唔多 8 點 45 分再嚟   話我可以出院   星期一去診所覆診   我第一時間打比里奧大人啦   佢話啱啱沖完杯咖啡時   會唔會咁邪真係出院 ?!   點知真係   哈哈   佢又要即刻請假陪我出院啦   好在佢上司體諒咋   感恩 ~ 

佢差唔多 10 點就到   姑娘又教咗我點辦出院手續同拎藥   里奧大人一嚟到就同我執嘢   1 袋去   3 袋番   因為里奧大人驚我唔夠衫換   又驚我熱   所以拎咗幾套衫比我   呢方面佢都幾細心嘅 ~

 
差唔多 11 點就搞掂   算快啦   一上的士里奧大人就叫司機唔好開咁快   因為我做完手術   呢一下真係覺得佢好好呀   睇唔出咁細心   哈哈 ~ 

嘩   好掛住屋企呀   最估唔到係里奧大人換哂床單   又洗乾淨哂啲 Cushion 比我墊   超級勁感動呀 ~

勁想飲茶呀   所以番到屋企   執好哂嘢就去鴻星飲茶   慢慢食慢慢飲   好嘆呀 ~

之後去買生果   因為我唔想着褲   驚整到箍住傷口   所以買咗 4 條 One Piece   里奧大人比埋錢㗎   仲問我夠唔夠 ?!   又好細心陪我揀   換轉係平時就無咁順灘   哈哈 ~

番到屋企就打比媽咪   話佢知我出院   佢緊張到以為我喺醫院   想即嚟睇我嗰隻   之後又問我真定假   我話真㗎   之後佢喺度喊   話我唔話佢知   其實係我哋特登唔講㗎   唔係佢包住兩隻腳嚟探我   我仲擔心 ~ 

鐘點 5 點幾到   3 個鐘就幫我抹咗洗手間  拖地同煮煲湯煮飯 ~

我初初諗住自己會做到家務   仲會煮到飯   煲到湯   原來係唔得架   下下按住傷口嚟行   根本做唔到嘢囉 ~ 

今晚里奧大人應該好瞓㗎喇   唔駛心掛掛嘛 ~