蕃茄雞柳 + 節瓜大魚尾湯 by 鐘點 ( 31-AUG-2011 )

( 31-AUG-2011 WED )

今日好番好多喇   叫做有胃口食早餐嘛 ~

番到菇場個個見到我精神番啲就埋嚟傾幾句   又幾好喎   咁先正常家嘛   哈哈 ~

諗住叫外賣   點知間茶餐廳話要 2 個先送喎   咁我出去食算數 ~

放工即走喇   因為想去百佳買啲蛋糕仔比里奧大人番大陸食呀   因為佢依家咁夜先喺大陸番嚟   驚佢餓嘛   個袋擺定啲蛋糕仔就最好啦   唔會食得飽又會頂到肚餓   我覺得佢好似我個仔咁   因為要成日 Check 住佢個袋有無紙巾   有無帶蛋糕仔   有無帶定裇衫   有無拎番份報紙出嚟   佢試過 2 日嘅報紙都無拎出嚟呀   真係豬兜呢 ~

今晚有鐘點   佢又幾醒喎   我之前兩次都擺定新床單出嚟 Remind 自己叫佢換   尋晚我正想開口時   已經係新床單   佢仲話咁擺就知道㗎喇   咁我飲魚湯   佢次次都會幫我掉哂啲魚   佢知道我好驚嘛   真係好幫手呢 ~

自己論盡   以為自己有帶個 Lunch Box 番屋企   點知諗諗下原來係無帶   所以要食哂啲雞柳   啲飯就用嚟後日做炒飯囉 ~

里奧大人又係 8 點半先喺大陸開始走   番到黎都差唔多 9 點 45 分   又係無胃口啦   陰公 ~

呢個暖壺係家姐送比里奧大人嘅生日禮物   真係好好用囉   因為我實在無本事等到咁夜先食飯   所以依家我可以食先   再將啲餸菜飯放入暖壺   咁我又唔駛翻熱   佢番黎一開就有得食   幾咁方便  哈哈

腸粉 + 車仔麵 (外賣) ( 30-AUG-2011 )

( 30-AUG-2011  TUE )

今朝又係瞓到 8 點半再打的番菇場   個人仲係好攰   同埋個肚有少少痛   唔想食食早餐   但就飲咗半支寶礦力同一罐咖啡   之後就好好多喇 ~

飲完好精神喎   不過仲未有胃口   但都要比自己食嘢囉   尋日買咗小牛蛋   今日到期   所以唔食唔得喇   無胃口仲食埋啲咁乾爭爭嘅嘢都幾難頂   啲同事經過我位都叫我應該食暖嘢   但真係無胃口嘛 ~

都有啲嘢做   所以覺得啲時間過得好快   無啦啦頭暈暈咁款   放工都係打的番屋企   之後再買隻茶葉蛋番屋企食   食完好啲呢 ~

今日里奧大人要上大陸見客   但好感恩 8 點都番到屋企   我真係唔太想食嘢   所以就咁食腸粉   佢食車仔麵啦   因為同一檔買嘢   唔駛分開買咁煩嘛 ~

呢啲係檀花香梘嚟㗎   我用界刀整成一片片   都幾辛苦㗎   用嚟掛喺房門鎖   希望間房會有檀花香味   哈哈

鐵匠 @ 九龍灣 ( 28-AUG-2011 ) + ( 29-AUG-2011 )

東京海鮮薄燒 / 煙三文魚沙律 / 北海道味噌拉麵 / 鹽燒雞軟骨串 / 加洲反卷

( 28-AUG-2011  SUN )

每月一到   個人比較攰啲   所以叫里奧大人買早餐番屋企食喇 ~

好 Hea 咁 Hea 到 2 點半就叫外賣喇   食完嘢里奧大人問出唔出街   我話無啦啦出街嘅   佢話驚我悶喎   自從我出院之後   佢成日都驚我屈喺屋企好悶   出院之後嗰兩個星期真係幾悶   好番少少之後我都成日約媽咪飲茶   佢梗以為我真係無出街定啦   反正佢無問   我都無講   反正講咗   佢都唔記得   依家咁仲好啦   佢一覺得我喺屋企就會悶   都會 Plan 下去邊到好   仲要唔駛我諗添喎   幾咁好呀 ~

TVB 播 "我和尋回犬的十個約定"   我無諗過睇   因為家姐之前講過話好慘   里奧大人都講咗幾次叫我唔好睇   但最終都忍唔住睇咗大半 Part   喊到我吖   之後家姐 Send SMS 嚟話好慘   原來佢都有睇   又係喊到豬頭咁啦   如果佢嚟我屋企一齊睇都幾搞笑   肯定嚇傻里奧大人   因為佢知我哋一睇到有狗呢啲戲   就好自然會諗起朱朱   所以佢都好識趣哋咁靜靜坐埋一邊   唔會出聲   但當我睇完嘅時候   佢就會話都叫妳唔好睇㗎啦 ~

喊完個人好攰呀   瞓咗半個鐘   之後一齊去探媽咪 lu ~

今晚 Book 咗鐵匠   所以 7 點 45 分就要走喇 ~

( 29-AUG-2011  MON )

尋晚個肚扯住扯住痛   又唔似以前嘅經痛   不過就嘔囉   唔知係咪食咗炸嘢太油膩呢 ~

成晚無乜點瞓   瞓到 8 點半起身梳洗   再打的番工   估唔到都係 9 點 15 分番到菇場   又唔係好遲喎 ~

喺菇場瞓下做下咁囉   個人係好攰   個肚間唔中扯住少少痛咁囉   幾經辛苦先捱到 Lunch Time   可以名正言順大覺瞓呀 ~

瞓咗好啲   不過無胃口   仍然好想嘔   個肚都開始有少少經痛   但同以前真係相差好遠   好感恩呀 ~

放工即走啦   番到屋企沖個熱水涼   舒服都爆炸呀 ~

到夜晚仲係無胃口   所以叫里奧大人自己買外賣番屋企食呢 ~ 

Loving Hut @ 九龍灣 ( 27-AUG-2011 )

蔭紫菜卷飯 / 黃金扒湯麵

( 27-AUG-2011  SAT )

我成日話好想飲早茶   所以里奧大人早幾日已經話我 Off 去鴻星飲早茶 Hea 下   所以 9 點半起咗身就出發 lu   好似無同里奧大人咁樣飲早茶   真係好正囉   又抵食   同埋最緊要無中午咁嘈嘛 ~

龍蝦湯鮮竹卷 / 蜜汁叉燒包 / 鮮蝦炸雲吞 / 懷舊馬拉糕 / 鮮山竹牛肉球 / 回味銀針粉

飲到 11 點幾就走人喇   番屋企 Hea 下   之後佢有佢做公司嘢   我有我熨衫呢 ~

之後家姐探完媽咪又嚟同我哋食 Tea   今次去 KFC 食三重滋味桶雞   我用八達通仲送多 3 個葡撻   正呀   不過食完好鬼飽 ~

家姐上我屋企坐   之後夠鐘就一齊探媽咪   里奧大人就繼續喺屋企做公司嘢 ~

見到媽咪都精神啲   我都安樂啦   醫生話可能耳水不平衡   但又唔 Make Sure   咁即係點先 ~

我哋又係坐到 8 點就走喇   家姐番屋企同姐夫食飯   我就同里奧大人去食素   咁就過咗一日 lu ~ 

叙苑粉麵茶餐廳 @ 九龍灣 ( 26-AUG-2011 )

( 26-AUG-2011  FRI )

Happy Friday 嘛   早餐要食得豐富啲呢   同埋將食唔哂嘅餐蛋做 Lunch Box 嘅餸   咁就唔駛浪費   就咁食一個麵其實已經好飽呢 ~

10 點幾收到家姐電話   話媽咪打嚟話頭暈氣促   但無帶平安手機同身份證咁點喎   咁點吖   叫人即 Call 白車啦   聽完個電話之後   我個頭痛到爆   好嬲囉   都叫落街帶電話   一有事打個電話就會即 Search 位置   知妳叫乜名   唔駛一陣警察嚟到再問妳   同埋如果周圍無人都唔駛咁驚嘛   今次好彩喺百佳   有人肯借電話比妳打   有人肯幫妳叫白車   如果唔係妳話會點吖   嬲鬼到我呢 ~

之後婆婆打嚟問媽咪點   有無事   姑娘點講   家姐知唔知媽咪點   我真係頂唔順用好重語氣話   媽咪無帶電話   我乜都唔知   今晚探佢先知   我真係已經好火   仲問埋呢啲問題喎   雖然係關心   但第一時間已經話唔知啦   點解仲問呢 ~

Lunch Box 係尋晚喺茶餐廳嘅炒麵   再加早餐食唔哂嘅餐蛋   啲麵乾到呢   餐蛋又係好乾呀   餐肉可以用脆嚟形容添呀   可能我叮咗 7 分鐘太耐喇   同埋無喺叮前加啲水   好難食都要食啦   唔通浪費咩 ~

放工即探媽咪啦   雖然我把口成日鬧媽咪   其實好關心佢㗎   哈哈   買咗葡萄適   蛋糕同糖囉   悶悶哋有啲甜嘢食會好啲嘛 ~

去到呢   我平靜中帶點激動同媽咪講   下次真係要帶平安手機   今次妳無帶到   妳話幾咁麻煩   咁咁咁咁   之後再話妳唔用就 Cut   我自己月費都唔捨得比呀   妳個個月百幾蚊又唔用   咁不過開張電話卡比妳好過   媽咪都唔敢出聲啦   見佢咁攰   我都唔話喇 ~

里奧大人上咗大陸   家姐又約咗朋友   所以我探到 8 點先走喇   反正番到屋企都係等里奧大人放工 ~

好在喺醫院飲咗碗湯頂到里奧大人番嚟   所以我都有氣力熨衫   抹櫃再拖地   叫做勁喇   一次過做咁多   做開有條路嘛 ~

等到 9 點半里奧大人就番到嚟喇   我話難得聽日 Off   所以唔好外賣   出去食啦   不過咁夜我哋都無胃口   食粉麵最好   好怕食完飯就瞓   好似好滯咁   唔鍾意呀 ~ 

星悅鮮廚 @ 官塘 ( 25-AUG-2011 )

美味汁牛仔骨 / 腐乳炒通菜 / 鴨蛋蠔仔餅

( 25-AUG-2011  THU )

今朝天氣怪怪哋   吽風咁   但啲風又唔係熱喎   同埋好多煙霞咁   總之好怪啦 ~

 
又去麥記食早餐   因為唔想食蛋   我覺得去茶餐廳好多早餐都有蛋咁 ~

朝早時間真係好快過   好快就到 Lunch Time   但過咗 Lunch Time 啲時間就好難過咁囉 ~

里奧大人依家逢星期三四五都會上大陸   所以我多數其中一晚會同媽咪食飯   今晚家姐唔得閒   所以我同媽咪就出街食 lu ~

家姐話有嘢比我   原來係 Nuts   因為尋晚同佢一路傾電話一路行超市   講開話想食 Nuts   但居然無   估唔到佢又特登去買 ~

食完去媽咪屋企坐到 8 點半就走人   因為想陪里奧大人食晚餐呢 ~

香蒜蜆肉意粉 ( 24-AUG-2011 )

( 24-AUG-2011  WED )

時間真係過得好快咁嘅   咁就過咗大半年 lu   不過呢年真係好開心呢   因為搬咗出嚟嘛   想幾時見屋企人都得   佢哋嚟見我又易喎   如果住得太遠   成日會覺得出出入入好攰咁囉 ~

結咗婚之後   我多數以里奧大人為先囉   所以嗰時住大埔唔係成日同媽咪食飯   因為想多啲時間陪里奧大人   但其實我成日都覺得自己好衰囉   所以依家同媽咪住得咁近   探媽咪方便好多   最多咪探完打的番屋企再陪里奧大人食飯   都仲有大把時間   再唔係   叫媽咪嚟我屋企附近一齊食嘢   咁我又可以見到媽咪又可以同里奧大人一齊食飯   咁仲好添 ~

早餐其實好想食三文治   方便嘛   但又唔想食蛋   食吞拿魚又得好少   唔夠飽嘛   所以最後都係食雪菜肉絲米粉餐喇 ~

菇場淡季嘛   所以都無乜嘢做   不過都慣咗㗎喇 ~

Lunch 就係食朝早買嘅杏仁蛋糕同腸仔包   買嘅時候係新鮮出爐   幾鬼正   不過我唔會買早餐番菇場食㗎   除非遲大到啦 ~

太耐無煮喇   真係一諗煮乜都頭痛   不過我只係想煮意粉   因為鐘點成日整中菜   所以有啲驚   難得自己煮   多數煮意粉 ~

無啦啦好想食油炸鬼   所以買咗條番屋企慢慢嘆   之後再行超市   點知睇到啲薯條呢   個肚係咁打鼓   咁同緊家姐傾緊電話   我話如果肚餓就好想食甜嘢   好似蜜糖杏仁嗰啲咁呢   點知家姐話根本我就係想食   唔係因為肚餓先想食   哈哈   又係喎   不過無得買囉   邪爆 ~

番到屋企第一時間食條油炸鬼啦   熱辣辣脆卜卜   好味到爆   不過食完好鬼漏   因為之前里奧大人話無背心底衫着嘛   所以我諗住食飽之後熨衫   當做運動囉   都唔等鐘點黎熨咯   諗住熨多一兩件就收手   點知忍唔住熨哂一機衫   我其實好怕做啲唔做啲咁   熨完衫即入廚房整嘢喇   忙到我呢 ~  

是日懶餐 - 香蒜蜆肉意粉

香蒜蜆肉意粉 - 爆香啲煙肉   再加蒜蓉爆香啲蜆肉   再加埋意粉同雜豆一齊粉   好在試味咋   原來無乜味   即刻加番啲蒜鹽   當堂好味好多呀   不過之前淥完啲意粉唔記得加油撈勻   所以啲意粉比較乾囉 ~

里奧大人差唔多 9 點半先番到屋企   好在依家有暖壺   超勁方便呀 ~ 

打邊爐 @ 稻香 (九龍灣) ( 23-AUG-2011 )

( 23-AUG-2011  TUE )

星期二喇   呢三晚都 10 點半上床瞓覺   我依家係想瞓就入房瞓喇   唔係喺梳化瞓着咗之後入房瞓   會瞓唔到㗎 ~

真係好感恩菇場附近有茶餐廳   呢間茶餐廳係之前食開嘅茶餐廳嘅另一間分店   所以水準一樣   同埋最緊要冷氣夠凍   正呀 ~

番到菇場見阿 Head 間房無開燈   超勁開心啦   點知 11 點見到佢 ~

又係食 Lunch Box 啦   我真係好唔鍾意食肉餅   肉絲同埋雞柳   但豬扒  雞扒又 OK 喎   唔知點解 ~

今晚請里奧大人食生日飯呀   但唔知佢收幾點   同埋佢實要做公司嘢   所以地方只限九龍灣 ~

好感恩佢 7 點放工   我問佢打唔打邊爐   佢話打啦   話我問咗幾十次喎    哈哈哈哈 ~

喺我哋對面枱有一男一女叫餸食飯   見佢哋枱面得半隻雞   仲以為佢哋就咁食一碟餸   因為見佢哋食咗好耐嘛   點知原來佢哋係等個唔知咩煲仔菜   點解我會咁留意佢哋係因為個男人就咁食   無乜點同個女講嘢   只有個女同佢講嘢   而佢啲態度都好冷淡咁    我真係接受唔到咁呀   可能我實在太多嘢講啦   同埋里奧大人唔理我   我會話佢唔聽我講嘢   如果佢係都話有聽   我會問番佢   我對上嗰 3 句係講咩   但佢又真係答到喎 ~

依家稻香唔抵啦   以前啲醬料係任添唔駛錢   依家每位要 $ 8   不過咁   喺稻香打邊爐又真係舒服過喺吉野家同大快活嘅   同埋佢哋啲嘢食都幾新鮮   算啦 ~

梅菜蒸肉餅 + 炒脆肉瓜 + 紅豆沙 by 鐘點 ( 22-AUG-2011 )

( 22-AUG-2011  MON )

話咁快又一個星期嘅開始   今日係里奧大人生日   所以我都覺得好開心咁 ~  

今朝又麥記喇   諗唔到食咩就多數麥記呢 ~

菇場無嘢做就啱喇   因為我晏晝 Off 嘛   唔想 Hold 住啲嘢做唔哂 ~

同媽咪飲茶   之後再打的去覆診   其實唔想打的   不過想陪媽咪耐啲囉 ~

Book 咗 3 點半   差唔多 4 點半先睇   醫生見到我就話原來係妳呀   我同醫生講估唔到妳認得我呀   佢就話梗認得妳啦   切個瘤切咗好耐嘛   哈哈   我好感恩 Everything OK   醫生話奇怪傷口仲會有啲痛   正常應該唔會   係因為我唔夠放鬆   叫我放鬆啲喎 ~ 

睇完搭地鐵   有個 6-7歲男仔   我坐幾個站   佢就問足佢爸爸咁耐嘢   問到我都煩呀   佢落車都仲聽見佢把聲   真係好煩   我會容忍到小朋友問嘢講嘢   但就唔可以不停咁講   真係人都顛 ~

番到屋企坐陣就同家姐去價真棧買嘢   之後約埋里奧大人一齊番屋企   家姐就番媽咪屋企食飯喇 ~ 

本來今晚想同里奧大人出去食架   但佢話想我食新鮮飯   咁算啦   留番聽晚先同佢出去食 ~ 

自從由知道開始要做手術到出院   里奧大人真係好表達到佢細心嘅一面   做完手術驚我無力拎杯飲水   所以千叮萬囑記得帶飲管   估唔到當晚真係要飲水   姑娘話等佢拎枝飲管先   我話我有   佢都好驚訝我有呀   呢一刻我真係好感動里奧大人咁細心   之後喺我住院期間   佢又洗哂屋企所有唔同大細嘅 Cushion   等我睇下邊個會墊得舒服啲   講真   雖然我都知佢本身都幾細心   但估唔到佢會諗埋我之後會點點點囉   因為佢都算係細心得嚟都係一個粗心大意嘅人嘛   所以我尋日話送比佢嘅生日禮物   就係我一定要身體健康   愛錫身體   咁先係愛佢囉   唔駛佢成日咁擔心   我一定會做到呢 ~

Saizeriya ( 薩莉亞意式餐廳 ) @ 將軍澳 ( 21-AUG-2011 )

( 21-AUG-2011  SUN )

今朝 10 點半先起身   梳洗後就落街食早餐   食完就留屋企喇 ~

喺屋企 Hea 到 2 點半就出門口   坐免費 Shuttle Bus 去新都城   真係好喇   可以慳番車錢 ~ 

去到第一時間食 Tea 喇   一早諗定要食餃子   之後加多個湯濛   飽到呢 ~ 

咁飽實要行   好在里奧大人買咗件裇衫   叫做有收穫嘛   諗住送比佢做生日禮物   但係都唔要我比   我都唔爭啦   一陣推嚟推去整親我傷口仲煩   我都唔明點解佢成日唔比我送嘢比佢   反而佢想送番件披肩比我喎   幾好呢   不過我覺得太貴都係唔好喇   同埋我成日買嘢都係買果刻好鍾意   之後擺埋一邊又會唔記得着   所以都係無謂浪費喇 ~

約咗媽咪同家姐 5 點 45 分到 Saizeriya   我哋早啲行去攞位喇   因為呢間嘢好鬼多人   我情願早啲到好過又要等   要等一頭半個鐘真係唔多值囉 ~  

食到 7 點 15 分就走喇   家姐車埋我哋番屋企   好在我哋順路   咁就真係方便好多喇 ~  

海港酒家 @ 將軍澳 ( 20-AUG-2011 )

粉絲蟹煲 / 海鮮辣豆腐煲 / 蒸東星斑 / 燒鵝 / 上湯浸菜苗 / 乳豬拚燒腩仔 / 干炒牛河 / 西瓜 / 芒果糯米糍

( 20-AUG-2011  SAT )

今朝食吉列魚柳餐    唔知點解   我覺得星期六食吉列魚柳餐係好開心   可能因為番半日啦 ~

菇場無乜嘢做呀   做電腦 Filing 囉   想做好耐㗎喇   今日有 Mood 就今日做 lu ~ 

放工約咗里奧大人同朋友茄子兩公婆一齊去鳳苑飲下午茶   之後再上佢哋屋企坐   由 2 點傾到 6 點   超勁開心呀 ~

蜜汁叉燒酥 / 脆麻花 / 腐皮卷 / 家鄉煎薄撐 / 娥姐粉果 / 川芎魚滑 / 菜心 / 鮑汁鳳爪 / 叉燒腸 

之後就去海港喇    約咗水姑一家一齊食晚飯   因為佢哋請里奧大人食生日飯   食到差唔多 9 點半就走人喇 ~

車仔麵 ( 外賣 ) @ 屋企 ( 19-aug-2011 )

( 19-aug-2011 fri )

Happy Friday 喇   今朝又同 8 卦去麥記食早餐   我依家策略係我早 d 到食先   咁樣我又唔駛咁趕頭趕命食喇 ~ 尋日有嘢要搵同事整   我見到佢玩緊 game   不過我都特登行去叫佢   嚇到佢即刻 close   同埋最頂癮佢好意思話好忙要聽日整   忙又玩 game   今朝我追番佢   佢話差 d 唔記得   最憎 d 人成日扮忙 ~ Lunch 又食 lunch box 喇   不過依家諗緊帶唔病 lunch box   因為個玻璃飯盒都幾重   再加埋飯餸   仲有自己手袋呢   我唔想拎咁多嘢呀   但如果平時夜晚里奧大人食咁小   食唔哂又唔會留番聽晚喎   但係如果買得小又唔得   好難買嘛   唔通叫鐘點特登同妳去超市買咩   我都唔好意思開口啦 ~   放工番屋企喇   諗住打邊爐   點知里奧大人話有排先番   咁唔打啦   佢咁夜番   實餓啦   所以食嘅嘢真係最緊要快囉 ~   唔知點解今日好快餓   我自己煲咗粟米湯飲咗先   如果里奧大人夜番我都可以捱到嘛   佢差唔多 9 點 50 分先番到屋企   所以我話食車仔麵   濕濕地易入口嘛 ~

住家飯 @ 媽咪屋企 ( 18-AUG-2011 )

煎黃花魚 / 冬菇燜雞 / 麵豉炒豆角 / 清補涼豬展湯

( 18-AUG-2011  THU )

今朝約咗 8 卦食早餐   本來想去另一間   但無啦啦寫住早餐暫停一天喎   所以去番我平時食開果間算數   唔好煩 ~

菇場超靜啦   不過都慣咗   反正自己都係成日 MSN 都無乜所謂   我之前做嗰間公司   個個師奶   一見老闆喺度呢   講嘢都特別大聲過人   把聲又唔係好聽   一個豆沙喉   一個似鬼 "錬" 咁聲   又尖又刺耳   我同里奧大人講好似喺街市番工咁呀 ~

好快 Lunch Time   又係 Lunch Box   依家 Lunch Box 份量係我自己原來嘅份量   加埋里奧大人食唔哂嘅份量   我唔鍾意咁囉   太多嘛   依家好快就飽   唔想食太多囉 ~ 

放工番媽咪屋企食飯   好耐無食過媽咪住家飯咁呀   媽咪依家隻腳嘅傷口仲要包住   我話出去食好過   我驚佢特登去遠啲買新鮮嘢呀   咁我就真係唔想囉   其實簡簡單單就最好   我無要求嘛   不過媽咪多數實會整魚   煲湯比我囉   自從話比媽咪聽我貧血之後   依家日日都問我個咀唇有無咁白   之得唔講佢知啦   佢實好擔心   下次覆診之後就呃佢話已經無哂貧血   同埋我做手術又唔話佢知   佢覺得我有事都唔會同佢講   所以今次真係要講呢個善意嘅大話呀   唔係佢咁樣擔心   我真係唔想囉 ~  

蠔油薯仔排骨 + 節瓜大魚尾湯 by 鐘點 ( 17-AUG-2011 )

( 17-AUG-2011  WED )

星期三喇   好似好快咁喎   唔知係咪休養期間無咩細藝   所以覺得啲時間過得特別耐咁呢 ~

今朝着咗條窄身啲嘅褲番工   本來想番屋企換過   但自己又行得慢   一來一回用好多時間囉   辛苦一日咁多啦 ~  

早餐食菠蘿包餐   不過個菠蘿包嘅包應該唔新鮮   個包一拻即散   比我感覺好似擺咗幾日嗰啲咁 ~ 

番到菇場忙啦   都係嗰句啦   有嘢做好過無嘢做嘅 ~

今日有 Lunch Box   幾個同事見到都話好靚好好味   我都唔知點答人好呢   哈哈 ~

放工即走啦   即刻大解放   比條褲箍咗成日真係好鬼辛苦 ~ 

今晚有鐘點黎煮飯   雖然有人煮   但諗食乜都好煩咁 ~

里奧大人 8 點先喺大陸放工   番到屋企都成 9 點   所以我依家食飯先喇   我真係唔想咁夜食飯   我又早瞓   依家又唔可以做運動   好肥家嘛   唔好搞 ~

蕃茄意式肉丸長通粉 ( 16-AUG-2011 )

( 16-AUG-2011  TUE )

星期二 lu   自從做完手術喺屋企休養之後   我覺得有得番工真係好好多呢   最緊要可以賺錢   咁唔駛下下就住用咁肉痛嘛   都係各有好處啦   哈哈 ~

菇場又係咁靜   個個自閉咁款   不過又係嘅   個個都用 MSN   唔靜先奇 ~

好快 Lunch Time 喇   諗住去遠少少食粥   但個天黑黑地   好似想落雨咁   所以去附近食粥算喇   呢間標榜無味精   不過係無味添囉   同埋我叫炒米粉   食咗半碗粥都未嚟   以為咁好即叫即炒啦   我整   原來係蒸嘅   難食到暈呀   呢間嘢我唔會再幫襯喇   整鬼吖   朝早同晏晝都咁鬼難食 ~

放工番屋企喇   話哂要預備晚餐   雖然里奧大人今日上咗大陸   我可以慢慢整   但依家做咩都慢動作   都係早啲整好口啲 ~   

是日懶餐 - 蕃茄意式肉丸長通粉

蕃茄意式肉丸長通粉- 今次用 2 磅茄仔嚟煮㗎   之前煮蕃茄蓉都會落好多糖   所以好多時甜味多過茄味   因為里奧大人話太酸會胃痛嘛   咁咪落多啲糖囉   其實我就鍾意酸酸咪咪多啲嘅   但上次佢話啲蕃茄蓉好甜   我話咁下次唔落咁多糖   但係如果好酸就唔可以話我囉   真係好彩   今次佢話好食咋 ~ 

別府 @ 九龍灣 ( 15-AUG-2011 )

芥辣餃子無骨雞翼 / 血池地獄拉麵 / 三文魚飯團 / 炒野菜

( 15-AUG-2011  MON )

依家呢   行路都仲未可以快   同埋菇場搬咗新地址   要搭多 3 個站   又行遠咗少少   所以都係早啲起身   唔駛搞到自己咁趕 ~

依家連食早餐都係慢慢嘆   好舒服呢 ~

菇場有時都幾凍咁   不過就無之前咁寒   可能係落地玻璃啩 ~

今朝喺菇場附近買咗兩個杏仁蛋糕做 Lunch   點知 Lunch Time 到咗都未餓   差唔多 1 點半先食   咁仲剩番一個又唔想食   又唔想留番聽日   所以比咗 8 卦食喇 ~

依家記得嘅話   會食車厘子做 Tea 啦   不過食完好鬼餓囉   好後悔比咗件蛋糕 8 卦食呀 ~

今晚約咗保險搞 Claim 錢   好快傾完就番屋企等里奧大人放工 lu ~ 

好想食拉麵呀   所以同里奧大人去別府   個 Waitress 好好人呀   見我按住個肚慢慢行就叫我坐另一張枱   再等佢抹完另一張枱就埋去坐   因為嗰張舒服好多   非常之感動呀 ~

食館 @ 九龍城 ( 14-AUG-2011 )

喇沙咖哩海鮮湯麵 ( 參參麵底 )

馬拉盞炒芥蘭苗 / 咖央厚多士 / 青檸梳打 / 凍紅豆沙 (免費)

( 14-AUG-2011  SUN )

今朝同里奧大人食完早餐   番屋企梳洗就番教會 lu ~

一起身走呢   條腰同到爆炸呀   辛苦到呢   不過挺直番條腰嚟慢慢行   之後又好番好多喎 ~

里奧大人做公司嘢呀   我見條腰又唔痛   所以挺直條腰坐喺度熨衫   熨下熨下都熨咗兩機衫   但又唔攰喎 ~

尋晚食剩成碟飯   所以喺太興買 $20 叉燒用嚟炒飯   里奧大人炒㗎   因為我話如果我整   我只會蒸熱啲飯   唔會炒呢 ~

之後一齊睇劇食沙律   6 點就出發去九龍城食嘢喇 ~

今次到里奧大人想食喇沙   所以我陪佢啦   呢間係上次同影子經過   影子話個樣都幾似喇沙   所以里奧大人成日話想食   點知一入到去無人嘅   之後無耐就有一家三口嚟食   晚飯黃金時間都係得 5 個人   佢哋員工都係得 5 個   我同里奧大人講   下次嚟九龍城   呢間嘢都可能已經唔喺度 lu ~

食飽就行去九龍城商場   知佢無咩嘢行   不過唔想食完就番屋企咁囉 ~

嘩哈哈   番到屋企即沖涼之後又煲劇啦   真係好鍾意睇呀 ~

泰北美食 @ 九龍城 ( 13-AUG-2011 )

牛丸冬蔭功湯河 (大辣) - 一定要大辣先好食   但我覺得其實都唔係好辣
蒜蓉炒雜菜 - 出街食雜菜就最好   因為自己唔會整囉
海南雞飯 - 最後先 Order   所以等咗好耐先有   啲油飯熱辣辣㗎   不過已經熱   又等得耐喎   最後都係食咗少少飯   但就食哂啲雞囉   其實本來想淨 Order 半隻海南雞   因為唔想食飯   但佢喿話無半隻喎   只可以要海南雞飯   因為無咁多雞喎   咁就唔好寫話有海南雞半隻嘛   真係呢

椰青 - 都幾甜

( 13-AUG-2011  SAT )

上星期六仲諗住今個星期六同里奧大人去邊度食早餐   之後去邊度邊度   都唔記得咗自己要番工   嗰刻真係情緒有啲低落㗎 ~

我到依家都係   一見得屋企人多呢   自己一個人就會覺得好唔慣   幾十歲一都係咁 ~

今朝同 8 卦食早餐呀   講明先到先等   但只可以我先到先食   佢唔可以   因為佢食得真係好快好快   好似唔駛咬咁   我個大食表妹又係咁㗎   食嘢唔咬就咁吞   唔怪得咁肥啦   同埋對胃唔好家嘛   都唔明點解啲人可以唔咬嘢嘅 ~

老闆 Off   所以勁 Free 呀   不過星期六真係無 Mood 做嘢囉 ~

放工番屋企   同里奧大人食 KFC  因為尋晚佢想食   但我話唔好   所以應承今日食補數 ~

見到自己個咀唇成日無厘血色真係好煩   但依家又唔可以睇中醫   又唔補得   所以都係買車厘子   今日百佳 $24.8/磅   勁抵呀   買咗 4 磅慢慢食   番到屋企整好哂嘢又煲 "賢內助女王"   差唔多 6 點就出發去九龍城食嘢喇 ~

里奧大人好想食冬蔭功湯粉   所以我話去泰北美食啦   點知間嘢無咩冷氣咁   熱到呢   我食食下   里奧大人叫我抹下塊臉啲汗   話我成塊臉都冒汗呀   其實我都想叫里奧大人抹額頭啲汗   因為我都見佢冒汗   不過見佢唔多   又唔多聽佢好熱   所以無叫佢抹   我驚佢話我咁熱之得唔嚟食呀 ~

我哋一出到門口就大笑啦   出面仲涼過入面   之後里奧大人話只可以秋天同冬天嚟食   咁熱嚟食會顛   同埋熱到無胃口囉 ~

真係好怕夏天出街架   特別係等紅綠燈過馬路   因為實有坑渠蓋   等緊期間會望實啲坑渠蓋位㗎   驚有巨強嘛   點知真係有 2 隻巨強呀   我慢動作退後   同埋係咁 "呀呀呀呀"   里奧大人問發生咩事   我話有 2 隻巨強   有個女仔聽到   話係 3 隻呀   好恐怖啦 ~  

依家搭巴士番屋企好方便   所以見到有車就上   見到架熱狗都上啦   幾個站之嘛   同埋出下汗都唔錯   之後再去麥記飲杯思樂冰   真係涼透心呀 ~

文記傳統車仔麵茶餐廳 @ 九龍灣 ( 12-AUG-2011 )

腸粉 / 辣魚蛋+豆卜幼麵 / 螺肉+牛丸粗麵 / 生菜

( 12-AUG-2011  FRI )

又 Happy Friday 喇   如果番 5 日就好啦   依家真係好渴望番 5 日工呀   今日又去試另一間茶餐廳   味道唔錯呀 ~

菇場有嘢做   啲時間過得好快咁呀   好快就 Lunch Time   今日有 Lunch Box   不過覺得食飯真係好滯咁   可能唔餓就要食啩 ~ 

放工番屋企 lu   里奧大人 8 點先放工   以前會早啲去食嘢嘅地方攞位   依家里奧大人話唔好咁樣喎   驚我等位要企   所以多數佢喺九龍灣地鐵站先打比我   叫我落樓   本來諗住去別府   但要等 4 張枱   唔等啦   望下啲人好似啱啱嚟咁   等得嚟驚 10 點先有得食   但我想食濕粉麵   但又唔想咁飽   所以去食車仔麵 ~

今晚里奧大人唔做公司嘢   我哋一齊煲韓劇 "賢內助女王"   我好少主動話睇電視劇㗎   但我覺得呢套好好睇   又搞笑又感人   演員又識做戲   所以我鍾意睇呢 ~

蒜蓉黑豚肉 + 炒脆肉瓜 + 芫茜皮蛋魚片湯 by 鐘點 ( 11-AUG-2011 )

( 11-AUG-2011  THU )

今日正式番工喇   心情好興奮呀   但又好懷念自然醒嘅日子   哈哈 ~ 

因為係番新地址   所以放假前 8 卦已經比咗地址我㗎喇   如果唔係我要打番菇場問囉   真係好奇怪點解菇場無人打比我   話我知新地址嘅呢 ~ 

8 卦話驚我唔識路   所以約我食早餐   點知佢塞車   咁我就自己食喇   其實我知點番菇場嘅   因為之前我 Lunch 都會周圍行嘛 ~  

今朝 8 點 50 分番到菇場啦   好耐無試過咁早   不過自己知自己事   慢慢行好過心心急急呢 ~ 

Unpack 完之後有嘢做喎   好充實 ~  

晏晝出去買車仔麵   唔想叫外賣呀   實在太多呢 ~ 

今日啲時間過得好快   好快就 5 點   不過坐咗成日真係好攰 ~

鐘點今日自己上屋企做嘢先   本來諗住唔叫鐘點㗎喇   但里奧大人話想我有飯食   所以會一星期嚟兩日咁囉 ~   

打咗比里奧大人好多次都無人聽   好鬼餓呀   所以真係飲湯食飯先 ~ 

之後家姐又嚟食沙律   陪我傾下偈就走 lu ~

里奧大人 9 點喺大陸打嚟   話原來電話無電   之後仲話未走得   咁唔緊要啦   我都食咗飯   之後 10 點打嚟   以為話差唔多番到屋企   點知原來話啱啱放工   真係慘啦   11 點先食晚飯   我又慘喎   又要等埋佢   陪下佢食傾下偈   唔係一個人好慘咁呢 ~  

麥當勞 @ 九龍灣 ( 10-AUG-2011 )

( 10-AUG-2011  WED )

聽日番工喇   所以今朝都校鬧鐘   8 點半起身   食完早餐就番屋企整沙律 ~

整到身水身汗   不過流汗嘅感覺好舒服呀   如果之後可以沖涼嘅話 ~

沖完涼即走喇   拎咗一盒細嘅沙律比媽咪   媽咪同家姐好鍾意食我整嘅沙律   其實真係無咩特別   醬料又唔係自己調   生果又唔係自己種   可能佢哋唔鍾意切粒   煩吖嘛 ~

今日最後一擊同媽咪喺平日飲茶   番工就無咩機會喇   不過飲咗咁多日   真係飲到有啲驚 ~

今晚鐘點唔嚟   我又唔想煮   所以喺媽咪屋企 Hea 啦   陪下佢嘛   家姐 7 點番到屋企   我又一齊食啲飯咁囉   我都無諗過今日全日會喺媽咪屋企   媽咪係咁話啦   話之得買條魚   又買雞咁   不過我都唔食飯㗎啦   因為我仲要陪里奧大人食嘢嘛 ~

之後家姐一齊去我屋企食沙律   咁里奧大人差唔多 9 點先番到嚟   一齊去麥記食 18 件麥樂雞餐   里奧大人就食多個豬柳蛋漢堡   佢咁驚熱氣   肯定唔會食咁多件雞囉 ~ 

蕃茄意式肉丸意粉 ( 9-AUG-2011 )

( 9-AUG-2011  TUE )

星期二喇   越嚟越接近番工嘅日子   有啲緊張添 ~ 

早餐要清埋兩塊黑椒火腿   如果唔係都懶得開火 ~

晏晝同媽咪飲茶呀   食到唔知食咩好   因為媽咪要戒口   我就牛肉都照食   不過唔可以食咁多囉 ~

飲完茶又係陪媽咪去百佳買餸呀   之後上媽咪屋企坐到 5 點就走人 lu   要預備晚餐嘛 ~

是日懶餐 - 蕃茄肉丸意粉

蕃茄肉丸意粉 - 好耐無自家煮啦   都幾開心   同埋自己鍾意食嘛   同埋之前喺 Ikea 買咗包意式肉丸嘛   夠哂方便啦   不過今次啲蕃茄都唔係太蕃茄蓉   企得耐唔掂呀   但都好味   不過里奧大人話甜咗啲   煩到吖   酸又話酸到胃痛   甜又話甜   好在佢都鍾意食   唔係真係把幾火唔煮呀 ~

煎釀孖寶 + 紅青蘿蔔豬展湯 by 鐘點 ( 8-AUG-2011 )

( 8-AUG-2011  MON )

今朝食完早餐   睇陣電視就梳洗 lu ~

晏晝同媽咪飲茶   飲完茶陪媽咪去百佳買餸   再番媽咪屋企坐到 3 點半就走喇 ~

今日鐘點又黎   有個人幫輕真係唔錯嘅   不過如果我完全好番哂   我就唔會用鐘點喇   我情願慢慢做好過 ~

里奧大人差唔多 8 點半番到屋企   算早喇   真係好想 7 點半食飯囉   咁樣之後啲時間會好好用   同埋多啲時間消化囉 ~

打邊爐 @ 大快活 (九龍灣) ( 7-AUG-2011 )

4oz 穀飼肥牛 / 魚蛋 / 魚片 / 炸魚皮 / 油麥菜 / 金邊粉 / 鮑汁荷葉飯

( 7-AUG-2011  SUN )

今朝同里奧大人食完早餐   就同媚媚一齊番教會 lu ~

不過我要避開人群   祝福完就即走喇   之後去百佳買生果   依家只會等里奧大人同我一齊先買生果   咁可以一次過買 5 日生果   唔駛煩 ~

買完拎番屋企   仲以為 1 點幾   點知已經 2 點幾   又落街食 Tea 喇 ~

差唔多 4 點翻滾媽咪煲嘅清補涼湯   唔想太夜飲   唔係食唔落飯   之後就坐梳化 Hea 喇   唔 Hea 唔知做咩好 ~

雖然尋晚打完邊爐   但今晚仲想打囉   所以又去大快活打過喇 ~

打邊爐 @ 稻香 (九龍灣) ( 6-AUG-2011 )

( 6-AUG-2011  SAT )

星期六喇   特登早啲啲起身蒸燒賣做早餐   之後早啲出去街呀   無咁多人   里奧大人話唔想我成日屈住喺屋企   算佢幾好啦 ~

之後里奧大人一早諗好   去完灣仔拎功課成績表之後就去銅鑼灣行街   之後打去問係咪要親身去攞   佢哋話可以寄比我哋嘅   所以最後決定去尖沙咀   我覺得銅鑼灣好鬼多人   雖然尖沙咀都唔少 ~

我上落樓梯比較辛苦   所以都係坐巴士   點知塞車   算啦   反正唔趕時間 ~

里奧大人話餓喎   但我又未餓   所以去 Food Court 食啲嘢算   但一定唔可以飽肚   唔係到時我餓佢唔餓 ~

行到差唔多 12 點半   里奧大人係咁問我攰唔攰   今日係 Relax   辛苦就坐低食嘢   之後話見到我個咀唇又好白喎   都係食 Lunch 好啲   因為我次次食完個咀唇都會紅啲   好感恩前面就係 BLT    咁啱仲有一張枱   咁就入去食啦   抖下真係舒服啲嘅 ~

A & W Cream Soda / Sweet Potato Fries (ChilI Spice) / The Classic - 7 oz Grilled Certified Black Angus Beef

食完行陣去 Starbucks   想用咗啲 Coupon   唔駛成日記住有 Coupon 要用嘛   一心諗住嘆咖啡   點知嘈到呢   啲自由行個個講嘢大聲到震   簡直影響哂成個氣氛   我哋飲完食完都即走啦   唔係人都顛 ~

都無嘢想行想買   之後去拎紅酒   無啦啦有個舊同事叫我   都成 7 年無見   估唔到仲認得我   我覺得佢同以前唔同咗   個人主動咗   因為佢依家做 Funds   唔怪得啦   唔好諗住打我主意呀   之前有個朋友又係咁   我直頭唔同佢聯絡添呀   咁樣做朋友都無意思啦 ~

諗住坐巴士好快番到屋企   點知喺土瓜灣塞咗 50 分鐘呀   不過我又無咩所謂   涼下冷氣瞓陣囉   同埋最主要係因為走又走唔到嘅   始終都係呢條路番屋企   落車都無用   過多一條街就係九龍城   但 5 點半咋   我哋根本食唔落嘢囉   註定同泰菜無緣 ~

之後同里奧大人去買 Notebook 就番屋企喇   Hea 到 9 點就同埋家姐一齊去稻香打邊爐   9 點之後打真係好平呀 ~ 

嘉華大酒樓 @ 官塘 ( 5-AUG-2011 )

( 5-AUG-2011  FRI )

Happy Friday 就落街食早餐啦   再買份報紙番屋企睇   其實我鍾意 "揭" 報紙睇   唔鍾意上網睇   因為對眼好攰咁   同埋要碌嚟碌去好煩囉   碌碌下都唔記得想睇啲咩 ~

晏晝呀   食番隔夜飯囉   尋晚剩番好多   唔食唔得 ~ 

今晚開心呀   因為里奧大人約咗舊同事食飯   咁我當然同媽咪家姐一齊出街食飯啦 ~ 

酸梅麵豉蒸排骨 + 炒菜心 + 蕃茄薯仔魚湯 by 鐘點 ( 4-AUG-2011 )

( 4-AUG-2011  THU )

今朝早餐就咁飲包麥精就算   因為晏啲會同媽咪飲茶   唔想食完早餐食唔落午餐 ~

飲完茶就番屋企喇   依家行得慢   要比多啲時間番屋企呢 ~

今晚有鐘點煮飯   但要我諗食咩都幾煩   好似來來去去都係嗰啲咁   鬼咩   里奧大人成日咁遲番   唔通叫人炸嘢咩   蒸魚又唔得   因為我唔想自己蒸   同埋太夜食得唔多   我又唔想食隔夜嘢   因為叮同蒸分別好大   蒸到啲嘢好腍咁   唔鍾意啲口感呀 ~  

日月星茶餐廳 (外賣) ( 3-AUG-2011 )

( 3-AUG-2011  WED )

今朝有胃口食嘢喇   喺屋企整早餐慢慢嘆 ~

好飽呀   個人又好攰   所以差唔多成 3 點 先整 Lunch Box   不過整完唔想食   無咩胃口   到 6 點先想食   但懶得整熱就咁食算喇 ~

今晚鐘點唔嚟   我仍都唔會煮   所以叫外賣喇   8 點半叫外賣   但 9 點半先到 ~

蒜蓉豬扒 + 炒唐生菜 + 蕃茄薯仔魚湯 by 鐘點 ( 2-AUG-2011 )

( 2-AUG-2011  TUE )

尋晚個肚都痛㗎   不過瞓醒就好好多 lu ~ 

今日好想幫里奧大人去 Jusco 買嘢   有 95 折嘛   所以之前已約好家姐一齊 Lunch ~

今朝無胃口食早餐   行到地鐵站個人都有啲虛脫   我依家出街都會慣性按住個傷口   好驚啲人撞埋嚟   所以啲人見我行得慢   又按住個肚   都以為我好辛苦呢   不過今次真係有啲辛苦   可能未食早餐無力呀   好在有個後生女讓位我坐   我都唔客氣要坐喇 ~ 

之後轉車啦   要企 2 個站   有個女人好緊張咁問我有無嘢 ?!   我話無   我 2 個站後就落車   佢都仲係好緊張咁問多次我有無嘢 ?!   話有嘢就叫人讓位我坐   好感動呀   個女人咁好人 ~

自己又搭錯車   要行一段路先可以去番太古站   攰到我呢   去到 Jusco 第一件事就係去搵位坐呀   好在有櫈坐咋   坐咗 10 分鐘先回到氣 ~ 

之後買嘢   個 Sales 見我個樣咁辛苦咁   話同我拎埋落去喎   我話唔駛喇 ~

同家姐去 Outback 食 Lunch   家姐第一句就話 "嘩   妳個咀唇好白呀   白過之前好多呀 "   我無照鏡呀   不過唔怪得啲人覺得我咁辛苦啦   原來自己面無血色嚇親人   好在食番嘢   個唇都有少少血色 ~

家姐同我一齊坐巴士   佢坐一個站就番到公司   我就坐到官塘轉車   熱到呢 ~ 

番到屋企要再沖涼啦   立痴痴真係好鬼辛苦   之後鐘點就嚟到 lu   不過個肚有少少痛   所以我瞓咗覺   瞓醒好好多喇又 ~ 

今晚里奧大人又係 9 點先番到屋企   我都無乜胃口   所以聽日又有 Lunch Box 喇 ~ 

海皇粥 ( 外賣 ) @ 屋企 ( 2-aug-2011 )

( 1-aug-2011 mon )

嘩   尋晚個肚好痛呀   但都無以前痛到顛果隻   同埋痛都黎個傷口好似扯住痛咁囉   好在後尾都瞓度 ~ 

今朝無胃口啦   但其實個人係餓   不過唔願郁 ~

一路睇電視一路瞓   之後熄咗電視又瞓唔到喎   所以又開番   之後鐘點打黎話今日有 d 事黎唔到   oh   我覺得仲好呀   因為無人阻住我瞓覺 ~ 

痛下瞓下   差唔多 4 點幾真係好鬼餓   食咗塊芝士夾麵包   叫做好 d ~   

里奧大人今日上咗大陸見客   好在 8 點幾可以番到屋企   因為我真係好餓啦