叙苑粉麵茶餐廳 @ 九龍灣 ( 30-SEP-2011 )

( 30-SEP-2011  FRI )

今日心情超級無敵勁興奮呀   因為之後我連放 5 日呀 ~

早餐食三文治   慢慢食好 Relax   如果食麵太快又好趕   但慢慢食呢   啲麵又好快凍唔好食喎 ~

菇場好忙呀   真係上網都唔得閒   同埋真係想清哂手頭上嘅嘢先放假呢 ~

Lunch 食番前日嘅 Lunch Box 呀   叮之前再聞下有無 "叔" 味   好在無咋   不過如果真係壞咗都唔驚   因為我有好多零食   每樣食啲都好飽呢 ~

放工番媽咪屋企坐陣   食啲餸又傾偈計   差唔多 8 點就走喇   同里奧大人食飯   不過我又食咗少少餸   所以只係想食粉麵囉 ~

陳果皮蒸泥猛 / 蓮藕餅 / 有機辣雞肉腸 /  炒椰菜花

Pizza & Chicken (外賣) ( 29-SEP-2011 )

( 29-SEP-2011  THU )

今日 8 號風球唔駛番工   所以同里奧大人去鴻星飲茶   好嘆呀 ~

之後約埋家姐 & 里奧大人姐夫嚟我屋企打牌   再叫外賣   咁就一日 lu ~

酸梅麵豉蒸排骨 + 炒脆肉瓜 by 鐘點 ( 28-SEP-2011 )

( 28-SEP-2011  WED )

好開心呀   今朝終於精神啲   同埋有番啲胃口 ~

個肚其實仲有少少唔舒服   但就唔係好辛苦   可以做到嘢 ~

晏晝真係覺得餓   好在 8 卦又無帶飯   所以佢就幫我買埋喇   好在有佢咋   唔係我就咁食蛋糕仔算 lu ~

估唔到掛 1 號風球   5 點個天都黑哂   放工打比媽咪   話已經改掛 3 號添喇   番到屋企再睇新聞話 8 號風球唔大   都係疊埋心水番工喇 ~

今晚鐘點嚟煮   我都唔駛咁辛苦煮飯   依家佢煮完飯   我就會即刻將啲飯餸入暖壺   成日差啲唔記得影相   可能我呢兩日無咩食嘢所以無相影   我驚自己唔記得影相   所以特登拎定部相機出嚟   之後沖涼   到食完飯先記得原來真係唔記得影相   無哂記性 lu ~

食食下雪糕   屋企突然好大風   好似殺到埋黎咁   所以都要開冷氣   唔敢開窗   唔係一陣連窗都吹甩呀 ~

香蒜蜆肉意粉 + 粟米蛋花湯 ( 25-SEP-2011 ) + ( 26-SEP-2011 ) + ( 27-SEP-2011 )

( 25-SEP-2011  SUN )

今朝同里奧大人一齊 10 點起身食早餐   之後番屋企梳洗就番教會喇 ~ 

里奧大人同媚媚都一齊番教會   所以一齊去 Delifrance 食 Lunch 喇   食完都差唔多 3 點 lu  去埋舖頭拎衫就番屋企 lu ~ 

意式沙律 / 至尊公司三文治 / 黑椒豬柳蘑菇炒扁意粉 / 法式芝士焗薯批 / 法式小蛋糕配雪糕

今日都好精神   所以熨埋衫   再煮埋晚餐   之後就抖下睇下電視咁喇 ~

星期日多數 7 點食飯   咁可以多啲時間消化   最緊要係可以早啲洗碗休息 ~

是日懶餐 - 香蒜蜆肉意粉 + 粟米蛋花湯

香蒜蜆肉意粉 - 為咗清埋半包煙肉同半包蜆肉   所以就整呢個意粉喇 ~ 

粟米蛋花湯 - 我其實真係好鍾意飲粟米湯   但里奧大人就話飲到驚囉 ~

( 26-SEP-2011  MON )

每月一到添   雖然無以前咁痛   但都痛囉   仲以為做咗手術會唔痛添   同埋又係好想嘔   點解會咁呢 ~ 

不過點都好過以前好多嘅   話哂番到工   只不過係好攰   同埋陰陰痛   但晏晝瞓咗覺又好啲囉   之後食咗腿治又好似好啲咁喎 ~   

夜晚叫里奧大人買白粥   佢就食炸兩 + 炒麵   我又食咗兩件炸兩   食完超級反胃   里奧大人又係咁話好反胃   依家真係唔想去海皇買嘢食喇 ~

( 27-SEP-2011  TUE )

個肚都有少少痛同埋真係好攰   唔知點解係超攰架喎   今日簡直全無食慾咁呀   晏晝瞓醒都係無胃口   好在放工番到屋企   再沖個熱水涼   恰咗陣就舒服好多   有胃口食埋今朝果份腿蛋治呢 ~

之後里奧大人買咗煎釀三寶番屋企   再煮辛辣麵   我都有胃口食咗件青椒同豆腐   覺得好好味呀 ~

大澳一日遊 + 豬肉乾 ( 24-SEP-2011 )

( 24-SEP-2011  SAT )

終於等到 Off 喇   里奧大人一早諗定好去大澳   不過呢排天氣唔係咁好   所以都係聽天由命   好感恩   今日天氣都幾好   唔落大雨就得喇 ~

10 點起身   去太興食早餐   之後就梳洗出發去大澳喇 ~

坐 E22 喺東涌落車   再轉 11 號巴士   坐咗個幾鐘頭車終於到啦 ~  

次次經過呢度  都有小朋友玩  玩得好開心添呀  我覺得啲小朋友好鍾意玩水咁

一去到就買烤魷魚   再望下個電話   原來 1 點半 lu   里奧大人見到間酒樓有蝦醬炒飯就雙眼發光   又話要食嘢喇   話費事一陣行入去無嘢食喎 ~

一去到張枱   超多烏蠅呀   要即轉枱   叫做無咁多囉   唔係見里奧大人咁想食個炒飯   我即走喇   不過應該唔會再有下次   因為啲嘢無厘味道 ~

大澳蝦醬炒飯 ($55) - 無厘味道

酥炸生蠔 ($88) - 細細隻蠔咋  我好憎食咁樣嘅炸漿   未食到隻蠔都已經漏喇   所以我食咗少少炸漿咋   同埋有水嘅   好驚囉

之前買嘅烤魷魚   放喺隻碟度   用筷子夾嚟食都唔錯   唔駛整污糟隻手

被迫食飯   好飽啦   所以唔可以食炸蕃薯住   要臨走先食   但里奧大人又食到個油籽喎   即係蘿蔔絲酥餅   佢嚟大澳目的都係想食呢個炸物 ~

炸芋頭 / 油籽 / 炸蕃薯

食完就行喇   不過應該吽雨囉   超級多青蜓   好驚囉   左避又避   里奧大人仲話我有咩好驚   之後佢有一下唔知避咩   我咪話番佢囉   叫人唔駛驚   自己又咁驚 ~

終於吽出雨啦   不過係毛毛雨   之後真係無咁多青蜓   實在太好喇 ~

行行下見到有班小朋友圍住曬咸蛋黃   又幾得意喎   同埋啲蛋黃好大隻呀   我好少見到咁大隻   其實應該係唔會留意蛋黃 ~

曬緊鹹魚   一粒粒黑色嗰啲係烏蠅   搞到我依家有啲驚食鹹魚

行到盡頭就坐下   超級正呀   啲風吹到我想瞓覺   真係好寫意   所以有時假期真係好想遠離市區呢   沿途又影下相咁   好 Relax 呀 ~ 

吹住風   望住個山真係好爽   真係差啲瞓着   我同里奧大人講如果沖完涼坐喺度   肯定好好瞓   佢話點解成日都講沖涼嘅   我話因為頭先好焗  出咗汗   所以超想沖涼

咁大個煲唔知煲乜   勁想叫里奧大人開嚟睇下

再行入去就係民居   坐喺度抖涼嘅阿婆話企喺度影相就得   再行入去就唔得喇

山上有好多大山墳   又天陰陰   所以突然覺得呢段路好陰森恐怖

好多彈彈魚   同埋好多都係銀色鐵皮屋   好 Cyber Feel   得幾粒房角石就支撐到一間屋   勁呀 

差唔多 4 點半就走 lu   其實仲係好飽   但真係好想食炸蕃薯囉   最後又買咗炸蕃薯   油籽同豆腐花喇   今次堂食又係好多烏蠅囉   好鬼驚呀   點解會咁㗎 ~

炸蕃薯 / 油籽 (餡料係蘿蔔絲) / 凍豆腐花

坐咗 45 分鐘車出到東涌   行咗個 Mall 一陣唔想行喇   其一好攰   其二好多人   無哂 Mood 啦 ~

搭地鐵番屋企算喇   由東涌企到九龍灣   超攰呀 ~

番到屋企第一時間灘喺梳化呀   其實今次去大澳都無去南丫島行山行咁耐   可以轉車轉車又轉車   之後又要企到番屋企   所以好鬼攰囉 ~

里奧大人話好滯喎   唔想再食晚飯   我就食咗少少豬腳薑當晚飯   難得星期六可以 Relax   大家沖完涼精神爽利哂   再食豬肉乾 + 啤酒 + 睇電視   簡簡單單都可以好開心呢 ~  

住家飯 @ 媽咪屋企 ( 23-SEP-2011 )

炒蟹 / 白灼蝦 / 貴妃雞 (大家樂) / 炒絲瓜 / 菜心 / 紅棗杞子糖水

( 23-SEP-2011  FRI )

星期五喇喎   早餐食豐富啲先 ~

聽日 Off   所以今日番工都番得好開心呀   喺菇場無嘢做都唔覺悶呀 ~

晏晝有 Lunch Box   食飽又瞓唔到   雖然唔眼瞓   但聽朋友話食完飯瞓陣係養生喎   但咁瞓會有胃腩噃 ~

今晚里奧大人約咗舊同事食飯   所以我又番媽咪屋企食飯喇 ~

同家姐一齊去超市買汽水   家姐仲係好驚我拎重嘢   所以喺都要幫我拎番屋企   之後一齊薯片   睇下電視   里奧大人又番到屋企   佢哋又食雪糕   再傾多陣偈   家姐差唔多 10 點就走 lu ~

住家飯 @ 媽咪屋企 ( 22-SEP-2011 )

金錢雞 (得龍) / 三文魚刺身 (家姐買嘅) / 蒸石斑仔 / 炒菜心 / 椰子雪耳紅蘿蔔豬骨湯 / 馬來西亞木瓜

( 22-SEP-2011  THU )

今朝 7 點 55 分出門口   差唔多 8 點到巴士站   咁就最 Fit   因為 8 點 05 分會有車   點知去到無哂人等   咁應該走咗班車   咁好啦   早咗 5 分鐘走   咁 13-15 分鐘有一班車   即係 8 時 15 分會有一班車啦   點知我等到 23 分先有車   忍唔住打去九巴熱線投訴呀   因為啲班次實在太唔準啦   又唔係塞車   又唔係爆水管   又唔係整路   成鬼日都甩咗班車   咁不如寫明 20 分鐘一班車   咁我就自己預時間嘛   真係離哂大譜   依家等緊佢哋點覆我先 ~

明明預好哂時間食早餐   依家又要好趕咁食   好在菇場唔駛打卡   不過依家真係好唔想遲到囉 ~

晏晝有 Lunch Box   我只係帶番尋晚嘅滾湯薯仔 雞 薑蓉同腐皮卷   點知我叮完   多油到呢   我估係鐘點用好多油嚟整薑蓉   唔怪之得我呢兩次食完佢整嘅雞都會覺得好滯   因為我食好多薑蓉嘛   下次叫佢磨薑 + 切蔥粒   我自己爆香算喇   我實在好難接受咁多油呀 ~

同 CC MSN   無啦啦又講起啲時間過得好快   係真㗎喎   明明上星期六先講會點執嘢   眨下眼已經星期三   過多兩日又星期六喇   不過另一個朋友就話因為充實   所以啲時間會過得好快   咁又係嘅   唔充實會覺得渡日如年嘛 ~

今晚番屋企食飯喇   依家里奧大人成日上大陸   都番唔到媽咪屋企食飯   所以我多數自己番去   雖然嫁咗人   但都要抽時間陪媽咪食飯呢 ~

因為我要清沙律   所以叫埋家姐嚟食喇   之後里奧大人都番到屋企   突然覺得好熱鬧咁呀 ~    

冰鮮有機穗香雞 + 腐皮卷 + 蕃茄薯仔魚湯 by 鐘點 ( 21-SEP-2011 )

( 21-SEP-2011  WED )

今朝好清涼呀   如果日日都係咁嘅天氣就好喇 ~

早餐食芝士吞拿魚治烘底   又幾好味噃   同埋好似好健康咁 ~ 

晏晝又係食 Lunch Box 啦   次次一叮呢個蕃茄通粉都好香   聞到都好想食呢 ~

今晚有鐘點   所以放工唔駛咁趕   如果鐘點有聚會   佢都會拎埋佢煮嘅嘢比我食   今晚有素腐皮卷   好好味呀   我好鍾意食㗎   不過依家佢煲魚湯就差咗啲   好腥咁呀   下次問佢點解會咁先   可能啲魚唔新鮮   如果係咁就唔好買喇   因為我好鍾意飲魚湯家嘛   咁腥真係好難入口   幾有營養都唔想飲囉 ~

尋晚整咗沙律   所以叫家姐嚟食   我發覺次次家姐打嚟   里奧大人又會打嚟   今次又係咁   家姐 Send SMS 比我   里奧大人就打電話比我   好在唔係一齊打電話比我   唔係手機又響   屋企電話又響   真係人都顛呀   大佬   喺廚房整嘢真係好唔鍾意有電話響囉 ~

秋天喇   今晚 9 點幾就熄冷氣喇   好在都有風   之後覺得有啲凍咁添呀   正呀   唔駛開冷氣真係好喇   可以慳錢又環保   個人又無咁濕   不過瞓覺就開冷氣囉   唔係好似好熱咁 ~  

蕃茄意式肉丸長通粉 + 蘋果沙律 ( 20-SEP-2011 )

( 20-SEP-2011  TUE )

星期二喇   因為呢個星期六有得 Off   所以未放假先興奮   番 5 日工真係好開心呢 ~ 

早餐食餐蛋治   食餐蛋治真係好鬼飽 ~

菇場雖然好靜   同埋有啲同事同比較怪   但好感恩同我傾得兩句嘅同意都對我好好   好似呢排 Receptionist 請咗假   我明明起身去開門   我同事都話 "得喇   等我去開"   佢個位遠過我㗎   反而我個衰 Partner 坐喺我隔離就當無事發生   真係睇得出佢對菇場真係好無歸屬感 ~ 

我 Partner 真係好怪囉   我哋 5 點 40 分有 Shuttler Bus 到地鐵站   佢 5 點半即走   我見到佢坐喺大堂等到有 Shuttler Bus 先去搭   好心啦   一係唔好咁做走嘛   好似遲一分鐘走要做嘢好蝕底咁   呢啲 咩人嚟㗎   我初初以為我憎佢所以先覺得佢怪   原來另一個同都見過   諗法仍都同我一樣   都係覺得留喺菇場坐到夠鐘好過坐大堂啦 ~

今日 Lunch 係朱古力奶溝麥片   食完好鬼凍呀   要出去行下 ~

今晚要煮飯呀   本來想整天婦羅   就咁整青椒咋   平啲嘛   整衰唔會心痛   但原來要用蛋黃   不過我今餐又用唔到蛋白   但又唔想掉咗去   所以最後唔整 lu ~ 

是日懶餐 - 蕃茄意式肉丸長通粉 + 蘋果沙律

蕃茄意式肉丸長通粉 - 唔知點解呢排煮餸都鍾意酸酸咪咪咁樣   呢個長通粉就啱哂胃口喇   同埋最緊要係想清埋半包煙肉   依家啲煙肉好貴呀   絕對不能夠唔記得食呢   哈哈 ~

蘋果沙律 - 之前買咗 5 個蘋果   就咁食蘋果好似好悶咁   所以就整沙律喇   今次材料係 5 個蘋果 + 2 罐粟米 + 1 罐紅腰豆 + 2 罐椰果   依家地們椰果超貴   $17.4   我買唔落呀   上年喺大埔凍肉舖只係買 $12   依家唔知幾錢   不過點都唔會貴過超市   所以我買另一隻原產地係泰國嘅椰果   口感同地們差唔多   都煙韌   價錢都係 $12.x   差好遠呀 ~

里奧大人今晚 8 點 15 分就番到屋企   雖然兩公婆住埋一間屋   但見佢時間真係好少   就算咁簡單一齊食飯都係好難   所以今晚可以一齊食飯好   我好開心呀 ~

裕和日本料理 @ 九龍灣 ( 19-SEP-2011 )

芝麻八爪魚 / 芥味八爪魚 / 螺肉 / 吞拿魚沙律 / 煙鴨胸肉 / 三文魚 / 月見豚肉什菜鍋

( 19-SEP-2011  MON )

話咁快就星期一   希望可以話咁快就星期五啦 ~

今朝遲咗出門口   所以又去食麥記喇   因為唔會撞到同事嘛 ~

晏晝有 Lunch Box 呀   尋晚嘅香辣海鮮闊條麵   好味道呀 ~  

老闆 2 點半就走人   我就 Free 爆啦   日日係咁都唔錯   可以真正抖下嘛 ~ 

放工要去長沙灣做 Research   所以坐地鐵   掛住周圍望   望到過咗站   好在過咗一個站   就咁過去對面坐番轉頭就得   最怕有啲要行上行落   浪費哂啲時間 ~ 

本來約咗 7 點   不過我 6 點半到咗   所以 6 點 40 分開始    7 點 10 分做完   正呀   可以早啲番屋企 ~

之前諗住可以喺地鐵站都 Join 埋里奧大人一齊番屋企   點知我打比佢時   佢話打緊仗   所以叫我自己番屋企先 ~ 

今日里奧大人 8 點半到屋企附近   勁想食壽司呀   不過里奧大人話一定要食熟囉   所以就去呢間裕和喇   實在太飽喇   要行陣商場先番屋企呢 ~

Pizza & Chicken (外賣) ( 18-SEP-2011 )

墨西哥香辣批 - 牛肉 / 洋蔥 / 墨西哥辣椒 / 辣肉腸 / 蕃茄 / 加倍芝士 / 小食拚盤 (春卷 / 咖哩角 / 魷魚圈 / 香茅雞翼) / 香辣海鮮闊條麵

( 18-SEP-2011  SUN )

今朝同里奧大人瞓到 11 點半先醒   崇拜肯定番唔到   連早餐都無得食呀   所以我喺屋企煮早餐   燒賣 + 五香肉丁辛辣麵 + 咖啡   悠悠閒閒咁過咗一個早上   望下個鐘原來已經 1 點 ~

之後洗碗同熨衫   又睇陣電視   執下衫   沖埋涼   咁就 3 點   出去食 Tea 喇 ~

里奧大人要拎對鞋去地鐵站嘅鞋舖度整   所以今日去池記食 Tea   同埋之前有 Cash Coupon   清埋去先   不過池記真係唔可以坐得耐   唔係會發顛   因為個地方細   又迫又嘈呀 ~

食完行陣馬莎就去拎鞋   時間啱啱好   之後同里奧大人講話好攰唔想煮飯呀   佢第一個反應就話試下你咋   因為我覺得佢好鍾意出街食   所以我煮都會呃佢話唔煮   睇佢又咩反應   佢一話好   

我就會話試下妳咋   我話今次唔係   係真㗎   個人好攰   同埋唔知煮咩好囉 ~

本來諗住出去食   但後尾我話唔想出街同埋想食 Pizza   所以又叫外賣喇   沖完個涼先食嘢   真係好鬼爽呀 ~

食完抖陣再食個桃   唔食就壞喇   我屋企好焗嘛   尋日買好生嘅蕉   今晚可以熟哂   所以次次都唔敢買太多蕉   但食蕉就最方便   我真係好唔鍾意切生果 ~

彩晶軒 @ 官塘 ( 17-SEP-2011 )

西華門燈影牛展 - 之前食燈影牛展係好薄好脆甜甜哋咁㗎   覺得好好食   所以叫呢個   點知原來係滷水牛展   不過都好入味   唔錯   同埋以佐酒小食份量嚟講   份量都算多

山東手抓薄撐 - 無咩特別   薄餅包住少少肉少少菜咁囉
甜豆冰耳炒鮮淮山 - 我唔識整新鮮淮山   所以就叫嚟食喇
女兒紅吆妹子三鮮鍋巴 - 蕃茄海鮮就蕃茄海鮮啦   個名懶特別   哎呀   我唔識讀個 "吆" 字添呀   所以我叫嘅時候就咁話指住張圖   同埋就咁叫鍋巴算 lu   不過呢個唔好食囉   唔酸又唔甜   我覺得有啲苦添呀   如果係城寨風味嘅錦滷雲吞汁料就正喇   好味好多呀
蒜香金沙鹽酥加拿大桶蠔 - 啲蠔都幾大隻   難得咁多人食   所以叫喇   如果 2 個人食係唔會叫囉   里奧大人話食隻半已經話好滯好滯   好煩呀

鮮胡椒醬烤牛肋排 - 呢碟好大碟   同埋有串鮮胡椒   不過我影得唔好   好在無手震咋   因為個 Waiter 等埋我影先切開一件件   所以都唔敢影咁多張   不過呢個又好味喎   啲肉好林好入味   啲醬汁係甜甜哋嘅   不過我就唔多鍾意甜甜哋嘅汁配紅肉   好似好漏咁   我自己覺得咋

杞子圓肉桂花凍 / 法式焦糖燉蛋 / 楊枝甘露- 其實大家都飽   不過見甜品係 $ 6-$12   咁平肯定好細件   想睇下幾細件囉   但估唔到比我哋想像中更細件   搞笑

杞子圓肉桂花凍- 呢隻碟嘅 Size 係裝辣椒油嘅 Size   妳話幾咁細隻呢   不過都幾好味

法式焦糖燉蛋- 家姐話隻匙更啱啱好夠位   可以放落個杯度   大啲都唔得呀   妳地諗下個杯幾咁細呢

楊枝甘露- 呢個 4 啖已經可以食哂 lu  

免費生果

( 17-SEP-2011  SAT )

逢星期六早餐都會食飽啲   因為多數 2 點先食 Lunch   今朝食芝蛋治烘底   唔餓食芝蛋治真係幾辛苦   好飽好滯咁囉 ~

番到菇場真係覺得好鬼悶   真係上網睇嘢都睇到唔知睇咩好   勁想番屋企呀 ~

今日好開心呀   因為同屋企人打麻雀食飯做節嘛   我哋好少會當日做或者提早做節   因為實多人囉 ~ 

媽咪要買梳化   所以我同里奧大人一早已經幫媽咪睇咗張電較梳化   等埋家姐一齊再去睇   OK 就買㗎喇   試下又商量下就買 lu   我比錢嘅時候   里奧大人話佢送比媽咪喎   又幾孝順媽咪噃   之後媽咪都嚟埋試   都話好鍾意呢   家姐同里奧大人整鬼媽咪   叫媽咪試張電較嘅   我哋買嗰張   之後就同媽咪講   叫妳試下架咋   唔係呢張   係隔離手挍嗰張呢 ~

咁齊人當然打麻將啦   我放工先同里奧大人講話媽咪嚟打牌   佢本來話唔想打㗎   公司好多嘢未做   我話陪下媽咪啦   佢話好啦   之得尋晚唔睇電視   做嘢喎 ~

我哋打咗一陣就叫外賣   再食 Cake   之後再打   我唔小心整到媽咪隻腳   因為我係夾住隻腳嚟坐嘛   唔知媽咪隻腳喺我嗰位度   所以我一放隻腳落地就整到佢   里奧大人就即刻幫媽咪敷冰   又幫佢用毛巾包住個退燒貼   等媽咪無咁凍   好在媽咪隻腳無瘀黑   只係有啲青青哋囉   不過我都好驚囉   同埋我都同媽咪講   唔好將隻腳放喺人哋嗰邊囉   人哋真係睇唔到㗎 ~

打到 6 點 15 分預備出發喇   講下嘢去下洗手間都成 15 分鐘   好在真係預鬆時間啫 ~

7 點準時到鱷魚裇中心   去番之前去過嘅酒樓   覺得唔錯   同埋 APM 又無咩好食   所以試下呢間   不過今晚有人擺滿月酒   所以間到間酒樓好細   如果唔係更舒服   好在食物水準都唔錯   感恩感恩 ~

煎雞翼 + 蒜蓉炒油麥菜 + 冬瓜祛濕水 by 鐘點 ( 16-SEP-2011 )

( 16-SEP-2011  FRI )

今朝坐巴士   有個阿婆將一盒嘢擺喺隔離位   有個女人要坐埋去   同阿婆講聲唔該   個阿婆望一望個女人   再施施然好唔情願咁拎開啲嘢   好心啦   又唔係比兩個人錢   明知架車差唔多滿就醒啲自己拎起啦   最憎啲人持老賣老   之後個阿婆就扮咳   又係咁拍隻腳   郁隻腳   之前上車一路無事㗎喎   睇得出佢係特登囉   唔忿氣無位擺嘢嘛   我覺得佢真係好衰格囉 ~

Happy Friday 呀   所以食豐富啲   不過食一個麵真係好鬼飽囉 ~

菇場好靜啦   我個位係望住 A/C Dept. 嘛   佢哋個個就鬼咁忙   同埋我發覺好多做 A/C 嘅人都帶眼鏡同好斯文咁咁   如果有個靚仔就好啦   無嘢做望下都唔錯呢 ~ 

又到 Lunch Time 喇   今朝食到好飽   晏晝就飲特濃朱古力奶溝脆麥片   今次溝細半杯算喇   上次溝咗一杯   食完好滯好唔舒服   今次咪搞喇 ~

時間過得真慢   如果假期啲時間過得咁慢就好 lu ~

放工去拎眼鏡   雖然左右眼都只係 50 度散光   但帶咗眼鏡之後真係望得好清楚呀   其實之前配嘅散光鏡係左 75 右 100   點解嗰時又唔覺好散   但依幾個月開始覺得睇嘢好散   同埋奇怪點解會淺咗度數   定係之前嗰間整錯度數呢 ~

依家雖然我會食飯先   但我都會打比里奧大人   睇下佢幾時番   咁今晚都預咗佢差唔多 9 點幾先番到屋企   估唔到 7 點打比佢   佢話喺大陸啱啱放工   我好開心呀   所以等埋佢一齊 8 點半先食飯喇 ~

星悅鮮廚 @ 官塘 ( 15-SEP-2011 )

西檸汁紐西蘭青衣班塊 / 咸菜胡椒浸肥蜆 / 海味上湯雜菜煲

( 15-SEP-2011  THU )

星期四 lu   今日去麥記食煙肉蛋漢堡特價餐   星期一食都係 $15   今日加到 $16   不過算啦   我覺得早餐喺 $20 之內都叫做平㗎喇 ~

今朝咬緊包嘅時候   見到隔離再隔離嘅枱嘅男人將杯凍奶茶嘅冰 "北" 落碗通粉度   佢係 "北" 哂啲冰㗎   我心諗係咪想飲冰鎮奶茶 Feel 呀   無理由 "北" 哂家嘛   之後再望下去   佢喺度食通粉呀   原來佢想整凍啲通粉   我覺得好核突呀   咁我食完出門口   見到有個道友用飲管飲溝奶茶嗰杯奶仔呀   呢間咁多怪人嘅   真係要諗諗仲去唔去食好呀 ~  

菇場嘅 Receptionist 放幾日假   所以我要幫手開門   咁又幾好喎   行下無咁悶 ~ 

晏晝有 Lunch Box   我同事問我尋日嘅生炒排骨係咪我整   話好好味呀   比人讚下真係幾開心嘅   不過佢可能唔知咩叫好睇唔好食   哈哈 ~

今晚同媽咪出去食飯   食食下無啦啦見到家姐喎   我仲以為自己認錯人   原來佢特登拎啲新鮮無花果比媽咪   同埋拎個日本金桃比我呀   話因為中秋節佢同媽咪食咗個桃   我同里奧大人無得食   所以特登買比我哋食喎   成 $50/個   我覺得好貴呀   唔怪之得佢今日成日問我去邊度食嘢啦   原來如此 ~

食完去媽咪屋企坐陣喇   其一要飲腐竹糖水   其二媽咪買咗榴槤比我喎   媽咪話上次見里奧大人話好食   所以就買喇   里奧大人有福啦   我屋企人對佢咁好   哈哈哈哈 ~

今晚里奧大人 9 點半就番到九龍灣   我叫佢自己出去食算喇   我真係好攰   唔想煮嘢唔想洗嘢呀   只係好想快啲瞓覺 ~

洋蔥豬扒 + 炒脆肉瓜 + 蕃茄薯仔魚湯 by 鐘點 ( 14-SEP-2011 )

( 14-SEP-2011  WED )

又要番工 lu   不過星期中番工都幾開心   因為好快就放假咁嘛 ~ 

今朝一早諗好食芝蛋治烘底   點知比錯腿治   我叫佢換   又比錯芝腿治   咁算啦   芝腿無咁漏 ~

番到菇場好眼瞓咁呀   同 8 卦 M 咗好耐都好似未到 11 點咁   所以一到 Lunch Time 就好開心囉   話哂過咗半日嘛 ~

唔知點解呢排好快餓咁   可能悶得滯呀   哈哈   唔食嘢會中眼瞓呀   定係個人太濕呢   搵日煲冬瓜袪濕水先   希望有幫助啦 ~

今晚有鐘點煮飯   所以我 7 點半可以食飯   差唔多 9 點里奧大人喺大陸打嚟話放工   之後我等下等下都瞓着咗   里奧大人 10  點幾番到嚟   叫佢自己開飯   我就滾熱啲湯   等佢食完我就洗碗   其實真係好鬼唔想洗囉   但見佢咁辛苦就算啦   我次次一話幫佢洗碗   佢就好開心咁問係咪真㗎 ?!   真係呢   之後佢又做公司嘢   話 12 點先瞓   咁我睇陣電視就瞓喇   呢排真係好攰 ~ 

生炒排骨 + 梅菜蒸鯇魚 ( 13-SEP-2011 )

( 13-SEP-2011  TUE )

今朝見里奧大人 9 點醒咗   我又想瞓又想醒   不過最後都醒啦   難得大家咁早起身   又去鴻星飲茶喇 ~

咸水角 / 蝦餃 / 燒賣 / 馬拉糕 / 牛肉煲仔飯

飲完之後我就去超市買餸   番到屋企見到里奧大人瞓着咗   之後我話食完又瞓好攰咩   佢話係喎   佢頭先係諗住起身睇一陣聖經再瞓過   點知見我醒咗   又知我想飲茶   所以咪飲囉   咁話喎 ~ 

不過唔好講笑   我都有少少攰   醃好啲餸   再坐喺梳化睇雜誌   之後我都瞓咗成個鐘呀 ~

 
差唔多 1 點半就食 Lunch 喇   喺屋企煮麵再加埋尋晚食剩嘅雲吞   成日以為得 10 粒雲吞左右   點知原來係 20 粒   不過唔理喇   照淥哂去算喇 ~

飽到咩咁   唔郁唔得啦   即刻熨幾件衫   不過熨熨下又好熱咁唔想熨   之後去沖涼   再焗牛油曲奇   真係好怕焗曲奇   次次都唔掂嘅   照足哂食譜㗎喎   都係唔掂嘅   啲曲奇唔係燶咗就係焗到好硬   真係無心機呀 ~

唔知點解無啦啦好想食甜嘢   所以就開咗個月餅嚟食喇   我唔會自己買月餅㗎   根本無可能食得哂   今次本來已經叫家姐比個美心月餅我   但里奧大人又拎咗個海港月餅比我   咁就唔要家姐拎啦   點知尋晚里奧大人阿 Head 又比咗個美心月餅佢喎   所以我好開心呀   因為我覺得美心好食啲囉 ~

6 點半準時入廚房   7 點半有得食   對我嚟講算勁㗎喇 ~ 

是日晚餐 - 生炒排骨 + 梅菜蒸鯇魚

生炒排骨 - 里奧大人鍾意食   所以我會間唔中整   佢話好味過出面食   不過真係好唔鍾意炸嘢   彈到周圍都係   最慘係彈到隻手好痛啊 ~   

梅菜蒸鯇魚 - 覺得里奧大人好耐無食魚   雖然有魚湯飲   但我都好想佢食魚   所以就整喇 ~ 

雖然今日假期無出街   里奧大人都做公司嘢   但又唔覺悶喎   有時喺屋企 Hea 下都係一種樂趣   最緊要有自己愛嘅人喺身邊就得喇   哈哈 ~

韭菜豬肉雲吞 ( 12-SEP-2011 )

( 12-SEP-2012  MON )

里奧大人今朝 4 點起咗身   我以為佢去洗手間   原來係開電腦做公司嘢   我話駛唔駛咁急   佢話要喎   因為佢唔記得整嘢比阿 Head   佢阿 Head 聽日出 Trip   所以一定要番公前整喎   咁我仲諗住自己瞓得番添   不過一個人瞓又好凍喎   瞓得超差呀   之後里奧大人好似 7 點番入嚟瞓   我平時 7 點半起身   但瞓得太差喇   所以 7 點 45 分先起身 ~

我平時朝早會沖涼洗頭先番工   如果我沖涼時候覺得沖極都凍   就代表個人唔多舒服喇 ~

遲咗 15 分鐘起身   所以樣樣都要快手快腳喇   好在一落車附近都有好多茶餐廳   不過最快都係麥記囉   同埋飲唔哂杯咖啡可以拎走   而唔駛加多 $1 呢 ~

我差唔多走嘅時候   有個女仔坐埋嚟   將自己早餐嘅托盤放喺之前嗰個人嘅托盤上面   我覺得好嘔心呀   之前嗰個人嘅托盤有奶茶漬嘅紙巾又有麵包皮   點可能就咁擺上去㗎   叫人收咗去又或者自己拎開去啦   之後佢仲食得好滋味咁   救命呀 ~

番到菇場第一件事係 Check Email 有無得放早   不過唔會咁快通知囉   好怪   之後里奧大人 SMS 話收 5 點   話出尖沙咀行下喎   都好吖   難得收早嘛   我就差唔多 12 點半先收到 Email 放 4 點   太好喇 ~ 

個人真係唔多舒服   晏晝食完個蛋糕就瞓陣晏覺   瞓醒叫做好啲啲咁啦 ~

之後里奧大人打嚟話 5 點應該收唔到工   我都預咗啦   不過都無咩所謂   我都唔多舒服   想喺屋企休息   咁難得放早就去街市買嘢   好想整雲吞呀   好在啲檔口無收早咋 ~ 

番到屋企即刻又洗又切又醃   之後沖涼休息   打比里奧大人   佢話 6 點可以走   點知 7 點都未打嚟   我都知咩事啦   我都睇睇下電視瞓着咗喇   之後 8 點打嚟話收工   不過見今日中秋佳節   夜啲都陪佢一齊食啦 ~

是日懶餐 - 韭菜豬肉雲吞

韭菜豬肉雲吞 - 好耐無整   咁問里奧大人好唔好食   佢話好食   不過無味喎   但我用嘅材料同醃料係同以前一樣架噃   之後先醒起   我次次會醃一晚   今次醃得 2 個鐘   唔怪得無味啦   不過唔緊要啦   點醋食都好好味 ~

食埋洗完碗再沖涼都 10 點幾   睇多陣電視都瞓喇   好攰呀 ~

之前喺 Log-on 買嘅日記薄   Display 有 2 個 Zipper 袋   原來原裝係無   要自己配   呵呵

沙爹王 @ 官塘 ( 11-SEP-2011 )

避風塘鮮魷皇子 - 里奧大人好多時落 Order 都會講全名   我話講避風塘鮮魷咪得囉  今次啲鮮魷好細隻   同埋好少避風塘料呀 

豉椒炒蟶子 - 唔想次次炒蜆呢

越南粉卷 - 我鍾意食   因為個皮煙煙韌韌   又有酸醋   不過今次個粉卷只係好似食皮咁囉

印度薄餅 - 里奧大人次次都食   佢真係好鍾意食呢啲薄餅   佢會用手拻嚟食   我會叫佢拻埋我嗰份   我用筷子夾嚟食   一個人污糟好過兩個人污糟嘛

石鍋泡菜海鮮湯 - 得幾隻蝦咋   仲要啲蝦係苦嘅添   今餐嘅沙爹王唔多掂呀

( 11-SEP-2011 SUN )

今朝同里奧大人食完早餐就番崇拜 lu ~ 

早餐食到好飽   所以 3 點先同里奧大人食 Tea   只想食小食囉 ~

番到屋企 Hea 到 4 點半就出發去 APM   超勁想行 Log-on   買咗本記真皮事簿   我覺得貴   不過又好想買喎   貴買平用係我左右銘   哈哈   行完再行無印   估唔到又有收穫   勁開心呀 ~

6 點 20 分去到沙爹王   估唔到要等位   好在等咗 20 分鐘就有位   感恩感恩 ~

太飽喇   所以又行下德福   順便配對散光眼鏡   其實我兩對眼嘅散光都係 50 度   唔算好深   但我覺得睇嘢真係好散囉   所以就配喇   配咗 $1,827   其實我覺得好貴呀   不過我又覺得副眼鏡框好睇喎   財散人安樂   所以番屋企休息喇 ~

稻香 @ 九龍灣 ( 10-SEP-2011 )

( 10-SEP-2011  SAT )

今朝同家姐去麥記食早餐   本來尋晚約埋媽咪去飲茶   不過媽咪驚朝早落雨   同埋想家姐瞓晏啲   所以最後取消   點知家姐尋晚打幾次嚟話約咗唔去唔知點咁   又問我幾次如果自己食早餐幾點起身   同佢哋食又幾點起身   又問我一個人食悶唔悶   問九萬幾樣嘢   所以我覺得佢想同我食囉   不過又驚我特登要早起身   但其實我都無所謂嘅   所以臨瞓前再約去佢想食咩囉   最後佢話麥記   所以就去麥記喇 ~

食到 8 點半就走 lu   9 點番到菇場   估唔到啲同事都番得 7788   因為平時如果老闆 Off   好多人都好遲番   好少見咁早有同事番囉 ~

晏晝無啦啦超勁想食牛什河   所以就約里奧大人去茶餐廳喇   再同里奧大人 Share 珍珠奶茶   突然覺得個肚好似想爆咁呀   所以食完去德福行下   估唔到無心去行街   反而有收穫   真係次次都係咁呢 ~

番到屋企坐陣就要出發去稻香喇   同里奧大人屋企人做節   限時個半鐘   6 點至 7 點半   我哋無叫套餐   就咁叫餸食飯咋   樣樣細細碟咁   不過過時過節食飯就預咗囉   食完就各自歸家 lu ~

週年結婚紀念日 ( 9-SEP-2011 )

多謝阿表影呢張相  我非常鍾意呀 

( 9-SEP-2011  FRI )

今日係我同里奧大人結婚紀念日呀  好開心呢 ^^

相處真係一個好大嘅學問呀   到呢一刻我都仲學緊點同里奧大人相處   係呢幾年先學識咗包容   體諒咋   所以里奧大人都幾慘   哈哈 ^^

同里奧大人無鬧交就呃人啦   不過我哋又唔會超大聲吵鬧嗰隻   只係比啲說話妳聽咁啦  哈哈 ^^

咁多年裡面經歷過一單大嘢   好感恩信咗主   神聽我禱告   係神改變咗我   令我喺婚姻歷程當中更加穩固   感恩感恩 ^^

呢年我真係確實到里奧大人對我嘅關懷喇   唔知係咪因為年紀大   開始珍惜我啦   哈哈 ^^

不過我都承認   里奧大人係一個好可靠好顧家嘅男人嚟嘅   我要食要買要着要玩要用嘅   佢能力範圍做到嘅   都會滿足我嘅   一係就會慳自己豪比我囉   所以有時佢衰呢   我就諗番起呢啲鎖碎嘢   我都會無咁激氣嘅   哈哈 ^^

其實我都為咗里奧大人做咗唔小嘢啦   不過我唔會講之嘛  ^^  

好似我以前做女都唔識煲飯   更何況煲湯整餸   結婚初時我真係好驚煮飯㗎   煮足一星期炒肉粒   唔係梅菜就係雜豆   對我嚟講係好艱難㗎喇   仲有第一次煲青紅蘿蔔湯   開住個蓋嚟煲   點知煲咗 2 個半鐘   煲到得 1 碗   之後開始慢慢學囉   睇下食譜   依家煮得唔係好味   但都叫做食得落口   話哂叫做住家飯嘛   雖然里奧大人唔會迫我煮   但我愛佢嘛   更係想佢健康啲啦   成日出街食好無益家嘛   我唔舒服另計   所以我都係一個賢妻嚟㗎 ^^

我喺依度都祝福自己同里奧大人永遠快快樂樂   身體健康   主恩滿溢咁過每一日呢 ^^  

我哋好鍾意呢首歌㗎 ^^

(陪著你走)

誰說　時間片刻變陳舊

全為我分秒亦停留
因我　身邊有你緊握我的手愛　誰說永不會長壽
陪著你一生到白頭
都能　把心中星星閃得通透
陪著你走   一生一世也不分
天天編出兩雙足印　過千山過千海
如果　走到這世界邊端
我倆已是無力前行　跟我一起飛去　不相信　時間片刻變陳舊
全為你分秒亦停留
因你　身邊有我緊握你的手這份愛　誰說永不會長壽
陪著我一生到白頭
都能　把心中星星閃得通透一世伴你同路去

煎雞翼 + 節瓜大魚尾湯 + 煎釀三寶 (外賣) ( 9-SEP-2011 )

( 9-SEP-2011  FRI )

呢日係同里奧大人結婚週年喇   晏下眼就過咗咁多年   但我都仲係每日都好掛住佢㗎   佢放工話去到九龍灣   我就會開住閉路電視睇住佢呢   所以佢一出 Lift   我就已經開定門㗎喇   不過嗰時做女都係咁樣   唔會坐定定等人   好似家姐話坐緊小巴番緊屋企   我就會企喺窗台度望住佢落車㗎   又會喺門口望住部 Lift   其實我都幾有潛質做看更   哈哈 ~

今朝搞笑   家姐打電話比我   傾傾下里奧大人又打嚟   同里奧大人傾傾下個鐘點又打嚟   忙到我呢   之後再打番比家姐   叫佢幫我諗食咩早餐呢 ~

雖然菇場一世都會咁靜英英   但今日 Happy Friday 加上今日結婚週年   心情真係唔錯 ~

呢排成日翻睇 "賢內助女王"   見到啲主角成日食泡菜   搞到我超勁想食泡菜   咁啱菇場附近有得買韓式小食   所以就買泡菜飯喇   佢哋有泡菜腩肉飯買   不過好想就咁試泡菜飯   好似好健康咁   不過我都仲未接受到泡菜嘅味道   但身在韓國食嘅泡菜又真係好好味㗎喎   點解會咁呢 ~

食完之後個胃有啲唔舒服   下次都係咪搞齋食泡菜喇 ~ 

放工行下百佳   突然間好想食壽司   諗住買   點知一盒都要 $78   得 7-8 件   覺得唔抵咁呀   仲要唔係太新鮮   更加唔會買   仲好啦   慳番 ~

今晚里奧大人 7 點幾番到屋企啦   真係無諗過咁早囉   今日佢上午番咗大陸   3 點幾就番到香港 Office   如果係咁就唔叫鐘點煮飯   出去慶祝啦   真係人算不如天算   不過都好感恩今晚可以同里奧大人一齊開飯呢 ~

聽晚會同里奧大人屋企做節   所以我又焗定啲朱古力曲奇   因為朱古力 11/9 到期   而麵粉就 18/9 到期   唔理啦   清得幾多得幾多喇 ~   

星悅鮮廚 @ 官塘 ( 8-SEP-2011 )

酸檸檬梅子蒸元朗烏頭 / 蒜蓉炒莧菜 / 紅燒乳鴿 / 滷水拚盤 (豬腸 / 雞腎 / 豆腐)

( 8-SEP-2011  THU )

呢排真係瞓得唔好   半夜會醒一醒咁   一係就發惡夢   打交斬人嗰啲惡夢   真係醒咗都好難瞓番囉 ~

其實我鍾意搭巴士番工   因為實有位坐   又去到菇場附近   同埋如果我行去地鐵站   行到一半已經出哂汗   同埋車廂又迫   好唔鍾意   不過我等呢架巴士唔好處就係啲時間成日唔準   有時 805  有時 810   815   820   點可能㗎   好多時都係咁   我真係會打去投訴囉   其他巴士線都唔係咁嘅 ~

今朝超勁想食麥記魚柳包   但單買加咖啡又唔抵喎   所以最後食魚柳包餐   超飽呀 ~

菇場無嘢做啦   再聽埋啲冷氣槽聲   真係好鬼眼瞓呀 ~

晏晝有 Lunch Box   因為想出去買嘢   所以唔餓都照食   慢慢食囉   食完就出去買嘢   雖然出面好熱   本來又唔想出去行   但實在太飽   所以真係要行一行 ~

呢排唔知點解   成日好反胃咁   唔知係咪開始唔受得咖啡呢 ~

里奧大人上咗大陸   所以今晚同媽咪出街食飯   姐夫喺醫院做 Body Check   所以家姐嚟唔到   家姐仲話我玩嘢   特登今晚同媽咪食喎 ~

食完再去媽咪屋企食生果   坐到差唔多 9 點就走喇 ~

番到屋企即煮肉丸米粉比里奧大人食啦   趕到我呢   不過見佢食哂成碗米粉   我辛苦都值得嘅 ~ 

蕃茄蜆肉腸仔長通粉 + 豬腳薑醋 ( 7-SEP-2011 )

( 7-SEP-2011  WED )

尋晚 10 點半喺廳度睇睇下電視就瞓着咗   差唔多 11 點幾   里奧大人就叫我入房瞓   但入到房又唔會即刻瞓到喎 ~

今朝超勁想瞓多 10 分鐘   但都係費事喇    唔想好趕咁食早餐   又唔想遲到呀 ~

今朝啲時間過得好慢咁呀   同 8 卦 M 咗好耐都係 10 點幾 ~

幾咁辛苦眼瞓先等到 Lunch Time 呀   今日有 Lunch Box   不過尋晚啲雞原來好油   整到啲飯都好多油同埋腍哂 ~

個人真係忽冷忽熱咁   應該係作感冒   咁打比里奧大人問佢今日係咪要見客   唔係就想佢早啲番   因為我想早啲食飯休息   之後佢叫我飲杯 Hot Lemon   飲完又好啲喎 ~

依家生果舖無得買車厘茄呀   因為中秋節要做果藍   買貴生果   無理由擺啲賺得咁少錢嘅車厘茄   阻住哂啲位呢 ~

終於放工啦   無咁唔舒服   所以就決定煮飯   去到百佳想買雞翼居然無喎   想買蕃茄又覺得 2 個要 $ 10 好貴唔抵   咁里奧大人又想食啲酸酸咪咪嘢   所以最後買咗支有機蕃茄香草意粉醬同埋熱浪薯片番屋企喇 ~

里奧大人知我唔多舒服   所以 7 點半就喺大陸開始番嚟   算佢啦 ~

是日懶餐 - 蕃茄蜆肉腸仔長通粉 + 豬腳薑醋

蕃茄蜆肉腸仔長通粉 - 我覺得蕃茄醬係無味   所以次次起碼要大半樽先有味   仲要自己加啲茄汁  鹽  豉油先得喎   今次呢樽都唔例外呢   我覺得煮有蕃茄嘅食物都好開心   煮完出嚟好 Colorful   真係唔好睇都好食   更何況係好食呢   哈哈 ~

豬腳薑醋 - 我覺得媽咪知我想食   就成日話自己想食   所以整咗先話我知囉   迫我要嘛   不過依家食下都好嘅   補補身   媽咪今次用 "同珍" 嘅甜醋   估唔到都好好味喎 ~

今晚真邪啦   因為我唔想開包新嘅長通粉   所以煮半包   咁其實係唔夠我同里奧大人食 + 我嘅 Lunch Box 嘅   所以我就食豬腳薑再加薯片   食剩差唔多 20 塊   實在食唔落   因為真係好油   開始想反胃   咁我就放入食物櫃嘅最入面   里奧大人食食下飯好奸笑拎住包薯片咁問點解咁   我就咁笑   問佢包薯片係咪跌咗出嚟   佢話唔係   咁啱望下就見到   之後佢都食埋剩番嗰啲   真係吖   平時真係好日唔望個食物櫃   無啦啦今晚偷食先望喎   邪到不得可了呀 ~ 

冰鮮有機穗香雞 + 炒菜心 by 鐘點 ( 6-SEP-2011 )

( 6-SEP-2011  TUE )

呢幾日勁想食麵   所以今朝就食五香肉丁芝士腸麵餐喇   超級飽呀 ~

唔知做乜鬼   個胃陰啲陰啲 痛   最憎就係咁   因為即係會痛好耐囉 ~

晏晝想食粥   但又驚好熱   想食燒賣粉果   但唔落辣油又唔好食   想食酸辣米線   但唔酸辣不如唔好食   所以最後決定食包算數   唔想諗喇 ~

食完好鬼眼瞓   但又瞓唔着   個胃又痛   勁想番屋企呀 ~

今晚好在有鐘點煮飯   唔係我都無心情煮   今晚媽咪打嚟問我食乜餸   又問我飲咩湯   我話唔想飲湯   媽咪笑住好出奇咁話唔想飲湯 ?!   咁又係喎   我超鍾意飲湯   不過今日個胃唔舒服   唔想飲完湯頂住又食唔到飯   所以唔煲算喇 ~

里奧大人 8 點 45 分番到屋企   我覺得算快架喇   所以我食一半份量   再留一半份量陪佢一齊食   咁等佢唔好成日好似一個人食咁悶咁 ~ 

焗叉燒 + 粟米蛋花湯 ( 5-SEP-2011 )

( 5-SEP-2011  MON )

尋晚里奧大 10 點食咗兩個橙   明知利尿都食兩個   所以我都覺得好出奇   點知佢夜晚去咗幾次洗手間   佢一郁我就會醒   到 7 點幾就話成晚瞓唔到   所以請假   咁我都陪佢啦   我都想清啲大假嘛 ~

真係好邪   9 點 10 分屋企電話響   因為我哋多數飛線番屋企嘛   有個鬼佬打嚟   咁我咪叫里奧大人聽囉   個鬼佬話因為里奧大人留咗口信叫佢回覆   之後又話約咗今日 2pm 去深圳 Office   但里奧大人就話應該係 10 月中喎   再講一大輪   里奧大人就話開電腦 Check Email 再覆番佢   叫佢番低埋電話號碼   之後離奇嘅事發生啦   就係里奧大人突然間同我講話佢係無飛線番屋企㗎   咁即係嗰個唔係佢個客啦   最邪係咁啱佢之前留低咗口信叫鬼佬覆   咁啱又係要去深圳 Office   之後佢打番比個鬼佬   原來係個鬼佬真係打錯電話號碼   我覺得非常搞笑   講咁耐原來先知係搭錯線 ~

之後里奧大人問我飲唔飲茶   我叫佢瞓下先啦   晏啲先食   咁我又瞓唔到喎   所以出廳睇雜誌   睇到差唔多 10 點半就超過餓喇   食咗啲點心麵   不過食完個胃就超痛   勁想叫里奧大人快啲起身食早餐呀   佢 11 點半先起身   我話快啲梳洗食嘢   我個胃好痛呀 ~

又係飲茶喇   不過今次去稻香   麻麻哋好食啦   但鴻星又無乜傳統點心   唔想來來去去都食嗰啲 嘛 ~

食完去惠康買梅頭   諗住買 $10/2 包嘅菜心   不過真係買唔落   1 包得 7 條   太少喇   所以最後決定整粟米湯算數喇 ~

番到屋企個胃又痛喎   里奧大人就話沖杯蜜糖水比我飲會好啲   飲咗真係舒服咗啲   之後我就執衫喇   我發覺做完手術之後個人好似懶咗咁呀   無乜原動力去分類啲衫   所以有時見里奧大人搵衫都有啲艱難   所以尋日的起心肝執衫   同埋其實最主要喺難得里奧大人唔攰又有時間執佢啲舊衫出嚟   因為成日想捐出去嘛   終於比我哋執哂啲舊衫出嚟   足足 30 磅   清咗 2 個櫃桶   爽呀 ~

差唔多 3 點半先食 Tea   執完衫好攰   唔想行咁遠   近近哋去大家樂   呢個時間無乜人   靜靜哋好舒服呀 ~

難得里奧大人可以同我一齊食晚飯   所以都係早啲準備   早啲食就多啲時間消化呢 ~

是日懶餐 - 焗叉燒 + 粟米蛋花湯焗

叉燒 - 買咗 $ 20 枚頭   整出嚟仲少過喺太興買 $20 叉燒咁呀   下次都係就咁喺太興買算喇 ~

粟米蛋花湯- 無買菜嘛   所以就實係粟米湯呢 ~

好想食雪糕呀   因為要清埋啲朱古力針   過咗期幾日㗎喇   家姐依家感冒都食唔到雪糕   咁就等我食啦 ~