香草瑞士汁雞翼 + 芥蘭炒臘味 ( 31-JAN-2012 )

( 31-JAN-2012  TUE )

今朝好想食公仔麵呀   所以覺得好好味呢 ~

菇場都幾忙呀   做完抖陣就 Lunch Time 喇   今日食 Special k + 朱古力奶   都幾飽喎 ~

放工去街市買餸   仲諗住買好多嘢添   點知就咁買咗包西米同菜就可以番屋企喇 ~

番到屋企第一時間開機洗衫   之後就浸菜   搞掂哂就熨衫   本來里奧大人話 7 點半走得   不過見等到 8 點都未有電話   所以我都煮飯自己食先 lu ~

是日懶餐 - 香草瑞士汁雞翼 + 芥蘭炒臘味

香草瑞士汁雞翼  - 有現成汁真係好方便   同埋依家想清哂啲醬   唔想又過期囉   今次好入味   因為我好有心機整   里奧大人話咁入味   以為我買添呀   唔係嘛   講到好似我平時煮嘢無味咁架 ~

芥蘭炒臘味 - 煲飯時順便蒸埋臘腸   咁就唔駛嘥煤氣喇 ~

里奧大人差唔多 9 點半先番到屋企   本來叫佢食埋龜苓膏   因為家姐尋晚特登買比佢嘛   不過佢話好飽食唔到   叫我又留番聽晚   我話唔好留咁多日   所以我食埋去   佢又食啲咁囉 ~

住家飯 @ 媽咪屋企 ( 30-JAN-2012 )

茄汁蝦

釀尖椒


蒸三蘇 & 冬菇蠔豉燜節瓜


青蘿蔔螺片豬骨湯

天桃

( 30-JAN-2012  MON )

星期一喇   話咁快又差唔多過咗一個月   時間過得真係快 ~ 

早餐食餐蛋治啦   諗唔到食咩 ~

菇場唔忙   咁都好   攰攰哋 Hea 下都唔錯 ~

晏晝出咗去行陣先買燒賣炒米粉   開始有啲厭添 ~ 

番工等放工   今晚里奧大人上大陸食春茗   所以我就番媽咪屋企食飯喇 ~

同家姐 8 點半走   番到屋企即開機洗衫   燙衫   其實有啲攰唔想做   不過食到好飽   一定要郁下囉 ~

里奧大人差唔多 11 點先番到屋企   佢話 8 點半已經食完   之後抽獎   好似有 200 個獎   每次抽 15 個   但每抽完一次呢   老闆就會高歌一曲   所以等咗好耐   仲話一抽完獎個個即刻起身走人   咁又係呀   喺大陸唔係香港喎   香港夜啲都話搭的士   但喺大陸轉車又轉車   無理由上水搭的士番屋企家嘛   咁鬼貴   真係食餐飯連利是錢都蝕埋搭的士呀 ~

鴻星海鮮酒家 @ 九龍灣 ( 29-JAN-2012 )

鴻運乳豬拚盤 (海蜇 / 鴨胸 / 乳豬) ($148)

家常遼參燒豆腐 ($88)

鳳梨咕嚕肉 ($68)

瑤柱上湯豆苗 ($78)

楊洲炒飯 ($88)

紅豆沙 (免費)

( 29-JAN-2012  SUN )

今朝 10 點起身食早餐   本來諗住番教會   不過里奧大人話好攰   所以我話唔好番喇 ~

番到屋企就煲八珍湯   同埋焗杏仁曲奇同 Brownies 比家姐同媽咪食呢 ~

焗到 1 點幾就搞掂   所以 Hea 到差唔多 2 點半就出去食 Tea 喇 ~

家姐同媽咪差唔多 3 點半上到屋企   第一件事就比佢地試曲奇同 Brownies   好在佢哋都話好味   不過家姐講明話唔好味都會幫手食哂   算佢啦 ~

開枱喇   今日超幸運   因為我一家贏三家   仲有兩舖 "海底撈月"   真係打咁耐牌都係試過一次咋   今次有兩次添   覺得超幸運呀 ~

7 點去鴻星食飯   估唔到今次樣樣餸都好食喎   因為我覺得鴻星不嬲都唔好食嘛   今次真係好有驚喜呀   感恩惑恩   同埋今餐係用 Cash Dollar 找數   感覺好似有人請食飯咁   好開心呀 ~

禮賓閣餐廳 @ 牛頭角 ( 28-JAN-2012 )

豆腐羅漢齋煲

涼瓜燜桂花魚 / 鳳梨咕嚕肉 / 鑊仔胡椒豬肚湯

( 28-JAN-2012  SAT )

今朝要番工   不過極度唔想起身囉 ~ 

早餐食熱狗   但心情唔太好   所以好似唔多好食咁 ~

菇場勁 Free   因為老闆阿 Head 無番   坐我後面嘅同事又無番   唔 Full Screen 上網都對唔住自己呀 ~

放工諗住同里奧大人一齊去同家姐媽咪喺屋企附近酒樓飲茶   點知媽咪話嚟淘大   咁仲好   一齊去和民食 Lunch 喇 ~

天婦羅盛合

脆脆炸薯條

石鍋蒜香海鮮飯

和民沙律

和風比薩 (叉燒 / 照燒雞)

差唔多 3 點幾就各自歸家喇   我番到屋企都係 Hea 住   無心情做嘢呀 ~

今晚約咗 Ivy 兩公婆一齊去食飯   差唔多 6 點就去到餐廳   同佢哋食飯感覺好似一家人   好舒服呢   食下傾下差唔多 8 點半就一齊坐小巴番屋企喇 ~

番到屋企無耐   里奧大人話想食湯丸   咁好啦   即煮   不過食完好滯呀 ~

鐵匠 @ 九龍灣 ( 27-JAN-2012 )

( 27-JAN-2012  FRI )

尋晚飽到想嘔   定係因為唔愛得辣   所以個胃有啲反反哋胃咁呢 ~

早餐食奶醬多   其實真係唔多想食嘢   但唔食又驚餓喎 ~

菇場個個無 Mood 做嘢   正常啦   廠又未開   同埋好多客都係初八先開工   有鬼嘢做咩   真係電話都唔多個呀 ~

仲係好飽   所以食 Special K 算喇 ~

3 點幾家姐 Send SMS 比我  話寶寶走咗   我個心實哂   冷靜之後即刻打電話比佢   原來話尋晚己經有啲喘   咁今朝有朋友嚟比咗啲哮喘藥佢食   不過最終都係唔得   要離開我哋呀   佢係咁喊   我只好安慰佢話陪朱朱一齊玩囉 ~ 

聽完之後無哂心機啦   雖然同阿寶相處唔耐   但都係屋企一份子   番親媽咪屋企都見到家嘛 ~

我初初以為自己唔會喊   但原來係唔會囉   冷靜咗之後就喊到九彩   之後媽咪打嚟話阿寶走咗   咁我都問點解咁突然   原來之前兩晚阿寶行得好慢   不過以為天氣凍   但咁尋晚好喘   所以今朝媽咪朋友帶咗啲哮喘藥比阿寶食   不過食完都仲係好喘   之後無耐就走   而媽咪朋友就幫阿寶搞啲身後事   遲啲就拎埋阿寶番屋企   同埋朱朱一齊呢 ~

太突然喇   好在有老友安慰   我都舒服咗啲   生離死別係要必經   唔傷心就假   只能放開啲呢 ~  

放工即走啦   今日里奧大人仲放緊假   所以我哋 6 點半就去鐵匠食嘢   之後行陣就番屋企 lu ~

親愛的寶寶 乖乖的睡覺了 ( 27-JAN-2012 )

親愛嘅寶寶,

阿寶   雖然同你相處嘅日子唔耐   同埋我又無錫朱朱咁錫你喎   因為朱仔走咗之後   我真係好怕再放感情落你度呀   好怕有離別嘅一日嘛   請你原諒家姐呀 ~

阿寶   由當初唔太鍾意你到依家開始夠膽摸你    點解你咁快走呀 ?!    你都係家中一份子   你知唔知我哋都好唔捨得你㗎 ~

又係心臟病發帶走你   你真係走得好突然呀   家姐雖然好唔捨得你   但知你走嗰陣時辛苦叫咗陣就安詳咁離開我哋   就係唯一一點令我哋舒服啲囉   寶呀   你喺我哋心目中你仍然係肥肥白白嘅寶寶呢 ~

你上到天國必定開心健康   家姐總有一日會同你相聚呢   仲有記得同朱朱玩喎   佢係阿婆   你要幫手照顧佢呀   咁先乖仔 ~

愛你嘅家姐上

27-JAN-2012 

稻香超級漁港 @ 德福廣場 ( 26-JAN-2012 )

蝦丸 / 墨魚丸

廣島蠔 / 綠色一籃子 / 美國肥牛 / 沙爹湯底 / 蘋果沙冰

( 26-JAN-2012  THU )

尋晚里奧大人同朋友傾偈傾到 1 點 45分   真係吖   搞到我都瞓得唔好添 ~

今朝又凍喎   真係超唔想起身囉 ~

唔知菇場附近啲茶餐廳有無開   所以就食麥當勞喇   咁啱 8 卦又話嚟   都好吖   食完傾下偈先番工都唔錯 ~

番到菇場完全感受唔到新年嘅熱鬧氣氛   9 點幾已經靜英英   阿 Head 同老闆又無番工   所以呢朝真係上網過日晨 ~

差唔多 11 點幾就拜食食乳豬   12 點幾就聽到話食完開年飯就收工   超級振奮呀 ~

開年飯又係飲茶   飲到差唔多 2 點幾   之後我喺屋企附近 Join 埋里奧大人去灣仔攞 Cert.   初四真係唔多食店開舖   好感恩雲桂米有開   咁就即入去食啦 ~  

醬拌皮蛋 - 想食小食嘛   所以咪叫嚟食囉   一望個樣好肉酸呀   同埋原來係麻辣醬汁   好鬼辣囉   啲皮蛋唔好食

豬腩肉小鍋米線 (中辣) - 里奧大人話好辣   咁唯有我幫佢包尾啦   同埋我覺得唔辣   因為醬拌皮蛋好鬼辣囉
奶醬多 - 因為里奧大人話太辣   要食番啲甜嘢中和番

食完再去 Time Square 嘅 Log-On 買電話套   再行陣 Sogo 就走喇   要避開放工人潮出番九龍 ~

差唔多 6 點就去德福稻香打邊爐   一入到去坐陣就已經差唔多 Full 哂   真係好多人打邊爐咁喎 ~

食到超級飽   所以必須要行陣商場散散步   番到屋企即沖涼就 Hea 住等瞓覺喇 ~

Riso Café @ 九龍灣 ( 25-JAN-2012 年初三 )

芝士火腿腸意式燴飯

惹味焗薯角

法蘭克福蜜糖腸

莓子雜薈

( 25-JAN-2012  WED 年初三 )

今朝 9 點幾醒咗又瞓唔番   所以自己起身蒸糕食   之後再熨衫   抹嘢執嘢   整完再抹埋廁所再沖涼   舒服哂 ~

之後就上網等里奧大人起身   佢差唔多 12 點先起身   所以我又再煎糕沖咖啡佢嘆喇 ~

放最後一日新年假喇   所以都係出去行下   里奧大人本來想去荃灣   但我話驚舖頭未開   到時唔知行咩好   之後佢話入大埔   我話都好喎   順便探阿婆 ~

今日係 16 年嚟最凍嘅年初三   我都覺得超凍呀   入到車廂都凍呀   一出車就仲更加唔駛講啦   又餓喎   諗住食冬蔭功河   點知餐廳又無開   不過搬咗出嚟一年幾   大埔好多地方都唔同哂   我同里奧大人就覺得好有去旅行嘅感覺呀 ~

去咖哩至尊食 Tea   之後再去買生果探阿婆   估唔到看更仲記得我哋   仲出嚟開門   如果我依家住緊嗰度啲看更係咁就好喇 ~

去到見到阿婆健健康康真係好開心   佢仲話我知   我哋之前個單位嘅阿婆   係度住越嚟越精神   我聽到真係好開心   因為之前賣樓嘅時候   佢哋啲仔女話阿婆唔想住老人院   話想喺生日之前離開老人院   仍因為咁   我哋要好急咁搵樓   唔想令人哋失望   不過好感恩係我又搵到自己鍾意嘅屋   阿婆又搵到自己鍾意嘅屋   所以真係好開心呢 ~

同阿婆傾開偈   佢又想拎馬蹄糕比我番屋企   真係好感動呀   佢仲記得我鍾意食佢嘅馬蹄糕   不過唔拎啦   一陣仲要去街嘛 ~

話咁快又傾咗個幾鐘   差唔多 5 點半就走喇   同里奧大人行下附近商場   估唔到有 Log-On   但就超焗   行完我即刻要出商場吸新鮮空氣   雖然超凍   不過我唔想焗死   之後再行埋一田就走喇   不過無嘢行嘅 ~ 

同里奧大人搭番車出去都差唔多 7 點半   不過我真係唔太餓   但又唔想太夜食   所以同里奧大人去 Riso Café   我哋 Share 一個餐就啱啱好喇 ~

翠苑海鮮酒家 @ 官塘 ( 24-JAN-2012 年初二 )

( 24-JAN-2012  TUE 年初二 )

今朝同里奧大人一齊 10 點幾起身 lu   之後約埋大食表妹就去媽咪屋企開年喇 ~

個肚仲係有啲唔舒服   所以個人都比較掹   同埋無咩胃口咁囉 ~

撈生喺馬來西亞買番嚟㗎   原來媽咪同家姐超想食撈生   仲想話去美心食添   所以我一話有撈生   佢哋好開心呀

鴨舌 / 冬菇髮菜蠔豉 / 白切雞 / 蒸斑 / 南乳齋 / 清補涼豬骨湯

Kuih Kapet 係馬來西亞賀年食品   脆卜卜好香椰絲味   估唔到佢哋個個都話好味

糟糟兩姐妹差唔多 3 點就到媽咪屋企拜年   傾下傾下都 4 點幾   佢哋都走喇  ~

我都諗住番屋企休息   點知里奧大人原來係去姑奶屋企   咁我話唔想去住   所以我哋都係媽咪屋企瞓陣抖陣先出發   其實真係好攰好想番屋企   又鬼咁凍喎   不過新年就算啦 ~ 

食到 8 點幾就走 lu   即開暖風機喇   我係一個怕熱嘅人   所以我一話開暖風機呢   里奧大人就知我一係唔舒服   一係真係好凍囉 ~

煎蘿蔔糕 ( 23-JAN-2012 年初一 )

( 23-JAN-2012  MON 年初一 )

年初一喇   我每月一到居然仲唔多舒服   其實我都知會咁架喇   次次一病再每月一到   之後會好唔舒服   不過都好感恩   因為係假期 ~

其實唔想出街   不過大年初一就想同婆婆拜年囉   天氣太凍媽咪又去唔到同婆婆拜年   所以我點都去拜年囉 ~  

約埋家姐一齊搭的士去婆婆屋企   1 點幾就開飯   食完飯又傾下偈   大舅父要趕下場   所以食完都走   本來我都諗住番屋企休息   但一有人打電話同婆婆拜年   佢就同人講有好多人陪佢   好熱鬧開心   咁我都唔好意思走   同埋坐坐下又 OK 無唔舒服   所以我哋同埋大食表妹就陪下婆婆囉   坐到 5 點幾就搭的士番屋企喇 ~

豉油王澳洲虎蝦 - 啖啖肉超好食   聽婆婆講好似話要 $3x 一隻   唔係講笑   真係就咁食 2 隻都飽 

滷水鴨舌 - 用咗一隻指天椒整   我覺得好辣呀   定因為唔舒服   所以覺得突別辣呢
煎鮫魚 - 好香口   唔駛任何汁都好好味
羅漢齋 - 前一晚燜定   好入味   正呀

白切雞 / 潤腸 / 臘鴨 - 我無食到呀

腰果 - 婆婆自己炸   仲話超級易炸添

家姐陪我哋食麥當勞就番屋企喇   因為個電話仲未整好   所以佢 8 點幾又再嚟我屋企   佢買咗魚肉燒賣   牛肉   生腸   雞腎上嚟食   里奧大人就負責煎糕   我講明唔煎唔洗   所以今晚我只係食   唔駛執   好嘆呀 ~

10 點幾終於搞掂 lu   家姐都番屋企喇   我都要瞓 lu ~

Chicken & Pizza (外賣) ( 22-JAN-2012 年廿九 )

( 22-JAN-2012  SUN 年廿九 )

今次每月一到唔多舒服添   不過都好感恩   可以盡情瞓 ~

因為里奧大人要幫家姐整電話   所以家姐 2 點幾上咗嚟   不過我都照瞓   之後聽到佢買下午茶同里奧大人一齊食   我唔理佢哋咁多喇   但佢哋講嘢細細聲好搞笑   同埋里奧大人倒瀉嘢   我聽到佢哋啲聲音變得好緊張   仲聽到里奧大人同家姐講   如果妳妹喺度就比佢鬧死   佢哋應該好快手抹好嘢   驚我突然起身咁啦   我覺得佢哋好好笑 ~

瞓到 7 點   叫做舒服啲   同埋想食嘢   其實想食熱辣辣小菜   不過家姐唔想   所以我話叫外賣 Pizza 呢 ~

之後又傾下偈   整部電話整到差唔多 11 點 45 分   佢一走我都即瞓 lu ~ 

Ruby Tuesday @ 九龍灣 ( 21-JAN-2012 年廿八 )

Triple Play ($288)

Beef Meatball

Salad Bar (Add on) ($78)

Mega Smoothie ($116)

( 21-JAN-2012  SAT 年廿八 )

好感恩   今日年廿八 Off   咁就連放五日假   超級開心振奮呢 ~

同里奧大人 11 點先起身   我話一個早餐 Share 食   不過佢話好餓   要每人一份早餐喎 ~

食完就番屋企梳洗   等埋家姐上嚟屋企放低嘢就一齊出發去銅鑼灣 lu ~

里奧大人諗住去灣仔攞 Cert.   點知原來星期六係 Closed 嘅   所以最後就一齊落車去食南記喇 ~

以前南記無咁多外傭   依家好鬼多   所以好多時都要等位   今次都好感恩   等咗一陣就有位 ~

食完差唔多 3 點   早啲去行年宵   唔駛同人迫    明明行緊都幾暢通   點知無啦啦好迫   原來梁振英嚟咗買嘢   啲人掛住望佢企定唔郁   同埋唔明點解啲人可以反方向行   寫明 One Way Only 家嘛   同埋妳見咁多人同妳反方向行   妳都應該知道自己行錯啦   仲要夾硬行   超級討厭 ~

終於每月一到   唔怪得咁攰啦   不過都好嘅   之後假期可以休息 ~

今次行年宵買咗個文件袋   其實唔知買黎做咩   不過又好想買喎   家姐又買咗地毯同狗仔床    之後我地一齊再去買花就坐巴士走人喇 ~

不過差唔多 6 點就番到屋企   放低啲花同抖多陣就出發去 Ruby Tuesday ~

家姐想買同事嘅 I-pod Touch 打機   好似 $1,200 二手價   家姐好想買嚟打機   不過佢同事差唔多日日都打機   咁即係日日叉電   咁部嘢唔駛幾耐都玩完啦   如果之後再買電   又要幾百   所以里奧大人話將佢部 I-phone 4 比家姐   佢自己就開 4S   我話咁最好啦   反正你哋兩個都想轉電話   一舉兩得 ~

佢哋去 Smartone 開機   我就去 Ruby Tuesday 拎位   好在訂咗位   唔係又要等 ~

食到 9 點 40 分就走喇   即走過隔離 MCL 睇 9:55pm 嘅 "地心探險記 2"   估唔到好睇喎   真係無期望先會有驚喜呢 ~

11 點半睇完   都好快喎   之後又一齊番屋企   家姐拎埋啲花就走喇 ~

板長壽司 @ 九龍灣 ( 20-JAN-2012 )

( 20-JAN-2012 FRI )

Happy Friday 喇   今日都無咩人番工   新年去旅行嘛   所以都無咩人等車 ~

今日好早到茶餐廳   諗住食完慢慢嘆報紙   點知老闆兩公婆入嚟   我張枱又無人坐   咁就同我坐啦   一齊傾下偈咁囉   好在佢哋食完走先   本來諗住一齊行   點知佢哋行得好快   我出到去都唔見佢哋   咁我都慢慢行番菇場 lu ~

菇場靜啦   工廠都收爐   個個都有 Holiday Mood   正常嘅 ~

晏晝同 8 卦出去食 Lunch   當團年啦 ~ 

好攰呀   放工番屋企抖下先   再叫里奧大人早啲番屋企食團年飯 ~

里奧大人 8 點番到九龍灣   本來佢想同我打邊爐   不過我又唔想   所以最後都係食壽司   近近哋食完番屋企 ~

食飽有氣力   所以番到屋企即刻拖地   熨衫洗衫   咁之後幾日假期就可以真正休息 lu ~

燒肉飯 (外賣) ( 19-JAN-2012 )

( 19-JAN-2012  THU )

今朝喺廚房聽到個雪櫃有聲音發出   咁一睇就慘喇   原來尋晚放完雞翼落冰格   無關好隻門   所以隻門開咗少少   我第一件事就係睇啲雪糕雪條有無溶   點知係完全溶嗮   所以要掉哂佢哋喇   唔係一陣里奧大人唔知食咗   腸胃炎都似 ~

早餐食腿蛋治   其實唔知食咩好   所以食三文治算喇   之後 8 卦又嚟埋一齊食   都好嘅   食完傾下偈先番菇場 ~

食咗藥個人呆呆哋   不過就無話好想瞓   但就好攰囉   唔多想郁 ~

今朝買定吞拿魚包同腿蛋包做 Lunch   不過原來夾錯咗餐肉包   好怕食凍咗嘅餐肉包   無計啦   鬼叫夾錯咩 ~ 

菇場靜啦   工廠都收爐   如果香港都一樣咁早收爐唔駛番就好 lu ~

好攰呀好攰呀   放工去明星買盒燒肉飯就番屋企喇   沖完涼食飯真係好舒服呢   食完飯再食藥   睇咗陣電視就瞓着咗   瞓咗差唔多一個鐘就醒喇 ~

里奧大人差唔多 10 點先番到屋企   佢想食麵喎   咁煮比佢啦   佢買煎釀三寶做餸   依家佢夜晚自己鍾意食咩就食咩   我都唔會阻止   因為難得佢有胃口食嘢呀 ~

粟米蘑菇蛋花湯 + 淨雲吞 & 牛腩魚片頭河粉 (外賣) ( 18-JAN-2012 )

( 18-JAN-2012  WED )

尋晚睇完醫生   醫生話有微燒   應該今日啲燒就會發出嚟   所以我今日都請病假喇 ~

9 點幾打番去菇場請假   之後都瞓唔着   所以整早餐食喇 ~  

食完又執下零食櫃   之後又煲羅漢果茶   因為今次啲抗生素非常之巨   所以食得非常辛苦   好反胃   所以煲羅漢果茶嚟送藥   又當水飲   我好怕有病飲暖水   食藥已經食到口寡寡   再飲暖水   真係超級極度好反胃呢 ~

難得有時間   所以沖完涼就覆下回應   覆覆下 d 藥就黎料   點知又瞓唔到喎   但其實好攰 ~  

屋企超大風   真係好鬼凍   見又夠鐘食藥   所以煮出前一丁食喇   食完暖好多呢 ~

食完又覆下回應   呢次真係好眼瞓喇   所以 4 點鐘開始瞓   瞓到 6 點   足足兩個鐘   其實仲想瞓   不過驚夜晚瞓唔着   所以都係起身算喇 ~

里奧大人 6 點半要開 Conf. Meeting   又唔知幾點番   所以我自己煮個粟米湯飲先   因為夠暖身呀 ~

是日懶餐 - 粟米蘑菇蛋花湯

粟米蘑菇蛋花湯- 飲完暖笠笠好舒服呀   真係想飲咋   唔係我唔會開火煮嘢囉   求其食包就算 ~

家姐幫我買咗蘿蔔糕    所以就拎嚟比我   喺電話度已經問有無影子啲零食   一嚟到坐低即食啦   之後又食埋小寶最鍾意食嘅朱古力   我又同佢一齊食 Nuts   好忙呀 ~

之後叫佢等埋我沖完涼先走   因為我頭暈暈呀 ~

里奧大人差唔多 10 點先番到屋企   但我又好想食嘢喎   所以叫佢買粉麵番屋企一齊 Share 食   食完就食藥瞓覺 lu ~

馬拉盞炒火鴨絲 ( 17-JAN-2012 )

( 17-JAN-2012  TUE )

尋晚食咗兩粒止痛藥同埋出咗一身汗   終於退咗燒   但仲係唔多舒服   咁諗住坐的士番工   所以瞓到 8 點半先起身喇   里奧大人叫我唔好番工   佢都陪我唔番工   不過我話我想番工   因為今日可能有新銀紙比我呀 ~

去到菇場附近先食早餐   好在番到菇場都係 9 點 20 分   同埋仲有同事未番齊   所以無咁異相呢 ~

菇場超忙呀   差唔多 Lunch Time 先停手   無胃口呀   食馬仔算   呢個馬仔係喺馬來西亞買㗎   口感好脆   同香港嘅馬仔完全唔同   不過比香港馬仔甜   真係唔買嚟食都唔知係咁呢 ~

2 點幾又作燒   骨都痛呀   所以食粒 Panadol 叫做好啲囉 ~

今日真係有新銀紙   差唔多 5 點 45 分先比我哋   拎完又要數   我又幫埋媽咪家姐兌換   所以我都將啲錢拎比媽咪先 ~ 

拎完錢比媽咪就去睇醫生喇   有少少燒同埋淋巴發炎   左一粒右兩粒喎   所以要食 5 日抗生素呢 ~

超餓呀   番到屋企即煮嘢食   之後再沖涼   熨衫拖地   爽呀 ~ 

是日懶餐 - 馬拉盞炒火鴨絲

馬拉盞炒火鴨絲 - 係尋晚食剩嘅火鴨絲嚟㗎   加啲馬拉盞去炒   炒嘅時候好辣咁   不過原來係唔辣   算啦   清清哋算喇 ~

里奧大人 9 點幾先番到屋企   佢話買咖哩牛腩點 Tortillas 食喎   都好喎   唔好浪費嘛 ~

另類自家片皮鴨 ( 16-JAN-2012 )

( 16-JAN-2012  MON )

尋晚 11 點就瞓 lu   所以今朝都幾精神   食咩都開心過人呀 ~ 

菇場又忙   所以好似好快肚餓咁   又食我最鍾意嘅燒賣 + 炒米粉喇 ~

食完又忙啦   之後無啦啦有啲燒咁   因為個人覺得好寒   即刻沖杯 Hot  Lemon   好似好啲咁囉 ~

放工即走喇   想快啲買餸快啲番屋企   番到屋企即探熱   原來已經 101.7 度   不過唔理喇   熨完衫就開始預備晚餐喇   之後叫里奧大人快啲番屋企   因為我唔舒服想早啲休息   所以佢 8 點即走喇 ~  

是日晚餐 - 另類自家片皮鴨

另類自家片皮鴨 - 其實點解整片皮鴨呢   就係因為之前買咗嘅  Tortillas 過咗期 2 日呀   唔食唔得   所以咪買咗半隻燒鴨   1 條京蔥   2 條青瓜   1 樽甜醬整片皮鴨囉   手撕鴨 + 切絲真係用咗好多時間   企到腰骨都痺痺哋   估唔到個 Tortillas 都好飽肚   我哋食咗 4 塊要投降喇   留番 4 塊聽晚食 ~

等里奧大人食飽就叫佢摸我額頭   一摸佢就樣都變埋   知我發燒呢   我話我洗完碗就休息㗎喇   之後佢即刻同我再探熱   又要我食藥   沖涼唔好關門驚我暈   幫我吹頭   又問我有無喉嚨痛   我話有   佢又比念慈奄我食   又比水我飲   招呼一流呀   之後我瞓到 11 點幾   佢又入房摸下我   見我個身熱辣辣又比藥我食   算佢啦 ~

御泰坊 @ APM (官塘) ( 15-JAN-2012 )

炸傳統越南春卷 ($48)

泰式辣豬肉生菜包  ($58)


泰式香辣燒魷魚伴辣椒汁 ($58)

泰式青木瓜沙律配炭燒牛肉 ($68)

馬拉盞炒通菜

椒鹽軟殼蟹配菠蘿芒果醬 ($74)

泰式鮮蝦金邊粉 ($68)

泰香蔥蒜茸包 ($20)

( 15-JAN-2012  SUN )

呢朝唔番教會 lu   因為要大掃除   所以同里奧大人食完早餐就即刻番屋企做嘢喇 ~

熨完衫就抹兩間房   再抹埋門   再將啲衫分類   咁都已經 2 點幾 lu   係時間食 Tea   食番尋晚嘅豬腸粉   同埋叫里奧大人買煎釀三寶番屋企   我再淥過出前一丁就搞掂喇 ~

食完再執下嘢就抖陣   5 點幾等家姐開車嚟接我哋同媽咪   今晚一齊提早食年廿八飯呢 ~

今次食物水準差咗   同埋只限食一個鐘   所以好多嘢一次上哂枱   張枱又細   所以要好快食完一碟   清啲位再放第 2 碟囉   最唔鍾意咁樣   星期日加上大時大節前夕真係唔好出街食咯 ~

馬拉盞炒豬腸粉 + 青紅蘿蔔粟米豬骨湯 ( 14-JAN-2012 )

( 14-JAN-2012  SAT )

今朝食飽啲   好在 8 卦又嚟   所以叫佢幫我食塊火腿喇 ~

菇場忙架   不過做埋啲 Urgent 嘢就上網 lu ~

放工去睇 中醫   之後去街市買餸    重到呢    豬肉檔阿姐好好呀   見我買到一袋二袋   佢第一件事就比個大膠袋我   好好人呀 ~

好想食炸雲吞   所以去鴻星拎位先再叫里奧大人落嚟一齊飲茶喇   飲到 3 點幾   之後拎啲餸番屋企就出去德福行街買嘢   6 點先番到屋企 ~

鮮蝦炸雲吞 / 水晶蝦餃皇 / 豆沙煎軟餅 / 燒鴨瀨粉 / 懷舊馬拉糕 / 健康素菜包 / 煎瑤柱韭菜餅

好攰呀   里奧大人叫我去打邊爐   不過我又未餓   同埋我想煲湯比佢飲   所以都係煮飯煲湯喇~

是日晚餐 - 馬拉盞炒豬腸粉 + 青紅蘿蔔粟米豬骨湯

馬拉盞炒豬腸粉 - 街市賣 $10/5條   好抵喎   同埋都好食   下次再整先 ~

青紅蘿蔔粟米豬骨湯 - 豬骨蘸辣椒豉油一齊食   真係好好味呢 ~

蕃茄豬扒意粉 ( 13-JAN-2012 )

( 13-JAN-2012  FRI )

今日係黑色星期五   不過都一樣 Happy 振奮喎 ~

菇場會計部又有人唔做啦   人如輪轉   勁呀 ~

晏晝 Special k + 朱古力奶   今次唔食唔得   因為我覺得自己開始好大食   要食細番個胃呢   同埋仲有好多   我要努力清哂去 ~

放工去超市買餸   之後就番屋企開機洗衫   熨衫   好忙呀 ~

是日晚餐 - 蕃茄豬扒意粉

蕃茄豬扒意粉 - 突然好想食囉   所以就咁用茄汁調味算喇   一樣好好味呢 ~

食完洗哂碗就大清潔廚房   抹咗個幾鐘   有啲攰喇   仲有個櫃未抹   留番聽日先抹   之後即刻沖涼喇   舒服哂 ~

里奧大人 9 點先喺大陸走   番到嚟都 10 點幾   真係餓都變唔餓呀 ~

住家飯 @ 媽咪屋企 ( 12-JAN-2012 )

椒蒸魚頭

蓮藕餅

蕃茄牛肉蛋

沙葛瑤柱蠔豉湯

酥炸魷魚鬚 / 沙薑雞腳 / 壽司 / 大樹菠蘿 @ 一田

( 12-JAN-2012  THU )

好攰添   點解咁呀 ~  

無啦啦好想食煎蛋嘅脆邊   所以食汾爹牛肉米粉餐喇 ~ 

菇場忙咗陣   之後又開始 Load 相   今日終於 Load 完   爽呀 ~

Lunch Time 去銀行入票   所以買埋炒米粉 + 燒賣番菇場食   多甜豉油 + 辣油嘅炒米粉   超好味呀 ~

今晚又去媽咪屋企食飯喇   不過放工就去一田買壽司   見到魷魚鬚同雞腳又想食   見到大樹菠蘿又想食   買完就去媽咪屋企喇 ~  

一去到即飲一大碗湯   之後媽咪再 "北" 多一大碗湯比我    飲湯已經好飽好飽 ~

食到飽一飽   所以好眼瞓呀   坐到 8 點半就同家姐一齊走 lu ~

番到屋企即開機洗衫   再沖涼   之後再熨衫   里奧大人差唔多 10 點幾先番到屋企   叫我煮麵   之後我下咗一聲   佢就話唔駛   不過我下係因為唔記得屋企有無餸   後尾記得仲有水餃   所以就煮比佢喇   如果要我開鑊煎嘢就唔㗎喇   唔想沖多次涼呀 ~

住家飯 @ 媽咪屋企 ( 11-JAN-2012 )

煎馬友魚


蠔油雞翼


炒黃芽白

燒鴨 (半隻)

節瓜蠔豉瘦肉湯

林柿 / 雪梨 / 蝴蝶酥

( 11-JAN-2012  WED )

尋晚  11 點幾就自己瞓先   里奧大人就做到 1 點先瞓   我真係無本事陪佢囉   我唔夠瞓皮膚好易敏感   同埋會出濕疹   我隻手指到依家都仲未好番   一夜瞓就好痕   我又忍唔住搲   所以好難埋口 ~

今朝 8 點半先落車   行咗一陣就收到 8 卦電話   所以又一齊食早餐 lu ~

菇場 9 點半已經靜英英   同人講咁靜   人地真係好難想像   靜過圖書館喎   所以次次睇親電視劇 Office 啲人有傾有講   真係好羨慕呢 ~

Lunch Box 萬歲   我又可以 Load 相   Load 咗成日都未 Load 完   希望聽日搞掂哂啦 ~ 

里奧大人今晚同客食飯   所以我都去媽咪屋企痴餐   不過無話比媽咪同家姐知   唔係媽咪一陣又去買嘢番嚟   所以我買半隻燒鴨做餸 ~

我一開門   媽咪見到我好驚訝呢   至於家姐   佢又唔知我番嚟   咁我就要比啲驚嚇佢喇   媽咪叫我企喺門後面嚇佢   我話無新意喎   同埋我又唔知家姐幾時番   驚走唔切    咁媽咪就打比佢   我話妳都夾埋整鬼佢   媽咪話成日都會打比佢問喺邊喎   就係喺 Lift 隔離呢埋等佢   一開 Lift 見係佢   就用好陰沉嘅聲叫佢   呵呵   佢好驚呀   不過個樣又好鎮定   佢話因為諗緊如果真係有個顛人拎刀出嚟   佢番入屋又入唔切   咁點好呢   諗咗好多嘢   開飯仲講緊 ~

同家姐坐到 8 點半就走喇   無啦啦又落雨   所以好鬼凍呀 ~

里奧大人 11 點先番到屋企    咁都好   上次同呢個客食完印度餐再去飲紅酒   成 1 點幾先番到屋企呀   里奧大人話今晚食咗羊肉同飲咗紅酒   個身好暖喎   唔駛着長袖衫瞓覺呢 ~