Sky Bar @ 朗豪坊 ( 旺角) ( 31-MAR-2012 )

白酒 (唔記得咩牌字) - 好飲噃   因為唔似酒  哈哈

銀鱈魚大蝦薯條 - 份量好少

安格斯牛扒薯仔 - OK 啦  

黑豚肉配蘋果醬 - 黐住骨嘅肉好似生生哋

黑松露野菌意粉 - 呢個最正啦   好濃味   同埋好多料

芒果拿破崙 @ 龍島 - 完全得一個甜字   搵粒芒果都難   食完好鬼漏

( 31-MAR-2012  SAT )

又係 8 點起身   所以就要縮短食早餐時間喇 ~

阿 Head 同老闆唔喺度   我可以全日網上行   Free 爆呀 ~

放工即走啦   因為要幫家姐買靚菜   所以我都買埋聽日煲湯料   唔駛又行多次我最憎嘅街市   點幾鐘去到   其實無咩人   我見到得 2 個人行咋   因為好多檔都休息   魚檔唔開就最好   唔駛濕立立   最緊要係唔駛同人迫 ~ 

買完餸番屋企就 hea 陣   等埋家姐黎到就出去茶餐廳食 tea 喇 ~

吉列魚柳拚薯條 / 牛扒拚薯條 / 酥皮蛋撻 / 味菜牛柳絲伊麵

今晚同 菜菜仔 慶祝生日   所以約埋媚媚一齊出去朗豪坊食飯喇 ~

我同里奧大人早啲出去行陣   佢話去電腦中心買機袋比我   不過我話唔要喇   成 $300 又唔係靚   又裝唔到 Spare 電   咁同我原裝袋無分別   其實之前喺 Log-on 睇中咗個真皮套   不過差唔多 $800   但又係裝唔到 Spare 電   又係唔要得   咁都好   可以慳番筆 ~

7 點去到朗豪坊   我哋 Book 咗 7 點半   我話行陣先   點知太多人   令到我好唔想行   有啲掹   諗住直接去餐廳坐   咁啱媚媚打嚟   所以就一齊去買生日蛋糕仔先上去囉   而菜菜仔兩公婆差唔多 8 點就到喇 ~ 

間餐廳好有情調㗎   但樓下餐廳搵人唱 Live 囉   有佢聲無我聲啦   所以要好大聲先傾到偈囉 ~ 

食到尾聲   菜菜仔話想叫甜品   里奧大人好醒水叫人拎蛋糕出嚟   佢好驚訝呀   估唔到嘛 ~

呢餐加埋切餅費 $50   埋單 $ 1,250   我覺得唔值   又唔係好食   又嘈喎   根本好難傾偈 ~

食完都差唔多 10 點   我哋都各自歸家喇   同里奧大人坐小巴番屋企   超勁快呀 ~

煎釀三寶 (外賣) + 韭菜豬肉雲吞 ( 30-MAR-2012 )

( 30-MAR-2012  FRI )

終於 Happy Friday 喇   好開心呀 ~

等食早餐嘅時候   家姐打嚟   嚇得我以為咩事   原來係問我食咩早餐好   如果家姐同我同區番工就好啦   可以一齊食早餐   又可以一齊食 Lunch 行下   咁樣真係唔錯   唔駛我一個人咁悶嘛 ~

晏晝食 K + 朱古力奶   但我反而覺得用酸酸咪咪嘅藍莓乳酪送 K 係飽啲喎 ~  

原本里奧大人話 4 點喺九龍灣見客   咁我話唔煮   出去食 Pizza   點知佢 5 點打嚟   話太多嘢做   所以無去見客 ~  

又唔知佢幾點放工   我又唔想煮   所以去媽咪屋企坐下 ~  

好餓呀   所以買咗麥樂雞餐番媽咪屋企同工人 Share 食   媽咪又比咗碗湯我飲   超飽呀 ~

里奧大人 8 點鐘打嚟話放工   咁我都走喇   佢話想食 COCO 咖哩   我話實無位啦   星期五 APM  邊度都要等   所以我話煮埋之前食剩嘅雲吞   叫佢再買煎釀三寶番屋企食仲好   唔駛同人迫 ~

住家飯 @ 媽咪屋企 ( 29-MAR-2012 )

榨菜粒蒸撻沙

大荷蘭豆唐芹炒鮮魷

白切雞

節瓜蠔豉瑤柱排骨湯

( 29-MAR-2012  THU )

星期四喇   都好開心   因為星期尾嘛 ~

今日無咁凍 lu   不過都好好太陽   好開心呀 ~  

又等咗 25 分鐘車   真係好離譜   番工時間嘛   好在早出門口啫 ~  

去到茶餐廳其實已經 9 點   不過好餓呀   所以照食沙爹牛肉腸仔麵餐   飲凍咖啡   如果飲熱就會耐啲時間   同埋咁急食麵再加杯熱飲   真係會食到出汗   我唔想囉 ~

又係忙咗陣就 Hea   如果可以彈性上班都唔錯   早啲番早啲放   時間好用好多咁 ~ 

晏晝食 k + 藍莓乳酪   真係唔錯架   好似好健康咁呢 ~

今晚番媽咪屋企食飯   坐到 9 點就同家姐一齊走 lu   我行路番屋企當做運動   唔錯唔錯 ~

里奧大人 9 點幾仲喺大陸   本來話淥埋尋晚剩嘅雲吞比佢   不過佢番到嚟都成 11 點   所以叫佢自己喺大陸食   食完番屋企   咁唔駛餓咁耐 ~

等到差唔多 12 點先番到屋企   再陪佢睇下電視   1 點先瞓   如果聽日唔駛番工就好喇 ~

韭菜豬肉雲吞 + 菠菜 ( 28-MAR-2012 )

( 28-MAR-2012  WED )

我次次醒一醒都唔會睜開眼睇幾點鐘   不過都 Feel 到應該差唔多要起身   因為個天已經光嘛   但我都會繼續瞓   等到鬧鐘響先起身呢 ~

早餐食腿蛋漢堡包   今次試下印尼咖啡   問佢係咪三合一   佢話唔係   係拉啡   第一次聽呢個名   好搞笑   不過都唔熱嘅   飲完之後搞肚痛添呀   以後都唔飲喇 ~

好悶呀   到咗 Lunch Time 又未餓   所以周圍行下   行咗半個鐘先食嘢   食魚皮餃米 ~

今晚唔駛買餸   所以喺商場行一陣先番屋企 ~

6 點 15 分開始預備晚餐   差唔多 7 點半先搞掂   食完就熨衫   好攰呀 ~

是日懶餐 - 韭菜豬肉雲吞 + 菠菜

韭菜豬肉雲吞 - 尋晚已經醃好咗韭菜豬肉   所以今晚只係買半斤 ($7.5) 上海雲吞皮就搞掂   但其實我一心諗住整水餃㗎喎   不過我好似同人講話要上海雲吞皮   但我覺得啲皮好白   唔似之前食開黃色嗰啲   同埋好薄   我唔鍾意呢啲口感 ~  

菠菜 - 我覺得洗菠菜都好煩   因為次次都好多泥咁 ~

8 點打比里奧大人   我話有啲頭暈   叫佢快啲番嚟   等我早啲煮埋比佢食   之後我先沖涼 ~ 

我淥咗 11 隻雲吞同埋一碗菜比佢   佢食唔哂啲菜   之後仲話我淥太多雲吞比佢   因為佢話 8 隻已經夠   都黐鬼線   我唔相信多 3 隻就飽成咁   大佬   你估 Size 好似叉燒包咁大個呀   同埋我話無人叫妳食雲吞先喎   可以食菜先   之後我叫佢自己洗碗洗鑊   我話本來諗住幫你洗   不過你食唔哂就自己洗   以後都係食唔哂就自己洗 ~

叉燒炒麵 + 金銀蛋菠菜 ( 27-MAR-2012 )

( 27-MAR-2012  TUE )

陽光普照   真係心情都好啲   人都精神啲呀   日日係咁就好 lu   不過就唔好咁乾燥就更好啦 ~

早餐食芝士豬柳漢堡包 + 拉茶   熱辣辣嘅拉茶真係好好飲   好溫暖嘅感覺 ~

忙咗陣就 Hea 喇   見咁好陽光   唔好嘥   所以出去食酸辣米線   之後行陣就番菇場 lu ~

食完米線有啲唔舒服咁   下次都係咪搞喇 ~

放工去街市買餸   之後番屋企   但個人都仲係飽飽滯滯咁   不過都浸定菜   淥定麵先   搞掂哂就拖地   之後再煮晚餐 ~

是日懶餐 - 叉燒炒麵 + 金銀蛋菠菜

叉燒炒麵 - 尋晚食唔哂啲叉燒   最好就用嚟炒麵   夠方便嘛 ~ 

金銀蛋菠菜 - 諗住買脆肉瓜   不過又唔多見有喎   所以買菠菜算喇 ~

今晚我 8 點先開餐   里奧大人 8 點打嚟話喺公司打多個電話就放工   本來想等埋佢一齊食   但又唔知佢傾幾耐   又唔知一陣有無比人捉住   所以我都係自己食咗先   點知佢 8 點 45 分打嚟話已經喺九龍灣   我話九龍灣定九龍塘呀   佢話九龍灣呀   佢好少可以喺 9 點前番到屋企嘛   所以我好開心呀 ~

蜜汁叉燒 (外賣) + 粟米蛋花湯 + 蝦子麵 ( 26-MAR-2012 )

( 26-MAR-2012  MON )

雖然今日係星期一   但今日非常之好天呀   有太陽有風   心情都好好呢   呢啲天氣真係好想出街   如果留喺屋企呢   就一定狂洗衫   我最鍾意啲衫比陽光曬乾   最自然嘅殺菌消毒呢 ~

早餐食腿蛋漢堡包 + 拉茶   呢間無普通奶茶咖啡   只得拉茶同印尼咖啡   我未試過印尼咖啡   因為我驚係三合一   會好甜咁囉 ~ 

忙咗陣就 Hea 啦   媽咪打嚟話可以出院   超開心呀   咁啱 CC 又超勁得閒   所以又可以一齊 M   佢之前日日忙到爆   但呢幾日就非常之得閒   佢得閒就會記得我㗎喇   因為佢無咩老友好似我咁   成日都咁得閒嘛 ~ 

Lunch 又食 K + 藍莓乳酪   好想快啲清哂   食完哂呢   呢幾年都未必會再食 K 呀 ~   

唔知點解個胃有啲唔舒服   同埋有啲頭暈   其實一早已經諗好咗煮咩   不過都係唔好搞咁多嘢   諗住去大家樂買隻雞   點知原來 25/3 係 Last Day   唯有去明星買叉燒囉 ~

6 點番到屋企   6 點半自己開餐   食完即熨 2 機衫   再洗 2 機衫   難得咁好風   之後又好似潮濕   早洗早着呀   熨完衫又忍唔住抹櫃抹書房   再抹洗手間   本來諗住拖埋地   但都係聽晚先   大佬   真係有啲攰呀 ~

是日懶餐 -蜜汁叉燒 (外賣) + 粟米蛋花湯 + 蝦子麵

蜜汁叉燒 (外賣) - 喺明星買架   $40/半斤   食唔哂   食剩就留番聽晚炒麵 ~

粟米蛋花湯 - 超勁想飲呀   CC 話佢鍾意飲   因為佢媽咪煲粟米湯會加瘦肉碎同魚肚   咁多料   我唔會整囉   極其量只會加蘑菇同素翅   放工番黎真係好鬼攰   唔會搞咁多嘢 ~

蝦子麵 - 余均益辣椒醬配蝦子麵真係絕配   不過我覺得食一個蝦子麵其實唔飽   但兩個又太飽   但今晚自己開餐先嘛   唔係就會淥 3 個麵同里奧大人 Share 食   咁就啱啱好呢 ~

里奧大人 9 點幾番到屋企   話想食出前一丁多啲   麻煩到暈   不過見佢做嘢咁辛苦   佢鍾意食咩就咩啦   但如果餐餐出前一丁又唔得喎   實在太唔健康嘛 ~

板長壽司 @ 九龍灣 ( 25-MAR-2012 )

( 25-MAR-2012  SUN )

今朝瞓到 10 點半   我同里奧大人講話唔想番教會呀   想抖下 ~

去海景食早餐啦   做到月尾咋   之後搬去九龍城   不過我唔會為咗食你份早餐去九龍城囉   食完就番屋企   洗咗一機衫就開始 Hea 喇 ~

里奧大人幫家姐 Update 咗部電話   所以家姐去探媽咪   之後就同我哋去 KFC 食 Lunch 喇   因為想試避風塘脆辣雞呀 ~

避風塘脆辣雞餐 - 完全唔掂   唔好話避風塘風味   連一啲辣都無啦   但家姐話鰂魚涌嗰間好正   啲雞肉都好入味   但淘大呢間真係唔掂

食完 Tea   各自歸家 ~

差唔多 5 點半就出發買嘢比媽咪   之後家姐就車埋我哋去醫院探媽咪 lu ~

坐到 7 點半就走喇   家姐屋企附近爆水管   所以上嚟我屋企沖涼   我就落去板長等位 ~

家姐食完就番屋企   我同里奧大人就行陣商場   因為要消化下呀 ~

豉油雞 (外賣) + 炒菜心 + 勁薑蕃薯糖水 ( 21-MAR-2012 ) + ( 22-MAR-2012 ) + ( 23-MAR-2012 ) + ( 24-MAR-2012 )

( 21-MAR-2012  WED )

早餐食沙爹牛肉麵   食飽都係好攰噃 ~ 

菇場吽到好悶   所以 Lunch Time 出去行咗半個鐘散散悶氣   再買 Big Mac 番菇場食 ~

是日懶餐 - 豉油雞 (外賣) + 炒菜心 + 勁薑蕃薯糖水

豉油雞 (外賣) - 勁想食雞   諗住去大家樂買隻雞   點知無 Coupon   所以走去明星買半隻豉油雞   $ 50 半隻   咁大家樂真係好鬼抵啦   $55 一隻   不過算啦   一隻都食唔哂   無謂浪費   咁樣諗會舒服啲 ~

炒菜心 - 炒下菜啦   醫師話淥菜好涼喎   所以依家盡量炒菜呢 ~

 
勁薑蕃薯糖水 - 清埋最後 4 隻蕃薯   估唔到仲好香蕃薯味添噃   好開心呀   話哂擺咗個幾星期都無壞嘛 ~

今晚每月一到添   唔怪得咁攰啦   好在個肚唔痛   不過聽日唔敢講   好在里奧大人 9 點幾番到屋企   等佢食埋飯   我幫佢洗埋碗   我就瞓 lu ~

( 22-MAR-2012  THU )

今朝 8 點半起身   瞓多啲希望個肚唔會痛   番工時無痛㗎噃   仲買咗腿治 + 咖啡番菇場食   不過其實無咩胃口   買定先咋   但差唔多 11 點就痛啦   好在有暖水袋   不過成日嘔就比較煩啲囉 ~  

媽咪又氣促頭暈入院   令到我又擔心   所以個肚更痛喇 ~

晏晝瞓啦   瞓咗精神小小   不過都係唔舒服囉 ~

今晚唔探媽咪喇   放工即坐巴士番屋企   番到屋企第一時間沖熱水涼   超正呀   之後都係睇電視   不過無胃口食嘢 ~  

我叫里奧大人喺大陸食埋嘢先番香港   反正我又唔食   早啲食好過呢 ~

等到 10 點半   都係覺得瞓床舒服啲   所以番房瞓 lu   不過都係心掛掛   佢差唔多 11 點半先番到屋企   我終於可以安心瞓覺啦 ~

( 23-MAR-2012  FRI )

今朝都係瞓到 8 點半   又係買腿治 + 咖啡番菇場食   不過仍然係唔想食   因為個胃超勁痛呀 ~

忍到 Lunch Time 就同阿 Head 請病假   即搭的士去睇醫生   之後就番屋企即沖涼即食藥即瞓覺喇   一瞓就瞓到 5 點半   但個肚仲有輕微唔舒服   所以又無探媽咪   繼續瞓   瞓到 8 點 ~   

家姐部電話又有問題   但里奧大人上咗大陸   今晚都好夜番   唯有放低部電話叫里奧大人 Update   所以家姐探完媽咪就買嘢食嚟我屋企食喇 ~

里奧大人又係 11 點幾先番到屋企   我都係見咗佢一眼   我就即番入房瞓喇 ~   

( 24-MAR-2012  SAT )

今朝 8 點 15 分起身   所以可以搭巴士   食埋早餐先番菇場   難得有胃口嘛 ~

忙到呢   搞到個人非常緊張   個肚又嚟料啦 ~

仲諗住同里奧大人一齊食 Tea   不過我最後都係要瞓覺   又探唔到媽咪喇   瞓到 8 點先起身 ~

之後個肚無痛喇   開始餓   所以叫里奧大人買雲吞麵 + 菜   隔咗個幾鐘   又開始餓   所以又叫里奧大人買魚柳包餐   一路睇電視一路食   真係好鬼嘆呀 ~

住家飯 @ 媽咪屋企 ( 20-MAR-2012 )

酸薑皮蛋蕎頭　

蠔油雞翼


酸梅麵豉蒸黃立鯧

煎腐皮卷 / 蝦卷

海蜇燻蹄 @ 得龍 / 燒排骨 @ 明星

炒油麥菜


節瓜瑤柱瘦肉湯

( 20-MAR-2012  TUE )

真係唔知點解超級攰   所以今朝都係 8 點先起身呀   不過仲想瞓囉 ~

早餐食燒賣粉果 + 咖啡   飲咗咖啡都好似唔多精神咁嘅 ~

菇場好忙呀   咁都好  唔係仲悶 ~

Lunch 食 K + 朱古力奶   次次食完都好鬼凍   但熱奶送 K 好難頂   腍哂嘅 K 係超級難食㗎 ~

又好忙喎   所以好快就放工   星期四同五家姐唔得閒   咁家姐又買咗雪糕比我   所以今日就番媽咪屋企食飯喇   不過無同媽咪講   諗住比驚喜佢   因為我次次放工打比佢   問佢食咩餸   佢都以為我番嚟食   但估唔到今次家姐同咗媽咪講囉 ~

我又唔知媽咪原來知我番去食   所以佢特登買咗條魚   但我都買咗海蜇燻蹄同燒排骨加餸呢   同埋因為好餓   所以買咗包雞蛋餅醫肚   脆卜卜好好味呀 ~

同家姐 9 點先走   里奧大人就啱啱先放工   佢番到屋企附近嘅茶餐廳食叉燒蛋炒飯   我話平時又叫我唔煮飯   依家又走去食飯   佢即刻話係少飯   我話都係飯   咁平時又話唔鍾意食飯   佢都唔夠我講啦   即係平時成日話飽   其實係唔鍾意食囉   衰格 ~   

Sambal Belacan 炒西蘭花豬柳 ( 19-MAR-2012 )

( 19-MAR-2012  MON )

尋晚開咗冷氣瞓   諗住好舒服   點知反而熱到瞓唔着   所以我同里奧大人講話遲啲先起身   又問佢熱唔熱   佢話好熱   同埋瞓得好差   今朝唔番工   咁我出房去廁所   估唔到廳仲涼過房   所以叫里奧大人即熄冷氣   之後我話我都請病假唔番工喇 ~

瞓到 10 點半就醒喇   梳洗之後就出去食早餐   抖陣沖涼就出去尖沙咀拎藥喇 ~  

拎完藥再買埋菜   差唔多 2 點   諗住番上屋企   點知里奧大人打嚟問我喺邊   話諗住去鴻星飲下午茶   我記得鴻星好似 2 點有下午茶   所以我都去攞位先 lu ~

平日同假日飲茶真係兩個世界   因為平日靜好多囉   超正   Hea 到 3 點半就走喇 ~

我要去睇醫生啦   唔係無病假紙   不過我條腰都仲係痛   所以都真係要去睇醫生囉   順便去化驗所拎埋張 X-Ray 片   話我有少少骨刺喎   問佢駛唔駛做物理治療   佢話唔駛   真係好痛好痛先做喎 ~

番到屋企就執屋啦   難得有陽光就拖埋地   間屋終於又整齊番喇   好開心 ~

是日懶餐 - Sambal Belacan 炒西蘭花豬柳

Sambal Belacan 炒西蘭花豬柳 - $11 有 3 棵西蘭花   我覺得都幾抵   好過食貴菜心   本來諗住煮茄汁豬扒   但又唔想搞咁多嘢   所以就用阿表送比我嘅 Sambal Belacan 醬   一碟過算數   最緊要快   同埋唔駛洗咁多嘢呢 ~

茶樹菇姬松茸豬骨湯 ( 18-MAR-2012 )

( 18-MAR-2012  SUN )

今朝同里奧大人 9 點半就自己醒咗   所以都即刻梳洗出去食早餐   今次見早咗起身   所以去 Delifrance 食早餐喇 ~

食完番屋企沖涼 Hea 陣就番教會   順便拎埋個電飯煲比阿 Jack 整呢 ~

崇拜完畢我就去街市買餸   里奧大人就番屋企做嘢 ~

今日又好熱呀   番到屋企要開冷氣添呀   唔係熨衫會熱到暈囉 ~

家姐去元朗買狗糧   所以又買埋豬肉乾比我   上年一磅 $72   今年 $80   家姐話貴過澳門喎   佢又同埋我哋一齊食 Tea   食完上我屋企 Update 電話   坐到 4 點半就番屋企 lu ~

里奧大人話今日應該做哂公司嘢   想出九龍城食泰國菜   不過我話難得咁早做哂   喺屋企抖下好過   同埋我又煲咗湯   下次先出啦 ~

諗住今晚煎豬扒   不過里奧大人話就咁飲湯加食湯渣已經夠飽   唔駛煎豬扒同煮飯喎 ~

是日懶餐 - 茶樹菇姬松茸豬骨湯

茶樹菇姬松茸豬骨湯 - 終於清哂 上年買嘅湯包   好開心呀 ~

食完飯洗完碗就睇電視   之後阿 Jack 打嚟話已經搞掂個電飯煲   但我沖咗涼   所以叫里奧大人去拎喇 ~

今晚里奧大人終於有時間睇番之前錄咗嘅電影   我就睇雜誌   佢坐喺隔離陪我   我已經覺得好開心㗎喇 ~

長洲半日遊 + 海港酒家 @ 將軍澳中心 ( 17-MAR-2012 )

( 17-MAR-2012  SAT )

難得每月一次嘅 Off   真係超級無敵振奮㗎 ~

當然要自然醒啦   同里奧大人差唔多 10 點半先起身   梳洗之後就去食早餐   食完就去照腰骨 X-ray   $320 搞掂   照完就番屋企沖涼   再出發去長洲呢 ~

搭 619 再轉 603 再坐船   好感恩車程船程都唔駛等   咁慳番唔少時間 ~ 

今日好好天呀   超感恩   藍天白雲可以影下相嘛~   

差唔多 2 點幾入到長洲   超熱呀   行咗陣再去食午餐   今次又去番蘇波記 ($198 - 四餸)   其實唔係唔想試另一間   之前試咗一間唔好食   真係唔想再試   因為長洲唔係成日嚟   唔同喺屋企附近嘛 ~

藍妹啤酒 - 太熱喇   又唔想飲汽水   所以問里奧大人飲唔飲啤酒   佢 O 哂咀呀   咁早飲啤酒   仲要係我話飲添   不過唔凍嘅   所以要加冰
香辣蝦 - 原來係麻辣   好在唔太麻咋   花生送啤酒超正呀   啲蝦又挑埋腸   感覺乾淨好多囉
里奧大人問紅色嗰啲係咩   我覺得佢以為係紅棗囉   我話係泡椒啩   笑笑口話應該唔辣   叫佢試下   佢話我笑得衰呀   唔方好嘢   所以幾大都唔試   哈哈

鐵板煎蠔仔蛋 - 鐵板果然唔同   熱辣辣超正   同埋有唔少蠔呀   我蘸埋魚露一齊食   但啲魚露超鹹呀

清蒸海上鮮 (黃立鯧) - 有兩樣魚   不過我揀黃立鯧   因為媽咪成日蒸嘛   知道條魚款係點嘛   最怕脹卜卜又大條嘅魚

豉椒炒蟶子 - 啲汁唔得惹味呀

最鍾意 226

食完周圍行   不過真係好熱囉   之後又食豆腐花   再周圍行影下相 ~  

芝麻糊豆腐花 (凍) - 無味嘅   不過勝在夠凍囉
大菜糕涼粉 (凍) - 呢個糖水又太甜   咁樣中和番無味嘅芝麻糊豆腐花

但太陽實在太猛烈   出咗汗個人好攰   同埋好想入冷氣地方坐   所以又食棉花冰喇   上年食好似 $20   今年已經 $25 lu ~ 

蕃石榴雪花冰 @ 花園雅座

食完雪花冰反而有啲眼瞓   可能飲咗啤酒   所以都係出去行下   本來我特登嚟影下相   不過突然有啲頭痛   所以無咩 Mood 再影   行多幾個圈買埋芝麻糕就走喇 ~

水姑今日搬屋   所以約佢哋食飯   原來佢哋又約埋表哥同其他朋友一齊食   因為佢哋幫手搬屋   食完就上佢屋企坐陣   佢又比咗豉油蠔油同按摩墊同其他嘢比我   加埋成 2 大袋嘢   所以我哋坐到 10 點半就搭的士番屋企喇 ~

蜜糖焗雞翼 + 蓮子紅豆沙 ( 16-MAR-2012 )

( 16-MAR-2012  FRI )

終於 Happy Friday 喇   食個出前一丁餐   早餐食飽啲真係人都開心啲咁㗎 ~

今日家姐無啦啦 Send SMS 問我有無帶飯   佢好少會咁問   原來佢 Off   但唔記得講我知   咁我話都係食 K 囉   所以佢話同我食 Lunch   喺菇場樓下等我 ~  

但我同家姐又唔係話太餓   所以我話食雲吞麵   之後再去買麥當勞比姐夫   但我哋就幫手食薯條   熱辣辣超正呀 ~

招牌雲吞麵 - 想食牛丸不過無   所以食招牌雲吞麵啦   話明招牌   理應唔會差得去邊   不過呢碗真係無咩特別囉   家姐食食下無啦啦話   街坊廚神應該特登幫佢哋做宣傳   根本唔好食

炸魚皮 - 呢個好香脆喎 

潮州粉果 - 想食小食咋   不過唔好食囉

自家制醃蘿蔔 - 食評又講到好好食   但真係一般囉   完全唔會有驚喜  

之後送家姐搭車   經過 Pizza 店   我話一陣睇下咩價錢   下次食呢間   咁我睇完就 Send SMS 比家姐   話 $48 同 $58   只可揀一樣主菜   咁佢問我有咩分別   我話無留意   又唔係食   問咁多做咩喎   佢話咁都得 ?!   覺得我睇咗同無睇無咩分別   哈哈哈哈哈哈   又係噃   咁唔係食   我真係唔會睇咁多   咁多嘢食點記喎   想食先再睇都未似啦   我自己覺得 ~

又等放工喇   今晚唔駛買餸超開心 ~

咁我自己成日驚唔記得煲飯   所以好多時會煮定先   今晚超黑仔啦   我唔記得自己拎咗個芯出嚟   居然倒哂啲米落個電飯煲度   我拆哂啲螺絲   諗住好易分體   點知原來好鬼實   同埋最慘點 Fing 都得幾粒   打比阿 Jack   佢教我倒轉 fing   但真係無咩米出來   之後即打比里奧大人   估唔到佢突然間好體諒我   話我太攰所以先咁   唔係第一時間話我論盡呢   之後好在記得阿 Jack 識整電器   所以即打比佢   佢話星期日拎比佢整呢   當堂放心哂 ~

里奧大人差唔多 8 點半就番到屋企   可以一齊食飯   好開心呀 ~  

是日懶餐 - 蜜糖焗雞翼 + 蓮子紅豆沙

蜜糖焗雞翼 - 好耐無焗雞翼   覺得真係好好食 ~  

蓮子紅豆沙 - 上次仲有紅豆剩   所以今晚煲埋去喇   難得有 Mood 煮嘢 ~  

釀青椒 + 冬蔭功湯河 + 韓國薯仔麵 ( 15-MAR-2012 )

( 15-MAR-2012  THU )

里奧大人上大陸就會 7 點起身   我尋晚又唔記得佢駛唔駛上   因為嗰排有時上有時唔上嘛   咁我仲以為係 7 點半   所以起身   咁里奧大人就問我做咩咁早起身   我話 7 點半喇   佢話 7 點咋   咁我即刻瞓番   教咗鬧鐘 7 點 45 分先起身   都幾爽   其實平時都可以咁   不過食早餐得 15 分鐘   好似好趕咁   所以都係早啲起身好啲 ~

一出被竇好似好凍   但沖完涼又無咁凍   不過唔理喇   都係着件厚褸穩陣啲   攝一攝好鬼易病㗎 ~

問早餐食燒賣粉果   如果兩樣都煙煙韌韌就好啦   好在啲辣椒油好香好辣   唔係我應該唔會喺度食早餐呢 ~

菇場忙咗陣就 Hea 住等 Lunch Time 啦   今日又係食 K + 藍莓乳酪   再睇下仲有幾多盒 K    好在得番 8 盒   應該好快清得哂 ~

尋晚買埋今晚餸   唔駛買餸真係好開心   喺商場行陣先番屋企   不過好怕一個人行街   因為好容易忍唔住手買嘢 ~

是日晚餐 -釀青椒 + 冬蔭功湯河 + 韓國薯仔麵

釀青椒 - 尋晚見啲菜咁貴   幾大都唔買   買咗 2 份青椒 ($12)   點都抵過菜   哈哈    今次又係好有心機煎   我自己食就咁蘸泰式辣雞醬   但里奧大人就鍾意蒜頭豆豉汁囉   所以又要特登整啲汁比佢   唔係一陣又話乾又咁又咁承機唔食 ~ 

冬蔭功湯河 - 終於清哂喇   感動到有啲想喊 ~

韓國薯仔麵 - 之前喺阿信屋買   1 Pack 4 包做緊特價   好似 $26.x   買咗 2 Pack   口感都幾煙韌   不過無薯仔味嘅   湯底都 OK   如果係辛辣麵湯底就更加吸引啦 ~

里奧大人明明 7 點半打比我話走得   點知我 8 點打比佢   佢話又比人捉住   所以啱啱走   次次煮麵我都會打比佢   問佢喺邊   我先預時間煮麵   所以煮麵真係煩過煮飯好多呢 ~

芝士肉醬焗扁意粉 ( 14-MAR-2012 )

( 14-MAR-2012  WED )

今朝又係幾凍咁   呢排啲天氣真係非常之唔好   又係每隔幾日就轉天氣   身體差啲都好易病呀 ~

好眼瞓呀   所以要飲濃啲嘅咖啡先頂得住呢   不過次次飲完呢間嘅咖啡都有啲反胃 ~  

菇場今日唔忙 lu   悶起上嚟就周圍望下人咁囉   唔係好易瞓着 ~

Lunch 又係食 K + 藍莓乳酪   我想喺 20 號之前清哂所有 K ~  

放工即走啦   屋企大把嘢做呀 ~

去街市買菜   啲菜貴到飛起   媽咪尋晚先講話菜心要 $14/斤   工人話旺角 $18/斤添呀   今晚睇到最貴係 $14/斤   我實唔買   同埋咁貴都無人買   都唔知擺咗幾耐   諗住買節瓜   都要 $12/斤   我又唔買呀   買唔落手囉 ~  

番到屋企即醃豬肉同解凍雜豆   之後拖地   洗衫   再預備晚餐   未停過手呀 ~ 

是日懶餐 - 芝士肉醬焗扁意粉

芝士肉醬焗扁意粉 - 好開心清哂包芝士粉同蕃茄意粉醬呀   今次醬汁係一磅百合茄 + 半樽蕃茄意粉醬   我次次煮肉醬意粉   都會加好多雜豆   我覺得食雜豆多過意粉 ~  

食完就抹櫃   之後沖涼再熨衫   9 點半就做哂喇   可以安安樂樂睇電視 ~

里奧大人 9 點幾先番到屋企   好在佢番到嚟都食哂啲意粉   仲話今次啲意粉口感好好   我話係扁意粉   之前都煮過啦   嗰時又話鍾意食意粉多啲 ~

住家飯 @ 媽咪屋企 ( 13-MAR-2012 )

酸梅麵豉蒸黃立鯧

薑蔥麻香雞 @ 大家樂

梅菜蒸肉餅

炒菜心苗

節瓜瑤柱蠔豉瘦肉湯

Puff @ Italian Tomato

( 13-MAR-2012  TUE )

依家搭巴士番工   見親都係差唔多同一班人   有兩父子啦   個仔係 3 歲嘅小朋友   同埋之前個站上車嘅婆婆   依個婆婆好好㗎   一見到佢地兩父子上車   就會讓自己個位比佢哋   等佢哋唔駛行咁遠   咁如果我上車見到佢地兩父子趕緊嚟   我都會比佢哋上車先   單手抱住小朋友都幾辛苦架   就係咁樣   我哋依家見到面都會打招呼呢 ~

其中仲有 1 個女人又係同我差唔多時間搭車   我哋都會打招呼   佢仲同我一個站落車   咁今朝我行行下見佢同我一個方向   都問下佢喺邊度做嘢咁啦   咁啱原來同一座大廈番工   住同一屋苑但唔同座   佢又同里奧大人一樣姓   又幾啱噃 ~

傾完之後我去食早餐喇   食秘制馬拉盞撈麵 + 熱檸茶   其實係印尼撈麵 ~

番到菇場忙呀   有啲攰   所以晏晝唔食 K   出咗去食手打牛丸米粉   坐喺我隔離係 3 個學生哥   最多 15 歲   佢哋講開 NBA 賽果   有個學生哥話輸咗   唔係咁細個就賭錢呀嘛 ~

又忙啦   忙到 4 點幾就可以等放工 lu ~

今晚番媽咪屋企食飯   因為家姐同事今日拎咗 Puff 要請我食埋喎   所以就番媽咪屋企食飯喇 ~

同家姐坐到 8 點半就走喇   趕住番屋企睇 "On Call 36 小時"   一番到屋企見到里奧大人食完麵   我唔番屋企煮飯就咁早番嚟   真係邪呢 ~ 

梅菜蒸鯇魚 + 金銀蛋菠菜 + 勁薑蕃薯糖水 ( 12-MAR-2012 )

( 12-MAR-2012  MON )

星期一喇   天氣好在無咁潮濕   不過仲係凍呢 ~

早餐食餐蛋漢堡包 + 拉茶   下次叫佢哋烘燶少少個包先   脆脆哋好味啲 ~

菇場呀   靜到呢   做咗咁耐都好唔慣咁靜囉 ~

晏晝又食 Special K   但今次飲藍莓乳酪   都 OK 夾   同埋覺得乳酪有益過朱古力奶咁   仲無咁肥添呢 ~

放工去街市買餸   落雨濕濕行街市真係最憎   不過我想買冬瓜   覺得街市平啲   唔係唔去街市呀 ~ 

番到屋企即煲冬瓜袪濕水   袪濕料喺藥房執   $15/包   媽咪話佢買 $5 咋   但我唔信囉   依家邊度仲有 $5 料買喎 ~

煲緊冬瓜水同時就浸菜同梅菜   再開機洗衫   之後就可以抖陣喇   今晚無煮飯呀   就咁食餸 + 蕃薯糖水   如果食飯就肯定食唔落蕃薯糖水呢 ~

是日懶餐 - 梅菜蒸鯇魚 + 金銀蛋菠菜 + 勁薑蕃薯糖水

梅菜蒸鯇魚 - 又係特登蒸魚比里奧大人食㗎   幾咁好呀 ~

金銀蛋菠菜 - 估唔到街市唔係好多檔有菠菜賣   但我之前買咗 2 隻皮蛋同 2 隻鹹蛋   所以點都要整囉   驚壞嘛   不過最後都係壞咗每樣一隻 ~  

勁薑蕃薯糖水 - 上星期買咗   不過無時間煮   襯今晚有 Mood 煮就煮埋佢啦   但煮咗 4 個   仲有 4 個   我今次用 2 粒黑糖薑茶再加半嚿薑   里奧大人話好辣   但我又真係一啲都唔覺辣喎   佢都唔知係咪心理作用   下次明明勁薑都話無用薑   睇佢會唔會話辣先 ~

外賣 @ 媽咪屋企 ( 11-MAR-2012 )

馬拉盞炒通菜鮮魷

椒鹽豬扒

涼瓜牛肉

楊洲炒飯

( 11-MAR-2012  SUN )

今朝 10 點起身   之後去 Delifrance 食早餐   點知到我 Order 時就咩都無  不過算啦   有 9 折都抵嘅 ~

食完即刻番上屋企沖涼再番教會   崇拜完畢就番屋企   點知落雨   所以突然間好鬼凍 ~

番屋企拎遮之後就出尖沙咀行下   諗住食牛丸河   但落雨濕濕都係唔好   同埋架巴士又唔到   所以都係去星林居食米線喇 ~

我要中辣   里奧大人要小中辣   佢碗黎先嘅   佢食兩啖話好辣好辣   咁我當然話佢無鬼用啦   中辣根本係得嗰小小辣嘛   我平時食開知道嘛   咁到我碗嚟咗   我食第二啖已經 "濁" 親   之後我覺得佢哋比咗麻辣我哋囉   不過呢排天氣濕   食啲麻辣都好嘅   所以都唔叫佢換喇   我食辣其實無問題   不過就唔鍾意麻辣嘅辣   因為食完真係條脷都麻埋   好似無咩意思   但今次我盡量食啦   一路食一路流眼淚   仲流埋鼻涕添呀   里奧大人又食到眼睛水汪汪   又間唔中咳   我第一次食辣食到咁辛苦   我食咗 1/3 真係頂唔順   我好驚胃痛嘛   所以叫佢比碗清湯   里奧大人之後都要碗清湯呀   感覺差好遠啦   浸咗清湯就食得哂喇   雖然浸咗都仲有啲辣 ~ 

實在太辣喇   我話要去麥記食雪糕   食完米線又食雪糕   頂級飽呀 ~

食完又行 Habour City   不過商場好焗啦   越行越攰   最後行埋 Citysuper 就走喇 ~

我同里奧大人講話想探媽咪   佢話好呀   之後一齊坐巴士去媽咪屋企呢 ~ 

5 點幾去到   估唔到家姐都差唔多時間到呢   睇下電視   傾下計都已經 6 點幾   所以去酒樓買外賣番媽咪屋企食喇 ~ 

食下傾下   坐到 8 點半就一齊走喇   好鬼凍啦   好似得 12 度咋 ~

番到屋企即沖熱水涼   爽到爆炸   之後就同里奧大人一齊睇之前錄咗嘅 "竊聽風雲 2"   不過我覺得 "竊聽風雲 1" 好睇啲咁呢 ~

敍苑粉麵茶餐廳 @ 九龍灣 ( 10-MAR-2012 )

( 10-MAR-2012  SAT )

星期六喇   又係瞓到 7 點 55 分先起身番工   超正 ~

早餐又食芝士豬柳漢堡包 + 拉茶   今朝 Hea 到 9 點先番菇場 ~

放工番屋企抖陣   再同里奧大人出去食 Tea   食完又番屋企抖陣就去陪媽咪喇   佢又胃脹同埋fh少少氣促   里奧大人又有 Urgent 嘢要做   起碼做一日   所以我就去陪媽咪喇 ~

差唔多 4 點先去到媽咪屋企   見佢都無咩事   感恩   不過只係個胃仲係脹   食咗藥水又好啲咁囉 ~

6 點半左右買嘢比媽咪食   佢話想食生炒骨   所以我同佢 Share 食囉 ~  

差唔多 8 點半就走喇   里奧大人打嚟話餓呀   不過我唔太餓   所以同佢去茶餐廳   因為我可以食點心呢 ~

食完行陣商場就番屋企喇   頻頻樸樸真係好鬼攰呀 ~

米桶越南餐廳 @ 官塘鱷魚裇中心 ( 9-mar-2012 )

越南春卷


越南蒸粉包

馬拉盞炒通菜

招牌牛油雞翼

烤豬肉湯粉

( 9-mar-2012 fri )

yoho   happy friday 喇   完全感受到人地聽日 off 嘅開心振奮   雖然我無份   但星期尾都係令人開心嘅 ~

今朝又食出前一丁麵   加埋杯拉茶   真係好鬼飽 ~

菇場仲係忙啦   忙到 lunch time 都未餓   所以出去行咗半個鐘先番菇場開餐   又係 special k + 朱古力奶喇   下星期應該都係 k   不過可能轉乳酪   無咁悶嘛 ~

里奧大人今日上大陸   我就約 cc 一齊去官塘鱷魚裇中心嘅米桶越南餐廳食飯喇 ~

今晚搭地鐵   一開門見到有個男仔着成女仔咁   窿窿線衫外套 + 熱牛 + 厚身灰色暗花絲襪 + boot   但見到佢粒大喉核同 d 剃唔乾淨嘅鬚鬚就覺得好恐怖啦   有班學生見到佢入黎   我聽見佢地問男定女   總之 d 人一見佢就會望住佢   佢 d 手指都好幼   其實喺後面睇   佢真係似一個女仔囉   佢係睇日文書   唔知佢真係日本人定係鍾意睇日文嘅人呢   我覺得女扮男都接受   其實好易睇到   因為果 d 個個打扮都一樣   但男扮女我就真係接受唔到喇   唔知點解 ~

APM 唔知有咩韓國歌星黎表演   超多學生妹睇呀   塞住哂條路 ~  

Book 咗 6 點半   不過我 6 點 15 分就到咗   cc 就6 點 20 分到   時間啱啱好 ~

一坐得點嘢食   一路食一路傾   傾呀傾   之後再點碗湯河   又一路食一路傾   傾呀傾   傾到燙衫問題   我話我會熨埋底衫  底底同襪   手巾都會熨   總知洗咗咩就熨咩   佢話好小聽人話熨底衫喎   但我覺得熨咗之後真係舒服 d 喎   叫佢試又唔試 ~  

之後 waiter 話 last order   我地都無睇幾點   又繼續傾   最後 waiter 比張單黎   我地先知原來已經 10 點半   我仲以為 9 點幾咋   真係唔係 waiter 叫埋單   我地會繼續傾囉 ~

今餐 cc 話請我生日飯架   不過其實佢上年生日飯我都未請   所以今餐我一定要請喇 ~

番到屋企無耐   里奧大人都番黎 lu   咁都好   唔駛等佢咁耐   我可以沖完涼即瞓呢 ~

住家飯 @ 媽咪屋企 ( 8-mar-2012 )

陳皮蒸泥掹



美極煎蝦碌

燒排骨 @ 得龍

乳鴿

炒菜心


粉葛江瑤柱蠔豉瘦肉湯


韓國士多啤梨

芒果

我同家姐都好鍾意食呢隻熊仔糖   因為超煙韌   今次超級抵   萬寧原價 $13.9/包   今日特價 $9.9/包   買第 2 包仲有 88 折   咁家姐又要儲印花   所以買夠 8 包   就算唔儲印花都起碼要買 6 包   因為實在太抵喇 

( 8-mar-2012 thu )

嘩   依家仲係咁潮濕   瞓極都好攰   所以呢排 10 點 45 分左右就瞓喇   瞓多 d 應該心理上無咁攰咁呢 ~

早餐超想食餐蛋治   好耐無食嘛   突然覺得好好味 ~ 

菇場超忙呀   忙到 lunch time   今日又 special k + 朱古力奶呀 ~

woo   又係好忙啦   忙到放工都仲未忙完   不過唔理 lu   做埋 d urgent 就走   其他就留番聽日做呢 ~

雖然里奧大人今日唔駛上大陸   不過我都照番媽咪屋企食飯   反正佢又唔知幾點放工   但我都唔想煮啦   成日食咁小好煩呀 ~

坐到 8 點 45 分就同家姐一齊走喇   又落毛毛雨   覺得凍添呀 ~

番到屋企見到里奧大人食排骨炒麵   真係丫   又食得哂喎   但又唔見食得哂我煮嘅嘢   衰格   我依家一見到佢食哂自己買嘅嘢   我反而唔開心   會諗起佢成日食唔哂我煮嘅嘢   其實真係唔鬼想煮   不過佢一日三餐都食味精又好似好慘咁   同埋佢唔食   我都要食家嘛   應該咁   飯我照煮   但只留好小好小份量比佢   到時唔好同我講話唔夠食   因為係佢自己攞黎衰呢 ~