茄汁豬扒 + 江魚仔炒飯 ( 31-JUL-2012 )

( 31-JUL-2012  TUE )

今朝起身有電話響   原來係媽咪   不過我都估到係媽咪約我飲早茶呢   佢同工人散完步   所以就問我飲唔飲茶   我梗飲啦 ~

金粟煎魚餅 / 娥姐潮州粉果 / 家鄉鹹水角 / 健康素菜包 / 牛肉煲仔飯 / 鮑汁燜雞腳

菇場忙下停下   所以都好快到 Lunch Time 呢 ~

放工即走   番到屋企就預備晚餐   之後拖地   抖陣就煮飯 lu ~

今晚自己食先   不過又未餓   但都想早啲煮   早啲沖涼囉   沖完涼再慢慢食   又係好爽呀 ~

是日懶餐 - 茄汁豬扒 + 江魚仔炒飯

茄汁豬扒 - 之前喺大埔買咗 5 隻紅 / 黃椒   再唔煮就壞架喇   之後又唔駛煮飯   所以一次過將佢地切粒粒   加埋茄汁豬扒   當一個有菜有肉嘅餸喇   見有咁多汁   倒咗好似好浪費   所以即煮多個意粉   留番後日做 Lunch Box   勁呀 ~

江魚仔炒飯 - 用馬來西亞買嘅 "江魚仔炒飯" 醬料炒   依家炒飯味道無咁單調   因為我平時炒飯好多時咩都無加呢 ~

里奧大人差唔多 9 點半先番到嚟   見佢喉嚨唔舒服   幫佢洗埋碗啦   等佢快啲沖涼休息 ~

梅菜蒸鯇魚 + Sambal 炒青豆角 ( 30-JUL-2012 )

( 30-JUL-2012  MON )

星期一 lu   又一個新開始   今日又係好好天   仍即係好鬼熱好曬呀 ~

又見到水草阿姐   今朝佢早咗搭車   所以又一齊食早餐喇   不過佢 8 點 35 分就番公司   我就坐到 8 點 50 分先走呢 ~

今朝唔飲咖啡   諗住熱檸檬茶都好濃茶   不過 11 點幾開始眼瞓 lu   下次都係飲咖啡   我都係飲半杯   好過唔飲中眼瞓 ~

晏晝同 8 卦一齊出去食   我提議去我食開間粉麵店   好在佢都話 OK   下次再食   咁都好   話哂大家口味都幾似   之後陪佢去惠康同零食店買餅   成身汗呀熱到   好想番屋企沖涼 ~

放工即走去街市買餸喇   居然無咩菜賣   有嘅都好黃   見到都唔想買嗰隻 ~ 

番到屋企即預備晚餐   再煲埋菊花茶   搞掂哂都已經 7 點 10 分   之後 7 點半里奧大人打嚟話唔舒服早啲番   好在未煮   咁樣就可以一齊食飯   好開心呀又 ~

是日懶餐 - 梅菜蒸鯇魚 + Sambal 炒青豆角

梅菜蒸鯇魚 - 媽咪之前教我   話將啲梅菜炒完再蒸先好味   所以今晚見有時間   我都先炒後蒸喇   如果里奧大人無唔舒服   我會加埋指天椒仲正呀   今次好感恩買到件鯇魚又大又平   $15 咋   好過食豬肉   話哂健康啲 ~   

Sambal 炒青豆角 - 自從上次喺馬來西亞食完 Sambal 青豆角炒飯之後   我念念不忘呀   所以今晚我行完一轉街市   已經出咗街市都再番轉頭買青豆角呀   $5 份抵食啦   我人生第一次煮呢啲青豆角   估唔到又比我想像中煮得好食呀   好爽脆呀   感恩感恩 ~

洗哂嘢再沖完涼都差唔多 9 點幾   條腸好痛呀   睇多陣電視   10 點 10 分頂唔順要瞓覺喇   我覺得好早瞓咁呀   哈哈 ~

青木瓜花生眉豆雞腳豬骨湯 ( 29-JUL-2012 )

( 29-JUL-2012  SUN )

今朝瞓到 10 點半   原來里奧大人唔記得拎電話入房   所以無響到鬧鐘   咁都番唔切教會 lu ~  

食完早餐   番屋企沖完涼就準備入大埔探 2 姑奶喇   打比佢約時間   佢叫我哋休息下   唔駛特登嚟探佢   其實我有好多家務未做   真係唔想出街   不過之前諗咗探就想探囉   唔會佢話唔好探   就比籍口自己唔探   有心做點都會做   我入到去   佢唔通趕我出去咩   咁我即問里奧大人想唔想探先   佢話想   因為下星期日又未必得閒   咁我話想就探囉   反正都預咗今日探嘛 ~

今日酷熱天氣呀   但見到藍天白雲真係好開心呢 ~ 

去到大埔墟買下嘢   我特登去番凍肉舖睇燒烤蜜糖幾錢   居然係 $11 咋   即買呀   里奧大人話屋企有蜜糖   點解唔用嗰啲   我話黐線啦   用幾百蚊嘅蜜糖整雞翼   唔係咁豪呀嘛   真係呢 ~ 

食埋豆腐花再買枝豆漿   買埋車厘子就去 2 姑奶屋企喇   去到 1 點   坐到 3 點就走喇   因為要趕住番屋企煲湯呀 ~

出到市中心都 3 點半   食埋 Tea 再買埋餸   又買咗 4 磅車厘子同 2 磅龍眼   買下買下都買咗 9 袋嘢   喺時候走喇   因為拎唔到   之後里奧大人話唔好煮餸同煮飯   因為就咁飲湯食湯渣已經夠飽   咁仲好   唔駛煮 ~

番到屋企即煲湯   之後沖涼   開機洗衫再熨衫   里奧大人沖完涼就瞓半個鐘   爽啦 ~     

是日懶餐 - 青木瓜花生眉豆雞腳豬骨湯

青木瓜花生眉豆雞腳豬骨湯 - 青木瓜係家姐屋企附近啲鄰居種㗎   所以比個我試下煲湯囉   媽咪就幫我買埋雞腳   我就咁買花生眉頭豬骨就搞掂 ~ 

食完飯洗埋嘢就去 OTO 買嘢   好感恩有 Discount 之餘再減 $200 呢 ~    

買完里奧大人拎番屋企   Set 好哂就出發去跑步喇   我唔去喇   好鬼攰   所以即沖涼 ~

呢年好多時腰骨都好痛   照過 X-Ray 又無事   兩個中醫就話做完婦科手術會咁   慢慢會無咁痛喎   希望快啲唔痛啦 ~ 

文記傳統車仔麵茶餐廳 @ 九龍灣 ( 28-JUL-2012 )

炸餃子 / 炸魚蛋


腸粉 ($7/3 條) / 牛腩 / 生菜 / 幼麵

( 28-JUL-2012  SAT )

今朝瞓到 8 點先起身   早餐食餐蛋治   星期六食咩都特別開心咁喎 ~ 

番到菇場有嘢做添   不過咁都好   時間過得超快 ~

放工即走   番到屋企坐一陣   之後家姐打嚟   叫我哋一齊去 :CHOCOLATE 買衫   之後趕到我腸又痛   仲標埋冷汗   口唇都白埋呀   睇嚟真係要減肥喇 ~

今次反而里奧大人有收穫   買到 4 件 Tee   真係次次無諗住買反而有收穫 ~

之後一齊去 Delifrance 食 Tea    食完就各自番屋企 lu ~

雜菜湯 / 歐陸沙律 / 鮮蝦扁意粉 / 煙三文魚雜菜扁意粉 / 迷你雪糖酥伴蛋糕 (配芒果醬) / 凍 Cafe Latte / 凍 Cafe Vanilla

4 點半番到屋企   玩 Line 又 Hea 下   6 點就出發喇   去文記食車仔麵同炸魚蛋就去睇戲喇 ~

今晚睇 "Batman 3"   我同里奧大人講一定要食爆谷   正想去買爆谷嘅時候   突然有人叫我   我好驚呀   即刻好大力捉住里奧大人隻手   佢比我嚇到唔知咩事呀   估唔到係 CC 叫我   好開心呀   估唔到會見到佢哋兩公婆   之後佢哋食唔哂 2 份爆谷   比咗 1 份我哋   無啦啦有免費爆谷同汽水   真係好感恩呀 ~

佢哋坐我哋後兩行   睇完一齊走   可惜佢哋約咗朋友   唔係一齊食飯   行到德福就分手喇   之後里奧大人講話見到熟朋友   感覺真係好唔同   唔需要刻意搵嘢講   呢啲感覺最舒服呢 ~

我食完爆谷仲好飽   所以唔想食嘢   里奧大人就去麥記買咗個豬柳蛋漢堡當晚餐算數 ~  

住家飯 @ 媽咪屋企 ( 27-JUL-2012 )

蟹柳炒蛋


節瓜蝦米

蠔油雞翼

果皮蒸泥猛

黃皮 / 石硤龍眼

( 27-JUL-2012  FRI )

Happy Friday 喇   不過唔落雨更 Happy   今朝終於忍唔住帶長身遮   因為縮骨遮實在好唔方便   最憎收遮整到隻手都濕哂 ~

今朝等車見到之前比我水草個阿姐   所以一齊坐啦   之後佢問我係咪食早餐   我話係咪一齊呀   佢話係   所以一齊食喇 ~

我唔影相喇   佢雖然都會手機影食物相   但我拎相機出嚟影就可能覺得我謗張   哈哈   又唔係啲咩特別食物嘛 ~

食完一齊番工添呀   同一座 Building   不過唔同樓層   感覺好得意呀 ~

菇場靜啦   出面又天陰陰   個人都覺得特別凍啲咁呀 ~  

Lunch Time 食穀麥片 + 維他奶   再加個茶粿   夠哂飽 ~

里奧大人今日上大陸   話應該好夜先放工   所以我 5 點先決定番媽咪屋企食飯   但就唔講比媽咪知   唔想佢又特登買嘢番嚟煮呀 ~

之後打去問家姐   叫佢打番屋企問有咩餸   佢好快做嘢   之後同我講番   話同媽咪係咁講好肚餓好肚餓   雞翼明明 5 隻就變 10 隻   嚇傻媽咪啦   又係喎   一加就加多 5 隻   唔係餓成咁呀嘛   之後媽咪即叫工人加啦   再叫家姐同工人講煮啲咩   咁家姐就話因為我番嚟食   所以煮多噂餸   但就唔好話比媽咪知   所以蟹柳明明 2 條變半包   雞蛋 2 隻變 4 隻   蒸魚明明 4 條變 8 條   樣樣 Double 呀 ~

去到媽咪屋企   我開門媽咪都唔知呀   之後望到我好愕然呀  ~

其實我今晚都唔想番㗎   因為屋企好多嘢未做   但家姐又問我番唔番   阿表又叫我番   咁我番啦   見屋企人都好緊要嘅   咁家務唯有遲啲做啦 ~

今晚無煲湯呀   媽咪問要唔要粟米湯   我話唔要呀   我好怕飽到上喉嚨感覺   所以今晚飽得好舒服呀 ~

差唔多 8 點半就同家姐一齊走   我番到屋企即開機洗衫   再抹廁所   雖然好鬼攰唔想抹   但抹完乾乾淨淨又覺得好鬼開心   之後沖涼再熨衫 ~ 

里奧大人 10 點半先番到屋企   傾下偈   等佢沖完涼睇陣電視就瞓 lu ~

住家飯 @ 媽咪屋企 ( 26-JUL-2012 )

美極煎蝦碌

蒸斑

炒白菜

青木瓜沙律

炸乳鴿 (外賣)

黨參生魚湯

車厘子
山竹 - 我覺得拻哂出嚟嘅山竹好肉酸   下次都係自己食自己拻好啲

炸腰果

( 26-JUL-2012  THI )

又落雨   落咗差唔多一星期   真係唔太好啦 ~  

早餐食米粉餐   差唔多 8 點 40 分 8 卦又嚟埋   傾下傾下又要番菇場 lu ~

我覺得次次落雨天   菇場都特別凍咁架   特別係對腳   可能又着涼鞋   所以凍上加凍呢 ~

lunch 去九龍灣買戲飛呀   因為今晚番媽咪屋企食飯   同埋我驚放工之後無哂靚位呀   所以先特登去買   好感恩買到靚位呀 ~

之後去泰昌買茶粿同白糖糕就走喇   番到菇場附近就入埋票   正呀   做哂要做嘅嘢 ~

放工即走   里奧大人今日無上大陸   不過我都照去媽咪屋企食飯   反正佢都夜放工 ~

食到好鬼飽   抖陣又要食生果   傾下傾下都差唔多 9 點   同家姐一齊走喇 ~

估唔到里奧大人 8 點放工   佢自己食完米線就番屋企   仲早番過我   不過咁都好   話哂叫早收工嘛   可以早啲休息 ~

蕃茄洋蔥燜牛展 + 通菜 + 辛辣麵 ( 25-JUL-2012 )

( 25-JUL-2012  WED )

尋晚瞓得唔好   所以今朝瞓到 7 點 55 分先起身   精神好多呢 ~

得番 15 分鐘食早餐咋   所以食奶油多算數   唔駛咬咁耐 ~

菇場無嘢做   阿 Head 又 Off   無人管真係唔錯唔錯 ~

今日食番前日嘅 Lunch Box   好在無壞 ~  

放工即走   諗住去百佳買蛋糕比里奧大人   順便買埋豬扒   居然咩豬都無喎   但尋晚買咗蕃茄洋蔥   所以點都要整囉   行咗好耐先諗到用嚟煮牛展   是但啦   因為真係諗唔到煮咩 ~

番屋企預備晚餐之後就拖地   抖陣就煮嘢   7 點半自己開餐   里奧大人打黎話放工   如果早 15 分鐘打黎就好啦   我可以等埋一齊食嘛 ~

是日懶餐 - 蕃茄洋蔥燜牛展 + 通菜 + 辛辣麵

蕃茄洋蔥燜牛展 - 第 1 次整牛展   求其煮咋   煮完汁再落鑊燜一陣   不過又好味喎   話哂無肥牛咁肥   又無肥牛咁貴   下次再試下整滷水牛展先 ~

通菜 - 食剩半斤   煮埋佢喇   放喺辛辣麵湯底   索哂啲湯   正到爆呀 ~

辛辣麵 - 其實煮蕃茄汁應該送飯   不過我實在太想食辛辣麵喇   所以唔食唔得 ~

等埋里奧大人食完   洗埋碗就沖涼   好感恩里奧大人唔駛做公司嘢   一齊睇下電視真係好開心呢 ~ 

煎鯪魚餅 + 通菜 + Sambal 辣吞拿魚崧子炒飯 ( 24-JUL-2012 )

( 24-JUL-2012  TUE )

瞓得勁差呀   啲風聲雨聲超嘈   真係好似無瞓過咁 ~

7 點 25 分鬧鐘響   即開電視   都仲係 8 號風球   即係可能放半日   所以繼續瞓   之後媽咪 8 點幾打嚟話 10 點前後會改發 3 號風球   咁即係要番工啦   不過仍然可以瞓多個幾鐘   其實瞓得都唔好架   因為始終未知確實時間落波   咁瞓好有壓力架 ~

10 點起身   再認真睇新聞   原來 00:45am 改發 10 號颶風訊號呀   之後 3:45am 再改發 8 號風球   呢個風真係超級勁呀  之後 10 點 10 分改發 3 號 lu   要 2 個鐘頭內回到菇場   所以即梳洗再出發食早餐喇 ~

今次明明話個風打唔成   估唔到突然吹歪咗   即改發 8 號風球   又令到我諗番起自己出發去吉隆坡果日   諗住打到正一正   後尾個 8 號風球掛咗幾個鐘就落波   令我當下切實感到神嘅保守帶領呢   感恩感恩 ~

食完番上屋企即沖涼就出門口 lu   好感恩啱啱有車   所以差唔多 12 點就番到菇場喇 ~

11 點幾食完早餐   12 點半根本食唔落 Lunch   所以 Lunch Time 落去買杯珍珠奶茶   有嘢咬下   都應該可以頂到放工呢 ~

放工即走喇   去街市買餸   估唔到無豬肉買喎   好在魚檔有開   即轉去買鯪魚肉呀 ~

番到屋企預備晚餐   之後開機洗衫   抖陣就煮飯 lu   今晚自己食先   食完就沖涼再熨衫   好攰呀 ~

里奧大人 8 點收工   8 點 45 分番到屋企   食完就睇下電視   今晚居然唔駛做公司嘢   實在太好喇 ~

是日晚餐 - 煎鯪魚餅 + 通菜 + Sambal 辣吞拿魚菘子炒飯

煎鯪魚餅 - 買咗半斤鯪魚肉 ($14)   買完之後見到有人買 $7   我以為最少買半斤添   我食鯪魚餅最鍾意蘸泰式甜辣醬一齊食   所以煎鯪魚餅都幾方便 ~

通菜 - 本來想炒㗎   不過又煎魚飯又炒飯   所以改為灼   其實係因為懶   點腐乳醬食算數 ~

Sambal 辣吞拿魚菘子炒飯 - 加咗菘子   口感又唔同哂   正呀 ~

麥芽糖焗雞翼 + Sambal 辣吞拿魚炒飯 + 素翅粟米蛋花湯 ( 23-JUL-2012 )

下次都係唔好咁懶   唔用片糖做糖水   冰糖水賣相唔掂呀   哈哈

( 23-JUL-2012  MON )

星期一喇   今朝 3 號風球   好在無乜雨   唔係就煩啦   感恩感恩 ~

早餐食餐蛋治   食咗一半已經好飽   所以留番一半 Lunch 食 ~

菇場靜呀   有啲想瞓添呀   所以覺得好耐先等到 Lunch Time ~

食完餐蛋治就上網睇嘢   好快又開工啦   又即係有排先等到放工 ~

上網睇到天文台話黃昏前後考慮改發 8 號風球   之後就話 5 點前後會考慮改發 8 號風球   又話打唔成   無啦啦吹歪咗   所以要改掛 8 號   差唔多 3 點半左右   Admin 就 MSN 通知大家 4 點半可以收工   咁即係好快掛 8 號啦 ~

我諗住有咩車就上   但去到車站明明有車   我都無上   之後幾架都爆   等咗 10 分鐘先有車 ~

諗住去惠康無咩人買嘢   其實真係唔多人行   不過原來都要排隊等比錢   番到屋企都 5 點半 lu ~

打比里奧大人問佢走未   佢就邪啦   明明今朝喺香港   不過番到 Office 就有 Urgent 嘢比大陸   所以順便喺大陸 Office 做嘢   咁所以佢哋要等香港 HR 通知先可以走   都黐鬼線   好多公司都放人走啦   5 點半未放人   仲要喺大陸喎   真係離哂大譜 ~

之後我 5 點 50 分開電視   原來 5 點 40 分已經掛咗 8 號   即打比里奧大人   叫佢即番屋企呀   佢話 HR 都仲未有人通知   不過佢都照走   無車番屋企點算先 ~

本來想就咁炒飯同粟米湯   不過見有時間   所以都整埋雞翼喇 ~  

里奧大人 8 點番到屋企   好感恩可以車程順利仲有位坐   同埋無落雨   仍都好感恩今晚可以同佢一齊食飯呀   因為真係無咩幾何呢 ~

是日晚餐 - 麥芽糖焗雞翼 + Sambal 辣吞拿魚炒飯 + 素翅粟米蛋花湯 + 芝麻湯丸

麥芽糖焗雞翼 - 好有心機焗㗎   好開心里奧大人可以即時食   佢好鍾意食   話好好味   所以我都好開心   因為佢食嘢好鬼麻煩嘛 ~ 

Sambal 辣吞拿魚炒飯 - 前晚叫外賣剩咗碗白飯   所以炒飯最好   好在同時間都煲好飯   因為一罐 Sambal 吞拿魚用嚟炒一碗飯   係醬多過飯   所以要加多大半碗飯一齊炒先得呀   但都用剩 1/3 醬   留番聽日再炒先 ~

素翅粟米蛋花湯 - 無買菜   就會出現粟米湯   正呀 ~ 

芝麻湯丸 - 無啦啦好想食   所以即淥呀   利川湯丸算唔錯㗎喇   但覺得以前啲皮就煙韌啲   不過算啦   唔駛自己搓有得食已經好好呢 ~

沖完涼就 Line   又睇下電視咁   睇到天文台將會考慮發更高信號   呢個 "韋森特" 風力都好驚人呀   真係唔好講笑   我坐喺屋企都覺得間屋啲窗會比佢扯走   同埋我覺得啲風聲好恐怖呀   好似鬼叫咁 ~

11 點 20 分改發 9 號風球   犀利呀   短時間咁大改變   聽日應該唔駛番工啩 ~

日月星茶餐廳 (外賣) ( 22-JUL-2012 )

黑椒牛仔骨

蒜蓉炒菜心

( 22-JUL-2012  SUN )

個肚仲有 d 唔舒服添   所以瞓到 11 點半先起身   可以煮到早餐同食到   感恩感恩 ~

食完即抖喇   估唔到里奧大人主動洗碗再熨衫   佢知我唔舒服   又難得唔駛做公司嘢   所以幫下我手呢 ~

之後一齊睇電視   差唔多 3 點   里奧大人話餓   我又唔太餓   所以佢話去麥記買個超級至尊番屋企 Share 食呢 ~

之後佢瞓咗陣   我就睇電視   無咩嘢做嘛 ~

差唔多 6 點半就叫外賣   真係好唔想落街呢 ~

食完里奧大就自己出去行下當做運動   我就睇電視   睇埋 "飛虎" 都差唔多 11 點 45 分先瞓   如果早啲做就好啦   咁唔駛咁夜瞓 ~

日月星茶餐廳 (外賣) ( 21-JUL-2012 )

京都豬扒

涼瓜牛肉

( 21-JUL-2012  SAT )

難得 Off   不過我瞓到 1 點幾先起身呀   里奧大人就 11 點幾起咗身   之後自己買包食再去銀行 ~

我個肚仲有啲唔舒服   所以喺屋企休息   好感恩都有胃口食嘢   所以叫里奧大人去即去大快活買 Tea 番屋企一齊食呀 ~

之後一齊睇之前錄咗嘅 Supernatural   再睇番啲廣告   原來已經係上年聖誕節嘅事 lu ~

6 點開始餓喇   所以即刻叫外賣   6 點半即開餐   好感恩又有胃口食嘢呢 ~

食完又睇電視   今日好難得里奧大人唔駛做公司嘢   佢又開胃   又飲啤酒食花生好 Relax 咁   我見到佢咁   我都好開心呀 ~

Food Court @ Piago (九龍灣) + ( 19-JUL-2012 ) + ( 20-JUL-2012 )

( 19-JUL-2012 THU  )

星期四 lu   仍然咁攰   真係要早啲瞓覺先得喇 ~

早餐食腿蛋治   好唔想食蛋   但唔知食咩好 ~

Lunch Box 又係蕃茄意粉   同事同我講話好似見我兩日都係蕃茄意   我話係㗎   分兩日先食得哂   佢個樣好愕然呀   因為佢 Lunch Box 係每朝早整   我真係好佩服佢   我一定唔會朝早整囉   瞓多陣好過 ~

Hea 到放工即走喇   里奧大人今晚要去九龍灣   所以我番屋企坐陣就 Join 埋佢一齊食飯喇 ~

佢呢期好鍾意食 Pepper Lunch 嘅鐵板牛肉飯   之前星期六佢自己食咗   今晚又想食   搞到我都想食 ~

食完行陣超市   買咗 2 Pack 雪條就走人 lu ~

個肚谷住谷住   終於每月一到   個肚又有啲唔舒服   所以 10 點半瞓喇 ~

( 20-JUL-2012 FRI )

諗住番到工   不過瞓得唔好   同埋有啲痛   最大問題係成日嘔   所以都係請病假算喇 ~

瞓到 5 點半就起身   6 點睇醫生   之後番屋企沖涼食藥   諗住睇電視   點知一醒已經 10 點   里奧大人啱啱番到屋企   咁我食咗啲止嘔藥   個人都溫溫燉燉   所以我都入房瞓喇 ~

住家飯 @ 媽咪屋企 ( 18-JUL-2012 )

蒸撻沙

豉椒炒排骨


炒蕃茄


炒菜心

燒鴨 (外賣)
超甜粟米

紅棗百合生魚湯


新鮮杏脯

( 18-JUL-2012  WED )

天陰陰又落雨   不過落咗場雨都好   無咁焗呀 ~

早餐食奶油多   想甜甜地呀 ~

番到菇場做一陣嘢就去 Pack 箱喇   我自己搞掂之後   就同 Partner 講有咩幫手   之後一齊快快手搞掂哂 lu   我覺得佢好開心我咁主動幫佢   其實一場同事應該係咁啦   唔係下下等人叫先幫手囉   咁之前同佢講我搵唔到個 File   佢幫我搵到呀   仲笑住嚟比我   呢一刻我感覺好舒服   因為我不嬲都唔鍾意佢家嘛   經此一役   我覺得其實佢都幾好人   哈哈 ~

Pack 完超熱呀   都唔知原來咁快已經 12 點幾   唔怪得 Pantry 咁多 Lunch Box 排隊去叮啦 ~

抖到放工   今晚番媽咪屋企食飯   其實係今日先講話番   因為里奧大人話聽晚同我食飯   所以想我改今晚番囉 ~  

媽咪本來無唔煲湯   之後又特登煲湯   媽咪話驚我無湯水   其實我係唔多湯水   但都會煲嘛   咁本來話出去食添   媽咪話驚我平時無飯食   所以情願煮飯比我食  唔係呀嘛   我有煮飯㗎喎   佢剩係記得我出街食   唔記得我會煮飯食咁喎 ~

食完飯就一齊食雪糕   飽到震呀   差唔多 9 點就同家姐一齊走喇 ~

里奧大人今晚 9 點已經番到屋企   真係呢   好多時我出街   佢反而會早番屋企   唔通佢真係好 Enjoy 一個人喺屋企 ~

好鬼攰呀   但好想洗衫   所以 9 點 20 分都照開機洗衫   等到 10 點半都未洗完   開始好後悔   所以一晾完衫就即瞓喇 ~

蕃茄蜆肉腸仔意粉 + Sambal 炒莧菜 ( 17-JUL-2012 )

( 17-JUL-2012  TUE )

依家多數 7 點 55 分先起身   瞓多平時半個鐘都幾好 ~

早餐食炸菜肉絲熟蛋通粉   好在叫少通粉   唔係又食唔哂㗎喇 ~

番到菇場做陣嘢就要 Pack 箱   Pack 到 11 點半就搞掂咗 1 Part   聽日再 Pack 過 ~

今日又食 Lunch Box   尋晚無食到雞翼   所以覺得唔似食隔夜嘢呢 ~

放工即走   番到屋企即預備晚餐   最唔鍾意浸菜   因為起碼要半個鐘   我覺得好耐咁呀 ~  

今晚自己食先   所以煮完就拖地   再沖埋涼先食   咁樣舒服好多呢 ~

是日晚餐 - 蕃茄蜆肉腸仔意粉 + Sambal 炒莧菜

蕃茄蜆肉腸仔意粉 - 星期日喺街市見到車厘茄 $8 磅咋   所以買咗 $10   又順便清埋半包蜆肉   依家好想快啲清哂雪櫃所有嘢呀 ~

Sambal 炒莧菜 - $9 / 2 份   一份仲鬼咁大份   所以分兩日食   但無理由又食鹹蛋莧菜嘛   所以試下用 Sambal 嚟炒   估唔到又夾喎   我覺得好似食緊蕃薯苗   唔通今次啲莧菜好爽脆   定係唔熟呢 ~

家姐今晚拎嘢去我屋企   我問佢食唔食馬來西亞買番嚟嘅零食   佢話咩都食   唔知以為佢無食飯   但其實佢食完飯先嚟   所以叫佢自己開櫃搵嚟食   食完花生又食 Twister   再食朱古力威化餅   仲飲埋汽水   搞到我又一齊食一齊飲   飽到呢   佢走之後   我要即刻熨衫當做運動呀 ~

里奧大人差唔多 10 點幾先番到嚟   所以佢食完   我都幫佢洗碗   唔駛佢咁辛苦   之後佢又做一陣公司嘢   我就入房瞓先   之後佢再睇陣電視就瞓 lu ~ 

麥芽糖焗雞翼 + 鹹蛋莧菜 ( 16-JUL-2012 )

( 16-JUL-2012  MON )

星期一喇   都 OK 精神啦 ~

早餐食三文治餐   開始又覺得悶   但又唔知食咩好 ~

菇場靜到咩咁   後面個同事又無番   所以今日盡情上網 Load 相 ~  

有 Lunch Box 呀   依家盡量帶 Lunch box   要慳錢   同埋天氣又熱   又成日話落雨   我都唔想出街買嘢食   一出一入   溫差相距又大喎   好容易病   好驚啦 ~

放工即走   番到屋企預備晚餐   飲埋尋晚啲湯再拖地   之後煮飯   差唔多 8 點先搞掂   熱鬼到呢   係咁流汗   所以沖完涼先再食飯呀 ~

是日懶餐 - 麥芽糖焗雞翼 + 鹹蛋莧菜

麥芽糖焗雞翼 - 其實不嬲用開燒烤蜜糖架   但實在貴到離哂大譜   我記得 3 年前喺凍肉舖係買 $8/樽   依家要 $16/樽   我知依家咩都貴哂   但唔係貴一個 double 嘛   所以我依家無必要真係唔買架喇   又唔係成日用   咁我用麥芽糖仲好   食唔哂用黎夾餅乾當零食   但燒烤蜜糖唔可以就咁食嘛   唔食真係用嚟擺咋 ~

鹹蛋莧菜 - 諗住整金銀蛋   不過屋企無皮蛋   我又唔想去街市   所以就咁用鹹蛋算喇 ~

里奧大人差唔多 9 點就番到屋企   食完再做公司嘢   我頭先出得太多汗   好攰呀   唔熨衫喇   留番聽晚熨   真係唔想咁辛苦呀 ~ 

茄汁蝦 + 馬拉盞叉燒炒飯 + 青紅蘿蔔粟米豬骨湯 ( 15-JUL-2012 )

( 15-JUL-2012  SUN )

想比自己瞓多啲   所以又無番主日學同教會喇 ~  

食完早餐   我就去買餸   里奧大人就番屋企做公司嘢 ~

番到屋企抹埋廚房   覺得好有新年大掃除 Feel 呀   之後就抹櫃抹書房   出哂汗呀   沖完涼就抖喇 lu ~

差唔多 3 點先食 Tea   其實我唔餓   不過唔想太遲食晚飯   但里奧大人唔食 Tea 又餓   所以最後決定食米線喇 ~

咁啱想買喼   咁啱銀行有 Roadshow   所以即申請呀   搞掂哂   番到屋企都已經 4 點   要預備煲湯啦 ~  

是日晚餐 - 茄汁蝦 + 馬拉盞叉燒炒飯 + 青紅蘿蔔粟米豬骨湯

茄汁蝦 - 尋晚見到又有 $20 份嘅蝦   所以買定   數下都有 11 隻都抵呀   今次無問里奧大人要唔要辣   直接加埋指天椒去整汁   里奧大人話好味呀   話呢兩晚嘅餸好有驚喜   我都話好難想像魚同蝦會喺自己晚餐出現 ~

馬拉盞叉燒炒飯 - 馬拉盞炒飯醬料喺馬來西亞買架   想快啲清哂   唔係又驚過期   本來想就咁炒   但覺得好單調   所以加埋叉燒   咁樣里奧大人就會食多啲 ~ 

青紅蘿蔔粟米豬骨湯 - 2 條紅蘿蔔 + 1 條青蘿蔔 + 3 條粟米 + $30 豬骨 + 南杏 + 蜜棗   好清甜呀   我都覺得自己好似 N 年無煲過湯咁 ~

里奧大人 9 點半出去跑步   我唔跑啦   今日已經做咗好多嘢   只想快啲沖涼休息 ~

蒸黃花魚 + 節瓜青根魚湯 ( 14-JUL-2012 )

( 14-JUL-2012  SAT )

星期六啦   好開心呀   因為可以 8 點 10 分先起身 ~  

今朝食吞拿魚火腿三文治烘底   薄切切咁   好在都夠飽 ~

坐喺後面個同事無番   所以我係咁 Load 相   雖然阿 Head Off   但有人喺後面真係好唔方便呢 ~

放工即走喇   同媽咪飲茶   家姐之後又黎埋   好開心呀 ~

酥炸鯪魚球 / /蝦春卷 / 家鄉炒米粉 / 潮州粉果 / 炸 BB 鴿 / 南乳燜豬手 / 素翅灌湯餃

飲到 3 點半就走喇   同家姐一齊去拎平安手機去整   之後一齊去萬寧買嘢   再去埋海天堂買龜苓膏就各自歸家 lu ~

咁都 5 點 lu   我買埋餸就即番屋企   好攰呀 ~

抖一陣就預備晚餐   今晚陪姑奶買手機   佢差唔多 7 點就嚟   所以一齊食飯喇 ~

是日晚餐 - 蒸黃花魚 + 節瓜青根魚湯

蒸黃花魚 - $35/份   有 2 條   姑奶話條魚好新鮮呀   我話唔知呀   佢話如果魚腮係鮮紅就係新鮮   又係喎   因為我問賣魚婆條魚靚唔靚   佢比我睇個魚腮又真係好紅噃   好開心今次買到靚魚呀   可惜我都係蒸完唔想食   我真係好怕整完條魚再食番呢   好在里奧大人好鍾意食   因為佢不嬲都鍾意食黃花魚   但我以為係新鮮我就唔敢買啦   咁尋晚媽咪話唔會係新鮮跳嗰啲   我就敢買喇 ~

節瓜青根魚湯 - 想買紅衫魚   居然要 $30 份   我覺得用嚟調味就好貴喇   所以轉買青根   都係 $20 份   好在尋晚又問媽咪仲有咩魚可以滾湯   唔係我要買貴魚 ~

食完洗完就一齊去買電話喇   之後我同里奧大人去萬寧買嘢   再行多陣就番屋企 lu ~

康和車仔麵茶餐廳 @ 官塘 ( 13-JUL-2012 )

炸蟹籽丸 / 蘿蔔 / 螺肉 / 雞翼尖 / 粗麵


墨魚條 / 豬紅 / 魷魚 / 麻辣豬耳 / 粗麵

( 13-JUL-2012  FRI )

今朝又瞓到 7 點 45 分先起身   都 OK 精神咁啦 ~

其實唔餓   但又想食沙爹牛肉腸仔米粉囉   不過覺得今次好似好多米粉咁 ~

菇場淡季   基本上無咩嘢做   好在唔駛妳眼望我眼   唔係就慘 ~

仲係好飽   所以去 Post Office 寄信   再行一陣就買個墨西哥包同芝士包番菇場食   估唔到無餡嘅包都可以咁鬼飽   之得買一個啦 ~

媽咪手機壞咗   咁里奧大人又上咗大陸無咁早番   所以我上媽咪屋企拎部手機   咁聽日可以即刻拎去整   喺媽咪屋企呢   成日會問我食唔食嘢   真係大大話話問咗差唔多 10 次   之後佢哋蒸粟米   我就食咗 1 條   最鍾意食一大條嘅粟米呢   成條拎住嚟食好滿足 ~

坐到 8 點就走 lu   因為約咗家姐食車仔麵呀 ~

之前食嘅辣汁非常之惹味   又辣   點知今次食完全唔同哂味道   同埋裝修咗   可能已經轉埋師傅都未定   無理由會唔同味道家嘛   所以好失望 ~

經過魚蛋檔   聞到啲辣汁好鬼正   所以又每人一串喇   飽到反肚 ~

同家姐再行超市   之後同家姐特登買夠 $140   咁將 2 個印花比門口個男人   家姐成日話佢好慘   話上次之前有十幾個印花想比佢   不過兩次都見唔到佢   所以家姐自己換咗隻碗   因為 Dead Line 唔換就無嘛   咁今次比 2 個佢   了咗心事啦   最多再有多先比佢   因為我依家都好少一個人去超市買到 $60 喇 ~

買完各自歸家   之後打比里奧大人   同事約佢喺上水打邊爐   都好   傾下偈都唔錯 ~

番到屋企即沖涼   本來諗住抖下   但都係忍唔住   熨埋兩機衫   攰到呢 ~

里奧大人差唔多 12 點半先番到嚟   陪佢傾下偈   差唔多 1 點 15 分先瞓呀   好在聽日番半日   咁都好啲 ~

住家飯 @ 媽咪屋企 ( 12-JUL-2012 )

炒米粉 (魚片 / 火腿 / 韭王 / 蒜芹)

牛脷酥 / 油炸鬼 / 煎堆

皮蛋豬潤肉丸鯇魚片粥

泰式酸辣無骨鳳爪 - 家姐同事整嘅   不過毫無酸味可言   好似食緊泰式雞醬鳳爪咁

( 12-JUL-2012  THU )

今朝 8 點先起身   但一樣好攰噃 ~

過馬路 8 卦企喺我隔離   又一齊食早餐啦   佢食米粉餐   我食三文治餐   但我食咗一件三文治   佢已經食完個米粉餐   我又要快啲食   所以好驚同佢同步食嘢   都唔知點解佢可以食嘢快成咁 ~

菇場靜   搞到我好想瞓覺添 ~

Lunch 食埋剩咗果 3 塊排包   加一包麥精   之後瞓咗半個鐘呀   不過可以再瞓就更好啦 ~

里奧大人上咗大陸   我又番媽咪屋企食飯喇   今晚食粥   家姐想食油炸鬼   所以我喺菇場附近買完先番媽咪屋企喇 ~

食下傾下   又睇下電視   差唔多 9 點同家姐一齊走喇 ~

里奧大人就差唔多 10 點半先番到屋企   佢明明話食埋先番屋企   但佢話果陣無咩胃口   所以番嚟煮麵   我話我唔煮架   佢食麵又要食餸   想開豆豉鯪魚   我話有五香肉丁   不過係福字牌   但佢話無水仙牌咁好味喎   我睇下個樣又真係無咁吸引嘅   無計啦   我話要平嘛   佢問我平幾多   我話平幾 5 蚊㗎   福字牌都要 $10.9 啦   但下次都係買番水仙牌算喇 ~

白菜豬肉餃米粉 ( 11-JUL-2012 )

( 11-JUL-2012  WED )

今朝 8 點 15 分先起身   其實真係勁攰勁唔想番工囉 ~

早餐諗住食粉果   不過啱啱先蒸   9 點喇   唔等啦   所以轉食腸粉算喇 ~

菇場無嘢做最好啦   可以抖下   今次攰到連上網都唔想上呀 ~

Lunch Time 諗住瞓   但又瞓唔到   食咗塊 "美心排包至尊"   唔係食藥真係唔想食嘢   不過今次美心嘅排包好有驚喜   因為好香牛油味   我已經病到無咩味雷都覺得好香牛油味喎 ~

放工即走   好耐無搭小巴   同埋食完藥個人又呆呆滯滯   嘟多咗錢添   激氣 ~

里奧大人晏晝有 Urgent 嘢所以上大陸   咁我又唔想出街食   所以都係煮米粉食算喇 ~

是日懶餐 - 白菜豬肉餃米粉

白菜豬肉餃米粉 - 本來想食腸仔   不過未開   都懶得開   所以淥一粒水餃   都係韭菜豬肉餃好味 d   今次淥咗 2 個米粉再加多半碗什豆   食到 2/3 已經好飽   要抖陣再食過 ~ 

食到咁飽   所以拖地幫助消化   之後沖完涼就休息喇 ~  

里奧大人差唔多 10 點先放工   番到屋企見我唔開冷氣覺得好奇怪呀   真係好唔舒服先唔開呢   因為我超級怕熱嘛   見佢拎住個麥記紙袋   幾驚佢又食餐呀   我真係幫唔到佢食薯條呢   好在佢食至尊   佢食完又做公司嘢   不過我唔陪佢喇   好鬼攰   要入房瞓喇 ~   

源發潮州粉麵 @ 九龍灣 ( 10-JUL-2012 )

( 10-JUL-2012  TUE )

今朝真係唔掂呀   9 點即刻打番菇場請病假   里奧大人又唔舒服   佢都話要抖半日呢 ~

我食埋藥就瞓喇   12 點幾醒咗   里奧大人話仲係唔舒服   所以晏晝都唔番喇   落街睇醫生   我就等到 1 點半食藥   之後又瞓喇 ~

5 點半又食藥   之後又瞓   今次好感恩瞓到差唔多食藥時間就醒呢 ~

7 點幾要食嘢   我只想食粥   不過海皇真係好難食   我話唔食都得   但里奧大人一定要我食   終於比我諗到源發有蠔仔粥食   好開心呀 ~

食飽粥真係無咁攰咁喎   買埋木瓜就番屋企喇   因為仲係有啲攰呢 ~

抖多陣就沖涼洗頭   睇陣電視   食埋藥   9 點半就一齊入房瞓喇 ~

大快活 @ 九龍灣 ( 8-JUL-2012 ) + ( 9-JUL-2012 )

( 8-JUL-2012  SUN )

今朝無留教會   所以瞓到 10 點半先起身   梳洗完就出去食早餐   食完就番屋企 lu ~ 

其實諗住休息   不過又瞓唔到   所以熨埋兩機衫   之後沖涼   好醒神呀 ~

去完旅行之後   真係好唔想食嘢   一講食都真係驚驚地   但里奧大人又無問題喎   所以我次次都話唔好預我食太多   今次食半碗墨丸河已經超飽   里奧大人好愕然啦   喺佢心目中   我係大食又無力嘛   哈哈 ~

本來諗住買餸   但都係唔好煮喇   攰攰地   無心機煮   煮出嚟都唔想食   休息吧啦 ~

喺屋企玩 Line 又睇下電視   好快就 7 點幾   要食嘢喇   今次我話去大快活食飯   因為想食蒜撈飯呀   感冒食蒜會好啲嘛 ~

( 9-JUL-2012  MON )

今朝起身完全 OK 喎   無流鼻水又無咳   點知一去到茶餐廳就嚟料 ~

都要番菇場喇   幾咁辛苦   幾難先等到 Lunch Time   點知食完個 Lunch Box 仲衰   好想嘔呀 ~

沾寒又沾凍   唔方好嘢   放工即走去睇醫生喇   感冒同少少發燒   但聲都變埋   醫生話啲痰困住喉嚨喎   佢好少主動講嘢   佢都講咗句好辛苦先等到放工 ~

番到屋企即沖涼   開陣冷氣要熄喇   家姐 Send SMS 問我點   我話無胃口同無開冷氣   佢都話肯定我病呀   如果唔係唔會唔開冷氣囉 ~

我無食嘢呀   咬咗啖包就食藥   等埋里奧大人番嚟就即入房瞓覺   佢話佢都病   不過我都無理佢喇   因為我已經好辛苦   要入房瞓喇 ~

明輝茶餐廳 @ 九龍灣 ( 7-JUL-2012 )

( 7-JUL-2012  SAT )

今朝 8 點 10 分起身   幫菇場 Shopping 完先食早餐   差唔多 10 點先番到菇場   唔錯唔錯 ~  

又流鼻水又頭重重   好想番屋企休息呀 ~

放工即走   番到屋企瞓咗陣先出去食 Tea ~

食完又瞓   4 點半瞓到 7 點半   唔係里奧大人開門   我可以繼續瞓 ~

里奧大人想食晚餐   不過我話我食得唔多   所以去茶餐廳食粉麵   最緊要唔好太飽   食完再去生果舖買木瓜   因為里奧大人深信我食咗木瓜   抵抗力好啲   會快啲好番呢 ~

番到屋企即 Whatsapp 業主 Confirm 續租   了咗心事就最好   可以安心咁瞓喇 ~

住家飯 @ 媽咪屋企 ( 6-JUL-2012 )

薑蔥炒蜆

釀尖椒

茄汁蝦碌

炒油麥菜

青紅蘿蔔牛骨湯

貓山王出現喺媽咪屋企   感覺都好得意下   好開心佢哋非常之鍾意食   之後我問佢同泰國榴槤相比   味道如何 ?!  佢地一致地好激動話   同泰榴完全無得比   之前我食完貓山都咁講   佢哋覺得我誇大   依家真係知道我點解咁講啦

( 6-JUL-2012  FRI )

Happy Friday   心情仍然處於極度興奮狀態呢 ~

早餐仍然無胃口  一件奶醬多要分為早午餐呢 ~

番到菇場居然忙到呢   仲諗住 Hea 住過添   不過一諗到阿 Head Off 到 8月中   我 Free 到爆就好開心喇 ~

整呢樣整嗰樣都到 Lunch Time 喇   但無胃口   差唔多 2 點先食塊奶醬多 ~ 

好快就放工喇   里奧大人上咗大陸   我又番媽咪屋企食飯 lu ~

食完飯睇下電視   望個鐘原來已經 9 點半喇   一齊睇電話真係好開心呢   所以啲時間好快過呀 ~

里奧大人差唔多 9 點先喺大陸放工   話好餓   所以頂唔順要喺上水食埋嘢先番屋企   咁仲好啦   唔係番到嚟 11 點咁夜先食   真係咩都食唔落呀 ~

水餃出前一丁 + 粟米蛋花湯 ( 5-JUL-2012 )

 

( 5-JUL-2012  THU )

攰到呢   8 點起身去洗手間   開機洗衫   之後再瞓   瞓到 11 點 50 分呀   我覺得好勁呀   瞓咁耐   唔係聽朝要回復正常   我可以再瞓下 ~

唔餓但要食   而且我唔食里奧大人都要食   好在我去旅行時   家姐買咗魚肉燒賣比我   咁今朝就唔駛出街食喇 ~

食完就執手信啦   又要分配   又要影相   搞咗 1 個幾鐘   之後沖涼   再抖陣就食 Tea 喇 ~

其實我唔餓   不過里奧大人要食   我個 Tea 食咗 1/3 咋   真係好唔想食囉 ~

喉嚨又唔多舒服   又鼻塞   所以我都唔做嘢住喇   要休息休息 ~

4 點諗住拎貓山王去媽咪屋企   點知臨上車前打比媽咪   好在佢話我知壞鎖   等緊人整   唔係上咗車就麻煩喇   之後整完都 5 點   所以我話等家姐放工   我哋喺巴士站交收算喇 ~

3 Kgs 左右嘅貓山王

業主 Whatsapp 話加租   估唔到咁就兩年 lu   呢兩年真係好鬼開心   同屋企人住咁近真係好好   之前住大埔太遠啦   又無人特登煲湯比我哋飲   依家次次去媽咪屋企食完飯都拎湯番屋企   有時媽咪又叫家姐拎比我哋飲   幾咁好呀  ~

8 點幾都未想食   但里奧大人話要食嘢架喇   所以我話煮麵算喇   唔想出街 ~

是日懶餐 - 水餃出前一丁 + 粟米蛋花湯

水餃出前一丁 - 想快啲清埋日丁   唔係會煮蝦子麵囉 ~

粟米蛋花湯 - 我唔食麵   就咁飲粟米湯   飽到上心口 ~ 

手信 from 馬來西亞 & 阿表 2012

即食魚餅 by 阿表 - 阿表家鄉吉蘭丹州出產嘅   KL 都無得買   所以阿表特登買比我   咁阿表爸爸知道後   又特登比咗好多我地   總共 16 包   一個箱仔呀   仲幫我地分配埋   我同里奧大人   媽咪同家姐   每人各 4 包   多謝阿表 & 阿表爸爸 33

Colek 醬 ( Colek 為吉蘭丹州點魚餅醬料 ) by 阿表 - 係都要我點黎食   嘩哈哈哈哈 33  

新鮮 Asam by 阿表 - 之前我見到媽咪食 Asam   所以話比阿表知   估唔到媽咪都會食 Asam   佢又特登喺家鄉買比媽咪食   因為 KL 無得買   同埋家鄉都唔係成日有得買新鮮 Asam   真係好感恩   同埋阿表真係好有心   媽咪都有份   哈哈 33


榴槤白咖啡 by 阿表 - 阿表話呢包咖啡係小寶見到   所以即買比我呀   多謝小寶諗起我   嘩哈哈 33 

Old Town 白咖啡 by 阿表 - 話促銷喎   咋咋啼啼又買嘢比我 33
 

米粉 by 阿表 - 阿表話佢食開呢隻係幼身米粉   所以又買 2 包比我試 33 

辣吞拿魚 by 阿表 - 阿表買咗 2 罐比家姐食   真客氣啦   又買埋比家姐 33   另外兩罐我喺 Tesco 買比自己嘅   因為平過香港 ( RM4.69/罐 )


九鼎香茶王 ( RM39.90 兩盒 ) @ Jusco - 買兩盒送一個隔茶杯   抵呀   同埋茶味都好濃   好飲呢


Twisties ( BBQ Curry & The Big Cheese ) ( RM3.29/包 ) @ Tesco - 最鍾意細細包   雖然一包唔夠喉   但好過大包食唔哂   又或者要夾硬食哂咁辛苦   嘩哈哈

媽咪麵 ( BBQ & 雞肉味 ) ( RM3.29/包 ) @ Tesco - 已經係第 4 次食喇   都一樣咁好味   頭 3 次都係阿表買比我   媽咪麵 = 阿表   所以我覺得媽咪麵好代表馬來西亞   嘩哈哈哈

榴槤餅乾 ( RM2.09 ) @ Tesco - 阿表講咗個口感比我知   所以我想試下 33

Crispy ( 橙味 ) ( RM2.99/包 ) @ Tesco - 我同家姐每人一包   估唔到家姐已經開咗黎食   佢話好好味呀   不過 6 塊太小喎   嘩哈哈哈

BOH 金馬崙茶包 ( RM6.99/包 ) @ Tesco - 我之前無咩點飲   但里奧大人自己已經飲咗半包   咁我今次認真 d 飲   真係好飲   唔澀   正呀   同埋金馬崙嘅茶好出名   所以一定要買  

花生餅乾 ( RM11.79 ) @ Tesco - 為咗個意粉盒先買 @.@

喉糖 ( Honey Lemon & Lime) ( RM1.29/包 ) @ Tesco - 之前香港好似有呢個牌字   但依家好小見   定係我無留意呢

100 plus @ 大炒  - 買咗 4 支咋   驚爆呀   唔敢買咁多   所以依家里奧大人當佢係珍品黎架   無咩必要都唔開黎飲  oh

朱古力威化 ( RM1.79 ) @ Tesco - 睇個樣好味   所以就買喇   家姐食咗啦   話好味呀

Bubble Gum ( RM5.99 ) @ Tesco - 嘩   兒時回憶呀   不過都唔係印水紙黎嘅   但味道同細過食嘅係一樣架   好開心呀

蔬菜鮮味素 ( RM29.9 ) @ Tesco - 阿表話比時煮麵就係落呢 d 調味   所以我都買啦   好過清水煮   嘩哈哈

Seri-AJI 醬料 ( RM0.49/包 ) @ Tesco - 買醬料係去 Tesco 首要目的

Maggie 醬料 ( RM1.00/包 & 1.50/包 ) & Alif 醬料 ( RM1.00/包) @ Tesco - 大包圍買醬料   係因為阿表可以即時話我知邊 d 好味   我就即買     

蜜糖 @ 榴槤果園 Raub - 原來要 RM79   我覺得唔平呀   不過里奧大人話老闆推介   所以幫襯下佢喎

貓山王 @ SS2 超勁感恩同幸運   可以買到貓山王比媽咪同家姐食呀   買咗 3 kg ( RM28/ kg )   番到黎香港完整無缺   太感恩喇   如果無阿表   我都無可能買到貓山王番香港 lu 33



江魚仔 @SS2 ( RM5.0/包) - 想整椰漿飯嘛   因為香港買唔到即食嘅江魚仔   可能有嘅   但我唔知   仍都懶得搵

印度人整嘅炸花生 @ SS2 ( RM5.0 ) - 阿表話好食   我就買啦   同家姐一齊試咗  好脆呀   停唔到口   所以好快食咗 1/3 包 @.@

脆脆 ( 米米 ) @ SS2 ( RM6.00/300g & RM19.00/1 kg ) - 特登去買架   本來買 4 包 300g 就算   不過諗諗下又驚唔夠食   所以再買 1 kg  



海鮮脆 @ SS2 ( RM19.00/1 kg ) - 索性買一包 1 kg   問老闆拎膠袋同紅繩   番到香港自己再分仲方便



兩包已經裝滿一個細喼 @.@