紅菜頭雞絲薯仔沙律 ( 31-AUG-2012 )

( 31-AUG-2012  FRI )

終於又 Happy Friday 喇   早餐食甜嘢開心啲 ~

晏晝叮蝦子麵   食完好鬼熱呀 ~

熱完再涼冷氣真係好爽   加上菇場又靜   令人好想瞓覺囉 ~  

放工去針灸   今次針個肚   等咗好耐   差唔多 8 點先走得 ~  

好餓呀   8 點半番到屋企   第一時間食沙律呀   媽咪整㗎   之後沖完涼再熨衫當做運動 ~  

里奧大人 9 點先喺大陸番黎   所以叫佢喺上水食嘢先   唔係番到屋企又餓到食唔落架喇 ~   

住家飯 @ 媽咪屋企 ( 30-AUG-2012 )

煎鮫魚 (蘸沙律醬)  

白切雞

叉燒 / 燒肉 (外賣)

炒豆角

豆豉炒苦瓜

牛蒡瑤柱粟米紅蘿蔔豬尾骨湯

( 30-AUG-2012  THU )

星期四喇又   一諗到就嚟星期六就最開心呢 ~

今朝食腿蛋治   呢間茶餐廳真係差唔多日日去   其實食到好悶   不過近菇場   所以又唔想轉地方囉 ~

靜呀   靜到真係抖大氣都驚全世界人聽到咁呀   所以我手機要校靜音   唔係一響就會好震撼呢 ~ 

真係好鬼悶   所以 Lunch Time 出去食   再行一陣   入埋票就番菇場喇   好鬼熱呢 ~

里奧大人上大陸   我又老規矩番媽咪屋企食飯喇 ~

今晚同家姐 8 點半走喇   今次又拎埋牛仔骨同雞扒同沙律走   次次都吉袋去 3 袋番 ~

番到屋企無 Mood 做家務   所以睇電視   里奧大人就差唔多 9 點半番到屋企   一齊睇下電視咁啦   不過唔知點解個胃無啦啦好鬼痛   好在里奧大人幫手搓下個胃   之後抖陣真係唔痛呢   感恩感恩 ~

金姆指米線 @ 九龍灣 ( 29-AUG-2012 )

椒鹽魷魚鬚

豬潤麻辣米線 (1 辣)
豬潤蘿蔔酸辣米線 (1 辣)

( 29-AUG-2012  WED )

星期中喇   咁呢個星期又會過得好快咁呢 ~

今朝食奶油多 + 咖啡   其實好想飲齋啡   無咁肥嘛   不過又唔想朝早咁苦澀嘅嘢   話哂一日嘅開始嘛 ~

菇場無咁忙   整啲嘢就 Lunch Time 喇   今日 Lunch Box 係前晚煮嘅炒麵   啲同事話點解好似日日炒麵咁   無計啦   食唔哂嘛 ~

諗住放工睇中醫   點知里奧大人 5 點要見客   應該可以好早番到屋企   咁我都唔睇中醫 lu ~  

上車時里奧大人話見完客走得   差唔多 6 點半可以到九龍灣   咁我就行陣商場   差唔多時間就去金姆指呢 ~ 

食完就番屋企喇   好難得咁早食完番屋企   但我番到屋企就開始忙喇   開機洗衫再熨兩機衫   好在今日多時間做嘢   做完都係 9 點半   爽呀 ~

檸檬雞翼 + 蛋白粟米湯 + 牛油曲奇 ( 28-AUG-2012 )

( 28-AUG-2012  TUE )

尋晚瞓得唔錯   今朝可以 7 點半起身   有好多時間比我慢慢嘆早餐呢 ~

菇場又忙   又好快到 Lunch Time   今日有 Lunch Box   本來想食完出去   不過見出面好多煙霞   好似好焗咁   都係唔出 lu ~

放工即走喇   要去街市幫家姐買鯪魚肉   之前食唔哂啲榴槤   里奧大人話好燥唔敢食   我又食唔哂   要家姐幫手食呀   所以番到屋企再拎埋榴槤同紅豆喺車站比佢喇 ~

番到屋企已經 6 點 45 分   要開行 Turbo 煮飯喇   順便整埋麵糰   好在里奧大人 7 點半放工   咁番到黎就啱啱好有得食呢 ~

是日晚餐 - 檸檬雞翼 + 蛋白粟米湯

檸檬雞翼 - 唔想成日整麥芽糖焗雞翼咁悶   所以上網搵食譜   呢個食譜好似係黃淑儀教人煮嘅   我覺得好味   不過里奧大人話酸   同埋同雞翼唔 Match 喎   話要同啲炸嘅肉 Match 啲喎 ~

蛋白粟米湯 - 因為用咗 2 隻蛋黃焗曲奇   所以用埋剩咗嘅蛋白滾粟米湯喇 ~ 

食完洗埋碗已經 8 點半喇   要開始焗曲奇   焗咗個幾鐘   都算快架喇   里奧大人話好味喎   之後問邊個食   我話焗比家姐   又問點解無啦啦焗曲奇嘅   呵呵   仲駛問嘅   平日無啦啦焗曲奇就唔方好嘢啦   因為牛油到期呀   呢罐係金罐牛油   我覺得貴   所以唔想浪費   之後里奧大人話我呢啲就買買買   佢地就要食食食   食到個個都驚哂   攞嚟搞 ~ 

叉燒炒麵 + 菜心 ( 27-AUG-2012 )

( 27-AUG-2012  MON )

唔知係咪食咗榴槤比較燥熱   所以瞓得唔係咁好   本來想早起身   不過最後都瞓到 8 點   瞓多半個鐘好好多囉 ~

早餐食餐蛋治   好似好耐無食咁 ~

菇場忙呀   轉個頭已經 Lunch Time   今日又叮蝦子麵   夠方便   同埋最緊要係想快啲清哂佢呢 ~

Hea 咗陣又忙   好在可以準時放工   今晚要去街市買菜   之後再去太興買叉燒就番屋企喇 ~

預備晚餐   里奧大人一放工就開始煮   好感恩佢 6 點 50 分放工   咁我可以早啲食早啲休息呢 ~

是日懶餐 - 叉燒炒麵 + 菜心

叉燒炒麵 - 呢個麵里奧大人最鍾意食   又易整 ~  

菜心 - 好似好耐無食菜心   依家 $9 斤 都唔知算唔算貴呢   好耐無買菜唔知價呀 ~

沖完涼就開機洗衫   星期一真係無咩原動力做家務   所以都唔想熨衫   睇下電視   差唔多 11 點就瞓喇 ~ 

梅菜蒸鯇魚 + 蕃茄薯仔魚湯 ( 26-AUG-2012 )

( 26-AUG-2012  SUN )

呢個星期好攰又唔夠瞓   所以同里奧大人講話唔番教會   瞓到自然醒 ~

瞓到差唔多 10 點 45 分就醒喇   梳洗之後就去大快活食早餐喇 ~

食完去百佳買榴槤   唔知點解突然好想食   所以里奧大人話我衰啦   又話唔食泰榴   依家又食   但無理由喺香港食貓山王家嘛   我哋又唔識揀   同埋超級貴喎   咁我地去百佳都係叫阿姐揀   我話要熟同埋大個   佢揀個全場最大嘅   之後收銀都話好大   屋企管理員話好似抱住個人仔咁添呀   我真係第一次買一個 12 磅重嘅榴槤呢 ~

沖完涼   再將榴槤入哂盒又要出發喇   1 點半約咗菜菜仔 Lunch   不過我同里奧大人都唔餓    所以揀麥記   買咗兩個餐 Share 食   傾到 3 點就走人 lu ~

里奧大人陪我去買餸   咁我話先入 100 plus   之後再去街市   同佢買煲湯魚   佢一指就指 $25/份嗰啲   我話煲湯唔駛咁貴啦   $10 份就得   如果比佢自己買餸   真係唔掂   同埋一定比人呃 ~

熱到爆   番到屋企又要沖涼喇   里奧大人就瞓覺   我就熨衫   之後入廚房劏魚   因為 $10/份唔會劏內臟   里奧大人入嚟見我劏魚   見我姐手姐腳   好驚我切親   問我點解唔比多幾蚊叫人劏   我話比多幾蚊叫人劏   我就唔買細魚啦   真係呢 ~

是日懶餐 - 梅菜蒸鯇魚 + 蕃茄薯仔魚湯

梅菜蒸鯇魚 - 依家多數星期日先整魚   因為里奧大人可以襯熱食   我驚留暖壺會腥呀 ~ 

蕃茄薯仔魚湯 - 第一次滾蕃茄湯啲色咁靚咋   可惜唔識計份量   滾埋之後得一碗囉 ~  

6 點 45 分開飯   所以食埋搞掂哂再沖埋涼都係 8 點幾   爽呀   之後里奧大人就出去跑步   我就睇電視喇 ~ 

9 幾點一齊食榴槤飲 100 plus 睇電視劇   真係好難得咁 Relax 呀 ~                  

豪宴海鮮酒家 @ 將軍澳 ( 25-AUG-2012 )

京式回鍋肉


黑椒西芹牛柳粒 /  茘芋南瓜煲 / 香草海皇蒸蛋白

( 25-AUG-2012  SAT )

8 點起身   早餐要食飽啲   因為要頂到 3 點 ~

菇場忙呀   所以好快到 1 點   放工即走 ~  

里奧大人去尖沙咀整嘢   所以我就番屋企等里奧大人   之後一齊出發去調景嶺喇 ~

今日去菜菜仔屋企探 BB   所以買埋外賣上去一齊食   去到都差唔多 3 點   食下傾下玩下 BB 已經 4 點半   要趕去第二場探另一個朋友茄子 BB 呀   但菜菜仔又想同我哋食晚飯   所以一陣要再番嚟一齊出去食飯呢 ~

鵪鶉蛋燒賣 / 山竹牛肉 / 鮮竹卷 / 雞扎 / 鳳爪排骨飯 / 糯米卷 / 馬拉糕

好在茄子都係住將軍澳   咁搭地鐵最方便   去到茄子爸爸媽媽都喺屋企   一齊傾下偈   玩下 BB   好快又到 8 點半   要走喇   因為要趕番去調景嶺同菜菜仔兩公婆食晚飯喇 ~

食到差唔多 11 點   之後又搭番地鐵番屋企   地鐵遊咁呀   不過估唔到今次兩邊都傾到唔願走   但可惜時間唔夠   下次都係一日約一個朋友就最好   可以盡情啲呢 ~

Riso Café @ 九龍灣 ( 24-AUG-2012 )

( 24-AUG-2012  FRI )

今朝 8 點半起身   打的番工   次次差唔多 9 點就好多人等車   等咗 10 分鐘先上到車 ~

買腿治 + 咖啡番菇場食   不過都係無胃口   只係飲咗半杯咖啡就夠 lu ~

lunch 食埋朝早份腿治   又瞓唔到   但又好似好攰咁 ~

放工即走喇   里奧大人晏晝喺大陸番嚟香港   所以今晚 8 點可以一齊食飯呢 ~

好想食酸嘢   所以又去 Riso Café 食嘢喇   食完再去買嘢比朋友 BB 就番屋企 lu ~

南小館 @ 德福廣場 ( 21-AUG-2012 ) + ( 22-AUG-2012 ) + ( 23-AUG-2012 )

招牌生煎包


蟹粉小籠包

蝦肉紅油抄手

排骨擔擔麵 - 排骨居然未熟   太離譜

( 21-AUG-2012  TUE )

早餐食麥皮餐   就咁食碗麥皮 + 半杯咖啡已經好飽   所以留番奶醬多做 Lunch 食喇 ~

晏晝食奶醬多 + 蝦子麵   食完覺得好脹胃添 ~

里奧大人見客   所以 Join 埋我喺德福等   見南小館呢個時間無咩人   所以試下喇 ~ 

食完行陣就番屋企 lu   可以快啲休息 ~

( 22-AUG-2012  WED )

今朝瞓到 8 點半   所以搭小巴番工   估唔到都好快   買埋早餐先番菇場喇   不過無胃口食   只飲咗咖啡 ~

終於每月一到   個肚輕微唔舒服   所以早餐份奶醬多變為 Lunch   食完即瞓   感恩瞓到呢 ~

放工即走   番到屋企沖熱水涼   今日係里奧大人生日   陪唔到佢食飯真可惜   佢 4 點幾見完客食咗個 Tea   所以佢番到屋企都話飽 ~

我 7 點幾入房瞓喇   之後 8 點幾醒一醒   里奧大人話餓   買麥記番屋企食喎   生日仲要自己買麥記   如果我肚無唔舒服就好啦 ~

( 23-AUG-2012  THU )

尋晚個肚唔舒服   瞓得超差   所以打完番菇場請病假就再瞓   瞓到 11 點幾就醒喇 ~

睇完醫生去百佳買龍眼   因為好想食呀   之後再買麥記番屋企食   睇電視又瞓下   醒咗就開機洗衫   好快就 6 點喇 ~ 

無啦啦個肚唔舒服   都唔知係咪食咗龍眼呢 ~

里奧大人今日上廠   不過番香港時塞車   差唔多 9 點先番到屋企   佢買咗源發嘅粉果同水餃麵   但我個肚唔知做咩鬼劇痛呀   咩都食唔落 ~

我次次一痛就沖熱水涼   但唔知做咩鬼   今日明明完全無問題   但夜晚就劇痛同嘔   仲有啲暈   今次真係最辛苦呀 ~

麥芽糖焗雞翼 + 牛油香草蒜蓉包 + 辛辣麵 + 粟米蛋花湯 ( 20-AUG-2012 )

( 20-AUG-2012  MON )

又星期一新開始喇   尋晚瞓得好   所以今朝 7 點 25 分都起身 lu ~

今朝又有好多時間食早餐   由唔凍坐到凍呀 ~

阿 Head 終於放完長假喇   上網無咁 Free   不過佢唔喺度   我都唔會 Full Screen 上網嘅   所以都無咩影響 ~

Lunch 食蝦子麵   第一次用微波爐叮麵   3 分鐘搞掂   超快呀 ~

食飽好想瞓   但又瞓唔到   真係好鬼難頂 ~

放工即走喇   懶到街市超市都唔去   但好想食蒜蓉包   所以喺山崎買個脆包就番屋企 lu ~

凍再醃埋雞翼就拖地   里奧大人 7 點 20 分先放工  等埋佢啦   8 點有得食 ~

是日懶餐 - 麥芽糖焗雞翼 + 牛油香草蒜蓉包 + 辛辣麵 + 粟米蛋花湯

麥芽糖焗雞翼 - 我次次都唔會掃啲油喺個盤度   所以好多時啲雞翼皮好多都會黐住   下次都係掃啲油   咁雞翼賣相會靚仔啲 ~

牛油香草蒜蓉包 - 唔知點解突然好想食   香草牛油蒜蓉真係好鬼正 ~

辛辣麵 - 無煮飯   所以里奧大人話食辛辣麵 ~

粟米蛋花湯 - 無菜自然會自動煮粟米湯呢 ~

掂哂都 9 點幾   沖埋涼   睇下電視   10 點 15 分就瞓喇 ~

黑椒洋蔥牛仔骨 + 皮蛋酸薑 ( 19-AUG-2012 )

( 19-AUG-2012  SUN )

今日 10 點 20 分起身   食完早餐   去埋超市買金枕頭番屋企就即沖涼   之後番教會喇 ~

崇拜完畢就番屋企 Hea 陣   差唔多 2 點半就出去食 Tea 喇    食到一半家姐又嚟埋   再叫多個小食一齊食呢 ~

食完一齊番屋企   家姐就打陣機   之後就拎榴槤去媽咪屋企 lu ~

開完機衫就抖陣   好鬼攰呀   差唔多 6 點半先煮飯   7 點半有得食 ~

是日懶餐 - 黑椒洋蔥牛仔骨 + 皮蛋酸薑

黑椒洋蔥牛仔骨 - 就咁牛仔骨好似好少嘢咁   所以加條司華力腸同什豆   咁樣好似豐富啲 ~

皮蛋酸薑 - 突然間好想食呀 ~   

食完洗完就沖涼喇   睇下電視   10 點半就瞓喇   好鬼攰 ~ 完就沖涼喇 睇下電視 10 點半就瞓喇 好鬼攰 ~

板長壽司 @ 九龍灣 ( 18-AUG-2012 )

珍珠廣島蠔壽司 / 海膽軍艦

三文魚子軍艦 / 一口帆立貝 / 金三文魚壽司 / 煙鴨胸壽司 / 車海老蝦壽司 / 玉子壽司 / 火灸鵝肝壽司 / 加州卷 / 油甘魚 ( 黑松露醬 ) 壽司 / 蝦天婦羅壽司 / 炸軟殼蟹 / 醬燒三文魚骨腩 / 牛肉鮮茄湯烏冬

( 18-AUG-2012  SAT )

終於每月一 Off 喇   我 10 點半醒咗   之後里奧大人都醒一醒   問我幾點   我話 10 點半   佢即刻話要起身   唔係趕唔切食早餐呢   佢好重視我每月嘅 Off 㗎   難得嘛   哈哈 ~

慢慢食早餐   之後就番屋企沖涼   本來想去濕地公園   不過我驚落雨   同埋好焗   所以都唔去喇 ~

咁手機電又好似作壞咁   所以就出旺角整囉   點知又叫我去番 Smartone 整   我之前打咗成半個鐘頭電話問好哂資料家嘛   離哂大譜   問咗價錢要 $1,900   我買新機好過   iphone 內置電真係好鬼煩呀 ~

都差唔多 2 點半   里奧大人有啲餓   所以去雲桂香食酸辣米線   不過我仲未餓   一碗 Share 食算喇 ~

食完再去買麵粉   之後去信和睇有無相機套   好感恩呀   一上到去里奧大人就見到   之前成日搵都唔見有   一係就唔啱心水   一係要 $700 又太貴   所以今次見到   里奧大人都話買兩個   留番一個做 Spare 都好喎 ~

之後再比我搵到合心水嘅眼鏡盒   真係又開心又感恩呀   雖然今日諗住整電話先出旺角   但整唔到我都幾激氣㗎   但里奧大人就話無所謂啦   當出嚟行下   估唔到仲有收穫   超幸運感恩呀 ~

番到屋企都 5 點   熨埋兩機衫   到 6 點就去板長拎位   因為約咗媽咪 家姐 工人一齊食壽司   媽咪話要請里奧大人食生日飯呀 ~

食到差唔多 8 點就走喇   我同里奧大人就行商場當做運動   唔錯呢 ~

海港酒家 @ 將軍澳 ( 17-AUG-2012 )

薑蔥炒蟹

龍蝦伊麵 / 沙巴大龍躉 / 海鮮豆腐煲 / 賽螃蟹 / 楊洲炒飯 / 芒果糯米糍 / 西瓜 / 咖啡奶凍

( 18-AUG-2012  FRI )

Happy Friday 喇   好開心呀   早餐食咩都好食呀 ~

驚落雨呀   所以朝早買定冷麵做 Lunch 呢 ~

放工即走喇   約埋里奧大人喺官塘廣場等   諗住順便買麵粉   點知去到無得買我要嘅粉   所以直接去將軍澳算喇 ~

我哋去到酒樓   坐喺大堂等里奧大人姐夫   咁啱見到大眼妹兩公婆   真係約實反而見唔到   真係有緣啦   我哋平日好少會去將中   多數係星期六日先去家嘛   大家喺門口都傾咗差唔多廿分鐘先入去呢 ~

里奧大人同佢姐夫   加埋姑奶都係 8 月生日   所以今餐里奧大人請食飯   之後再上佢哋屋企傾下偈   差唔多 10 點半就走人喇   好鬼攰 ~

住家飯 @ 媽咪屋企 ( 16-AUG-2012 )

蒜蓉蒸蝦

蒸白殼蟹

煎鯧魚


白切雞

黑豆紅棗唐虱魚湯

恐龍蛋 / 龍眼

Tartufo @ Cova
Layers of Sacher base filled with chocolate & Guanduia cream, topped with Sacher Crumbs & cocoa powder

( 16-AUG-2012  THU )

星期四喇   呢個星期好開心   因為係我每月一 Off 嘅星期   難能可貴喔 ~

早餐食奶醬多   正呀 ~

菇場又忙呀   所以好快就 Lunch Time   今日 Lunch Vox 嘅蜜糖骨係水姑整嘅   佢同事同我住同一座   所以佢叫同事拎埋我果盒   等我自己去拎呢 ~

忙咗陣又等放工喇   2 點又三號風球   但改發 8 號機會唔大 ~   

里奧大人上咗大陸   我又去媽咪屋企食飯喇 ~

7 點幾食食下飯睇到電視播話 10 點 15 分改發 8 號風球   唔係咁玩嘢呀嘛   5 點幾收工都話 8 號機會唔大   兩個幾鐘又話改發 8 號   好在里奧大人已經放工   所以都無咁緊張 ~

同家姐 9 點走喇   估唔到里奧大人已經番到屋企添呀 ~

10 點 15 分改發 8 號喇   但出面風平浪靜   無風又無雨   同上次打到嚟完全唔同   不過咁早改發 8 號   睇嚟聽朝都要番工 lu  ~ 

源發潮州粉麵 @ 九龍灣 ( 15-AUG-2012 )

( 15-AUG-2012  WED )

星期三喇   尋晚瞓得好好   7 點 25 分可以起身 lu ~

今朝行行下差噂打爛個 Lunch Box   晨早流流未食嘢無咩力   諗住擺啲報紙喺 Lunch Box 嘅袋度   點知甩手   成個 Lunch Box 跌落地下   好在飯蓋着地先   唔係盒連袋都唔要得㗎喇   感恩感恩 ~

又有 40 分鐘食早餐   所以食米粉餐喇 ~

菇場雖然靜到不得了   不過啲時間都好快過   好快就到 Lunch Time   又係 Lunch Box   今朝跌完落地之後  啲飯餸好似打風咁   我同事都話好少見到我 Lunch Box 咁樣呀 ~

又話傍晚可能會掛 1 號風球   今次又係打到正一正   呢 2 個月 3 個風球都幾勁噃 ~

今晚去針灸   6 點 15 分去到   聽到話醫師出咗去診症   仲諗住有排等   好在佢 6 點半番到嚟   我又係第一個睇   所以 7 點搞掂   第一次咁快咋   非常之感恩 ~

之後又到九龍塘地鐵站 Join 里奧大人   入到車廂我就坐   里奧大人就企   我就問依家幾號風球   突然間坐我隔離嘅女人同我講 : 阿小姐   妳個電話可以睇到天文台㗎喎   嚇得我吖   佢塞住耳仔喎   我又無特登好大聲問   不過睇佢啲眼神同語氣   應該係有啲問題呢 ~

好想食粉果呀   所以今晚又去源發   估唔到里奧大人都好想食   仲想食 2 個   不過都係睇定啲先叫   因為次次都好飽 ~

又係捧住個肚番屋企   整埋 Lunch Box 再沖涼   之後就熨衫   睇陣電視   11 點就瞓覺喇 ~

香草瑞士汁燜冬菇雞膇 + 瑤柱節瓜甫 + 蒜粒炒飯 ( 14-AUG-2012 )

( 14-AUG-2012  TUE )

唔知點解成日覺得今日係星期三   可能想快啲到星期六 Off 啦 ~

早餐食奶醬多   最緊要夠快呀 ~

菇場靜呀   忙咗陣就等 Lunch Time 喇 ~

今日食 Lunch Box   我有個男同事個 Lunch Box 係超級清㗎   次次都係菜  豆腐   蕃茄同飯咁咋   有次女同事見到   話好似人哋啲減肥餐咁   因為樣樣都好似烚咁   所以見到佢飯盒有肉係好出奇嘅事囉 ~

放工去 Citibank   因為佢講番我份保單嘅嘢   之後就 Sell 儲錢計劃   傾完之後就傾閒偈   問我係咪喺醫院做嘢   我問佢點解   佢話我好大陣消毒藥水味   覺得我好乾淨   但我真係咩味都聞唔到喎   可能我聞慣咗滴露味   所以唔覺啦 ~

同家姐傾電話   傾開有條路   所以企喺屋企樓下繼續傾   傾咗 15 分鐘先番屋企   原來已經 7 點喇 ~

好在尋晚燜定雞膇   今晚就咁蒸節瓜同炒飯就搞掂   里奧大人差唔多 8 點半番到屋企   咁就等埋佢一齊開飯呢 ~

是日懶餐 - 香草瑞士汁燜冬菇雞膇 + 瑤柱節瓜甫 + 蒜粒炒飯

香草瑞士汁燜冬菇雞膇 - 冬菇入哂味   超正呀   連里奧大人唔鍾意食冬菇都話好味   其實我都幾鍾意用呢個香草瑞士汁   又唔駛自己調味夠方便呀 ~

瑤柱節瓜甫 - 尋晚浸定瑤柱   慳番唔少時間呢   整呢個餸又係好方便呀 ~ 

蒜粒炒飯 - 加咗蒜粒同蛋去炒   其實好似同煲嘅無咩分別   搞嘢 ~

洗完碗沖埋涼都 9 點半喇   今晚真係比自己休息   有衫都唔熨住呀   睇下電視同雜誌   11 點就瞓呢 ~

老少平安 + Sambal 炒通菜 ( 13-AUG-2012 )

( 13-AUG-2012  MON )

依家多數瞓到 7 點 55 分先起身   但食早餐就比較趕   所以如果精神夠就 7 點 25 分起身算喇   我都係鍾意慢慢嘆住早餐睇報紙咁呢 ~

今朝食麥記嘅芝士雞堡   估唔到好味道呀   好香口   不過我朝早好少食炸嘢   同埋呢間麥記如果正常早餐時間好多人   等得嚟都夠鐘 lu   所以我好少食麥記呢 ~  

菇場靜到真係唔眼瞓都變眼瞓   好在飲咗咖啡   夠呢刻提提神   唔係真係好難頂 ~

今日食 Lunch Box   諗住食完就瞓陣   不過想瞓嘅時候已經 1 點半喇   要開工啦 ~

3 點幾好想瞓呀   我見到 Partner 瞓着添呀   真係好夠膽   仍都夠核突 ~ 

放工去街市買餸   番到屋企即浸菜醃魚肉   之後飲湯再拖地 ~

7 點半諗住炒菜   點知里奧大人打嚟話放工   咁我可以抖陣先煮飯呢 ~

是日懶餐 - 老少平安 + Sambal 炒通菜

老少平安 - 買咗 $15 鯪魚肉 + 一磚豆腐   估唔到豆腐仲係暖   本來我想煎鯪魚餅   不過又炒菜又煎好似好熱氣咁   所以先整老少平安夠健康 ~

Sambal 炒通菜 - Sambal 醬真係好惹味   又辣辣哋   真係送飯一流呀 ~

洗哂碗之後我就燜定雞翼   咁聽晚就唔駛咁趕喇   同埋應該夠入味呢 ~

蒜芹雞絲炒米粉 + 肉絲粉麵 + 南瓜粟米紅蘿蔔豬展湯 ( 12-AUG-2012 )

( 12-AUG-2012  SUN )

今朝 10 點起身   食完早餐就番教會   真係太耐無番喇 ~

崇拜完畢   我就去買餸   里奧大人就去剪髮   之後 Hea 到 2 點半就食 Tea 呢 ~

里奧大人想買 New Ipad   所以陪佢去百老滙   不過佢無帶 Credit Card   所以要打到回府   本來諗住食完飯先去買   但佢要拎衫去洗   所以順便買埋先番屋企 ~

我就煲湯預備晚餐   之後再熨衫   熨完都差唔多 6 點   又要煮飯喇   無停過咁   好攰呀 ~

是日晚餐 - 蒜芹雞絲炒米粉 + 肉絲粉麵 + 南瓜粟米紅蘿蔔豬展湯

蒜芹雞絲炒米粉 - 尋晚食剩半隻雞   所以我拎番屋企   整雞絲炒米粉   加埋蒜芹真係好好味呢 ~

肉絲粉麵 - 我話今晚炒米粉   里奧大人問炒麵得唔得   咁問即係唔鍾意食米粉啦   所以我又要將豬展切絲黎炒麵喇 ~ 

南瓜粟米紅蘿蔔豬展湯 - 上次煲燶咗   唔忿氣   所以今次加多啲水   好在個湯都甜   唔係人都顛 ~ 

搞掂哂所有嘢   再沖埋涼都 9 點   之後食埋家姐尋日喺恆香買嘅皮蛋酥   再坐定定睇 "飛虎" 大結局   睇完 11 點幾呀   要即瞓呀 ~  

富臨漁港 + 皇子星級甜品 @ 九龍城 ( 11-AUG-2012 )

加拿大龍蝦 (伊麵底)

片皮鴨 

竹笙羅漢上素

蔥油香妃雞

芒果腸粉 @ 皇子星級甜品


石榴綿花冰 (芒果魔豆 / 黑珍珠 / 七彩彩針 / 椰果) 
麥提莎糯米糍 (新張期內免費贈送每人一粒)

( 11-AUG-2012  SAT )

今朝 8 點起身   Shopping 完之後食早餐   番到菇場 10 點 lu ~

無嘢做就等放工啦   一點放工即走 ~

同里奧大人喺地鐵站 Join 埋一齊去尖沙咀   我見到佢之後   第一時間比佢睇 100 plus   佢好驚訝   因為估唔到我喺香港買到呢 ~  

今次食 Burger King   食完就睇中醫   時間啱啱好 ~

芝士煙肉小華堡餐 x 2 / 粗切脆薯條

睇完行 Harbour City   之後里奧大人話想食牛丸河   所以又走去食喇   好在落咗場雨無咁熱   唔係一定唔去食呢 ~

牛筋丸 / 滑丸河粉 / 自家蝦米辣椒油

搭巴士番屋企   一落車就行去華潤買 100 plus   仲做特價   好感恩呀 ~

番到屋企 Hea 陣   里奧大人換埋魚缸水就出發去九龍城喇 ~

今晚媽咪請里奧大人食飯   預早嘅生日飯呢   我哋經過清真牛肉館   里奧大人就話好想食牛肉餅   所以外賣兩個   等咗 15 分鐘   等到家姐都嚟埋   一齊行去酒樓喇 ~

差唔多 8 點半就走喇   媽咪要睇 "飛虎"   咁我哋陪埋媽咪工人上車之後就去食甜品喇 ~

食完都 9 點半   所以各自歸家休息 lu ~

家姐比里奧大人嘅生日利是 + 蜜汁豬肉乾一磅

香港仔魚蛋粉 @ 旺角 ( 10-AUG-2012 )

牛什河粉

魚皮餃米線 / 菜心

( 10-AUG-2012  FRI )

Happy Griday 喇   8 點先起身   爽呀 ~

晏咗起身   所以要縮短咗食早餐時間   食三文治就最好啦 ~

菇場忙咗陣就 Hea 喇   今日又 Lunch Box   不過我都仲未好接受到紅咖哩   但紅咖哩整魚餅 OK 喎 ~

里奧大人上大陸   所以約咗 CC 今晚行街   佢差唔多 6 點 40 分就出到花園街   算快喇   因為我已經出咗嚟一個鐘呢 ~

同佢行完花園街再去 H & M   之後再行聯合廣場   今次我壓抑自己嘅購物慾   只係買咗 2 條 One Piece   之後就食嘢喇 ~

今餐係 CC 生日飯   本來想同佢去紅螞蟻   不過又多人   佢話食粉麵   之後再食燉蛋好過 ~

食下傾下   傾開洗衫   佢話如果天氣好好   試過一日開 7 機衫   我覺得好誇張呀   咁咪即係朝 8 晚 8 ?!   所以佢屋企部洗衣機用咗 2 年幾就要換   佢老公話勞損呀   所以佢之後都唔敢洗得咁顛   一日 1 機衫算喇   因為佢話屋企 11 年換咗 3 部洗衣機   唔想再換喇 ~

傾到 10 點半   CC 話食唔落燉蛋   所以就番屋企 lu ~

住家飯 @ 媽咪屋企 ( 9-AUG-2012 )

蒸白殼蟹

薑絲麻油浙醋

茄汁蝦碌

薑蔥麻香雞 (大家樂)

勝瓜雲耳

炒芽菜

淮山黨參瘦肉山斑魚湯

無花果 / 哈蜜瓜

( 9-AUG-2012  TUE )

今朝 7 點半有電話響   仲以為媽咪叫我飲茶添   原來係里奧大人同事打嚟叫佢買嘢 ~

感恩好快有車   所以有好多時間食早餐   咁就食米粉餐喇 ~

菇場有 1/3 人唔喺度   靜到爆   好想瞓覺 ~

Lunch 有之前整咗嘅紅咖哩薯仔雞膇意粉   其實食完想出去行   不過真係好驚出到去又焗又熱   好辛苦呢 ~

里奧大人上大陸   我放工就去媽咪屋企食飯喇 ~

同家姐 8 點半走人   我去拎袋順便等埋業主拎租約   點知打比佢話佢老公要 9 點半先到   咁我都番屋企先喇   趕住洗衫熨衫呀   所以叫里奧大人落去拎喇 ~  

之後里奧大人打嚟話業主上嚟睇下間屋   同佢講個廚房之前有漏水跡象   同埋個廚櫃入面好大陣噏味   搬嚟果時仲有一隻隻類似虱咁嘅嘢   應該係之前長期滲水無人理   我話我已經放過檸檬   茶包   洋蔥   再用埋強勁噴虱清理都無用   虱就無哂   但噏味仍在   之後又叫佢睇埋企缸   因為之前一沖涼就滲水出嚟   里奧大人就用玻璃膠整好   但其實始終有一日都會滲番出嚟   所以佢話下個月搵人整柜同企缸   其實好感恩   因為呢啲問題發生咗好耐   不過見租人地方唔講咁多啦   但佢問里奧大人住得好唔好   咁里奧大人就叫佢自己上嚟睇睇囉   咁知道我哋講嘅嘢全部係事實   佢仍都親眼睇到同聞到   唔駛好似我哋空口講白話咁嘛 ~

睇完都已經 10 點 45 分   睇咗陣電視都瞓喇 ~

源發潮州粉麵 @ 九龍灣 ( 8-AUG-2012 )

蝴蝶腩銀針粉 - 我好鍾意個湯底   同埋都有唔小芽菜   好耐無食銀針粉   覺得好味呀   不過超級飽肚     

水餃粗麵 - 水餃都幾大隻   同埋最緊要無咩肥豬肉 

粉果 - 真係好味道㗎   配埋豉油同佢嘅蒜香辣椒油   我覺得真係超正   連里奧大人對粉果無咩興趣都要食一隻呢  

腐乳通菜 (大) - 點都要食啲菜嘛   不過真係好鬼飽   下次叫碟細算數喇

( 8-AUG-2012  WED )

瞓到 7 點 55 分先起身   感恩一到車站就有車   咁就唔駛咁趕食早餐喇 ~

菇場忙下停下忙下咁   所以都幾快就 Lunch Time 喇 ~

我叮完 Lunch Box 埋位食咗幾啖   8 卦已經食完   3 分鐘食完   好誇囉   話哂個 Lunch Box 由微波爐拎出嚟好鬼熱家嘛   咁尋日應承咗 8 卦出去買零食   所以我話食完就陪佢買啦   出到去幾咁焗呀   好似吽風咁   今次真係希望快啲落場雨啦   太焗真係好辛苦呢 ~

放工去睇中醫   咁我伏低喺床嘅時候   我打比媽咪   之後醫師入嚟大力按我背脊   我即同媽咪講 Bye Bye   醫師笑住話仲諗住特登大力按   等我依嘩鬼叫咁講電話   估唔到我收線   哈哈 ~

針完差唔多 7 點半   即打比里奧大人   之後喺九龍塘地鐵站等佢   我話坐喺樓梯附近等佢   佢話叫我唔好坐樓梯等佢咁肉酸   哈哈   笑死我啦   我點會坐樓梯等佢呀   我話樓梯附近有櫈坐㗎   之後佢嚟到我即指比佢睇   原來佢無留意   所以佢奇怪我點解坐樓梯咁肉酸呀 ~  

我話一定要去源發食粉   佢好奇怪點解我咁想食   之後我話埋要食粉果   佢就話終於知道點解咁想食源發   係因為食粉果 ~

飽到呢   不過無行陣先番屋企呀   因為里奧大人 Backpack 好重   想番屋企呀 ~

Sambal 豆角炒蝦球 + 泰式紅咖哩薯仔雞膇 ( 7-AUG-2012 )

( 7-AUG-2012  TUE )

今朝起身時   里奧大人問我做咩唔瞓多陣   我話 OK 精神所以起身喇 ~

早餐食沙爹牛肉腸仔米粉   之前喺金加利食咗啖德國腸   覺得好濃味   依家食番普通腸仔覺得無味   平時係覺得好鹹咁家嘛 ~

菇場忙下停下   到 Lunch Time 都未餓   好在我個 Lunch Box 係尾二先叮   灘凍啲先食   唔駛咁快又食咁 ~

放工即走喇   依家超市買菜唔平   所以依家多數去街市買餸   多數買兩晚餸   咁就唔駛晚晚去   時間好用好多 ~

番到屋企預備哂晚餐就拖地   之後再煮飯   啲汗係咁流   煮完之後無胃口食   沖個靚涼抖半個鐘先有番胃口呢 ~

是日晚餐 - Sambal 豆角炒蝦球 + 泰式紅咖哩薯仔雞膇

Sambal 豆角炒蝦球 - 估唔到包 Sambal 差唔多到期   好似買咗無幾耐咁咋噃   好在上次睇下啲醬料   唔係真係過期都唔知   今次問埋阿表點煮呢個餸   有人教果然有信心啲   哈哈   里奧大人仲有幾聲咳   所以我預佢一食就依依哦哦   但估唔到佢話好食   不過係辣咗啲   好開心佢都鍾意食   因為仲有 2 包未煮呀   哈哈  ~

泰式紅咖哩薯仔雞膇 - 上次執櫃   見到阿表買比我樽紅咖哩醬就嚟過期   媽咪又買咗雞膇比我   所以又即煮囉   不過唔係今晚嘅餸   係我後日同大後日嘅 Lunch Box 呢 ~

里奧大人 9 點幾先番到嚟   食完飯睇陣電視   沖完涼就瞓   我就睇乒乓波到 11 點半   本來想繼續睇   不過都係瞓覺算喇   唔想太夜瞓 ~

家鄉炒飯 + 新鮮 Asam ( 6-AUG-2012 )

馬來西亞新鮮 Asam - 甜甜哋又少少酸   消滯最好   

( 6-AUG-2012  MON )

真係好眼瞓囉   所以瞓到 7 點 55 分先醒 ~ 

早餐食奶醬多   因為無咩胃口   同埋最緊要唔駛咬咁耐呀 ~

忙呀   所以好快到 Lunch Time   食番星期六晚食唔哂嘅燒春雞同意粉   加咗黑椒汁嚟煮   正呀 ~

忙咗陣就可以抖喇   今晚放工即番屋企   飲咗碗湯先炒飯   因為太夜飲會成晚去廁所好煩呀 ~

是日懶餐 - 家鄉炒飯

家鄉炒飯 - 用馬來西亞買嘅 "家鄉炒飯" 醬料炒   加埋尋晚煲湯食唔哂嘅豬展   拻成肉絲   用蒜蓉再爆香   加埋蛋同蔥花   我覺得好好食呀 ~

尋日里奧大人買咗 Key Holder 比家姐   所以叫家姐今晚嚟拎   順便同佢睇鞋   佢同里奧大人同一時間喺屋企樓下   不過里奧大人就番屋企食飯   我同家姐就去商場行下呢   之後我送佢去車站   等埋佢上車就走 lu ~

本來業主今晚比新租約我嘅   不過到咗約定時間都唔見佢   即打比佢   原來佢唔記得   好在我無等佢咋 ~

番到屋企即沖涼   之後熨衫   睇咗陣電視   10 點 40 分就瞓覺   好攰呀 ~

美極煎蝦碌 + 青紅蘿蔔粟米豬展湯 ( 5-AUG-2012 )

( 5-AUG-2012  SUN )

今朝起身已經 11 點半   趕唔切去食早餐   更加趕唔切番教會   所以我煮炒蛋出前一丁喇 ~

食完就抹房同書房   再抹廁所同廚房   簡直覺得係新年大掃除咁呀   做到大汗疊細汗   好在里奧大人主動幫手熨衫   咁我仲少樣嘢嘛   做完沖番個靚涼   爽到震呀 ~   

搞掂哂已經 2 點   不過又未餓   所以 Hea 到 3 點幾先出去食 Tea   好在同阿表 Line   佢話我知今晚 8 點羽毛球比賽   林丹對李宗偉   史上最 Top 嗰兩位對賽   一定要睇啦 ~  

快快食完快快買餸   好在里奧大人幫手拎   咁我可以行快啲 ~

番到屋企已經 4 點幾   即煲湯喇   我要喺 8 點前食哂飯   洗哂碗   沖哂涼睇比賽呀 ~

是日晚餐 - 美極煎蝦碌 + 青紅蘿蔔粟米豬展湯

美極煎蝦碌 - 第一次整   我覺得好好味呀   好在里奧大人都覺好味   下次我要加埋指天椒   我覺得更加惹味呀 ~

青紅蘿蔔粟米豬展湯 - 今次買咗 2 條大紅蘿蔔 + 1 條青蘿蔔 + 2 條超甜粟 + $30 豬展   可惜落得太多水   無厘味道   激氣 ~

7 點 50 分坐定定   叫埋里奧大人一齊睇   真係睇到超級緊張呀   雖然李宗偉落敗   不過我都覺得佢實力同超級丹係旗鼓相當   我覺得能夠參與奧運已經係好叻好叻   代表國家喎   壓力真係好大呢   21:19   好勁㗎喇 ~  

睇到 9 點半再睇埋飛虎   差唔多 11 點半先瞓 ~

金加利餐廳 @ 九龍灣 ( 4-AUG-2011 )

厚切肉眼牛扒王餐 - 個名好勁咁   鐵板上最正啦   可惜黑椒汁完全無黑椒味囉

羅馬盛宴 (燒春雞 / 牛仔骨 / 德國腸 / 煎蛋) 配意粉 - 太巨喇   所以燒春雞同意粉要拎走

羅宋湯 / 牛油厚多士 - 羅宋湯好鹹   不嬲佢哋嘅羅宋湯都好好飲㗎噃

( 4-AUG-2012  SAT )

今朝同 8 卦去一間新嘅茶餐廳食早餐   不過我覺得麻麻哋囉 ~

菇場忙咗陣就等放工   如果放 12 點半就好啦 ~

放工即走   因為家姐同里奧大人已經喺星林居等緊我   食完再去買香水   之後家姐番屋企   我就陪里奧大人去睇中醫 ~

我同家姐 Share 嘅中辣小鍋米線 (豬紅 / 豬潤 / 魚腐)

里奧大人嘅小小辣小鍋米線 (豬腩肉 / 蘿蔔) 

3 點等到 4 點半   里奧大人問我平時係咪一樣等咁耐   我話係㗎   所以你有我陪好好啦 ~

睇完都無行街喇   大家都好攰   真係好怕等   等得耐之後真係咩 Mood 都無哂 ~

好感恩好快有巴士   之後買完嘢就去麥記食雪糕   因為好鬼焗熱呀 ~

番到屋企里奧大人就瞓陣   我就睇雜誌   差唔多 7 點半先去食嘢   食完行陣就番屋企 lu ~

住家飯 @ 媽咪屋企 ( 3-AUG-2012 )

蕃茄炒蝦仁

蒸鯧魚

白切雞

蒜蓉炒豆角

髮菜花生眉豆雞腳螺片湯 (隔夜)

石硤龍眼 / 西瓜

卡樂 B 原味薯片 - 我去到媽咪屋企   出奇哋見到有 2 包薯片   媽咪話買比家姐食   之後就話食完飯一齊食薯片   食香口嘢完全無問題啦

( 3-AUG-2012  THU )

星期四喇   一樣咁焗   依家真係想快啲喺 Office Hour 落番場雨   咁就無咁焗喇 ~

菇場忙呀   所以一望個電腦已經 12 點 10 分 lu ~

同 8 卦一齊出去食 Lunch   我又未餓   所以邊行邊搵食   都差唔多 1 點   所以最後見到有車仔麵就入去食喇   其實我哋最初都係食麵   但 8 卦話好熱唔想食   不過最終都係食麵   佢食完話好熱   但我一滴汗都無   個身仲係爽   所以我話佢應該食得太急呢 ~

里奧大人又上咗大陸   我又番媽咪屋企食飯 lu   依家如果里奧大人夜番   我都番媽咪屋企食飯   除非真係好攰好攰   話哂見到屋企人都好開心嘅   反正又有時間   依家又住得近   遠就話比籍口唔去啫   不過諗深一層   遠都唔係籍口   因為家姐住元朗都都成日番去食飯   係睇妳有無心去囉   我都唔算好㗎喇   咁近都唔係成日番去呢 ~  

8 點幾就同埋家姐一齊去惠康買嘢   買咗一大袋   所以家姐又爭住拎   佢知我腰骨痛嘛   但其實佢都腰骨痛   所以我真係好感恩有個好家姐 ~

佢又問海鮮脆開咗未   我好肯定就係佢真係好想好想食   因為由我喺馬來西亞番嚟   佢每次見我都問   不過我話未食   佢話唔好開住   驚會腍   咁今晚佢上嚟   我都照開啦   同埋太大包呀   想佢快啲食同埋拎啲走   我又有空間擺其他嘢嘛 ~

家姐 10 點半就走喇   之後里奧大人就番嚟   佢話頭先比個女人撲埋去嚇親   原來係家姐嚇佢 ~

本來 11 點半就瞓   不過整呢樣嗰樣   12 點先入房瞓   好在聽日番半日啫 ~