燒排骨 (外賣) + 蒜蓉豆豉炒皇帝菜 ( 31-OCT-2012 )

( 31-OCT-2012  WED )

突然凍咗好多呀   呢啲天氣真係超舒服呢 ~

今朝去另一間餐廳食早餐   其實之前都有去嘅   但覺得唔夠冷氣   係有啲焗嘅感覺添呀   夏天好辛苦啫   同埋等早餐好耐   試過有次等咗 20 分鐘   又要趕頭趕命咁食   唔想囉   人哋明明預咗好多時間食家嘛   咁見今朝又早咗   天氣又凍咗   所以又食番喇   但味道已經無以前咁好味 lu ~

次次 Off 都係臨放工前一個鐘先忙   好在搞得掂咋 ~

同媽咪飲茶   之後再去買餸   原來已經 4 點   咁我都番屋企喇 ~

番上屋企放低嘢又要出去拎鞋   超級攰呀   見行開德福   順便去 Piago 買蛋糕比里奧大人   我推車仔啦   第一時間放對鞋落籃   之後再放手袋   咁買咗 2 盒蛋糕就比錢走人   再上樓上睇保溫杯   睇睇下覺得點解好似兩手 Fing Fing 咁得閒咁   原來我唔記得拎對鞋呀   即飛落收銀處   佢哋話啱啱拎咗去客戶中心認領處   感恩拎得番咋   唔係我唔想 $1,300 買 2 盒蛋糕囉   同埋實比里奧大人鬧死都似呀 ~

番到屋企已經 5 點半   抖陣就抹書房   執鞋櫃   搞掂哂都差唔多 7 點   煲落飯先   個人太攰真係會唔記得煲飯 ~ 

里奧大人 8 點幾先放工   又要 9 點開飯   咁我都等埋佢一齊食   反正晏晝都好飽   遲啲食都無問題 ~ 

是日懶餐 - 燒排骨 (外賣) + 蒜蓉豆豉炒皇帝菜

燒排骨 (外賣) - 有新鮮出爐燒排骨   里奧大人好鍾意食   咁媽咪又話靚   所以買咗半斤   懶得煮餸 ~  

蒜蓉豆豉炒皇帝菜 - 喺佳寶見到 $12/2 斤又抵喎   所以同媽咪 Share   之前喺酒樓食過   用蒜蓉豆豉炒好鬼惹味   不過一到我手就惹味程度起碼減半   無計   唔識煮嘢係咁喇   里奧大人話啲菜嘅味道好腥臭   好似唐萵菜   其實我以前不嬲最驚唐萵嘅味道   但依家覺得味道好特別   都幾鍾意   年紀大喇   口味都唔同哂 ~

蒜頭豆豉蒸排骨 + 清炒長紹菜 + 粟米蛋花湯 ( 30-OCT-2012 )

( 30-OCT-2012  TUE )

星期二番第一日工真係幾開心   番少一日咁嘛 ~

天陰陰又落雨   感覺都涼咗少少   唔錯唔錯 ~

又唔餓   所以早餐食奶醬多   一路睇報紙一路慢慢食 ~

菇場唔忙   不過 Holiday Mood 仍在   勁想聽歌   如果坐角落位就好啦   無人望到做咩   真係想點就點   正呀 ~

Lunch 食鮑魚麵   之後上下網都好快 1 點半喇   又要開工 ~

放工諗住去大成街街市買餸   不過落雨就唔行喇   同埋屋企好多嘢未做   都係早啲番去算喇 ~

去超市買排骨同菜   番到屋企醃肉浸菜   開機洗衫   拖地   再熨一機衫   里奧大人 7 點 45 分話放工   咁我都預備煮飯喇 ~ 

是日懶餐 - 蒜頭豆豉蒸排骨 + 清炒長紹菜 + 粟米蛋花湯

蒜頭豆豉蒸排骨 - 好耐無整喇   因為整到好厭   即係食到好厭   不過今餐想蒸嘢   所以先煮呢   送飯都唔錯 ~ 

清炒長紹菜 - $4.8/條真係好抵   所以買黎試下   就咁炒咋   估唔到啲菜都幾甜同埋爽口 ~

粟米蛋花湯 - 自己超想飲   所以即煲嚟飲 ~ 

洗埋碗再熨多一機衫   好在係里奧大人啲裇衫西褲   咁佢就會自己熨番   呢個策略真係非常之好喇 ~

稻香超級漁港 @ 德福廣場 (九龍灣) ( 29-OCT-2012 )

魚腐

雲吞 / 水餃 / 廣島蠔 / 雪花丁方 / 美國肥牛 / 綠色一籃子 / $1 豬骨煲湯底

( 29-OCT-2012  MON )

今日同里奧大人一齊 Off   太開心喇   10 點起身去 Delifrance 食早餐   平日同假日真係差好遠   靜好多呢 ~

食完就番屋企   其實無咩地方想去   不過里奧大人話行旺角   因為話平日嘅旺角應該無咁多人喎 ~

坐巴士出旺角   想去弼街附近行下   等落車時聽到有個阿婆同電話中人講依家喺 "粥"街   講咗 2 次都係粥街   但我好奇怪點解無人糾正佢嘅   如果真係有條粥街   咁咪去錯地方囉 ~

見到 85℃   之前睇過報紙介紹話啲麵包好好食   咁又去睇下   我對包就真係無咩興趣   但見到啲 Cheese Cake 好似好好味   想買番屋企   所以同里奧大人去完聯合廣場買完 2 件外套   之後再去番  85℃   本來諗住買磅鮮奶方包比家姐就走喇   比我見到原來可以堂食   所以就買件藍莓芝士蛋糕同香芒雪泥試下   不過唔會有下次了   但試咗啖鮮奶方包又 OK 喎   但可惜我對麵包真係無咩興趣 ~

藍莓芝士蛋糕 - 無芝士味   同埋質感唔得結實   唔好食囉  
香芒雪泥 - 完全無芒味   飲冰水咁

GF5

食完又去金魚街行下   途經寵物店   啲狗仔真係超級可愛   次次見佢哋都好開心   睇夠就去食嘢喇   諗住 2 點幾無咩人   點知都要等一陣   不過啲卡位好迫   下次應該唔會再嚟 ~

蕃茄豬潤通粉 / 炒蛋 / 餐肉 / 牛油烘多士 / 雞扎 / 奶茶

買埋拿破崙同椰撻比家姐   再買埋 2 碗芝麻糊就坐小巴番屋企 lu   叫里奧大人諗下今晚食咩   佢話想同我打邊爐   因為之前打唔到   佢呢樣嘢真係幾好   我次次想食但食唔到嘅   佢都會記得   要同我食到為止   咁佢話叫埋家姐   估唔到家姐會嚟囉   因為佢尋晚買咗餸嘛   不過佢話超鍾意打邊爐   所以實嚟呢 ~

家姐塞車   差唔多 7 點先到   真係邪爆   上次約星期一食飯又係咁 ~

食到 9 點幾   再同家姐睇鞋就各自歸家 lu ~ 

Saizeriya (薩莉亞意式餐廳) @ 將軍澳 ( 28-OCT-2012 )

水牛芝士伴蕃茄

帕瑪火腿 x 2 / 三文魚沙律 / 洋蔥蒜蓉焗青口 / 蕃茄吞拿魚意粉 / 羊鞍焗爐燒 / 黑椒汁美味雜雞拚盤 / 黑椒雞肉 Pizza / 蒜香法包 x 2

( 28-OCT-2012  SUN )

同里奧大人 10 點起身   去大家樂食早餐   估唔到見到水草阿姐   佢話個幾月唔見我   以為我搬咗呀 ~

食完就番上屋企抖陣就番教會喇    1 點完畢   去德福行下   感恩又買到 3 對鞋   里奧大人又買到 2 對   買完都 2 點幾 lu ~ 

我想食點心   但唔想去酒樓   所以諗起鴻星有外賣點心   其實可以堂食嘅   不過都係買番屋企食就舒服啲   同埋拎住 2 大袋鞋好阻住囉 ~

潮州粉果 / 臘腸卷 / 炸雲吞 / 煎魚餅 / 山竹牛肉  / 馬拉糕 / 楊枝金露

食完就煲八珍湯   5 點又要出發同媽咪家姐食飯   因為我想去 Saizeriya 食嘢呀 ~

去到都 5 點半   估唔到仲要等 1 張枱   所以次次都寧願早啲去   如果撞正食飯時間   閒閒哋等 1 個鐘   咁又唔係太值得 lu ~  

差唔多 8 點食完   家姐車我哋番屋企   早食飯真係好多時間用   實在太好喇 ~

海港酒家 @ 將軍澳 ( 27-OCT-2012 )

蒜蓉粉絲蒸蟶子皇

豉蒜炒皇帝菜 / 漁香海鮮燒豆腐煲 / 海港醬燒雞 / 別不同果醋骨煲 / 清蒸青斑 / 咖啡凍 / 芒果糯米糍

( 27-OCT-2012  SAT )

終於回復正常   星期六係要番工嘅 ~

早餐食餐蛋治烘底   今次件三文治熱辣辣   一路食一路出煙   好少有呢 ~

菇場忙咗陣   之後 Hea 過   所以好快又放工喇 ~

放工一定即走   避開哂同一時間放工嘅人一齊搭 Lift   上次遲 1 分鐘走   遊 Lift 河 3 分鐘   超勁趕去搭小巴呀 ~

同里奧大人差唔多 3 點先食 Tea   之後去旅行社睇資料   再去百老匯買相機   因為里奧大人部單反上次比我跌一跌   角落頭有黑影   所以一定要買機囉   今次買 Panasonic GF5   貪佢擄帶方便 ~

買完番屋企抖 1 個鐘就去將軍澳食飯   8 點幾食   食到大半呢   里奧大人姐夫話同晴晴上屋企溫書走先   好心啦   人哋一心搵妳哋食飯   又走咗去   好在水姑繼續同我哋食   如果佢都走埋   我一定唔會再搵佢哋食飯   離離奇奇   完全唔尊重人 ~

食到差唔多 10 點就走人   番到屋企沖埋涼   又 12 點先瞓 ~

黑椒蜜糖雞翼 + 北海道味噌豬骨湯出前一丁 ( 26-OCT-2012 )

覆盆子酒 - 未試   但報導話對女性身體有好處   搵日試下先

黑芝麻糕 - 買咗 2 包   好快食哂   好香芝麻味   口感好得意

越南魚露 (60度) / 勁辣椒油 / 辣腐乳 / 豆豉蒜蓉醬

( 26-OCT-2012  FRI )

終於又 Happy Friday 喇   但不斷提醒自己   聽日要返回現實係要番工呢   放咗 4 星期 Off   好感受到星期六番同唔番嘅心情呀   唔駛番真係開心好多   哈哈 ~

早餐食火腿吞拿魚治烘底   我記得以前食吞拿魚治   啲吞拿魚入面好似有啲洋蔥碎之類嘅嘢   好味之餘又好咬口   依家係一 Pat 咁嘅   同埋好腥 ~  

菇場唔忙   靜到有啲頭痛添呀   好在私事忙   時間都過得好快 ~

又 Lunch Box 喇   同事估唔到個 Lunch Box 係我   因為我好少帶媽咪飯   同埋啲餸同自己煮開嘅唔同呢   佢哋話我多數炒飯或者意粉 ~

放工約咗家姐去惠康   順便拎啲柑桔蜜同喉糖比佢   一齊行超市最好   幫手計下數   我數字白痴   薯片 $14.5/筒   買二送一   萬寧 $18.9/2 筒   我居然話買二送一平啲   家姐計埋條數出嚟   我都話買 3 筒抵啲   家姐話唔想再講   有啲頭暈 ~

佢真係好鍾意食文記煎釀三寶   好記得我旅行番嚟嗰晚   我叫佢唔駛去我屋企餵魚   佢話無問題   我話唔駛啦   滕嚟滕去   佢都話無問題   咁我話真係唔駛㗎喇   佢好無奈咁 "哦" 一聲   之後佢講番   話好期待嗰晚嚟餵魚   因為佢特登等最後呢日去買文記魚蛋食喎   哈哈   點知無得買嚟食好慘   黐鬼線   咁尋晚又陪佢食囉   樣樣新鮮炸起呀   超感恩 ~

7 點半里奧大人仲喺大陸   所以打嚟叫我食先   反正有時間   我陪埋家姐等車   之後我行書局   里奧大人又話走得   好在頭先解凍咗雞翼   唔係又要出去食喇 ~

是日懶餐 - 黑椒蜜糖雞翼 + 北海道味噌豬骨湯出前一丁

黑椒蜜糖雞翼 - 個皮仲係唔夠脆   最衰自己唔記得焗之前掃油喺雞翼面啦 ~

北海道味噌豬骨湯出前一丁 - 湯底都幾濃味   啱我 ~

里奧大人差唔多 9 點番到屋企   食完洗埋碗都已經 9 點 45 分   沖完涼就熨 2 機衫   好彩里奧大人幫手熨 1 機   唔駛我咁攰   但又唔想分開 2 次熨   我唔鍾意啲嘢做啲唔做啲   心掛掛仲煩 ~

住家飯 @ 媽咪屋企 ( 25-OCT-2012 )

孟加拉鹹魚


煎鯧魚

白切雞

荷蘭豆炒臘鴨

清補涼湯

買比家姐嘅零食 

( 25-OCT-2012 THU )

覺得好似啱啱過咗星期四無耐咁咋噃   估唔到今日又星期四呢   時間呀時間   係咪過得咁快呀   唔通真係開心嘅時間過得特別快 ~

好餓呀   又早到   所以食米粉餐   諗住食完慢慢嘆報紙   但 8 卦打嚟話食早餐   咁就無得睇報紙 lu ~

菇場超靜   好在夠精神   唔係真係想瞓陣呢 ~

Lunch 食埋幾塊糙米芝士包   都幾飽下   不過真係唔太鍾意食乾爭爭嘅包做 Lunch ~

今晚番媽咪屋企食飯   但原來里奧大人唔駛上大陸   等我以為佢會上添   不過無計啦   應承咗媽咪   唔想又改 ~

等埋家姐番黎   差唔多 7 點開飯   里奧大人就打嚟話放工   但平時我煮飯又唔見咁早放   整定 ~ 

同家姐 8 點半走人   買下嘢差唔多 9 點番到屋企   一入屋里奧大人就話沖涼   呢排佢都好攰   今晚 9 點幾已經瞓覺喇   佢早放工反而見得仲唔多   哈哈 ~

金姆指米線 @ 九龍灣 ( 24-OCT-2012 )

( 24-OCT-2012  WED )

尋晚瞓得唔好   加上呢排聽到啲令自己唔太開心嘅事   所以都好難入睡   一係醒咗又好難瞓番   但鬧鐘響咗之後又想瞓   哈哈 ~

今朝 8 點 15 分先起身   途經 KFC 買埋早餐   原本只係想買杯咖啡就算   但都要 $11.3   之後睇到有個早餐係 $12.x (烤香腸 + 烤鬆餅 + 咖啡)   咁梗係買個餐啦   個人仲暈暈哋   上小巴即食條腸呀   食完又精神啲喎 ~

菇場又忙   咁都好   時間過得快   眨眼又 Lunch Time   食埋個鬆餅   又食塊糙米芝士包   食咗藥又攰   但又瞓唔到先最折磨呀 ~

今晚放工去醫院探叔叔   真係好怕一個人夜媽媽認路   所以我多數見人就問   慳唔少時間 ~

去到病房   見到堂哥哥餵緊叔叔飲營養奶粉   咁我都安心啲   話哂肯飲嘢 ~

里奧大人 7 點半放工   咁我都走喇   堂哥哥知我唔識路   所以特登帶我去搭車   落到樓下見到堂細佬   咁都好嘅   咁叔叔有人陪嘛 ~

今晚食米線   食完就番屋企喇   因為我勁想開機洗衫 ~

長洲 + 南記粉麵 @ 北角 ( 20-OCT-2012 ) + ( 21-OCT-2012 ) + ( 22-OCT-2012 ) + ( 23-OCT-2012)

招牌河粉 - 唔落辣醬完全係無味道嘅   不過我食呢碗粉嘅原因都係想落辣醬

春卷豬腩肉小鍋米線 - 里奧大人勁推介   咁佢要小辣   菜仔懶勁要中辣   之後嚇佢話小辣都好辣   佢就話同里奧大人交換   不過呢間南記嘅小辣係一啲都唔辣   同銅鑼灣食開嗰間好大分別   仲要係少咗好多米線   所以菜仔唔飽   要加多碗淨水餃雙拚先叫做飽

( 20-OCT-2012  SAT )

今次係自己真正嘅 Off   最搞笑係我自己都放到亂哂籠   唔係睇日曆   我以為今日係要番工   最搞笑係我之前同里奧大人講我係要番工添呀 ~

10 點起身   去麥當勞食早餐   一個珍寶餐 Share 食就最好   咁一陣可以早啲食 Lunch 嘛 ~

番到屋企梳洗之後就出發去長洲喇   坐 619 再轉 603   差唔多 11 點 40 分到碼頭   好感恩快船係 11 點 45 分開   架船都好 Full   感恩有孖位   不過坐船頭好拋呀   勁刺激   但真係好怕離心力  哈   差唔多 12  點 17 分到達   又唔係好多人喎 ~

喺船度拋下拋下   搞到超勁眼瞓   所以即去麥當勞買咖啡提提神喇 ~   

行陣就去蘇波記食海鮮   之前食過另一間   不過唔好食   所以次次都會去蘇波記呢   如果成日嚟嘅話   都會遂間試嘅   但一年嚟一次   唔搞咁多喇 ~   

水煮魚 - 應該係鯇魚片啩   唔腥但多細骨   我覺得 OK 辣   里奧大人直頭話唔辣   因為佢喺大陸食係好鬼辣喎

薯粉好味  因為煙韌   不過勁飽肚

蒜蓉粉絲蒸扇貝 - 今次好味喎   同埋大隻咗   記得上次係無味同好細隻咋

椒鹽鮮魷 - 如果乾身啲就更好   蘸淮鹽喼汁真係好好味  

豉汁炒蟶子 - 我話要加辣   味道真係正好多呢

大藍妹 - 我無飲   因為我驚眼瞓   之後里奧大人叫我留番少少咖啡比佢提神 

咖啡嘅糖水   原來唔會化開   真係唔知   見識少   哈哈

好飽呀   又周圍行   真係無咩人喎   見鬼多過見人   咁頭先坐船嗰啲人去哂邊呢 ~

芝麻餅 - 次次都好想買   不過又唔想食   所以無買 lu

平安包 - 我見到有人買 1 個   但就 Share 幾個食   見佢拻開都好似硬崩崩咁嘅

經過允升甜品   里奧大人話難得無人就入去食喎   一入去好大陣芒果味呀   超正   但上次食嘅芒果超級酸   今次都係好酸   好驚 ~

鴛鴦芒果腸粉 ($20) - 我食咗糯米糍先嘅   啲芒果好甜   之後再食腸粉   覺得啲芒果好酸   叫里奧大人食腸粉再食糯米糍   不過佢話腸粉入面啲芒果其實真係酸呢  

芒果糯米糍 ($8) - 啲皮煙煙韌韌好味呀   不過我唔敢食咁多甜嘢   唔係我可以一口氣食 6 個㗎 

途經一間買 Tee 嘅舖頭   諗住買件衫比家姐   之後同老闆傾下傾下又講到自己啲狗狗   又係老狗   不過佢照顧得隻狗狗非常之好呀   獸醫話本來上年 5 月已經可能要一別   不過比佢養到依家呀   好感恩   咁都傾咗差唔多 20 分鐘   係時候走 lu ~

行埋沙灘嗰邊   里奧大人話一定要食紅豆包   我就真係食唔落喇   之後佢好開心咁咬一大啖   但苦瓜乾面口話麻麻哋   咁我話比我試一啖啦   衰得佢   好開心咁一嘢質入我口呀   好在我扮咬一大啖   之後慢慢 Dun 番個包出嚟   係核突㗎   鬼叫佢咁衰呀 ~

雞屎勝   係咪雞屎滕細佬 ?!   真係笑到肚痛

懷舊理髮店   得過獎㗎

行到差唔多 4 點半就走人喇   又要坐快船   因為普通船要等 45 分鐘   唔想等呀 ~

出到碼頭就打比朋友菜菜仔   去佢荃灣舖頭睇下   我哋到咗佢都未到   咁我哋行荃新天地   佢差唔多 7 點半先到舖頭   但佢居然唔記得拎背囊   所以要等同事比鎖匙開門   之後一定要去灣仔再拎鎖匙   咁先可以番北角拎番背囊   因為所有嘢都喺背囊度   地鐵遊呀   攰到我哋呢   不過咁都好   有時間傾偈 ~

去到北角就一定要幫襯佢   目的就係咁   不過我屋企仲有好多嘢未清   所以都唔買得好多   情願用哂再幫襯佢 ~

諗住去新斗記食飯   不過我見到南記   即同里奧大人講   佢雙眼發光話要去南記   咁我同菜菜仔都無所謂   同埋菜菜仔話平時好多人食   好幾次都食唔到呢   佢都好想試下 ~

差唔多 11 點就走喇   坐地鐵走   順便用埋啲免費飛   過海用抵啲嘛 ~ 

( 21-OCT-2012  SUN )

終於每月一到啦   個肚又痛痛哋   不過就唔係劇痛   但冤冤哋咁痛先係最折磨   完全無胃口  但又嘔喎   所以係全日瞓 ~

( 22-OCT-2012  MON )

尋晚痛呀   好似無瞓過咁   所以最終都係病假 ~  

痛下嘔下醒下瞓下   差唔多 6 點幾先睇醫生   食完藥好好多   不過好攰   有啲頭暈   同埋一樣食唔到嘢   里奧大人話兩日唔食嘢唔得   不過我食唔落都無計 ~

( 23-OCT-2012  TUE )

今日好啲啲咁啦   有胃口咬兩啖麵   之後就灘喺梳化 lu ~

見精神啲就沖涼洗頭   但其實里奧大人話唔好㗎   無食嘢驚我暈喎 ~

3 點幾開始有啲餓   叫里奧大人去大快活買瀨粉比我食   咁我開完門比佢   無啦啦眼前一黑超頭暈   我好記得係挨住牆講話好暈   之後我醒番時   我係跪咗喺地   里奧大人問我咩事   其實我唔知發生咩事   但 Feel 到個身慢慢跣咗落地囉   同埋最離奇我係笑住起身   所以里奧大人以為我玩   我諗可能真係兩日幾無嘢落肚   所以無力呀 ~

食完嘢再飲包豆奶   都好好多喇   不過都仲係好攰   瞓咗陣都已經 6 點半 lu   都唔敢再瞓   驚夜晚瞓唔着呀 ~

今次到我突然好想食排骨炒麵   所以去叙苑   但個侍應態度非常之差   應該唔會再幫襯佢 lu   但如果佢唔係度就食去食呢 ~

住家飯 @ 媽咪屋企 ( 19-OCT-2012 )

煎蓮藕餅

蒸魚

鴨舌


燜柚皮魚卜


海蜇皮馬蹄豬展湯

( 19-OCT-2012  FRI )

又到 Happy Friday   好似好快又一星期咁   正呀 ~

早餐食奶醬多   真係一定要燶燶哋先好味道 ~

菇場忙呀   好快又到 Lunch Time   食完 Lunch Box 都差唔多 1 點   唔出街 lu   上網算喇 ~

忙呀   好快就放工   今日里奧大人上大陸   我都番媽咪屋企食飯喇 ~

差唔多 8 點 15 分就同家姐一齊走喇   趕住番屋企睇 "天梯" 大結局呀 ~

尋晚煮多咗啲雞膇   所以叫里奧大人一定要番屋企食   最多我煮麵比佢   好感恩佢 9 點番到屋企   一番到嚟就有得食啦 ~ 

香草瑞士汁燜冬菇雞膇 + 蔥花炒飯 + 粟米蛋花湯 ( 18-OCT-2012 )

( 18-OCT-2012  THU )

星期四喇   星期尾最開心   不過我覺得自從搬番出嚟九龍   個人真係開心咗好多好多 ~

早餐唔想食甜   所以食扒芝士吞拿魚治 ~ 

菇場忙呀   好在個幾鐘搞掂   最怕啲人講嘢唔清唔楚   嘥哂啲時間番轉頭做嘢 ~

今日有 Lunch Box   食飽本來想出去行   但個天好暗   驚落雨   所以無出去   不過望個鐘原來都已經 1 點 15 分   去埋廁所   拎埋個袋   都已經要用 5 分鐘   真係落一落就要番上嚟   無意思 ~

放工番屋企   食完碗沙律就熨衫   之後 Hea 陣就煮飯喇   7 點 45 分自己開餐   里奧大人就打嚟話放工   不過我唔等佢喇   好餓呀 ~  

是日懶餐 - 香草瑞士汁燜冬菇雞膇 + 蔥花炒飯 + 粟米蛋花湯

香草瑞士汁燜冬菇雞膇 - 尋晚燜定   今晚肯定入哂味   最開心係支瑞士汁喺 Expiry Date 前用哂嘛   唔駛浪費   又可以慳番啲位 ~ 

蔥花炒飯 - 加咗蔥花真係好好食   無落生抽老抽   所以加少少香辣馬拉盞嚟炒   真係唔錯 ~

粟米蛋花湯 - 前晚已經勁想飲喇   所以今晚一定要煲嚟飲呢 ~

黑椒牛扒 + 菜心 + 蘋果沙律 ( 17-OCT-2012 )

( 17-OCT-2012  WED )

星期中喇又   今朝班車早咗   所以就食米粉餐喇 ~

菇場唔忙   細老闆同另一個阿 Head 又唔喺度   所以 8 卦就比較得閒   同我 MSN   一望個鐘已經 12 點   快到呢 ~

今日 Lunch Box   食完陪 8 卦出去睇咭   番到菇場都差唔多要開工 lu ~

放工去買菜   不過諗唔到有咩想買   所以都走喇   估唔到可以坐番平時放工班次嘅小巴   實在太感恩喇 ~

番到屋企即浸菜   之後就拎沙律比家姐   等埋佢上車就走 lu ~

今晚無咩嘢煮   所以拖地先   之後淥菜   食埋尋晚嘅意粉   再煮埋聽晚嘅餸   咁聽晚可以多啲時間做其他家務 ~

是日懶餐 - 黑椒牛扒 + 菜心 + 蘋果沙律

黑椒牛扒 - 媽咪之前買比我試下嘅   我用光波爐焗   不過都 Over Cook   無計   我驚生嘛 ~ 

菜心 - 家姐工人之前買到 $10/2 斤哈哈笑菜心   我覺得超抵   又大條又靚   但我今晚買唔到   仲要係 $10/斤   之後見到有 $7/2斤   價錢差咁遠嘅   不過我買呢斤菜心都好甜   同埋無渣   咁都好 ~

蘋果沙律 - 用 5 個蘋果 + 1 罐紅腰豆 + 1 罐椰果 + 2 罐粟米   整埋都一大盤   好在可以同家姐 Share   唔係又要食到驚 ~

里奧大人 9 點幾先番到屋企   食完飯   睇下電視抖陣就沖涼   佢 11 點唔夠就瞓覺   所以我見到佢嘅時間只係個幾鐘   如果我哋係夜鬼就可以見耐啲   不過我都係鍾意早瞓多啲   咁早瞓個黑眼圈都咁勁   再夜啲瞓仲得了嘅   咪搞 ~

蕃茄雞肉腸意粉 ( 16-OCT-2012 )

( 16-OCT-2012  TUE )

今朝里奧大人話唔舒服   請咗半日病假   咁我喉嚨其實仲痛   又攰   其實都好想唔番   不過又覺得好衰咁   所以都係番工好啲 ~

早餐食奶油多   開始有啲唔想食   但又唔想食到咁飽喎   真係有得食又煩   無得食又慘 ~  

菇場唔忙實在太好   因為唔多舒服   唔想行嚟行去 ~

終於忍唔住沖咗杯桔仔蜜   其實之前阿表都成日話喉嚨唔舒服飲咗會好好   不過我懶   無沖嚟飲   尋日冰姑又係叫我飲柑桔   我仲笑佢話   單憑呢句   就知佢又係馬來西亞嘅人   但真係唔到妳唔信   我飲咗第一啖   個喉嚨真係無咁痛   我再飲第二啖   我個喉嚨真係唔痛呀   超級神奇   我都忍唔住即打比里奧大人知添呀 ~ 

個喉嚨無痛   但仲喺咳   食埋喉糖潤下   應該好快好番 ~

今日有 Lunch Box   我個 Lunch Box 係四方形   飯嘅份量多數係 1/3   因為次次晏晝食完飯都好滯   唔鍾意呢啲感覺   咁尋晚家姐幫埋同事帶 Lunch Box   飯嘅份量好似酒樓一碗飯嘅份量   我覺得同 8 卦嘅 Lunch Box 咁呀   我會用男人份量嚟形容呢 ~  

放工唔駛買餸   諗住煮埋星期六嘅西蘭花   點知原來爛咗 lu   咁星期日夜晚番到屋企   我見到啲西蘭花拎咗出嚟   因為里奧大人無手尾   拎完無擺番入去   我即刻 Line 佢   話因為佢無手尾   又浪費食物   其實勁想打比佢   不過我唔想發火   要比自己冷靜下   但其實又會唔會啲菜唔可以擺幾日呢   但點都好   佢不嬲都衰無手尾   承機話佢都應該囉   衰格 ~

好餓呀   所以我食先   食番里奧大人晏晝食剩嘅茄汁豬扒飯   同埋又係佢食剩嘅 2 塊方包   里奧大人差唔多 8 點番到屋企   我都唔陪佢喇   想快啲整好啲沙律   快啲沖涼休息呀 ~  

是日懶餐 - 蕃茄雞肉腸意粉

蕃茄雞肉腸意粉 - 車厘茄係星期五喺大成街街市買架   好在無爛到啫   $13/2 磅咋   又紅卜卜   唔買對唔住自己   咁本來諗住買免治豬肉   不過諗到之前買咗包雞肉腸   所以整香腸算喇 ~  

沖完涼諗住熨衫   熨咗一件之後行開咗拎嘢   咁里奧大人就自己行埋去熨另一件   我無叫佢話等我熨呀   由佢熨哂一機衫   鬼叫佢整到我無菜食呀   成日無手尾真係好黑我憎囉 ~

住家飯 @ 家姐屋企 ( 15-OCT-2012 )

煎釀三寶 (尖椒 / 豆卜 / 豆腐)

攞妳命三椒 - 佢哋話平時閒閒哋都 3 條指天椒   辣到我呢   但佢哋一啲都唔覺得辣

豉汁蒸馬友

焗雞翼


蝦仁炒蛋

西班牙白肉瓜
魔鬼 mini @ 美心 - 我覺得好多 Cream 好甜

B 仔呀  你個樣做乜咁慘呀


好狗唔欄路噃

工人煮嘢   B 頭望到實

麥包笑口常開


廚房太危險喇   工人抱走兩隻   佢哋實在太活躍喇   肥 B 因為實在太肥   所以唔抱走喇 

叫佢哋一齊望鏡頭真係好鬼難   但一見有人拎食物就會同一時間望   但當我拎食物引佢哋望鏡頭呢   佢哋又跳哂落地   真係好難搞  

相隔 8 年先見到嘅 B 頭   估唔到會見得番   實在係送比家姐嘅生日大禮物
佢因為啲牙仔蛀哂   蛀到下顎都有問題   除非要做手術   否則以後都係伸哂條脷出嚟   但年紀大   獸醫唔建議做手術   好感恩佢食嘢都無問題   唔係就慘喇
個賤人真係好不負責任   偷咗人隻狗咁耐   依家就遺棄佢   係咪因為下顎咁樣 ?!  係都係妳整到咁啦   賤人 

( 15-OCT-2012  SUN )

以我係一個超級為食嘅人嚟講   無胃口食嘢就應該係作病先會咁   尋晚無咩胃口已經覺得有啲唔妥   瞓瞓下喉嚨仲痛到不得了   吞口水都痛到想喊呀 ~

今朝起身喉嚨一樣痛   無燒就起身番工喇 ~

嘆完早餐就開始嚟料   但喉嚨痛嘅話   飲凍嘢喉嚨會舒服啲 ~   

番到菇場無耐   面紅紅又骨痛   身又慶慶哋   都應該有啲燒   即刻食番粒 Panadol   又狂食喉糖   咁樣又好似舒服啲咁喎 ~

里奧大人同客食飯   咁我就去家姐屋企食飯   想探狗狗呀   太耐無見   好想攬下 ~

無啦啦醒起   原來之前居然無買生日蛋糕同家姐慶祝   所以諗住去一田買 Cheese Cake   不過無得買   所以即去美心買個魔鬼 mini ~

等車無耐家姐打嚟   問我仲想食啲咩   傾傾下我講開芝士   之後話佢工人唔食豬   所以唔買 "豬屎" 喇   我次次同 8 卦講芝士   佢一定係講 "豬屎"   所以我白痴到諗咗 "豬屎" 係豬嚟整   之後家姐笑住話係牛奶喎   我都忍唔住大笑   太白痴喇 ~ 

咁坐小巴嘛   估唔到官塘塞車   司機即刻轉線去藍田   之後暢通少阻咁啦   家姐話呢個時間好少塞車   不過好在小巴可以隨時轉線喎    最邪係家姐搭緊架巴士   因為司機緊急剎車   所以有人跌到   一個話腳痛一個話頭暈   咁即係無得走啦   好日唔去佢屋企食飯   估唔到我同佢今晚都係 "突然" 塞車同有啲阻滯 ~

其實我第一次自己坐車去家姐屋企   不過都認得路   咁司機又教咗我   我都唔叫工人嚟接我啦   但最後都係要佢接我   因為有隻大狼狗企咗喺佢屋企入口度   又係咁吠   又發出狼叫聲音   我超級驚呀 ~ 

我 6 點 40 分到咗   玩陣狗   按下摩   家姐差唔多 7 點半就番到嚟   8 點開飯   之後食生果   本來諗住比 Superise 家姐   不過佢開雪櫃拎生果   所以發現咗蛋糕 ~

食埋蛋糕   坐多陣就走喇   家姐車我番屋企   順便拎埋生果比媽咪   我一入到屋企   差唔多 10 點   里奧大人就打嚟話同客食完飯   都好喇   唔算太夜   最怕啲鬼佬成日要去飲嘢   妳估第朝唔駛番工咩 ~   

海洋公園 + 明輝茶餐廳 @ 九龍灣 ( 14-OCT-2012 )

( 14-OCT-2012  SUN )

今日家姐生日   里奧大人又要做公司嘢   所以我都 Join 埋家姐 媽咪 工人同糟糟一齊去海洋公園 lu ~

10 點 15 分家姐嚟接我再接糟糟   之後去安利食早餐   11 點去到都要等位   勁呀 ~

切腩撈粗 x 2 / 1 條魚片頭 / 牛丸河 / 淨雲吞 / 炸魚皮 / 鮮油多 x 2

食完都差唔多 12 點幾   出發去海洋公園喇 ~ 

全日泊車 $95   入場費 $280/位   好在唔太多人   應該係比我想像中少   同埋好在有煙霞   唔駛咁曬 ~

首先去海洋奇觀   細咗好多好多好多呀   我好鍾意咁近距離睇啲大魚   可能因為我唔識游水   去到海洋館入面就好似置身喺海底咁   好振奮呢 ~

魔鬼魚 - 我超鍾意睇魔鬼魚   今次懶得連環快拍   所以影唔到佢個樣 

海星

一睇都知係有毒嘅魚

八爪魚   個樣超級勁恐怖 

超巨嘅螺   不過唔記得咩名

超大嘅蟹   同樣唔記得咩名

發光小熊貓


每去一個主題地方   都要經過呢啲禮品店   真係好識做生意 


一唧對眼就突出嚟   勁樣衰   不過好搞笑

之後去四川奇珍館隔住玻璃睇熊貓   再去熊貓山莊   鱷魚潭   金魚寶殿   水獺遊蹤   坐埋迴旋木馬就坐登山纜車過去睇企鵝 lu ~

非常可愛嘅熊貓公仔   好似 $199   我超勁想買   不過糟糟話唔好喎   嘥錢

 

熊貓 @ 四川奇珍館 - 嘆到呢

熊貓 @ 熊貓山莊 - 圓碌碌真係好可愛呀

佢係揸住一大咋葉   之後一口咬   幾叻呀  

Halloween 關係   所以又見小南瓜擺設 

娃娃魚 - 個樣好肉酸

金獅猴 - 唔係糟糟話我知   我都唔知有嘢喺度   嘩哈

鱷魚仔 @ 鱷魚潭 - 好似得 1 條鱷魚仔咋噃

鱷掌 - 得 2 隻有指甲 ?!

五花蛋球 @ 金魚寶殿 - 魚名好搞笑   

水獺 @ 水獺遊蹤

香港老大街

我超級期待玩嘅迴旋木馬   我都係鍾意馬多啲   轉嘅時候先發覺我條海豚升得唔高嘅   家姐同糟糟條魚升高我半個頭㗎   真係唔好蝦人   因為我唔比糟糟坐海豚   我話我要坐  

Halloween 嘅全院嚇滿   真係好鬼寒呢

我同糟糟坐一部纜車  我同佢都係畏高嘅   所以大家一齊驚都幾過癮   之後 Join 埋佢地就去冰極天地喇 ~  

登山纜車 - 最怕係 Fing 出去嗰下   我同糟糟捉到支柱實一實   之後落車就一齊覺得隻手勁黐立立   即去洗手間洗手呀

巨型海象 @ 北極之旅 (場館溫度係攝氏 15-17度) - 兩隻好尖好大嘅牙   同埋佢咆哮時啲聲都好得人驚 

海豹   好肥嘟嘟   好得意

冰極天地 (場館溫度係攝氏 8-10度)   企鵝排哂隊企喺度好得意呀

之後坐海洋摩天塔   再行水母萬花筒   坐完摩天巨輪再玩攤位遊戲 ~

海洋摩天塔 - 無特別   不過媽咪想坐就坐呢

飛雪冰 ($35) - 我同家姐 & 糟糟 share 飲   超級多冰呀   

好鍾意睇人地玩呢啲機動遊戲   倒樹衝呀   我會叫埋一份   因為我就咁睇都好驚

水母 @ 水母萬花筒

每個灘位遊戲都好似係 $20 / 唔記得幾個 token   但記得 $50/25 個 Token   如果一次買 $50 會送個細細嘅公仔   氹妳入局   好彩我同糟糟都中咗個蛋糕公仔

隻彊師仔係玩掟圈仔落玻璃樽度   不過超級難玩   隻大鴨仔係糟糟玩射槍中嘅   玩咗 $200   都係去冒險樂園抵啲   哈哈

玩完都差唔多 5 點半   要走人喇   坐海洋列車去番入口度攞車   3 分鐘過到去   超勁快 ~

家姐話上次佢去玩 Halloween 時   天窗係播啲恐怖嘢   但我哋走時仲未到 Halloween 時間   所以播其他嘢   咁都好   黑媽媽好驚家嘛

好似係冥婚新郎   我幾年前去過 Halloween   玩咗 2 樣嘢咋   每度排個幾鐘   排到無癮

楂車落銅鑼灣喇   糟糟 Book 咗位食牛扒   所以泊喺 Times Square   出到 Times 就同佢哋分道揚鑣喇 ~  

我去番 Sogo 搭巴士走人   感恩好快有車   半個鐘頭就出去九龍灣 lu ~

我真係唔餓   但里奧大人就好鬼餓   咁我話去茶餐廳叫小菜   咁食唔哂可以做 Lunch Box ~

食完就去商場買 Headphone   我真係唔知依家啲 Headphone 成 $300 咁鬼貴   我以為百幾蚊咋 ~