茄汁豬扒 + 節瓜瑤柱豬骨湯 ( 30-APR-2013 )

( 30-APR-2013  TUE )

諗起聽日放假就開心喇   如果每個星期三都放假   妳話幾咁好呢   就算唔出街喺屋企抖下   執下嘢都好吖 ~

早餐食奶油豬仔包   估唔到呢間又整得幾好味噃   下次多過選擇呢 ~

又唔係好忙   不過又唔係咁想上網   可能無心機呀   因為阿 Head 今日 Last Day 啦 ~

做做下嘢嘅時候   老闆喺我面前行過   同我講多謝   話好鍾意本 Cook Book   仲舉高隻手指公   好搞笑   不過我真係好開心   因為啱佢用呢 ~

今日有 Lunch Box 呀  係前日食剩嘅豆豉炒雞柳   但好奇怪叮出嚟嘅味道勁似沙茶味   我同事以為我整沙爹添呀   話搞到佢想食沙爹牛河   好記得有次佢聞到我嘅肉醬意粉   佢 Lunch 即刻去 Pizza Hut 食肉醬意粉   搞笑 ~ 

平時放工都會擰轉頭同阿 Head 講 Bye Bye   今晚特登入佢房同佢講 Bye Bye 啦   佢第一句話老闆好鍾意好鍾意本 Cook Book   之後我又再祝佢生活愉快啦   講多幾講我 Feel 到自己開始眼濕濕   所以即講 Bye Bye 就走喇   真係好唔捨得佢哋呢 ~  

放工去牛頭角拎中藥   雨粉粉最煩   因為等如長命雨嘛 ~ 

媽咪煲咗湯又買咗大蕉同豬腰芒比我   所以又同工人喺屋企交收喇 ~

番到屋企即醃豬扒   之後嘆杯中藥   家姐飲完中藥一定要食啲涼果之類嘅嘢   我就唔駛喎   雖然係苦   但又無咩嘢喎   不過次次飲到最後一啖就勁反胃   可能一氣呵成咁飲   好脹胃啦 ~

又唔知里奧大人幾時番   又費事打比佢   正想煮飯嘅時候   佢就話放工   感恩呀   佢差唔多 8 點半番到屋企   咁就一齊食喇   不過今晚唔煮飯   淥泰國冬蔭功麵   酸酸辣辣正呀 ~

是日晚餐 - 茄汁豬扒 + 節瓜江瑤柱豬骨湯

茄汁豬扒 - 今次掂呀   唔知係咪多蒜蓉   所以有啲似蒜蓉汁   我覺得好味呀   好在里奧大人都覺得好味   好開心呀 ~

節瓜江瑤柱豬骨湯 - 媽咪加埋蓮子薏米   再加埋幾塊豬潤比我補補血   最衰家姐啦   成日話我口唇白   嚇到媽咪次次都望我口唇   一白就好擔心   所以我有時會咬自己口唇   咁樣就好快紅啦 ~

金姆指米線 @ 九龍灣 ( 29-APR-2013 )

( 29-APR-2013  MON )

星期一喇   尋晚 9 點幾先食西瓜   所以夜晚成日去廁所   但食完西瓜之後   個人真係無咁熱氣咁 ~ 

早餐食芝腿治烘底   其實有時想食下腸粉燒賣   不過嗰間餐廳真係坐得好唔舒服   唔係可以多啲選擇 ~

番到菇場第一件事比本 Cook Book 阿 Head 喇   希望佢哋啱用啦   喺外國好多都會自己煮   唔似香港食嘢咁方便嘛 ~

無嘢做又靜   衰 8 卦又係咁話眼瞓   真係唔眼瞓都比佢講到眼瞓呀 ~

老闆同阿 Head 番埋聽日   所以今日去龍皇食 Farewell Lunch   正呀 ~

食飽仲眼瞓   4 點幾老闆話喺文華酒店買咗 Cake 請我哋食   真係勁好味呀   差唔多 5 點 20 分   所有人要去 Showroom   因為老闆有嘢宣佈   好在好快講完   因為今晚我要去旺角睇中醫呀 ~

睇完都 7 點   打比里奧大人叫佢放工喇   所以我都坐小巴番九龍灣   夠快嘛 ~

本來想食餃子   但無位   所以都係去金姆指喇   因為趕住番屋企煲中藥呀 ~

番到屋企即煲中藥   再開機洗衫   9 點半先飲碗中藥   真係好少咁夜飲   不過無計啦   唔想嘥咗去呀 ~    

辣豆豉炒雞柳 + 油麥菜 ( 28-APR-2013 )

( 28-APR-2013  SUN )

今朝 9 點半起身喇   梳洗之後食早餐   抖陣就番教會喇 ~

里奧大人得得戚戚同我講   話佢食麥皮幾健康   我即刻話有鬼用咩   幾個月食一碗仔   日日食就差唔多

家姐今日放監呀   所以之前已經約定   話今日過嚟去麥記飲咖啡   因為飲夠 4 杯就送 1 杯呀   所以奉獻完就走 lu   里奧大人番屋企先   我就同家姐去超市買嘢   係咁買買買   都唔記得自己無拎環保袋   好在家姐有咋   唔係唔知點拎好呢 ~

里奧大人瞓咗覺   但家姐又想 2 點半走   咁叫家姐嘈醒里奧大人啦 ~

食完就各自歸家喇   執下嘢   再飲埋湯   都已經 5 點幾喇   差唔多預備煮飯 lu ~

是日晚餐 - 辣豆豉炒雞柳 + 油麥菜

辣豆豉炒雞柳 - 爆香蒜頭豆豉乾蔥   再加多湯匙磨豉醬同 1 隻指天椒   惹味就惹味   不過唔夠辣   唔係就更加好味呢 ~

油麥菜 - 惠康買 $15/2 Pack   估唔到煮起上嚟都幾多喎   今次蘸腐乳食   好味道 ~  

我好鍾睇飲食節目   依家睇 "MAY 姐有請"   佢加埋嘉賓   成班女人   係又笑唔係又笑   我覺得好煩同好嘈囉 ~

別府 @ 九龍灣 ( 27-APR-2013 )

鬼石坊主地獄拉麵 (2 辣) - 牛肉好味   不過湯底一啲都唔辣嘅

天婦羅蝦壽司 / 吞拿魚壽司 / 甜蝦壽司 - 啲飯好新鮮 

三文魚刺身 - Order 1 客加 $12 就多 1 客   不過好明顯 $12 嗰客係頭頭尾尾囉

七味炸三文魚骨 - 無上次咁脆

( 27-APR-2013  SAT )

今朝唔駛同 8 卦食早餐   咁我可以瞓到 8 點呢 ~

早餐食碎蛋吞拿魚三文治   不過今次塊麵包係凍嘅   係雪過嚟咁囉   我唔鍾意呢啲凍冰冰嘅感覺 ~  

雖然阿 Head 係 Off   不過我都忙呀   所以好快就到 1 點   放工即走喇   因為要坐 Shuttle Bus 去地鐵站 Join 埋里奧大人去旺角呀 ~

旺角呢個地方   真係唔係買嘢   我係唔會出   因為人太多   同埋呢啲地方實在令我太傷感呢 ~

1 點幾未餓嘛   所以去星際睇相機袋   不過唔啱心水   行到 2 點半   我開始覺得好餓好餓   餓到面青口唇白呀   嚇到里奧大人拿拿聲同我去食 Tea 先   咁先有氣力再去下一場 ~

烤牛肉撈濛 - 我想食撈濛啲醋好耐喇   所以食到好開心   真係超級滿足   雖然牛肉好韌   但心情都無受影響   同埋估唔到有好多牛肉   真係無 10 塊都有 8 塊  

烤牛肉湯金邊粉 - 賣相已經唔掂   放幾條香草好睇啲嘛   點知原來個湯底都好唔掂  

食飽精神哂啦   咁去另一間睇   好似叫 CAM 2   好感恩想要嘅 Backpack 啱啱番貨呀   買完就搭地鐵去佐敦拎喼   之後再搭番地鐵去九龍灣   去埋 HMV 買本 Jamie Oliver 嘅 Cook Book 比阿 Head 就番屋企喇 ~

番到屋企抖陣   7 點就去別府食嘢   食完去書局睇陣書   再買埋張心意卡就走喇   好攰呀 ~

好耐無好似今日咁頻樸   番到屋企即沖涼   再做埋腳按摩先舒服啲咋 ~ 

住家飯 @ 媽咪屋企 ( 26-APR-2013 )

蒸海星斑

豉椒炒蜆

炒菜心

節瓜淮山江瑤柱豬骨湯

( 26-APR-2013  FRI )

Happy Friday 喇   今朝試食嘢   食炸魚柳包   不過真係麻麻地   食完個口好苦咁呀 ~

菇場忙呀   好快又到 Lunch Time 喇   唔想食麥皮咁齋   所以去買酸辣米線番菇場食   飽到呢 ~

里奧大人上咗大陸   今晚我又番媽咪屋企食飯喇   家姐要傾屋企裝修嚟唔到   無人爭食   所以覺得好快飽   哈哈 ~

8 點半走喇   好鬼大風   好在無雨   因為又要拎湯同雪糕批   一袋二袋再拎遮真係好麻煩 ~

番到屋企即沖涼   里奧大人差唔多 10 點幾先番到屋企   我又未眼瞓   一齊睇下電視   睇到 12 點幾   唔瞓唔得啦   聽日要番工嘛   實在   實在太羨慕啲人星期六唔駛番工呢 ~    

栗米蛋花湯 ( 25-APR-2013 )

( 25-APR-2013  THU )

今日好啲喇   個肚唔痛   不過就谷住谷住咁囉 ~

早餐食芝腿治烘底   食咗半份就食唔落   食剩半份就做 Lunch 啦 ~

菇場超級勁忙呀   咁都好   時間過得超勁快嘛 ~

晏晝諗住食麥皮   不過都係想食湯米粉暖暖肚呢   即飛落街買呀 ~

做到 5 點就搞掂哂   放工即走喇   個肚谷住好唔舒服   番到屋企即沖熱水涼   舒服好多   因為可以灘喺梳化 ~

抖咗陣又有啲餓   超勁想食熱嘢   所以諗起粟米湯喇 ~

飲完真係舒服哂呀   個肚完全無事   之後鬼打咁精神   同埋有啲餓添呀   食埋朝早果半份芝腿治   勁呀 ~

里奧大人差唔多 8 點先喺大陸放工   喺上水食埋嘢先番屋企   咁仲好   太夜食會無胃口嘛 ~  

用 Ipad 睇 "中國好聲音" 呀   可以一首歌聽好多次   越聽越有味道呢 ~

終於等到里奧大人番嚟喇   等佢沖埋涼   再傾下偈   睇陣電視就瞓覺喇 ~

淨雲吞 + 水餃粗麵 (外賣) ( 24-APR-2013 )

( 24-APR-2013  WED )

今朝瞓到 8 點半   個肚仲有啲痛   但都番工啦   今日 Partner 請咗假嘛   我又唔係咁想 Dept 無人   最多頂唔順先再請假囉 ~

打的番工   再買埋早餐先番菇場 ~

真係好在有番工咋   真係有嘢做呀   幾辛苦都做埋佢先呀   之後真係頂唔順   下午請病假喇 ~

拿拿聲打的去診所拎今日下午嘅病假紙   番到屋企即沖涼瞓覺喇 ~

起身嘅時候天黑黑   又望見隔離無人   心諗里奧大人 2 點都未瞓   再望一望鐘   原來果時係 7 點   未瞓醒唔知自己做緊咩呀   哈哈 ~

有啲餓喇   食埋今朝份腿治   咁里奧大人 8 點放工   咁我勁想食雲吞呀   所以叫佢買嘢番屋企食喇 ~

明輝茶餐廳 @ 九龍灣 ( 22-APR-2013 ) + ( 23-APR-2013 )

中式牛柳


西蘭花羅漢齋煲 / 西洋菜湯

( 22-APR-2013  MON )

星期一 lu   又涼咗啲   好彩無落雨 ~  

早餐食芝蛋治烘底   真係諗唔到食咩好 ~

又忙喇   又係幫另一 Dept 對數   啲嘢又唔 Match   但係 8 年前嘅數嚟   佢哋點會記得   所以呢   開頭做得唔好   之後仲更加嘥時間去整呢 ~

對住啲數字真係人都顛   又未餓   所以出去行陣   行到點幾先買盒炒麵番菇場食   估唔到盒炒麵咁巨   食完要食柑桔消滯呀 ~

里奧大人作感冒   腸胃又唔舒服   請咗一日病假喺屋企休息   咁我放工都即走喇   好難得里奧大人咁早喺屋企嘛 ~  

諗住行遠少少食   點知落毛毛雨   又懶上番屋企拎遮   所以去明輝算喇 ~

( 23-APR-2013  TUE )

今朝每月一到   肚有少少痛   不過就勁想嘔   所以瞓到 9 點   打番去菇場請病假   再去埋睇醫生就番屋企沖涼瞓覺喇 ~

今次食藥都好啲喎   因為啲藥係食完好眼瞓   同埋真係無咁痛 ~

瞓到 8 點幾   我真係無胃口   叫里奧大人自己買嘢番屋企食   千其唔好預我   之後我都瞓喇   真係全日無離開過間房   勁呀 ~

海寶漁港 @ 九龍灣 ( 21-APR-2013 )

片皮鴨一食 - $138 就無要求啦

金豬紅袍半邊天 - 啲皮脆卜卜好食呀

百花炸釀鮮蟹拑 - 完全似食緊蝦丸

翠綠妙醬炒蝦球 - 打風咁呀   不過啲蝦都幾大隻   都埋我鍾意食藕片

清蒸游水海星斑 - 都幾大條   不過中間唔係太熟

飄香鮮蝦荷葉飯 - 食咗一啖   好香荷葉味呀

金湯蟹肉燴燕窩 - 無食到

其實仲有翡翠玉環瑤柱甫 / 魚湯鮮腐竹翡翠 / 黃金脆皮一品雞 / 紅豆沙同生果拚盤   不過距離我太遠   所以無影到

( 21-APR-2013  SUN )

今朝 10 點 20 分起身   沖埋涼就去 KFC 食早餐   食完番屋企抖陣就番教會喇 ~

今次又係聽完道就走喇   要去家品店買防潮箱同防潮包   之後番屋企煲中藥   2 點就約埋姑奶一齊去食 Tea ~  

食完就坐巴士去上環同其他姑奶集合   佢哋喺 Pacific Coffee 買咗嘢飲   所以就喺度坐一陣傾下偈咁喇   之後分批坐的士去拜山呢   差唔多 5 點走人   跟 2 姑奶佢哋車番九龍灣   快好多呀 ~

去到九龍灣各自各活動   姑奶就跟我地番屋企   6 點 20 分就出發去海寶食飯   咁多人食   所以叫個 "金豬星斑燕窩全包宴" 加多隻片皮鴨   夠哂飽呀 ~

番到屋企都 8 點半   沖完涼就熨兩機衫   里奧大人就熨番佢啲裇衫西褲   咁我就可以抖抖喇 ~  

大家食 @ 旺角 ( 20-APR-2013 )

豬油渣削搖麵 (酸辣湯底) - 豬油渣都 OK 啦   但如果脆啲更好

我覺得削搖麵好似喺西安食嘅皮帶麵咁   不過佢整得都幾煙韌   但真係好鬼飽肚囉  
鹹腩肉手攪麵 - 真係好腩肉啦

( 20-APR-2013  SAT )

今朝瞓到 8 點先起身   如果唔駛番工幾好呢 ~

正想食早餐嘅時候   見到另一部門嘅阿 Head 西瓜頭   所以就一齊坐啦   我隔離又無人坐喎   好在都傾到兩咀   唔係唔知點咁   之後佢仲請埋我依早餐   佢又唔收番我錢   咁樣就更加唔好啦   好似欠人一餐咁 ~

菇場忙呀   真係做到 12 點 50 分   去埋廁所   抖多陣就放工喇 ~

去牛頭角拎藥同睇中醫   差唔多 2 點就去到酒樓同媽咪家姐飲茶   里奧大人今朝早起   食完早餐   之後又整呢樣嗰樣   所以佢話想瞓番陣覺   咁我就可以同媽咪家姐飲茶   飲到 3 點幾   之後上媽咪屋企拎嘢就走喇 ~

滷水牛展 / 順德煎魚餅 / 薑蔥牛柏葉 / 山竹牛肉 / 蠔油叉燒包 / 腐乳通菜

陪里奧大人去大快活食 Tea   佢超勁想買 MARK III   所以就出旺角喇 ~

出到旺角即睇相機啦   再格價   之後比里奧大人冷靜考慮一下先   咁就陪我去信和買麵粉就最好   佢有佢諗   我有我買 ~

都差唔多 6 點   里奧大人仲心大心細   咁好啦   食嘢先啦   咁我想食辣菜甫   所以就去大家食喇 ~

里奧大人真係好鍾意 MARK III   我話鍾意咪買囉   貴買平用   用番 10 年都抵啦   里奧大人話用一世添呀   我話用一世就更加要買啦 ~

今次一袋二袋   真係要坐小巴喇   去埋商務買本天書就番屋企喇 ~

番到屋企飲湯   之後沖涼   里奧大人就第一時間拎部相機出嚟玩   又睇天書又睇說明書   今晚佢肯定夜瞓呀 ~

住家飯 @ 媽咪屋企 ( 19-APR-2013 )

茄汁煎蝦碌

蒸撻沙

燒肉

炒唐生菜

髮菜眉豆雞腳瘦肉湯

( 19-APR-2013  FRI )

星期五喇   每星期番工   最期待就係呢日架喇 ~

早餐食芝腿治烘底   家姐問點解塊芝士唔溶   我先記得應該要燶啲添   所以芝士唔係咁溶呢 ~

菇場唔忙喇   可以抖下   咁先有 Happy Friday Feel 嘛 ~

又食 Lunch Box 喇   不過 YEO's 嘅黑椒汁唔係咁辣咁噃   好在自己狂加黑椒粉   咁就惹味好多喇 ~

放工去媽咪屋企食飯   等埋家姐番到嚟   7 點準時開飯   不過原來媽咪感冒   咁之得出街食啦   又唔講出嚟喎 ~

里奧大人 8 點喺大陸放工   本來話煮麵佢食   不過佢話好餓   所以喺上水食咗先番屋企   咁仲好啦   一舉兩得 ~

同家姐 8 點半走 lu   番到屋企即沖涼呀   之後睇聖經   等到里奧大大番嚟就開電視睇喇   今晚又比自己夜啲瞓喇 ~

黑椒吞拿魚扁意粉 + 四川擔擔麵 + 豬腳薑 ( 18-APR-2013 )

( 18-APR-2013  THU )

今日里奧大人唔駛上大陸   所以又一齊出門口   因為我依家都轉番 7 點半起身喇   雖然瞓少 15 分鐘   但就可以陪里奧大人買麵包   行下傾下到地鐵站囉   無計啦   佢平時咁夜放工   唯有喺朝早爭取時間見面啦 ~

早餐食五香肉丁炒蛋公仔麵   今次要個麵唔好煮咁腍   好味好多囉   太腍真係好難頂 ~

菇場忙呀   充實到呢   眨眨眼就 Lunch Time 喇   有 Lunch Box 唔駛煩   因為出面落雨   買完嘢食之後成腳濕哂真係好唔舒服呢 ~

忙呀忙   忙到 4 點就搞掂哂喇   終於可以抖抖呢   對眼好攰呀 ~

放工去超市買豬肉同醬料   行下買下都半個鐘   要快啲番屋企喇   大把嘢要做嘛 ~

醃完肉就開機洗衫   嘆埋杯中藥就抖陣   正想抖嘅時候先醒起要熨衫   熨完就即刻煮飯喇 ~

呢排晚晚睇 "Just For Laughs"   見到啲人比人嚇   笑到我呢   點知報應喇   我右手拎碗中藥   左手開煮食爐   點知一開就聽到一下巨響   嚇到我倒瀉咗少少中藥喺地呀   好在無成碗趺落地咋   定神之後再望一望發生咩事   原來係針板拍咗落熱水壺度   但平時拍落去都無咁大聲家嘛 ~

今晚自己食先   之後沖埋涼就坐定定等里奧大人   佢 9 點半先番到屋企呀   如果等埋佢先食   我覺得自己係食宵夜呢 ~

是日懶餐 - 黑椒吞拿魚扁意粉 + 四川擔擔麵 + 豬腳薑

黑椒吞拿魚扁意粉 - 其實係聽日嘅 Lunch Box   反正里奧大人又唔鍾意食吞拿魚   所以就清埋佢啦 ~

四川擔擔麵 - 用四川擔擔麵醬炒肉碎   再加埋壽桃牌嘅四川擔擔麵   好味又方便 ~

豬腳薑 - 媽咪知我鍾意食   所以特登煲㗎   比咗 2 樽我   都比咗個幾星期 lu   希望 2 個月內食哂啦 ~

茄汁雞扒 + 金銀蛋菠菜 ( 17-APR-2013 )

( 17-APR-2013  WED )

又潮濕天氣   好在無落雨咋 ~ 

早餐食奶油多   好耐無食喇   覺得好好味 ~

菇場忙呀   忙完自己嗰 Part   再幫另一個 Dept 對數   係咁望住啲細細粒數字   對眼超級攰呀 ~

晏晝食 Lunch Box   食完都唔落街喇   落雨濕濕無 Mood 行呀 ~

放工去牛頭角拎藥   之後就番屋企喇 ~ 

浸完菜   醃好雞扒就飲中藥   次次飲完杯中藥就好飽   所以 Hea 到 7 點先煮飯   差唔多 7 點 45 分就煮完    咁里奧大人 4 點先見客   都唔知見完未   所以我自己食先 lu ~

是日晚餐 - 茄汁雞扒 + 金銀蛋菠菜

茄汁雞扒 - 今次嘅雞扒唔算好大塊   所以加多 2 條雞肉腸   再自己求其煮啲汁   好耐無煮茄汁嘢   所以都驚唔知咩味   咁我食咗雞肉腸先   好鹹   心諗今次又衰咗   之後再食雞扒   原來唔鹹喎   應該係雞肉腸本身鹹呢   嚇親呀 ~

金銀蛋菠菜 - $8/斤菠菜唔算貴   所以買咗 $10   加埋金銀蛋真係好好食   如果加埋蒜子更好   不過我唔識炸蒜子呢 ~

8 點 15 分打比里奧大人   佢話收工喇   咁我話煮麵佢食   佢話最鍾意食麵   出前一丁有味嘛   上次連煮 3 晚蝦子麵又話食到驚   即係咩呢 ~

今晚 11 點即瞓喇   眼皮塌哂落嚟   潮濕天氣真係令人好鬼易攰咁呢 ~  

沙茶醬牛仔骨 + 蔥蒜油麥菜 ( 16-APR-2013 )

( 16-APR-2013  TUE )

雖然無落雨   但好多煙霞   空氣好差咁呀   同埋又潮濕   又要開抽濕機喇 ~

早餐食沙爹牛肉餐肉米粉   食完超級飽   唔知係咪因為啖啖肉呢 ~  

菇場忙呀   因為幫另一 Dept 對數   對到天昏地暗   所以覺得好快到 Lunch Time   食番尋晚食剩嘅干燒伊麵   但喺唔餓嘅情況下食   食完作嘔呀   要飲熱茶   食柑桔同搽平安膏   辛苦到呢   差唔多 3 點幾先 OK 咋 ~  

放工去街市買菜   依家啲菜同瓜又貴哂   但無可能唔食蔬菜嘛   唯有買啲比較平嘅菜食囉 ~

番到屋企浸菜醃牛仔骨   飲埋杯中藥就拖地   開機洗衫   之後里奧大人話 7 點 15 分放工   咁我都開始煮飯喇 ~

是日晚餐 - 沙茶醬牛仔骨 + 蔥蒜油麥菜

沙茶醬牛仔骨 - 想買中式牛柳醬汁   不過買唔到   所以諗住整黑椒汁   不過原來用哂樽黑椒汁添   靈機一觸諗到用沙茶醬   因為反正里奧大人都唔想食鄗嘛   諗起樽沙茶醬   其實我好感恩㗎   因為我想買好耐   但又驚買咗唔整   咁同家姐傾開偈   佢無啦啦話糟糟去台灣   買咗 2 樽沙茶醬比佢   咁家姐覺得麻麻哋好食   咁我即話我要喇   不過里奧大人都麻麻哋鍾意沙茶醬   話唔辣喎   但沙茶醬唔係辣家嘛   咁我下次加隻指天椒落去炒先   到時唔好又話辣 ~  

蔥蒜油麥菜 - 我用煎牛仔骨啲油炒埋蒜粒同蔥粒   香到呢   好過就咁落油炒呀 ~   

Green Monday 寶光齋素菜館 @ 官塘 ( 15-APR-2013 )

齋滷味 (細) 酸齋 / 齋鴨腎 / 蠔油齋 / 咖哩齋 - 估唔到係熱辣辣   不過應該係叮熱   齋鴨腎勁好味   辣辣哋咁   其他 OK 啦

溫公齋煲 - 又話有南乳味   都無嘅

干炒伊麵 - 里奧大人諗唔到食咩   所以就叫干燒伊麵喇   都幾好味

( 15-APR-2013  MON )

又到星期一   新嘅開始啦   今日算有陽光   但好多煙霞   不過要好好珍惜埋今日嘅陽光啦   聽日又開始唔好天 lu ~

早餐食芝蛋治烘底 + 凍咖啡   次次飲凍咖啡都精神啲㗎   不過就唔可以成日飲   朝早飲凍嘢唔好呢 ~

菇場忙咗陣就得 Lunch 喇   今朝實在太飽   所以 1 點半先食麥皮   仲要沖到稀稀哋   咁無咁飽之餘又唔會餓嘛 ~

同事問我得唔得閒   想比嘢我做   咁我都無所謂   因為真係太得閒喇   3 點半開始做   做到放工都未完   聽日再做過   時間過得幾咁快呀 ~

里奧大人今日 4 點喺官塘見客   咁我今日 Green Monday   所以約佢食齋   我放工拎完中藥就 Join 佢一齊行去齋舖喇 ~

行行下發現有個中年女人同阿叔打眼色   咁我以為佢哋係兩公婆   但之後個男人無理佢   即係唔係兩公婆啦   咁我覺得個女人似企街兜生意   咁我行快兩步睇下佢啦   見到佢件衫低到呢   好明顯係咩啦   之後佢又向阿伯單眼打眼色   阿伯又無理佢   咁多人經過   點會跟妳走呀   乜依家官塘變成咁嘅 ~  

一入齋舖   個人感覺其實真係唔太舒服   我好驚聽啲佛歌   不過我真係好想食齋   所以都坐低食   好在隔離係電視   再加埋我不斷同里奧大人講嘢   分散啲注意力   但呢餐真係要食得快   因為好想食完快啲走 ~

走咗之後   里奧大人同我講話無翻單   不過我都唔會再去喇   感覺唔舒服   之後原本佢話一入到去聞到好大陣噏味   不過見我好想食   所以無講   但我聞唔到喎   如果我聞到我都會即走   我咪話佢囉   即場講嘛   最多咪轉場去食上海菜   唔食肉好易啫 ~

去官塘有樣好   就係可以坐小巴番屋企   我真係好唔鍾意搭地鐵呢 ~ 

豉油王雞膇 + 煎鮫魚 + 西蘭花 ( 14-APR-2013 )

( 14-APR-2013  SUN )

今朝同里奧大人一齊 9 點半起身   又係去金姆指食早餐喇 ~

去埋超市買菜就番屋企抖陣   沖埋涼就番教會喇   諗住聽完道就去鴻星搵位   之後先叫媽咪同家姐嚟   點知媽咪 12 點半打嚟話有位   早餐未落格又要食第 2 餐   勁呀 ~

娥姐潮州粉果 - 好味道   其實鴻星有啲點心都幾好味   不過唔鍾意佢哋服務態度差   所以好少嚟

煎瑤柱韭菜薄餅 - OK 啦
金粟煎魚餅 - 好味呀   因為個皮脆卜卜 

鮮蝦炸雲吞 - 好味呀   必食   其實好感動架   因為媽咪第一樣就搵炸雲吞   知我上次好想食呢 

煎韭菜角 - 唔掂呀

迷你南瓜排骨煲仔飯 - 媽咪 & 里奧大人要食飯

燒鴨瀨粉 - $20 碗咋   所以里奧大人叫一碗   大家 Share 食

蛋撻仔 - 推車仔阿姐問我要唔要   我話唔要   點知里奧大人又話要   
懷舊馬拉糕 - 次次飲茶都叫   里奧大人真係好鍾意食   但呢啲飽肚嘢就唔係咁啱我喇珍珠奶茶 & 百香果寒天 @ 貢茶

只從上次里奧大人喺家姐手中拎咗 2 塊蝴蝶酥比我之後   家姐一有蝴蝶酥就比我   不過家姐今次實比我啦   因為姐夫個妹買咗 4 盒比家姐呀

飲完都 3 點 lu   送埋媽咪同家姐就番屋企   里奧大人做公司嘢   我就煲中藥   煮埋雞翼   浸下菜   再出廳抖陣   6 點幾煮飯   7 點前有得食呢 ~

是日晚餐 - 豉油王雞膇 + 煎鮫魚 + 西蘭花

豉油王雞膇 - 今次又係跟高師傅食譜   不過佢整雞翼   我就整雞膇   但我落多咗豉油   所以鹹咗啲   唔係就 Perfert 喇 ~

煎鮫魚 - 之前媽咪比㗎   今晚煎埋去食   等里奧大人即場食   可以脆卜卜呢   但可惜今次無咁脆 ~

西蘭花 - 懶呀   就咁淥熟算喇   好在真係淥咋   因為啲雞翼鹹   要食啲清淡嘢中和番呢 ~

搞掂哂   沖埋涼就睇電視食榴槤   飽到震呀 ~

西貢半天遊 + 松記車仔麵 @ 西貢 ( 13-APR-2013 )

( 13-APR-2013  SAT )

今日每月一 Off 呀   里奧大人約咗姑奶 10 點食早餐   其實我唔鍾意假期約人   因為我鍾意瞓到自然醒嘛   不過呢日 8 點 45 分都醒一醒咗   所以開機洗衫   之後瞓到 9 點 45 分就要起身喇 ~

去金姆指食早餐   食下傾下都 11 點 lu   之後里奧大人同姑奶上屋企整 Ipad   我就去睇中醫喇   醫師一打脈就話我好熱氣   咁又係喎   尋晚食好多炸嘢呀   同埋呢排唔知做咩瞓得唔好   又貧血   真係想懶啲唔調理身體都唔得呢 ~

差唔多 12 點先番到屋企呀   即沖涼喇   里奧大人勁想同我去街   不過又諗唔到去邊   咁我話去西貢   因為難得好天呀   感恩感恩 ~  

去埋旅行社交錢就坐小巴去西貢   今次等咗成 15 分鐘先有車   唔塞車嘅話   車程都係 25 分鐘   都唔算遠   間唔中去下 Relax 都唔錯 ~

今次一定要去番巷仔嘅 "旺泰" 呀   佢有 2 個舖位可以坐室內   雖然有冷氣   不過我見到啲座位好貼近洗手間   所以我坐巷仔   同埋天氣又清涼   坐巷仔都好舒服呢   勁有上次去翟道翟 Feel 呀 ~

脆肉炒椰菜苗 ($58) - 椰菜苗生咗啲   唔係更好食   不過脆豬肉真係超過正   塊皮脆卜卜   下次會就咁叫碟脆豬肉   實在太好味喇

串燒各 $11 - 雞全翼 + 雞腎 + 牛肉 - 無咩特別   只係好想食串燒啫
清湯牛丸金邊粉 ($32) - 里奧大人生痱滋   所以要清湯底   不過我無所謂   因為我會加辣椒粉呢   但下次就會叫冬蔭功湯底喇

里奧大人生痱滋   唔係可以陪我食炸嘢同辣嘢   下次一定要叫埋家姐嚟   可以叫多啲   幫手食嘢呀 ~ 

辣汁魚蛋 + 粉果 - 個辣汁勁正   唔係太辣   但好香呀   下次要再食

食完又行去碼頭   周圍影下相   之後睇下有咩船出島   因為之前想去地質公園   不過無時間   同埋要百幾蚊一個人   好似好貴   因為跟團都係差唔多價錢嘛   所以今次又黎睇下   但今次有好多檔開船去地質公園   上次得 2 間咋喎   咁奇怪嘅 ~

里奧大人影嘅   佢話個爸爸教緊個仔   個仔又好留心聽   不過睇呢個小朋友個樣都好乖咁呢  

我地食完嘢都 3 點   有檔係 3 點 35 分開嘅   環島遊 1 個半鐘 ($88)   不過最後都係跟另一間環島遊 ($50)   佢有環島遊同埋橋咀島   咁我地本身係買環島遊票嘅   全程個半鐘   又可以上岸影下相   但最遲 5 點要上船番碼頭   但架船 3 點半都未到   都唔知要等幾耐   所以就咁去橋咀島 ($20) 算喇   下次先環島遊 ~

坐船吹海風真係好舒服   所以覺得話咁快就到咁喇    行下又影下相   好快都 4 點 45 分 lu      要上船番碼頭喇 ~ 

落船見到好多龍友呀   個個大大枝炮   仲以為影日落   原來影啲鷹   我好鍾意睇鷹㗎   由細到大都鍾意睇 ~  

好喇   行夠影夠喇   臨走前里奧大人話去松記食車仔麵喎   因為佢 Lunch 唔係咁飽   同埋話呢個時候應該無咩人排隊喎   5 點半咋   我真係食唔落一碗車仔麵   所以食咗佢少少麵同豬腸   不過呢間嘅珍珠奶茶非常非常之好飲   有驚喜呀   下次唔食麵都要飲番杯呀 ~

牛腩豬腸蘿蔔粗麵 - 個湯比較杰   牛腩都好入味   豬腸好爽口   同埋份量都唔少 

珍珠奶茶 - $15 杯   真係超級勁好飲   下次要每人一杯呀

坐番小巴去德福   再去馬莎買餅比家姐就番屋企   我今晚飲湯食渣就算喇   因為就咁都好飽肚呢 ~

御泰坊 @ APM (官塘) ( 12-APR-2013 )

炸傳統越南春卷 - 超級勁好味   最開心係家姐唔食   我食埋佢嗰條呀   超級滿足呢

軟殼蟹蘋果沙律配芒果醬 - 媽咪鍾意食軟腳蟹   所以就叫喇 

都幾多青紅蘋果   青蘋果仲好甜添呀

泰式炸蝦餅配酸籽梅汁 - 估唔到有咁多件呢  

辣蝦片超正呀   食幾十塊都無問題   呵呵

醃酸辣扎肉雞爪子 - 唔係好酸   不過好辣

泰式鮮蝦金邊粉 - 去完泰國食金邊粉之後   覺得香港整得真係超級孤寒   蛋都無咩添呀   同埋無味道嘅

香茅香辣炸雞 - 我覺得無香茅味同辣味   因為我食完鳳爪之後   覺得咩都唔辣喇

泰香蔥蒜蓉包 - 必食   真係超級好食呀

椰林樹影 - 都幾香椰子味

辣椒膏炒青 D ?!   我當時無睇英文無睇相   只係諗緊咩叫 "青 D"   我仲以為係泰國蔬菜嘅一種   好似台灣咁叫 A 菜咁呢

( 12-APR-2013  FRI )

終於到 Happy Friday   終於聽日每月一 Off 喇   超期待呢 ~

早餐食芝蛋治烘底   今朝早咗到餐廳   可以食完慢慢嘆報紙   勁爽呀 ~

菇場靜   不過唔緊要   因為聽日 Off 實在太開心   無嘢影響到心情呀 ~

晏晝有 Lunch Box   呢期天氣潮濕   無咩原動力落街行   之後又會熱   又唔會落街行   一個人懶就咩都有藉口添 ~

今晚好開心呀   里奧大人要見客   話好夜先放工   咁我就約媽咪同家姐去 APM 食泰國菜   其實係今朝即興約   所以間餐廳已經 Fully Book   咁我同媽咪就差唔多 6 點到 APM   行咗 15 分鐘左右就 Walk-in 去餐廳   最感恩係家姐 6 點 15 分左右已經係藍田   咁可以好快嚟到開餐呢 ~

食完就送埋媽咪工人搭的士   之後就同家姐行 APM   最後去埋超市就走喇    同家姐行超市就最開心   因為大家都係超級為食   同埋見到咩就會講一餐   唔似里奧大人咁成日問仲有咩買   催催共咁囉 ~

差唔多 9 點就各自歸家喇   我搭地鐵番屋企   打比里奧大人   佢原來已經喺九龍灣   叫佢去明輝食粉   之後我過嚟 Join 佢呢 ~

番到屋企沖完涼   睇下電視   12 點幾先瞓覺   對我嚟講係好夜   不過聽日 Off 就會放縱下自己咁囉 ~

住家飯 @ 媽咪屋企 ( 11-APR-2013 )

煎鹹魚 - 點沙糖喼汁真係超級好味   全晚最好食係呢個餸

蒸撻沙

薑蔥生蠔 - 媽咪第一次整蠔   我覺得好食   可能係想食好耐   但之後媽咪真係整到每況越下   所以我話唔好再整蠔

荷蘭豆芹菜炒鮑片鮮魷 - 話咗幾百次唔好成日整鮮魷   膽固醇高   對老人家唔好嘛   所以我都無食鮮魷  

鮑汁炒生菜

榴槤 - 媽咪比人呃啦   嗰個人又話識揀   點知毫無味道可言

( 11-APR-2013  THU )

仲係回南天 + 毛毛雨   個人攰唔在講   最慘係成日要袋住把遮骨遮   整到個袋重上加重 ~

今朝去完大家樂食早餐   抖陣就幫菇場掃貨   差唔多 10 點就番到菇場   所以覺得啲時間過得幾快咁噃 ~

晏晝食 Lunch Box   衰里奧大人食唔哂啲炒飯就比埋我   明明人哋唔想食咁多飯家嘛   點知又要食埋佢食剩嗰啲   滯到我呢 ~

忙咗陣又 Hea 喇   放工去媽咪屋企食飯   例牌飲咗碗巨湯先   之後家姐 7 點番到嚟就開飯喇 ~

今餐膽固醇完全爆哂燈   蠔 + 豬肚 + 鮮魷   媽咪又買埋榴槤添   但其實血壓高一定唔可以食榴槤 ~

上次姑姐話佢鄰居血壓高食榴槤   即刻唔舒服咩定   所以我姑姐鍾意食都唔敢食呀   仲話錫啲仔女   最緊要自己身體好   唔好要仔女擔心   如果媽咪好似姑姐咁識體諒仔女就好啦   之後千叮萬囑叫我唔好比媽咪食   我話咁大個人點會控制到 ~

我一星期番媽咪屋企一次   佢平時食我都唔知啦   不過我見到實會鬧佢㗎   我仲衰到話攞嚟賤添呀   因為真係好鬼激氣   家姐都話我講得好 Hurt 人呀   不過咁   我都知自己把口好衰   所以會同媽咪講對唔住嘅   因為覺得自己真係好衰女呢   但其實最好都係唔好咁鬧佢啦   哈哈   因為我鬧完佢   自己又火   佢又係唔聽嘅   死哂我啲細胞   但我又唔可以心平氣和話喎   因為話咗 N 咁多次都係咁   唔發火先奇   所以我最後嗰句仍都會話   個身體係妳嘅   唔舒服係妳自己受   最緊要最緊要唔舒服時   唔好怨呢樣怨嗰樣就得喇 ~

同家姐 8 點 15 分就走喇   里奧大人就差唔多 8 點半先喺大陸放工   番到嚟都 10 點幾   咁沖完涼   再開機洗衫等佢啦 ~   

煎鮫魚 + 甜豆炒臘潤腸 + 叉燒蔥粒炒飯 ( 10-APR-2013 )

( 10-APR-2013  WED )

今朝里奧大人要見客   所以早啲番公司   我就瞓到 7 點 45 分先起身呢 ~

仲係陰陰天   同埋有啲凍   好想見到陽光呀 ~

早餐食雪菜肉絲炒蛋米粉   點知黎錯咗炸菜肉絲   仲要之後等 15 分鐘添   之後見其他客人都話啲食物等好耐   鬼咩   入錯哂單   唔漏單已經好好彩喇 ~

菇場淡季   超級靜   好想聽歌呀   不過真係有同事一路帶住 Earphone 聽歌一路做嘢 ~ 

終於 Lunch Time 喇   其實諗住今朝食米粉   Lunch 就食麥皮   但次次真係早餐食米粉反而更快餓   所以我出去行陣再買炒米粉番菇場食呢   食完好滯   有啲反胃添呀 ~

媽咪煲咗豬腳薑   又買咗榴槤  香梨  蔥  鮫魚  雞扒同雞翼比我   所以叫同工人拎比我   唔係聽晚我拎唔到   因為好重呀   之後去太興買埋 $20 叉燒就番屋企 lu ~  

番到屋企就預備晚餐先   洗洗切切要唔小時間嘛   之後就熨衫   又唔知里奧大人見完客未   所以我都煮飯自己食先喇 ~

真係好彩食咗先咋   里奧大人成 9 點先放工呀   咁我都沖埋涼先喇   唔想佢食飯時我就沖涼   變咗無時間傾偈呢 ~ 

是日晚餐 - 煎鮫魚 + 甜豆炒臘潤腸 + 叉燒蔥粒炒飯

煎鮫魚 - 媽咪比㗎   今次好有心機煎   煎到脆卜卜   最開心係無黐底   之後加埋蒸魚豉油   好味道呀 ~

甜豆炒臘潤腸 - 依家菜貴呀   所以食住豆先   $8/半斤   不過我都好耐無食甜豆   都唔知幾錢斤   不過心理上覺得單位數就叫平喇 ~ 

叉燒蔥粒炒飯 - 炒飯對我嚟講係一件好難嘅事   次次痴底   仲要係明明 3 碗飯  炒埋得 2 碗飯  因為痴哂底   同埋唔夠乾身咁   但今次雖然都有痴底   但覺得好好食呀   都幾乾身   加埋叉燒又甜甜哋   又有蔥花爽爽哋   正呀   希望下次都可以炒到咁啦 ~

韭菜豬水餃子 + 超甜粟米 ( 9-APR-2013 )

 ( 9-APR-2013  TUE )

仲係幾凍咁噃   仲有少少雨添   所以個天又係灰灰暗暗   勁唔想起身呢 ~

早餐食菠蘿油   好耐無食喇   但其實麻麻地鍾意食菠蘿油   不過唔想食三文治同麵餐   所以就食佢喇 ~

我習慣係將牛油搽勻個包嚟食嘅   一見到咁多牛油都覺得好多咁   心諗又幾闊佬喎   點知原來得咁細塊咋   又薄喎   不過我都無咩所謂   因為太多牛油會好漏咁呢

潮濕天氣真係令人好易攰   加上菇場又靜   又無嘢做   真係坐喺度都瞓得着   但我一定唔敢瞓   因為我依家鼻寒聲好勁呀   醒嗰下一 Chok   肯定會發出鼻寒聲   因為我上次去韶關喺車度就係發生呢單核突嘢呀   領隊話團友瞓得好香甜   咁比大家一齊抖下先呀   講到幾好聽呀   香甜 ~

終於等到 Lunch Time   今次勁啦   叮孜然雞翼   叮完出嚟嗰下真係香到震呀   下次都係咪搞   比人殺呀 ~

菇場真係超級勁凍   我啲手指係凍到硬哂   所以我依家搵緊啲手襪   咁我唔駛咁辛苦呀 ~

又等到放工   去街市買菜   諗住買菠菜   要 $20/斤 呀   我之前買都係 $8/斤   貴到黐哂線呀   所以買甜豆同粟米就算喇 ~

番到屋企開機洗衫再拖地   開冷氣等個地快啲乾   乾咗即熄冷氣喇   好鬼凍 ~

里奧大人差唔多 9 點先番到屋企   不過我等埋佢一齊食啦   分開 2 次淥餃子仲煩 ~

是日懶餐 - 韭菜豬水餃子 + 超甜粟米

韭菜豬水餃子 - 上次食唔哂呀   所以放冰格   呢檔餃子皮真係好正   煙煙韌韌咁   加上我又鍾意點醋同蒜頭   下次一定再整黎食 ~

超甜粟米 - 想食好耐架喇   食咗 2 條半   滿足到呢 ~

今晚 11 點唔夠就瞓喇   如果 8 點食完飯   11 點瞓就最 Perfect   但 9 點先食完飯   11 點就瞓   就好似未消化完就瞓咁   好在我都眼瞓可以瞓到   我好記得以前同事講   人哋話早睡早起身體好   佢就話早睡早起早啲死   幾咁衰呀 ~

土匪雞翼 + 蠔油唐生菜 ( 8-APR-2013 )

( 8-APR-2013  MON )

又凍番咁噃   真係 "未食五月糭   寒衣不入櫳" 係講得無錯呀 ~

早餐食芝腿治烘底   咁樣就可以一路食一路睇報紙喇 ~

好眼瞓添   菇場又好多人唔喺度   靜上加靜   如果可以瞓番一個鐘幾咁好呢 ~

今日下午要婦科覆診   所以又約媽咪飲茶喇   飲到 2 點半就走人 lu ~ 

3 點半去到   但 5 點先有得睇   睇完就去美麗華大廈拎 Coupon   之後坐 1A 去牛頭角拎中藥   坐巴士嘅時候   我後面個女人請電話都好大聲   鄉音人呀   唔知點解啲鄉音人講嘢係要講到隔離村都要聽到咁嘅   坐我隔離個女人直頭擰轉頭 "噓" 佢呀   不過只係細聲咗一句咁大把   之後又繼續講   無耐前面有一班旅客   因為有個男人叫成班人落車   咁我隔離個女人就走上前坐   佢坐低之後又望我   叫我一齊坐埋前面呀   佢話個女人講嘢又大聲   把聲又唔好聽   我覺得佢講得好搞笑 ~

旺角勁塞車呀   我半路都瞓咗呀   所以我由旺角瞓到新蒲崗   去到牛頭角都差唔多 6 點 45 分   足足一個鐘   其實可以搭地鐵再行去藥房拎藥   不過我懶行   所以坐 1A   好在唔駛買餸   唔係就真係好鬼趕喇 ~

番到屋企咩都唔理就煮飯喇   里奧大人 7 點半放工   番到屋企仲差少少先有得食   所以叫佢沖涼先   我勁鍾意沖完涼先食飯㗎   但之後唔駛洗碗喎   即係好似做女咁呢 ~

是日怬餐 - 土匪雞翼 + 蠔油唐生菜

土匪雞翼 - 用孜然粉醃咗 10 分鐘咋   所以唔得入味   但今次個皮好脆   真係有得必有失喇   哈哈 ~


蠔油唐生菜 - 其實我好少食蠔油   我覺得蔬菜本身係有份清甜嘅味道   不過費事里奧大人唔太食菜   所以加啲蠔油   佢就會食   無咁淡口嘛   麻鬼煩 ~

搞掂哂就沖涼   之後按摩   再做下運動   抖陣就瞓喇   好鬼攰呀今日~

韭菜豬肉餃子 ( 7-APR-2013 )

( 7-APR-2013  SUN )

尋晚里奧大人連飲 4 杯功夫茶   終於瞓唔着啦   之後出廳睇 "心計"   睇到 4 點先瞓 ~  

今朝同鐘點去食早餐   我將自己嗰份火腿奄列同牛油多士留比里奧大人   一份早餐 Share 食都幾好   如果唔餓嘅話 ~

番到屋企無耐   里奧大人都起身 lu   食埋份早餐   沖埋涼就番教會喇 ~

崇拜完畢就一齊去超市買菜就番屋企   里奧大人做公司嘢   我就睇雜誌咁啦   2 點幾就去 KFC 食 Tea   一個 Tea Set 真係好鬼飽 ~

好似好眼瞓咁   不過又唔想瞓   所以包定餃子   了咗心事先   之後睇電視   睇睇下都頂唔順   瞓咗半個鐘 ~

唔知做咩鬼   呢排個肚間唔中谷住谷住   但瞓咗覺又好啲喎 ~  

5 點先飲完碗湯   唔會咁早食飯   所以我 6 點幾又瞓咗   姑奶就啱啱到咗我屋企   因為佢要搵里奧大人整 Ipad   之後我瞓到 7 點半   我醒之前原來佢已經走咗 lu ~

我抖陣再煮餃子   差唔多 8 點幾先開餐   好在煮餃子好方便   一隻鑊搞掂 ~ 

是日懶餐 - 韭菜豬肉餃子

韭菜豬肉餃子 - 實在想食餃子好耐喇   所以一定要整呢   買咗 $10 餃子皮   $25 梅頭   $4 韭菜   份量啱啱好   感恩呀 ~  

里奧大人都鍾意食餃子   粉麵之類嘅嘢   所以食得好快架   咁就最好啦   快啲食完   我可以快啲洗碗沖涼休息嘛 ~

潮宮 @ Mega Box (九龍灣) ( 6-APR-2013 )

避風塘炒蟹 - 是日特價 $38 抵啦   所以叫嚟食   估唔到都幾大隻   不過出街食蟹真係好麻煩   一定要食完蟹先可以食其他嘢   唔係洗手洗到攰呀

第一時間撩走啲紅辣椒   唔小心食咗就大鑊   不過啲避風塘料都好辣下   食到流鼻水呀

香煎蠔仔烙 (例 $88) - 新鮮食第 1 塊好好味   凍咗之後極度難食   口感好似唔熟咁 

滷水鵝片 (例 $118) - 唔錯   最緊要唔好 "鞋"

方魚肉碎粥 (碗 $38) - 份量都唔少   可以分到 4 小碗

鹹酸菜 - 無味嘅   仲諗住酸酸地   開胃啲添

功夫茶 - 唔好睇佢細細杯   飲完一杯   之後會好精神

( 6-APR-2013  SAT )

依家好多時星期六都會同 8 卦食早餐   今朝試翠華   不過無翻單啦   無厘味道   最難頂係啲麵好腍   最鬼驚   最出名嘅脆豬又係腍嘅   真係好失望呢 ~

未瞓夠   所以食一 Set 早餐真係會覺得好飽   好在比咗半份滑蛋比 8 卦   想比埋脆豬佢   不過佢又話飽 ~

菇場靜啦   唔駛講   個個一點即準時走 lu ~

去牛頭角睇中醫   再去街市買餸就番屋企抖陣   差唔多 2 點幾就同里奧大人去金姆指食嘢喇 ~  

好攰呀   煲埋香茅茶就灘喺梳化唔願郁喇   難得里奧大人話今日唔駛做公司嘢住   咁我就話出去行街食晚飯呢 ~ 

本來想去九龍城食泰菜   但望個鐘已經 6 點 15 分   太遲喇    所以去 Mega Box 算喇 ~

坐小巴仔去 Mega Box   今次真係去潮宮食喇   如我表哥所講   服務真係唔錯   但味道就 OK 啦   最緊要係咩呀   夠靜呀   因為無咩人   星期六晚市都無咩人   喺 Mega Box 入面真係好難做生意   太隔涉喇 ~

食完就去 Ikea 睇嘢   之後就住 Shuttle Bus 去德福   里奧大人去買波鞋   不過試咗又唔啱   咁仲好啦   可以慳番 ~

番到屋企即沖涼   抖陣就叫里奧大人食榴槤   食到咁飽都可以連食 4 件榴槤   勁呀 ~

住家飯 @ 媽咪屋企 ( 5-APR-2013 )

陳皮蒸泥鯭

白灼蝦

叉燒 (外賣)

炒青豆

瑤柱燜節瓜 - 一開呢   我第一句話白雪雪肯定無味   不過媽咪依然係嗰句 "鍾意清清哋"   我話下次咁清嘅餸唔駛預我   哈哈

髮菜眉豆雞腳豬骨湯

泰國榴槤

( 5-APR-2013  FRI )

又星期五喇   但好鬼攰噃 ~

早餐食芝士吞拿魚治烘底   依家食多士餐都要 $18   咁我食雙拚抵 d 咯   烘底都係 $19   不過呢間烘得好求其囉 ~

成個天黑哂呀   勁似放工咁   之後番到菇場   里奧大人話我知已經黃雨喇 ~

菇場靜啦   個天又黑哂   真係好想瞓下覺 ~

今日有 Lunch Box   食完又上網咁啦   呢排好鬼攰   真係無原動力落街行咯 ~

放工番媽咪屋企食飯   周圍濕立立   真係超級超級勁大回南呀   最鬼驚咁樣 ~

家姐 6 點 45 分番到屋企   可以開飯喇   家姐依家又減肥   只食菜同肉   其實我哋唔食飯都無咩所謂   我都係食餸多   同埋飲湯都飲飽   真係 7 成飽   所以我成日話如果媽咪想整多啲餸   咁就唔好煲湯   飲完湯真係無哂戰鬥力 ~

里奧大人 8 點半打嚟   話已經食完米線番到屋企   真係好多時我出街呢   佢就會好早番到屋企㗎噃 ~

我同家姐都 8 點半走喇   番到屋企即沖涼   仲要開冷氣呀   因為好翳焗   不過開咗個幾鐘就要熄喇   覺得好鬼凍呀 ~

真係勁攰呀   所以 11 點即瞓喇 ~