譚仔三哥 @ 九龍灣 ( 31-JUL-2014 )

( 31-JUL-2014  THU )

里奧大人今朝上廠   所以 6 點半要起身   我就瞓到 8 點 15 分先起身 ~

好悶呀   所以同 8 卦出去食 Lunch   之後再陪佢去一田買烏冬就番菇場喇 ~

差唔多放工   PMS 話佢比人炒咗   好 Shock 呀   不過我都唔方便同佢喺菇場傾   同埋我又放工嘛 ~   

唔想煮   咁啱里奧大人話 8 點可以番到屋企   咁就同佢去譚仔食嘢喇 ~

番到屋企抖陣就沖涼   咁 PMS 9 點半 Whatsapp 話想同我傾   咁我打比佢啦   傾到 11 點   不過我唔想再傾喇   要瞓覺呢 ~

嘉華大酒樓 @ 官塘 ( 30-JUL-2014 )

( 30-JUL-2014  WED )

今朝好想食米粉   但叫咗又唔想食   不過最後都慢慢食哂   真係唔想嘥嘢囉 ~

攰呀   唔想點郁   好在唔忙咋   呵呵 ~

Lunch Time 無出去   所以食 Flakes 喇 ~

今晚大食表妹都嚟嘉華食飯   有佢喺度就唔驚食唔哂啲嘢   哈哈 ~

之後佢請食雪糕   算佢啦   唔可以成日食人哋家嘛 ~   

食完上媽咪屋企坐陣就走喇   大食同我一齊走   始終都避唔過佢   哈哈 ~

同里奧大人差唔多 9 點番到屋企附近   所以陪佢食埋嘢先番屋企啦 ~

睇陣電視   11 點幾瞓   夜晚啲時間真係過得好快呢 ~

黑椒牛丸辛辣麵 ( 29-JUL-2014 )

( 29-JUL-2014  TUE )

尋晚瞓得唔好呀   今朝 8 點起身   去大家樂食完早餐就打的番菇場 ~

菇場唔忙   咁都好   可以抖下 ~  

勁眼瞓呀   所以 Lunch Time 都瞓咗半個鐘   之後食 Flakes   話咁快又要開工 lu ~

放工即走  抖陣就煮麵食喇   今晚我覺得自己好勁   開住風扇食辛辣麵   食完先開冷氣   抖陣就沖涼   爽 ~

里奧大人 8 點放工   我叫佢買煎釀三寶番屋企   我就煮個泰國媽咪麵比佢食   喺屋企食舒服啲   同埋我真係好想快啲見到佢呢 ~

搞掂哂又打下機咁啦   今晚正常時間 11 點幾瞓 ~

滇二哥雲南米線 @ 新蒲崗 ( 28-JUL-2014 )

( 28-JUL-2014  MON )

今朝有啲胃口食早餐   感恩感恩 ~

部腦打咗柴   所以用 Partner 嗰部   點知仲衰過我嗰部 ~

Lunch Time 唔餓   所以差唔多 1 點先食 Flakes + 朱古力奶 ~

真係好喇   到 3 點幾就開始餓喇   放工即去食酸辣米線   仲要係下午茶時段   呵呵 ~

食完行一田   之後番屋企喇 ~

里奧大人 8 點幾先放工   佢食埋嘢先番屋企 ~

個肚有少少唔舒服   所以今晚 10 點瞓喇 ~

吉野家 @ 九龍灣 ( 26-JUL-2014 ) + ( 27-JUL-2014 )

( 26-JUL-2014  SAT )

尋晚半夜食咗強勁止痛藥   真係 OK 喎   都幾快瞓到   同埋唔痛   感恩感恩 ~

8 點半起身打的番工   買咗奶油多 + 奶茶   因為我好驚眼瞓   如果唔係想唔飲囉 ~

菇場部腦終於打柴   希望救得番啦 ~

放工即走   番到屋企抖到 2 點半就去漁米之鄉飲下午茶   飲到 4 點就走 lu ~

今日勁喎   食到嘢   勁想去吉野家打邊爐   所以 6 點半出門口   感恩有位呀   因為次次經過都要等位嘛   

食完就番屋企喇   好景不常   無啦啦肚痛又嘔   仲以為食錯嘢添   原來係每月一到嘅唔舒服   咁沖埋熱水涼   9 點就瞓 lu ~         

( 27-JUL-2014  SUN )

朝早仲有啲肚痛   所以唔番教會   本來里奧大人都起咗身   不過我叫佢瞓啦   醒咗就出去買個包   咁我再陪佢下午茶 ~

佢 12 點醒咗   去買包番屋企食   之後 3 點幾我先醒   但唔想食嘢   咁叫佢自己落街買嘢食算喇   我再瞓   瞓到 5 點幾就醒 lu ~

差唔多 7 點幾有啲餓   勁想食豬扒飯   所以叫佢去大家樂買番屋企一齊 Share 食 ~

今晚都係 11 點瞓   不過瞓覺嘅時候   個肚有啲唔舒服   但就唔係扯住嗰啲痛   所以唔食藥喇 ~

嘉華大酒樓 @ 官塘 ( 24-JUL-2014 ) + ( 25-JUL-2014 )

( 24-JUL-2014  THU )

早餐食腿蛋治   因為突然間好想食呀 ~   

菇場唔太忙   Hea 過最好 ~

Lunch 食 Flakes + 朱古力奶   菇場好凍   所以成日覺得食熱嘢會好啲   不過成日食粉麵真係好鬼飽 ~  

里奧大人上大陸   我又同媽咪 家姐去嘉華食飯 lu ~

食完就上屋企拎湯   坐陣就番屋企喇 ~

里奧大人 9 點番到屋企   陪佢傾陣偈   之後我 10 點幾瞓喇   個肚谷住谷住咁   所以想早啲瞓呢 ~

( 25-JUL-2014  FRI )

終於每月一到啦   9 點起身打番菇場請假   咁見個肚唔痛就去埋睇醫生呢 ~

掛咗號   咁 9 點半先有得   但唔理喇   落咗去先   之後里奧大人打嚟   佢話知我出咗房   但咁耐都唔番入嚟   所以出嚟睇下我咩事   驚我暈咗 ~

之後睇完就約佢去太興食早餐   不過我其實唔想食   但又唔想佢一個人咁悶 ~

我番到屋企即沖熱水涼就瞓喇   佢就 11 點出門口   因為水姑今日去澳洲   所以佢特登請假幫佢執嘢同陪佢入機場呢 ~

我瞓到 4 點呀   之後飲湯   睇波等里奧大人番囉   佢差唔多 9 點先番到屋企   所以叫佢買茶葉蛋比我食喇 ~

11 點瞓喇   因為個肚嚟料 ~

香煎黑胡椒扎肉 + 蝦米蒸節瓜 ( 23-JUL-2014 )

( 23-JUL-2014  WED )

里奧大人今朝 6 點半起身喇   因為 9 點要番到大陸 Office 見客 ~

我 8 點先起身呀   食早餐係趕啲㗎喇   今朝仲食米粉   食完熱鬼死   哈哈 ~  

     
菇場仍然無大粒   所以有嘢都唔願做   個個唔係上網就玩電話   幾咁爽   呵呵 ~

1 點幾先食 Flakes + 朱古力奶   都好飽肚㗎   不過唔可以成日食   因為依家慣咗 Lunch 食啲濃味嘢   突然咁健康   要啲時間適應 ~

里奧大人 2 點打嚟話番咗香港   食完 Tea 就番公司   今晚一定夜放工   因為見客無咗半日 ~

     
放工即走 lu   今晚超勁焗熱   但我都照徑步   徑 5 個圈算喇   流咗超勁多汗呀   不過話時話   呢排徑步之後   個 Shoulder 真係唔痛   同埋感覺個人係舒服咗   唔識點講 ~         

番到屋企即沖涼   之後抖陣就煮嘢 lu   煮完即食   好鬼餓呀   哈哈 ~   

里奧大人 8 點半放工   呢排都多數煮麵或者米粉   天氣熱真係無咩飯癮 ~   

是日懶餐 - 香煎黑胡椒扎肉 + 蝦米蒸節瓜  

香煎黑胡椒扎肉 - 老實講   真係完全唔覺有黑椒味   依家啲嘢係咁㗎喇   貴又貴哂   但份量又會細咗   同埋連調味都無埋咁呀   可悲 ~   

蝦米蒸節瓜 - 呢期鍾意食節瓜   同埋節瓜又可以留多 2 晚先煮   哈哈 ~

搞掂哂都 10 點   打下機   睇下電視   11 點幾都瞓 lu ~

麥芽糖焗雞肶 + 蔥油菜心 ( 22-JUL-2014 )

 

( 22-JUL-2014  TUE )

實在太感恩喇   屋企附近開咗間凱斯施   咁里奧大人可以多個選擇 ~

早餐又食菠蘿油   開始厭喇   哈哈   所以我都唔敢再成日話人來來去去都係食嗰啲   其實原來自己都係   呵呵 ~    

菇場忙忙哋   不過好在大粒唔喺度   咁樣 Free 好多   唔駛成日昅住佢哋會唔會行出嚟 ~

Lunch Time 同 8 卦出去食   幫埋 PMS 買飯就番菇場喇   好鬼熱 ~

我嘅紅咖哩豬扒意粉

8 卦嘅芥菜鹹蛋肉片湯飯   麻甩飯   哈哈

3 點幾無啦啦行雷   但就無落雨   大聲到好似空襲咁   嘈咗成 15 分鐘   我 Feel 到菇場震添呀   之後就落雨   要落就快啲落喇   唔好放工先落呢 ~

放工好好天呀   所以又去徑步  仲有啲涼涼哋嘅感覺   實在太好喇   不過今日攰啲   所以只係徑咗 6 個圈就番屋企 lu ~       

沖完涼抖陣就煮嘢   8 點開餐   食完抖陣又沖涼   今次沖涼相距時間短呀   所以我自己都覺得好似沖咗無耐又沖咁   有啲亂呀   哈哈 ~       

今晚里奧大人 8 點半先放工   咁水姑叫咗佢朋友拎啲生果比我哋   咁里奧大人拎埋先番屋企 ~   

是日懶餐 - 麥芽糖焗雞肶 + 蔥油菜心  

麥芽糖焗雞肶 - 好有心機焗   不過一拎出嚟   我覺得好似喺大快活食 Tea 咁   哈哈 ~ 

蔥油菜心 - 有啲蔥油係好食啲嘅   但我平時好鬼懶唔會咁整囉 ~

搞掂哂就打機   依家好無聊呀   玩推銀機   因為我唔想用腦諗個 Game 點玩嘛 ~

今晚 10 點 45 分瞓覺   又瞓到喎 ~ 

五香雞肶 + 唐生菜 ( 21-JUL-2014 )

( 21-JUL-2014  MON )

星期一喇   應該唔會太精神   哈哈 ~

早餐食餐蛋治   夠哂飽 ~

菇場忙啦   之後停下做下咁囉 ~

Lunch Time 又未餓   所以陪 PMS 去還書   之後再買嘢食番菇場   出面好鬼熱呀   真係唔想行咁耐搵食 ~

一出完汗就好鬼攰   好在菇場冷氣夠   抖陣就成身爽哂   之後仲覺得凍添   所以有啲想瞓   哈哈 ~

去街市買菜就算喇   一路行一路想嘔   可能太焗喇   勁辛苦 ~

番到屋企沖涼再抖陣   浸完菜又抖   之後拖地啦   不過真係好唔舒服咁   所以拖下抖下   我好少會咁   因為我鍾意一次過做哂呢 ~

好感恩之後無咩嘢   又未餓   所以再抹櫃同書房   等埋里奧大人放工   8 點半就一齊開餐喇 ~      
是日懶餐 - 五香雞肶 + 唐生菜 

五香雞肶 - 諗住焗㗎   不過無心機   所以就咁用五香粉醃一陣   之後就咁蒸熟就算   再加啲辣蘿蔔   賣相無咁寡   哈哈 ~  

唐生菜 - 又係懶   但想食菜   煮生菜最好 ~

搞掂哂抖陣就沖涼 lu   里奧大人就做公司嘢   今晚勁攰   所以 11 點要瞓喇 ~    

吉野家 @ 九龍灣 ( 20-JUL-2014 )

( 20-JUL-2014  SUN )

今朝 8 點半起身   因為姑奶教會有慶祝活動 ~

9 點 15 分就出發   2 姑奶嚟接我哋去大埔   之後一齊食埋早餐就去會堂喇 ~

1 點完畢就去飲茶   3 點幾走人 lu   同里奧大人喺大埔行一陣   之後坐巴士番屋企 lu ~

番到屋企原來都差唔多 5 點半   又未餓   所以 Hea 到 7 點先出去食嘢 ~

我想去吉野家打邊爐   都諗住無位   不過里奧大人話去睇下先囉   好感恩有位呀   因為我真係好想打邊爐囉 ~

食完就番屋企   9 點一齊出去徑步   依家越徑越快   以前徑一個圈要 5 分鐘   依家 2 分鐘左右就徑完   不過我係計時間徑步囉   如果徑 6 個圈   真係好快徑完   哈哈   徑咗半個鐘   身水身汗   番到屋企即沖涼 ~

之後里奧大人番黎喇   我其實次次都會快過佢番屋企   咁就唔駛醃住等沖涼嘛 ~

11 點半瞓喇   星期一最唔想起身   所以早啲瞓好啲 ~

稻香超級漁港 @ 德福廣場 ( 九龍灣 ) ( 19-JUL-2014 )

蒸多寶魚

唔記得咩名

沙拉惹味骨

上湯浸莧菜

通菜炒牛肉

美極金薯牛柳粒

( 19-JUL-2014  SAT )

今朝約咗 8 卦食早餐   我 8 點 40 分去到   佢已經食完   我話佢食得咁快唔等我   佢 8 點 20 分已經到咗餐廳   不過我無睇到 Whatsapp   之後我話佢   又話 8 點 45 分先到   所以我咪遲啲先起身   估唔到你咁快囉   呵呵 ~

無哂大粒   所以都 Free   不過有嘢做囉   但真係無 Mood   所以做下停下   之後陪 8 卦研究點煮溫泉蛋   最後結論係放棄   因為過程好煩 ~

放工同 PMS 一齊即走喇   里奧大人喺鑽石山地鐵站等我   PMS 就喺太子轉車   其實里奧大人同 PMS 喺南丫島見過   但當時傾咗幾句就走   所以無可能記得佢咩樣   哈哈 ~

實在太熱   所以唔想周圍搵食   同埋我又好想食酸辣米線   所以去星林居   我同里奧大人講我一星期食 3 次酸辣米線係咪好勁   佢話係   同埋知我真係好鍾意食   不過我同佢講   係時候停一停   我唔想咁快食厭 ~

食完即去 GAP 買嘢   因為有 8 折   不過我買唔到嘢囉   但里奧大人就開心啦   買咗 2 件裇衫 + 2 條長褲   好似 8 折再 85 折   真係好抵   如果我有嘢買到就好啦 ~

買完就去黃金睇電腦   里奧大人話驚我又話迫又頭暈   叫我番屋企先   咁我又唔想喎   我話我去茶餐廳坐囉   佢就可以安心買嘢喇 ~

差唔多 5 點就走得   佢番屋企放低嘢   我就去稻香   今晚 6 個人食飯   諗住同水姑一齊就一定去勝利   但佢無啦啦 Book 咗稻香   諗住無咁嘈   其實一樣咁嘈 ~

食到 8 點就走喇   一齊坐車走   因為我哋去水姑屋企   睇下有咩要幫佢執嘢去澳洲 ~

搞到 9 點半   係時候走喇   真係好鬼攰囉 ~

沖埋涼就睇陣電視   11 點半瞓喇 ~