馳名蔥油田園雞 (外賣) ( 31-OCT-2024 )

留咗啲拎聽日帶飯嘅   所以一隻碟都裝得哂喇   

( 31-OCT-2024  THU )

尋晚瞓瞓下有啲焗   所以又要開番冷氣瞓 ~

今朝鬧鐘未響都醒咗   不過等埋鬧鐘響先起身 ~

同里奧大人出去食早餐   職員一見我就話好番哂喇   因為我出聲講嘢   哈哈 ~

食完去里奧大人公司坐陣先番工   唔想番到公司未開門呀 ~

菇場唔忙   今日 3D 呀   因為西瓜同好多同事上哂廣州呢 ~

Lunch Time 去日本城買風筒   買完再去買菜   之後番菇場喇   今日要食泡菜杯麵   因為已經過咗期 10 日啦 ~

唔忙就做自己嘢啦   所以好快就放工 ~

買埋隻雞就番屋企   雖然有時唔想煮   但又更加唔想出去食囉 ~

番到屋企都備喇喇   里奧大人 6 點幾先放工   我可以慢慢整 ~

是日晚餐 - 馳名蔥油田園雞 (外賣) + 芥蘭苗

馳名蔥油田園雞 (外賣) - $88 係一隻雞   所以好抵   同埋啲土雞肉都好滑 ~

芥蘭苗 - 醫師叫我食深色菜   所以選擇唔多呢 ~

洗埋碗就整蕃薯糖水   之前阿妹買比我㗎   不過我唔舒服無心情整   但見啲蕃薯越縮越細   所以要整喇   咁順便煮埋芝麻湯丸喇 ~

阿妹話 1 磅蕃薯要 $26   咁真係好貴   佢話買咗接近 $200   我都第一次聽人講話買二百蚊蕃薯   哈哈 ~

食完抖陣就沖涼   之後同里奧大人一齊睇 "沖遊泰國" ~

再睇陣 Youtube   今晚 10 點 45 分先瞓覺 ~

鹹蛋黃汁滑蛋叉燒焗飯 (外賣) ( 30-OCT-2024 )

( 30-OCT-2024  WED )

感恩一覺瞓天光呀   尋晚開 Dry 瞓覺都唔錯   起碼唔駛咁凍 ~

今朝我鬧鐘響   里奧大人都起身   仲第一句問我仲有無唔舒服 ?!   算佢啦   記得我尋晚頭暈 ~

早餐仍然食千屠吐司   終於食哂   真係要停一停   哈哈 ~

菇場忙咗陣就 Hea 過   咁就 Skype 過日啦 ~

10 點幾見阿花飲齋啡   我以為佢眼瞓   原來佢話想食甜餅所以飲齋啡   我話咁早 High Tea   佢話尋日直頭係薯片   佢成日 10 點幾就會食零食   仲堅過我 ~

Lunch Time 蒸好飯就出去行下   番到嚟都 12 點 20 分   咁嘅時間開飯就最好 ~

唔忙就 Skype   咁時間就好快過㗎喇 ~

放工即走   番到屋企就蒸熱尋晚食剩嘅兩餸飯   再淥埋啲菜心苗   好在無壞咋 ~

里奧大人 6 點幾放工   順便買埋晚餐番屋企 ~

食完去超市買涼粉   估唔到里奧大人又話一齊去   咁都好呀   當散下步 ~

番到屋企就開機洗衫   之後沖涼休息 ~

里奧大人 8 點半要用 Zoom 開會   開到 9 點半   仲諗住會開到好夜添 ~

睇多陣 Youtube   今晚 10 點 20 分瞓覺   呢排仲係好攰咁 ~

辣子雞拚生炒骨飯 + 魚香茄子拚雞扒飯 (外賣) ( 29-OCT-2024 )

里奧大人話阿姐比多隻雞翼   因為雞扒得 1 塊   我話如果個餸係得 1 塊雞扒又好少咁喎

( 29-OCT-2024  TUE )

尋晚瞓得都唔錯   雖然去咗次廁所 ~

今朝起身有啲頭暈   所以做咩都要慢動作 ~

早餐食千層吐司   居然食剩一半   咁要留番聽朝食 lu ~

菇場忙咗陣就可以抖   實在太好 ~

Lunch Time 都喺菇場休息下   反正今日有 Lunch Box 呢 ~

唔忙就繼續抖   今日真係唔想郁 ~

放工即走   今晚唔煮喇   本來里奧大人話食豬潤麵   但我最後都係話買兩餸飯   因為豬潤麵無得少麵   我又食唔哂   同埋我想堂食   無理由一碗 Share 食嘛   所以都係叫里奧大人買飯算喇 ~

里奧大人話估唔到我食兩餸飯   我問佢點解咁講 ?!   佢話我講唔想成日食味精嘛   因為今朝我話唔舒適煮飯都好攰   佢話我怨呀   我話唔係怨   只係怨你唔識煮飯   成日要我唔舒服都要食味精嘢   之後佢叫我教佢煮 ~

食完抖陣就開機洗衫   之後沖涼休息    里奧大人就熨 2 機衫 ~

依家又睇 "沖遊泰國"   曼谷真係一個我好鍾意嘅地方   可能次次都食買玩得開心啦   哈哈 ~

仍然有頭暈   所以睇多陣 Youtube   今晚 10 點都瞓覺喇 ~

蠔油燜薯仔栗子排骨 + 菜心苗 ( 28-OCT-2024 )

( 28-OCT-2024  MON )

尋晚去咗次廁所   之後都好快瞓番   感恩感恩 ~

今朝早餐食黑岩餐包   我真係好鍾意食呢個包   因為麵包質感好 Soft ~

菇場忙咗陣   咁我同阿齋講嘢   佢個樣好錯然   之後話妳開番聲喇   但把聲仲係沙沙哋囉 ~

家姐今朝去睇中醫   之後話情況同我一樣   氣管受細菌感染   真係有排搞 ~

我又每月一到   唔怪得咁攰啦 ~

Lunch Time 出去買麵包   買完就行咗陣   番到菇場可以即刻開飯了 ~

唔忙就 Skype   唔係日子會好難過   哈哈 ~

番到屋企即預備晚餐   不過好簡單   只係翻熱同淥菜 ~

是日晚餐 - 蠔油燜薯仔栗子排骨 + 菜心苗

蠔油燜薯仔栗子排骨 - 估唔到又幾好味喎   我覺得呢啲燜餸比較健康   但呢啲餸又要食啲白飯   如果唔係真係飯都唔駛煮   因為食藩仔栗子都好飽肚下 ~

菜心苗 - 之前買咗 1 斤   都預咗食幾晚   始終呢排唔係點想食嘢   仲有 10 幾條剩咗   其實唔想擺咁耐   分分鐘之後仲唔會食   但真係唔想格硬食囉 ~

洗完碗就開機洗衫   沖埋涼就休息休息 ~

我同里奧大人講話攰到不得了   好似瞓極唔夠咁   話我之前燒得太勁   我話唔係好勁啫   佢好大反應話 40.9 度呀   我都唔記得添   不過咁樣病一樣真係元氣超級傷呀 ~

睇多陣 BAO Family   今晚 10 點 20 分都瞓覺 lu ~

蕃茄肉碎扁意粉 + 蕃茄薯仔栗子湯 ( 27-OCT-2024 )

( 27-OCT-2024  SUN )

尋晚本身應承里奧大人去佢公司幫手   但鬧鐘響我都想繼續瞓   之後里奧大人話瞓啦   瞓到夠為止先好起身 ~

之後我一瞓就瞓到 10 點   食完早餐再沖埋涼   就去里奧大人公司喇 ~

阿妹見到我   話我重出江湖   因為佢哋習慣每個星期點都會有一日見到我嘛   但我病就會見唔佢哋呢 ~

幫里奧大人執好個櫃   話咁快又已經 1 點   所以我去買午餐喇 ~

京都骨飯超級好味呀   可能口淡淡   食啲酸酸甜甜嘅餸就覺得好開胃   今餐算係最食得到嘢呢

叻叻請㗎   我諗住即刻食   點知阿妹同里奧大人講話凍嘢唔可以食   所以叫我拎番屋企   等好番先食得

食完就番屋企   里奧大人要去開會 ~

番到屋企即滾湯   之後執嘢   抖陣又燜嘢   咁樣都已經 5 點半   又要開始預備晚餐 ~

今日諗住會有啲時間抖下   但整呢樣嗰樣又唔敢瞓   始終開住火嘛   所以搞到我有啲頭痛 ~

里奧大人 6 點番到屋企   叫佢抖陣先呀   因為未食得 ~

是日晚餐 - 蕃茄肉碎扁意粉 + 蕃茄薯仔栗子湯

蕃茄肉碎扁意粉 - 大家都無咩胃口   煮咗少少扁意粉   真係肉碎多過扁意粉   咁都好   聽日大家都有 Lunch Box 喇 ~

蕃茄薯仔栗子湯 - 我仲加咗南瓜   今次個湯好甜呀   唔知係咪加咗栗子 ~

食完就開機洗衫   之後沖涼休息   里奧大人就熨衫 ~

里奧大人同事去完瑞士   買咗朱古力一齊食   里奧大人本身有 1 粒   但 CF 話比多粒佢太太   之後里奧大人望到有其他顏色   佢就拎嚟影相   之後諗住擺番原位   但 CF 又比多 2 粒佢   話呢份係一套嘅味道   哈哈   里奧大人每逄有食物   都會第一時間影比我   咁我就會提佢拎出嚟   唔係擺到下年都唔知㗎

睇陣電視同 Youtube   今晚 10 點 15 分都瞓覺 lu ~

燒排骨 (外賣) + 炒麵 + 菜心苗 ( 26-OCT-2024 )

( 26-OCT-2024  SAT )

今朝同里奧大人一齊食早餐   食完就去搞啲嘢   佢就番工   各有各忙   呵呵 ~

差唔多 1 點先搞掂   今日去唔到家姐屋企   所以佢話特登過嚟陪下我   同埋我哋一齊食午餐喇 ~

今日大家都病病哋   所以叫兩個餐 Share 食   最後都食剩飯同河粉   平時家姐點都會食埋去   今次真係唔得啦   哈哈 ~

香茅炒牛肉飯 ($58) - 啲牛肉好 "鞋"   有啲失望

香茅豬扒湯河 ($50) - 豬扒都幾好味   下次都係叫豬同埋雞穩陣啲

熱蜜桃鹹柑桔 (+$6) - 飲品就非常之 OK   飲到最尾都仲好夠味

我哋 3 個都病   里奧大人食完就番屋企瞓覺   我同家姐慢慢食埋先走 ~

咁我陪家姐去搭地鐵   順便買埋餸 ~

個人仲係溫溫燉燉   我拎住張一百蚊紙買餸   咁期間都有買嘢   但用八達通   我行到一半覺得好似無咗張一百蚊   以為自己放番喺銀包   但拎住二袋嘢   所以都唔想開銀包搵喇 ~

番到屋企摺個環保袋   好奇怪點解有張紙   原來係張一百蚊呀   我都唔知幾時放落去 ~

里奧大人先搞笑   以為我同家姐傾偈傾咁耐   我話去買餸要慢慢行呀   再望個鐘原來已經 4 點   啲時間真係過得勁快 ~

之前唔舒服無動力做家務   今晚真係頂唔順要執下間屋   感恩好快搞掂   里奧大人都話間屋好似新嘅一樣   哈哈哈哈   因為之前好鬼亂呀   啲嘢放埋一堆就算 ~

家姐比嘅蛇膽陳皮   真係好好味喎   食完個喉嚨係舒服好多   家姐話咳到要含住嚟瞓   咁先瞓得到呀   佢又係咳得好嚴重

是日晚餐 + 燒排骨 (外賣) + 炒麵 + 菜心苗

燒排骨 (外賣) - 之前買過一次   我同里奧大人都覺得幾好味   所以今冷再買   但食剩 2/3   咁留番聽晚再食 lu ~

炒麵 - 里奧大人話做咩唔整叉燒炒麵 ?!   我真係無諗過喎   不過我都唔想開火煮嘢   因為真係好攰   我覺得食哂啲藥仲攰過食藥嘅時候   唔知係咪仲有炎症   所以咁攰呢 ~

菜心苗 - 覺得好似好耐無食菜咁呀   所以點都要食啲 ~      

沖埋涼就休息   睇下電視   今晚 10 點 20 分都瞓覺 lu ~

皮蛋艇仔粥 + 艇仔粥 + 炒麵 (外賣) ( 25-OCT-2024 )

我食皮蛋艇仔粥   里奧大人就食艇仔粥   大家食到一半都好飽   之我買 1 碗 Share 食啦   呢排不在狀態   所以個人諗嘢都慢過人

我哋食咗幾啖都食唔落   咁留番聽晚食 lu

( 25-OCT-2024  FRI )

感恩終於一覺瞓天光呀   仲要係無咳   不過都係瞓極唔夠咁囉 ~

里奧大人話佢燒咗成晚好攰   但我話醫生又話你無發燒   不過我尋晚摸佢身體都係慶嘅   呢排真係要佢自己顧自己   我依家仲未好番   雖然就無之前咁嚴重   但呢排又多嘢搞   想好好休息都唔得 ~

今朝同里奧大人出去食早餐   居然無通粉   咁啱里奧大人就係想食啲濕嘢   但無計啦   我哋都唔想轉地方食 ~

我幫手食啲碎蛋   平時點都可以幫手食哂   但唔舒服就唔會咁囉   我將佢嘅碎蛋放入三文治   所以今朝食到好飽   佢又食剩半個牛角包   之後叫佢頭先拻開   咁可以等我整碎蛋牛角包做午餐嘛

菇場唔忙   肥仔豪話我終於開到聲   話咳係最煩   起碼個幾月   我話氣管又敏感   最慘咳起上嚟控制唔到   堝唔想咳就咳得更犀利 ~

尋日老粗又係咁講   佢又係氣管敏感   我發覺好多中咗之後就咳繼而氣管敏感   搭車搭 Lift 一咳真係係人都望住   所以一定要戴口罩   雖然唔係病 ~

呢兩個星期我聽得最多同事講   睇妳咳成咁好辛苦   好番啲未 ?!   連西瓜都忍唔住問我啦   佢話聽同事講我咳得幾嚴重   因為失埋把聲 ~

Lunch Time 出去行陣再去食牛筋米   食完再行陣就番菇場 lu ~

少米都食唔哂   其一牛筋都比較滯   其二又唔係咁餓   如果加辣就可以食哂   不過一定無可能啦

2 點左右超級忙呀   一忙就忙到 4 點半   突然覺得好充實 ~

放工睇中醫   我條頸又生咗粒嘢   我發覺次次一咳就會咁   醫師話淋巴結節好易搞   之後睇我條脷   佢嘩咗一聲   我問佢嘩一聲係咩意思 ?!   佢話我個人好飽滯   我話真係呀   無咩胃口食但唔食又唔得   但食完就好滯咁 ~

之後佢話好矛盾   因為我個人好燥但又要補   今晚佢做埋啲嘢同講埋啲嘢同以前好唔同咁呀   哈哈 ~

買埋晚餐就番屋企   里奧大人今日中午請病假   咁我都換埋衫食晚餐先喇 ~

食完抖陣就開機洗衫   之後沖涼休息 ~

睇下 Youtube   今晚 10 點半都瞓 lu ~

鮮竹卷 + 雞扎 + 燒賣 (外賣) ( 24-OCT-2024 )

食剩 1 件雞扎同鮮竹卷   之得買少一個點心啦   比着平時我真係會食埋去   但唔舒服就真係唔勉強自己了

( 24-OCT-2024  THU )

感恩一覺瞓天光   仲要無咳   但 7 點起身去廁所   之後再瞓到鬧鐘響先起身 ~

今朝終於開到啲啲聲喇   聽到自己把聲有啲唔慣添呀   今次真係覺得家庭醫生啲藥真係夾好多呀   但我覺得佢啲藥係勁啲嘅   所以食到個人好燥熱咁呢 ~

早餐食夏威夷 Pizza 加丹麥條   塊 Pizza 係里奧大人尋日特登買比我食㗎   話個包係好煙韌喎   今朝佢一起身仲第一時間叫我記得有塊 Pizza 添   佢次次買嘢比我食就好緊張   驚我唔記得食咁   哈哈 ~

菇場唔忙   可以休息休息 ~

家姐今朝睇醫生   佢又係咳   又同我一樣嘅   不過尋晚醫師都話依家好多人咳呢 ~

之後阿齋都話今朝無聽到我點咳   我都覺呀   但一出一入   或者一開聲就會咳囉 ~

Lunch Time 都無出去呀   食完飯都休息 ~

唔忙就好   呢排都係比較攰 ~

放工去買外賣   但里奧大人唔舒服要去睇醫生   等埋佢先一齊食嘢   食完就要去搞啲嘢 ~

搞掂就番屋企   開埋機洗衫就沖涼休息喇 ~

我同里奧大人講話阿齋知道我病之後   成日叫我唔好蒸飯   叫我瞓陣   佢幫我蒸熱   里奧大人從心而發講話呢啲真係好同事    所以我真係好感恩   

里奧大人 9 點幾瞓覺   我就睇陣 Youtube   不過 10 點都瞓覺 lu ~

燒汁燜金沙骨拚司華力腸 + 蕃茄薯仔湯 ( 23-OCT-2024 )

( 23-OCT-2024  WED )

尋晚雖然都咳醒   但算瞓得唔錯   因為咳完可以即刻瞓番呢 ~

今朝里奧大人出去買早餐番屋企食   點解我會唔記得有呢樣嘢㗎   哈哈 ~ 

同里奧大人 Share 食就最好   我就肯定夠飽   但里奧大人話半件咋   可能我真係早食午飯   早餐唔駛食咁多嘢呢

里奧大人話見到好似幾好味   所以買件嚟試下   我食咗 2 啖咋   係幾好味嘅   

我唔想咁早番公司   所以食完早餐就去里奧大人公司坐下先番工 ~

菇場 3D   可以合埋眼休息 ~

阿齋叫我飲蜜糖   仲好溫柔話潤喉好舒服唔甜㗎   好似氹細路仔咁   之前執零食櫃見有樽蜜糖   係家姐特登買多樽比我㗎   依家可以大派用場喇

Lunch Time 出去食酸菜豬潤米線   食完再去買粟米   之後都差唔多 12 點半   咁要番菇場休息下先喇 ~

仍然 Skype 過日   唔係會瞓着   因為今日成日中眼瞓咁 ~

放工即走   今晚點都要煮飯   因為之前醃咗金沙骨 ~

咁我煮餸嘅時候   里奧大人就番到嚟   佢問我做咩又開冷氣又開窗 ?!   我話我無開冷氣喎   之後先知原來又係里奧大人中午無熄冷氣   真係好煩囉   下下咁樣浪費電   已經第 3 次啦   下次要佢交電費先 ~

是日晚餐 - 燒汁燜金沙骨拚司華力腸 + 蕃茄薯仔湯

燒汁燜金沙骨拚司華力腸 - 醃咗 6 條金沙骨   咁帶埋飯就太少   所以即加 2 條司華力腸喇   咁無啦啦好想食烚蛋   又加咗 3 隻落去   本身 4 隻㗎   但其中 1 隻爆開咗呢 ~

蕃茄薯仔湯 - 特登加多 2 條超甜粟   咁可以當蔬菜食   因為懶得浸菜 ~

洗埋碗就沖涼   抖陣就熨衫   不過熨剩 1/3 比里奧大人熨喇 ~

睇下 Youtube   今晚 10 點 45 分先瞓覺 ~

綱記車仔麵 @ 紅磡 ( 22-OCT-2024 )

滷水腩肉 + 蘿蔔 + 甜酸齋粗麵 ($38) - 我本來好餓   但食到一半突然好飽   所以將所有餸比哂里奧大人食   最後就變咗佢好飽   哈哈

牛筋丸 +雲吞 + 魷魚粗麵 ($39)

( 22-OCT-2024  TUE )

尋晚算係瞓得唔錯   只係咳醒 2 次   同埋好快瞓得番   所以我都係同家庭醫生啲藥係夾啲 ~

今朝同里奧大人出去食早餐   呢排都唔想自己整早餐喇 ~

菇場唔忙   咁就好啦   阿爽話我氣管侯感啦   咳起上嚟係 "嘻嘻哈哈" 聲   我就咩聲都唔知   只係覺得好嘈   哈哈 ~

Lunch Time 都無出去啦   個人好攰同埋帶咗飯   其實無咩胃口食飯   所以食剩一半都要掉   因為突然間好反胃 ~

仍然唔忙就 Skype 啦   唔係好易瞓着   始終食咗藥嘛   個人真係好鬼攰   我已經唔食令人昏昏欲睡嘅藥喇   但其實可能食呢啲藥先會快好   所以我覺得 2 日病假係最好   起碼食哂啲藥快啲好嘛   不過好多醫生都只開 1 日病假   同埋我又多數只攞 1 日病假   雖然真係病   但費事比人黑面 ~   

放工即走   今晚砸我想食車仔麵   因為無落辣汁都好味呢   但可能未餓就食   我同里奧大人講話要隔一排先好再食   佢即笑住話梗係啦   一係唔食   一食就連續食咁   哈哈 ~

食食下見到細表妹同個女   本來佢想一齊食   不過我話我病咗同失聲   所以佢話咁唔食喇   之後喺窗口又再拜拜   好似家姐咁呀   唔會話走就走   哈哈 ~

食完就番屋企  里奧大人就會番公司繼續做嘢 ~

開埋機洗衫就沖涼   里奧大人差唔多 7 點半先番到屋企   呢個月都應該係咁忙㗎喇   可惜我唔舒服幫唔到手 ~

打陣機又睇下 Youtube   9 點其實已經好眼瞓   我睇睇下都瞓着咗   瞓到 9 點 45 分呀   之後覺得仲想瞓   所以拿拿聲入房瞓喇 ~

Hungry Korean @ 九龍灣 ( 21-OCT-2024 )

韓式牛肉鐵板燒 ($64) - 甜甜哋都 OK 㗎   今晚食剩一半可以帶飯   依家帶飯真係唔錯   唔駛諗食咩   哈哈

辣雞肉鐵板燒 ($64) - 見到啲辣汁   真係好想蘸一下來食呀   不過呢兩個月都好忙   唔可以再病落去   所以點都要忍下

( 21-OCT-2024  MON )

尋晚又係咳到死死下   所以今朝鬧鐘響都要再瞓到 8 點先起身呀 ~

早餐食黑岩餐包   我覺得呢個包都好味 ~

菇場忙咗陣就可以抖下   今日完全不在狀態咁款 ~

Lunch Time 都唔出去喇   反正有帶飯   阿齋係都叫我瞓   話會幫我蒸飯   我瞓醒有得食   真係又令我好感動啦   所以一病就知邊個對我好   哈哈哈哈 ~

之前我失聲   我寫紙仔問阿蟲嘢   佢即開 Skype 覆我   到我問阿渠嘢   咁啱我行開咗   一番嚟見佢望我個位   原來佢打電話嚟覆我嘢   真係黐鬼線   出得聲就直接用口問啦   駛咩寫紙呀   妳以為我想練好首字呀 ?!

不過我都瞓唔着   只係個人好攰咁囉 ~

蕃茄薯仔湯 / 粟米+雞翼 - 我覺得咁樣好過食白飯   依家食藥食到淡淡   同埋本身都唔係咁習慣中午食飯   食完好滯咁   已經只係兩湯匙更份量咋 

好在唔忙   放工可以即走 ~

里奧大人去姑奶屋企之後再陪我去睇醫生   佢幫我掛號   所以佢早到過我   因為我仲係開唔到聲呀 ~

好感恩好快到我   醫生話我對眼咁紅   係咳到微絲血管爆烈   但我又唔記得講話上次有綠色眼屎   同埋我喉嚨仍然好腫   所以開 Covid 啲藥   上次食咗啲藥   喉嚨真係即刻唔痛㗎 ~

睇完就去食晚餐   依家只可以食清淡嘢   煎炸辣嘢唔可以食   今次我都認真戒口喇   依家得番半條人命   仲唔忍口真係命都無呀 ~

同里奧大人去    佢話辣呀   我話牛肉咪唔辣囉 ~

食完仲要去搞啲嘢   差唔多 8 點幾搞掂就番屋企 lu ~

睇陣 Youtube   今晚 10 點 20 分瞓覺 ~