麻婆豆腐 + 西蘭花 ( 4-JAN-2025 )

( 4-JAN-2025  SAT )

今朝特登同里奧大人食早餐㗎   食完就去佢公司幫佢做嘢喇 ~

豬柳漢堡扒蕃茄濃湯通粉太陽蛋加多士 ($46) - 我以為得 1 隻蛋同 1 塊多士咋   所以食剩少少蛋同多士

特濃沙嗲雞扒麵太陽蛋加多士 ($48) - 沙嗲味道都唔錯

塊雞扒煎得好靚   可惜咁早唔想食塊雞皮   哈哈

9 點開始做  其實做嘅嘢唔難但就要花好多時間   同埋要係好專心   我做做下都亂咗   要比自己抖下先敢再做呀   做完望個鐘原來已經 1 點   無諗過一做就做咁耐呢 ~

里奧大人其實可以放工   不過我一陣有 LA 事奉   所以話食完再番公司做多一陣嘢先走 ~

好想食濃味嘢   所以去食口水雞喇 ~

口水雞配紅薯粉 ($52) - 紅薯粉都煙韌   同埋細細碗就最好

水煮魚配飯 ($60) - 呢個都好味道   同埋配菜份量都唔少

里奧大人食完就番公司   我就要去 LA 事奉喇 ~

今日只係玩團體遊戲   本來我同石頭要諗 4 個遊戲   但石頭搵到 1 個   我只搵到 2 個   估唔到都夠哂玩   仲個個都玩得好開心   好有成功感呀 ~

石頭去完上海旅行   買咗白兔糖   因為有好多味道   咁隻手插入個袋度揀味道比較麻煩嘛   我叫倒哂出嚟揀啦   黑珍珠話妳都好鍾意食咁喎   哈哈 ~

好在我今日都帶咗日本脆餅咋   咁大家 Share 食就開心啲呢 ~

大家傾多陣偈就散會   之後我去買菜同去超市買嘢   買完都番屋企 lu ~

番到屋企見到里奧大人   仲諗住佢未番到屋企添   原來佢話交收完就番屋企瞓覺   因為真係好攰 ~

家姐頭先同里奧大人交收咗車厘子同洗頭水   佢話驚里奧大人唔記得放車厘子入雪櫃   叫我跟一跟   呢句好笑   佢都知里奧大人好論盡囉   哈哈 ~

呢盒紐西蘭車厘子   好似只係二百幾蚊

細細粒   希望係甜啦   哈哈

我抖到 6 點都預備晚餐喇   今日出咗去成日   所以想早啲食飯旱啲休息 ~

是日晚餐 - 麻婆豆腐 + 西蘭花

麻婆豆腐 - 雖然係用醬料包   但食落都有麻嘅感覺 ~

西蘭花 - 見到幾靚就買   我都鍾意食西蘭花㗎 ~

洗埋碗就開機洗衫   之後沖涼休息 ~

食下生果又睇下 Youtube   今晚 10 點 20 分都瞓覺喇 ~

梅菜炒肉碎 + 芥蘭苗 ( 3-JAN-2025 )

( 3-JAN-2025  FRI )

尋晚半夜去完廁所   之後都要開風瞓覺呀   唔知係咪食咗榴槤同車厘子   個人有啲熱呢 ~

早餐仍然食金文拔芝士包   里奧大人問做咩今朝唔出去食   因為我之前話第時每逢星期五要出去食早餐呀   估唔到佢真係記得我講嘅嘢 ~

家姐今朝話叫糟糟買黑瓜子同紅瓜子同開心果   仲有咖啡加朱古力味嘅鳥結糖   之後每樣分一半比我   我話可以唔要㗎   但佢話新年放下啲嘢會開心啲喎   哈哈   不過我話只要 1/5   因為真係得我一個食㗎咋 ~

菇場唔忙   家姐又打嚟問要唔要蘿蔔糕同芋頭糕 ?!   我話唔要喇   之前飲茶我先問里奧大人新年食唔食蘿蔔糕   佢話唔食呀   次次都一次食好多好驚囉   但家姐係都要我要   話咩都預埋我   咩都雙份   依家訂 1 盒好唔慣呀   我叫佢買半份要兩盒囉   真係唔好買比我呀   哈哈 ~

Lunch Time 出去行陣再去食 Lunch   食完去 759 買零食   之後又去惠康睇下嘢   點知又買到嘢   好在有帶大嘅環保袋咋 ~

買完即番菇場   原來已經 12 點 55 分   出去食嘢買嘢啲時間真係過得好快 ~

$18.9/3 包   啱啱好可以買比阿妹 榴槤同細細聲

紹香園無糖特濃黑芝麻丸 ($21) - 之前喺門市買係 $108/3 盒   仲無特濃味道   咁喺惠康買仲好喎   仲要平咁多   但份量就細盒啲呢   因為買滿 $100 有 92 折   咁買 5 盒比里奧大人食啦

唔忙就繼續做自己嘢   呢排好多同事放假   所以無人望住勁開心 ~

放工即走   番到屋企都預備晚餐   里奧大人 6 點幾先番到屋企   但要等陣先食得 ~

是日晚餐 - 梅菜炒肉碎 + 芥蘭苗

梅菜炒肉碎 - 以前唔鍾意食肉碎   依家其實都唔係咁鍾意   但就要買定做儲備囉   諗唔到煮咩就出動佢㗎喇 ~

芥蘭苗 - 呢排唔係瓜類就係芥蘭苗   因為醫師叫我要食深色菜 ~

洗埋碗就出去買廁紙   里奧大人話陪我去買   不過無哂貨呀   所以要去另一間   但叫里奧大人番屋企先   因為唔想佢着住皮鞋行咁耐呀   叫佢快啲做運動好過 ~

我要買 4 條廁所先滿 $100   我買嘅廁紙得番 5 條咋   所以買到真係好感恩呢   因為得 3 條就要打道回府了 ~

手短真係慘   我放直對手呢   啲廁紙就會掂落地   但又攬唔哂 4 條廁紙喎   所以我全程要吊住對手嚟行   番到屋企放低完   發覺對手痺到無哂知覺咁呀   之後再磅下條廁紙   原來係 4 磅   真係無諗過咁重呀 ~

今日放工前個肚都搞搞下咁   但係似食錯嘢嗰款   咁我覺得可能午餐有問題   因為早餐都係平時食開嘅嘢 ~

坐咗一陣無啦啦搞肚痛   但唔係劇痛   不過真係好驚暈   去完再坐陣梳化   點知又要再去過   咁之後又坐梳化抖啦 ~

抖唔夠 5 秒又去過   感覺開始有啲唔對路   眼前嘅嘢變得好光   咁拿拿聲搞掂就諗住坐地下   但我無拎到電話   所以點都要去梳化   之後即叫里奧大人快啲番屋企   因為我好似想暈咁呀 ~

感恩里奧大人好快番到嚟   因為我又搞肚痛   要佢陪我去廁所呀   之後我係咁標冷汗   里奧大人係咁搓我背脊同問我有無事 ?!   我都答到佢嘢   感恩最後係無暈到   但流咗一身汗好攰   要抖半個鐘先再開機洗衫同沖涼呀 ~

我真係要休息下喇   本來約咗石頭傾啲遊戲   最後都要留番聽日先傾 ~

里奧大人就幫手熨 3 機衫   頭先嚇親佢仲要做家務   真係辛苦佢了 ~

等埋里奧大人搞掂哂就食生果   佢係咁叫我食多啲補血   之後就特登食剩幾粒比我食   我話仲有好多呀   要幫手食呢 ~

1887 都甜喎

睇陣 Youtube   今晚 10 點 50 分都瞓覺 lu ~

湖南土匪雞翼 + 雲耳 + 過橋米線 (外賣) ( 2-JAN-2025 )

突然間好想食土匪雞翼   所以叫喇   雲耳 & 凍華田只係 +$12 係好抵   同埋我都想食口水汁呀

過橋米線 (煳辣 3 小辣) - 今次完全唔覺辣   不過都好味

( 2-JAN-2025  THU )

尋晚瞓得麻麻哋呀   唔知因為係晏晝飲咗茶呀   但感恩起身都精神呢 ~

早餐食半個金文拔芝士包   同埋尋朝食剩嘅牛油多士   不過一定要去皮   唔係會食到好飽同埋咬到牙都軟   哈哈 ~

一開雪櫃就成陣榴槤味   我個膠飯蓋都吸咗味呀   咁我拎埋包當參番菇場   一喺個飯袋拎出嚟   都係好大陣榴槤味   好在唔要個膠袋   唔係實比人鬧呀   哈哈 ~

菇場忙咗陣就可以做自己嘢   呢排都 3D   所以個個都作哂反   呵呵 ~

2025 好開始

話咁快 2025 年已經開始咗喇

里奧大人今朝本身係番 10 點   咁諗住叫佢起身啦   但原來佢 9 點半都已經番咗公司   因為記錯時間同人開會呀 ~

一收完線   家姐叫我打比佢   時間係咪咁啱呀 ~

佢話糟糟今晚同唔到親戚食飯   所以比盒車厘子比家姐   咁家姐問我要唔要先 ?!   唔要就拎番公司請同事食   不過我話唔要喇   尋晚都拎咗好多呢 ~

之後又問我食咗貓山王未 ?!   我話未啦   食咗幾粒車厘子咋   之後佢話同工人講今日食生果做午餐   因為姐夫食好少   同埋工人又唔食榴槤   所以話食盒貓山王做午餐算喇   我話呢個午餐都唔平喎   哈哈 ~

Lunch Time 蒸完飯就出去行陣   行到 12 點 15 分就番菇場食飯 lu ~

其實唔想蒸菜   但尋晚真係剩咗好多   咁無理由浪費嘛

唔忙就 Skype 同做自己嘢   咁樣就會好快放工㗎喇 ~

今晚里奧大人 7 點要見客   所以我買埋晚餐去佢公司一齊食 ~

個客早到咗   好在差唔多食哂咋 ~

咁我等埋里奧大人先走   番到屋企都 8 點 lu ~

叫里奧大人沖涼先   因為我要包好啲貓山王入冰格   因為想食哂啲車厘子先 ~

金條   哈哈

搞掂就開機洗衫   之後沖涼休息再食生果 ~

貓山王真係超級好味   啲核又細   所以真係啖啖肉呢

阿妹又比咗啲同事手信比我

同里奧大人睇埋 "照明商店" 大結局   佢又話要食啲零食   不過今次到我食唔落喇 ~

我哋覺得套劇唔算爛尾   但係有啲唔明咁囉   哈哈 ~

里奧大人鍾意食綠茶嘢   所以喺藥妝目到就買   只係 376 Yen

呢包都係藥妝買   不過唔記得幾錢   但一定唔會超過 HK$10

辣牌點心麵   不過我唔覺得辣

睇多陣 Youtube   今晚 10 點 25 分都瞓覺喇 ~

黑椒洋蔥豬扒 + 菜心苗 ( 1-JAN-2025 )

( 1-JAN-2025  WED )

今朝同里奧大人瞓到 9 點自然醒   沖埋涼就去食早餐喇 ~

我食完去超市買嘢   里奧大人就要番屋企做少少公司嘢   佢搞掂就熨 2 機衫   我就開機洗衫   冬天啲衫好厚   洗 1 件褸同 2 件抓毛已經 1 機衫   所以冬天衫成日洗極唔完咁   哈哈 ~

里奧大人話晏晝出佐敦買護髮素   之後再去權發小廚買埋晚餐   佢真係好搞笑   我之前講過話想買佢哋啲兩餸飯   依家里奧大人成日都記住要買嚟食   但我話今日唔想出街   想喺屋企睇劇呀 ~

我話睇 "照明商店"   因為有朴寶英   差唔多 11 點開始睇   估唔到好好睇喎   同埋最正係 8 集   咁啲劇情唔會拖好耐呢   哈哈 ~

話咁快睇咗 3 集   睇到 1 點半就出發去食午餐   里奧大人話飲茶 Relax 下喎 ~

咁我出大堂見到有個人拎住塊嘢遮住個頭   我同里奧大人講話佢遮嚟做咩 ?!   之後再行出去原來落緊毛毛雨呀   所以要番屋企拎遮   但頭先又唔見有人開遮喎   唔係我都唔會咁話嗰個人啦   真係勁樣衰囉   比里奧大人話我成日唔睇清楚就話人 ~

因為點心係即叫即蒸   我哋都預咗等   咁有個茶客好勞氣話等咗 30 分鐘   仲要人哋遲過佢都有   咁樣又係激氣啲嘅 ~

虎皮煎釀尖椒 ($23) - 新鮮熱辣   連我都要灘凍啲先食呀   哈哈

菜苗餃 ($26) - 我鍾意食呢啲皮嘅蒸餃

紅油抄手 ($25) - 我哋覺得唔好食

峰巢芋角盒 ($28) - 賣相唔似芋角   但係好味嘅

春風得意腸 ($35) - 里奧大人好搞笑   一坐低已經話自己來來去去都係食春風得意腸   我話無咩問題   鍾意食咪得囉   同埋依家我都唔會成日話人哋啦   我自己都係咁   哈哈

食完就去買柿同香蕉   但都唔靚嘅   咁等我聽日番工先買 lu ~

去埋山崎買麵包做早餐就番屋企   繼續睇多 3 集   睇完都已經 5 點 15 分   係時候要預備晚餐喇 ~

家姐 5 點 40 分鐘打嚟話有生果比我   但佢要整埋啲嘢先可以交收   咁仲好呀   我可以食埋飯先出去 ~

是日晚餐 - 黑椒洋蔥豬扒 + 菜心苗

黑椒洋蔥豬扒 - 諗住炒 1 個包裝烏冬比里奧大人帶飯   點知酸嘅   好在我突然間想試下味同口感咋   但下個月先到期喎   唔明點解會酸囉   好在今晚都只係諗住食餸咋 ~

菜心苗 - 尋晚買咗 1 斤諗住分 2 餐食   但有啲變咗冰菜   所以食埋去 lu ~

洗埋碗都 7 點   啱啱家姐話佢可以出發交收   佢話每樣比一半比我   叫我帶定啲膠盒同環保袋   同埋話好重   所以我叫埋里奧大人幫手喇 ~

原來家姐買有 3 大袋生果呀   好在帶咗啲膠盒   咁樣裝就易啲   如果帶保鮮袋可能會壓爛 ~

我拎個神石榴就覺得超級重   家姐話係里奧大人個頭咁大   哈哈   所以真係連里奧大人都話重呀   之後個日田梨又係好重   家姐咁樣拎法真係好辛苦囉 ~

里奧大人再拎啲車厘子出嚟分啦   真係好大粒同埋係令身   家姐話好似係直徑 36mm 一粒   咁真係同平時食嘅美國車厘子係好唔同嘅   所以我同里奧大人都 O 哂咀   之後家姐又話真係好少咁大粒同咁靚   所以同糟糟都忍唔住買   咁再分埋 1887 就真係好明顯睇到個分別喇 ~

搞掂都 8 點   都唔傾多陣喇   因為家姐仲要番屋企食飯 ~

番到屋企叫里奧大人沖涼先   我要擺好啲生果呀   屋企雪櫃細   要好有系統咁擺   哈哈 ~

家姐工人鍾意食福崗士多啤梨   所以就買比佢食喇

里奧大人話呢度有 10 磅重   好在佢幫手拎咋   家姐話神石榴 ($80/7 個) 好抵   所以比 4 個我榨汁

呢度係貓山王 (2 Kgs)   家姐話 $400/4 Kgs   咁又抵喎   泰榴都唔止呢個價錢啦

塔斯曼厘亞 43° South ($650/2 Kgs)

我只放到 1 粒入口咋   所以啲車厘子真係好大粒

個色係深色啲嘅 1887 ($540/2 Kgs)

日田梨 ($100/2 個)

個梨仲大過我個飯盒   糟糟話好食呀   所以家姐叫我快啲食   哈哈

沖埋涼就收到家姐 Whatsapp   佢話頭先成日講幾多錢   好似好衰咁   但佢係想講話今次買生果係好平呀   我話從來唔會覺得妳講錢   即係等如唔捨得咁喎   同埋我都想知幾錢囉   因為可以吸引到妳哋突然買咁多呀   哈哈 ~

佢話同糟糟講話去買生果   之後糟糟就話即刻出車一齊去   佢哋一齊買下買下   總共買咗 $2,820 呀   本來仲想買埋提子比我   但糟糟話唔好啦   寧願食哂先再買   我話好在無買比我咋 ~

我同家姐講話今日好感恩呀   因為我呢兩日都買唔到生果   估唔到今晚就有咁多生果食呢 ~

傾完就同里奧大人睇 "照明商店"   今日全日煲劇真係好少有   哈哈 ~

里奧大人今晚主動拎零食   次次睇劇都會咁   咁就好啦   幫手清下嘛 ~

喺日本超市買   只係 429 Yen

口感唔錯喎   但味道比較淡   又或者我重口味啦

睇咗第 8 集少少都要瞓喇   因為已經 11 點 15 分呢 ~