豉油雞 (外賣) ( 25-MAR-2026 )

( 25-MAR-2026  WED )

感恩一覺瞓天光呀   仲要係熟睡無發夢添   所以起身好開心呀   哈哈 ~

早餐食法國丹麥酥方包  仍然覺好味道 ~

今朝等車同石頭 Whatspp   因為佢尋晚已經 Whatspp 比我㗎喇   我驚一陣唔記得覆佢呀   但今次醒喇   一路傾一路望住啲巴士   唔想因為傾偈再走咗班車呀 ~

菇場忙下停下   好快又到 11 點 45 分 lu ~

Lunch Time 蒸完飯就去買洗衣珠   之後再去惠康買出前一丁   買完就番菇場開餐喇 ~

ar FUM 洗衣珠 ($100/ Pack)   我買咗 2 Packs   其實屋企有 3 Packs   不過見到平就好想買   同埋呢啲損耗品   真係好快用完

出前一丁北海道蝦麵 ($23) / 出前一丁黑蒜豬骨麵 ($23)

出前一丁小麥粉雞白湯麵 ($23) / 吉百利夾心朱古力 ($19.9)

尋日同船頭 阿齋傾出前一丁嘅味道   所以我買哋 3 包   大家可以 Share 唔同味道   不過我話唔會收錢   因為尋日佢哋幫我手撕嘢呀 ~

船頭比紅莓汁比我同阿齋

阿齋又比零食比我同船頭

差唔多 2 點去執倉   實在太想搬番好啲嘢   執咗成個鐘呀   搞到成身汗勁熱   好在菇場冷氣夠咋  坐咗一陣就成個人乾爽哂 ~

我有時會擺啲零食喺枱面   阿齋問我做咩唔食包齋雞粒 ?!   買咗好耐喇喎   我話買咗又唔想食呀   佢覺得好奇怪   我咪話我成日都有嘢買就係咁原因囉   有時真係買買埋埋都唔知做咩好 ~

放工去睇中醫   我同醫師講話呢兩個星期作嘔作悶   同埋隻腳成日痛   之前無㗎   佢話因為啲天氣呀   呢排睇佢嘅人幾乎全部都咁講   我話聽你咁講就放心哂喇   哈哈 ~

睇完去惠康買菜   之後再去買隻豉油雞   依家 $90/隻   好記得上年只係 $75 咋   我仲同里奧大人講話好抵添 ~

買完就番屋企抖下先   里奧大人 7 點 45 分番到屋企就開始煮麵 ~

里奧大人朝早開咗機洗衫   我洗埋碗就可以沖涼休息喇   里奧大人就去做機 ~

睇陣 Youtube   今晚 10 點 50 分都瞓覺 lu ~

豆豉鯪魚炒苦瓜 + 五指毛桃鹽焗雞肶 ( 24-MAR-2026 )

( 24-MAR-2026  TUE )

尋晚算係一覺瞓天光   但臨起身前係咁發夢   個夢係唔知邊個殺咗人   佢拎咗個蝴蝶 Bow Tie   因為放咗啲好重要嘅嘢   所以要放喺我屋企收埋佢   另一個夢係里奧大人要我轉工   咁啱我要做手術   我打比里奧大人話如果無轉工就好啦   可以 Claim 保險   但好在我買多咗另一份保險都可以 Claim 到   之後番埋位做嘢啦   有個女同事叫我幫佢拎粒桃味嘅糖   之後鬧鐘響 lu ~

早餐食法國丹麥酥方包   食完就去里奧公司坐陣先番工 ~

菇場唔忙   又做下自己嘢先 ~

Lunch Time 蒸完飯就去入票   之後再行陣先番菇場開餐 ~

船頭話阿爽唔會執枱面啲嘢   因為比人覺得佢好忙   佢枱面啲嘢真係又多又亂   啲文件都唔知有無三十年   之後船頭話佢唔會掉啦   唔係比人覺得佢好得閒   同埋儲唔番咁多文件   哈哈 ~

我要手撕文件   起碼有 15 疊   所以船頭同阿齋幫我一齊撕   我哋 3 個圍埋一路傾一路撕   都撕咗成個鐘呀   好感激佢哋幫我   唔係我要分開幾日撕㗎喇 ~

搞掂魰做其他嘢   所以好快放工 ~

放工即走   番到屋企已經見到里奧大人   咁我都快啲煮晚餐   不過今晚差唔多 6 點 50 分先食得   真係煮得好慢 ~

是日晚餐 - 豆豉鯪魚炒苦瓜 + 五指毛桃鹽焗雞肶

豆豉鯪魚炒苦瓜 - 里奧大人鍾意炒苦瓜多過炒油麥菜   我話其實炒苦瓜好啲   咁樣可以帶埋飯呀 ~

五指毛桃鹽焗雞肶 - 特登煮呢個做聽日 Lunch Box 㗎   因為我唔想啲魚留過夜呀 ~

同里奧大人去惠康買椰汁同廁紙   有佢幫手拎真係差好遠呢 ~

里奧大人放低哂啲嘢就去做機   我就沖涼休息喇 ~

睇陣 Youtube   今晚 10 點半都瞓覺 lu ~

蠔油茄子燜鴨肉 ( 23-MAR-2026 )

( 23-MAR-2026  MON )

感恩一覺瞓天光呀   星期一一定要好夠精神先得㗎   哈哈 ~

早餐食牛油卷搽牛油   食埋今次就食完喇 ~

菇場忙咗一陣   之後又執嘢喇 ~

Lunch Time 蒸完飯就出去買菜同生果   逐樣買盲唔覺得重   但裝埋一袋就覺得好重喇   所以買完即刻番場開餐喇 ~

依家裝修時間緊迫   我同阿怪講話佢要 Pack File   我話上次時間關係幫妳哋部門 Pack   依家妳要自己 Pack 番   點知佢叫我做番   我話唔會囉   妳部門嘅嘢嚟   之後又話妳做開妳做啦   我話我個個部門都牽涉   唔通我幫哂個個部門 Pack 嘢呀 ?!   我自己都要 Pack 嘢呀   妳自己搞掂佢啦   佢個樣想鬧我咁呀   我目無表情咁望佢   佢嬲爆爆咁走出去囉   如果佢發顛又或者再叫我做   我會叫佢同西瓜講囉 ~

放工即走   番到屋企見里奧大人熨緊衫   有 2 機要熨㗎   好在今日佢做咗運動   我可以慢慢煮飯喇 ~

2 磅人參果 ($32) / 豬腰芒 ($20/3 磅)

是日晚餐 - 蠔油茄子燜鴨肉

蠔油茄子燜鴨肉 - 就咁用蠔油燜都幾好味   反正屋企好多蠔油   係時候清咁啲喇 ~

洗埋碗就開機洗衫   之後沖涼休息 ~

睇下 Youtube 又打下機   今晚 10 點半都瞓覺 lu ~

明爐香烤 BB 鴨 (外賣) ( 22-MAR-2026 )

仲剩咗瑤柱珍珠雞   不過今晚食唔落   所以可以留番做我哋嘅 Lunch Box 喇

再焗熱啲蛋糕仔比里奧大人食

( 22-MAR-2026  SUN )

今朝同里奧大人一齊起身   其實起身有啲攰   所以再灘喺床   等里奧大人搞掂哂先去梳洗   佢叫我瞓覺啦   我同佢講要珍惜一齊食早餐嘅時間呀   哈哈 ~

食完早餐就番屋企執屋   里奧大人就番工喇 ~

8 點開始大清潔   一做就做到 11 點半   但感恩唔攰呀 ~

沖埋涼就休息   差唔多 1 點就同里奧大人去九龍灣 lu ~

水公番嚟香港搞啲嘢   咁今日就約埋 Y 姑 U 姐 姑奶一家一齊飲茶喇 ~

紅米脆網腸 ($40) - 呢個好味呀   之前喺公司附近食嗰間好難食   有陣油膉味咁

爽滑牛肉腸 ($32)

煙肉糯米包 ($40) - 姑奶話想食半個   所以我話同佢 Share 喇

招牌流沙包 ($40)

香芋蒸排骨 ($40)

潮州靚粉果 ($26) / 家鄉鹹水角 ($32) - 我叫㗎   但其實兩樣嘅餡都係差唔多   哈哈

煎釀虎皮椒 ($40) - 都係我叫   因為我鍾意食虎皮椒

海皇鹹薄撐 ($40) - 叫比里奧大人食嘅

瑤柱珍珠雞 ($46) / 北菇棉花雞 ($40) - 棉花雞一上枱   姑奶夾起件魚肚   之後比咗我仲話呢件好食   我真係好感動㗎   個仔喺佢隔離都無比佢呀

沙爹金錢肚 ($40) / 醬皇蒸鳳爪 ($40) / 魚蝦豆苗餃 ($40) - 姑奶叫我食多啲   話我哋叫咗太多無咩人食   我話仲以為妳驚我唔夠飽添   哈哈

福建炒飯 ($98) - 比小朋友食嘅

XO 醬乾炒牛河 ($88)

鴨屎香手打檸檬茶 ($116/4 杯)   茶位要 $15/位   我覺得貴呀   不過其實我唔知依家茶位係咪已經呢個價

里奧大人同水公傾偈   咁我就同姑奶傾偈喇   佢話佢以前好惡㗎   我話唔覺喎   可能我無激嬲佢   哈哈 ~

佢話有次瞓瞓下覺喊住同老公講對唔住   以前成日咁惡鬧你   姐夫話過咗去就算啦   提嚟做咩   所以我係最鍾意里奧大人呢個姐夫   雖然有啲嘢係做得唔好   但佢真係好愛老婆同個仔   樣樣以家庭行先   就算個仔都結埋婚   但都無變過   仍然係緊張個仔呢 ~

姑奶話好多人講姐夫好愛佢   因為姐夫愛屋及烏   係好多朋友睇見都覺得佢好錫姑奶屋企人   呢樣又係事實   佢成日主動幫水姑整舖頭啲嘢   好記得初初識里奧大人嘅時候   一齊食晚飯   姐夫叫我揀餸   我揀咗牛仔骨   佢就話叫牛仔骨喇   里奧大人話其實姐夫已經揀咗   見我揀牛仔骨就即轉牛仔骨呀   不過依家都係咁㗎   佢一定叫我揀先   所以我就會話唔知食咩好   等佢揀自己鍾意食嘅嘢喇 ~

依家年紀都大啦   同埋識咗佢哋咁多年   但佢哋仍然當我係細路女咁看待   所以都好感激佢哋包容暴躁嘅我 ~

講起愛屋及烏   我都好感激里奧大人都係咁   好記得佢靜靜雞買部 Laptop 比家姐   知家姐公司嗰部好細睇得辛苦   但我仍都好感激家姐都愛屋及烏   成日記住里奧大人鍾意食啲咩飲啲咩   一訂貨就問佢要唔要   所以佢一買好多   佢啲同事就知買比我哋㗎喇   哈哈 ~

3 點走人   水公話請飲茶   之後里奧大人同姐夫話梗係唔好啦   姐夫今日特登嚟請佢飲茶㗎   其實里奧大人又係特登請佢飲茶   所以由里奧大人請啦   難得齊人飲茶咁開心 ~

Y 姑話下次煲湯叫 U 姐拎比我   又話買定餸比我   等我番到屋企蒸熱就食得   我話好呀   話哂係住家菜嘛   哈哈 ~

里奧大人話去德福睇鞋   因為我想買白色鞋   所以依家每次一出街   佢就話會去睇鞋   所以同水公一齊搭車去九龍灣地鐵站喇 ~

經過 Panash 都即刻買麵包先   唔係一陣走嘅時候實唔記得 ~

去 MIRABELL 睇鞋   我本身係買 1 對鞋   點知職員又比另一對我試   但着上去真係超級舒服   但要成千銀又好貴咁   不過里奧大人話舒服就買埋囉   咁我唔客氣喇 ~

職員又拎對皮鞋比里奧大人試   佢話着上去都舒服   咁我話兩對交換着囉   難得做特價 ~

諗住比錢   職員話買滿 $2,000 就有其他優惠   但我唔記得佢講咩   之後話買 Tee 最抵   所以里奧大人就買咗件 Tee 喇 ~

我 2 對鞋係 $413 (原價 $590 -30%) / $839 (原價 $1,199 -30%)

里奧大人對鞋係 $1,113 (原價 $1,590 -30%)   件 Tee 就係 $279 (原價 $349 -20%)   之後再減 $100   我唔記得係咪會員優惠

買完就繼續周圍睇下   今日有精神   所以覺得有好多嘢睇咁   哈哈 ~

呢個公仔都得意

呢個都得意   但係粉紅色就要考慮下先   哈哈

去到馬拉松見到 Joguman Tote Bag 呀   我諗住要 $199   估唔到只係 $99   所以我話要買呀   里奧大人就唔想我買   所以叫我自己比錢   咁當然無問題啦   哈哈 ~   

Joguman Tote Bag   個袋都幾厚身㗎

買完啱啱好趕到班車   今晚去大家樂買鴨做晚餐   里奧大人話想 6 點 15 分食飯   咁可以一陣做機   咁無問題啦   只係焗熱牛河就搞掂 ~

法國丹麥酥方包 ($40) - 可以食 3 日   所以覺得好抵食   哈哈

食完抖陣就同里奧大人去做機   今晚做 20 分鐘就夠   今日行咗好多路有啲攰 ~

番到屋企即開機洗衫   沖埋涼就休息下先 ~

同里奧大人一路食糖水一路睇 "中年好聲音 4"   估唔到今次波仔啲芝麻糊唔甜喎   定係因為頭先食咗個甜橙關係呢 ~

家姐今日嘅手信   佢問我要唔要小新捷運卡 ?!   我話唔要啦   唔好浪費   佢話估唔到呢句說話由我講喎   哈哈

佢唔肯定我鍾唔鍾意   就會問我要唔要 ?!   所以我同佢每次去旅行   都要望實手機   哈哈

睇多陣 Youtube   今晚 10 點 50 分先瞓覺 ~

鑫媽餃子 @ 紅磡 ( 21-MAR-2026 )

上海糖醋排骨湯麵 ($52) - 我同里奧大人講話味道唔夾喎   但佢話想試糖醋排骨呀   咁我話好啦   之後佢話味道真係好唔夾   我話我唔應該講你知   你會先入為主呢   好在糖醋排骨都好味道咋

十全十美 (各種口味各一 $56) 轉煎 +$3 - 我都好鍾意食餃子   下次會試湯餃子   咁唔駛咁油膩呢

豆漿 (淡白) ($12)

( 21-MAR-2026  SAT )

尋晚瞓到半夜好似醒醒哋咁   以為已經 6 點   但原來只係 1 點 44 分   咁要再瞓啦   感恩瞓到 7 點 15 分就醒喇   之後知道家姐去到機場同同事去麥當勞食早餐   再傾多陣就起身 lu ~

里奧大人話醒咗陪我食早餐   但我叫佢繼續瞓啦   佢根本係想陪我食但唔係醒咗囉 ~

早餐食牛油卷搽牛油   呢期要快啲食哂啲牛油   因為想過期前食哂呀 ~

食完就靈修半個鐘   之後就番工 lu ~

經過 7-11   終於忍哈住買咗褲褲兔盲盒   因為隻隻都鍾意   咁 $35 又唔係貴   所以買 1 盒咁多啦   哈哈 ~

菇場唔忙   但要執嘢同埋清潔個新位呀 ~

感恩抽到滴汗版

將啲嘢轉咗位   又可以擺多啲嘢   之前成日想執   但我次次開櫃桶   阿爽又會望我整緊咩   咁難得佢放假就一次執好哂喇

搞掂都差唔多 12 點   抖多陣就放工 lu ~

放工買埋午餐就去里奧大人公司   食完就要參加義工培瞓喇 ~

比我 Fing 到啲湯漏哂出嚟   搞到成個膠袋都污糟哂

Debreifing 到 4 點半   之後同小米傾咗個幾鐘先番崇拜 ~

崇拜完畢就等里奧大人放工   差唔多 7 點半先走得 ~

食完去大生買支朱古力奶   之後里奧大人問係咪好飲 ?!   我話之前上網吹得好勁   依家先買到就試下囉   佢話佢鍾意飲朱古力奶呀   咁我再入去買啦   咁比錢嘅時候見到後面嗰人買豆腐花   我比完支奶比里奧大人拎住   又再番入去買豆腐花呀   來回咗 3 次   好在地方唔大咋   哈哈 ~

日本守山乳業 MORIYAMA 朱古力奶 ($29/盒)

番到屋企即開機洗衫   搞掂就沖涼喇 ~

好在里奧大人熨咗衫   我就可以休息   因為今日出咗去成日有啲攰   哈哈 ~

家姐買嘅手信   今日義工培訓睇唔到訊息   佢見我無覆就打嚟問要唔要海邊走走   因為我話如果我唔覆佢就要打比我   哈哈

睇下 Youtube   差唔多10 點 50 分都瞓覺 lu ~

富華燒味餐廳 @ 紅磡 ( 20-MAR-2026 )

粒粒花生醬西多士 ($39) & 星洲炒米粉 ($52) - 我上星期已經話要食星洲炒米粉 ($52)   但今晚唔想食呀   只想食甜嘢   但里奧大人記得我上星期話要食   所以就話佢要食喎   但我佢根本都唔鍾意食米粉   不過佢自己落定單先嘅   阻唔到佢添   哈哈

( 20-MAR-2026  FRI )

感恩瞓得都唔錯   不過 7 點 15 分都醒醒哋   但我會等到鬧鐘響先起身呢 ~

今朝同里奧大人出去食早餐   食完就去佢公司坐陣先番工 ~

菇場唔忙   但準備搬位   所以要執下啲嘢 ~

Lunch Time 蒸完飯就出去配女廁所匙   搞掂就去 A1 買牛油卷同一田買零食   買完已經 12 點 15 分   要飛番去菇場開餐喇 ~

里奧大人話 MM 話啲零食好食   咁我再買多包比佢哋食啦

唔忙就做自己嘢   之後西瓜拎咗幾箱紙巾同廚房紙出嚟比我哋分   全部同事湧去拎   好似散貨場咁   拎完又全部人再入 Showroom 睇其他嘢   真係勁開心呀   睇下又拎下   原來都用咗成個鐘頭   所以好快放工咁   哈哈 ~

今晚要做義工   所以同里奧大人出去食晚餐喇 ~

感恩今晚大家都超級開心   建立關係真係好重要   感恩自己有時間參加呢個活動呢 ~

Debreifing 到 9 點   之後都即番屋企喇 ~

沖埋涼就休息   我比啲活動相比里奧大人睇   佢話睇個樣都知道我好開心   哈哈 ~

睇陣 Youtube   差唔多 11 點先瞓覺 ~