感恩感恩 朱朱出院喇

今朝食餐蛋治烘底 + 奶茶    好耐無食餐肉   覺得好好味呀 ~




番到菇場個個 Holiday Mood   加上老闆 11 點半走埋   真係有嘢都唔願做呀 ~

晏晝同里奧大人   同埋佢同事一齊 lunch   覺得自己呢期好小食菜   所以就叫腐乳通菜 + 豉椒排骨炒麵    d 麵脆卜卜   超好味呀 ~ 

放工又同家姐去探朱朱   仲有機會見到醫生了解朱朱病情   感恩朱朱可以出院呀 ~   

不過朱朱眼睛發炎   查咗藥膏好好多 lu ~

因為等朱朱出院都要一段時間   所以同家姐又去阿土麵線   share 一碗特大   其實唔係好大架咋   再每人一包冷冷撈   食完飛去接朱朱喇 ~ 

抱咗朱朱出黎   仲要等 45 分鐘先有得拎藥   因為好多狗狗趕喺夜診前睇醫生呀 ~

今次找數盛惠 $11000   因為朱朱太多病   所以要食十幾種藥丸   黎緊每個月嘅藥費要 $2400   好貴呀呀呀呀  ~ 

同家姐一齊送朱朱番屋企   媽咪見到朱朱勁開心呀   仲話會全天侯照顧朱朱呀 ~

同家姐 11 點先走   番到屋企   沖埋涼成12 點幾先瞓   好在聽日五一勞動節假期唔駛番工咋 ~


Babymama 一家非常感激大家為朱朱送上祝福及祈禱   謝謝

感謝神對朱朱嘅保守看顧   憐憫醫治   求神繼續保守朱朱每一日都健康咁生活   每日活在恩典當中   求神仍保守媽咪有精神力氣智慧照顧朱朱   奉主名求   阿門

越興園 @ 旺角 + 探朱朱

今朝好肚餓   所以食榨菜肉絲米粉 + 腸蛋多士 + 奶茶    除咗肉絲之外 ( 因為我唔食嘅 )   其他都好好味道咁   可能真係好肚餓呀 ~

菇場無嘢做   無無聊聊諗下嘢   諗到呢排成日探朱朱   所以都無時間照顧里奧大人   又無住家飯比佢食   唉   都幾慘咁 ~

好在里奧大人知道朱朱係我心目中第一位   知道我唔探會心掛掛   所以都叫我去探朱朱   仲話無住家飯食唔緊要   最緊要係食多 d 生果同運動咁話喎   咁識體諒人   真係無嫁錯你呢   呵呵呵呵 ~ 

天氣好好呀   所以同里奧大人行遠 d 食 lunch   我食魚蛋河粉   里奧大人食炸醬麵    我覺得加辣椒油同紅醋真係好正   顏色又靚喎   不過次次食完個胃就唔多舒服咁囉 ~

放工去探朱朱兼聽報告   好感恩係 6:45 pm 可以見到醫生 ( 因為之前姑娘話如果要見醫生嘅話   就要等到夜晚 10 點 )   醫生話朱朱腎同肝係好過入院前   但就唔係叫做好   但食咗藥同轉咗藥膳配方就好好多   不過我相信朱朱出院之後   有媽咪好好嘅照顧   有神嘅保守帶領   朱朱必定會渡過一個又一個嘅難關 ~

希望大家繼續為朱朱送上祝福及祈禱    謝謝 

同家姐去附近嘅越興園晚餐   叫咗牛肉撈濛 + 越式拚盤 ( 細 ) + 青檸梳打    味道 ok 啦   始終唔 expect 旺角有好嘢食呢   食完送埋家姐去巴士站就走 lu 

好旺角粥麵專家 @ 旺角 + 探朱朱

今朝呢   食芝士蘑菇腸三文治烘底 + 奶茶    其實朝早食芝士真係幾滯   不過覺得好過食火腿咁囉 ~



呢排成日探朱朱   真係好攰   好在菇場無嘢做   唔係都幾慘 ~ 

晏晝同里奧大人去海皇食粥   菜干豬骨粥 + 牛脷蘇 + 炒麵 + 生菜   其實好小晏晝叫一碟菜    但驚里奧大人自己夜晚食飯唔食菜   所以我先叫咋   咁樣唔到佢唔食丫嘛 ~

 

里奧大人今晚同朋友去中央圖書館借書同傾功課   所以放工我又同家姐一齊去探朱朱喇   今次要等到 7 點 15 分先入得去   激氣呀 ~ 

朱朱今日無乜精神   姑娘話病情反覆   所以唔想比佢出院   見到朱朱無哂精神真係好心痛好心痛好心痛   唉   朱呀   快 d 好番啦   等家姐唔駛咁擔心好無呀 ~

同家姐今次又去旺中附近食粉麵   呢間好旺角粥麵專家嘅門面幾舊式   不過都好多人食喎    叫咗生菜鯪魚球麵 ( $28 ) + 雲吞麵 ( $22 ) + 皮蛋酸薑  ( $14 ) + 菜心 ( $13 ) + 細可樂 ( $7 )   其實 d 嘢都幾貴   因為樣樣都細細碟細細碗咁呢   不過 d 麵都好食   無梘水味   最正最正係有余均益辣椒醬任點呀 ~

呢排天氣勁乾燥   所以試下用 Body Shop 嘅 Passion Fruit Body Butter ( 熱情果身體潤膚霜 )   真係好香呢   如果就咁擺喺枱面 ( 唔要蓋 )   加多隻匙   我相信里奧大人以係雪糕咁 "北" 黎食都有之呢 ~

求求大家繼續為朱朱送上祝福及祈禱   謝謝大家

樂園牛丸大王 @ 旺角 + 探朱朱 + 回到 N 年前嘅怪人

朝早唔想食鹹同唔想食濕嘢   所以就食花生醬厚多士 + 奶茶    $14 咋   唔錯唔錯   不過如果杯奶茶再好飲 d 就更好啦 ~



阿 Head 出 Trip   所以心理上比較 free 咁呢 ~ 

晏晝同里奧大人食麥記   今次麥樂會送細薯條   正呀 ~

放工即走喇   因為約咗家姐探朱朱呢 ~   

早到咗   又唔會即刻比妳探   所以出去周圍行   去到診所附近   見有堆人圍住隻狗   人影我又影   不過我想影嘅就係佢主人多 d   佢 d 打扮真係 O 哂咀   乜年代呀   以為自己好型咁   個髮型仲嘔心呀   不過係真髮黎架   因為睇到頭頂果 d 係黑色呢   咁嘅 look   真係頂佢唔鬼順呀 ~

終於到探病時間喇   朱朱 everything ok   但都係唔肯食嘢   當然啦   食慣人嘢嘛 ~

眼仔碌碌   但一抱又想瞓   十成十係媽咪晏晝探完又等我地探   所以等咗成日無瞓過   所以心情唔好   想咬家姐   又吠家姐   好火呀 ~

今晚朱朱會照超聲波   睇下個肝嘅情況 希望唔好惡化就得    求神繼續保守醫治朱朱呢

話咁快又到 8 點   所以要走喇   同家姐去附近嘅樂園食粉   今次 share 四寶河 ( 有 7 粒唔同嘅丸 ) + 炸魚皮 + 腐乳通菜 + 凍柑桔    丸丸都 ok   河粉就好通透好滑   加埋辣椒油真係好正呢   食完就各自歸家喇 ~  

番到屋企食下生果清熱氣   所以就食天生雪蓮   佢嘅功效好似係清熱   仲有唔知乜乜咁   總之好好咁啦   我覺得口感似食馬蹄   都 ok 架 ~