怪味雞柳 + 菜心 + 徑步

一早醃好咗雞扒   放工買菜就搞掂 ~  

是日懶餐 - 怪味雞柳 + 菜心

怪味雞柳 -  其實唔記得 exactly 醬汁係點   只記得有蒜蓉 + 薑蔥茸 + 鎮江醋 + 豉油 + 糖 + 麻油 + 水呢幾樣嘢   所以求其整埋當係怪味汁   不過今次唔想落辣椒油   所以無咁惹味   但都好好食架 ~  

菜心 - 要健康   所以菜心只會灼   唔落油同鹽   但都好甜架 ~ 

食完抖陣就同里奧大人徑步去 lu ~

~~~~
今日請假   因為媽咪有白內障   所以請假陪媽咪驗眼 ~  

第一件事當然同朱朱食早餐啦   不過好大風   只係抱住佢落街呢   驚佢吹親呀   其實佢食完營養糊仔之後就多數瞓覺   所以我食早餐嘅時候   佢都好乖咁無話要嘢食   咁我就可以舒舒服服咁食喇 ~  



食完上屋企抖陣   就同媽咪出發去驗眼 lu   

我真係好感恩   因為有次同媽咪飲茶   見佢好辛苦咁望嘢   仲以為佢眼鏡度數唔啱   但佢話有小小白內障   諗住 6 月覆診再問醫生   我即刻話唔好喇   睇私家好 d   政府等好耐   真係盲咗都未做呀   所以就 book 咗私家睇喇   我媽咪食好多藥   上次我無無聊聊咁 mark 低喺記事薄   估唔到今次用得着   因為醫生話藥物都會有影響   媽咪仲好愕然點解我會有佢食藥嘅資料添呀   so 真係好感恩呢 ~

驗完眼就同媽咪去 King Ludwig Beerhall 食德國菜   去到嘅時候差不多 1 點半   估唔到無乜人喎 ~



今次同媽咪 order  2 個 lunch set ( 三文魚湯律  + 德國脆皮鹹豬手 + 甜品 + 餐飲 & 甘筍忌廉湯 + 炸魚蕃茄天使麵 + 甜品 + 餐飲 )   再散叫 1 個農夫包   個 Waiter 好好人   話不如叫兩個 set 算啦   驚我地太多食唔哂   但我話真係好想試埋個農夫包囉 ~

( 每枱都有嘅蒜蓉包 ) - 脆卜卜   勁香蒜蓉味   超正 

( 甘筍忌廉湯 ) - 我媽咪飲嘅   話有粒粒甘筍蓉 

( 德國脆皮鹹豬手 ) - 超脆卜卜嘅皮   正   d 肉都好滑   但覺得好似有陣羶味 

( 三文魚沙律 ) - 兩塊三文魚都幾大塊   但最有驚喜係粒車厘茄   超甜呀  

( 炸魚蕃茄天使麵 ) - 我覺得無乜味   唔知係咪食咗鹹豬手呢  

( 農夫包 ) - 超超超超正   外脆內軟   正到難以形容   下次再黎必食呀  

( 鵝肝醬 ) - 我好小食鵝肝   但覺得好好味 

( 酸忌廉芝士醬 ) - 我鍾意食呢個醬   但比較漏  

( 士多啤梨忌廉蛋糕 ) - 好飽   所以無咩點食 


不過呢   最後食剩差唔多半隻豬手同碟炸魚天使麵   所以我就可以當晚餐咁整比里奧大人食喇 ~ 

同埋媽咪一齊番屋企   陪下媽咪陪下朱朱   5 點半先番屋企   一日頻頻撲撲真係好攰呢 ~