新港明珠海鮮酒家 @ 官塘 ( 31-DEC-2010 )

明爐燒味拼盤 / 大斑兩味 - 碧綠炒斑球 / 蒜蓉蒸頭腩 / 紅燒鮑參翅肚羹 / 荔茸鳳尾蝦 / 枝竹羊腩煲 / 田園脆綠蔬 / 當紅南乳吊燒雞 / 生炒糯米飯 / 精彩甜品 - 合桃露 / 精彩甜品 - 綠豆沙

( 31-DEC-2010  FRI )

今日 Happy Friday   再加上係 2010 最後一日   心情真係特別興奮呀   因為好期待新一年嘅開始呢 ~

早餐要食飽啲   因為飽啲個人會精神啲同埋特別開心啲 ~

Holiday Mood 啦   番到菇場無嘢做   更加好想快啲放工呀 ~ 

晏晝食完 Lunch Box 之後就落街買嘢   但買唔到嘢添   又好熱喎   無收鑊嘅   之得唔落街啦 ~ 

噢噢噢   仲諗住放 4 點添   原來無得放早   仲要好忙添   不過算啦   好過悶嘛 ~ 

今晚約咗大眼妹一家同埋佢家姐一齊食飯   里奧大人又放 6 點半   所以諗住行一陣   之後再 Join 埋里奧大人一齊去   途經街邊檔   買咗梳皇帝蕉   再去食神傳說買咗零食比自己   又買餅乾比里奧大人   點知里奧大人打嚟話不如將啲餅乾直接拎去佢公司   咁佢就唔駛拎嚟拎去   咁又係喎   所以我就接里奧大人放工喇 ~ 

今次着 One Piece 又出事啦   里奧大人同事問我哋會唔會倒數   我哋話唔會啦   佢同事話 "BB 唔捱得夜"   我仲以為佢知我哋早瞓   所以用 BB 嚟形容   點知里奧大人陰陰咀笑   話妳知咩事啦   我話我真係唔知喎   佢話同事話緊妳個肚嘅 BB 呀   乜我個腩真係大成咁咩   成日比人誤會   哈哈 ~

7 點準時到酒樓   大眼妹一家又係差唔多時間到   今次我哋叫咗半席嘅菜式   我覺得勁有 Family Feel 咁呀   又一齊飲紅酒   呢晚好開心呀 ~

差唔多 9 點半就各自歸家喇   我帶里奧大人搭小巴番屋企   點知搭錯車   我仲同佢講話呢條小巴線又加咗價   點知去到中途發覺路線唔同之前   再望真啲個牌   原來係另 1 條線嘅小巴   好在可以比我哋中途落車咋   唔係都唔知去邊到先可以落車呀   之後再行番附近小巴站   好在唔遠咋   不過已經比里奧大人嘈嘈嘈   我實在太論盡喇   咁都睇錯 ~

2010 年最後一日喇   好想同里奧大人一齊迎接新嘅一年   但我哋年紀大喇   要早瞓   又唔想同人迫   舒舒服服喺屋企相親相愛咁倒數仲好啦 ~  

住家飯 @ 媽咪屋企 ( 30-DEC-2010 )

蒜蓉金菇蒸帶子 / 陳皮蒸泥猛 / 海參蠔豉燜排骨 / 炒菜心 / 花膠紅蘿蔔粟米湯

 

( 30-DEC-2010  THU )

今朝好似清涼咗   不過有太陽   都唔話好凍咁呢 ~ 

早餐食腿蛋治   其實我唔鍾意食火腿   不過又唔想食餐肉   鹹牛又肥   芝士又滯   但就咁蛋治又好齋咁喎 ~

菇場又係好 Free   掛住上網   郁都唔願郁咁   所以越坐越凍呀 ~

晏晝同 8 卦去一間新開嘅餐廳食嘢   之後我就買絲襪   叫佢番菇場先   買女人嘢唔方便有男人喺度 ~

里奧大人上咗大陸   我又番媽咪屋企食飯喇   食完飯就同家姐一齊番屋企   我要幫佢搽指甲油呀   我哋仲買埋煎釀三寶番屋企食   佢恨食好耐啦   次次都提嘅 ~  

送埋佢搭車我就幫里奧大人買龜苓膏   出一出街就比人點去買嘢 ~ 

我今晚雖然唔駛煮飯   但都好攰   不過見到一機衫未熨   我又唔想堆埋一齊熨喎   連熨 2 機衫好攰家嘛   所以沖個熱水涼   醒一醒神再熨衫   但都係好攰   哈哈 ~ 

打邊爐 @ 稻香 (九龍灣) ( 29-DEC-2010 )

豚肉 - 上次喺朋友屋企打邊爐食過之後   覺得好好食   所以就 Order 喇
墨魚膠 - 里奧大人好鍾意食㗎   所以必叫呢   
頂級肥牛 - 打邊邊唔叫肥牛   唔似打邊邊呀 
綠色一藍子 - 菜喎   當然唔少得啦

沙爹湯底 - 呢個湯底要 $48   我覺得都幾貴   不過原來都好香沙爹味   加咗 1 次水都仲係好濃味   Good 呀   咁都幾物有所值

8 款醬料 - 最鍾意呢   我記得好耐之前去唔知邊度打邊爐   生蒜係要 $10 碟   不過無又唔好食喎   所以依家可以無限次任添加   真係食得好鬼開心囉

左邊係喺養和堂買嘅竹蔗馬蹄水 / 右邊係稻香嘅西洋菜蜜

( 29-DEC-2010  WED )

今朝又唔覺好凍咁噃   不過都係要着番件褸穩陣啲 ~ 

好想飲即磨咖啡呀   所以又去麥記食早餐喇   不過其實我唔多鍾意幫襯麥記   覺得佢成日將啲價錢加啲加啲咁樣   好奸咁囉   同埋依家啲餐紙又薄咗同細塊咗呀   上次聽到有個人係咁講㗎喇   不過我無用到張餐紙   所以無為意   點知上次里奧大人印薯餅嘅時候又係咁講    無計啦   樣樣嘢都加哂價嘛 ~

番到菇場超開心呀   因為所有高層都唔喺度   想點都得呀 ~ 

晏晝有 Lunch Box   食完就出去行下   又買咗兩對絲襪   真係無事出街少破財呀   定係女人真係見到咩都想買呢 ~

里奧大人今日 Off 做功課   佢又記錯咗啲嘢喎   等我無諗定晚餐煮咩   所以都唔煮喇   去稻香打邊爐算喇 ~

我哋飽到反哂肚   去咗商場行一陣先番屋企   番到屋企諗住熨衫郁下   點知啲衫又未乾喎    無計啦   個天都要比我休息   無理由特登再搵嘢嚟做家嘛   係咪先 ~     

鴛鴦腸蒸排骨伴玉子豆腐 + 沙爹醬炒唐生菜 + 甜酸齋拚齋鴨腎 (外賣) ( 28-DEC-2010 )

( 28-DEC-2010  TUE )

呢幾日假期朝朝瞓到 10 點幾先起身   今朝要 7 點 45 分起身   瞓少 3 個鐘   真係好鬼攰呀 ~  

今朝好想食甜包   所以食雞尾包   但坐我對面嘅女人食車仔麵   仲要加醋同辣椒油   香到呢   幾想叫佢比兩啖嚟食呀   哈哈 ~

菇場呢排無咁忙   可以偷雞上網   雖然菇場啲同事好古怪   但唔緊要   因為可以 MSN 同朋友傾偈   如果無得 M   咁每一日都好難過囉 ~ 

晏晝有 Lunch Box 喇   好耐無食 Lunch Box   都幾有新鮮感呢 ~ 

呢日里奧大人 Off 做功課   難得佢咁早喺屋企   我放工都即刻趕番屋企煮飯 lu ~

是日懶餐 - 鴛鴦腸蒸排骨伴玉子豆腐 + 沙爹醬炒唐生菜 + 甜酸齋拚齋鴨腎 (外賣)

鴛鴦腸蒸排骨伴玉子豆腐 - 我覺得呢個餸係懶人首選   今次加埋玉子豆腐   係因為原來 1/1/2011 到期   好在比我留意到咋   唔係又浪費呢 ~

沙爹醬炒唐生菜 - 懶呀   唔想炒呀   最多落多兩片薑   我真係好驚拍薑拍蒜頭   次次都唔知飛咗去邊   但見人哋拍就好簡單咁   可能我把唔係菜刀啦 ~

家姐介紹嘅印尼沙嗲醬   佢話蘸唐生菜好好味   今晚試咗都唔錯喎   好香花生味   同埋呢隻沙嗲醬有分唔辣 / 小辣 / 中辣 / 大辣   我呢包係中辣   我一啲都唔覺得辣   但里奧大人話辣喎

甜酸齋拚齋鴨腎 (外賣) - 無啦啦勁想食   所以就買喇   不過鴨腎好乾呀   咬到牙到軟埋    唔掂呀 ~  

本來想食完飯出去睇電話   但都係想里奧大人快手啲做功課   咁樣第時可以成日去街都得啦   好期待呀 ~

韓汁雞翼 + 勁薑蒜炒飯 + 炒菜心 + 牛大力土茯苓豬骨湯 ( 27-DEC-2010 )

( 27-DEC-2010  MON )

最鍾意星期一係假期   咁會覺得呢個星期番工會好快過咁呢 ~

呢朝 10 點 15 分起咗身 lu   同里奧大人 Share 一份早餐   之後我就去鴻星等位 lu   感恩呀  一去到有位   但約咗媽咪同家姐 12 點   不過咁都好嘅   好過佢哋嚟到無位呢 ~

坐正風位   吹正個頭喎   有啲頭痛   忍唔住打比里奧大人叫佢黎嘅時候拎頂帽比我   估唔到無耐就到呢   仲拎埋頸巾   佢話驚我凍喎   又幾窩心噃   一叫即到 ~

椒鹽魷魚鬚 / 蝦腸 / 鹹菜豬肚湯 / 臘味煲仔飯 / 粟米雞球粥 / 山竹牛肉 / 懷舊馬拉糕

差唔多 2 點飲完茶   里奧大人就番屋企做功課   我就叫家姐車我去千色店買瓦煲   好感恩買到呀   之後家姐再陪我去埋街市買豬展煲湯   咁我就唔駛特登再去屋企附近先買嘢喇 ~

番到屋企都 4 點幾   問里奧大人餓唔餓   佢話餓   但無咩胃口   點知去到大快活就餐蛋麵 + 香草雞翼   咁叫無咩胃口喎 ~

是日晚餐 - 韓汁焗雞翼 + 勁薑蒜炒飯 + 炒菜心 + 牛大力土茯苓豬骨湯

韓汁焗雞翼 - 用韓式醃肉汁醃咗一晚   好好味呀   本來諗住就咁煎   但要焗埋啲火雞片   所以就開爐喇 ~ 

勁薑蒜炒飯 - 里奧大人話凍嘛   所以整呢個炒飯   我食咗兩啖咋   但佢就話好辣   成身暖哂呀 ~

炒菜心 - 食埋剩餘嘅 1 斤   我又唔識買牛肉   又唔識炒牛肉   如果唔係唔駛齋食菜心咁悶 ~

牛大力土茯苓豬骨湯 - 次次煲湯包都唔記得買紅蘿蔔同粟米   好在食 Tea 嘅時候記得要買咋   唔係個湯應該無咁甜呢 ~

蒜蓉豆豉蒸鯇魚 + 炒菜心 + 金滿堂甜品 ( 26-DEC-2010 )

雜果拉麵 / 心太軟伴綠茶 / 曲奇雪糕 / 超辣黃金組合 (蕃薯 / 湯丸 / 清心丸)

( 26-DEC-2010  SUN )

今朝瞓到 11 點幾呀   所以都無番教會   食完早餐就番屋企執屋喇 ~

呢兩個星期都好忙   都無好認真咁打掃   今日盡地一舖咁做   雖然好攰   不過見到間屋整整齊齊就真係好開心呢 ~ 

同里奧大人食完 Tea   我買完餸   煲埋雪梨茶   就將啲衫換季喇   應該唔會無啦啦又熱到着短袖啩 ~

好耐無煮飯啦   所以要煮啲最簡單嘅   唔想一下子太多嘢搞   咁樣好攰 ~   

是日懶餐 - 蒜蓉豆豉蒸鯇魚 + 炒菜心

蒜蓉豆豉蒸鯇魚 - 之前整咗梅菜   所以今次整蒜蓉豆豉   惹味啲嘛 ~ 

炒菜心 - $15/2 斤   可以食 2 晚   唔駛煩 ~

呢晚家姐想我陪佢去淘大買衫   又順便拎埋啲火雞肉比我   所以就上嚟屋企坐陣先喇   因為佢好想玩 Iphone 啲 Game 呀 ~ 

同家姐買完衫   就叫埋里奧大人一齊食甜品   我同家姐食咗凍嘅甜品   所以我陪佢等車嘅時候   凍到腳震震呀   哈哈 ~

我覺得家姐件 Tee 嘅八哥公仔好搞笑   佢真係超勁鍾意八哥   所以我同佢啲朋友送嘢比佢就最好   唔駛諗   總之係八哥就鍾意㗎喇

打邊爐 @ 朋友屋企 ( 25-DEC-2010 )

( 25-DEC-2010  SAT )

今朝同里奧大人10 點就起身 lu   晏晝約咗朋友飲茶   所以就 Share 食 1 份早餐喇 ~

番到屋企梳洗完   抖多陣   12 點就出發 lu ~  

同大眼妹一家三口飲茶   對上一次見已經係年幾之前   話咁快又一年   真係唔覺囉   成日好似見

咗無幾耐咁   時間呀時間   可唔可以唔好過得咁快呀 ~

飲到差唔多 3 點就走 lu   里奧大人又話唔做功課   所以陪我去 Piago 睇嘢呢   經過 Unilqo 見到格仔 One Piece   我超鍾意啦   又做特價喎   我買咗 3 件同款唔同色   另外 2 件又係同款唔同色   好滿足呀 ~ 

見里奧大人開始可能覺得有啲悶   我都唔行咁多喇   番屋企比佢小睡片刻   抖足精神去下場喇 ~   

今晚去朋友嘅上環屋企打邊爐   但我哋就去 菜菜仔 舖頭一齊集合買嘢再打的去呢 ~ 

我哋 10 個人一齊打邊爐   不過有 3 個係朋友嘅朋友   我真係未試過咁多人打㗎   所以覺得好熱鬧   同埋可以食好多唔同嘅嘢呀 ~   

差唔多 11 點幾就交換禮品   我抽仲里奧大人果份呀   無哂驚喜   噢 ~

食埋糖水都差唔多 12 點   我同里奧大人就走先喇   番到屋企差唔多 1 點   但我次次沖完熱水涼都唔可以即刻瞓到   所以 2 點鐘先瞓呀   真係 N 年未試過咁夜瞓喇 ~

今年好有 Mood 買聖誕禮物比里奧大人呀   買咗 1 盒朱古力同伸縮鏡頭杯比佢   佢好開心呢

大家樂 @ 九龍灣 ( 24-DEC-2010 )

( 24-DEC-2010  FRI )

Happy Friday 加上聖誕節連放幾日   真係超級勁 Holiday Mood 呀 ~ 

今朝要食豐富啲   因為晏晝要食麥皮   個餐包可以送麥皮呢 ~ 

菇場無哂高層   Free 到震啦   不過知道無得放早就無哂 Mood 囉 ~

晏晝食麥皮 + 餐包   勁有病人 Feel 呀   不過為咗清清腸胃就無計啦 ~

 
里奧大人又無得放早   仲要 6 點半先放工   要 7 點先番到屋企喎   但 8 點又要番教會聽佈導晚會   好趕咁呀 ~

今晚其實突然好想食車仔麵   但又覺得好似好慘咁   所以都係去大家樂打邊爐   感覺豐富啲咁嘛   不過食得好急囉 ~

鐵匠 + 許留山 @ 九龍灣 ( 23-DEC-2010 )

鐵匠卷 (三文魚 / 炸軟殼蟹 / 牛油果 / 沙律醬 /  蟹籽 / 青瓜絲) / 炸雞軟骨 / 三文魚手卷 / 黃蘿蔔手卷 / 辣味螺肉壽司 / 蕃茄豬軟骨手打烏冬 / 巴黎戀人朱古力火鍋 / 椰汁紫米糕

( 23-DEC-2010  THU )

星期四喇   今日想好食菠蘿包呀 ~

菇場靜哂 lu   老闆同阿 Head 又唔喺度   可以無限上網   好爽呀   不過對眼好攰 ~ 

晏晝想出去行下   因為聖誕節就黎到   所以依家街邊好多走鬼檔   我之前買咗隻襪筒 $20   喺舖頭買就 $45   一模一樣喎   依家舖租好貴   實係打番喺消費者身上 ~

勁想食廈門炒米呀   不過都唔好食嘅   米粉又乾    下次真係唔想買呢間嘅炒米粉呀 ~

今晚要幫家姐整沙律   里奧大人又上咗大陸   所以都好多時間慢慢整呢 ~ 

家姐今晚同埋我哋一齊去鐵匠開餐   今次佢坐出面   所以好快拎卡出嚟埋單   真係好感恩    因為原來 DBS 有 9 折 (食滿 $200 未計加一)   仲有恆生卡食滿 $150 (未加一) 都有折   但個 

Waiter 又唔講   我依家先知道咋   我覺得佢應該喺人埋單前要講囉 ~  

之後一齊再去許留山食甜品   因為我要用埋 $50 Cash Coupon   12 月底到期   真係唔記得用就唔抵嘛 ~

稻香 @ 九龍灣 ( 22-DEC-2010 )

( 22-DEC-2010  WED )

今日冬至應該可以放早啩   所以個人都特別有 Holiday Mood 咁呀 ~ 

呢朝又去麥當勞食早餐   食緊嘅時候先知道原來連續 3 日都係去麥當勞添 ~

次次去麥當勞都會見到同一班阿婆   好在佢哋講嘢唔係太大聲   唔係都好嘈下   同埋佢哋個個都知道每個人家庭狀況咁   好似坐喺我隔離嘅母子   原來個仔係獸醫   因為佢哋一走   個 Staff 阿嬸就同班阿婆講   話佢個仔係獸醫   住喺邊度嘅 4 樓   阿媽就住廿幾樓   個仔都 30 歲仲未結婚   真係咩都知咁 ~

   

諗番起自己未嫁嘅時候   但有男朋友嘅   同媽咪飲茶   間唔中就有人問我結婚未   話佢個仔未拍拖   又咁咁咁   就算我結咗婚都有人咁問囉   有次喺舊公司   個煮飯阿姐又係問我拍拖未   話佢個仔未拍拖   佢個樣流哂口水咁㗎   好恐怖   我真係好驚呢啲人   有得拍咪拍   無得拍咪唔拍住囉   駛唔駛阿媽開口做媒人呀   同埋比人感覺妳個仔可能有問題   無理由無拖拍囉 ~

菇場今日都一般忙   不過 Holiday Mood 真係好唔想做   只係不斷 Check Email 有無得放早   哈哈 ~

差唔多 11 點幾就收到 Email 話放 4 點   超開心呀   本來 Lunch Time 想出去買嘢食   不過我又驚一陣里奧大人又放 4 點   要我陪佢食 Tea   所以食杯麵算喇 ~ 

食完真係等放工㗎   不過里奧大人收 5 點半喎   我就自己行下街先囉   德福依家開咗間 Piago   有間日超都唔錯   唔駛下下過海嘛 ~ 

行到 6 點左右就番屋企 lu   里奧大人就去剪髮   路經買鬆馳熊嘅攤檔   叫里奧大人送個 Cushion 比我番菇場攬住   當聖誕禮物啦 ~

今晚同姑奶佢哋一齊去稻香食晚飯做節   真係好鬼怕正日出街食   又等得耐   又要限時   人都顛呀   同埋唔知點解   佢地可以去到邊度都食差唔多嘅食物   真係唔悶咁 ~

住家飯 @ 媽咪屋企 ( 21-DEC-2010 )

蒜蓉蒸帶子 / 蒸游水魚 / 一斤乳豬 (外賣) / 黑椒牛扒 / 大豆芽金菇炒豆卜 / 青紅蘿蔔鱷魚肉豬骨湯 / 大樹菠蘿

( 21-DEC-2010  TUE )

今朝又喺麥記食早餐喇   我好鍾意食煙肉蛋漢堡㗎   個包煙煙韌韌好好味呢 ~

菇場都一般忙   不過老闆又唔喺度   唔上網做下私人嘢   好對唔住自己咁 ~ 

晏晝食杯麵   我要快啲食哂所有杯麵呀 ~

里奧大人上咗大陸   我又去媽咪屋企食飯喇   依家住得咁近   真係次次都有嘢拎番屋企咁   因為我屋附近嘅藥房好 Dirty 咁   加上我又唔識買喎   所以我多數叫媽咪幫我買乾貨呢 ~ 

海參冬菇燜排骨 + 粟米蛋花湯 ( 20-DEC-2010 )

( 20-DEC-2010  MON )

星期一喇星期一喇   好攰呀好攰呀   尋晚 11 點幾先瞓   今朝好唔夠瞓呀 ~

今朝去麥當勞食熱香餅餐   我覺得無咁悶呀   同埋 d 熱香餅好似煙煙韌韌咁   都幾好味   不過份量都幾多   本來諗住留 1 塊晏啲食㗎   但無糖漿又好似無厘味道咁   所以最後都食埋去 lu ~

番到菇場忙咗成朝   Lunch 好想食車仔麵   所以落街買喇 ~

呢晚要煮飯 lu   真係好耐好耐無煮飯   有啲唔慣呢 ~ 

是日懶餐 - 海參冬菇燜排骨 + 粟米蛋花湯

海參冬菇燜排骨 - 媽咪燜㗎   不過今次太多汁咁   都係即場食好味啲 ~

粟米蛋花湯 - 今次係優惠裝嗰啲粟米湯   即係 4 盒粟米湯送 1 盒粟米粒嗰啲   但我開嘅時候   覺得係無單買嘅咁多粟米   同埋乾啲咁   食嘅時候真係唔多覺得好多粟米   但我落水嘅份量係一樣喎 ~

Cafe Iguana @ Elements (尖沙咀) ( 19-DEC-2010 )

Tea Set - Tostada / Ceviche / Queso Manchego Frito / Alitas de Pollo / Calamares / Pie de Limon /  Pastry Cream Puff
Queso Manchego Frito - Deep-fried Manchego Cheese in Salsa VerdeAlitas de Pollo - Spicy Chicken WingsCalamares - Deep-fried Calamari Rings with Citrus Mayo
Ceviche - Prawn, Scallop and Papaya Marinated in Fresh Lime Juice, Onion, Cilantro and Tomato served with Tortilla Chips
Tostada - Cryspy Tortilla served with Puled Beef Guacamole, Salsa and Cilantro
Pastry Cream Puff - with Hazelnut Chocolate Clip
Pie de Limon - Key Lime Meringue Pie
Nachos - Tortilla Chips layered with Melted Asadero Cheese, Roasted Corn, Peppers, Salsa and Guacamole

( 19-DEC-2010  SUN )

今朝差唔多 10 點起身   同里奧大人去大快活食早餐就番教會 lu ~

差唔多 2 點出去食 Tea 喇   去咗大家樂   不過依家覺得大快活係好味啲 ~

我覺得呢朝係咁出出入入咁   因為 4 點又要出門口   約咗家姐一齊去 Elements 食飯睇戲呀   我第一次去 Elements 咋   不過如果唔係糟糟比戲飛我哋睇   相信我唔會特登行 Elements 囉   都唔就腳嘅 ~

Book 咗 Cafe Iguana   可能因為 5 點幾關係無咩人   可以有個好舒服嘅卡位坐呢 ~ 

冬天好快日落   所以未夠 6 點已經黑哂   但佢哋唔會開燈   就咁放低個 Candle 座   但我哋覺得係黑   唔係浪漫囉   呵呵   因為真係睇唔到自已食緊嗰啲係乜嘢嚟㗎 ~

差唔多 6 點 45 分就走 lu   去 Threesixty 行陣   家姐話要買無花果乾   我又買包   估唔到又幾好味喎   啲口感好得意呢 ~

今晚睇 7 點 15 分嘅  "Harry Porter 死亡之聖物"   其實我只係睇咗 1 同 2 集咋   所以我都唔知講咩   不過其實都好悶下   仲要睇 2 個半鐘添   好眼瞓 ~

睇完戲就各自歸家 lu   家姐搭巴士   我地搭地鐵   去到荔景轉車去太子再去九龍灣   轉幾轉   地鐵又焗   整到好鬼攰呀 ~ 

番到屋企差唔多 11 點   沖埋涼再杠呢樣嗰樣   都成 11 點 45 分先瞓   攰到呢 ~

做冬 @ 淘源酒家 (官塘) ( 18-DEC-2010 )

宮廷雞煲翅 / 古法蒸龍躉腩 / 原隻鮑魚伴玉掌 / 姬松茸蝦球蚌仁 / 野菌扒豆苗 / 脆皮黃金雞 / 鮮果拚盤 / 嶺南美點

( 18-DEC-2010  SAT )

今朝要番工   預咗 2 點先食 Tea   所以食扒芝腿治也 ~

菇場忙呀   不過阿 Head 出咗 Trip   我都唔願做嘢住 lu ~ 

12 點半里奧大人打電話嚟問晏晝食咩好   原來佢開始餓   想早啲食嘢   本來諗住食煲仔飯    點知夜晚先有   所以里奧大人就話不如去飲茶喎   是但啦 ~

去到酒樓樣樣都想試   不過其實又唔係餓喎   點知食到 2/3 已經飽到反哂肚   最後就妳推我讓咁囉   好在食哂   但講明下星期唔再飲茶囉   好驚呀 ~ 

豆沙軟餅 / 野菌素粉果 / XO 醬炒蘿蔔糕 / 山竹牛肉球 / 蔥花炸兩 / 蝦餃 / 小籠包

里奧大人番屋企做功課   我就出旺角買麵粉   順便靜靜雞買聖誕禮物比里奧大人呢 ~ 

今次買咗急凍酥皮同牛油   所以坐小巴   8 分鐘去到九龍灣   超快呀   不過行到高速時   有架小巴係咁砵砵砵   原來有架車想駛開線   不過無打燈   我嚇到心都離埋 ~

今晚家姐揸車一齊去淘源同媽咪做冬   估唔到都 Full 哂   好在 Book 咗位   叫咗個套餐   話就話 $1,680   加埋一同茶水   都要 $1,900 埋單   不過媽咪食得好開心   我哋都比得好開心呢 ~

名古屋 @ 尖沙咀 ( 17-DEC-2010 )

( 17-DEC-2010  FRI )

今朝雖然有陽光   但都都幾凍下   同里奧大人食完早餐就去超市掃貨   爽呀 ~

番到菇場忙到呢   望一望個鐘   原來已經 12 點 10 分   有嘢做啲時間真係過得好快呀 ~ 

Lunch 食兩餸飯 + 例湯   話明無味精   不過都應該無嘅   因為食哂都唔覺口喝呢 ~ 

今晚去針灸呀   隔離果個女仔又做聯線減肥   佢一路做一路話好痛   成日問吉咗入去未   痺到落腳板底咁   搞到我好鬼寒呀   好想快啲針完走呀 ~ 

針完之後就同埋里奧大人 + 媚媚 + 村姑 + 文西一齊去 Harbour City 影相   不過我去到佢哋都影完 lu   同埋話今次無咩特別   所以即轉場去 1881   可能我唔識影相   所以覺得無咩特別好影 ~

之後約埋菜菜仔兩公婆到名古屋食飯   說說笑笑又 10 點幾   之後一齊行到地鐵站就各自歸家 lu ~ 

生力飯店 @ 大埔 ( 16-DEC-2010 )

( 16-DEC-2010  THU )

今朝市區得 8 度   但我又唔覺好凍咁喎   可能沖完熱水涼啦   同埋可能依家住喺市區   唔係覺得太凍咁囉 ~  

等巴士等咗半個鐘   黐孖根   不過我又唔會轉去搭地鐵   因為我唔想去到地鐵附近先見到架巴士喺我隔離經過   我會顛㗎 ~

我真係唔鍾意喺菇場食早餐   所以我寧願快快食都唔會外賣呢 ~

忙呀忙呀忙呀   忙到 Lunch Time   又係好想食辣椒豉油呀   所以落街買燒賣 + 炒麵   超好味呀 ~

姑奶今日唔知咩咩鬼畢業   所以就請哂家人去大埔食飯   好有舊地重遊嘅感覺呀   同埋大埔啲藥房買嘢真係好鬼平   所以又買咗啲日用品番屋企   最衰啲日用品又大件又重   唔係就可以入多啲貨呢 ~ 

上海婆婆 @ 九龍灣 ( 15-DEC-2010 )

香辣溫室小黃瓜 / 生煎包 / 小籠包 / 干煸四季豆 / 蕃茄牛肉湯麵

( 15-DEC-2010  WED )

今朝早餐去麥當勞   飲埋杯即磨咖啡   爽呀 ~

忙呀忙   攰到呢   Lunch Time 都唔想落街買嘢食   所以又食杯麵喇 ~

食完又開始忙喇   想快啲做哂啲嘢呀 ~   

今晚好開心呀   因為約咗 CC 一齊晚飯   之後再上嚟我屋企坐   佢仲買咗盒曲奇比我添   我覺得好有新居入伙 Feel 呀   啲感覺好得意   以前住大埔   唔會有朋友探我   依家啲朋友就會話想嚟我屋企玩   真係好似啲朋友番番哂嚟咁呀   開心開心 ~

大家樂 @ 官塘 ( 14-DEC-2010 )

( 14-DEC-2010  TUE )

今朝勁想食甜包   所以去食菠蘿油喇   咁啱我對面又食菠蘿包   原來可以就咁叫菠蘿包   仲平 $3 添 ~

番到菇場忙到呢   忙到做唔到私人嘢呀   好在有 Lunch Box   唔駛落街買嘢食   可以一路食一路上網睇嘢 ~

食完又繼續忙啦   好在今晚唔駛煮飯   唔係真係好辛苦呀 ~

今晚里奧大人唔駛上大陸   不過要開會   但唔知開到幾時   所以我就同媽咪 家姐去大家樂打邊爐喇 ~

蕃茄雞柳意粉 + 炒菜心 + 紫蕃薯糖水 ( 13-DEC-2010 )

( 13-DEC-2010  MON )

夠瞓真係好喇   今朝好精神呀   不過今朝天氣唔好啦   又熱又濕咁   唔鍾意呀 ~

今朝好想食辣椒油   所以食漢堡炒蛋米粉喇   食完出汗呀 ~

菇場無咩嘢做   又上網咁囉   不過唔可以咁猖狂   唔係細老闆見到就煩 lu ~ 

今日又係 Lunch Box 喇   其實尋晚我無乜點食到啲豬軟骨   所以今日覺得好似食新餸咁呀 ~

晏晝超忙呀   坐到腰骨痛   睇到眼又濛   所以抖下先   食下花占餅   我好鍾意食粒糖   講起花占餅就好笑   上次同家姐講話好想食花塔餅   佢好愕然咁問我係咪要杜蟲   我話係有粒糖嗰啲餅呀   先醒起我自己講錯   呵呵 ~

終於放工喇   今日 13 號   所以去惠康買嘢有 95 折   唔係多但係如果特價再 95 折呢   咁就差好遠喇 ~ 

是日晚餐 - 蕃茄雞柳意粉 + 炒菜心 + 紫蕃薯糖水

蕃茄雞柳意粉 - 尋晚又醃定塊雞柳   所以都唔係話好煩   今次仲整得好味添   我覺得有心機整   唔試味整出黎都好好味   但無心機呢   跟哂食譜買埋好材料都唔好食咁囉 ~  

炒菜心 - 真係大頭蝦啦   唔記得有斤菜心喺雪櫃   好在無煲粟米湯咋   唔係又太飽啦   我唔想呀 ~

紫蕃薯糖水 - 好想食糖水呀   簡簡單單整個蕃薯糖水   用黑糖煲糖水真係好味啲咁呢 ~

瑞士汁豬軟骨 + 蒜蓉炒豆苗 + 薑黃炒飯 ( 12-DEC-2010 )

( 12-DEC-2010  SUN )

今朝同家姐 媽咪去海港飲茶   出咗門口先知道毛毛雨又凍凍哋 ~

檸蜜蛋散 / 牛肉腸 / 蘿蔔糕 / 叉燒包 / 柚皮蒸鴨掌 / 醬汁蒸鳳爪

飲完之後陪家姐去街市買嘢   明明佢只係想買冬瓜   之後買依樣又買嗰樣   佢買嘅時候我又想買喎   如果我同佢去旅行真係唔掂呀   買都唔係問題   最大問題係點拎呀 ~ 

陪完佢哋飲茶   我就陪里奧大人食早餐喇   時間啱啱好   之後就番教會 lu ~ 

同里奧大人去買俄羅斯立英   華潤堂有得買   但我話要去萬寧同屈臣氏格價   估唔到佢哋都無喎   又要去番華潤堂買   里奧大人陰陰笑衰衰咁話   又要番轉頭買   一早買咪好囉   我話買同一樣嘢可以有好多價錢   反正又唔係遠   更要格價啦   幾蚊都係錢呀 ~ 

今次一定要去許留山食龜苓膏   因為有印花   貼滿 6 個印花就有 $20 Cash Coupon   同埋一個糕點呢   好感恩呀   我同個 Staff 講上次去食龜苓膏   妳哋無比印花   佢話經理唔喺度   補番一個比我呀   咁我就唔駛再特登食多次先貼滿 6 個   好開心呀 ~

次次飲完茶都好飽好滯咁   所以唔會話太早又 Tea   但我今次睇錯鐘   以為 2 點半係 3 點半    所以快快去食 Tea   唔怪之當時唔係話太餓啦 ~ 

香草雞翼配炒米粉 / 雪菜肉絲上海麵 / 蜜汁燒雞肶配紅豆冰

尋日好努力做哂所有家務   今日真係可以好 Hea 呀   今朝又早起身    睇睇下電視都瞓着咗 lu   應該都有半個鐘   爽呀   幾咁精神呀 ~

是日晚餐 - 瑞士汁豬軟骨 + 蒜蓉炒豆苗 + 薑黃炒飯

瑞士汁豬軟骨 - 尋日整定架喇   所以今次非常非常之入味呢   呢次記得落冰糖喇   但里奧大人話甜咗啲   但我覺得好 OK 喎 ~ 

蒜蓉炒豆苗 - 食埋尋晚果半斤   豆苗真係好好食呢 ~

薑黃炒飯 - 炒咗 N 次都炒唔到粒粒分明嘅   激氣呀 ~  

梅菜蒸鯇魚 + 蒜蓉炒豆苗 ( 11-DEC-2010 )

( 11-DEC-2010  SAT )

今朝早咗出門口呀   所以就同里奧大人一齊食早餐先番工喇 ~

星期六番工   其實真係有嘢做都無 Mood 做   不過算啦   依家近近哋當去圖書館上網啦 ~  

放工諗住番屋企等食 Tea   點知里奧大人打嚟話好鬼餓   咁我話去飲茶啦   佢原來都想飲茶   咁就去咗海寶漁港試下喇   1 點半去到   都唔等 2 點下午茶時間先叫嘢食咯   我唔多 Like 喺酒樓咁耐㗎 ~

一坐低里奧大人就剔點心   蝦餃燒賣同山竹牛肉呢啲   男人真係只食飽肚嘢   我其實未餓   但都覺得啲點心都好好味   下次會再去呢 ~ 

帶子炸雲吞 / 素菜野菌餃 / 蝦餃 / 蟹籽燒賣 / 山竹牛肉球 / 馬拉糕 / 冰鎮鵝掌翼

飽到反肚   我就去街市買餸喇   番到屋企再抹廚房 + 拖地 + 熨衫   做好哂所有家務   咁聽日就可以好 Hea 咁過喇 ~

是日懶餐 - 梅菜蒸鯇魚 + 蒜蓉炒豆苗

梅菜蒸鯇魚 - 里奧大人話想食梅菜   所以就整梅菜啦 ~ 

蒜蓉炒豆苗 - 街市 $7 半斤   我覺得好抵呀   因為超市 1 Pack 都 $1x   所以我買咗 1 斤喇    我好鍾意食豆苗㗎   同埋唔係成日都有得食   所以有得買就好買喇 ~  

婆婆生日飯 @ 美心酒樓 (紅磡) ( 10-DEC-2010 )

( 10-DEC-2010  FRI )

Happy Friday 喇   加上今朝又好精神   所以更加特別開心添呀 ~ 

今朝食榨菜肉絲 + 芝士腸米粉   熱到呢   食完出汗呀 ~

好似好耐無煮飯   依家菇場又得閒   其實可以搵下有咩食譜   但又唔想搵喎   但當番到屋企嘅時候   睇啲食譜   又好想即刻開電腦 Search 其他食譜㗎喎 ~ 

終於等到 Lunch Time 喇   又食杯麵喇   懶得落街買嘢呀 ~

 
今日係婆婆生日   但 8 點幾先開席   所以我去佐敦拎禮品   係旅行蒸氣熨刷嚟㗎   不過我都唔知申請咗邊張卡先有呢份禮品   但對番個人資料又確實係我噃 ~ 

拎完嘢就去紅磡喇   咁啱家姐又差唔多到   所以就 Join 埋一齊行下街再去食飯呢 ~ 

里奧大人搵唔到美心喎   又要我出去接去   等我同唔到啲阿表傾偈影相   難得見面嘛   真係吖 ~ 

今晚 10 點 45 分就散席 lu   同埋媽咪 家姐一齊打的番屋企   好耐無試過可以一齊坐車番屋企喇   啲感覺好新鮮好得意好開心呢 ~

台灣水果凍 - 之前喺永安見到   所以想買嚟試下   點知原來係果凍   我以為係糖嚟添   之後仲同家姐講話仲以為係糖   點知家姐好無奈話   個盒面係果凍喎   點解我睇唔到嘅   我覺得係因為我一心想係糖   所以就覺得係嗰樣嘢囉 ~

出前一丁餐具 - 之前喺百佳買滿 $50 出前一丁杯麵送嘅   所以我買咗 8 個杯麵   依家諗起食杯麵都好驚   但唔食又驚到期要一次過食哂 ~ 

住家飯 @ 媽咪屋企 ( 9-DEC-2010 )

蒸斑 / 燒腩仔 (外賣) / 鹹蛋 / 炒青豆 / 粉葛花膠淮山紅蘿蔔圓肉豬骨湯

( 9-DEC-2010  THU )

尋晚飽到上腦   所以早餐清清哋食吞拿魚治算喇   反正啲吞拿魚少到無可再少   當食生菜三文治   清清腸胃 ~

細老闆今日唔喺度   又可以好 Free 咁上網   爽呀 ~ 

Lunch 食粉果 + 炒米粉   不過今次啲指天椒唔辣嘅   所以覺得好滯咁 ~

里奧大人今日唔駛上大陸   但因為家姐以為我會番媽咪屋企食飯   所以買咗蛋糕   咁我就番囉   反正里奧大人 7 點半先放工   佢自己食算喇 ~

尋晚買咗件褸   覺得家姐都應該鍾意   但如果直接話送比佢呢   佢實唔要   所以又要動動腦筋   就係話有 $50 Coupon 喇   佢一聽見有 Coupon   啱唔啱都會買   買嘢又好狼喎   如果里奧大人係咁就好啦 ~    

到比錢嘅時候   我就簽卡   家姐就問張 Coupon 呢   我都唔記得自己講過有 Coupon 添   之後我都直接話我呃妳㗎咋   係無 Coupon   只係想送件褸比妳做聖誕禮物啫   不過次次送完嘢比佢   佢又唔知送番啲嘢比我   好鬼驚㗎   所以我依家唔會講自己鍾意啲咩嘢   等佢買唔到比我呢 ~

今次里奧大人都幾好   話如果家姐鍾意件褸   佢就送比家姐   可能我依家買任何嘢都會提起家姐   所以佢都好自然會諗起家姐   算佢啦 ~ 

海寶漁港 @ 九龍灣 ( 8-DEC-2010 )

調味架 (蒜蓉 / 炸蒜 / 蔥花 / 紅辣椒絲 / 沙爹醬 / 豆板醬 / 豉油) - 一心諗住係指天椒   點知原來係紅辣椒   一啲都唔辣   蒜蓉又無味   極度失望呀   對我嚟講   呢兩樣係打邊爐嘅靈魂呀

炸魚皮 - 好脆好好味   但見到個膠兜就唔多開胃囉   生就係佢   熟又係佢咁

魚腐 / 墨魚丸 / 鯇魚腩 - 無特別

鮮蝦 - 都唔爽嘅

黑木耳 / 水魷 - 自己唔會買黎食   所以想食呀

肥牛 - 肥到呢   不過後尾再 Order 嗰啲就無咁肥

潮州魚片 / 潮州魚蛋 - 無特別

油麥菜 - 最鍾意打邊爐食油麥菜

鴛鴦湯底 (沙爹 / 清湯) - 湯底都 OK   好彩

( 8-DEC-2010  WED )

今朝都唔係好凍啫   又講到好凍好凍咁 ~

好想飲即磨咖啡呀   所以去咗麥當勞食早餐喇 ~

菇場無咩嘢做   又 Hea 到 Lunch Time   又係有 Lunch Box ~ 

今晚雖然唔係好凍   但就好想打邊爐囉   感恩里奧大人早咗放工   又感恩呢間酒樓有好舒服嘅卡位坐   但食物水準就唔掂囉 ~   

雲興隆小廚 @ 九龍灣 ( 7-DEC-2010 )

豉椒炒新鮮蟶子 - 味道一般啦   無乜大驚喜
菠蘿生炒骨 - 離遠睇個樣都好掂   但食落完全唔掂   粉太厚同埋唔脆   我覺得自己整得好味過佢囉
魚湯什菜 - 我好鍾意出街食什菜   樣樣有啲無咁悶   加埋魚湯好似好健康咁 
大支藍妹 - 好口渴呀   唔想飲汽水   所以啤一啤

( 7-DEC-2010  TUE )

呢朝里奧大人上大陸   所以 7 點就起身   佢起完身之後   我都瞓唔着   早咗 15 分鐘起身   咁就真係可以慢慢嘆份早餐喇 ~ 

今朝又去 KFC 食腸仔蕃茄湯通粉 + 咖啡   咁我食嘢嘅時候都好鍾意周圍望   突然聽到啲怪聲   原來有位阿叔食食下用電鬚刨剃鬚   佢剃得好自然㗎喎   以為自己喺屋企咁   如果佢坐我對面   我即調位呀   黐鬼線   公眾地方嘛   點會做埋呢啲嘢㗎   真係好影響市容呀 ~

番到菇場唔算好忙   不過要就住就住上網   整到個人好緊張咁   有啲眼瞓呀 ~ 

今日嘅 Lunch Box 就勁喇   帶番星期日晚依剩嘅 1 件雞同蘑菇飯   估唔到仲好好味喎 ~ 

今晚本來好想煮飯同滾湯   不過里奧大人又話唔好煮   叫我抖下   咁我又好難抉擇咁喎   所以呢   如果有大魚肉買嘅話   我就煮   無呢   就唔煮   去到街市真係好緊張呢   哈哈   我行咗兩檔都無得買喎   即係唔駛煮   可以抖下喇 ~ 

諗住去茶餐廳食蒸魚套餐   但行行下又見到呢間雲興隆小廚   話喺牛頭角下村好出名喎    所以就去試下喇 ~  

太興 (外賣) ( 6-DEC-2010 )

( 6-DEC-2010  MON )

休息咗 2 日都好咗好多喇   不過都仲係無乜胃口   個包食咗半個   剩番半個就拎走   留番做 Lunch ~

喺我好 Hea 咁上網嘅時候   同事突然踢咗我張椅一下   原來話我知細老闆番咗嚟喇   又要鬼祟上網添 ~

晏晝諗住食埋早餐食剩嘅半個包   但又想食熱嘢   所以最後都係食咗出前一丁杯麵   再加多罐可樂   但個麵都係食咗一半咋   好浪費咁   不過真係食唔落囉 ~

終於等到放工   但個人都係唔多舒服咁   只係想飲例湯   所以叫里奧大人去太興外賣番屋企食   算佢啦   想我食啖飯   特登買咗乳豬同燒鵝   咁我真係見到乳豬就好想食㗎喇 ~   

煙三文魚 + 北寄貝 + KFC (外賣) ( 5-DEC-2010 )

( 5-DEC-2010  SUN )

今朝個肚仲有少少少少唔舒服   所以都無番教會   喺屋企瞓到 1 點幾先起身 ~

終於有啲餓喇   叫里奧大人即刻去 Happy Lemon 買杯朱古力布甸珍珠   不過無厘味道   淡到呢   睇相個杯好濃味咁㗎   呃人嘅 ~ 

今日真係好 Hea   個心真係無諗過做任何家務㗎   全日坐喺梳化睇電影   反而里奧大人就好主動熨衫   實屬難得 ~ 

呢晚家姐會同前工人阿 C 上嚟開餐   所以我係咁易執好張餐枱   掃下地就算   我真係好唔願郁呢   家姐佢哋差唔多 6 點半黎到   一齊食下傾下   好快就 8 點幾   佢哋都走 lu   希望下次再有機會一齊食啦 ~   

叉燒炒麵 + 炒菜心 ( 2-DEC-2010 ) + ( 3-DEC-2010 ) + ( 4-DEC-2010 )

( 2-DEC-2010  THU )

今朝好感恩呀   因為我想去 KFC 食個 $11 (鬆餅 + 薯餅 + 咖啡) 套餐同埋加個蕃茄通粉    但我無張 Coupon   Cashier 姐姐話要散買   每樣 $6   我覺得唔抵囉   點知 Cashier 姐姐話比張 $11 Coupon 我用呀   幾好人呀   咁我就唔駛散買   慳唔小呢 ~

菇場無咁忙 lu   勁有 Holiday Mood   星期四同星期五真係令人好鬼開心   如果以後個個星期六唔駛番就發達喇 ~  

晏晝食番朝早嘅鬆餅   再加半杯麥皮都夠哂飽咯 ~   

今晚買餸嘅時候   無啦啦收到個大陸長途電話   仲以為係里奧大人打嚟   點知原來係一個鄉音極重嘅男人打嚟   我根本聽唔到佢講乜   我仲以為佢喺里奧大人啲大陸同事   之後發覺唔對路   我又聽到佢話唔好扮唔識人   我好惡咁話我無大陸人朋友   之後佢就收線 lu   應該都係呃人嗰啲㗎喇   不過無啦啦聽到呢啲電話都好驚   妳知大陸啲人啦   成日呃呃騙騙   真係比佢嚇到半死 ~ 

是日懶餐 - 叉燒炒麵 + 炒菜心

叉燒炒麵 - 唔知煮乜好   就煮里奧大人最 Like 嗰啲啦   佢一番嚟見到碟炒麵真係好開心㗎   會好快洗手開餐囉   但我其他嘢都唔係好難食啫   但唔知點解真係咁鍾意食叉燒炒麵囉 ~ 

炒菜心 - 今次好成功咁炒到一碟菜心   因為之前嘅炒菜係灼熟再炒   但媽咪話唔駛咁   就咁炒熟就得   所以我又試下   估唔到又唔係好難喎 ~ 

( 3-DEC-2010  FRI )

尋晚每月一到   今朝又超級精神喎   又唔痛   仲可以慢慢食兩個咸餐包   點知晏晝就嚟料   有啲痛   同埋嘔到九彩   喺洗手間出出入入   如果唔係 Partner 請咗病假   我實請假番屋企休息呀 ~ 

( 4-DEC-2010  SAT )

好感恩呢日 Off   咁就唔駛請病假可以喺屋企盡請瞓呢   同埋有里奧大人服侍下都唔錯   無乜幾何 ~