滷水雞翼 + 菜心 + 花膠響螺燉雞湯 ( 31-JAN-2010 )

( 31-JAN-2010  SUN )

今朝同里奧大人食完早餐就去髮型屋喇   我補番焗油   里奧大人就剪髮   估唔到 11 點已經好多人   12 點已經爆哂   好在預約咗   唔係又唔知要等到幾時 lu ~

次次吹完個髮型都好靚   自己硬係吹唔到啲效果   不過我相信係自己無心機吹   求求其其就算   所以我下定決心   每朝早 10 分鐘起身   咁就多啲時間吹靚啲個頭喇 ~

臨近新年   之前已經清潔咗廚房   執好哂衣櫃   所以今次就只係主力清潔書房   里奧大人就負責燉湯   各有各忙呀 ~

今日好好太陽   所以執嘢抹嘢都幾熱   有啲辛苦呢 ~

3 點幾去食 Tea 喇   之前嘅 Tea Set 份量好細   估唔到今次份量多咗 1/3   之得唔叫多士啦    食到超飽呀 ~

番到屋企 Hea 陣先煮飯   因為尋晚已經整好咗餸   今晚就咁翻熱就得呢 ~

是日懶餐 - 滷水雞翼 + 花膠響螺燉雞湯 + 菜心

滷水雞翼 - 醃咗一晚嘅雞翼非常入味呀   最鍾意係可以咁深色   因為我之前整係無咁深色   所以今次好開心呢 ~

花膠響螺燉雞湯 - 今次材料有冰鮮芝麻雞 + 響螺 + 圓肉 + 杞子 + 紅棗 + 薑   其實燉湯可以話好方便   又可以話幾煩   因為要將之前嘅材料煲滾 45 分鐘先可以放入燉盅   再燉 3 個鐘   加埋洗切   前前後後要用 4 個鐘   但就唔駛睇火同埋加水囉   咁無咁大壓力   最怕煲燶湯   嘥哂啲材料   時間同煤氣呀 ~

菜心 - $10 有 2 斤   分兩餐食就最好不過啦 ~ 

粟米魚柳 ( 30-JAN-2010 )

( 30-JAN-2010  SAT )

今日番喺新地址開工   好開心呀   因為好想轉換工作環境呢 ~

感恩公司附近有間環境幾好   乾乾淨淨嘅茶餐廳   可以慢慢食早餐   食到一半嘅時候見到兩個同事   所以一齊食   我估第時好多時都會喺呢間茶餐廳見到同事㗎喇 ~

有陽光   個人充滿朝氣   做嘢都特別醒神呀 ~

晏晝同里奧大人食 Tea   之後諗住剪髮   點知勁多人   所以番屋企 lu ~

抖一陣就番教會   本來想唔煮   但諗下都係煮啦   住家飯有益啲嘅 ~

是日懶餐 - 粟米魚柳粟米魚柳 - 用鯰魚柳 + 罐頭粟米蓉   所以好快就有得食呢 ~

搞掂哂   又出去散步 lu ~  

太興燒味 @ 大埔 ( 29-JAN-2010 )

八寶飯 - 叉燒 / 油雞 / 燻蹄 / 紅腸 / 燒肉 / 燒鵝 / 鹹蛋 / 魷魚 + 枝竹斑腩煲

( 29-JAN-2010  FRI )

呢朝要一早番菇場   準備大遷徙   已經早咗出門口   又已經早咗到餐廳   仲未坐低已叫定   點知比錯   搞到本來可以慢慢食   變咗要比平時嘅速度更快呀 ~

之後同其他同事一齊坐公司車去新公司   睇住啲搬運哥哥整嘢   我咃個個企喺度吹水   12 點幾就分批食 Lunch   因為新環境   所以我哋一班人一路行一路搵食   不過一行九人   所以最後去飲茶   慶祝番新公司呢 ~

番到公司又係等等等   自己同 Dept. 嘅文件 4 點幾先到   5 點先開始 Pack   搞到 6 點半先放工   估唔到去車站都好近   好感恩呢 ~ 

依家應該要企到番屋企 lu   不過都只係企 20 分鐘   都無乜問題   但今日第一次企就啱啱遇到塞車   企咗 45 分鐘   加上今日喺新公司又企喎   所以對腳好鬼痛呀 ~

原本諗住同里奧大人一齊剪頭髮   點知又遲收工加埋塞車喎   所以無去剪啦   人哋收 8 點   費時阻人收工呀 ~

呢日體力勞動較大   放工開始好鬼肚餓呢   家姐之前比咗我一張太興 $100 Cash Coupon   所以用埋啦   補貼 $7 搞掂   用人哋比嘅 Cash Coupon 真係好開心㗎 ~

腳痛呀   所以唔飽步 lu   喺屋企 Fing 手 Fing 腳扭腰算喇   都叫做郁下 ~

南乳焗金沙骨 + 粟米蘑菇蛋花湯 ( 28-JAN-2010 )

( 28-JAN-2010 THU )

今朝食奶醬多   因為晏晝同媽咪飲茶   唔想食咁飽 ~

番到菇場見啲同事仲喺度 Pack 嘢   大遷徙真係好煩呢 ~

晏晝同媽咪飲茶   第時搬咗新地址就無咁方便㗎喇 ~

4 點要熄 Sever   所以 4 點就開始 Pack 嘢封箱   之後就坐定定 lu ~ 

是日懶餐 - 南乳焗金沙骨 + 粟米蘑菇蛋花湯

南乳焗金沙骨 - 用南乳醃咗一晚   不過里奧大人話唔夠入味   無計啦   第一次整   驚太多會好鹹嘛 ~

粟米蘑菇蛋花湯 - 好耐無飲   真係好好味呀 ~

呢晚又去跑步   番到屋企沖涼之後再食沙律同埋 影子 送比我嘅榴槤糕   啲榴槤糕煙煙韌韌又重榴槤味   好好食呢   有驚喜   因為我之前係好抗拒榴槤糕呢 ~

住家飯 @ 媽咪屋企 ( 27-JAN-2010 )

蒜蓉蒸蝦 / 煎薯仔餅 / 海參山筋燜鴨掌 / 蒸魚 / 滷水乳鴿 (外賣) / 花膠淮山烏雞湯

( 27-JAN-2010  WED )

今朝又天陰陰呀   都係鍾意有陽光多啲   個人會充滿朝氣咁   好在我食完早餐多數都會精神啲呢 ~

呢排菇場個個都努力 Pack 嘢   日 Pack 夜 Pack   好在我無佢哋咁多嘢   同埋佢哋好得意   唔明點解搬嚟先拻唔要嘅紙   早啲拎出嚟做環保紙仲好啦   之前裝環保紙嘅 Tray 多數係得廣告嘅 Fax   依家差唔多全部係同事 N 年前嘅紙呀 ~ 

晏晝又同 8 卦出去大快活食嘢   呢間大快活啲位有梳化位   好有屋企 Feel 咁呢 ~

番到菇場就 Pack 自己枱嘅嘢   執完哂嘢   張枱只係得電腦屏幕 CPU Keyboard Mouse 同電話呢幾樣嘢   勁唔似番工枱呀 ~ 

今晚番媽咪屋企食飯   唔駛煮有得食就最開心呢   依家寶寶好搞笑   成日坐喺電視機櫃度    阻住哂人哋睇電視   不過我哋又唔會叫佢番入竇   難得佢肯出嚟坐嘛   咁代表佢唔係咁怕我哋   好過我哋次次嚟都匿埋喺櫃入面啦   好似好孤獨咁 ~

黑椒牛仔骨 + 黃薑炒飯 + 芒果糯米飯 ( 26-JAN-2010 )

( 26-JAN-2010  TUE )

今朝早一班車出門口   唔駛咁趕食早餐   舒服好多呀 ~

呢排好攰   但又唔想話咁早瞓   不過我又唔可以太夜瞓   最遲 11 點半要瞓   如果唔係第朝會好無精神咁呢 ~

晏晝同 8 卦出去食   同枱坐嘅學生仔成日扮勁講粗口   不知所謂   我唔覺好勁   只覺得毫無家教無修養囉   不過可能佢父母都成日講粗口   聽慣所以好自然講囉   好耐之前有個女仔喺 Lift 度講粗口   當時部 Lift 唔少人   我心諗   如果佢父母聽到佢咁講會唔會鬧佢   點知第晚見到佢父母   一樣係粗口爛舌   唔怪之得個女都係咁啦   喺咁嘅家庭成長真係可悲呀 ~

今晚好他條   只係買三色椒同白蘑菇就 OK   醃定餸真係好方便呢 ~

是日晚餐 - 黑椒牛仔骨 + 黃薑炒飯 + 芒果糯米飯

黑椒牛仔骨 - 材料有牛仔骨   三色椒 + 紫洋蔥 + 白蘑菇 + 黑椒汁   最鍾意食呢個餸   送飯同意粉都好好味呢 ~

黃薑炒飯 - 不嬲都知用易潔鑊對身體唔好   不過貪佢唔會黐底   又輕身先用   但諗諗下都係為自己身體着想唔用啦   用不绣鋼鑊或者五層鑊   但唔知點解次次炒飯都黐底好煩   擦到手痛囉   已經凍鑊落油   啲油又夠熱喎   唔通我太少油   因為我炒飯用半湯匙油咋 ~  

芒果糯米飯 - 第一次整   我覺得好好味   但里奧大人話啲糯米飯好硬喎   仲話下次唔好預佢添   哼   好巴閉咩 ~

今晚又去跑步喇   最鍾意跑步啲胃氣會 "ur" 哂出嚟   個人舒服好多㗎 ~

蕃茄焗豬扒飯 + 菜心 ( 25-JAN-2010 )

( 25-JAN-2010  MON )

星期一喇   早餐食豐富啲   等自己開心啲   精神啲呢 ~

番到菇場坐陣又 Pack 箱   好在食飽有力咋   唔係都幾辛苦 ~

晏晝同 8 卦出去食   本來我晏晝唔食飯   但見到糯米飯好吸引   所以忍唔住叫   點知番到菇場飯氣攻心   勁眼瞓呀 ~

星期一已經好攰   加埋飯氣攻心   所以坐車無耐已經瞓着咗 lu ~

是日晚餐 - 蕃茄焗豬扒飯 + 菜心

蕃茄焗豬扒飯 - 3 個大蕃茄 + 1 個 紫洋蔥 + 1 罐細茄膏 + 1 塊芝士 + 2 塊豬扒 + 2 碗冷飯   今次落咗茄膏   開得唔夠稀呀   搞到好糊口   口感唔掂   里奧大人又話呢個飯太酸   今次好失敗呀 ~ 

菜心 - 本來諗住加啲薑蔥蓉好味啲   點知攰到唔記得點豉油   如果唔係更好味呢 ~

今晚好攰   唔想跑步   只想快啲沖熱水涼 Hea 喺梳化睇電視呢 ~  

薑蔥雞絲 + 菜心 + 沙律 ( 24-JAN-2010 )

( 24-JAN-2010  SUN )

習慣會問里奧大人瞓得好唔好   基本上佢瞓得都好嘅   不過今朝問佢瞓得好唔好   佢話唔好   因為驚我踢開張被會冷親   所以佢成晚睇我有無踢被   搞到佢瞓得唔好   聽到都好感動呀   真係好感恩好感恩有個咁細心嘅里奧大人喺我生命中出現呢 ~ 

今朝番教會   所以又早少少出門口   去試另一間餐廳嘅早餐   味道唔錯   不過聽見啲阿姐對話就得人憎   成日聽到 "妳叫㗎   我唔知喎   妳話家嘛"   最憎人做嘢用呢啲態度   好不負責任咁呀 ~

番完崇拜就番屋企執屋   就嚟新年喇   想慢慢執啲   唔想一次過大掃除呢 ~  

3 點食 Tea   勁想去 KFC   不過食完就會滯九個幾鐘   唔行番陣都唔得 ~

是日懶餐 - 薑蔥雞絲 + 菜心 + 沙律

薑蔥雞絲 - 用 1 隻大雞肶拻絲   再用薑蔥蓉麻油一齊炒   再加啲炸咗嘅辣蒜蓉碎   超好味呀 ~

菜心 - 好耐無食菜心   $10 / 2 斤咁平就買咯   分兩餐食就最好不過啦 ~

沙律 - 材料有紅腰豆 + 椰果 + 粟米 + Mayonnaise   簡簡單單又健康呢   日日食都唔驚呀 ~

呢晚同里奧大人一齊跑步   最怕跑直路   好似跑極都唔完咁   都係公園啱我多啲   又有啲簡單運動設施玩喎   無咁悶嘛 ~

明新焗飯小廚 @ 大埔 ( 23-JAN-2010 )

( 23-JAN-2010  SAT )

今朝要直接去新菇場 Unpack 嘢   所以順便去埋果邊食早餐   希望搵到間好啲嘅地方食早餐啦 ~ 

因為 Partner 有嘢做   所以得我一個 Unpack File   好在阿 Head 幫手   唔係得我一個就慘喇   好重嘛   Paper File 喎   我真係根感恩有個好好好好嘅阿 Head   同埋其他同事都對我好好呢 ~

坐番公司車番菇場已經 11 點幾  lu   上陣網已經夠鐘放工   爽呀 ~

今次感恩趕到巴士   但唔明啲人點解明知多人上車   都仍然放個手袋喺隔離位   呢啲人好不知所謂囉   以為咁就無人坐咩   自私都爆 ~

無啦啦個人超唔舒服   好似作感冒咁   所以同里奧大人食完 Tea 就即刻番屋企沖杯薑茶   瞓咗陣覺舒服好多   但諗深一層應該唔係作感冒   係新公司比較焗   我又要行嚟行去執嘢   所以焗親都未定呢 ~

本來想自家打邊爐    但個人仲未進入最佳狀態   所以都係唔煮 lu ~ 

住家飯 @ 媽咪屋企 ( 22-JAN-2010 )

( 23-JAN-2010  FRI )

今朝好開心呀   因為去咗 KFC 食早餐   開心係因為無乜人排隊買嘢   我可以好快就買完有得食呢 ~

晏晝又好開心呀   因為食咗咖哩魚蛋芝士腸鳥冬   超辣好味呀   食完覺得好熱添呀 ~

夜晚仲梗加開心呀   因為里奧大人接我放工   一齊再去媽咪屋企食飯呢   我見到屋企人就最開心㗎喇 ~

今晚落毛毛雨   所以無跑步 lu   我覺得跑完步會瞓得好啲   希望真係會咁啦   因為我最想要係瞓得好呢 ~  

健康炒飯 + 冬蟲草花膠響螺燉湯 + 蕃薯糖水 ( 21-JAN-2010 )

( 21-JAN-2010  THU )

呢朝潮濕到呢   真係令到個人好攰   又立痴痴咁   總之超級唔舒服啦 ~ 

今朝又係食奶醬多   但多奶醬   食完超滿足呀 ~

番到菇場忙到震   最憎啲人唔問清楚就叫人改   改完先問客   問完客又要我再改   煩到震   點解唔搞清楚先叫人做呢 ~

晏晝同媽咪飲茶   唔知點解覺得飲茶係特別滯咁 ~

是日晚餐 - 健康炒飯 + 冬蟲草花膠響螺燉湯 + 蕃薯糖水

健康炒飯 - 材料有急凍蝦   叉燒粒 + 蔥粒 + 3 條粟米 + 10 條豆角切粒粒   感覺上健康好多呢   炒埋出嚟一大碟   本來里奧大人話唔駛 Lunch Box 㗎   到最後都要 Lunch Box 呢   因為食唔哂呀 ~ 

冬蟲草花膠響螺燉湯 -  今次又係里奧大人燉㗎   材料有冬蟲草 + 花膠 + 響螺 + 肉眼 + 杞子 + 圓肉 + 薑   有湯飲真係好呢 ~ 

蕃薯糖水 - 條蕃薯擺咗幾日㗎喇   估唔到仲好好味喎 ~

今晚又去跑步   唔駛點行都一身汗呀   不過好在有啲風都幾舒服   如果唔係就好想唔跑   快快番屋企沖涼架喇 ~

住家飯 @ 姑奶屋企 (官塘) ( 20-JAN-2010 )

蒸魚 / 蒜蓉炒豆苗 / 蝦毛炒蛋 / 蕃茄魚湯

( 20-JAN-2010  WED )

今朝天氣勁似回南天   周身唔舒服咁呢  最怕呢啲天氣呢 ~  

早餐諗住去 KFC   點知多人到爆   所以即轉場去麥記食早餐算喇 ~  

尋晚瞓得勁唔好   所以勁眼瞓   做乜都無心機呀 ~

晏晝同 8 掛同事食   點知我碗麵又漏單喎  佢食完哂先嚟喎   搞到我都唔好意思慢慢食    佢個樣又周圍望   好似好想快走咁   最怕係咁 ~

今日里奧大人幫姑奶間房髹油漆    所以順便食埋晚飯 lu ~

我成日覺得食菜同魚都唔夠飽咁   所以今餐唔係咁飽   番到屋企食零食   里奧大人見到居然指住我對腳   心諗以為佢話唔好獨食  比啲佢食   點知佢話:  妳睇    妳睇下妳隻豬腿"   又會咁講人 ~

半肥瘦叉燒 + XO 醬炒脆肉瓜 ( 19-JAN-2010 )

( 19-JAN-2010  TUE )

呢日暖咗啲   人都舒服啲   食早餐都食得開心啲呢 ~

番到菇場一陣就聽到後面同事剪指甲   仲要剪哂所有指甲   必必啪啪咁好核突囉   呢啲嘢番屋企做嘛   次次都係咁 ~

晏晝想食米粉 + 粉果   點知無喎   所以買炒烏冬 + 魚肉燒賣   兩樣都唔夠熱   超難食   好在要咗多豉油同辣椒油   唔係食唔落呀 ~ 

里奧大人今日見工   咁啱見完嘅時候就同我放工時間差唔多   所以接埋我一齊番屋企呢 ~

是日懶餐 - 半肥瘦叉燒 + XO 醬炒脆肉瓜半肥瘦叉燒 - 

今次買咗 $ 20 五花腩   仲醃咗兩晚   相當入味呢   不過唔知點解成日都無出街嗰啲咁深色嘅   已經落咗老抽㗎啦   仲諗住醃咗兩晚會深色啲添 ~  

XO 醬炒脆肉瓜 - 終於用哂樽 XO 醬喇 如釋重負呀 ~

無啦啦腳痛   所以無出街跑步   改為喺屋企做家務算 lu ~

三色椒照燒豬扒 + 麻油皮蛋 ( 18-JAN-2010 )

( 18-JAN-2010  MON )

最眼瞓就係星期一   好在陽光普照   再食埋個早餐   個人都即刻精神番哂呢 ~

番到菇場又要 Pack 箱   力的表現   好在同 Partner 快快手就搞掂   唔係食完 Lunch 又 Pack 仲煩  

我鍾意做嘢係一氣呵成嘛 ~

同 8 卦去海皇食粥   食到熱辣辣   番到菇場勁眼瞓呀 ~

今晚煮飯啦   因為前一日買好哂嘢嘛 ~ 

是日懶餐 - 三色椒照燒豬扒 + 麻油皮蛋

三色椒照燒豬扒 - 加埋紫洋蔥同脆肉瓜一齊炒   再加照燒汁同黑椒   超惹味呀   見里奧大人食飯食得好開心咁   我都覺得切嘢雖然幾煩   但都值得呢 ~

麻油皮蛋 - 突然好想食皮蛋   加咗麻油好好味 ~

今晚又同里奧大人一齊跑步   希望 Keep 住跑啦   做運動身體好嘛 ~ 

冬蟲草花膠響螺燉雞湯 + Brownies ( 17-JAN-2010 )

( 17-JAN-2010  SUN )

今朝食完早餐就番教會 lu   之後去惠康買埋罐頭同雞湯   好在依家一定會有環保袋跟身   咁隨時買嘢都好方便啦 ~

番到屋企   里奧大人又好主動燉湯比我飲   所以 3 點鐘先可以食 Tea 呀 ~

睇陣報紙   又醒起朱古力差唔多到期   所以拿拿林焗 Brownies   今次用咗 220g 黑朱古力   同埋加咗多啲杏仁一齊焗   食落好有口感同埋超濃郁朱古力味呀   超滿足呢 ~

差唔多 7 點就燉好啲湯   飲完食埋湯渣真係好飽   所以里奧大人話唔好煮飯   好在我只係醃咗豬扒   可以留番啫 ~

同里奧大人一齊去公園跑步   番到屋企又覺餓喎   所以淥即食河粉 + Jagabee 就算   而里奧大人就堅持自己淥辛辣麵   無問題啦   最緊要唔好要我煮就得喇 ~

清真牛肉館 @ 九龍城 ( 16-JAN-2010 )

( 16-JAN-2010  SAT )

呢日係老闆 Off   所以我可以慢條斯理嘆早餐   爽呀 ~

好在食咗丁丁啫   因為估唔到阿頭 Send Email 要我同 Partner 一齊 Pack 箱   因為 20 號有搬運公司嚟搬嘢   所以早少少執嘢囉   好在 12 點半執哂   可以抖陣就放工 lu ~

同里奧大人出旺角掃街   食完再去買麵粉   買防曬   再買 For 電髮嘅風筒   行旺角真係好鬼迫   真係無必要係唔去呢 ~

買哂嘢就殺入九龍城   頭先掃街好熱氣   所以食啲糖水潤下先   食完心理上真係覺得無咁熱氣 ~

諗住買啲泰國嘢食   不過又唔啱心水   所以周圍行下   去咗新三陽買啲醬料   之後去買台灣店買啲嘢   再行前少少又見到南貨舖好多嘢買   又買咗啲嘢   估唔到一條街就可以買哂自己想買嘅嘢呢   唔錯唔錯 ~

難得嚟到九龍城   本來想食泰國菜   但 5 點幾又未餓喎   所以我提議去清真牛肉館食牛肉餅   不過等牛肉餅都等咗 20 分鐘呢 ~

行飽食飽就番屋企 lu   今晚 "的起心肝" 跑步   我去公園跑   里奧大人就 Join 運動會   各有各做   我唔 Join 會啦   因為平時放工夜晚會好趕   好怕趕頭趕命做一件事   我情願他他條條喺公園跑步仲好呀   如果落雨就行商場或者喺屋企做運動又得喎   唔駛受時間限制嘛 ~

煎釀孖寶 + 蕃薯糖水湯丸 ( 15-JAN-2010 )

( 16-JAN-2010  FRI )

Happy Friday 當然 Happy 啦   食埋甜甜哋嘅早餐就仲更加 Happy 呀 ~

菇場仍然忙   但唔緊要   因為諗起 Lunch 同里奧大人同媽咪一齊食就開心啦 ~ 

同得媽咪 Lunch   首選係飲茶   今次為咗就里奧大人   所以去美心皇宮飲茶喇 ~

食到好飽行番菇場   好小有咁嘅感覺 lu ~

放工坐巴士好小瞓覺   除非好攰   同埋好嘈就會聽 MP3   又或者突然好想聽歌   尋晚聽 MP3 時   坐我隔離個麻甩佬好大聲打喊露 "鴉" 一聲咁好長又好響   前面啲人都望佢   以為佢黐線呀   無啦啦咁大聲 "鴉" 喎   之後無幾耐又再嚟多次   又係咁大聲   無啲禮貌   又唔掩住個口喎   屋企咩   最憎呢啲人   令人反胃呀 ~

去到街市買餸   問阿姐有無尖椒   佢就咁指去另一邊   黐黐地線   成堆嘢都無   有就唔駛問啦   正想開口話佢都唔知妳指邊   咁啱有另一個阿姐問我要啲乜   如果唔係實話鬼佢呀 ~

是日晚餐 -  煎釀孖寶 + 蕃薯糖水湯丸

煎釀孖寶 - 唔想成日得尖椒一樣好悶咁   試下整豆卜   不過釀嘢真係好花時間   下次都係釀一樣算喇 ~

蕃薯糖水湯丸 - 好想食勁薑糖水   所以整蕃薯糖水 + 無餡湯丸呢   食完超滿足呀 ~

住家飯 @ 媽咪屋企 ( 14-JAN-2010 )

豉油王蝦碌 / 黑椒牛仔骨 / 海參魚肚腐竹燜鴨掌 / 炒菜 / 花膠杞子瘦肉竹絲雞湯

( 14-JAN-2010  THU )

今朝早咗   可以去麥記食煙肉蛋漢堡 + 奶茶   其實我麻麻地鍾意食薯餅   覺得好油同好飽肚   所以依家出咗無薯餅嘅餐就最啱我呢 ~

好在食飽有氣有力咋   因為番到菇場忙到震呀 ~ 

Lunch 食泡菜米粉 + 雞尾包   熱辣辣嘅雞尾包真係好好味呢   不過就好肥囉 ~ 

晏晝仲係忙   所以時間過得特別快 ~

好在今晚番媽咪屋企食飯   唔駛諗唔駛煮就最好啦 ~ 

今次又買 Cake 番屋企當飯後甜品   食完飯已經好飽   媽咪同里奧大人食咗少少咋   所以我同家

姐又食到反肚呀 ~

綠茶蛋糕 / 栗子黑森林蛋糕 / 藍啤梨芝士撻

又收到零食物語 SMS   憑短訊買滿 $50 就可以當 $10   咁即係有 8 折啦   所以又買咗 2 盒 Jagabee   因為折實咗就好抵呢 ~

A 貨土匪雞翼 + XO 醬西蘭花炒帶子 + 豬腳薑醋 ( 13-JAN-2010 )

( 13-JAN-2010  WED )

今朝好凍呀   要帶番條真正頸巾先可以保暖呀   裝飾嗰啲唔夠暖㗎 ~ 

早餐食芝菇治烘底   呢朝好餓   所以覺得好好味呀 ~

Lunch Time 出去商場行陣先買嘢食   點知番到菇場已經 1 點 15 分   食到好趕呢 ~

呢晚里奧大人陪我一齊去街市買餸   因為要買生果   好重嘛   唔幫手唔得 ~   

是日晚餐 - A 貨土匪雞翼 + XO 醬西蘭花炒帶子 + 豬腳薑醋

A 貨土匪雞翼 - 估唔到大埔墟街市有得賣孜然粉   $4/包   平平哋細細包買番屋企玩下   但一定要再用個膠袋入住   因為一大陣濃烈嘅 "加拿大" 味呀   今次加埋芝麻一齊焗   好香呀   又辣辣哋   好味呀   里奧大人話今次係有史以嚟最好食嘅雞翼喎 ~

XO 醬西蘭花炒帶子 - 尋晚食整嘅西蘭花   加埋 XO 醬同帶子   咁就覺得食多晚西蘭花都唔覺悶啦 ~

豬腳薑醋 - 天氣凍嘛   食啲薑暖身   夜晚真係會熱醒㗎 ~

食完散步再行超市   估唔到咁快已經放哂賀年禮品   放到一層層好高   真係好想一腳踢跌哂佢落地   肯定好好玩呀 ~

臘腸蒸排骨 + 西蘭花 + 冬蟲草燉雞湯 + 薑茶小丸子 ( 12-JAN-2010 )

( 12-JAN-2010  TUE )

呢朝勁想食甜嘢 + 飲凍嘢   所以就食咗奶醬多 + 凍咖啡   食完好開心呀 ~

雖然呢排好凍   但又唔覺特別好瞓喎   只係特別唔想起身啫 ~ 

菇場唔係太忙   但又有嘢做   做下停下咁   所以上網都無乜心機   唔鍾意下下睇緊又停下咁囉 ~

 
媽咪屋企油油   所以同媽咪飲茶   都唔知食乜好   太多選擇反而仲慘   但無咁多嘢揀又覺得無嘢食喎 ~

一到 3 點幾就勁眼瞓   所以覺得一到 4 點半就會好開心呢   代表就快收工嘛   但又唔知點解 4 點半開始又覺得私人時間唔夠用喎 ~  

是日懶餐 - 臘腸蒸排骨 + 西蘭花 + 冬蟲草燉雞湯 + 薑茶小丸子

臘腸蒸排骨 - 懶餐首選   里奧大人又有 Lunch Box 喎   唔錯唔錯 ~  

西蘭花 - $8 有兩大個西蘭花   抵呀   西蘭花有益   食多啲都唔驚   不過今餐只食咗 1 個   因為個西蘭花都好大呀 ~ 

冬蟲草燉雞湯 - 里奧大人主動話燉㗎   超感動呀   仲燉咗 4 個幾鐘   超好飲呀 ~

薑茶小丸子 - 勁想食煙韌嘢   所以又搓嚟食   不過只用即沖薑茶   懶得又洗又切又要煲呀   今晚搓多十幾粒放冰格   咁想幾時食都無問題 lu ~ 

上次喺大澳買咗樽麥芽糖   所以又整麥芽糖夾餅   啲麥芽糖唔係太甜   啲梳打餅又脆卜卜   勁好味呀 ~

雲桂香米線專門店 @ 大埔 ( 11-JAN-2010 )

( 11-JAN-2010  MON )

尋晚夜瞓   加上今朝又凍咗咁喎   所以真係好唔願起身番工呀 ~ 

又落毛毛雨   預咗塞車   好在唔係太塞咋   如果唔係又要急急趕趕咁食早餐 ~

菇場就嚟搬   所以啲人係咁掉嘢   係咁撕嘢   最怕聽到撕紙嘅聲   好鬼嘈呀 ~ 

Lunch Time 仲未餓   所以行咗陣超市先買嘢食番菇場慢慢嘆 ~

今晚去屋企附近電髮   第一次喺屋企附近電髮   其實都好驚效果唔滿意   所以無期望   估唔到真係有驚喜呢   唔錯唔錯   最搞笑係里奧大人接我嘅時候   望到幫我電髮嘅髮型師   原來就係平時幫佢剪開嗰個喎   因為我無指定髮型師   好在無講里奧大人壞話啫   今次埋單 $680   其實我覺得貴   因為我表妹實在收得我好平呢 ~  

今次又去食雲桂香食米線   又係好失望   小辣一啲辣都無嘅   但上次中辣又辣到胃痛   都唔知想點咁   求求其其就唔好比人揀大中小辣嘛   不過我會比多次機會佢呢 ~

田中日本料理 + B 仔涼粉 @ 元朗 ( 10-JAN-2010 )

( 10-JAN-2010  SUN )

今朝要 9 點半起身喇   因為約咗家姐去側魚涌睇戲呀 ~

去到差唔多 11 點半   超餓呀   去 Food Republic   開餐算喇 ~

泰式炒粉皮 / 炸蝦餅 / 冬蔭功湯 / 八方雲集嘅招牌餃子 / 台灣肉燥蚵仔煎飯 / 鰭魚丸紫菜湯

今次去 MCL 康怡睇 "阿凡達"   最鍾意一路睇戲一路食爆谷   3 個人食 1 Set 大汽水 + 大爆谷   只係 $36   超抵呀   我哋係睇 12 點 50 分   散場係 2 點 35 分   真係坐到腰骨痛呀   同埋帶住副 3D 鏡睇好辛苦   副鏡好重   所以睇完個鼻實有紅印呢   好在呢套戲超級好睇   無悶場呀   所以 2 個幾鐘好快過呢 ~

睇完入元朗呀   幫家姐屋企影相   佢要搬嘛   又鍾意間屋喎   所以幫佢影相留念   諗住影完再出嚟食嘢   點知里奧大人話好餓   所以要食嘢先喎   我哋 5 點半開餐   6 點 15 分就要還枱   雖然 45 分鐘比較趕   但我都無所謂   因為平時 Lunch 都係用咁嘅時間就食完嘛 ~ 

估唔到個雜錦壽司咁巨   真係食到反肚   但次次食完壽司都好口渴   所以我提議去 B 仔涼粉   家姐事先聲明話 B 仔涼粉好巨   我話無問題   3 個人食嘛   同埋生果呢   無問題喎   點知一嚟度真係嚇暈   巨到呢   好在最後傾外食下   好辛苦咁先食得哂咋 ~

食完就去家姐屋企 lu   家姐要搬啦   所以今次特登叫里奧大人幫家姐間屋影相   留為記念嘛   影下傾下差唔多 9 點半就走 lu ~

甜麵醬蒸鯇魚 + 蕃茄薯仔魚湯 ( 9-JAN-2010 )

( 9-JAN-2010  SAT )

星期六喇   可以遲啲起身   因為多數無乜人搭車   車程好順   同埋菇場好多人都會遲少少番   我都唔例外呢   呵呵 ~

諗住可以 Hea   點知忙到爆   但啲時間過得勁快囉 ~

好感恩呀   趕到班車   唔駛等咁耐先番到屋企   因為次次星期六都要等好耐車   同埋我估里奧大人都好心急見到我呢   哈哈 ~

同里奧大人又 Tea 啦   食完行陣買餸   街市啲阿姐真係好鬼勁   大聲到呢   就算普通傾偈都好大聲   我買蕃茄嘅時候   買蕃茄嘅地方好迫好細   阿姐企喺我隔離同啲熟客傾   把聲向住我耳邊喎   初初兩三句都忍到佢雄厚嘅聲量   但佢越講越興奮   我叫佢唔該唔好咁大聲講嘢啦   佢後尾行出去傾   我買完之後覺得耳仔痛添呀 ~

買完餸快快腳番屋企   因為想 Hea 下先番教會呀 ~ 

是日懶餐 - 甜麵醬蒸鯇魚 + 蕃茄薯仔魚湯

甜麵醬蒸鯇魚 - 條魚好大件   我又懶開火   夾硬放喺電飯煲蒸   點知中間唔熟喎   要再開火蒸過   仲更加浪費時間   激氣呀 ~

蕃茄薯仔魚湯 - 好想飲呢個湯   我覺得用大眼雞魚會甜啲   但呢期啲蕃茄好似唔多甜咁   如果唔係更滿足呢 ~

住家飯 @ 媽咪屋企 ( 8-JAN-2010 )

煎鯧魚 / 蝦仁炒蛋 / 咖哩薯仔牛筋腩 / 豆苗 / 白菜 / 法包 (外賣) / 牛蒡響螺頭當參瑤柱圓肉杞子淮山玉竹瘦肉湯  

( 8-JAN-2010  FRI )

終於 Happy Friday 喇   真係好開心   如果日日番到都用迎接 Happy Friday 嘅心情就好喇   無咁苦悶嘛 ~

早餐去麥當勞   因為想飲即磨咖啡   想飲咖啡嘅時候就覺得咖啡好香   唔想飲嘅時候會聞到都好想反胃   所以想飲就要即刻飲呢   其實去麥當勞食嘢真係幾好   因為可以儲嘟嘟嘅積分   雖然係儲嘅銀碼極少   但積少成多嘛   不過麥當勞又唔可以成日食   Junk Food 無益嘛 ~

次次食完麥當勞都好漏   所以晏晝多數買啲唔好咁飽嘅嘢   今次買炒米粉   得少少菜咋   好孤寒呢 ~

2 點同其他同事一齊出發去新菇場地址   環境都唔錯喎   大好多呢   好在我都有巴士去到公司附近   唔係都幾煩呢 ~ 

差唔多 3 點半番到菇場   忙到呢   真係想抖下都唔得呀 ~ 

今晚去媽咪屋企食飯好開心   唔知點解   嫁咗番娘家食飯嘅感覺特別開心㗎 ~

依家零食物語會員   每月嘅 8 號有 8 折   所以又走去睇睇   有啲特價再有 8 折   真係好抵 ~

京都宴會廳 @ 大埔 ( 7-JAN-2010 )

( 7-JAN-2010  THU )

呢朝又好似凍咗   但屋企又好鬼暖   又沖完熱水涼   所以次次一出大堂門口就凍到震呀 ~ 

早餐明明話要牛扒腸仔走包   點知無啦啦又整咗個牛扒餐喎   不過趕時間   唔再換啦   但火腿同蛋就真係食唔落囉   因為無諗過食咁多嘢   好浪費呀 ~

尋晚食完辣嘢   搞到肚屙又胃痛喎   辛苦到震呀又   Lunch 又懶出街   所以食泡菜米粉   唔知點解啲米粉係煙韌   唔似米粉口感喎   又係辣到震   食咗 1/3 食唔落喇   又浪費哂 ~   

唔多舒服搞到到成個人都無心機   但無啦啦又忙喎   真係人都顛呀 ~

放工落毛毛雨更加凍呀   所以里奧大人想打邊爐   佢一凍就好想打邊爐   所以我一定陪佢呢 ~ 

一百蚊一位   任飲任食抵啦   不過我哋食得唔係好多   但算啦   酒樓打邊爐好過大家樂打邊爐嘅   感覺唔同啲咁㗎   但唔識講點唔同囉 ~ 

飽到震   行一大個圈先番屋企幫助消化呀 ~  

雲桂香米線專門店 @ 大埔 ( 6-JAN-2010 )

( 6-JAN-2010  WED )

今朝番工啦   不過又係瞓得唔好   超辛苦呀   都費事去食早餐   買個菠蘿包做早午餐算喇   橫掂無胃口 ~

眼瞓到呢   一路中到 Lunch Time   真係一伏喺枱就即刻瞓得着   瞓完舒服好多呀 ~ 

放工即走喇   同里奧大人去雲桂香食米線   今次試中辣   食嘅時候以為自己無事   點知番到屋企無耐就胃痛 ~

大家樂 @ 大埔 ( 4-JAN-2010 ) + ( 5-JAN-2010 )

( 4-JAN-2010  MON )

假期之後第一日番工   無可能精神啦 ~  

早餐去 KFC   買 2 個鬆餅 + 熱奶茶都係 $10   不過鬆餅好漏   食一個已經好夠   所以留番一個做 Lunch 喇 ~ 

菇場靜英英   邊有 Mood 做嘢喎   之前做 Garment 就嘈到好似街市   依家菇場又靜過籠   真係好極端   但我都係鍾意唔好咁靜   因為太靜又無嘢做好易眼瞓呢 ~ 

終於 Lunch Time   勁想食熱嘢   所以買火腿通粉   不過買完又唔想食喎   食剩一大半真係食唔落    但又好想食甜嘢   所以又食埋個鬆餅喇   我鍾意又甜又鹹   又鹹又甜咁㗎 ~

呢晚唔煮喇   好攰呀   同里奧大人去大家樂開餐算 lu ~ 

( 5-JAN-2010 TUE )

今朝每月一到呀   所以請病假休息   其實唔係好痛   不過就瞓得唔好   個人超攰   所以喺屋企抖抖咁囉 ~    

蕃茄海鮮長通粉 + 炸腰果 ( 3-JAN-2010 )

( 3-JAN-2010  SUN )

瞓到 10 點起身梳洗   食完早餐就番教會喇   今朝好熱咁   呢排啲天氣真係好玩人   幾日凍幾日熱咁   真係身體差啲都好易病呀 ~

番完教會就行 Jusco   又有 9 折   不過有啲特價再 9 折又真係好抵嘅 ~ 

抖到 2 點幾又食 Tea   見到屋企附近開咗間雲桂香米線 (前名雲南桂林過橋米線)   所以又試下   希望多過選擇   但唔好味囉    明明要小辣   一啲都唔辣   我覺得係無加辣囉   離譜呀   都係唔好喺啱啱開張就嚟試   因為多數錯漏百出呢 ~

見到啲油就嚟黎到期   所以就買啲腰果番屋企炸   好在我分兩次炸啫   因為第一次炸燶咗呀   睇錯嘢  小火當中火   所以唔駛 5 分鐘就已經燶哂 lu   第二次就 Very Good 啦   睇清睇楚唔好心急   炸嘢其實真係幾煩 ~

是日懶餐 - 蕃茄海鮮長通粉

蕃茄海鮮長通粉 - 同里奧大人講話海鮮   嚇到佢問乜海鮮   因為之前買嘅海鮮包得魷魚   蟹柳同幾隻蝦毛   佢最怕食魷魚   我話唔駛驚   唔係之前買嗰啲   係急凍鯰魚柳同蝦啫   煮蕃茄汁嘅時候   先知道茄汁過咗期   好彩買咗兩個蕃茄   同埋屋企有茄膏   如果唔係又要落街買浪費哂啲時間呢 ~  

煙三文魚 - 里奧大人鍾意食嘛   又可以當一個餸   唔錯唔錯 ~

南丫島一日遊 + 鮮蝦雲吞米粉 + 唐生菜 ( 2-JAN-2010 )

( 2-JAN-2010  SAT )

呢日 Off 呀   所以連放 3 日假期超開心呀   呢日同里奧大人去完大家樂食早餐就出發去南丫島 lu ~

今次里奧大人睇埋上船班次  咁就可以唔駛浪費時間等船喇    點知里奧大人睇咗假期嘅班次   假期係半個鐘一班   平日係一小時一班   因為佢唔記得我星期六係 Off    以為係假期呀   計錯時間要等 45 分鐘先上得船   所以周圍行下   同埋好在 12 點半開閘   可以入去坐嚟等開船 ~

今日好大霧同好大浪   坐船 "浪" 下 "浪" 下真係好舒服   入到南丫島里奧大人又即刻睇 Map  睇離地方唔係好大   所以又係隨緣周圍行啦 ~

唔知係咪天氣影響   覺得好攰咁   可能感覺無乜嘢睇   所以有啲悶   又唔多想影相   邊行邊睇算數 ~ 

去到見到啲鹹濕嘢   所以買幾包試下   好味就買多啲番屋企食喇 ~

行去每間舖頭睇嘢   真係唔可以多留 1 分鐘   因為間間舖頭都無開冷氣   焗到呢   又一陣味咁喎   行咗幾間舖頭唔再行啦   焗完出嚟好攰   超辛苦呀 ~

南丫島好細   所以無乜地方好行 + 好影   見到有間食 Pizza 好似唔錯   所以就開餐   食飽再行過 ~

間餐廳門面麻麻哋   但啲嘢食又好味噃   簡直係抵食夾大件呀   我哋坐細嘅四方枱   兩碟嘢已經霸哂成張枱 lu   不過正因為份量太多   根本無可能食得哂 ~

Chicken Shish Kebab (烤雞串燒卡巴)  with Pitta Bread (比得包) & Turkish Green Salad (土耳其沙律)
Pepperoni 香辣肉腸薄餅 - Pepperoni (辣肉腸) / Green Pepper (青椒) / Cheeese (芝士) / Tomato (蕃茄)

食完再睇索古灣條路行   見到有亞婆豆腐花   唔知點解好多地方都有檔亞婆豆腐花㗎喎   睇 Blog 話好好食   所以買嚟試下   估唔到好滑好好味喎   明明諗住行路幫助消化   點知又忍唔住口食呢 ~

食到好滯   超辛苦    加上天暗暗   超眼瞓   根本無原動力再周圍行   連索古灣同風力發電站都無行就走 lu 其實好想行㗎   不過尋日做家務做到腰骨痛   里奧大人話嚟係想我 Relax   唔想係辛苦   所以再周圍影下相   食埋乳酪雪條就走 lu ~

個巨 P 食到我哋好滯   加上 6 點幾番到屋企又未餓   所以我都係煮雲吞米粉算喇   咁幾時食都得嘛 ~

 
是日懶餐 - 鮮蝦雲吞米粉 & 唐生菜

鮮蝦雲吞米粉 - $12/6 隻   大大粒唔錯㗎 ~  

唐生菜 - 最鍾意淥唐生菜   快熟嘛   唔駛好似菜心咁煩   又要摘花又要切   又要浸好耐喎 ~ 

食完沖涼抖陣又睇碟   租咗隻 "District 9"   我哋有時會睇舖頭播嘅片頭   如果好睇就會租    點知就出事   套戲完全唔合邏輯   雖則做戲   但都唔係咁囉   真係好後悔租呢套戲呀 ~

釀尖椒 + 鯊魚骨姬松茸滋補湯 + 綠茶果凍 ( 1-JAN-2010 )

( 1-JAN-2010  FRI )

2010 年 第 1 日   有得放假喎   當然勁開心啦    瞓到 10 點半自然醒   瞓夠所以心情特別好   所以好開心咁同里奧大人去食早餐喇 ~

里奧大人問我想去邊   但我真係無乜邊度想去   想抖下   同埋執屋囉   里奧大人有此賢妻真係有福氣呀 ~

食完早餐有氣有力   所以就做啲勞動力比較大嘅家務   就係執衣櫃   唔好睇少以為好簡單呀    因為執起上嚟都幾辛苦㗎   要分類嘛   番工衫   出街衫   瞓覺衫   今次又執到一大袋唔要嘅衫捐比人就最好   唔會浪費 ~ 

執到忘形   里奧大人話食 Tea 先知原來已經 2 點 45 分 lu   拿拿聲走喇   因為唔想咁晏食 Tea   之後又要晏食晚飯喇 ~  

今次去椰林閣食 Tea 有 Coupon 嘛   慳唔少呢   不過味道就真係麻麻   服務態度又差   都係嗰句   唔係有 Coupon 嘅話   係絕對唔會去呢 ~

食完買餸   之後番屋企再執   又夠時間煮晚飯 lu ~

是日懶餐 - 釀尖椒 + 鯊魚骨姬松茸滋補湯 + 綠茶果凍

釀尖椒 - 想食好多日架喇   但次次想食都無得買尖椒   今日見到即買   不過唔辣嘅   真係好難睇邊啲辣邊啲唔辣呀 ~

鯊魚骨姬松茸滋補湯 - 湯包嚟㗎   再加 $10 瘦肉同 3 隻螺頭就夠哂甜啦 ~ 

綠茶果凍-  1 月 9 日到期日   非食不可   今次無加椰果就無咁甜   都好好味呢 ~